ᐰᓕᒨᓂᒧᑦ 1 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᓗᓁᕐᓯᑦᔪᑏᑦ

¹ ᐸᐅᓗᓯᒥᑦ, ᑎᒍᔭᐅᓯᒪᔪᒥᑦ ᔩᓱᓯ ᙭ᔅᑑᓯ ᐱᑦᔪᑎᒋᓪᓗᒍ, ᑎᑎᕋᕐᐳᒍᒃ ᐅᒃᐱᕐᑑᖃᑎᕗᓪᓗ ᑎᒧᑎ, ᐃᓚᓐᓇᕆᔭᑦᑎᓐᓄᑦ ᐱᓇᓱᐊᖃᑎᑦᑎᓐᓄᓪᓗ ᐰᓕᒨᓂᒧᑦ,

² ᐃᓚᒌᒃᑐᓄᓪᓗ ᐃᒡᓗᑦᓯᓐᓂ ᑲᑎᒪᖃᑦᑕᕐᑐᓄᑦ, ᓇᔭᑦᑎᓐᓄᓪᓗ ᐊᐱᐊᒧᑦ, ᐅᓇᑕᕐᑎᐅᖃᑎᑦᑎᓐᓄᓪᓗ ᐋᑭᐸᓯᒧᑦ.

³ ᒎᑎᐅᑉ ᐊᑖᑕᑦᑕ ᐊᑕᓂᐅᓪᓗ ᔩᓱᓯ ᙭ᔅᑑᓯᐅᑉ ᑐᓂᓯᕕᒋᓕᓯ ᐱᔪᓐᓇᕐᑎᑦᓯᓂᕐᒥᓂᒃ ᓮᒻᒪᕐᑎᑦᓯᓂᕐᒥᓂᒡᓗ.

ᐰᓕᒨᓂᐅᑉ ᓇᒡᓕᖕᓂᖓ ᐅᒃᐱᕐᓂᖓᓗ

⁴ ᑍᒪᓐᖓᑦ ᑐᒃᓯᐊᓕᕌᖓᒪ ᐃᖅᑲᐅᒪᖃᑦᑕᕐᐸᒋᑦ ᒎᑎᒧᓪᓗ ᖁᔭᓕᑦᔪᑎᒋᖃᑦᑕᕐᐸᒋᑦ.

⁵ ᑐᓴᕐᑎᑕᐅᓯᒪᒐᒪ ᐃᑦᔪᕐᓁᑎᑕᐅᓯᒪᔪᓕᒫᓄᑦ ᓇᒡᓕᒍᓱᖕᓂᕐᓂᒃ ᐅᒃᐱᕐᓂᓂᒃᓗ ᐊᑕᓂᕐᒧᑦ ᔩᓱᓯᒧᑦ.

⁶ ᑐᒃᓯᐊᕐᐳᖓᓗ ᐅᒃᐱᕐᓂᕐᓂᒃ ᐅᖃᐅᓯᖃᖃᑦᑕᖁᓪᓗᑎᑦ ᐃᓅᖃᑎᖕᓄᑦ ᖃᐅᔨᑦᔪᑕᐅᖁᓪᓗᒍ ᓮᒻᒪᕐᑎᑕᐅᓂᕆᔭᑦᑎᓐᓂᒃ ᙭ᔅᑑᓯᒥ.

⁷ ᐅᒃᐱᕐᑑᖃᑎᒐ ᓇᒡᓕᖕᓇᕐᑐᑎᑦ, ᓇᒡᓕᖕᓂᕐᓄᑦ ᐊᖏᔪᐊᓗᖕᒥᒃ ᖁᕕᐊᓱᒃᑎᑕᐅᕗᖓ ᐱᕙᓪᓕᕐᑎᑕᐅᓪᓗᖓᓗ, ᐃᑦᔪᕐᓁᑎᑕᐅᓯᒪᔪᓕᒫᑦ ᐆᒻᒪᑎᒥᒍᑦ ᖁᕕᐊᓱᒃᑎᑕᐅᓯᒪᖕᒪᑕ ᐱᑦᔪᑎᒋᓪᓗᑎᑦ.

