ᒨᓯᓯ ᓯᑕᒪᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᒃᐱᕐᓂᖅ ᐱᓪᓗᒍ ᓴᓗᒤᑦᑐᑦ ᐃᓛᒃᑰᕐᑎᑕᐅᓂᖏᑦ

¹ ᐊᑕᓂᕐᓗ ᐅᖃᓚᐅᕐᐳᖅ ᒨᓯᓯᒧᑦ, ᐃᒤᓕᓪᓗᓂ,

² “ᐃᓴᕆᐊᓕᐅᑉ ᕿᑐᕐᖓᖏᑦ ᐱᖁᓚᐅᒃᑭᑦ ᑕᖕᒫᕐᓯᒪᕕᖕᒥᑦ ᐊᐅᓪᓚᕐᑎᑦᓯᖁᓗᒋᑦ ᐸᕐᑎᕐᑐᓕᒫᓂᒃ, ᒪᕿᖃᑦᑕᕐᑐᓕᒫᓂᒡᓗ, ᑐᖁᖓᔪᒥᒡᓗ ᐊᒃᑐᕐᓯᓂᕐᒥᖕᓄᑦ ᓇᕐᕈᓇᕐᓯᓯᒪᔪᓕᒫᓂᒃ.

³ ᑕᒪᕐᒥᒃ ᑍᒤᑦᑐᑦ ᐊᐅᓪᓚᕐᑎᑕᒃᓴᕆᕙᓯ ᐊᖑᑎᑦ ᐊᕐᓁᓪᓗ; ᓄᓇᓖᑦ ᓯᓚᑖᓃᑦᓴᕆᐊᖃᕐᐳᑦ, ᑕᖕᒫᕐᓯᒪᕕᖕᒥᓂᒃ ᓇᕐᕈᓇᕐᓯᑎᑦᓯᖁᓇᒋᑦ, ᑖᒃᑯᐊ ᐊᑯᓐᓂᖓᓐᓂ ᐃᓂᖃᕋᒪ.”

⁴ ᐃᓴᕆᐊᓕᐅᑉ ᕿᑐᕐᖓᖏᑦ ᑍᒤᓕᐅᓚᐅᕐᐳᑦ, ᑕᖕᒫᕐᓯᒪᔪᑦ ᓯᓚᑖᓄᑦ ᐊᐅᓪᓚᕐᑎᓪᓗᒋᑦ; ᐊᑕᓂᐅᑉ ᒨᓯᓯ ᐅᖃᐅᑎᓚᐅᕐᒪᒍ, ᐃᓴᕆᐊᓕᐅᑉ ᕿᑐᕐᖓᖏᑦ ᑍᒤᓕᐅᓚᐅᕐᐳᑦ.

ᖃᕿᐊᓕᕐᓃᑦ ᐅᑎᕐᑎᑕᐅᓂᕐᓗ

⁵ ᐊᑕᓂᖅ ᐅᖃᕐᐳᑦ ᒨᓯᓯᒧᑦ ᐃᒤᓕᓪᓗᓂ,

⁶ “ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᐅᑎᓚᐅᒃᑭᑦ: ‘ᐊᖑᑎᑦ ᐊᕐᓁᓪᓘᓐᓃᑦ ᐊᔪᕐᑐᓕᒃᐸᑕ ᐃᓄᐃᑦ ᐊᔪᕐᑐᓕᓂᕆᕙᒃᑕᖏᓐᓄᑦ ᐊᑕᓂᕐᒧᑦ ᑲᔪᓯᖃᑦᑕᖏᓐᓂᕐᒧᑦ, ᑍᒤᓕᐅᕐᑐᖅ ᐸᓯᔭᒃᓴᐅᕗᖅ,

⁷ ᑕᕝᕙ ᖃᕿᐊᓕᕆᐊᖃᕐᐳᖅ ᐊᔪᕐᑐᓕᓂᕆᓚᐅᕐᑕᒥᓂᒃ; ᓱᓇᒥᒡᓗᒋᑦ ᐅᑎᕐᑎᑦᓯᔭᕆᐊᖃᓕᕐᐳᖅ ᐊᔪᕐᑐᓕᓂᕆᓚᐅᕐᑕᒥᓂᒃ, ᑕᓪᓕᒪᐅᓕᓂᖓᑕ ᐊᕕᒃᑐᕐᓂᖓᓂᒃ ᐊᑕᐅᓯᕐᒥᒃ ᐃᓚᒃᑲᓐᓂᕐᓗᒍ ᐱᐅᖏᑦᑐᓕᕝᕕᒋᓚᐅᕐᑕᓂ ᑐᓂᓯᕕᒋᓗᒍ.

