ᒨᓯᓯ ᓯᑕᒪᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᑯᕼᐋᑎᐅᑉ ᐃᕐᓂᖏᑕ ᐱᔭᒃᓴᖏᑦ

¹ ᐊᑕᓂᖅ ᒨᓯᓯᒧᑦ ᐂᕉᓂᒧᓪᓗ ᐅᖃᕐᐳᖅ,

² “ᑯᕼᐋᑎᐅᑉ ᐃᕐᓂᖏᑦ ᓈᓴᓚᐅᒃᑭᑦ ᓕᕔᑎᑦ ᑭᖑᕚᖏᓐᓂᑦ ᐱᓯᒪᔪᑦ, ᐃᓚᒌᑦ ᐃᓛᒃᑰᕐᑎᓪᓗᒋᑦ, ᓯᕗᓕᕕᓂᖏᑕᓗ ᐃᓚᒌᖕᓂᖏᑦ ᒪᓕᒡᓗᒋᑦ.

³ 30ᓂᒃ ᐊᕐᕌᒍᓕᖕᓂᑦ ᐱᒋᐊᕐᓗᒋᑦ ᐊᖓᔪᒃᓰᓪᓗ 50ᓂᒃ ᐊᕐᕌᒍᓖᑦ ᑎᑭᓪᓗᒋᑦ, ᐱᔨᑦᓯᕐᓂᕐᒧᑦ ᐱᓇᓱᐊᕈᓐᓇᕐᑐᓕᒫᑦ ᑐᐱᕐᔪᐊᒥ ᑲᑎᒪᕕᖕᒥ.

⁴ ᐃᒫᒃ ᑕᕝᕙ ᑯᕼᐋᑎᐅᑉ ᐃᕐᓂᖏᑦ ᐱᔨᑦᓯᕐᓂᐊᕐᐳᑦ ᑐᐱᕐᔪᐊᒥ ᑲᑎᒪᕕᖕᒥ, ᐃᑦᔪᕐᓁᓐᓂᕐᐹᓂᒃ ᐱᓇᓱᐊᕐᑎᐅᓪᓗᑎᒃ.

⁵ “ᐃᓅᖃᑎᒌᒡᔪᐊᑦ ᐊᐅᓪᓚᕐᓂᐊᕐᓗᑎᒃ ᐸᕐᓇᓕᕌᖓᑕ, ᐂᕉᓂ ᐃᕐᓂᖏᓪᓗ ᐃᑎᖃᑦᑕᕐᓂᐊᕐᐳᑦ ᐅᓕᒡᔪᐊᖅ ᑖᓗᑕᖅ ᐲᕆᐊᖃᕐᐹᑦ ᐃᒃᓯᕐᕕᒡᓗ ᐊᖏᕈᑎᑕᓕᒃ ᑖᑦᓱᒥᖓ ᐅᓕᒡᓗᒍ.

⁶ ᐆᒪᔪᕕᓃᓪᓗ ᐹᑦᔪᕆᒥᒃ ᐊᑎᓖᑦ ᐊᒥᖏᓐᓂᒃ ᐅᓕᓕᐊᕆᓯᒪᔪᓂᒃ ᐅᓕᒡᓗᒍ, ᖄᓕᒫᖓᓗ ᐅᓕᒡᓗᒍ ᖃᓪᓗᓈᕐᑕᒥᒃ ᑐᖑᔪᕐᑐᒥᒃ; ᐊᑭᕋᐅᑎᖏᓪᓗ ᑕᑭᔪᑦ ᐃᓕᓗᒋᑦ.

⁷ “ᓂᕐᕆᕕᒃ ᓂᐊᖂᔭᓂᒃ ᑕᑯᔭᒃᓴᖃᕐᕕᒃ ᐅᓕᒃᑕᒃᓴᕆᕚᑦ ᖃᓪᓗᓈᕐᑕᒥᒃ ᑐᖑᔪᕐᑐᒥᒃ, ᖄᖓᓄᓪᓗ ᐃᓕᓗᒋᑦ ᐴᒍᑍᓪᓗ ᐸᓕᐊᓪᓗ, ᐅᐊᓴᕐᕖᓪᓗ ᐃᒪᖃᐅᑏᓪᓗ; ᓂᐊᖂᔧᓪᓗ ᑕᑯᔭᒃᓮᑦ ᖄᖓᓄᑦ ᐃᓕᓗᒋᑦ.

