ᓲᓗᒨᓂᐅᑉ ᐅᖃᓪᓚᖕᓂᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐱᖃᓐᓂᖏᑦᑐᖅ ᐃᒻᒥᓂᑐᐊᖅ ᐃᓱᒪᒋᕗᑦ, ᐊᖏᖃᑕᐅᔪᓐᓇᓐᖏᓚᓪᓗ ᓈᒻᒪᑦᓯᐊᕐᑐᒥᒃ ᐱᓂᐊᕐᑐᖃᕋᓗᐊᕐᒪᑦ.

² ᓯᓔᑦᑐᖅ ᖁᕕᐊᒋᔭᖃᓐᖏᓚᖅ ᑐᑭᓯᑎᑕᐅᓂᕐᒥᒃ, ᐃᒻᒥᓂᒡᓕ ᐃᓱᒪᒋᔭᓂ ᑭᓯᐊᓂ ᐅᖃᐅᓯᒃᓴᑐᐊᕆᕚ.

³ ᐱᐅᖏᑦᑐᖅ ᓴᖅᑭᑦᑕᕌᖓᑦ ᐱᑦᓯᐊᖏᓐᓂᕐᑕᐅᖅ ᓴᖅᑭᖃᑕᐅᓲᖑᕗᖅ, ᐅᐱᒍᓱᖏᓐᓂᕐᓗ ᓴᖅᑭᑦᑕᕌᖓᑦ ᑲᓐᖑᓲᑎᒃᓴᑦᑕᐅᖅ ᓴᖅᑭᑉᐸᒃᑭᕗᑦ.

⁴ ᐃᓅᑉ ᐅᖃᐅᓯᖏᑦ ᐃᒪᕐᑎᑐᑦ ᐃᑎᔪᕐᔪᐊᑎᑐᑦ ᑍᒤᑉᐳᑦ; ᓯᓚᑐᓂᐅᑉ ᑯᕕᓂᖓ ᑰᒃᑐᕐᔪᐊᑎᑐᑦ ᑍᒤᑉᐳᖅ.

⁵ ᐱᐅᖏᑦᑐᓂᒃ ᐊᑦᔨᒌᓐᖏᑎᑦᓯᓂᖅ ᐱᐅᓐᖏᓚᖅ, ᐃᓱᐊᕐᑐᕐᓗ ᐊᑦᔨᒌᒃᑎᑦᓯᑦᑍᓕᑎᓪᓗᒍ ᐱᐅᖏᓐᓂᕗᖅ.

⁶ ᓯᓔᑦᑐᖅ ᐂᕙᓂᕐᒥᒃ ᐱᒋᐊᕐᑎᑦᓯᕗᖅ, ᖃᓂᖓ ᑏᒐᕐᑐᕐᑕᐅᓂᕐᒥᒃ ᑲᔪᖏᕐᓮᕗᖅ.

⁷ ᓯᓔᑦᑑᑉ ᖃᓂᓂ ᐊᓯᕈᕐᑕᐅᑦᔪᑎᒋᕚ, ᐅᖃᐅᓯᓂᓗ ᓂᒐᕐᑎᑕᐅᑦᔪᑎᒋᓪᓗᒋᑦ.

⁸ ᓂᐱᑭᓪᓗᓂ ᐅᖃᐅᓰᑦ ᒪᒪᕐᑐᑎᑐᑦ ᐅᖁᒻᒥᒐᒃᓴᑎᑐᑦ ᑍᒤᑕᐅᕗᑦ; ᐄᔭᕆᐊᖓᓗ ᐱᐊᒃᑐᑎᑐᑦ ᐊᕿᐊᕈᕐᒨᕐᐳᖅ.

⁹ ᐱᓇᓱᐊᕆᐊᒥᒃ ᐃᕿᐊᓱᒃᑐᖅ, ᐊᓯᕈᕐᓮᔨᒥᒃ ᖃᑕᓐᖑᑎᖃᕐᐳᖅ.

¹⁰ ᐊᑕᓂᐅᑉ ᐊᑎᖓ ᓇᐸᔪᕐᔪᐊᑎᑑᕐᐳᖅ ᐊᑕᕐᓇᕐᓂᖃᖏᑦᑐᖅ, ᐃᓱᐊᕐᑐᑦ ᕿᒫᕕᒋᕙᒃᐹᑦ ᐱᔭᐅᓇᕐᑐᖃᖏᒻᒪᑦ.

¹¹ ᐊᒃᓱᐃᑦᑑᑉ ᐱᖁᑎᕐᔪᐊᓂ ᐃᒡᓗᒐᓴᒡᔪᐊᕆᕔᑦ ᐊᑦᑕᕐᓁᑦᑐᑦ, ᐊᕙᓗᕐᔪᐊᑎᑐᓪᓗ ᐳᕐᑐᔪᑎᑐᑦ ᐱᔭᐅᑦᔧᒃᑯᑎᒋᕔᑦ.

¹² ᐊᓯᕈᕐᑕᐅᓂᖅ ᐱᒋᐊᓚᐅᕐᑎᓐᓇᒍ ᐃᓄᒃ ᐆᒻᒪᑎᒥᒍᑦ ᐱᔪᓐᓇᕋᓱᒋᓗᐊᕐᓂᖃᓲᖑᕗᖅ, ᒥᑭᒡᓕᑎᕐᓯᒪᓂᕐᓕ ᓯᕗᓪᓕᐅᓲᖑᕗᖅ ᐅᐱᒋᔭᐅᓂᖅ ᐊᑐᓚᐅᕐᑎᓐᓇᒍ.

