ᓲᓗᒨᓂᐅᑉ ᐅᖃᓪᓚᖕᓂᖏᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᓱᒪᒃᑯᑦ ᐃᓱᒪᒃᓴᕐᓯᐅᕐᓂᖅ ᐃᓅᑉ ᐱᒋᕚ, ᐅᖃᐅᓪᓕ ᑭᐅᔭᐅᑦᔪᑎᒃᓴᖓ ᐊᑕᓂᕐᒥᑦ ᐱᕗᖅ.

² ᐃᓅᑉ ᐊᖅᑯᑎᒋᔭᖏᑦ ᐃᔨᖏᒃᑕ ᓵᖓᓂ ᐱᐅᖏᑦᑐᕐᑕᖃᓐᖏᓚᑦ, ᐊᑕᓂᐅᓪᓕ ᐊᓂᕐᓃᑦ ᖃᐅᔨᓴᕐᐰᑦ.

³ ᐱᓂᐊᕐᓂᑎᑦ ᐊᑕᓂᕐᒧᑦ ᑐᓂᒃᑭᑦ, ᑕᕝᕙ ᐃᓱᒪᕕᑦ ᐱᓇᓱᐊᕈᒪᔭᖏᑦ ᓈᒻᒪᒃᓯᑎᓐᓂᐊᕐᐰᑦ.

⁴ ᐊᑕᓂᐅᑉ ᓱᓇᑐᐃᓐᓁᑦ ᐱᓐᖑᕐᑎᓚᐅᕐᐰᑦ ᐊᑑᑎᒃᓴᖏᓐᓄᑦ, ᐱᐅᖏᑦᑐᑦ ᐊᒡᓛᑦ ᐊᓯᕈᕐᑕᐅᕕᒃᓴᖏᑦ ᓇᓪᓕᐅᑎᑎᑦᓱᒫᕐᐰᑦ.

⁵ ᐱᐅᔪᕆᔪᓕᒫᑦ ᐊᑕᓂᕐᒧᑦ ᓇᕐᕈᓇᕐᐳᑦ, ᖃᐅᔨᒪᓕᕆᑦ ᐊᑕᓂᐅᑉ ᓱᒋᐊᓐᖏᓮᓐᓇᕐᓂᐊᓐᖏᓔᑦ.

⁶ ᑲᒪᑦᓯᐊᕐᓂᕐᒧᑦ ᓱᖁᓯᔪᐃᑦᑑᓂᕐᒧᓪᓗ ᐊᔪᕐᑐᓕᓃᑦ ᐃᓱᒪᒋᔪᓐᓁᕐᑕᐅᑦᔪᑎᒃᓴᖃᕐᐳᑦ, ᐊᑕᓂᕐᒥᒃ ᓯᕘᕋᓂᒃᑯᑦ ᐃᓄᒃ ᐱᐅᖏᑦᑐᓂᒃ ᓂᒍᐃᔪᓐᓇᕐᐳᖅ.

⁷ ᐃᓅᑉ ᐃᓕᖅᑯᓯᕐᒥᒍᑦ ᐊᑕᓂᖅ ᖁᕕᐊᓱᒃᑎᑉᐸᒍ, ᐊᑭᕋᖏᓐᓄᑦ ᐊᒡᓛᑦ ᐊᑕᓂᐅᑉ ᐱᑦᓯᐊᕐᑕᐅᑎᑦᓱᓐᓇᕐᐹ.

⁸ ᐱᐅᓂᕐᓴᐅᕗᖅ ᐱᖃᑦᓯᐊᖏᒃᑲᓗᐊᕐᓗᓂ ᐃᓱᐊᕐᑐᒥᒃ ᐃᓅᓯᖃᕐᑐᖃᕈᓂ, ᑮᓇᐅᔭᓕᐅᕐᑐᕐᔪᐊᖑᓂᕐᒥᒃ ᓈᒻᒪᖏᑦᑐᒃᑯᑦ ᐱᔭᐅᔪᓂᒃ.

