ᓲᓗᒨᓂᐅᑉ ᐅᖃᓪᓚᖕᓂᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐃᕐᓂᖅ ᓯᓚᑐᔪᖅ ᐊᑖᑕᒥᓄᑦ ᐊᔪᕆᕐᑐᕐᑕᐅᔪᑎᒋᔭᒥᓂᒃ ᓈᓚᒃᐳᖅ, ᒥᑕᐅᑎᖃᑐᐃᓐᓇᕐᐸᒃᑐᕐᓕ ᐃᓂᕐᑎᕐᑕᐅᑦᔪᑎᒥᓂᒃ ᓈᓚᒍᓐᓇᓐᖏᓚᖅ.

² ᐊᖑᑦ ᐅᖃᐅᓯᕐᒥ ᐱᕈᕐᑎᑕᖏᓐᓄᑦ ᒪᒪᕐᑐᓂᒃ ᓂᕿᖃᕐᑎᑕᐅᕗᖅ, ᓯᓔᕐᕆᒃᓯᓇᓱᐊᕐᑎᓕ ᑲᑉᐱᐊᓱᒃᑎᑦᓯᓂᕐᒥᒃ ᐱᔪᒪᔭᖃᕐᐳᖅ.

³ ᐅᖃᐅᓯᕆᔭᒥᓂᒃ ᐅᑦᔨᕐᓱᑦᓯᐊᕐᑐᖅ ᐃᓅᓯᕆᔭᒥᓂᒃ ᐱᓯᒪᒃᓯᑦᓯᐊᕐᐳᖅ, ᐅᖃᕐᑍᓕᓐᖏᓗᐊᕐᑐᕐᓕ ᐃᓅᓯᕐᒥᓂᒃ ᐊᓯᕈᐃᕗᖅ.

⁴ ᐃᕿᐊᑦᑕᐅᑉ ᑕᕐᓂᖓ ᑳᒃᐳᖅ, ᓂᕿᒃᓴᕐᑖᕋᓂᓗ, ᐃᕿᐊᑦᑍᑦᑑᓪᓕ ᐊᒃᓱᕈᕐᓗᓂ ᐱᓇᓱᐊᕐᓂᕐᒥᓄᑦ ᓂᕿᒃᓴᖃᑦᓯᐊᕐᐳᖅ.

⁵ ᐃᓱᐊᕐᑑᑉ ᓱᓕᖏᓐᓂᖅ ᐱᐅᒋᓐᖏᓛ, ᐱᐅᖏᑦᑐᕐᓕ ᐱᓇᓱᐊᕐᐳᖅ ᑲᓐᖑᓲᑎᒃᓴᓂᒃ ᓇᕐᕈᒋᔭᐅᓂᕐᒥᒃᓗ.

⁶ ᐃᓱᐊᕐᑐᓕᓂᐅᑉ ᓴᐳᑎᓯᒪᕚ ᐸᓯᔭᒃᓴᐅᖏᑦᑐᒥᒃ ᐃᓅᓯᖃᕐᑐᖅ, ᐊᔪᕐᑐᓕᓂᕐᓕ ᑲᑕᒃᑎᑦᓯᕗᖅ ᐱᐅᖏᑦᑐᓕᔪᓂᒃ.

⁷ ᐃᓚᖏᑦ ᐊᒃᓗᐃᑦᑑᓐᖑᐊᕐᐸᒃᐳᑦ, ᓱᓇᖃᖏᓪᓗᑎᒃ; ᐊᓯᐊᓕ ᐊᔪᕐᓴᕐᑑᓐᖑᐊᕐᐳᖅ, ᐊᒃᓱᐃᑦᑐᐊᓘᓪᓗᓂ.

⁸ ᐃᓅᑉ ᐊᒃᓱᐃᑦᑑᓂᓂ ᐃᓅᓯᕐᒥᓂᒃ ᐊᑭᓖᑦᔪᑎᒃᓴᕆᕚ, ᐊᒃᓱᔪᕐᓕ ᓯᕘᕋᓵᕐᑕᐅᑦᔪᑎᒃᓴᖃᓐᖏᓚᖅ.

