ᒨᓯᓯ ᓯᑕᒪᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᓇᓂᕈᐊᒃᑯᕖᑦ ᐃᓂᒋᔭᕆᐊᖃᕐᑕᖏᑦ

¹ ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

² “ᐂᕉᓂ ᐅᖃᐅᑎᓚᐅᕈᒃ ᐃᒤᓕᓗᒍ, ‘ᓇᓂᕈᐊᑦ ᐋᖅᑭᒃᓱᓕᕈᕕᒋᑦ, ᓇᓂᕈᐊᑦ 7 ᖃᐅᒪᑎᑦᓯᔭᕆᐊᖃᕐᐳᑦ ᓇᓂᕈᐊᖃᕐᕕᐅᑉ ᓯᕗᓂᖓᓂᒃ.’”

³ ᐂᕉᓂ ᑍᒫᒃ ᐱᓚᐅᕐᐳᖅ; ᓇᓂᕈᐊᑦ ᐃᓕᓚᐅᕐᐰᑦ ᓇᓂᕈᐊᖃᕐᕕᐅᑉ ᓯᕗᓂᖓᓂᒃ ᖃᐅᒪᑎᑦᓯᓪᓗᑎᒃ, ᐊᑕᓂᐅᑉ ᒨᓯᓯ ᐅᖃᐅᑎᓚᐅᕐᒪᒍ.

⁴ ᑖᓐᓇᓕ ᓇᓂᕈᐊᖃᕐᕕᒃ ᓴᓇᓯᒪᓚᐅᕐᐳᖅ ᒎᓗᒥᒃ ᑲᓱᐊᕐᓯᒪᔪᒥᒃ: ᓇᐸᔪᖓᓂᑦ ᐊᕙᓚᖓᔪᖏᓐᓄᑦ ᒎᓗ ᑲᓱᐊᕐᓯᒪᔪᖅ ᒪᓕᒡᓗᒍ ᓴᓇᓯᒪᔭᕆᐊᖃᕐᓂᖓ ᐊᑕᓂᐅᑉ ᒨᓯᓯᒧᑦ ᐅᖃᐅᓯᕆᓚᐅᕐᑕᖓ, ᑍᒫᒃ ᓴᓇᔭᐅᑎᓚᐅᕐᐰᑦ.

ᓕᕔᑎᑦ ᓴᓗᒻᒪᕐᑕᐅᓂᖏᑦ ᑐᓂᔭᐅᓂᖏᓪᓗ

⁵ ᐊᑕᓂᐅᑉ ᒨᓯᓯ ᐅᖃᕐᕕᒋᕚ ᐅᖃᕐᓗᓂ:

⁶ “ᓕᕔᑎᑦ ᓴᓂᕐᕙᒃᑭᑦ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ ᓴᓗᒻᒪᕐᓴᕐᓗᒋᓪᓗ ᑐᒃᓯᐅᑦᔭᐅᓂᒃᑯᑦ.

⁷ ᐃᒫᒃ ᐱᓂᐊᕐᐳᑎᑦ ᑖᒃᑯᓂᖓ ᓴᓗᒻᒪᕐᓮᓗᑎᑦ, ᐃᒥᕐᒧᑦ ᓯᕐᐸᕐᓴᕐᓗᒋᑦ ᓴᓗᒻᒪᕐᓮᑦᔪᑎᒋᓗᒍ, ᑎᒥᓕᒫᑎᒃ ᒥᖅᑯᐃᔭᕆᐊᖃᕐᐰᑦ, ᐊᓐᓄᕌᑎᒡᓗ ᐅᐊᓴᕐᓗᒋᑦ, ᐃᒻᒥᖕᓂᒃ ᓴᓗᒪᑦᓯᐊᓕᖁᓪᓗᒋᑦ.