⁹ ᐃᓅᑉ ᐃᓱᒪᖓᑕ ᐊᑐᕐᓂᐊᕐᑕᖏᓐᓂᒃ ᐋᖅᑭᒃᓲᑎᕚ, ᐊᑕᓂᐅᓪᓕ ᑕᓯᐅᕐᐹ ᐱᓱᖕᓂᖏᑦ.

¹⁰ ᐊᖓᔪᖅᑳᕐᔪᐊᖅ ᖃᐅᔨᑎᑕᐅᓂᕐᒥᒍᑦ ᐅᖃᕐᐸᒃᐳᖅ, ᐃᖅᑲᕐᑐᐃᓕᕈᓂ ᐅᖃᐅᓯᕐᒥᒍᑦ ᐊᔪᕐᑐᓕᓐᖏᓚᖅ.

¹¹ ᐅᖁᒤᓐᓂᕐᓯᐅᑏᑦ ᐆᒃᑐᕋᐅᑎᓪᓗ ᐊᑦᔨᒌᒃᑎᑦᓯᔪᑦ ᐊᑕᓂᕐᒥᑦ ᐱᕗᑦ; ᐴᕐᒧᑦ ᐴᕐᓯᒪᔪᑦ ᐅᖁᒤᓐᓂᖏᑦ ᑖᑦᓱᒪ ᐱᓂᐊᕐᓂᖓᓄᑦ ᐃᓕᖓᕗᑦ.

¹² ᓇᕐᕈᓇᕐᑐᕐᔪᐊᖑᕗᖅ ᐊᖓᔪᖅᑳᕐᔪᐊᖅ ᐱᐅᖏᑦᑐᓕᒃᐸᑦ, ᐃᒃᓯᕙᐅᑕᕐᔪᐊᖓ ᐋᖅᑭᒃᑕᐅᓯᒪᖕᒪᑦ ᐃᓱᐊᕐᑐᓕᓂᕐᒧᑦ.

¹³ ᐃᓱᐊᕐᑐᓂᒃ ᐅᖃᐅᓯᓖᑦ ᐊᖓᔪᖅᑳᕐᔪᐊᑉ ᖁᕕᐊᒋᕔᑦ, ᖁᕕᐊᒋᔭᖃᕐᐳᖅ ᓈᒻᒪᒃᑐᓂᒃ ᐅᖃᐅᓯᖃᕐᑐᓂᒃ.

¹⁴ ᐊᖓᔪᖅᑳᕐᔪᐊᑉ ᓂᓐᖓᖕᓂᖓ ᑐᖁᒥᒃ ᑐᓴᕐᑎᑦᓯᑦᔪᑎᐅᕗᖅ, ᓯᓚᑐᔪᕐᓕ ᓮᒻᒪᕈᑎᒃᓴᖓᓂᒃ ᐱᓇᓱᐊᕐᐳᖅ.

¹⁵ ᐊᖓᔪᖅᑳᕐᔪᐊᑉ ᑮᓇᖓ ᖁᕕᐊᓱᑐᐊᕐᐸᑦ ᐃᓅᓯᕐᑕᖃᕐᐳᖅ, ᓈᒻᒪᒃᓴᕐᓂᖓᓗ ᓄᕗᔭᑎᑐᑦ ᑍᒤᑉᐳᖅ ᐅᐱᕐᖔᒥ ᓯᓚᓗᓕᕐᑐᑎᑐᑦ.

¹⁶ ᓯᓚᑐᓂᕐᑖᕐᓂᑦ ᐱᐅᓂᕐᓴᐅᕗᖅ ᒎᓗᒥᒃ ᐱᑖᕐᓂᕐᒥᑦ, ᑐᑭᓯᔪᓐᓇᕐᓯᓂᖅ ᓂᕈᐊᕆᔭᒃᓴᐅᓂᕐᓴᐅᕗᖅ ᓯᐅᓪᕕᕆᒥᑦ.