¹³ ᑐᑭᓯᓚᐅᕋᓂ ᑭᐅᔪᖅ ᓯᓔᕐᕈᕐᑐᕐᐳᖅ, ᓯᓔᓐᓂᕐᒥᓄᓪᓗ ᑲᓐᖑᓇᕐᑐᒦᑎᓪᓗᓂ ᐃᒻᒥᓂᒃ.

¹⁴ ᐃᓅᑉ ᐊᓂᕐᓂᖓᑕ ᖃᓂᒪᑎᓪᓗᒍ ᐱᔪᓐᓇᕐᑎᑉᐹ; ᐊᓂᕐᓂᑯᓪᓕ ᓯᖁᒥᓯᒪᔪᖅ ᐃᒻᒥᓂᒃ ᐱᓯᒪᔪᓐᓇᓐᖏᓚᖅ.

¹⁵ ᑐᑭᓯᐊᔫᑉ ᐃᓱᒪᖓ ᖃᐅᔨᒪᓂᕐᒥᒃ ᐱᑖᕐᐳᖅ, ᓯᓚᑐᔫᓪᓗ ᓯᐅᑎᖏᒃ ᖃᐅᔨᑎᑕᐅᓂᕐᒥᒃ ᕿᓂᕐᐴᒃ.

¹⁶ ᐃᓄᒃ ᑐᓂᔭᒃᓴᒥᓄᑦ ᐅᒃᑯᐃᕈᑦᔭᐅᕗᖅ ᐊᖓᔪᖅᑳᓪᓗ ᓵᖏᓐᓄᑦ ᐱᑎᑕᐅᑦᔪᑎᒋᓪᓗᒍ.

¹⁷ ᓯᕗᓪᓕᕐᐹᖅ ᐱᑦᔪᑎᒃᓴᒥᓂᒃ ᐅᖃᐅᓯᖃᕐᑐᖅ ᐃᓱᐊᕐᑑᖅᑰᔨᕗᖅ, ᐃᓅᖃᑎᖓᓄᑦ ᖃᐅᔨᓴᕐᑕᐅᒃᑲᓐᓂᓚᐅᕋᓂ.

¹⁸ ᓇᓚᐅᑦᑖᕈᑎᒃᑯᑦ ᓂᕈᐊᕐᓂᖅ ᐂᕙᑦᔪᑕᐅᔪᓂᒃ ᓄᖅᑲᕐᑎᑦᓯᕗᖅ, ᐱᔪᓐᓇᕐᓂᖃᕐᑐᓪᓗ ᓵᓚᒌᖃᑦᑕᐅᑎᓇᓱᖕᓂᖏᓐᓂᒃ ᓄᖅᑲᕐᑎᑦᓯᓪᓗᓂ.

¹⁹ ᖃᑕᓐᖑᑦ ᓂᓐᖎᔭᐅᔪᖅ ᓵᓚᒋᔭᕆᐊᖓ ᓴᐱᕐᓇᕐᓂᕐᓴᐅᕗᖅ ᐃᒡᓗᒐᓴᒡᔪᐊᓂᑦ, ᐂᕙᓃᓪᓗ ᐱᔭᕐᓂᖏᓐᓂᕐᓴᐅᓕᕐᐳᑦ ᐃᒡᓗᒐᓴᒡᔪᐊᑉ ᓴᐴᓗᑕᖏᓐᓂᑦ.

²⁰ ᐊᖑᑦ ᐊᕿᐊᑦᑐᓱᒃᑐᑎᑐᑦ ᑍᒤᑉᐳᖅ ᖃᓂᖓᑕ ᐱᕈᕐᑎᑕᖏᑎᒍᑦ, ᐅᖃᐅᓯᖏᑕᓗ ᓴᖅᑭᑎᑕᖏᓐᓄᑦ ᓈᒻᒪᒃᓯᑎᑕᐅᓂᐊᕐᐳᖅ.

²¹ ᑐᖁ ᐃᓅᓯᕐᓗ ᐅᖃᐅᑉ ᐱᔪᓐᓇᕐᓂᖓᓃᑉᐳᑦ, ᐅᖃᕐᒥᖕᓂᒃ ᐱᓪᓗᐊᑕᓖᑦ ᐱᕈᕐᑎᑕᖏᓐᓂᒃ ᓂᕿᖃᕐᓂᐊᕐᐳᑦ.

²² ᓄᓕᐊᒃᓴᒥᓂᒃ ᓇᒡᕚᕐᑐᖅ ᐱᐅᔪᒥᒃ ᓇᒡᕚᕐᐳᖅ, ᐊᑕᓂᐅᓪᓗ ᓈᒻᒪᒋᔭᖓᓂᒃ ᐱᓪᓗᓂ.

²³ ᐊᒃᓱᔪᖅ ᓂᑲᒋᔭᐅᔪᒪᓂᕐᒥᒃ ᓂᓪᓕᐊᑦᔪᑎᖃᕐᐳᖅ, ᐊᒃᓱᐃᑦᑐᐊᓗᒡᓕ ᐊᑦᑕᕈᓱᒐᓂ ᑭᐅᒐᔪᖕᓂᕐᓴᐅᕗᖅ.

²⁴ ᐃᓚᓐᓈᖃᕐᑐᖃᕐᐳᖅ ᐃᓚᓐᓇᕆᔭᐅᓐᖑᐊᕐᑐᓂᒃ, ᐃᓚᓐᓈᖃᓪᓚᕆᒃᑐᕐᓕ ᖃᑕᓐᖑᑎᒥᑦ ᖃᓂᓐᓂᕐᓴᐅᔪᓐᓇᕐᐳᖅ.