⁸ ᑐᓂᕐᕈᓯᕆᐊᖃᕐᐳᑦ ᐃᒻᒧᒃᓯᐅᒐᕐᒥᒃ ᐊᖑᓴᓪᓗᕐᒥᒃ ᐃᓐᓇᐅᖏᑦᑐᒥᒃ ᐱᔭᕆᐊᖃᕐᐳᑦ ᓂᐊᖂᔭᒃᓴᒥᒡᓗ ᓯᖃᓪᓕᑦᓯᐊᕐᓯᒪᔪᒥᒃ ᐅᕐᓱᒥᒃ ᐃᓚᖃᕐᓗᒍ, ᐱᒃᑲᓐᓂᕆᐊᖃᕆᕗᑎᑦ ᐸᖕᓂᕐᒥᒃ ᐃᓐᓇᐅᖏᑦᑐᒥᒃ ᐊᔪᕐᓂᖅ ᐱᑦᔪᑎᒋᓗᒍ ᑐᓂᕐᕈᑎᒃᓴᒥᒃ.

⁹ ᑕᕝᕙ ᓕᕔᑎᑦ ᕾᑎᑦᓴᕆᐊᖃᕐᐸᑎᑦ ᑐᐱᕐᔪᐊᑉ ᑲᑎᒪᕕᐅᑉ ᓵᖓᓄᑦ, ᐃᓴᕆᐊᓕᐅᓪᓗ ᕿᑐᕐᖓᓕᒫᖏᑦ ᑲᑎᑎᑕᒃᓴᕆᕙᑎᑦ.

¹⁰ ᑍᒫᒃ ᓕᕔᑎᑦ ᐊᑕᓂᐅᑉ ᓵᖓᓄᑦ ᐱᑎᑦᓴᕆᐊᖃᕐᐸᑎᑦ, ᐃᓴᕆᐊᓕᐅᓪᓗ ᕿᑐᕐᖓᖏᑕ ᐊᒡᒐᒥᖕᓄᑦ ᐸᑎᒻᒥᔭᕆᐊᖃᕐᐰᑦ;

¹¹ ᐂᕉᓂᐅᓪᓗ ᓕᕔᑎᑦ ᐊᑕᓂᕐᒧᑦ ᑐᓂᔭᕆᐊᖃᕐᐰᑦ ᐃᓵᒃᑕᕈᑎᔭᐅᓗᑎᒃ ᑐᓂᕐᕈᑕᐅᔪᑎᑐᑦ ᐃᓴᕆᐊᓕᐅᑉ ᑭᑐᕐᖓᖏᓐᓂᑦ ᐱᓗᓂ, ᐊᑕᓂᐅᑉ ᐱᓂᐊᕐᑕᐅᖁᔭᖏᓐᓂᒃ ᐱᓇᓱᐊᕐᑎᐅᖁᓪᓗᒋᑦ.

¹² ᓕᕔᑎᑦ ᑕᕝᕙ ᐸᖕᓃᑦ ᐃᒻᒧᒃᓯᐅᒊᑦ ᐃᓐᓇᐅᖏᑦᑐᑦ ᓂᐊᖁᖏᑎᒍᑦ ᐸᑎᒻᒥᔭᕆᐊᖃᕐᐰᑦ, ᑐᓂᕐᕈᓯᕆᐊᖃᕐᐳᑦ ᑕᕝᕙ ᐊᔪᕐᓂᖅ ᐱᓪᓗᒍ ᑐᓂᕐᕈᑕᐅᔪᒥᒃ ᐂᑉᐸᖓᓗ ᐆᑕᒃᓴᐅᓗᓂ ᑐᓂᕐᕈᑎ ᐊᑕᓂᕐᒧᑦ, ᓕᕔᑎᑦ ᐃᓱᒪᒋᔪᓐᓁᕐᕕᐅᖁᓪᓗᒋᑦ.

¹³ “ᓕᕔᑎᓪᓗ ᓇᖏᕐᑎᑦᓴᕆᐊᖃᕐᐸᑎᑦ ᐂᕉᓂᐅᑉ ᐃᕐᓂᖏᑕᓗ ᓵᖓᓂ, ᑐᓂᕐᕈᑎᒋᓗᒋᓪᓗ ᐃᓵᒃᑕᕐᓗᓂ ᑐᓂᕐᕈᑕᐅᔪᑎᑐᑦ ᐊᑕᓂᕐᒧᑦ.

¹⁴ ᑍᒫᒃ ᑕᕝᕙ ᓕᕔᑎᑦ ᓴᓂᕐᕙᒃᑎᓐᓂᐊᕐᐸᓯ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ, ᓕᕔᑎᓪᓗ ᐅᕙᖓ ᐱᒋᓂᐊᕐᐸᒃᑲ.

¹⁵ ᑕᒪᑐᒪ ᑭᖑᓂᖓᒍᑦ ᓕᕔᑎᑦ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐃᑎᕐᓂᐊᕐᐳᑦ ᐱᔨᑦᓯᕆᐊᕐᑐᓕᕐᓗᑎᒃ. ᑍᒫᒃ ᓴᓗᒻᒪᕐᓴᕆᐊᖃᕐᐸᓯ ᑐᓂᕐᕈᑎᒋᓗᒋᓪᓗ ᐃᓵᒃᑕᕈᑎᔭᐅᔪᑐᑦ ᑐᓂᕐᕈᑎᒃᓴᑐᑦ.

¹⁶ ᐅᕙᓐᓄᑦ ᑕᒪᒃᑭᕐᓗᑎᒃ ᑐᓂᔭᐅᖕᒪᑕ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ; ᐅᕙᖓᓗ ᐱᑖᕆᕙᒃᑲ ᐃᕐᓂᐊᖑᖅᑳᕐᑐᑦ ᐊᖑᑎᑦ ᐱᓇᒋᑦ, ᓯᕗᓪᓕᕐᐹᒥᒃ ᐃᕐᓂᕐᑖᕆᔭᐅᔪᑦ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ.

¹⁷ ᐃᓴᕆᐊᓕᐅᑉ ᕿᑐᕐᖓᖏᑕ ᐃᕐᓂᕐᑖᕆᐅᕈᑎᖏᑦ ᐱᒋᒐᒃᑭᑦ, ᐃᓄᐃᑦ ᓂᕐᔪᑎᓪᓗ; ᐅᓪᓗᒥ ᑍᑦᓱᒪᓂ ᐄᑦᔨᑉᑎᒥ ᐃᕐᓂᕐᑖᕆᔭᐅᖅᑳᕐᓯᒪᔪᑦ ᑐᖁᓚᐅᕋᒃᑭᑦ ᑍᒪᓐᖓᑦ ᐅᕙᓐᓄᑦ ᐃᑦᔪᕐᓁᑎᓚᐅᕐᐸᒃᑲ.

¹⁸ ᐅᕙᖓᓗ ᓕᕔᑎᑦ ᐱᒋᔪᒪᓚᐅᕐᐸᒃᑲ ᐃᓴᕆᐊᓕᐅᑉ ᕿᑐᕐᖓᖏᑕ ᐃᕐᓂᕐᑖᕆᖅᑳᕐᑕᖏᑦ ᐱᓇᒋᑦ.

¹⁹ ᐅᕙᖓᓗ ᓕᕔᑎᑦ ᐂᕉᓂᒧᑦ ᐃᕐᓂᖏᓐᓄᓪᓗ ᑐᓂᓚᐅᕐᐸᒃᑲ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ ᐱᓪᓗᒋᑦ, ᐱᓇᓱᐊᖁᓪᓗᒋᑦ ᐃᓴᕆᐊᓕᐅᑉ ᕿᑐᕐᖓᖏᑕ ᐱᔭᒃᓴᖏᓐᓂᒃ ᑐᐱᕐᔪᐊᒥ ᑲᑎᒪᕕᖕᒥ, ᐃᓴᕆᐊᓕᐅᓪᓗ ᕿᑐᕐᖓᖏᑕ ᐃᓱᒪᒋᔪᓐᓁᕐᕕᐅᑦᔪᑎᒃᓴᖏᓐᓄᑦ, ᐃᓴᕆᐊᓕᐅᑉ ᕿᑐᕐᖓᖏᑦ ᖃᓄᐃᓐᓇᕐᑐᓄᑦ ᑎᑭᑕᐅᖁᓇᒋᑦ ᐃᑦᔪᕐᓁᑦᑐᕕᖕᒧᑦ ᖃᒡᓕᔭᕆᐊᖃᕐᐸᑕ.”

²⁰ ᑍᒫᒃ ᒨᓯᓯ ᐂᕉᓂᓗ ᐃᓴᕆᐊᓕᐅᓪᓗ ᕿᑐᕐᖓᖏᑦ ᑲᑎᒪᔪᕐᔪᐊᑦ ᓕᕔᑎᓄᑦ ᑍᒤᓕᐅᓚᐅᕐᐳᑦ; ᐊᑕᓂᐅᑉ ᐱᖁᔨᓂᖏᑦ ᒨᓯᓯᒃᑯᑦ ᓕᕔᑎᑦ ᐱᑦᔪᑎᒋᓗᒋᑦ, ᐃᓴᕆᐊᓕᒥᐅᑦ ᓕᕔᑎᓄᑦ ᑍᒤᓕᐅᓚᐅᕐᐳᑦ.

²¹ ᓕᕔᑎᑦ ᐃᒻᒥᖕᓂᒃ ᓴᓗᒻᒪᕐᓴᓚᐅᕐᐳᑦ ᐊᓐᓄᕌᑎᒡᓗ ᐅᐊᓴᕐᓗᒋᑦ; ᐂᕉᓂᐅᓪᓗ ᑐᓂᕐᕈᑎᒋᕔᑦ ᐃᓵᒃᑕᕈᑎᔭᐅᔪᑐᑦ ᐊᑕᓂᐅᑉ ᓵᖓᓂ, ᐂᕉᓂᐅᑉ ᐃᓱᒪᒋᔪᓐᓁᕐᑕᐅᑦᔪᑎᒥᒃ ᑐᓂᕐᕈᓯᐅᑎᕔᑦ ᓴᓗᒻᒪᕐᑕᐅᖁᓪᓗᒋᑦ.

²² ᑭᖑᓂᖓᒍᑦ ᓕᕔᑎᑦ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐃᑎᓚᐅᕐᐳᑦ ᐱᓇᓱᐊᕆᐊᕐᑐᕐᓗᑎᒃ ᐂᕉᓂᐅᑉ ᐃᕐᓂᖏᑕᓗ ᐱᔨᒋᓪᓗᓂᒋᑦ; ᐊᑕᓂᐅᑉ ᒨᓯᓯ ᓕᕔᑎᓄᑦ ᑍᒫᒃ ᐱᖁᓚᐅᕐᒪᒍ, ᑍᒤᓕᐅᓚᐅᕐᐳᑦ.

²³ ᑕᕝᕙ ᐊᑕᓂᐅᑉ ᒨᓯᓯ ᐅᖃᐅᑎᕚ, ᐅᖃᕐᓗᓂ,

²⁴ “ᑕᒪᓐᓇ ᓕᕔᑎᓄᑦ ᑐᕌᕐᑐᖅ: ᐊᕐᕌᒍᖃᕐᑐᑦ 25ᓂᒃ ᐊᖓᔪᒃᓰᓪᓗ ᐊᑐᓂᑦ ᐃᑎᕈᓐᓇᕐᐳᑦ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐱᓇᓱᐊᕆᐊᕐᑐᕐᓗᑎᒃ;

²⁵ ᐊᕐᕌᒍᖃᓕᕈᑎᒃ 50ᓂᒃ ᐱᓇᓱᐊᕐᑕᒥᓂᒃ ᓄᖅᑲᕆᐊᖃᕐᐳᑦ, ᐱᓇᓱᐊᑲᓐᓂᕈᓐᓃᕐᓗᑎᒃ.

²⁶ ᖃᑕᓐᖑᑎᒥᖕᓂᒃ ᐱᔨᑦᓯᕈᓐᓇᕋᓗᐊᕐᐳᑦ ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕐᑐᓂᒃ, ᐱᔭᕆᐊᖃᕐᑕᖏᓐᓂᒃ ᐃᑲᔪᕐᓗᒋᑦ, ᓇᖕᒥᓂᕐᓕ ᐱᓇᓱᐊᕐᑎᐅᔪᓐᓃᕐᓗᑎᒃ. ᑍᒤᓕᐅᕆᐊᖃᕐᐳᓯ ᓕᕔᑎᑦ ᐱᔭᒃᓴᖏᑕ ᓇᓛᓄᑦ.”