ᓲᓗᒨᓂᐅᑉ ᐅᖃᓪᓚᖕᓂᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐊᕐᓇᖅ ᓯᓚᑐᔪᖅ ᐃᒡᓗᓕᐅᕐᐳᖅ, ᓯᓔᑦᑑᓪᓕ ᐃᒡᓗᓕᐊᓂ ᐊᒡᒐᖕᒥᓄᑦ ᓯᖁᑦᑎᕐᐹ.

² ᐃᓱᐊᕐᑐᒥᒃ ᐃᓅᔪᖅ ᐊᑕᓂᕐᒥᒃ ᓯᕘᕋᒋᔭᖃᕐᓗᓂ ᐃᓅᕗᖅ, ᐃᓱᐃᑦᑐᒥᒡᓕ ᐃᓅᔪᖅ ᐊᑕᓂᕐᒥᒃ ᓇᕐᕈᕗᖅ.

³ ᓯᓔᑦᑐᖅ ᐱᐅᔪᕆᓂᕐᒥᓄᑦ ᐅᖃᐅᓯᖃᕐᐳᖅ ᐊᓇᐅᓕᕐᑕᐅᑦᔪᑎᒃᓴᒥᓂᒃ, ᓯᓚᑐᔪᓪᓕ ᐅᖃᐅᓯᓂ ᓴᐳᑎᔭᐅᑦᔪᑎᒋᕔᑦ.

⁴ ᐆᒪᔪᓂᒃ ᐅᓂᐊᕐᑎᒃᓴᖃᕐᑎᓐᓇᒋᑦ, ᐱᕈᕐᓰᕕᒃ ᐱᕈᕐᕕᐅᔪᓐᓇᓐᖏᓚᖅ; ᓄᓇᓕᕆᐅᑎᓂᒃ ᐅᓂᐊᕐᑎᐅᑉ ᐱᓇᓱᐊᕐᔪᐊᕈᓐᓇᕐᓂᖓᓄᑦ ᑲᑎᕐᓱᒐᒃᓴᖃᑦᓯᐊᕐᐳᖅ ᐱᕈᕐᑐᕕᓂᕐᓂᒃ.

⁵ ᓱᓕᔪᒥᒃ ᖃᐅᔨᓯᒪᔪᖅ ᓴᒡᓗᓗᓂ ᐅᖃᕐᓂᐊᓐᖏᓚᖅ, ᖃᐅᔨᒪᔫᓐᖑᐊᕐᑐᕐᓕ ᓱᓕᓗᓂ ᐅᖃᓪᓚᒍᓐᓇᓐᖏᓚᖅ.

⁶ ᒥᑕᐅᑎᖃᕋᔪᒃᑐᖅ ᓯᓚᑐᓂᖃᕐᑎᑕᐅᓂᕐᒥᒃ ᐱᔪᒪᒐᓗᐊᕐᐳᖅ ᓇᓂᓯᓇᓂᓗ, ᖃᐅᔨᒪᓂᖅ ᐊᔪᕐᓇᓐᖏᓚᖅ ᐃᓄᖕᒧᑦ ᑐᑭᓯᐅᒪᔪᒧᑦ.

⁷ ᕿᒪᒍᒃ ᓯᓔᑦᑑᑉ ᓇᔪᒐᖓ, ᑕᕝᕙᓂ ᐅᖃᐅᓯᕐᓂᒃ ᖃᐅᔨᒪᓂᕐᓂᒃ ᖃᐅᔨᓂᐊᓐᖏᓚᑎᑦ.

⁸ ᓯᓚᑐᓂᕐᒥᓄᑦ ᓯᕗᓂᒃᓴᕐᓯᐅᑦᓯᐊᕐᑑᑉ ᐊᖅᑯᑎᒋᔭᓂ ᐅᑦᔨᕐᑐᑦᓯᐊᕐᓗᒍ ᐃᓅᕗᖅ, ᓯᓔᑦᑐᓪᓕ ᐱᓂᐊᕐᓂᖃᕐᐳᑦ ᑕᒻᒪᕐᑎᑦᓯᓪᓗᑎᒃ.

