ᒨᓯᓯ ᓯᑕᒪᖏᑦ 35 - ᐊᒡᓔᑦ ᐃᑦᔪᕐᖕᓁᑦᑐᑦ

ᓕᕔᑎᑦ ᓄᓇᖁᑎᑖᕆᒋᐊᖃᕐᑕᖏᑦ

¹ ᐊᑕᓂᐅᑉ ᒨᓯᓯ ᐅᖃᕐᕕᒋᕚ ᒧᐊᐱᐅᑉ ᓇᑎᕐᓇᖓᓂ ᔪᐊᕐᑕᓂᐅᑉ ᓴᓂᐊᓂᑎᓪᓗᒋᑦ ᔨᕆᑰᑉ ᐊᑭᐊᓂ, ᐅᖃᕐᓗᓂ:

² “ᐃᓴᕆᐊᓕᒥᐅᑦ ᐱᖁᒃᑭᑦ ᑐᓂᓯᖁᓗᒋᑦ ᓕᕔᑎᓄᑦ ᐃᒡᓗᒐᓴᒡᔪᐊᓂᒃ ᐃᓂᒋᓂᐊᕐᑕᖏᓐᓂᒃ ᓄᓇᖁᑎᑖᕆᔭᖏᓐᓃᑦᑐᓂᒃ, ᓕᕔᑎᓪᓗ ᓄᓇᖁᑎᑖᕐᑎᑦᓴᕆᐊᖃᕐᐸᓯ ᐃᒡᓗᒐᓴᒡᔪᐊᕐᑖᖏᑕ ᖃᓂᒋᔭᖏᓐᓃᑦᑐᓂᒃ.

³ ᐃᒡᓗᒐᓴᒡᔪᐊᓂᒃ ᐃᓂᖃᕐᓂᐊᕐᒪᑕ; ᓄᓇᖓᓂᓗ ᐆᒪᔪᖁᑎᖏᑦ ᐃᒻᒧᕐᓯᐅᒐᖁᑎᖏᑦ, ᐆᒪᔪᖁᑎᖏᑦ ᐅᓄᕐᑐᑦ ᐃᓂᖃᕐᓂᐊᕐᒪᑕ, ᐆᒪᔪᖁᑎᖏᓪᓗ ᓱᓇᑐᐃᓐᓁᑦ.

⁴ ᐃᒡᓗᒐᓴᒡᔪᐊᖏᑕ ᑭᒡᓕᖓ, ᑐᓂᔭᒃᓴᕆᕙᑦ ᓕᕔᑎᓄᑦ, ᐃᒡᓗᒐᓴᒡᔪᐊᖏᑕ ᐊᕙᓗᖓᓂᑦ ᓯᓚᑖᓄᑦ ᐆᒃᑑᑎᓂᒃ 500ᓂᒃ ᐊᖏᓂᖃᕆᐊᖃᕐᐳᖅ ᑬᕙᓪᓚᒃᓯᓯᒪᓗᓂ ᐃᒡᓗᒐᓴᖕᓂᒃ ᑲᓱᕐᓗᒍ.

⁵ ᐆᒃᑐᕐᓯᔭᕆᐊᖃᕐᐳᓯᓗ ᐃᒡᓗᒐᓴᒡᔪᐊᑦ ᓯᕿᓂᖓᑕ ᓄᐃᕕᐊᑕ ᓯᓚᑖᒍᑦ ᐆᒃᑑᑎᓂᒃ 1,000ᓂᒃ ᓯᕿᓂᖓᓂᓗ 1,000ᓂᒃ, ᓂᐱᕕᐊᓂᓗ 1,000ᓂᒃ, ᐅᓐᓄᐊᓪᓗᐊᖓᓂᓗ 1,000ᓂᒃ. ᐃᒡᓗᒐᓴᒡᔪᐊᑦ ᕿᑎᖓᓃᑦᓴᕆᐊᖃᕐᐳᑦ. ᑖᒃᑯᐊ ᐆᒪᔪᖁᑎᖏᓐᓄᑦ ᐃᓂᒋᔭᐅᓗᑎᒃ ᐃᒡᓗᒐᓴᖏᓐᓂ.

⁶ ᐃᒡᓗᒐᓴᒡᔪᐊᓂ ᓕᕔᑎᓄᑦ ᑐᓂᓂᐊᕐᑕᑦᓯᓐᓂ ᐃᒡᓗᒐᓴᒡᔪᐊᓂᒃ 6ᓂᒃ ᓇᓗᓁᕐᓯᔭᕆᐊᖃᕐᐳᓯ, ᓇᓪᓕᐊᑦ ᐱᔮᕆᖏᓪᓗᑎᒃ ᐃᓄᐊᕈᑎᒃ ᕿᒫᕕᒋᔪᓐᓇᕐᑕᖏᓐᓂᒃ. ᐊᒻᒪ ᓱᓕ ᐃᓚᓗᒋᑦ ᐃᒡᓗᒐᓴᒡᔪᐊᓂᒃ 42ᓂᒃ.