⁸ ᐃᓄᒡᓕ ᐃᓚᖃᖏᑉᐸᑦ ᐅᑎᕐᑎᑦᓯᕕᐅᔪᒃᓴᒥᒃ ᐊᔪᕐᑐᓕᓂᖅ ᐱᓪᓗᒍ, ᐊᔪᕐᑐᓕᓂᕐᒧᑦ ᐅᑎᕐᑎᑦᓯᒍᑎ ᑐᓂᔭᐅᔭᕆᐊᖃᕐᐳᖅ ᐊᑕᓂᕐᒧᑦ ᑐᓂᕐᕈᓯᕐᑎᑦᓯᔨᒧᑦ ᑐᓂᓗᒍ, ᐃᓚᓗᒍᓗ ᓰᐱᒥᒃ ᐊᖑᓴᓪᓗᕐᒥᒃ ᐃᓱᒪᒋᔭᐅᔪᓐᓁᕈᑎᒃᓴᒥᒃ, ᑖᑦᓱᒧᖓ ᑕᕝᕙ ᐃᓱᒪᒋᔪᓐᓁᕐᕕᐅᓂᐊᕐᐳᖅ.

⁹ ᑐᓂᕐᕈᑕᐅᔪᓕᒫᑦ ᐃᓴᕆᐊᓕᐅᑉ ᕿᑐᕐᖓᖏᓐᓂᑦ ᐃᑦᔪᕐᓁᓐᓂᕐᒧᑦ, ᑐᓂᕐᕈᓯᕐᑎᑦᓯᔨᒧᑦ ᑐᓂᔭᐅᔪᑦ, ᑖᑦᓱᒪ ᐱᒋᕔᑦ.

¹⁰ ᐊᖑᑎᑦ ᐊᑐᓂᑦ ᐃᑦᔪᕐᓁᑦᑐᖁᑎᓂ ᓇᖕᒥᓂᖅ ᐱᒋᕔᑦ; ᐃᓄᐃᓪᓗ ᓱᓇᑐᐃᓐᓇᕐᒥᒃ ᑐᓂᕐᕈᓯᕐᑎᑦᓯᔨᒧᑦ ᑐᓂᔭᖏᑦ ᑐᓂᕐᕈᓯᕐᑎᑦᓯᔨᐅᑉ ᐱᒋᕔᑦ.’”

ᐊᕐᓁᑦ ᐅᐃᒥᖕᓂᒃ ᐊᓯᓐᓂᐊᕐᐸᒃᑐᑦ

¹¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐃᒤᓕᓪᓗᓂ,

¹² “ᐃᓴᕆᐊᓕᐅᑉ ᕿᑐᕐᖓᖏᑦ ᐅᖃᕐᕕᒋᒃᑭᑦ ᐃᒤᓕᓗᑎᑦ: ᐊᖑᑎᐅᑉ ᓄᓕᐊᖓ ᕿᒤᒃᐸᑦ ᐅᐃᒥᓂᒡᓗ ᐊᓯᓐᓂᐊᕐᓗᓂ.

¹³ ᐊᖑᑎᒥᒡᓗ ᐊᓯᐊᓂᒃ ᐃᓐᓇᖓᖃᑎᖃᕐᓗᓂ, ᐅᐃᖓ ᖃᐅᔨᑎᓐᓇᒍ, ᑕᕝᕙ ᐃᒻᒥᓂᒃ ᐃᑦᔪᕐᓇᕐᑎᑉᐳᖅ, ᖃᐅᔨᔭᐅᖏᓐᓇᒥ ᐊᓯᒥᓄᑦ ᓁᐱᑕᐅᒐᓂᓗ.

¹⁴ ᐅᐃᖓᓕ ᓯᖕᓇᓕᕐᐸᑦ ᓄᓕᐊᓂ ᐸᓯᓗᒍ ᐊᕐᓇᖅ ᐃᒻᒥᓂᒃ ᐃᑦᔪᕐᓇᕐᓯᑎᑉᐸᑦ ᐅᕝᕙᓘᓐᓃᑦ ᐅᐃᖓ ᓯᖕᓇᓕᕐᐸᑦ ᓄᓕᐊᓂ ᐸᓯᓗᒍ ᓄᓕᐊᖓ ᐃᑦᔪᕐᓇᕐᓯᓯᒪᓐᖏᑎᓪᓗᒍ,

¹⁵ ᑕᕝᕙ ᓄᓕᐊᓂ ᑐᓂᕐᕈᓯᕐᑎᑦᓯᔨᒧᑦ ᐂᑎᑕᒃᓴᕆᕚ. ᓇᖕᒥᓂᕐᓗ ᑐᓂᕐᕈᓯᕐᓗᓂ ᓂᐊᖂᔭᒃᓴᒥᒃ ᐹᕐᓕᒥᒃ 2ᓖᑕᑐᑦ ᐅᖁᒤᑎᒋᔪᒥᒃ; ᐅᕐᓱᒥᒃ ᐃᓚᖏᓪᓗᒍ, ᑎᐱᑦᓯᐊᕆᒃᑐᒥᒡᓗ ᕗᕌᑭᓐᓴᓐᓯᒥᒃ ᐃᓚᖏᓪᓗᒍ, ᑐᓂᕐᕈᑕᐅᖕᒪᑦ ᓯᖕᓇᓂᖅ ᐱᑦᔪᑎᒋᓪᓗᒍ, ᑐᓂᕐᕈᑕᐅᖕᒪᑦ ᐃᖅᑲᐅᒪᓂᖅ ᐱᑦᔪᑎᒋᓪᓗᒍ, ᐱᐅᖏᑦᑐᓕᓂᕐᒥᒃ ᐃᖅᑲᐅᒪᑦᔪᑕᐅᖕᒪᑦ.

¹⁶ “ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᕾᑎᑕᒃᓴᕆᕚ, ᐊᑕᓂᐅᓪᓗ ᓵᖓᓄᑦ ᐱᑎᑦᓴᕆᐊᖃᕐᐹ.

¹⁷ ᑐᓂᕐᕈᓯᕐᑎᑦᓯᔨ ᐃᒥᕐᒥᒃ ᐃᑦᔪᕐᓁᑦᑐᒥᒃ ᐱᔭᕆᐊᖃᕐᐳᖅ ᒪᕐᕋᕕᓂᕐᒥᒃ ᐃᒪᖃᐅᑎᒥᒃ, ᐳᔪᕐᓗᖕᒥᒡᓗ ᑐᐱᕐᔪᐊᑉ ᓇᑎᖓᓂᑦ, ᐃᒥᕐᒧᑦ ᐃᓕᓗᒍ.

¹⁸ ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᐊᑕᓂᐅᑉ ᓵᖓᓂ ᓂᑯᕕᑎᓪᓗᒍ, ᓂᐊᖁᖓᓗ ᐅᓖᕐᓗᒍ ᐃᖅᑲᐅᒪᓂᕐᒧᓪᓗ ᑐᓂᕐᕈᑎ ᑖᑦᓱᒧᖓ ᑐᓂᓗᒍ, ᓂᐊᖂᔭᒃᓴᖅ ᓯᖕᓇᓂᖅ ᐱᓪᓗᒍ ᑐᓂᕐᕈᑎ ᑐᓂᕐᕈᓯᕐᑎᑦᓯᔨ ᐃᒥᕐᒥᒃ ᑎᒍᒥᐊᕆᐊᖃᕐᐳᖅ ᒪᒤᓕᑎᓯᒪᔪᒥᒃ ᐃᑦᔪᕐᓇᕐᑎᑦᓯᔪᒥᒃ.

¹⁹ ᑐᓂᕐᕈᓯᕐᑎᑦᓯᔨᐅᑉ ᐊᕐᓇᖅ ᐊᖏᕐᑎᑦᓴᕆᐊᖃᕐᐹ ᐅᖃᐅᑎᓗᒍ, ‘ᐊᖑᒻᒧᑦ ᑐᑎᒃᑕᐅᓚᐅᖏᒃᑯᕕᑦ, ᐅᐃᖕᓂᒡᓗ ᓴᓗᒤᑦᑐᓕᓂᕐᒧᑦ ᕿᒤᓚᐅᖏᓪᓗᑎᑦ, ᐅᐃᖕᓂᑦ ᐱᒋᔭᐅᑎᓪᓗᑎᑦ, ᕿᓚᕈᑦᔮᓕᕆᑦ ᐃᒥᕐᒥᑦ ᓴᓗᒤᑦᑐᒥᑦ ᐃᑦᔪᕐᓇᕐᑎᑦᓯᔪᒥᑦ.

