ᓲᓗᒨᓂᐅᑉ ᐅᖃᓪᓚᖕᓂᖏᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᐋᖅᑭᒋᐊᕐᑕᐅᓂᕐᒥᒃ ᖁᕕᐊᒋᔭᓕᒃ, ᖃᐅᔨᑎᑕᐅᓂᕐᒥᒃ ᖁᕕᐊᒋᔭᖃᕆᕗᖅ, ᐃᓂᕐᑎᕐᑕᐅᓂᕐᒥᒃ ᐱᐅᒃᓴᖏᑦᑐᖅ ᐃᓱᒪᖃᖏᑦᑑᕗᖅ

² ᐃᓄᑦᓯᐊᕙᐅᔪᖅ ᐊᑕᓂᕐᒧᑦ ᖁᕕᐊᒋᔭᐅᓂᖃᕐᐳᖅ, ᐱᐅᖏᑦᑐᓂᒡᓗ ᐱᓇᓱᐊᕈᒪᓂᕾᓐᓇᕐᑐᖅ ᐊᑕᓂᐅᑉ ᑐᖁᔪᒃᓴᖁᑎᒋᕚ.

³ ᐃᓄᒃ ᐃᓂᖃᑦᓯᐊᕈᓐᓇᓐᖏᓚᖅ ᐱᐅᖏᑦᑐᒧᑦ ᐊᐅᓚᑕᐅᔪᒥ, ᐃᓱᐊᕐᑐᓪᓕ ᐃᓂᒋᔭᖓᑦ ᐊᐅᓚᑦᔭᒃᑕᐅᔪᓐᓇᓐᖏᓚᖅ.

⁴ ᓄᓕᐊᑦᓯᐊᕙᐅᔪᖅ ᐅᐃᖓᑕ ᓂᐊᖂᑎᒋᕚ, ᓄᓕᐊᕐᓕ ᑲᓐᖑᓇᕐᑐᒦᑎᑦᓯᔪᖅ ᐅᐃᖓᑕ ᓴᐅᓂᖏᓐᓂᒃ ᐊᐅᓂᕈᕐᑎᑦᓯᔪᑎᑐᑦ ᑍᒤᑉᐳᖅ.

⁵ ᐃᓱᐊᕐᑑᑉ ᐃᓱᒪᒋᔭᖏᑦ ᐊᑦᔨᒌᒃᑎᑦᓯᓂᐅᕗᑦ ᐱᐅᖏᑦᑑᓪᓕ ᐃᓱᒪᒃᓴᕐᓯᐅᖃᑎᒌᖕᓂᕆᔭᖏᑦ ᑕᑎᒋᔭᒃᓴᐅᓐᖏᓚᑦ.

⁶ ᐱᐅᖏᑦᑐᑦ ᐅᖃᐅᓯᖏᑦ ᐅᑕᖅᑭᓂᐅᕗᑦ ᑐᖁᑦᓯᔪᒪᓂᕐᒧᑦ ᐃᓱᐊᕐᑐᓪᓕ ᐅᖃᐅᓯᖏᑦ ᐃᓄᖕᓂᒃ ᓴᐳᑦᔨᕗᑦ.

⁷ ᐱᐅᖏᑦᑐᑦ ᓴᓚᐅᔭᕌᖓᒥᒃ ᐊᓯᐅᑐᐃᓐᓇᕐᐸᒃᐳᑦ, ᐃᓱᐊᕐᑐᓪᓕ ᓇᔪᒐᖏᑦ ᒪᑭᑕᓂᐊᕐᐳᑦ.

⁸ ᐊᖑᑦ ᐅᖃᐅᓯᐅᑦᓯᐊᕐᐸᒃᐳᖅ ᐱᐅᔪᓂᒃ ᐃᓱᒪᖃᕐᓂᖓ ᐱᓪᓗᒍ, ᐱᐅᖏᑦᑐᓂᒡᓕ ᐃᓱᒪᖃᕐᑐᖅ ᓇᕐᕈᒋᔭᐅᒐᔪᒃᐳᖅ.

⁹ ᐱᐅᓂᕐᓴᐅᕗᖅ ᓱᓇᐅᔪᕆᔭᐅᖏᑦᑐᖅ ᐃᒻᒥᓄᑦ ᐱᓇᓱᐊᕐᑐᖅ, ᐃᒻᒥᓂᒃ ᐊᖏᒃᓕᑎᕐᓯᒪᔪᒥᑦ ᓂᕿᒃᓴᖃᓚᐅᕐᓯᒪᖏᑦᑐᒥᑦ.