⁹ ᓯᓔᑦᑐᑦ ᒥᑕᐅᑎᖃᕐᐳᑦ ᐊᔪᕐᑐᓕᓂᕐᒧᑦ ᑐᓂᕐᕈᑎᓂᒃ, ᐃᓱᐊᕐᑐᒥᒡᓕ ᐃᓅᔪᑦ ᒎᑎᒧᑦ ᐅᐱᒋᔭᐅᓂᕐᒥᒃ ᖁᕕᐊᓱᒃᐳᑦ.

¹⁰ ᐆᒻᒪᑎᐅᑉ ᖃᐅᔨᒪᕚ ᓇᖕᒥᓂᖅ ᐅᖁᒤᒃᓴᕐᓂᓂ, ᐃᓅᖃᑎᒋᓐᖏᑕᖓᓗ ᖁᕕᐊᓱᖕᓂᖓᓂᒃ ᐃᓚᐅᓐᖏᓚᖅ.

¹¹ ᐱᐅᖏᑦᑑᑉ ᐃᒡᓗᖓ ᐊᓯᕈᕐᑕᐅᔪᒫᕐᐳᖅ, ᐃᓱᐊᕐᑐᓪᓕ ᑐᐱᖓ ᐱᕈᕐᑐᑎᑐᑦ ᐱᕈᕐᐸᓪᓕᐊᔪᑎᑑᕐᓂᐊᕐᐳᖅ.

¹² ᐊᖅᑯᑎᑕᖃᕐᐳᖅ ᐃᓄᖕᒧᑦ ᓈᒻᒪᑦᓯᐊᕐᑑᔮᕐᑐᒥᒃ, ᐃᓱᐊᓕ ᑐᖁᒧᑦ ᐊᖅᑯᑕᐅᕗᖅ.

¹³ ᐃᔪᕿᑕᒃᑲᓗᐊᕐᓗᓂ ᐆᒻᒪᑎ ᖁᕕᐊᓱᖏᑦᑐᓐᓇᕐᐳᖅ, ᖁᕕᐊᓱᖕᓂᖅ ᐃᓱᓕᑉᐸᑦ ᕿᒃᓵᖕᓂᖅ ᐱᒋᐊᕐᐳᖅ.

¹⁴ ᐱᐅᖏᑦᑐᒥᒃ ᐃᓱᒪᓕᒃ ᐱᐅᓯᕆᔭᒥᓄᑦ ᐊᐅᓚᑕᐅᓕᕐᓂᐊᕐᐳᖅ, ᐃᓱᐊᕐᑐᕐᓕ ᓈᒻᒪᒃᓯᑎᑕᐅᓂᐊᕐᐳᖅ ᐱᐅᓯᕆᔭᒥᓄᑦ.

¹⁵ ᓯᓔᑦᑐᖅ ᐅᖃᐅᓯᐅᔪᓕᒫᓂᒃ ᐅᒃᐱᕈᓱᒃᐳᖅ, ᓯᕗᓂᒃᓴᕐᓯᐅᕐᑑᓪᓕ ᐊᖅᑯᑎᒋᔭᓂ ᐅᑦᔨᕐᑐᕐᐰᑦ.

¹⁶ ᓯᓚᑐᔪᖅ ᓯᕘᕋᒐᒥ ᐱᐅᖏᑦᑐᒥᒃ ᐊᑐᕐᑍᓕᕗᖅ, ᓯᓔᑦᑐᕐᓕ ᐃᓱᒤᓐᓇᕐᕆᓪᓗᓂ ᐊᑐᕆᐊᖃᓐᖏᑕᓂ ᑲᒪᒋᑦᓯᐊᓐᖏᓛ.

¹⁷ ᓂᓐᖓᒃᓴᕅᑦᑐᖅ ᓯᓔᕐᕈᕐᑐᕐᓗᓂ ᐱᓇᓱᐊᕐᓴᕅᑉᐳᖅ, ᓯᓚᑐᔪᕐᓕ ᐅᐃᒪᔮᕋᓂ ᕿᓄᐃᓵᕐᐳᖅ.