²⁰ ᕿᒤᓚᐅᕈᕕᓪᓕ ᐅᐃᖕᓂᑦ ᐱᒋᔭᐅᑎᓪᓗᑎᑦ, ᐃᓕᖕᓂᒡᓗ ᓴᓗᒤᓕᑎᓚᐅᕈᕕᑦ ᐊᖑᒻᒧᑦ ᐅᐃᕕᑦ ᐊᓯᐊᓂᒃ ᐃᓐᓇᖓᖃᑎᖃᓚᐅᕈᕕᑦ,’

²¹ ᑕᕝᕙ ᑐᓂᕐᕈᓯᕐᑎᑦᓯᔨᐅᑉ ᐊᖏᒻᒪᕆᖕᓂᕐᒧᑦ ᐱᑎᑕᒃᓴᕆᕚ ᐃᑦᔪᕐᓇᕐᑎᑕᐅᓂᖅ ᐱᓪᓗᒍ, ᐊᕐᓇᒧᑦ ᐅᖃᕐᓗᓂ, ‘ᐊᑕᓂᐅᑉ ᐃᑦᔪᕐᓇᕐᑎᓪᓕᑎᑦ, ᐃᓅᖃᑎᕕᑦ ᐊᑯᕐᖓᓐᓂ ᐊᖏᒻᒪᕆᖕᓂᕐᒧᑦ, ᓇᓕᒃᑳᕕᓪᓗ ᐊᑯᓐᓂᖓ ᓱᕈᕐᑎᓪᓕᐅᒃ, ᓈᖅᑯᕐᑐᓯᑎᓪᓗᑎᓪᓗ;

²² ᐃᒥᕐᓗ ᐅᓇ ᐃᑦᔪᕐᓇᕐᑎᑦᓯᔪᖅ ᓈᕐᓄᑦ ᐱᓕ, ᓈᖅᑯᕐᑐᓯᓕᕆᑦ ᓇᓕᒃᑳᒃᑭᒡᓗ ᓱᕈᕐᓗᑎᒃ.’ ᐊᕐᓇᖅ ᑭᐅᓗᓂ, ‘ᐂᒤᓐ, ᑍᒤᓕᕐᓕ.’

²³ “ᑐᓂᕐᕈᓯᕐᑎᑦᓯᔨᐅᑉ ᐃᑦᔪᕐᓇᕐᑎᑕᐅᓃᑦ ᒪᒃᐱᕐᑐᒐᕐᓄᑦ ᑎᑎᕋᕐᑕᒃᓴᕆᕔᑦ, ᐃᕐᕈᕐᑐᕐᓗᒋᓪᓗ ᐃᒥᕐᒧᑦ ᒪᒤᓕᑎᓯᒪᔪᒧᑦ.

²⁴ ᐊᕐᓇᖅ ᐃᒥᕐᒥᒃ ᐃᑦᔪᕐᓇᕐᓯᑎᓯᒪᔪᒥᒃ ᐃᒥᕐᑎᑦᓴᕆᐊᖃᕐᐹ, ᐃᒥᖅ ᑎᒥᖓᓄᑦ ᐃᑎᕈᓂ ᑎᒥᖓ ᖃᓯᓕᓇᕐᑐᒥᒃ ᐃᒃᐱᖕᓂᕐᓂᐊᕐᐳᖅ.

²⁵ ᑐᓂᕐᕈᓯᕐᑎᑦᓯᔨᐅᑉ ᓂᐊᖂᔭᒃᓴᖅ ᓯᖕᓇᓂᕐᒧᑦ ᑐᓂᕐᕈᑕᐅᔪᖅ ᐊᕐᓇᒥᑦ ᑎᒍᓗᒍ, ᐊᑕᓂᐅᑉ ᓵᖓᓂ ᐃᓵᒃᑕᕈᑎᔭᕆᐊᖃᕐᐹ, ᑐᓂᕐᕈᓯᕐᕕᖕᒧᐊᕐᓗᒍᓗ.