⁸ ᑖᒃᑯᐊ ᖄᖓᒍᑦ ᐅᓕᒋᐊᖃᕐᐰᑦ ᖃᓪᓗᓈᕐᑕᒥᒃ ᐊᐅᐸᓪᓚᕆᒃᑐᒥᒃ, ᖄᖓᒍᓪᓗ ᐅᓕᒡᓗᒋᑦ ᐆᒪᔪᐃᑦ ᐹᑦᔪᕆᒥᒃ ᐊᑎᓖᑦ ᐊᒥᖏᓐᓂᒃ; ᐊᑭᕋᐅᑎᖏᓪᓗ ᑕᑭᔪᑦ ᐃᓕᓗᒋᑦ.

⁹ “ᖃᓪᓗᓈᕐᑕᒥᒃ ᑐᖑᔪᕐᑐᒥᒃ ᐱᔭᕆᐊᖃᕐᐳᑦ ᓇᓂᕈᐊᒃᑯᕖᓪᓗ ᖃᐅᒻᒪᖅᑯᑎᖃᕐᕖᑦ ᐅᓕᒡᓗᒋᑦ, ᖃᐅᒻᒪᖅᑯᑏᑦ ᐊᑕᓗᑎᒃ, ᒪᓂᖓᑕᓗ ᐋᖅᑭᒋᐊᕈᑎᖏᑦ ᐱᖃᓯᐅᑎᓗᒋᑦ, ᐊᓪᓕᕋᖏᓪᓗ, ᐅᕐᓱᖃᕐᕕᓕᒫᖏᓪᓗ, ᐅᕐᓴᒃᓴᕆᐊᖃᖃᑦᑕᕐᑕᑎᒃ.

¹⁰ ᐅᓖᑦ ᐆᒪᔪᑦ ᐹᑦᔪᕆᐅᑉ ᐊᒥᖏᑕ ᖄᖏᓐᓄᑦ ᐃᓕᔭᕆᐊᖃᕐᐰᑦ ᓱᓇᒃᑯᑖᖏᓪᓗ, ᐃᓕᓗᒋᓪᓗ ᐊᑭᕋᐅᑎᖏᖕᓄᑦ.

¹¹ “ᑐᓂᕐᕈᓯᕐᕕᒃ ᒎᓘ ᐅᓕᒋᐊᖃᕐᐹᑦ ᖃᓪᓗᓈᕐᑕᒥᒃ ᑐᖑᔪᕐᑕᒥᒃ, ᖄᖓᒍᑦ ᐆᒪᔪᐃᑦ ᐹᑦᔪᕆᑦ ᐊᒥᖏᓐᓂᒃ ᐅᓕᒡᓗᒋᑦ; ᐊᑭᕋᕐᕕᖏᓪᓗ ᑕᑭᔪᑦ ᐃᓕᓗᒋᑦ.

¹² ᓱᓇᒃᑯᑖᓪᓗ ᐃᑦᔪᕐᓁᑦᑐᕕᖕᒥ ᐱᔨᑦᓯᕐᓂᕐᒧᑦ ᐊᑐᕐᑕᐅᓲᑦ, ᖃᓪᓗᓈᕐᑕᒧᑦ ᑐᖑᔪᕐᑐᒧᑦ ᐴᕐᓗᒋᑦ, ᐅᓕᒡᓗᒋᓪᓗ ᐆᒪᔪᐃᑦ ᐹᑦᔪᕆᑦ ᐊᒥᖏᓐᓄᑦ, ᐊᑭᕋᐅᑎᒧᓪᓗ ᐃᓕᓗᒋᑦ.

¹³ ᐊᕐᔭᓕᓃᓪᓗ ᑐᓂᕐᕈᓯᕐᕕᐅᑉ ᖄᖓᓂᑦ ᐲᔭᕐᑕᐅᔭᕆᐊᖃᕐᐳᑦ, ᐅᓕᒡᓗᒍᓗ ᐊᐅᐸᓪᓚᕆᒃᑐᒥᒃ.

