ᓲᓗᒨᓂᐅᑉ ᐅᖃᓪᓚᖕᓂᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓚᑐᓂᐅᑉ ᐊᑑᑎᖃᕐᓂᖓ

¹ ᐃᕐᓃᒃ ᐅᖃᐅᓯᒃᑲ ᐊᖏᑦᓯᐊᕈᕕᒋᑦ, ᐱᓂᐊᕐᑕᐅᖁᔭᒃᑲᓗ ᑐᖅᑯᕐᓯᒪᑦᓯᐊᕈᕕᒋᑦ ᐃᓗᖕᓂ,

² ᓯᐅᑏᒃᑭᒃ ᓈᓚᑦᓯᐊᕐᑎᒃᑯᕕᒋᒃ ᓯᓚᑐᓂᕐᒥᒃ, ᐆᒻᒪᑎᒃᑯᓪᓗ ᐱᔪᒪᑦᓯᐊᕈᕕᑦ ᑐᑭᓯᑎᑕᐅᔪᒪᓂᕐᒥᒃ.

³ ᐃᓛᒃ, ᓂᓪᓕᐊᒍᕕᑦ ᐃᓗᖏᕐᓱᕐᓗᑎᑦ ᑐᑭᓯᑎᑕᐅᔪᒪᓗᑎᑦ, ᓂᐱᖅᑯᕐᑐᒋᐊᒃᑲᓐᓂᕐᓗᑎᓪᓗ ᑐᑭᓯᑎᑕᐅᔪᒪᓗᑎᑦ.

⁴ ᓯᐅᓪᕕᕆᐅᑉ ᐱᔪᒥᓇᕐᓂᖓᑐᑦ ᕿᓂᓪᓚᕆᒃᑯᕕᐅᒃ, ᐱᓪᓚᕆᐊᓘᑉ ᕿᓂᕐᑕᐅᔭᕆᐊᖃᕐᓂᖓᑐᑦ ᓇᓂᓇᓱᐊᕐᓂᐊᕈᕕᐅᒃ.

⁵ ᑕᕝᕙ ᑐᑭᓯᓕᕐᓂᐊᕐᐳᑎᑦ ᐊᑕᓂᕐᒥᒃ ᐃᓕᕋᒋᔭᖃᕐᓂᕐᒥᒃ ᒎᑎᒥᒡᓗ ᖃᐅᔨᕙᓪᓕᐊᓂᕐᒥᒃ ᓇᓂᓯᓂᐊᕐᐳᑎᑦ.

⁶ ᐊᑕᓂᖅ ᓯᓚᑐᓂᕐᒥᒃ ᑐᓂᓯᔨᐅᖕᒪᑦ, ᖃᓂᖓᓂᑦ ᐱᖕᒪᑕ ᖃᐅᔨᑎᑕᐅᓂᖅ ᑐᑭᓯᑎᑕᐅᓂᕐᓗ.

⁷ ᓯᓚᑐᑎᑦᓯᓂᖅ ᑲᑎᕐᓱᐊᕆᓪᓗᒍ ᐃᓂᑖᕐᑎᑉᐹ ᐱᓇᓱᐊᑦᓯᐊᕐᑐᓂ, ᓴᐴᓗᑕᐅᕗᖅ ᐃᓅᓯᖃᕐᑐᓄᑦ ᐱᐅᔪᒥᒃ ᑲᔪᓯᑦᓯᐊᕐᑐᓄᑦ.

⁸ ᓴᐳᑎᓯᒪᕚ ᓈᒻᒪᓈᑦᓯᐊᕐᑑᑉ ᐊᖅᑯᑎᖓ, ᓴᐳᑎᓯᒪᑦᓯᐊᕐᐰᓪᓗ ᐃᓅᑦᓯᐊᕐᑐᖁᑎᖏᑕ ᐊᖅᑯᑎᒋᓂᐊᕐᑕᖏᑦ.

⁹ ᑕᕝᕙ ᑐᑭᓯᓂᐊᕐᐳᑎᑦ ᐃᓱᐊᕐᑐᓕᓂᕐᒥᒃ ᐊᑦᔨᒌᒃᑎᑦᓯᓂᕐᒥᒡᓗ. ᐊᑦᔨᒌᒃᑎᑦᓯᓂᕐᒥᒃ ᐱᐅᔪᒥᒡᓗ ᐊᑐᒐᒃᓴᒥᒃ.

¹⁰ ᓯᓚᑐᓂᖅ ᑕᕝᕙ ᐆᒻᒪᑎᖕᓄᐊᕐᓂᐊᕐᐳᖅ, ᖃᐅᔨᒪᓂᕐᓗ ᑕᕐᓂᕐᓄᑦ ᖁᕕᐊᓇᕐᓂᐊᕐᐳᖅ,

¹¹ ᐊᑦᔨᒋᔭᐅᖏᓐᓂᐅᑉ ᑲᒪᒋᑦᓯᐊᕐᓂᐊᕐᐹᑎᑦ, ᑐᑭᓯᓂᐅᓪᓗ ᓴᐳᑎᓯᒪᓂᐊᕐᐹᑎᑦ.

