ᓲᓗᒨᓂᐅᑉ ᐅᖃᓪᓚᖕᓂᖏᑦ 21 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᖓᔪᖅᑳᕐᔪᐊᑉ ᐆᒻᒪᑎᖓᑕ ᐃᒥᕐᒥᒃ ᑰᖕᓂᖓ ᐊᑕᓂᐅᑉ ᐊᒡᒐᖏᓐᓃᑉᐳᖅ, ᑰᖕᓂᖓ ᓇᒧᑐᐃᓐᓇᖅ ᓵᑎᖃᑦᑕᕈᓐᓇᕐᐹ ᐃᓱᒪᒥᓂᒃ.

² ᐃᓅᑉ ᐊᑐᕐᑕᓕᒫᓂ ᓈᒻᒪᒐᓱᒋᕔᑦ ᑕᐅᑐᒃᑕᒥᒍᑦ, ᐊᑕᓂᐅᓪᓕ ᐆᒻᒪᑎᖏᑎᒍᑦ ᖃᐅᔨᓴᕐᐰᑦ.

³ ᐃᓱᐊᕐᑐᓂᒃ ᓈᒻᒪᑦᓯᐊᕐᑐᓂᒡᓗ ᐱᓇᓱᐊᕐᓂᖅ ᓈᒻᒪᒋᔭᐅᓂᕐᓴᐅᕗᖅ ᐊᑕᓂᕐᒧᑦ, ᑐᓂᕐᕈᑎᓂᑦ ᐆᑕᒃᓴᓂᑦ ᑐᓂᓯᓂᕐᒥᑦ.

⁴ ᐱᔪᓐᓇᕋᓱᒋᓂᖅ ᐆᒻᒪᑎᒃᑯᓪᓗ ᐱᐅᔪᕆᓂᖅ, ᐱᐅᖏᑦᑐᓕᔪᑦ ᐱᓇᓱᐊᒐᒃᓴᓕᐊᖏᑦ, ᐊᔪᕐᑐᓕᓂᐅᕗᑦ.

⁵ ᑲᔪᖏᕐᓂᖃᑦᓯᐊᕐᓗᑎᒃ ᐱᓂᐊᕈᒪᔭᒥᓂᒃ ᐋᖅᑭᒃᓱᐃᕙᒃᑐᑦ ᐊᔪᕐᓴᕐᓂᐊᓐᖏᓚᑦ, ᑐᐊᕕᕐᓗᑎᒃ ᐱᓂᐊᕈᒪᔭᒥᓂᒃ ᐋᖅᑭᒃᓱᐃᔪᑦ ᐊᔪᕐᓴᓕᕐᓂᐊᕐᐳᑦ.

⁶ ᓴᓗᕿᑦᓯᓂᒃᑯᑦ ᐱᐅᔪᓂᒃ ᐱᑖᕐᑐᕐᓂᖅ ᐊᔪᕐᓴᓕᑦᓴᐅᑎᒋᑦᔪᑎᒃᓴᐅᕗᖅ ᑐᖁᒦᑦᔪᑎᒃᓴᐅᓪᓗᓂᓗ.

⁷ ᑲᑉᐱᐊᓱᒃᑎᑦᓯᓂᕐᒥᒃ ᐱᐅᖏᑦᑐᓕᔪᑦ ᓴᓂᕐᑎᑐᑦ ᐊᒡᕖᕐᑎᓐᓂᐊᕐᐰᑦ, ᐱᐅᔪᒥᒃ ᓈᒻᒪᒃᑐᒥᒃ ᐱᓇᓱᐊᕈᒪᖏᒻᒪᑕ.

⁸ ᐸᓯᔭᒃᓴᐅᓂᕐᒥᒃ ᐃᓕᖅᑯᓯᓖᑦ ᐊᖅᑯᑎᖏᑦ ᑐᑭᓕᐊᓐᖏᓚᑦ, ᐸᓯᔭᒃᓴᐅᓂᖃᖏᑦᑐᓪᓕ ᐱᓂᐊᕐᓂᖏᑦ ᐃᓱᐊᕐᑑᕗᑦ.

⁹ ᐱᐅᓂᕐᓴᐅᕗᖅ ᐃᒡᓘᑉ ᖁᓛᖓᑕ ᑎᕆᖅᑯᐊᓂ ᐃᓂᖃᕐᓗᓂ, ᐂᕙᑐᔪᒥᒃ ᓄᓕᐊᖃᕐᓂᕐᒥᑦ.

¹⁰ ᐱᐅᖏᑦᑑᑉ ᑕᕐᓂᖓ ᐱᐅᖏᑦᑐᓕᐅᕈᒪᔪᒥᒃ ᐃᓱᒪᖃᕐᐳᖅ, ᐃᓅᖃᑎᒥᓄᑦ ᓇᒡᓕᒋᔭᐅᓕᕈᓐᓇᓐᖏᓚᖅ.