ᐅᓂᓯᒪᓯᐅᑉ ᐃᓚᓕᐅᕐᑕᐅᖁᔭᐅᓂᖓ

⁸ ᑍᒤᒻᒪᑦ ᓯᕘᕋᖏᓪᓗᖓ ᙭ᔅᑑᓯᒥ ᐅᖃᕐᕕᒋᔪᓐᓇᕋᓗᐊᕐᐸᒋᑦ ᐱᔭᕆᐊᖃᓪᓚᕆᒃᑐᒥᒃ ᐱᖁᓪᓗᑎᑦ,

⁹ ᓇᒡᓕᒋᒐᒃᑭᓪᓕ ᕿᓄᕕᒋᑐᐃᓐᓇᓕᕐᐸᒋᑦ, ᐅᕙᖓ ᐸᐅᓗᓯ, ᒫᓐᓇ ᑎᒍᔭᐅᓯᒪᕕᖕᒦᑦᑐᖓ ᔩᓱᓯ ᙭ᔅᑑᓯ ᐱᑦᔪᑎᒋᓪᓗᒍ.

¹⁰ ᕿᓄᕕᒋᕙᒋᑦ ᐅᓂᓯᒪᓯ ᐱᑦᔪᑎᒋᓪᓗᒍ, ᑖᓐᓇ ᐃᕐᓂᕐᑖᕆᓚᐅᕋᒃᑯ ᙭ᔅᑑᓯᒥ; ᑎᒍᔭᐅᓯᒪᕕᖕᒦᑎᓪᓗᖓ ᐊᓂᕐᓂᒃᑯᑦ ᐊᑖᑕᑖᕆᓚᐅᕐᒪᖓ.

¹¹ ᑍᑦᓱᒪᓂ ᐊᑑᑎᒃᓴᖃᓚᐅᓐᖏᓚᖅ ᐃᓕᖕᓄᑦ, ᒫᓐᓇᓕ ᐊᑑᑎᒃᓴᖃᒻᒪᕆᓕᕐᐳᖅ ᐃᓕᖕᓄᑦ ᐅᕙᓐᓄᓪᓗ.

¹² ᒫᓐᓇ ᐃᓕᖕᓄᑦ ᐅᑎᕐᑎᓕᕐᐸᕋ, ᐅᕙᖓᐅᔮᕐᑎᓪᓗᒍ ᐃᓚᓕᐅᓚᐅᕈᒃ.

¹³ ᐱᓯᒤᓐᓇᕈᒪᔭᕋᓗᐊᕋ, ᑎᒍᔭᐅᓯᒪᓂᓐᓂ ᐅᖃᐅᓰᑦ ᑐᓴᕈᒥᓇᕐᑐᑦ ᐱᑦᔪᑎᒋᓪᓗᒋᑦ, ᐅᕙᓐᓂᒃ ᐃᑲᔪᕈᓐᓇᖁᓪᓗᒍ ᐃᓇᖏᕐᓗᑎᑦ.

¹⁴ ᖃᐅᔨᓐᖏᑎᓪᓗᒋᓪᓕ ᐋᖅᑭᒃᓯᔪᒪᓐᖏᓇᒪ ᐱᓇᓱᐊᕈᒪᔭᓐᓂᒃ ᐱᔪᒪᔧᓪᓕ ᐊᑐᑦᓯᐊᕐᓗᒍ ᐱᖁᕙᒋᑦ ᐱᓇᓱᐊᕈᒪᓪᓗᖓ ᐊᖏᖃᑎᒋᓯᒪᑦᓯᐊᕐᓗᑎᑦ.

¹⁵ ᐃᒻᒪᖄ ᑖᓐᓇ ᐃᓕᖕᓂᑦ ᑭᒤᓚᐅᕐᓂᕐᐳᖅ ᑕᒪᓐᓇ ᐱᑦᔪᑎᒋᓪᓗᒍ, ᐱᓯᒤᓐᓇᕈᓐᓇᓛᕋᕕᐅᒃ ᑍᒪᓐᖓᓕᒫᖅ,

¹⁶ ᒫᓐᓇ ᐱᔨᑐᑦ ᑍᒤᑦᓱᓐᓁᕐᐳᖅ ᐱᔨᒥᓪᓕ ᐱᓪᓚᕆᐅᓂᕐᓴᐅᓕᕐᐳᖅ, ᓇᒡᓕᖕᓇᕐᑑᓪᓗᓂᓕ ᐅᒃᐱᕐᑑᖃᑎᐅᓕᕐᐳᖅ, ᐅᕝᕙᓐᓄᑦ ᐃᓕᖕᓄᓪᓕ ᐊᑐᕐᓇᕐᓂᕐᓴᐅᓕᕐᐳᖅ, ᑎᒥᒃᑯᑦ ᐊᑕᓂᕐᒥᓗ.