¹⁸ ᓯᓔᑦᑐᖅ ᐱᐅᓯᖃᕐᐳᖅ ᓯᓔᓐᓂᕐᒥᒃ, ᓯᕗᓂᒃᓴᑦᓯᐅᑦᓯᐊᕐᑐᓪᓕ ᓂᐊᖂᑎᖃᕐᐳᑦ ᖃᐅᔨᒪᓂᕐᒥᒃ.

¹⁹ ᐱᐅᖏᑦᑐᒥ ᐃᓅᔪᑦ ᐅᑯᕗᑦ ᐱᐅᔪᑦ ᓵᖏᓐᓂ, ᐱᐅᖏᑦᑐᓪᓗ ᐃᓱᐊᕐᑐᓕᔪᑦ ᐃᑎᕐᑕᕐᕕᖏᓐᓂ.

²⁰ ᐊᒃᓗᔪᑦ ᐱᐅᒋᔭᐅᕙᓐᖏᓚᑦ ᓯᓚᖅᑲᑎᒥᖕᓄᑦ, ᐊᒃᓗᐃᑦᑐᕐᓕ ᐅᓄᕐᑐᓂᒃ ᐃᓚᓐᓈᖃᕐᐳᖅ.

²¹ ᓯᓚᖅᑲᑎᒥᓂᒃ ᓇᕐᕈᔪᖅ ᐊᔪᕐᑐᓕᕗᖅ, ᐊᒃᓗᔪᓂᒡᓕ ᓂᑲᒍᓱᒃᑐᖅ ᑖᓐᓇ ᖁᕕᐊᓱᒃᐳᖅ.

²² ᐱᐅᖏᑦᑐᓂᒃ ᐱᓂᐊᕈᒪᔪᑦ ᐊᔪᕐᑐᓕᓐᖏᓛᑦ? ᐱᐅᔪᓂᒃ ᐱᓂᐊᕈᒪᔪᑦ ᐃᑲᔪᕐᑎᒃᓴᕐᓯᕗᑦ ᑕᕝᕙᓃᖏᓐᓇᕐᓂᐊᕐᑐᓂᒃ.

²³ ᐊᒃᓱᕈᕐᓗᑎᒃ ᐱᓇᓱᐊᕐᓂᐅᔪᓕᒫᑦ ᐱᕙᓪᓕᕐᓇᕐᑐᕐᑕᖃᕐᐳᑦ, ᐅᖃᑐᐃᓐᓇᕐᓂᖅ ᐊᔪᕐᓴᕐᓂᕐᒥᒃ ᐱᑎᑦᓯᕗᖅ.

²⁴ ᓯᓚᑐᔪᑦ ᓂᐊᖂᑎᖃᕐᐳᑦ ᓯᓚᑐᓂᕐᒥᖕᓂᒃ, ᓯᓔᑦᑑᓪᓕ ᓯᓔᑦᑑᓂᖅ ᓂᐊᖂᑎᒋᕚᑦ.

²⁵ ᓱᓕᔪᒥᒃ ᖃᐅᔨᓯᒪᔪᖅ ᑕᕐᓂᕐᓂᒃ ᐱᐅᓕᒃᓯᕗᖅ, ᓱᓕᖏᑦᑐᓂᒡᓕ ᐅᖃᐅᓯᒃᓴᖃᕐᑐᖅ ᐊᓯᒥᓂᒃ ᐱᔭᐅᑎᑦᓯᕗᖅ.

²⁶ ᐊᑕᓂᕐᒥᒃ ᓯᕘᕋᔪᑦ ᓴᐱᖏᓐᓂᕐᒥᒃ ᑎᒍᒥᐊᕐᐳᑦ, ᕿᑐᕐᖓᖏᓪᓗ ᕿᒫᕕᒃᓴᖃᕐᓂᐊᕐᐳᑦ.

²⁷ ᐊᑕᓂᕐᒥᒃ ᓯᕘᕋᓂᖅ ᑯᕕᕗᖅ ᐃᓅᓯᖃᕐᓇᕐᑐᒥᒃ, ᑐᖂᓪᓗ ᓂᒐᖓᓂᒃ ᓂᒍᕈᓐᓇᕐᓗᓂ.