¹⁴ ᖄᖓᓄᓗ ᐃᓕᓗᒋᑦ ᓱᓇᒃᑯᑖᑦ ᑕᕝᕙᓂ ᐱᔨᑦᓯᕐᑐᒧᑦ ᐊᑐᕐᑕᐅᓲᑦ ᐊᓪᓕᕅᓪᓗ ᐃᑯᒪᔪᒃᑯᕖᑦ, ᓂᕿᒥᒡᓗ ᑲᐳᒻᒥᑖᕈᑏᑦ, ᖃᓗᕋᐅᑏᓪᓗ, ᐅᐊᓴᕐᕖᓪᓗ, ᑐᓂᕐᕈᓯᕐᕕᖕᒥᓗ ᓱᓇᑐᐃᓐᓁᑦ ᐊᑐᕐᑕᐅᓲᑦ ᐅᓕᒃᑕᐅᔭᕆᐊᖃᕐᐳᑦ ᐆᒪᔪᐃᑦ ᐹᑦᔪᕆ ᐊᒥᖏᓐᓂᒃ ᐊᑭᕋᐅᑎᖏᓪᓗ ᐃᓕᓗᒋᑦ.

¹⁵ ᐂᕉᓂ ᐃᕐᓂᖏᓪᓗ ᐃᑦᔪᕐᓁᑦᑐᕕᖕᒥᐅᑍᑦ ᐃᓗᓕᓕᒫᖏᓪᓗ ᐅᓕᒃᑐᕇᕐᐸᒋᑦ, ᑕᖕᒫᕐᓯᒪᔪᓗ ᐸᕐᓇᒌᕐᐸᑕ, ᑕᕝᕙ ᑯᕼᐋᑎᐅᑉ ᐃᕐᓂᖏᑦ ᑖᒃᑯᓂᖓ ᐊᒃᔭᕐᓯᔭᕐᑐᕆᐊᖃᓕᕐᐳᑦ; ᐃᑦᔪᕐᓁᑦᑐᓂᒡᓕ ᓇᓪᓕᐊᓐᓂᒃ ᐊᒃᑐᐃᒋᐊᖃᓐᖏᓚᑦ, ᑐᖁᔪᖃᑐᐃᓐᓇᕆᐊᖃᕐᒪᑦ. “ᑖᒃᑯᐊ ᑕᕝᕙ ᑐᐱᕐᔪᐊᒥᑦ ᑲᑎᒪᕕᖕᒥᑦ ᐱᓯᒪᔪᑦ ᑯᕼᐋᑎᐅᑉ ᐃᕐᓂᖏᑕ ᐊᒡᔭᕆᐊᖃᕐᑕᖏᑦ.

¹⁶ “ᐃᓕᓯᕆᐅᓪᓕ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᑕ ᐱᔭᒃᓴᖓ ᖃᐅᒻᒪᖅᑯᑏᑦ ᐅᕐᓱᒃᓴᖓᓂᒃ ᑲᒪᔨᐅᓗᓂ, ᐳᔫᕐᑎᑕᒐᕐᒥᒡᓗ ᑎᐱᑦᓯᐊᕆᒃᑐᒥᒃ, ᓂᐊᖂᔭᒃᓴᒥᒡᓗ ᖃᐅᑕᒫᑦ ᑐᓂᕐᕈᑕᐅᔭᕆᐊᖃᕐᑐᒥᒃ, ᐅᕐᓱᒥᒡᓗ ᒥᖑᐊᕐᓯᑦᔪᑕᐅᕙᒃᑐᒥᒃ, ᑐᐱᕐᔪᐊᕐᓗ ᑲᑎᒪᕕᒃ ᑕᒪᕐᒥᒃ ᐃᓗᓕᖏᓪᓗ ᖃᐅᔨᓴᕐᓗᓂᒋᑦ.”

¹⁷ ᑕᕝᕙ ᐊᑕᓂᖅ ᒨᓯᓯᒧᑦ ᐂᕉᓂᒧᓪᓗ ᐅᖃᕐᐳᖅ ᐃᒫᒃ ᐅᖃᕐᓗᓂ:

¹⁸ “ᐅᑦᔨᕐᑐᕆᑦᓯ, ᑯᕼᐋᑎᐅᑉ ᐃᕐᓂᖏᑦ ᓕᕔᑎᓂᑦ ᐊᕕᑕᐅᖁᓇᒋᑦ;

