ᒨᓯᓯ ᓯᑕᒪᖏᑦ 36 - ᐊᒡᓔᑦ ᐃᑦᔪᕐᖕᓁᑦᑐᑦᐊᕐᓁᑦ ᑲᑎᑎᑕᐅᓯᒪᔪᑦ ᑭᖑᕐᖑᑎᔭᒃᓴᖏᑦ 1 ᓯᕗᓕᕐᑎᑦ ᒋᓕᐊᑎᐅᑉ ᑭᖑᕚᖏᑦ ᒪᑬᕆᐅᑉ ᐃᕐᓂᖓᑕ, ᒫᓇᓯᐅᑉ ᐃᕐᓂᕆᓚᐅᕐᑕᖓᑕ, ᔫᓯᐱᐅᑉ ᑭᖑᕚᖏᑦ, ᒨᓯᓯᒧᑦ ᓯᕗᓕᕐᑎᐅᔪᓄᓪᓗ, ᐃᓴᕆᐊᓕᒥᐅᑦ ᐊᖓᔪᖅᑳᖏᓐᓄᐊᓚᐅᕐᐳᑦ ᐅᖃᕆᐊᕐᑐᕐᓗᑎᒃ. 2 ᐅᖃᕐᓗᑎᒡᓗ: “ᐊᑕᓂᖅ ᐱᖁᔨᓚᐅᕐᒪᑦ ᐊᖓᔪᖅᑳᑦᑎᓐᓂᒃ ᒨᓯᓯᒥᒃ ᓄᓇ ᐊᕕᒃᑐᕐᓗᒍ ᓇᓚᐅᑦᑖᕈᑎᒃᑯᑦ ᓄᓇᖁᑎᑖᕆᔭᐅᖁᓪᓗᒍ ᐃᓴᕆᐊᓕᒥᐅᓄᑦ, ᐊᖓᔪᖅᑳᕗᑦ ᐊᑕᓂᐅᑉ ᐱᖁᓚᐅᕐᒪᒍ ᖃᑕᓐᖑᑎᕗᑦ ᔨᓘᕕᕼᐊᑦ ᓄᓇᖁᑎᑖᖓᓂᒃ ᐸᓂᖏᑦ ᓄᓇᖁᑎᑖᖁᓪᓗᒋᑦ. 3 ᐂᑉᐸᕐᑖᕐᓯᒪᒃᐸᑕᓕ ᐃᓴᕆᐊᓕᒥᐅᑦ ᑭᖑᕚᖑᖃᑎᒌᑦ ᓇᓪᓕᐊᑕ ᐃᕐᓂᖏᓐᓂᒃ, ᑖᒃᑯᐊ ᓄᓇᖁᑎᑖᕆᒋᐊᖃᕐᑕᒥᖕᓂᒃ ᓯᕗᓕᕕᓂᕐᒥᒃᑎᒍᑦ ᐱᑎᑕᐅᒐᔭᖏᒻᒪᑕ, ᐃᓚᓕᐅᑎᑐᐃᓐᓇᕋᔭᕐᒪᑕ ᐂᑉᐸᕐᑖᕆᔭᖏᑕ ᓄᓇᑯᑎᖏᓐᓄᑦ; ᓇᓚᐅᑦᑖᕈᑎᒃᑯᑦ ᓄᓇᖁᑎᑖᕗᑦ ᐃᓚᓐᖓᕐᑕᐅᒐᔭᕐᒪᑦ. 4 ᐊᕐᕌᒍ ᔫᐱᓖᒥᒃ ᑍᔭᐅᔪᖅ ᐅᑎᕐᑎᑦᓯᕕᒃ ᓇᓪᓕᐅᑎᒃᐸᑦ ᐃᓴᕆᐊᓕᒥᐅᓄᑦ, ᓄᓇᖁᑎᑖᕕᓂᖓᑦ ᐃᓚᓕᐅᑎᔭᐅᒐᔭᕐᒪᑦ ᐂᑉᐸᕐᑖᕐᕕᒋᓯᒪᔭᖏᑕ ᓄᓇᖁᑎᖏᓐᓄᑦ; ᓯᕗᓕᑦᑎᒍᑦ ᓄᓇᖁᑎᒋᓂᐊᕐᑕᕗᑦ ᐊᖏᕈᑕᐅᓯᒪᔪᖅ ᐲᕐᑕᐅᒐᔭᕐᒪᑦ ᐅᕙᑦᑎᓐᓂᑦ.” 5 ᑕᕝᕙ ᒨᓯᓯᐅᑉ ᐃᓴᕆᐊᓕᒥᐅᑦ ᐱᖁᕔᑦ ᐊᑕᓂᐅᑉ ᐅᖃᐅᓯᖓ ᒪᓕᒡᓗᒍ, ᐅᖃᕐᓗᓂ: “ᔫᓯᐱᐅᑉ ᐃᕐᓂᖏᑕ ᑭᖑᕚᖏᑕ ᐅᖃᐅᓯᖏᑦ ᓱᓕᕗᑦ. 6 ᑍᒫᒃ ᐊᑕᓂᖅ ᐱᖁᔨᕗᖅ ᔨᓘᕕᕼᐋᑎᐅᑉ ᐸᓂᖏᑦ ᐱᓪᓗᒋᑦ, ᐅᖃᕐᒪᑦ, ‘ᐂᑉᐸᕐᑖᕆᔪᒪᔭᒥᖕᓂᒃ ᐅᐃᑖᕐᓕᑦ, ᑭᓯᐊᓂᓕ ᓯᕗᓕᕕᓂᑐᖃᖏᓐᓂᑦ ᐱᔪᓂᒃ ᑭᓯᐊᓂ.’ 7 ᐃᓴᕆᐊᓕᒥᐅᑦ ᓄᓇᖃᑎᖏᑦ ᑭᖑᕚᖑᖃᑎᖏᑕ ᐊᓯᖏᓐᓄᑦ ᐱᔭᐅᖃᑦᑕᖁᓇᒋᑦ, ᐃᓄᐃᑦ ᐊᑐᓂᑦ ᓯᕗᓕᕕᓂᕐᒥᒍᑦ ᓄᓇᖁᑎᑖᕆᓯᒪᔭᒥᖕᓂᒃ ᐱᓯᒤᓐᓇᖁᓪᓗᒋᑦ. 8 ᐸᓂᒋᔭᐅᔪᓕᒫᑦ ᓄᓇᖁᑎᑖᕐᓯᒪᔪᑦ ᐃᓴᕆᐊᓕᒥᐅᓂ ᐂᑉᐸᕐᑖᕆᔭᐅᔭᕆᐊᖃᕐᐳᑦ ᓯᕗᓕᕕᓂᖓᓂᑦ ᐱᓯᒪᔪᒧᑦ, ᐃᓴᕆᐊᓕᒥᐅᑦ ᓄᓇᖁᑎᖃᖁᓪᓗᒋᑦ ᓯᕗᓕᕕᓂᕐᒥᒃᑎᒍᑦ ᐱᓯᒪᔭᒥᖕᓂᒃ. 9 ᓄᓇᖁᑎᑖᖑᓯᒪᔪᑦ ᑭᖑᕚᖑᖃᑎᒌᓂᑦ ᑭᖑᕚᖑᖃᑎᖏᑕ ᐊᓯᖏᓐᓄᑦ ᐱᔭᐅᖃᑦᑕᖁᓇᒋᑦ, ᐃᓴᕆᐊᓕᒥᐅᓂ ᑭᖑᕚᖑᖃᑎᒌᑦ ᐊᑐᓂᑦ ᓄᓇᖁᑎᑖᕆᓯᒪᔭᒥᖕᓂᒃ ᐱᓯᒤᓐᓇᖁᓪᓗᒋᑦ.” 10 ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ, ᔨᓘᕕᕼᐋᑎᐅᑉ ᐸᓂᖏᑦ ᑍᒤᓕᐅᓚᐅᕐᐳᑦ; 11 ᒪᕼᐊᓚ, ᑏᕐᔭ, ᕼᐅᒡᓚ, ᒥᐅᓪᑲ, ᐊᒻᒪᓗ ᓄᐊ ᑖᒃᑯᐊ ᔨᓘᕕᕼᐋᑎᐅᑉ ᐸᓂᖏᑦ, ᐂᑉᐸᕐᑖᕐᑐᓚᐅᕐᐳᑦ ᐃᓚᖏᑕ ᐃᕐᓂᖏᓐᓂᒃ. 12 ᐂᑉᐸᕐᑖᕐᑐᓚᐅᕐᐳᑦ ᔫᓯᐱᐅᑉ ᐃᕐᓂᖓᑕ ᒫᓇᓯᐅᑉ ᑭᖑᕚᖏᓐᓂᑦ ᐃᓚᖃᕐᑐᓂᒃ. 13 ᑖᒃᑯᐊ ᑕᕝᕙ ᐱᖁᔧᑦ ᐃᖅᑲᕐᑐᐃᑦᔪᑎᓪᓗ ᐊᑕᓂᐅᑉ ᒪᓕᒃᑕᐅᖁᓚᐅᕐᑕᖏᑦ ᐃᓴᕆᐊᓕᒥᐅᓄᑦ ᒨᓯᓯ ᐊᖅᑯᑎᒋᓪᓗᒍ ᒧᐊᐱᐅᑉ ᓇᑎᕐᓇᖓᓂ ᔪᐊᕐᑕᓂᐅᑉ ᓯᓈᓂ ᔨᕆᑰᑉ ᐊᑭᐊᓂ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society