¹¹ ᒥᑕᐅᑎᒃᓴᕐᑐᖅ ᓱᒋᐊᕐᑕᐅᔭᕌᖓᑦ, ᓯᓔᑦᑐᖅ ᓯᓚᑦᑐᕐᐹᓪᓕᓲᖑᕗᖅ; ᓯᓚᑐᔪᕐᓕ ᐅᖃᐅᑦᔪᕐᑕᐅᒍᓂ ᖃᐅᔨᑎᑕᐅᓂᕐᒥᒃ ᐱᑖᕈᓐᓇᕐᐳᖅ.

¹² ᒎᑎ ᐃᓱᐊᕐᑑᒐᒥ ᓯᓚᑐᓂᕐᒥᓄᑦ ᐱᐅᖏᑦᑑᑉ ᓇᔪᕐᑕᖓ ᖃᐅᔨᓴᕐᐹ, ᐱᐅᖏᑦᑑᓪᓗ ᐱᓂᐊᕐᓂᖏᑦ ᐊᓯᕈᕐᑕᐅᑎᑉᐰᑦ.

¹³ ᐊᔪᕐᓴᕐᑐᑦ ᕿᓄᓂᖏᓐᓂᒃ ᑐᓴᕐᑍᓕᒪᔪᖅ, ᕿᓄᓇᓱᐊᓕᕋᓗᐊᕐᐸᑦ ᑐᓴᕐᑕᐅᓂᐊᓐᖏᓚᖅ.

¹⁴ ᓂᓐᖓᐅᒪᔪᖅ ᑐᓂᔭᐅᒍᓂ ᖃᐅᔨᑎᑕᐅᖏᓪᓗᓂ ᓮᒻᒪᕈᑎᒋᔪᓐᓇᕐᐹ, ᐃᓚᓐᓂᕐᓴᐅᑎᒥᒃ ᑐᓂᓯᓂᖅ ᓮᒻᒪᕐᑎᑦᓯᔪᓐᓇᕆᕗᖅ ᓂᓐᖓᕐᔪᐊᕐᓯᒪᔪᒥᒃ.

¹⁵ ᐃᓱᐊᕐᑐᓄᑦ ᖁᕕᐊᓇᕐᐳᖅ ᓈᒻᒪᑦᓯᐊᕐᑐᒥᒃ ᐱᓇᓱᐊᕐᓂᖃᕆᐊᒥᒃ, ᐱᐅᖏᑦᑐᒥᒡᓕ ᐱᓇᓱᐊᕐᑐᑦ ᖁᕕᐊᓇᕐᑐᒧᑦ ᑎᑭᑕᐅᔪᓐᓇᓐᖏᓚᖅ.

¹⁶ ᐃᓄᒃ ᑐᑭᓯᓂᖃᕐᑎᑕᐅᓂᕐᒥᒃ ᕿᒪᕉᑎᔪᖅ, ᐃᓂᒃᓴᖃᕐᓂᐊᕐᐳᖅ ᑐᖁᖓᔪᑦ ᐃᓂᖓᓂ.

¹⁷ ᖁᕕᐊᒋᔭᑐᐃᓐᓇᕐᒥᓂᒃ ᐊᑐᕈᒪᔪᖅ ᐊᔪᕐᓴᓕᕐᓂᐊᕐᐳᖅ, ᕔᓂᒥᒃ ᐅᕐᓱᒥᒡᓗ ᐱᐅᒋᔭᑐᐊᖃᕐᑐᖅ ᐊᒃᓱᐃᓕᓂᐊᓐᖏᓚᖅ.

¹⁸ ᐱᐅᖏᑦᑐᑦ ᐊᑭᓕᕐᑕᐅᓂᐊᕐᐳᑦ ᐃᓱᐊᕐᑑᑉ ᐃᓅᑦᔪᑎᒃᓴᖓᓄᑦ, ᐅᒃᐱᕈᒪᖏᑦᑐᓪᓗ ᐊᑭᓕᐅᑕᐅᓗᑎᒃ ᓈᒻᒪᑦᓯᐊᕐᑐᓄᑦ.

¹⁹ ᓱᓇᖃᔪᐃᑦᑐᒥ ᐊᖏᕐᕋᖃᕐᓗᓂ ᐱᐅᓂᕐᓴᐅᕗᖅ, ᓄᓕᐊᖃᕐᓂᕐᒥᑦ ᓂᓐᖓᒃᓴᕅᑦᑐᒥᒃ ᐂᕙᓇᓱᐊᖏᓐᓇᕐᑐᒥᒡᓗ.

²⁰ ᓯᓚᑐᔪᑦ ᐃᒡᓗᖓᓂ ᖃᓄᐃᑦᑐᑐᐃᓐᓇᕐᓂᒃ ᐱᒃᑯᒥᓇᕐᑐᓂᒃ ᐅᕐᓱᒃᓴᓂᒡᓗ ᐱᑕᖃᕐᐳᖅ, ᓯᓔᑦᑐᓪᓕ ᑕᒤᓐᓂᒃ ᓄᖑᕈᑎᑲᐅᑎᒋᕚᒃᐳᑦ.