⁹ ᐃᓱᐊᕐᑐᑦ ᓇᓂᕈᐊᖓ ᖃᐅᒻᒪᕆᑦᓯᐊᕐᐳᖅ, ᐱᐅᖏᑦᑐᓪᓕ ᓇᓂᕈᐊᖓ ᖃᒥᑕᐅᓂᐊᕐᐳᖅ.

¹⁰ ᓵᓚᖃᕋᓱᐊᕐᓂᕐᒧᑦ ᓈᓚᖏᑦᑐᖅ ᐂᕙᓂᕐᒥᒃ ᓴᖅᑭᑎᑦᓯᕗᖅ, ᐅᖃᐅᑦᔪᕐᑕᐅᑦᔪᑎᒥᓂᒡᓕ ᓈᓚᒃᑐᖅ ᓯᓚᑐᔫᕗᖅ.

¹¹ ᐱᔭᕆᐊᑭᑦᑐᒃᑯᑦ ᑮᓇᐅᑦᔭᒃᑐᖅ ᑮᓇᐅᔧᕈᑎᑦᓴᐅᑎᒋᓲᖑᕗᖅ, ᒥᑭᔫᑎᑎᒍᓪᓕ ᐃᓚᓯᕙᓪᓕᐊᔪᖅ ᐱᕈᕐᐸᓪᓕᐊᑎᑦᓯᓂᐊᕐᐳᖅ.

¹² ᓂᕆᐅᖕᓂᕐᒥᒃ ᑭᖑᕙᕆᐊᕐᑎᑦᓯᓂᖅ ᐆᒻᒪᑎᒧᑦ ᖃᓂᒪᓇᕐᑐᒥᒃ ᐱᑎᑦᓯᕗᖅ, ᓂᕆᐅᒋᔭᒥᓄᓪᓕ ᑎᑭᐅᑎᓂᖅ ᓇᐹᕐᑑᕗᖅ ᐃᓅᓯᕐᑕᓕᒃ.

¹³ ᐅᖃᐅᓯᕐᒥᒃ ᓇᕐᕈᔪᖅ ᐊᓯᕈᕐᑕᐅᓂᐊᕐᐳᖅ, ᐱᖁᔭᓐᓂᒡᓕ ᓯᕘᕋᒋᔭᖃᕐᑐᖅ ᐊᑭᓕᕐᑕᐅᓂᐊᕐᐳᖅ.

¹⁴ ᓯᓚᑐᔫᑉ ᐃᓕᓮᑦᔪᑎᖏᑦ ᐃᒥᕐᕕᒃᓴᐅᕗᑦ ᐃᓅᓯᖃᕐᓇᕐᑐᒥᒃ, ᐃᓄᒃ ᑐᖂᑉ ᓂᒐᖏᓐᓂᒃ ᓂᒍᕐᓯᖁᓪᓗᒍ.

¹⁵ ᐃᓱᒪᒃᓴᕐᓯᐅᑦᓯᐊᕐᓂᖅ ᓈᒻᒪᒋᔭᐅᓂᖃᕐᑎᑦᓯᕗᖅ, ᑐᑭᓯᒪᓂᖃᕋᓱᐊᖏᑦᑐᕐᓕ ᐊᑐᒐᒃᓴᖃᕐᐳᖅ ᐊᓯᕈᕐᑕᐅᓂᕐᒥᒃ.

¹⁶ ᑕᒤᑎᒍᑦ ᓯᕗᓂᒃᓴᑦᓯᐅᑦᓯᐊᕐᑐᖅ ᐱᓂᐊᕐᓂᖃᕐᐳᖅ ᖃᐅᔨᒪᓂᕐᒥᓄᑦ, ᓯᓔᑦᑐᕐᓕ ᓯᓔᓐᓂᕐᒥᒃ ᓴᖅᑭᔮᕐᑎᑦᓯᕗᖅ.

¹⁷ ᐱᐅᖏᑦᑐᖅ ᐅᖃᕆᐊᕐᑐᕐᑎᑕᐅᒐᒥ ᐃᓄᖕᓂᒃ ᑲᑕᒃᑎᑦᓯᕗᖅ ᐃᓱᐊᖏᑦᑐᒧᑦ, ᓱᓕᑦᓯᐊᕐᑑᓪᓕ ᐅᖃᕆᐊᕐᑐᕐᑎᑕᐅᓂᖓ ᐋᖅᑭᒃᑕᐅᓇᕐᐳᖅ.