⁷ ᑲᑎᓪᓗᒋᑦ ᐃᒡᓗᒐᓮᑦ ᓕᕔᑎᓄᑦ ᑐᓂᔭᓯ 48ᖑᔭᕆᐊᖃᕐᐳᑦ; ᑖᒃᑯᐊ ᐆᒪᔪᖁᑎᖏᑕ ᓄᓇᑖᕆᔭᖏᓐᓄᑦ ᐃᓚᓕᐅᑎᔭᕆᐊᖃᕐᐳᑦ.

⁸ ᐃᒡᓗᒐᓮᓪᓗ ᑐᓂᔭᓯ ᐃᓴᕆᐊᓕᒥᐅᑦ ᓄᓇᖁᑎᑖᕆᔭᖏᓐᓂᑦ ᐱᔭᕆᐊᖃᕐᐳᑦ; ᑭᖑᕚᖑᖃᑎᒌᓂᑦ ᐅᓄᕐᓂᕐᓴᓂᑦ ᑐᓂᓯᔭᕆᐊᖃᕐᐳᓯ ᐅᓄᕐᓂᕐᓴᓂᒃ; ᑭᖑᕚᖑᖃᑎᒌᓂᓪᓗ ᐅᓄᖏᓐᓂᕐᓴᓂᑦ ᒥᑭᓂᕐᓴᓂᒃ ᑐᓂᓯᔭᕆᐊᖃᕐᐳᓯ. ᑭᖑᕚᖑᖃᑎᒌᓕᒫᑦ ᐊᑐᓂᑦ ᐃᒡᓗᒐᓴᖕᓂᒃ ᑐᓂᓯᔭᕆᐊᖃᕐᐳᑦ ᓕᕔᑎᓄᑦ, ᓄᓇᖁᑎᑖᕆᔭᑎᒃ ᐊᑐᓂᑦ ᐊᖏᓂᖏᑦ ᒪᓕᒡᓗᒋᑦ.”

ᐃᒡᓗᒐᓮᑦ ᕿᒫᕕᒃᓴᐅᔪᑦ

⁹ ᐊᒻᒪ ᐊᑕᓂᐅᑉ ᒨᓯᓯ ᐅᖃᕐᕕᒋᒋᕚ, ᐅᖃᕐᓗᓂ,

¹⁰ “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᒤᓕᓗᑎᑦ: ‘ᔪᐊᕐᑕᓂᒥᒃ ᐃᑳᕈᑦᓯ ᓄᓇᒧᑦ ᑬᓇᓂᒧᑦ,

¹¹ ᓇᓗᓁᕐᓯᔭᕆᐊᖃᕐᐳᓯ ᐃᒡᓗᒐᓴᒡᔪᐊᓂᒃ ᕿᒫᕕᒃᓴᐅᔪᓐᓇᕋᔭᕐᑐᓂᒃ, ᓇᓪᓕᐊᑦ ᐃᓄᖕᒥᒃ ᑐᖁᑦᓯᒃᐸᑦ ᐱᔮᕆᖏᓪᓗᓂ ᕿᒫᕕᒋᒐᔭᕐᑕᖓᓂᒃ.

¹² ᐃᒡᓗᒐᓮᑦ ᑍᒤᑦᑐᑦ ᕿᒫᕕᒋᒐᔭᕋᑦᓯᐅᒃ ᐊᑭᓂᐊᕋᓱᐊᕐᑐᒥᑦ, ᐃᓄᖕᒥᒃ ᑐᖁᑦᓯᔪᖅ ᑐᖁᑕᐅᑲᐅᑎᒋᖁᓇᒍ ᐃᓅᖃᑎᒌᒡᔪᐊᑦ ᐃᖅᑲᕐᑐᐃᔨᖏᑕ ᓵᖓᓂ ᓇᖏᓚᐅᕐᑎᓐᓇᒍ.

¹³ ᐃᒡᓗᒐᓮᓪᓗ ᑐᓂᔭᓯ ᐃᓚᖏᓐᓂᒃ, ᐃᒡᓗᒐᓴᖕᓂᒃ ᕿᒫᕕᒃᓴᓂᒃ ᐱᖓᓲᔪᕐᑐᓂᒃ ᐋᖅᑭᒃᓯᔪᒃᓴᐅᕗᓯ.