²¹ ᐃᓱᐊᕐᓂᕐᒥᒃ ᐱᑦᓯᐊᕐᓂᕐᒥᒡᓗ ᕿᓂᕐᑐᖅ ᐃᓅᓯᕐᒥᒃ ᓇᓂᓯᕗᖅ ᐅᐱᒋᔭᐅᓂᕐᒥᒡᓗ.

²² ᓯᓚᑐᔪᖅ ᐱᔪᓐᓇᕐᑐᕐᔪᐊᑉ ᐃᒡᓗᒐᓴᖏᓐᓂᒃ ᒪᔪᕋᕐᓗᒍ ᐃᑖᕈᓐᓇᕐᐹ, ᐊᕙᓗᕐᔪᐊᖏᓪᓗ ᐱᔭᐅᑦᔧᕐᓯᒪᑦᔪᑎᒋᓇᓱᒋᔭᖏᑦ ᓯᖁᑦᑎᕐᓂᐊᕐᐰᑦ.

²³ ᐅᖃᐅᓯᕐᒥᓂᒃ ᐅᖃᕐᒥᒡᓗ ᐃᒃᐱᒍᓱᑦᓯᐊᕐᑐᖅ, ᑕᕐᓂᕐᒥᓂᒃ ᓴᐳᑦᔨᓯᒪᕗᖅ ᖃᓄᐃᑕᐅᓐᓇᕐᑐᓂᑦ.

²⁴ ᐱᐅᔪᕆᔪᖅ ᐱᔪᓐᓇᕋᓱᒋᓗᐊᕐᑐᕐᓗ ᑍᔭᐅᕗᖅ, “ᒥᑕᐅᑎᒃᓴᕐᑎᒥᒃ” ᐱᓂᐊᕐᓂᖃᕐᒪᑦ ᐊᔪᖏᓐᓇᓱᒋᓂᕐᒥᒃ ᐱᐅᔪᕆᓂᕐᒥᒃ.

²⁵ ᐃᕿᐊᑦᑕᐅᑉ ᐃᓱᒪᒥᒍᑦ ᐱᔪᒪᓂᖓᑕ ᑐᖁᑎᑉᐹ, ᐊᒡᒐᖕᒥᓄᑦ ᐱᓇᓱᐊᕈᒪᓂᖃᖏᓐᓇᒥ.

²⁶ ᐅᓪᓗᓕᒫᖅ ᑐᓱᒋᔭᒥᓂᒃ ᐱᑦᓴᓚᐅᕈᓂ ᐃᓱᒪᕗᖅ, ᐃᓱᐊᕐᑐᓪᓕ ᑐᓂᓯᕗᑦ ᐊᓐᓂᕈᓱᒐᑎᒃ.

²⁷ ᐱᐅᖏᑦᑐᑦ ᑐᓂᕐᕈᑎᖏᑦ ᓇᕐᕈᓇᕐᐳᑦ, ᐱᐅᓐᖏᓗᐊᕆᕗᑦ ᐱᐅᖏᑦᑐᒥᒃ ᐱᓂᐊᕈᑎᒋᔪᒪᓗᓂᒋᑦ ᑐᓂᕐᕈᑎᒋᒃᐸᒋᑦ.

²⁸ ᖃᐅᔨᓯᒪᓂᕋᕐᑐᖅ ᓱᓕᓇᓂ ᐊᓯᕈᕐᓇᕐᑐᒧᑦ ᑎᑭᐅᑎᓂᐊᕐᐳᖅ, ᓈᓚᑦᓯᐊᕈᓐᓇᕐᑐᕐᓕ ᐅᖃᐅᓯᒃᓴᖃᑦᓯᐊᕐᓂᐊᕐᐳᖅ.

²⁹ ᐱᐅᖏᑦᑐᖅ ᑮᓇᖃᕐᐳᖅ ᐃᓕᕋᓇᕈᓇᕐᑐᒥᒃ, ᐃᓱᐊᕐᑑᓪᓕ ᐃᓕᖅᑯᓯᕆᔭᓂ ᐃᒃᐱᒋᑦᓯᐊᕐᓗᒍ ᐊᑐᕐᐹ.

³⁰ ᓯᓚᑐᓂᖅ, ᐃᓕᓯᒪᓂᕐᓗ, ᐃᓱᒪᒃᓴᕐᓯᐅᕈᓐᓇᕐᓂᕐᓘᓐᓃᑦ, ᓵᓚᖃᓕᕈᓐᓇᓐᖏᓚᑦ ᐊᑕᓂᕐᒥᒃ.

³¹ ᕿᒻᒥᕐᔪᐊᖅ ᐅᓇᑕᕆᐊᕐᓂᐊᕐᑐᓄᑦ ᐊᑐᕐᑕᐅᓂᐊᕐᑐᖅ ᐊᑐᐃᓐᓇᕈᕐᑕᐅᔪᓐᓇᕋᓗᐊᕐᐳᖅ, ᐅᓇᑕᕐᓂᕐᒥᒡᓕ ᓵᓚᖃᕐᓂᖅ ᐊᑕᓂᕐᒥᑦ ᐱᕗᖅ.