¹⁷ ᐃᓱᐊᕐᑐᑦ ᐊᖅᑯᑎᕐᔪᐊᖓᑦ ᐱᐅᖏᑦᑐᒥᒃ ᓴᓂᖅᑯᑦᓯᓂᐅᕗᖅ; ᐊᖅᑯᑎᒋᔭᒥ ᐊᓯᐊᓄᑦ ᓅᑦᑍᓕᔪᖅ ᐃᓅᓯᕐᒥᓂᒃ ᓴᐳᑦᔨᕗᖅ.

¹⁸ ᐱᐅᔪᕆᓂᖅ ᓯᕗᓪᓕᐅᕗᖅ ᐊᓯᕈᕐᑕᐅᓂᕐᒥᑦ, ᐊᔪᖏᓐᓇᓱᒋᓂᕐᓗ ᓯᕗᓪᓕᐅᕗᖅ ᑲᑕᖕᓂᕐᒥᑦ.

¹⁹ ᐱᐅᓂᕐᓴᐅᕗᖅ ᒥᑭᒡᓕᑎᕐᓯᒪᓗᓂ ᐊᔪᕐᓴᕐᑐᓂ, ᐅᓇᑕᕐᓂᒃᑯᑦ ᓵᓚᖃᐅᑎᕕᓂᕐᓂᒃ ᑐᓂᐅᖅᑲᕐᑕᐅᓂᕐᒥᑦ ᐱᐅᔪᕆᔪᓄᑦ.

²⁰ ᐅᖃᐅᓯᕐᒥᒃ ᓈᓚᒃᑐᖅ ᐱᐅᔪᒥᒃ ᐊᔪᕈᓐᓃᕐᓂᐊᕐᐳᖅ, ᖁᕕᐊᓇᕐᑐᒦᑉᐳᖅ ᓇᓪᓕᐊᑦ ᐊᑕᓂᕐᒥᒃ ᑕᑎᖃᕐᑐᖅ.

²¹ ᐆᒻᒪᑎᖃᕐᑐᖅ ᓯᓚᑐᔪᒥᒃ ᐅᑦᔨᕐᓱᑦᓯᐊᕐᑐᒥᒃ ᑍᔭᐅᓂᐊᕐᐳᖅ, ᐅᖃᓪᓚᑦᓯᐊᕐᐸᒃᑐᕐᓗ ᒪᓕᒃᓴᕐᑎᑦᓯᑦᓯᐊᕈᓐᓇᕐᐳᖅ.

²² ᓯᓚᑐᔪᒧᑦ ᓯᓚᑐᓂᖅ ᐃᓅᓯᕐᑕᖃᕐᐳᖅ ᓄᓇᐅᑉ ᐃᓗᐊᓂᑦ ᑰᒃᑐᑎᑐᑦ, ᓯᓔᑦᑐᓪᓕ ᓯᓔᕐᕈᕐᑐᕐᓂᖅ ᓱᒋᐊᕐᑕᐅᑦᔪᑎᒋᕚᑦ.

²³ ᓯᓚᑐᔫᑉ ᐃᓱᒪᖓᑕ ᐅᖃᐅᓯᖃᕐᑎᑉᐹ ᓯᓚᑐᔪᓂᒃ, ᖃᓂᓂᓗ ᑲᔪᖏᕐᓮᓂᕐᒥᒃ ᐃᓚᖃᕐᑎᑉᐹ.

²⁴ ᐅᖃᐅᓰᑦ ᑐᓐᖓᓇᕐᑐᑦ ᐃᒍᑦᓴᐅᑉ ᓰᕐᓇᐅᑎᖓᑐᑦ ᑍᒤᑉᐳᑦ, ᑕᕐᓂᐅᑉ ᒪᒪᕆᕔᑦ ᑎᒥᖓᑕᓗ ᐋᖅᑭᒃᑕᐅᑦᔪᑎᒋᕔᑦ.

²⁵ ᐊᖅᑯᑎᑕᖃᕐᐳᖅ ᐃᓄᖕᒧᑦ ᓈᒻᒪᑦᓯᐊᕐᑑᔮᕐᑐᒥᒃ, ᑭᓯᐊᓂᓕ ᐃᓱᖃᕐᐳᖅ ᑐᖁᒥᒃ.

²⁶ ᐱᓇᓱᐊᕐᑎ ᓂᕆᔭᕆᐊᖃᕋᒥ ᐊᒃᓱᕈᕐᓗᓂ ᐱᓇᓱᐊᕐᐳᖅ, ᓂᕆᔪᒪᓂᖓᑕ ᐱᓇᓱᐊᖁᕚ.

²⁷ ᐱᕋᔭᒃ ᐱᐅᖏᑦᑐᓂᒃ ᐃᓱᒪᒃᓴᕐᓯᐅᕈᑎᖃᕐᐳᖅ, ᓂᓪᓕᐊᓂᖓᓗ ᐃᑯᐊᓚᔪᑎᑐᑦ ᑍᒤᑉᐳᖅ.

²⁸ ᐃᓄᒃ ᐱᐅᖏᑦᑐᓕᔨ ᐊᑭᕋᕐᑐᕐᑎᑦᓯᓂᕐᒥᒃ ᓯᐊᒻᒪᒃᑎᑦᓯᕗᖅ, ᐃᓯᑦᔫᑎᓂᕐᓗ ᐃᓚᓐᓇᕇᓂᒃ ᐊᕕᑎᑦᓯᑦᔪᑎᐅᕙᒃᐳᖅ.

²⁹ ᑲᑉᐱᐊᓵᕆᔩᑦ ᐃᓚᓐᓇᕆᔭᒥᖕᓂᒃ ᑕᐱᒃᓴᕐᑖᕋᓱᐊᕐᐸᒃᐳᑦ ᓯᓔᕐᕆᒃᓯᓂᒃᑯᑦ, ᑕᓯᐅᕐᓗᒋᓪᓗ ᐊᖅᑯᒻᒧᑦ ᐱᐅᖏᑦᑐᒧᑦ.

³⁰ ᐃᔨᒥ ᐃᒡᓗᐃᓐᓇᖓᓄᑦ ᓯᑯᓐᖏᕐᑕᕐᕕᖃᕐᐳᖅ ᐱᑦᓯᐊᕐᓂᐅᖏᑦᑐᒧᑦ ᑕᓯᐅᕐᓯᔪᒪᓕᕋᒥ, ᖃᓂᓂᓗ ᑮᒻᒥᕚ ᐱᐅᖏᑦᑐᒥᒃ ᐱᓂᐊᓂᖃᕈᒪᓕᕋᒥ.

³¹ ᓂᐊᖁᖅ ᖀᖑᓕᕋᒥ ᓂᕐᑐᕐᓇᕐᑐᒥᒃ ᓂᐊᖂᑎᐅᕗᖅ, ᑍᒤᓕᕙᒃᐳᑦ ᐃᓱᐊᕐᑐᒥᒃ ᐃᓅᓯᖃᕋᒥᒃ.

³² ᓂᓐᖓᒃᓴᕅᖏᑦᑐᖅ ᐊᔪᖏᑦᑐᕐᔪᐊᒥᑦ ᐱᐅᓂᕐᓴᐅᕗᖅ, ᐊᓂᕐᓂᕐᒥᓂᒡᓗ ᐊᐅᓚᑦᓯᔪᓐᓇᕐᑐᖅ ᐱᐅᓂᕐᓴᐅᒋᕗᖅ ᐃᒡᓗᒐᓴᒡᔪᐊᓂᒃ ᓵᓚᖃᕐᑐᒥᑦ.

³³ ᓄᓇᖁᑎᑖᕋᓱᐊᕐᑐᖅ ᖃᐅᔨᓇᓱᐊᕐᐳᖅ ᓇᓚᐅᑦᑖᕈᑎᒃᑯᑦ ᓵᒥᒍᑦ, ᐃᓱᒪᑖᕈᑕᐅᔪᓪᓕ ᐊᑕᓂᕐᒧᑦ ᓇᓗᓇᕈᓐᓃᕐᑎᑕᐅᓂᐊᕐᐳᑦ.