¹² ᓴᐳᑦᔨᔨᒋᖃᑦᑕᕐᓂᐊᕐᐸᑦ ᐱᐅᖏᑦᑑᑉ ᐱᓇᓱᐊᕐᓂᖓᓂᑦ, ᐃᓄᐃᓪᓗ ᐅᖃᐅᓯᕐᓗᖕᓂᖏᓐᓂᑦ.

¹³ ᑖᒃᑯᓇᓐᖓᑦ ᐃᓱᐊᕐᑐᒥᒃ ᐊᑐᕆᐊᓕᖕᒥᒃ ᐊᑐᕈᓐᓃᕐᑐᓂᑦ. ᑖᕐᑑᓪᓗ ᐱᓂᐊᕐᓂᖏᓐᓂ ᐃᓅᔪᓂᑦ.

¹⁴ ᐱᐅᖏᑦᑐᒥᒃ ᐱᓇᓱᐊᕐᓂᕐᒥᒃ ᖁᕕᐊᓲᑎᖃᕐᑐᓂᑦ, ᖁᕕᐊᒋᔭᖃᕐᑐᑦ ᐱᐅᖏᑦᑐᐊᓘᑉ ᑕᒻᒪᕐᓯᒪᓂᖓᓂᒃ.

¹⁵ ᐃᓄᐃᑦ ᑐᑭᒧᐊᖏᑦᑐᓂᒃ ᐊᖅᑯᑎᖃᕐᑐᑦ, ᓴᖑᐃᕐᑐᒥᒡᓗ ᐱᓂᐊᕐᓂᖃᕐᓗᑎᒃ.

¹⁶ ᓴᐳᑎᔭᐅᑦᔪᑎᒋᓂᐊᕐᐸᑦ ᐊᕐᓇᐅᑉ ᐅᓇᖕᒥᓇᕐᓴᕐᓂᖓᓂᑦ, ᐅᖃᐅᓯᒃᑯᓪᓗ ᐱᔪᒥᓇᕐᓴᕐᓂᖓᓂᑦ.

¹⁷ ᐃᓅᓱᖕᓂᕐᒥᓂᑦ ᐂᑉᐸᕆᔭᓂ ᕿᒪᒃᓯᒪᓪᓗᒍ, ᒎᑎᒧᑦ ᐊᖏᖃᑎᒌᒃᓯᒪᓂᕐᒥᓂᒃ ᐳᐃᒍᕐᓯᒪᔪᒥᑦ.

¹⁸ ᐃᒡᓗᖓ ᓯᑐᕙᓪᓕᐊᖕᒪᑦ ᑐᖁᒧᑦ, ᐊᑐᕐᑕᖓᓗ ᐃᓗᕕᕐᕕᖕᒧᓐᖓᐅᓪᓗᓂ,

¹⁹ ᐊᕐᓇᒧᑦ ᑍᒤᑦᑐᒧᑦ ᐂᓯᒪᔪᑦ ᐅᑎᕐᑐᖃᕈᓐᓇᓐᖏᓚᑦ, ᐃᓅᓯᖃᕐᓇᕐᑐᒧᓪᓗ ᐅᑎᒃᑲᓐᓂᕈᓐᓇᕋᑎᒃ.

²⁰ ᐃᓅᑦᓯᐊᕐᑐᑦ ᐊᖅᑯᑎᖓᓂ ᐃᓅᓂᐊᕐᐳᑎᑦ ᐊᑐᕐᑍᓪᓗ ᓇᓛᒎᕐᑐᒥ ᐃᓅᓯᕐᒦᓪᓗᓂ.

²¹ ᐱᐅᔪᒥ ᑲᔪᓯᔪᑦ ᓄᓇᒥ ᓄᓇᖃᕐᓂᐊᕐᐳᑦ, ᓱᓕᔪᕐᓇᑦᓯᐊᕐᑐᓪᓗ ᓄᓇᕾᓐᓇᕐᓂᐊᕐᐳᑦ ᑕᕝᕙᓂ.

²² ᐱᐅᖏᑦᑐᓪᓕ ᓄᓇᒥ ᐃᓅᑎᑕᐅᓂᐊᓐᖏᓚᑦ, ᐅᒃᐱᕆᔭᒃᓴᐅᖏᑦᑐᓪᓗ ᐊᒫᖏᑎᒍᑦ ᓄᓱᒃᑕᐅᓂᐊᕐᐳᑦ.