¹⁰ ᐃᓱᐊᕐᑑᑉ ᐆᒪᔪᖁᑎᒥ ᐃᓅᓯᖏᑦ ᑲᒪᒋᑦᓯᐊᕐᐰᑦ, ᐱᐅᖏᑦᑑᓪᓕ ᑲᒪᑦᓯᐊᕐᑑᔭᕐᓂᖏᑦ ᐋᓐᓂᐊᑎᑦᓯᑦᔪᑎᒋᕔᑦ.

¹¹ ᓄᓇᖁᑎᒥᓂᒃ ᐱᕈᕐᓰᕕᓕᕆᑦᓯᐊᕐᓂᕐᒥᓄᑦ ᐱᕈᕐᑎᑕᒥᓄᑦ ᓂᕿᒃᓴᖃᕐᓂᐊᕐᐳᖅ, ᐊᑑᑎᒃᓴᖃᖏᑦᑐᓂᒡᓕ ᐱᓇᓱᐊᖃᑦᑕᕐᑐᖅ ᐃᓱᒪᒃᓴᕐᓯᐅᕈᓐᓇᓐᖏᓚᖅ.

¹² ᐱᐅᖏᑦᑐᑦ ᐱᐅᖏᑦᑐᓕᔪᑦ ᐱᓂᐊᕐᓂᖏᓐᓂᒃ ᑐᓱᕗᑦ, ᐃᓱᐊᕐᑐᓪᓕ ᐊᒫᖃᕐᐳᑦ ᐸᐅᕐᖓᓂᒃ ᐱᕈᕐᕕᐅᓕᕈᓐᓇᕐᑐᓂᒃ.

¹³ ᐃᓄᒃ ᐱᐅᖏᑦᑐᓂᒃ ᐅᖃᐅᓯᕐᒥᒍᑦ ᓈᒻᒪᖏᑦᑐᓕᓂᕐᒥᖕᓄᑦ ᓂᒐᕐᑎᑕᐅᓯᒪᕗᖅ, ᐃᓱᐊᕐᑐᓪᓕ ᓈᒻᒪᖏᑦᑐᓂᒃ ᐊᓂᒍᐃᓂᐊᕐᐳᑦ.

¹⁴ ᐊᖑᑦ ᐱᐅᔪᓂᒃ ᐅᖃᐅᓯᕐᒥᓄᑦ ᓈᒻᒪᒃᓯᑎᑕᐅᓯᒪᓂᐊᕐᐳᖅ ᐱᐅᔪᒥᒃ, ᐊᒡᒐᖏᑕᓗ ᐱᓇᓱᐊᕐᓂᖏᑦ ᐊᑭᓕᕐᑕᐅᑦᔪᑎᒋᓂᐊᕐᐰᑦ.

¹⁵ ᓯᓔᑦᑑᑉ ᐊᖅᑯᑎᒋᔭᓂ ᓈᒻᒪᒃᑐᑑᔪᕆᕚ, ᓯᓚᑐᔪᕐᓕ ᐃᓱᒪᓕᐅᕐᑕᐅᒍᓂ ᓈᓚᖕᓂᐊᕐᐳᖅ.

¹⁶ ᓯᓔᑦᑐᖅ ᓂᓐᖓᑐᐊᕋᒥ ᓇᓗᓇᕈᓐᓁᕇᕐᐳᖅ, ᐅᑦᔨᕐᑐᑦᓯᐊᕐᑐᕐᓕ ᒥᑕᐅᑎᒋᔭᐅᓂᕐᒥᓂᒃ ᑲᒪᓐᖏᓯᕐᑐᕈᓐᓇᕐᐳᖅ.

¹⁷ ᓱᓕᔪᒥᒃ ᐅᖃᐅᓯᖃᕐᑐᖅ ᐃᓱᐊᕐᑐᒥᒃ ᓇᓗᓁᕐᓯᔪᓐᓇᕐᐳᖅ, ᓱᓕᖏᑦᑑᓪᓕ ᐅᖃᐅᓯᕆᔭᖏᑦ ᐅᐃᕕᕆᒃᓯᕗᑦ.

¹⁸ ᐅᖃᐅᓯᕐᒥᖕᓂᒃ ᐅᑦᔨᕐᓱᕈᓐᓇᖏᑦᑑᑉ ᐅᖃᐅᓯᖏᑦ ᓴᕕᒡᔪᐊᑎᑐᑦ ᑲᐱᓯᕗᑦ, ᓯᓚᑐᔪᓪᓕ ᐅᖃᐅᓯᖏᑦ ᐋᖅᑭᒃᑕᐅᓐᓇᕐᐳᑦ.

¹⁹ ᓱᓕᑦᓯᐊᕐᑐᑦ ᐅᖃᐅᓰᑦ ᐳᐃᒍᕐᑕᐅᓂᐊᓐᖏᓚᑦ ᐃᓱᖃᖏᑦᑐᒧᑦ, ᓴᒡᓗᑐᔫᓪᓕ ᐅᖃᐅᓯᖏᑦ ᑕᕝᕔᓐᓇᖅ ᐊᓯᐅᕗᑦ.

²⁰ ᐅᐃᕕᕆᒃᓯᓂᖅ ᐆᒻᒪᑎᖓᓂᑉᐳᖅ ᐱᐅᖏᑦᑐᓂᒃ ᐃᓱᒪᒃᓴᕐᓯᐅᕈᑎᖃᕐᑐᓄᑦ, ᐃᓱᒪᒃᓴᕐᓯᐅᑦᓯᐊᕐᑐᓪᓕ ᐱᐅᔪᓂᒃ ᖁᕕᐊᓱᖕᓂᕐᒦᑉᐳᑦ.

²¹ ᐃᓱᐊᕐᑐᑦ ᕿᒃᓵᖕᓇᕐᑐᓄᑦ ᓵᓚᐅᓂᐊᓐᖏᓚᑦ, ᐱᐅᖏᑦᑐᓪᓕ ᖃᓄᐃᓐᓇᕐᑐᓄᑦ ᐅᒋᐊᕐᑕᐅᓯᒪᓂᐊᕐᐳᑦ.

²² ᓴᒡᓗᑐᔪᓂᒃ ᐅᖃᐅᓯᓖᑦ ᐊᑕᓂᐅᑉ ᓇᕐᕈᒋᕔᑦ, ᐱᓂᐊᕐᓂᖃᕐᑐᓪᓕ ᒪᓕᑦᓯᐊᖏᓐᓇᕐᓗᑎᒃ ᖁᕕᐊᒋᕔᑦ.

²³ ᓯᕗᓂᒃᓴᒥᒃ ᐃᓱᒪᑦᓯᐊᕈᓐᓇᕐᑑᑉ ᖃᐅᔨᒪᑎᑕᐅᓂᓂ ᐃᔨᕐᓯᒪᕚ, ᓯᓔᑦᑐᕐᓕ ᓇᓗᓁᕐᓯᕙᒃᐳᖅ ᓯᓔᕐᕆᔭᐅᓂᕐᓂᒃ.

²⁴ ᐊᔪᐃᓐᓇᕐᓗᓂ ᐱᓇᓱᐊᓪᓚᕆᒃᐸᒃᑐᖅ ᐊᐅᓚᑦᓯᔨᓐᖑᕈᒫᕐᐳᖅ, ᐃᕿᐊᑦᑕᕐᓕ ᐃᓱᒪᕐᓱᕐᕕᖃᖏᓪᓗᓂ ᐃᖅᑲᓁᔭᕐᑎᑕᐅᓂᐊᕐᐳᖅ.

²⁵ ᐃᓱᒪᔮᕈᑎᖃᓗᐊᕐᑐᖅ ᐆᒻᒪᑎᒥᒍᑦ ᖁᕕᐊᓇᖏᑦᑐᒦᓕᕈᓐᓇᕐᐳᖅ, ᐅᖃᐅᑦᔭᐅᑦᓯᐊᕐᓂᕐᒧᓪᓕ ᖁᕕᐊᑦᓴᒃᑎᑕᐅᔪᓐᓇᕐᐳᖅ.

²⁶ ᐃᓄᒃ ᐃᓱᐊᕐᑐᖅ ᐅᖃᐅᑦᔨᑦᓯᐊᕐᐸᒃᐳᖅ ᒪᓕᒐᒃᓴᓂᒃ ᐃᓚᓐᓇᕆᔭᒥᓄᑦ, ᐱᐅᖏᑦᑐᓪᓕ ᐊᖅᑯᑎᒋᑦ ᑕᒻᒪᕐᑎᑦᓯᕗᑦ.

²⁷ ᐃᕿᐊᑦᑍᑦ ᐆᒪᔪᕐᑕᒥᖕᓂᒃ ᓂᕆᔭᒃᓴᓕᐅᕈᓐᓇᓐᖏᓚᑦ, ᐊᔪᐃᓐᓇᕐᑐᓪᓕ ᐊᔪᕐᓴᖏᑦᔪᑎᒃᓴᕐᓯᓂᐊᕐᐳᖅ.

²⁸ ᐃᓱᐊᕐᑐᓕᓂᐅᑉ ᐊᖅᑯᑎᖓᓂ ᐃᓅᓯᐅᕗᖅ, ᐊᖅᑯᑎᒋᔭᖓᓂᓗ ᑐᖁᓐᓇᕐᑐᕐᑕᖃᓐᖏᓚᖅ.