¹⁷ ᐱᓇᓱᐊᖃᑎᓪᓚᕆᒃᑐᑦ ᐃᓱᒪᒋᒍᕕᖓ, ᑐᓐᖓᓱᒃᑎᓐᓂᐊᕐᐸᑦ ᐅᕙᖓᐅᔮᕐᑎᓪᓗᒍ.

¹⁸ ᐃᓕᖕᓄᑦ ᓈᒻᒪᖏᑐᓕᓚᐅᕐᐸᑦ, ᐅᕝᕙᓗ ᐊᑭᓕᒃᓴᖃᓚᐅᕐᓂᕐᐸᑦ ᓱᓇᑐᐃᓐᓇᕐᒥᒃ, ᐅᕙᓐᓄᑦ ᐊᑭᓕᒐᒃᓴᐅᑎᓐᓂᐊᕐᐸᑎᑦ.

¹⁹ ᑖᒃᑯᐊ ᒫᓐᓇ ᑎᑎᕋᕐᑕᒃᑲ ᓇᖕᒥᓂᖅ ᐅᕙᖓ ᐸᐅᓗᓯ ᐊᒡᒐᓐᓄᑦ ᑎᑎᕋᕐᐸᒃᑲ, ᐅᕙᖓ ᐊᑭᓕᕈᒫᕐᐸᒋᑦ; ᐅᕙᓐᓄᑦ ᐊᑭᓕᒃᓴᖃᕐᓂᕋᕐᓗᑎᑦ ᐅᖃᖏᒃᑲᓗᐊᕐᐳᖓ ᐃᓕᖕᓂᒃ ᓇᖕᒥᓂᖅ ᐊᑭᓕᒃᓴᕆᒐᕕᑦ ᐅᕙᓐᓄᑦ.

²⁰ ᐃᓛᒃ ᐅᒃᐱᕐᑑᖃᑎᒐ, ᖁᕕᐊᒋᔭᓐᓂᒃ ᐱᓇᓱᐊᖁᕙᒋᑦ ᐊᑕᓂᕐᒥ. ᐆᒻᒪᑎᒃᑯᑦ ᖁᕕᐊᓱᒃᑎᓚᐅᓐᖓ.

²¹ ᖁᓚᓐᖏᓚᖓ ᐱᓇᓱᐊᕐᑕᐅᖁᔭᓐᓂᒃ ᓈᓚᖕᓂᐊᕋᕕᑦ, ᑖᒃᑯᓂᖓ ᑎᑎᕋᐅᑎᒋᔭᓐᓂᒃ, ᖃᐅᔨᒪᓪᓗᖓ ᐅᖃᐅᓯᕆᔭᒪ ᐊᒡᓛᑦ ᐅᖓᑖᓄᑦ ᐱᓇᓱᐊᑦᓯᐊᕐᓂᐊᕋᕕᑦ.

²² ᑍᒫᒃᑕᐅᖅ, ᓯᓂᒃᑕᕐᕕᒃᓴᓐᓂᒃ ᐋᖅᑭᓯᓯᒪᖁᕙᒋᑦ, ᓂᕆᐅᒃᑲᒪ ᑐᒃᓯᐊᕐᓂᓯ ᑭᐅᔭᐅᓂᐊᕐᒪᑕ ᐃᓕᖕᓄᑦ ᐅᑎᕈᓐᓇᖁᓪᓗᖓ.

ᐸᐅᓗᓯᐅᑉ ᑕᕝᕙᐅᕗᑏᕐᓂᖓ

²³ ᐃᐸᐳᕌᓯᐅᑉ, ᑎᒍᔭᐅᓯᒪᖃᑎᒪ ᔩᓱᓯ ᙭ᔅᑑᓯ ᐱᑦᔪᑎᒋᓪᓗᒍ ᑖᑦᓱᒪ ᑕᕝᕙᐅᕗᑏᕐᐹᑎᑦ,

²⁴ ᐅᑯᓇᓐᖓᓪᓗ ᐱᓇᓱᐊᖃᑎᓐᓂᑦ ᑕᕝᕙᐅᕗᑏᕐᑕᐅᒋᕗᑎᑦ ᒫᑯᓯᒧᑦ, ᐊᕆᔅᑕᑰᓯᒧᑦ, ᑏᒪᓯᒧᑦ, ᓘᑲᓯᒧᓪᓗ.

²⁵ ᐊᑕᓂᑦᑕ ᔩᓱᓯ ᙭ᔅᑑᓯᐅᑉ ᐱᑦᓯᐊᕐᓂᖓᑕ ᐱᔪᓐᓇᕐᑎᑦᓯᓂᖓᑕ ᐊᓂᕐᓂᓯ ᐃᓚᒋᓕᒋᑦ.