¹⁹ ᑍᒤᓕᐅᕆᑦᓯᓕ ᑖᒃᑯᐊ ᐱᓪᓗᒋᑦ, ᐃᓅᖁᓪᓗᒋᑦ ᑐᖁᖁᓇᒋᑦ ᐃᑦᔪᕐᓁᓐᓂᕐᐹᑦ ᓴᓂᐊᓅᕋᓗᐊᕈᑎᒃ: ᐂᕉᓂᐅᑉ ᐃᕐᓂᖏᑕᓗ ᐃᑎᕐᓗᑎᒃ ᑎᓕᔭᕆᐊᖃᕐᐰᑦ ᐱᔨᑦᓯᕈᑎᒋᔭᕆᐊᖃᕐᑕᖏᓐᓂᒃ, ᐱᔭᒃᓴᖏᓐᓂᒡᓗ.

²⁰ ᐃᑎᕐᓗᑎᒡᓕ ᑕᑯᓐᓇᕆᐊᕐᑐᕆᐊᖃᓐᖏᓚᑦ ᐃᑦᔪᕐᓁᓐᓂᕐᐹᑦ ᐅᓕᒃᑐᕐᑕᐅᑎᓪᓗᒋᑦ, ᑐᖁᖁᓇᒋᑦ.”

ᒋᕐᓲᓂᐅᑉ ᐃᕐᓂᖏᑕ ᐱᔭᒃᓴᖏᑦ

²¹ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ ᐃᒤᓕᓪᓗᓂ:

²² “ᐊᒻᒪᑦᑕᐅᖅ ᒌᕐᓲᓂᐅᑉ ᐃᕐᓂᖏᑦ ᓈᓴᒃᑭᑦ, ᓯᕗᓕᕕᓂᖏᑕ ᐃᓚᒌᖕᓂᖏᑦ ᒪᓕᒡᓗᒋᑦ, ᐃᒡᓗᒥᐅᖃᑎᒌᑦ ᒪᓕᒡᓗᒋᑦ.

²³ ᐊᕐᕌᒍᖃᕐᑐᑦ 30ᓂᒃ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᓈᓴᕐᑍᓐᓇᕆᓗᒋᑦ, ᐱᔨᑦᓯᖃᑕᐅᔪᓐᓇᕐᑐᓕᒫᑦ, ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕈᓐᓇᕐᑐᑦ.

²⁴ ᐅᑯᐊ ᑕᕝᕙ ᒌᕐᓲᓁᑎᑦ ᐱᔨᑦᓯᕐᓂᖏᑦ ᐊᒡᔭᕐᓯᔭᕆᐊᖃᕐᓂᖏᓪᓗ:

²⁵ ᑖᒃᑯᐊ ᐊᒡᔭᕐᓯᔭᕆᐊᖃᕐᐳᑦ ᑐᐱᕐᔪᐊᑉ ᑖᓗᑕᖏᓐᓂᒃ, ᑐᐱᕐᔪᐊᒥᒡᓗ ᐴᕐᓯᒪᓗᓂ, ᖄᖃᕐᓗᓂ ᐹᑦᔪᕆᑦ ᐊᒥᖏᓐᓂᒃ, ᑐᐱᕐᔪᐊᓪᓗ ᑲᑎᒪᕕᐅᑉ ᐃᑎᕐᑕᕐᕕᖓᑕ ᑖᓗᑕᖓᓂᒃ.

²⁶ ᑐᕐᓲᖓᑕᓗ ᐃᑎᕐᑕᕐᕕᐅᑉ ᐅᒃᑯᐊᖓᓂᒃ, ᑐᕐᓲᖓᓂᓗ ᓂᕕᖓᔪᓂᒃ ᐊᕙᓗᐊᓃᑦᑐᓕᒫᓂᒃ, ᑐᓂᕐᕈᓯᕐᕕᐅᓪᓗ ᐊᕙᓗᐊᓃᑦᑐᓂᒃ, ᐃᐱᐅᑕᖏᓐᓂᒡᓗ, ᐱᐅᓴᐅᑎᖏᓐᓂᒡᓗ ᑕᒪᒃᑯᓂᖓᓕᒫᖅ ᓴᓇᓯᒪᔪᓂᒃ: ᑍᒫᒃ ᐱᔨᑦᓯᕈᑎᖃᕆᐊᖃᕐᐳᑦ.