¹⁴ ᐃᒡᓗᒐᓴᖕᓂᒃ ᑍᒤᑦᑐᓂᒃ ᐱᖓᓱᓂᒃ ᐋᖅᑭᓯᔪᒃᓴᐅᕗᓯ ᔪᐊᕐᑕᓂᐅᑉ ᐊᑭᐊᓂ ᑕᒫᓂ ᓇᔪᕐᑕᑦᑎᓐᓂ, ᑬᓇᓂᐅᓪᓗ ᓄᓇᖓᓂ ᐱᖓᓱᓂᒃ ᐃᒡᓗᒐᓴᒡᔪᐊᓂᒃ ᐋᖅᑭᒃᓯᔪᒃᓴᐅᕗᓯ, ᐃᒡᓗᒐᓴᒡᔪᐊᓂᒃ ᕿᒫᕕᒃᓴᓂᒃ.

¹⁵ ᑖᒃᑯᐊ ᐃᒡᓗᒐᓮᑦ ᕿᒫᕕᒃᓴᐅᔭᕆᐊᖃᕐᐳᑦ ᐃᓴᕆᐊᓕᒥᐅᓄᑦ, ᐃᓅᖃᑎᑐᖃᕆᓐᖏᑕᑦᓯᓐᓄᑦ, ᑕᒫᓂᓗ ᓄᓇᖃᕐᑐᓄᑦ ᐃᓚᒋᓐᖏᑕᑦᓯᓐᓄᑦ, ᓇᓪᓕᐊᑦ ᐱᔮᕆᖏᓪᓗᓂ ᐃᓄᖕᒥᒃ ᑐᖁᑦᓯᒃᐸᑦ ᕿᒫᔪᓐᓇᖁᓪᓗᒍ.

¹⁶ “‘ᐃᓄᒡᓕ ᓴᕕᕋᔭᖕᒧᑦ ᐊᓇᐅᓯᒃᐸᑦ, ᑐᖁᑦᓯᓗᓂᓗ, ᑖᓐᓇ ᐃᓄᐊᕐᑑᕗ; ᐃᓄᐊᕐᑐᕐᓗ ᑐᖁᑕᐅᓪᓚᕆᒋᐊᖃᕐᐳᖅ.

¹⁷ ᐅᔭᕋᖕᒧᓪᓕ ᒥᓗᕐᐸᒍ ᑎᒍᒥᐊᕐᑕᒥᓄᑦ, ᑐᖁᒍᑕᐅᓪᓗᐊᕐᑐᒧᑦ ᑐᖁᒃᐸᑦ, ᑍᒤᓕᐅᕐᑐᖅ ᐃᓄᐊᕐᑑᕗᖅ, ᐃᓄᐊᕐᑐᕐᓗ ᖁᓚᕐᓇᖏᑦᑐᒥᒃ ᑐᖁᑕᐅᔭᕆᐊᖃᕐᐳᖅ.

¹⁸ ᕿᔪᖕᒥᒡᓕ ᓱᒋᐅᑎᖃᕐᓗᓂ ᐊᓇᐅᒃᐸᒍ, ᑐᖁᒍᑕᐅᓪᓗᐊᕐᑐᒧᑦ, ᑐᖁᒃᐸᑦ, ᑍᒤᓕᐅᕐᑐᖅ ᐃᓄᐊᕐᑑᕗᖅ, ᐃᓄᐊᕐᑐᕐᓗ ᖁᓚᕐᓇᖏᑦᑐᒥᒃ ᑐᖁᑕᐅᔭᕆᐊᖃᕐᐳᖅ.

¹⁹ ᐊᑭᓂᐊᕐᑑᑉ ᐊᐅᒃ ᐃᒻᒥᓄᑦ ᐱᑎᒻᒪᒍ ᐃᓄᐊᕐᑐᖅ ᑐᖁᑦᓴᕆᐊᖃᕐᐹ; ᑲᑎᒍᓂᐅᒡᓗ, ᑐᖁᑦᓴᕆᐊᖃᕐᓗᒍ.

²⁰ “‘ᓇᓕᐊᓪᓕ ᓂᓐᖓᐅᒪᓂᕐᒧᑦ ᐃᓄᖕᒥᒃ ᐊᔭᒃᓯᒃᐸᑦ, ᐃᔨᕐᓯᒪᓗᓂᓗ ᐅᑕᖅᑭᓗᒍ, ᒥᓗᕆᐊᕐᓗᒍ ᓱᓇᑐᐃᓐᓇᕐᒧᑦ, ᑖᓐᓇᓗ ᑐᖁᒃᐸᑦ,

²¹ ᐆᒥᓱᖕᓂᕐᒧᓪᓗ ᐱᒋᐊᕐᐸᒍ ᐊᒡᒐᒥᓄᑦ ᑑᕐᓗᒍ ