ᓲᓗᒨᓂᐅᑉ ᐅᖃᓪᓚᖕᓂᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᓴᒡᓗᕿᑦᓯᓪᓗᑎᒃ ᐅᖁᒤᓐᓂᓂᐊᕈᑎᑎᒍᑦ ᐊᑭᓕᕐᑐᐃᔪᑦ ᐊᑕᓂᐅᑉ ᓇᕐᕈᒋᕔᑦ, ᓱᓕᓪᓗᑎᒡᓕ ᐅᖁᒤᓐᓂᕐᓯᐅᑎᓂᒃ ᐊᑐᕐᑐᑦ ᐊᑕᓂᐅᑉ ᖁᕕᐊᒋᕔᑦ.

² ᐱᐅᔪᕆᓂᖅ ᐊᑐᕐᑕᐅᓕᕋᖓᑦ ᑕᕝᕙ ᑲᓐᖑᓲᑎᒃᓴᑦ ᕾᒋᕗᑦ, ᒥᑭᒡᓕᑎᕐᓯᒪᔪᕐᓕ ᓯᓚᑐᓂᖃᕐᐳᖅ.

³ ᐃᓱᐊᕐᑑᑉ ᓱᓕᑦᓯᐊᕐᓂᖅ ᑕᓯᐅᕐᑎᒋᕚ, ᓱᓕᑦᓯᐊᕋᓱᐊᖏᑦᑐᓪᓕ ᐱᑦᓯᐊᖏᓐᓂᕐᒧᑦ ᐊᓯᕈᕐᑕᐅᕗᑦ.

⁴ ᐊᒃᓗᐃᓐᓂᖅ ᓴᐳᑦᔨᓯᒪᔪᓐᓇᓐᖏᓚᖅ ᓂᓐᖓᖕᓂᐅᑉ ᐅᓪᓗᖓᓂ, ᐃᓱᐊᕐᓂᕐᓕ ᓴᐳᑦᔨᔪᓐᓇᕐᐳᖅ ᑐᖁᒥᑦ.

⁵ ᐃᓱᐊᕐᑐᒥ ᐃᓅᔪᖅ ᐸᓯᔭᒃᓴᐅᖏᓐᓂᕐᒥᓄᑦ ᐃᓱᐊᕐᑐᒦᑎᑕᐅᕗᖅ, ᐱᐅᖏᑦᑐᕐᓕ ᐱᐅᖏᑦᑐᓕᓂᕐᒥᓄᑦ ᑲᑕᒃᑎᑕᐅᕗᖅ.

⁶ ᐃᓱᐊᕐᑐᒥ ᐃᓅᔪᖅ ᓇᓛᒎᕐᓂᕐᒥᓄᑦ ᓴᐳᑦᔭᐅᓯᒪᓂᐊᕐᐳᖅ, ᐃᓱᐊᖏᑦᑐᒥᓕ ᐃᓅᔪᖅ ᑎᒍᔭᐅᑎᑉᐳᖅ ᐃᒡᓕᒍᖕᓂᕐᒥᓄᑦ.

⁷ ᐱᐅᖏᑦᑐᖅ ᑐᖁᒐᒥ, ᓂᕆᐅᒋᔭᖏᑦᑕᐅᖅ ᑐᖁᖃᑕᐅᕗᑦ, ᐃᓱᐃᑦᑐᓪᓗ ᐱᓇᓱᐊᕈᒪᓯᒪᔭᖏᑦ ᓄᖅᑲᕐᐳᑦ.

⁸ ᐃᓱᐊᕐᑐᑦ ᓴᐳᑦᔭᐅᓯᒪᓂᐊᕐᐳᑦ ᐊᑲᐅᖏᑦᑐᒥᑦ, ᐱᐅᖏᑦᑐᓪᓗ ᑎᑭᐅᑎᖔᕐᓂᐊᕐᐳᑦ ᐊᑲᐅᖏᑦᑐᒧᑦ.

⁹ ᑕᒃᑯᕐᒨᕐᑐᖅ ᐅᖃᐅᓯᕐᒥᓄᑦ ᐃᓅᖃᑎᒥᓂᒃ ᐊᓯᕈᐃᔪᓐᓇᕐᐳᖅ, ᐃᓱᐊᕐᑑᓪᓕ ᖃᐅᔨᒪᓂᖓᒍᑦ ᓴᐳᑦᔭᐅᓂᕐᑕᖃᕐᐳᖅ.

¹⁰ ᐃᓱᐊᕐᑐᑦ ᐱᕙᓪᓕᐊᑦᓯᐊᓕᕌᖓᑕ ᐃᒡᓗᒐᓴᒡᔪᐊᑦ ᖁᕕᐊᓱᓕᕐᐸᒃᐳᑦ, ᐱᐅᖏᑦᑐᓪᓕ ᐊᓯᕈᕐᑕᐅᔭᕌᖓᑕ ᓯᕆᓂᕐᒧᑦ ᖁᕕᐊᓱᖕᓂᕐᑕᖃᕐᐳᖅ.

¹¹ ᐃᓱᐊᕐᑐᑦ ᓮᒻᒪᕐᑎᑦᓯᓂᖏᓐᓄᑦ ᐃᒡᓗᒐᓮᑦ ᐊᖏᔪᕈᕐᑎᑕᐅᕗᑦ, ᐱᐅᖏᑦᑐᓪᓕ ᐅᖃᐅᓯᖏᓐᓄᑦ ᓯᖁᒥᑕᐅᓯᒪᑦᓯᐊᕈᓐᓇᕐᐳᑦ.

¹² ᐃᓅᖃᑎᒥᓂᒃ ᒥᑭᒡᓕᑎᕆᔪᖅ ᑐᑭᓯᐅᒪᓂᖃᓐᖏᓚᖅ, ᓯᓚᑐᓂᖃᕐᑐᕐᓕ ᓂᓪᓕᐊᑦᔪᑎᖃᓐᖏᓚᖅ.

¹³ ᐅᖃᐅᓯᕐᓂᒃ ᒥᓇᕋᕐᑎ ᑐᓴᕐᑕᐅᔭᕆᐊᖃᖏᑦᑐᓂᒃ ᓴᖅᑭᑎᕆᕗᖅ, ᐅᒃᐱᕆᔭᒃᓴᐅᔪᕐᓕ ᑐᓴᕐᑕᐅᔭᕆᐊᖃᖏᑦᑐᓂᒃ ᓴᖅᑭᑎᑦᓯᓐᖏᓚᖅ.

¹⁴ ᐅᖃᐅᑦᔨᒋᐊᕐᑎᒃᓴᖃᖏᑦᑐᑦ ᐃᓄᐃᑦ ᐅᕐᕈᕙᒃᐳᑦ, ᐃᑲᔪᕐᑎᒃᓴᓂᒡᓕ ᐊᒥᒐᕐᓯᖏᑦᑐᑦ ᓴᐳᑦᔭᐅᕕᒃᓴᖃᕐᐳᑦ.

¹⁵ ᖃᐅᔨᒪᔮᕆᓐᖏᑕᒥᓂᒃ ᐱᑦᔪᑦᔨᔪᒪᔪᖅ ᐅᒍᐊᓕᕈᒫᕐᐳᖅ, ᐱᑦᔪᑦᔨᑲᑕᑐᐃᓐᓇᕈᒪᖏᑦᑐᕐᓕ ᐅᒡᒍᐊᕈᑎᒃᓴᖃᕐᓂᐊᓐᖏᓚᖅ.

¹⁶ ᐊᕐᓇᐅᑉ ᐃᓄᑦᓯᐊᕙᐅᓂᖓᑕ ᐅᐱᒋᔭᐅᓂᕐᑖᕐᑎᑉᐹ, ᐊᖑᑎᓪᓕ ᓇᒡᓕᖕᓂᖃᖏᑦᑐᑦ ᐊᒃᓗᐃᑦᔪᑎᓂ ᐱᑐᐊᕆᕔᑦ.

¹⁷ ᐊᖑᑦ ᓂᑲᒍᓱᖕᓂᖃᑦᓯᐊᕐᑐᖅ ᐃᓅᑦᓯᐊᕈᑎᒃᓴᓕᐅᕐᐳᖅ ᐃᒻᒥᓄᑦ, ᐊᑦᑕᕆᔭᖃᖏᑦᑐᕐᓕ ᑎᒥᒥᓄᑦ ᐃᓱᐊᖏᑦᔪᑎᒃᓴᓕᐅᕐᐳᖅ.

¹⁸ ᐊᖑᑦ ᐱᐅᖏᑦᑐᖅ ᓯᓔᕐᕆᒃᓯᓇᓱᐊᕐᓂᕐᒥᒃ ᐱᓂᐊᕐᓂᖃᕋᔪᒃᐳᖅ, ᐃᓱᐊᕐᓂᒥᒡᓕ ᐱᓂᐊᕈᑎᓕᒃ ᐱᑖᕐᑎᑕᐅᓗᓂ ᑭᓯᐊᓂᐅᕗᖅ.

¹⁹ ᐃᓱᐊᕐᑐᒥᒃ ᑲᔪᓯᔪᖅ ᐃᓅᔪᒫᕐᐳᖅ, ᐱᐅᖏᑦᑐᒥᒡᓕ ᐱᓇᓱᐊᕐᑐᖅ ᑐᖁᔪᒫᕐᐳᖅ.

²⁰ ᐱᐅᖏᑦᑐᓂᒃ ᐃᓱᒪᓖᑦ ᐊᑕᓂᕐᒧᑦ ᓇᕐᕈᓇᕐᐳᑦ, ᐱᓂᐊᕐᓂᕐᒥᒃᑎᒍᓪᓕ ᐸᓯᔭᒃᓴᐅᓂᖃᖏᑦᑐᑦ ᖁᕕᐊᒋᕔᑦ.

²¹ ᖃᐅᔨᒪᓕᕆᑦ, ᐱᐅᖏᑦᑐᑦ ᓱᒋᐊᕐᑕᐅᓐᖏᓮᓐᓇᕐᓂᐊᓐᖏᓚᑦ, ᐃᓱᐊᕐᑐᓪᓕ ᐱᓂᐊᕐᓯᒪᔭᒥᖕᓄᑦ ᐊᓐᓇᒃᑎᑕᐅᓂᐊᕐᐳᑦ.

²² ᑰᒃᑰᓯ ᒎᓗᒥᒃ ᐳᑐᓕᖕᒥᒃ ᕿᖓᕐᒥᐅᑦᓯᕐᑕᐅᓯᒪᔪᖅ, ᐊᑦᔨᖃᕐᐳᖅ ᐊᕐᓇᑦᓯᐊᕙᖕᒥᒃ ᐅᑦᔨᕐᓱᖏᑦᑐᒥᒃ.

²³ ᐃᓱᐊᕐᑐᑦ ᐱᔪᒪᔭᖃᕐᐳᑦ ᐱᐅᔪᓂᒃ, ᐱᐅᖏᑦᑐᓪᓕ ᓂᕆᐅᒋᔭᒃᓴᑐᐊᖃᕐᐳᑦ ᓂᓐᖓᐅᒪᓂᕐᒥᒃ.

²⁴ ᑐᓂᐅᖅᑬᖃᑦᑕᕐᑐᖅ ᐊᓐᓂᕈᓱᒐᓂ ᐊᔪᕐᓴᕈᓐᓃᕐᐸᓪᓕᐊᕗᖅ, ᐊᓯᐊᓕ ᐱᓯᒪᓇᓱᐊᕐᑐᖅ ᑐᓂᔭᕆᐊᖃᕐᑕᒥᓂᒃ, ᐊᔪᕐᓴᓕᕈᓐᓇᕐᐳᖅ.

²⁵ ᐊᓐᓂᕈᓱᖏᑦᑐᖅ ᐊᒃᓗᐃᓕᓂᐊᕐᐳᖅ, ᐃᒥᕐᑎᑦᓯᔪᕐᓗ ᐃᒥᕐᑎᑕᐅᓂᐊᕆᓪᓗᓂ.

²⁶ ᓂᐊᖂᔭᒃᓴᓂᒃ ᑭᓯᕐᖔᕐᓯᔪᖅ ᐃᓱᒪᓂᕐᓗᒡᕕᐅᓕᕐᓂᐊᕐᐳᖅ, ᓂᐅᕐᕈᑎᖃᖃᑦᑕᕐᑐᕐᓕ ᓮᒻᒪᕐᑎᑕᐅᓂᐊᕐᐳᖅ.

²⁷ ᐱᐅᔪᒥᒃ ᐊᔪᐃᓐᓈᖃᕐᓗᓂ ᕿᓂᕐᑐᖅ ᐅᐱᒋᔭᐅᓂᒃᓴᕐᓯᕗᖅ, ᐱᐅᖏᑦᑐᒥᒡᓕ ᕿᓂᕐᑐᖅ ᐃᓱᐊᖏᑦᑐᒧ ᑎᑭᐅᑎᓂᐊᕐᐳᖅ.

²⁸ ᐊᒃᓗᐃᑦᔪᑎᒥᓂᒃ ᑕᑎᖃᕐᑐᖅ ᓄᖑᕈᑎᓂᐊᕐᐳᖅ, ᐃᓱᐊᕐᑐᕐᓕ ᐆᒻᒪᕐᑎᑐᑦ ᐅᖃᐅᔭᕐᑎᑐᑦ ᐱᕈᕐᐸᓪᓕᐊᓂᐊᕐᐳᖅ.

²⁹ ᐃᒡᓗᒥᐅᖃᑎᒥᓂᒃ ᐃᓱᐊᖏᑦᑐᒦᑎᑦᓯᔪᖅ ᐊᓄᕆᒥᒃ ᑭᖑᕐᖑᑦᔨᓂᐊᕐᐳᖅ, ᓯᓔᑦᑐᕐᓗ ᐱᔨᒋᔭᐅᓂᐊᕐᐳᖅ ᓯᓚᑐᔪᒧᑦ.

³⁰ ᐃᓱᐊᕐᑐᖅ ᐸᐅᕐᖓᖃᕐᐳᖅ ᓇᐹᕐᑐᒥᒃ ᐃᓅᓯᖃᕐᓇᕐᑐᒥᒃ, ᐱᖁᔭᖃᖏᑦᑐᕐᓕ ᐃᓅᓯᕐᒥᒃ ᐃᓱᓕᑎᑦᓯᕗᖅ.

³¹ ᐃᓱᐊᕐᑐᑦ ᐱᓂᐊᕐᓂᖏᑦ ᐊᑭᓕᕐᑕᐅᔪᓐᓇᕐᐸᑕ ᓄᓇᒥ, ᑕᕝᕙᓕᑭᐊᖅ ᒎᑎᖃᖏᑦᑐᑦ ᐊᔪᕐᑐᓕᔪᓪᓗ ᐱᓂᐊᕐᕕᐅᓂᕐᓴᐅᓂᐊᕐᐳᑦ ᐱᓂᐊᕐᓂᖏᑦ ᒪᓕᒡᓗᒋᑦ.