²⁷ ᐂᕉᓂ ᐃᕐᓂᖏᓪᓗ ᐱᔭᒃᓴᖏᓐᓂᒃ ᑎᓕᓯᔭᕆᐊᖃᕐᐳᑦ ᒌᕐᓲᓂᐅᑉ ᑭᖑᕚᖏᑕ ᐃᕐᓂᖏᑕ ᐱᔭᒃᓴᖏᓐᓂᒃ, ᐱᓇᓱᐊᕆᐊᖃᕐᑕᖏᓐᓂᒃ ᐱᔨᑦᓯᕈᑎᒋᔭᕆᐊᖃᕐᑕᖏᓐᓂᒡᓗ; ᐃᕝᕕᓪᓗ ᑎᓕᔭᕆᐊᖃᕐᐸᑎᑦ ᐱᓕᕆᐊᕆᔭᕆᐊᖃᕐᑕᓕᒫᖏᓐᓂᒃ.

²⁸ ᑕᕝᕙ ᒌᕐᓲᓂᐅᑉ ᑭᖑᕚᖏᑕ ᐃᕐᓂᖏᑕ ᐱᔭᒃᓴᖏᑦ ᑐᐱᕐᔪᐊᒥ ᑲᑎᒪᕕᖕᒥ ᐱᔨᑦᓯᓂᕆᔭᕆᐊᖃᕐᑕᖏᑦ. ᐱᔭᒃᓴᒥᖕᓄᑦ ᐊᖓᔪᖅᑳᖃᕆᐊᖃᕐᐳᑦ ᐃᑕᒫᕐᒥᒃ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓂᒃ.”

ᒧᕋᐅᕆᐅᑉ ᑭᖑᕚᖏᑕ ᐃᕐᓂᖏᑕ ᐱᔭᒃᓴᖏᑦ

²⁹ “ᒥᕋᕆᐅᓪᓕ ᐃᕐᓂᖏᑦ ᓈᓴᕆᐊᖃᕆᕙᑎᑦ ᐃᒡᓗᒥᐅᖃᑎᒌᑦ ᐃᓚᒌᖕᓂᖏᑦ ᒪᓕᒡᓗᒋᑦ ᓯᕗᓕᕕᓂᖏᑕᓗ ᐃᓚᒌᖕᓂᖏᑦ ᒪᓕᒡᓗᒋᑦ.

³⁰ ᐊᕐᕌᒍᖃᕐᑐᑦ 30ᓂᒃ ᐱᒋᐊᕐᓗᒋᑦ 50ᓂᒃ ᐊᕐᕌᒍᖃᕐᑐᓄᑦ ᑎᑭᓪᓗᒋᑦ, ᓈᓴᕐᑍᓐᓇᕆᓗᒋᑦ, ᐱᔨᑦᓯᖃᑕᐅᔪᓐᓇᕐᑐᓕᒫᑦ, ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕈᓐᓇᕐᑐᑦ.

³¹ ᐃᒤᑦᑐᓂᒡᓕ ᐊᒡᔭᕐᓯᔭᕆᐊᖃᕐᐳᑦ ᑐᐱᕐᔪᐊᒥ ᑲᑎᒪᕕᖕᒥ ᐱᔨᑦᓯᕈᑎᒋᔭᒥᖕᓂᒃ: ᑐᐱᕐᔪᐊᑉ ᖃᓇᖏᓐᓂᒃ, ᓴᓐᓂᖓᔪᖏᓐᓂᒡᓗ, ᓇᑉᐸᖅᑯᑎᖏᓐᓂᒡᓗ, ᐃᓕᐅᕋᕐᕕᖏᓐᓂᒡᓗ,

³² ᑐᕐᓲᖓᑕᓗ ᐊᕙᑖᓂ ᓇᑉᐸᒍᑎᖏᓐᓂᒃ ᐃᓕᕝᕕᖏᓐᓂᒡᓗ, ᐸᐅᒍᐊᖏᓐᓂᒡᓗ ᓄᖃᕈᑎᖏᓐᓂᒡᓗ ᐱᐅᓴᐅᑎᓕᒫᖏᓐᓂᒡᓗ ᐱᔭᕆᐊᖃᕐᑐᓕᒫᓂᒃ ᑖᒃᑯᓄᖓ; ᐊᖑᑎᓪᓗ ᐊᑐᓂᑦ ᑎᓕᔭᕆᐊᖃᕐᐸᑎᑦ ᐊᑎᖏᑦ ᒪᓕᒡᓗᒋᑦ ᓱᓇᒥᒃ ᐊᒡᔭᕐᓯᔭᕆᐊᖃᕐᒪᖔᑕ.