²⁶ ᑐᓂᕐᕈᓯᕐᑎᑦᓯᔨ ᑐᓂᕐᕈᑎᒥᑦ ᐊᒡᒐᖕᒥᓄᑦ ᑎᒍᓯᓗᓂ, ᐊᔪᕐᓂᕐᒥᒃ ᐃᖅᑲᐅᒪᑦᔪᑎᒥᒃ, ᐃᑯᐊᓚᑎᑕᒃᓴᕆᕚ ᑐᓂᕐᕈᓯᕐᕕᖕᒥ, ᑭᖑᓂᖓᒍᑦ ᐊᕐᓇᖅ ᐃᒥᕐᒥᒃ ᐃᒥᕐᑎᓕᕐᓗᒍ.

²⁷ ᐃᒥᕐᒥᒃ ᐃᒥᕐᑎᒃᑯᓂᐅᒃ ᑕᕝᕙ ᐃᒤᑦᑑᓕᕋᔭᕐᐳᖅ, ᐃᒻᒥᓂᒃ ᓴᓗᒤᓕᑎᓯᒪᒍᓂ ᐅᐃᒥᓂᒃ ᐊᓯᓐᓂᐊᕐᓯᒪᒍᓂ, ᐃᒥᖅ ᑎᒥᖓᓄᑦ ᐃᑎᕐᑐᖅ ᑖᓐᓇ ᖃᓯᓕᓇᕐᓂᐊᕐᐳᖅ, ᓈᖅᑯᕐᑐᓯᓗᓂ, ᓇᓕᒃᑳᖓᓗ ᓱᕈᕐᓗᓂ, ᐊᕐᓇᕐᓗ ᐃᓅᖃᑎᒥ ᐊᑯᕐᖓᓐᓂ ᐃᑦᔪᕐᓇᕐᓯᓂᐊᕐᐳᖅ.

²⁸ ᐊᕐᓇᕐᓕ ᐃᒻᒥᓂᒃ ᓴᓗᒤᓕᑎᓯᒪᖏᒃᑯᓂ, ᓴᓗᒪᑦᓯᐊᕈᓂᓗ, ᑕᕝᕙ ᕿᓚᕈᑦᔮᕐᓯᒪᓂᐊᕐᐳᖅ ᕿᑐᕐᖓᕐᑖᕈᓐᓇᕐᓂᐊᕐᓗᓂᓗ.

²⁹ “ᑕᒪᑦᔭ ᐱᖁᔭᖅ ᓯᖕᓇᓂᐅᑉ ᓇᓛᓄᑦ, ᓄᓕᐊᖅ ᐅᐃᒥᓄᑦ ᐱᒋᔭᐅᓗᓂ, ᕿᒤᒃᐸᑦ ᐃᒻᒥᓂᒡᓗ ᓴᓗᒤᓕᑎᓪᓗᓂ,

³⁰ ᐅᕝᕙᓘᓐᓃᑦ ᐊᖑᑦ ᐊᓂᕐᓂᕐᒧᑦ ᓯᖕᓇᓂᕐᒧᑦ ᑎᑭᑕᐅᒃᐸᑦ, ᓄᓕᐊᓂ ᐸᓯᓕᕐᓗᒍ ᓯᖕᓇᓗᓂ; ᑕᕝᕙ ᐊᕐᓇᖅ ᐊᑕᓂᐅᑉ ᓵᖓᓄᑦ ᐱᑎᑦᓴᕆᐊᖃᕐᐹ, ᑐᓂᕐᕈᓯᕐᑎᑦᓯᔨᐅᓪᓗ ᐱᖁᔭᖅ ᒪᓕᒡᓗᒍ ᐱᓂᐊᕐᕕᒋᔭᕆᐊᖃᕐᐹ.

³¹ ᐊᖑᑦ ᐊᔪᕐᓂᕐᒥᑦ ᐸᓯᔭᒃᓴᐅᓂᐊᖏᓚᖅ, ᐊᕐᓇᐅᓪᓕ ᐸᓯᔭᒃᓴᐅᓂᓂ ᐊᑐᕐᓂᐊᕐᐹ.”