¹⁸ ᐋᖅᑭᒋᐊᕐᑕᐅᑦᔪᑎᒥᓂᒃ ᑲᒪᖏᑦᑐᖅ ᐊᔪᕐᓴᕐᓇᕐᑐᒧᑦ ᐅᐱᒋᔭᐅᓐᓇᖏᑦᑐᒧᓪᓗ ᑎᑭᑎᓐᓂᐊᕐᐳᖅ, ᐃᓂᕐᑎᕐᑕᐅᑦᔪᑎᒥᓂᒡᓕ ᓈᓚᑦᓯᐊᕐᑐᖅ ᐅᐱᒋᔭᐅᓂᖃᕐᓂᐊᕐᐳᖅ.

¹⁹ ᐱᔪᒪᔭᒥᓂᒃ ᐱᔪᖅ ᓰᕐᓇᕐᐳᖅ ᑕᕐᓂᕐᒧᑦ, ᓯᓔᑦᑐᓪᓕ ᐱᐅᖏᑦᑐᒥᑦ ᓴᖑᔭᕆᐊᒃᓴᖅ ᓇᕐᕈᕗᑦ.

²⁰ ᓯᓚᑐᔪᓂᒃ ᐃᓅᖃᑎᖃᕐᐸᒃᑐᖅ ᓯᓚᑐᓕᕐᓂᐊᕐᐳᖅ, ᓯᓔᑦᑐᓂᒡᓕ ᐃᓅᖃᑎᓕᒃ ᐱᑦᓯᐊᕐᑕᐅᖏᓐᓂᕐᒥᒃ ᐅᖁᒤᒃᓴᐅᑎᖃᕐᓂᐊᕐᐳᖅ.

²¹ ᐱᓂᕐᓗᖕᓃᑦ ᐊᔪᕐᑐᓕᔪᓂᒃ ᒪᓕᒃᐳᑦ, ᐃᓱᐊᕐᑐᓪᓕ ᐱᐅᔪᒥᒃ ᐊᑭᓕᕐᑕᐅᑦᔪᑎᖃᕐᓂᐊᕐᐳᑦ.

²² ᐃᓄᑦᓯᐊᕙᒃ ᑭᖑᕐᖑᑎᔭᒃᓴᖁᑎᖃᕐᐳᖅ ᕿᑐᕐᖓᒥ ᕿᑐᕐᖓᖏᓐᓄᑦ, ᐊᔪᕐᑐᓕᔫᓪᓕ ᐊᒃᓗᐃᓐᓂᖓ ᐊᑐᐃᓐᓇᕈᕐᑕᐅᕗᖅ ᓇᓛᒎᕐᑐᒧᑦ.

²³ ᐊᒃᓗᔫᑉ ᐱᕈᕐᓰᕕᖁᑎᖓ ᐱᕈᕐᕕᐅᔪᓐᓇᕐᐳᖅ ᓂᕿᒃᓴᓂᒃ ᐊᒥᒐᖏᑦᑐᓂᒃ, ᐊᓯᐅᑎᑕᐅᑐᐃᓐᓇᕐᐳᓪᓕ ᐱᖁᔭᓂᒃ ᒪᓕᑦᓯᐊᖏᑦᑐᓄᑦ.

²⁴ ᐃᕐᓂᕐᒥᓂᒃ ᓱᒋᐊᕐᓯᔪᓐᓇᖏᑦᑐᖅ ᐃᕐᓂᕐᒥᓂᒃ ᓇᒡᓕᒍᓱᓐᖏᓚᖅ, ᓇᒡᓕᒍᓱᒃᑐᕐᓕ ᓱᒋᐊᕐᓯᑦᑍᓕᓂᐊᓐᖏᓚᖅ.

²⁵ ᐃᓱᐊᕐᑐᑦ ᓂᕿᒃᓴᖃᕐᐳᖅ ᐊᕿᐊᑦᑐᕈᑎᒃᓴᒥᓂᒃ, ᐱᐅᖏᑦᑐᓪᓕ ᐊᕿᐊᕈᖏᑦ ᐃᓗᓪᓕᕈᑎᒃᓴᖃᓐᖏᓚᑦ.