³³ ᑖᒃᑯᐊ ᑕᕝᕙ ᐃᓚᒌᑦ ᒥᕋᕆᐅᑉ ᑭᖑᕚᖏᑕ ᐃᕐᓂᖏᑕ ᐱᔨᑦᓯᕈᑎᒋᔭᕆᐊᖃᕐᑕᖏᑦ, ᐱᓇᓱᐊᕐᓗᑎᒃ ᑐᐱᕐᔪᐊᕐᒥ ᑲᑎᒪᕕᖕᒥ ᐱᔨᑦᓯᕐᓗᑎᒃ, ᐊᖓᔪᖅᑳᖃᕐᓗᑎᒃ ᐃᑕᒫᕐᒥᒃ ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓂᒃ.”

ᓕᕔᑎᑦ ᓈᓴᕐᑕᐅᓂᖏᑦ

³⁴ ᒨᓯᓯᐅᑉ ᐂᕉᓂᐅᓪᓗ ᐃᓅᖃᑎᒌᒡᔪᐊᓪᓗ ᓯᕗᓕᕐᑎᖏᑕ ᑯᕼᐊᑍᑎᐅᑉ ᑭᖑᕚᖏᑦ ᓈᓴᕐᐰᑦ ᐃᓚᒌᑦ ᒪᓕᒡᓗᒋᑦ, ᓯᕗᓕᕕᓂᖏᑕ ᐃᓚᒌᖕᓂᖏᑎᒍᑦ,

³⁵ ᐊᕐᕌᒍᖃᕐᑐᓂᑦ 30ᓂᑦ ᐱᒋᐊᕐᓗᑎᒃ ᐊᖓᔪᒃᓰᓪᓗ 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ ᐱᓇᓱᐊᖃᑕᐅᔪᑦ ᐱᔨᑦᓯᕐᓗᑎᒃ ᑐᐱᕐᔪᐊᒥ ᑲᑎᒪᕕᖕᒥ;

³⁶ ᓈᓴᕐᑕᐅᔪᓪᓗ ᑖᒃᑯᐊ ᐃᓚᒌᑦ ᒪᓕᒡᓗᒋᑦ 2,750ᓂᒃ ᐅᓄᕐᓂᖃᓚᐅᕐᐳᑦ.

³⁷ ᑖᒃᑯᐊ ᑕᕝᕙ ᓈᓴᕐᑕᐅᓚᐅᕐᑐᑦ ᑯᕼᐊᑍᑎᐅᑉ ᑭᖑᕚᖏᑦ ᐱᓇᓱᐊᕈᓐᓇᕐᑐᑦ ᑐᐱᕐᔪᐊᒥ ᑲᑎᒪᕕᖕᒥ, ᒨᓯᓯᐅ ᐂᕉᓂᐅᓪᓗ ᓈᓴᓚᐅᕐᑕᖏᑦ ᐊᑕᓂᐅᑉ ᐱᖁᔨᓂᖓ ᒨᓯᓯᒥᒃ ᒪᓕᒡᓗᒍ.

³⁸ ᓈᓴᕐᑕᐅᓚᐅᕐᑐᓪᓗ ᒌᕐᓲᓂᐅᑉ ᑭᖑᕚᖏᑕ ᐃᕐᓂᖏᓐᓂᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒍᑦ ᐃᓚᒌᑦ,

³⁹ ᐊᕐᕌᒍᖃᕐᑐᓂᑦ 30ᓂᒃ ᐱᒋᐊᕐᓗᒋᑦ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᐱᓇᓱᐊᖃᑕᐅᔪᓐᓇᕐᑐᓕᒫᑦ ᑐᐱᕐᔪᐊᒥ ᑲᑎᒪᕕᖕᒥ,

⁴⁰ ᑖᒃᑯᓇᓐᖓᑦ ᓈᓴᕐᑕᐅᔪᑦ ᐃᓚᒌᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒍᑦ ᐃᓚᒌᑦ, 2,630ᓂᒃ ᐅᓄᕐᓂᖃᓚᐅᕐᐳᑦ.