²⁸ ᓄᓇᓖᑦ ᐃᓄᒋᐊᒃᐸᑕ ᐊᖓᔪᖅᑳᕐᔪᐊᑉ ᓂᕐᑐᕐᓇᐅᑎᒋᕚ, ᐊᖓᔪᖅᑳᕐᔪᐊᕐᓕ ᐃᓄᖁᑎᖃᖏᒃᑯᓂ ᐊᖓᔪᖅᑲᐅᓂᖓ ᐊᑑᑎᖃᓐᖏᓚᖅ.

²⁹ ᓂᓐᖓᒃᓴᕅᖏᑦᑐᖅ ᐊᖏᔪᒥᒃ ᑐᑭᓯᐅᒪᓂᕐᒥᒃ ᐱᓯᒪᕗᖅ, ᓂᓐᖓᒃᓴᕅᑦᑐᕐᓕ ᓯᓔᓐᓂᕐᒥᒃ ᐊᖏᒡᓕᑎᕆᕗᖅ.

³⁰ ᐆᒻᒪᑎᖃᕐᑐᖅ ᓮᓕᓂᕐᒥᒃ ᑎᒥᒥᓂᒃ ᐃᓅᓯᖃᕐᑎᑦᓯᕗᖅ, ᑐᓱᓂᖃᓗᐊᕐᑐᕐᓕ ᓴᐅᓂᕐᓂᒃ ᐊᐅᓂᕈᕐᑎᑦᓯᕗᖅ.

³¹ ᐊᒃᓗᔪᓂᒃ ᐅᖁᒤᒃᓴᕐᑎᑦᓯᔪᖅ ᐱᓐᖑᕐᑎᑎᔨᒥᓂᒃ ᐱᐅᒃᓴᓐᖏᓚᖅ, ᐊᒃᓗᔪᓂᒡᓕ ᐱᑦᓯᐊᕐᑐᖅ ᒎᑎᒥᒃ ᐅᐱᒍᓱᖕᓂᖃᕐᐳᖅ.

³² ᐱᐅᖏᑦᑐᑦ ᐱᐅᖏᑦᑐᓕᓂᕐᒥᖕᓄᑦ ᐃᒻᒥᓂᒃ ᓵᓚᐅᑎᑉᐳᑦ, ᐃᓱᐊᕐᑐᓪᓕ ᓴᐳᑦᔭᐅᕕᒃᓴᖃᕐᐳᑦ ᐅᐱᒋᔭᐅᓂᕐᒥᓄᑦ.

³³ ᓯᓚᑐᓂᖅ ᐃᓂᖃᕐᐳᖅ ᐃᓄᖕᒥ ᑐᑭᓯᐅᒪᔪᒥ, ᓯᓔᑦᑑᓪᓕ ᐆᒻᒪᑎᒥᓂ ᑕᒪᑐᒥᖓ ᖃᐅᔨᒪᓐᖏᓚ.

³⁴ ᓇᓛᒎᕐᓂᖅ ᐊᖏᓕᑎᕆᕗᖅ ᐃᓅᖃᑎᒌᒡᔪᐊᓂᒃ, ᐊᔪᕐᓂᕐᓕ ᓈᒻᒪᒋᔭᐅᔪᓐᓃᕐᑎᑦᓯᕗᖅ ᑭᓇᒃᑯᑐᐃᓐᓇᑦᓯᐊᓂᒃ.

³⁵ ᐱᔨ ᓯᓚᑐᔪᒥᒃ ᐱᓇᓱᐊᕐᑐᖅ ᐊᖓᔪᖅᑳᕐᔪᐊᒥᓄᑦ ᖁᕕᐊᒋᔭᐅᕗᖅ, ᓂᓐᖓᐅᒪᓂᖓᓕ ᑎᑭᐅᑎᕗᖅ ᑲᓐᖑᓇᕐᑐᓕᓂᕐᒥᒃ ᐱᓇᓱᐊᕐᑐᒧᑦ.