⁴¹ ᑖᒃᑯᐊ ᑕᕝᕙ ᐃᓚᒌᑦ ᒌᕐᓲᓂᐅᑉ ᐃᕐᓂᖏᑕ ᑭᖑᕚᖏᑦ, ᐱᔨᑦᓯᕈᓐᓇᕐᑐᑦ ᑐᐱᕐᔪᐊᒥ ᑲᑎᒪᕝᕕᖕᒥ, ᒨᓯᓯᐅᑉ ᐂᕉᓂᐅᓪᓗ ᓈᓴᓚᐅᕐᑕᖏᑦ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ.

⁴² ᐅᑯᐊᓗ ᑕᕝᕙ ᐃᓚᒌᑦ ᒥᕋᕆᐅᑉ ᐃᕐᓂᖏᑕ ᑭᖑᕚᖏᑦ ᓈᓴᕐᑕᐅᓚᐅᕐᑐᑦ ᐃᓚᒌᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒃᑎᒍᑦ ᐃᓚᒌᒃᑐᑦ,

⁴³ ᐊᕐᕌᒍᖃᕐᑐᓂᑦ 30ᓂᒃ ᐱᒋᐊᕐᓗᒋᑦ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᐱᓇᓱᐊᖃᑕᐅᔪᓐᓇᕐᑐᓕᒫᑦ ᑐᐱᕐᔪᐊᒥ ᑲᑎᒪᕕᖕᒥ,

⁴⁴ ᓈᓴᕐᑕᐅᓚᐅᕐᑐᓕᒫᑦ ᐃᓚᒌᑦ ᒥᕋᕆᐅᑉ ᑭᖑᕚᖏᑦ 3,200ᓂᒃ ᐅᓄᕐᓂᖃᓚᐅᕐᐳᑦ.

⁴⁵ ᑕᒃᑯᐊ ᑕᕝᕙ ᓈᓴᕐᑕᐅᓚᐅᕐᑐᑦ ᐃᓚᒌᑦ ᒥᕋᕆᐅᑉ ᑭᖑᕚᖏᓐᓂ, ᒨᓯᓯᐅᑉ ᐂᕉᓂᐅᓪᓗ ᓈᓴᓚᐅᕐᑕᖏᑦ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ ᒨᓯᓯᒃᑯᑦ.

⁴⁶ ᓈᓴᕐᑕᐅᓚᐅᕐᑐᓕᒫᑦ ᓕᕔᑎᓂ, ᒨᓯᓯᐅᑉ ᐂᕉᓂᐅᓪᓗ ᐃᓴᕆᐊᓕᒥᐅᓪᓗ ᓯᕗᓕᕐᑎᖏᑕ ᓈᓴᓚᐅᕐᑕᖏᑦ, ᐃᓚᒌᑦ ᐃᒡᓗᒥᐅᖃᑎᒌᑦ ᓯᕗᓕᕕᓂᕐᒥᒃᑎᒍᑦ ᐃᓚᒌᒃᑐᑦ,

⁴⁷ ᐊᕐᕌᒍᖃᕐᑐᓂᑦ 30ᓂᒃ ᐱᒋᐊᕐᓗᒋᑦ ᐊᖓᔪᒃᓰᓪᓗ, 50ᓂᒃ ᐊᕐᕌᒍᖃᕐᑐᑦ ᑎᑭᓪᓗᒋᑦ, ᐱᓇᓱᐊᖃᑕᐅᔪᓐᓇᕐᑐᓕᒫᑦ ᐊᒡᔭᕐᓯᖃᑕᐅᓪᓗᑎᒃ ᑐᐱᕐᔪᐊᕐᒥᒃ ᑲᑎᒪᕕᖕᒥᒃ,

⁴⁸ ᓈᓴᕐᑕᐅᓚᐅᕐᑐᓕᒫᑦ 8,580ᓂᒃ ᐅᓄᕐᓂᖃᓚᐅᕐᐳᑦ.

⁴⁹ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᓈᓴᕐᑕᐅᓚᐅᕐᐳᑦ ᒨᓯᓯᒃᑯᑦ, ᐱᔨᑦᓯᕈᓐᓇᕐᓂᖏᑦ ᐱᔭᒃᓴᖏᓪᓗ ᐊᑐᓂᑦ ᒪᓕᒡᓗᒋᑦ; ᑍᒫᒃ ᓈᓴᕐᑕᐅᓚᐅᕐᐳᑦ, ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.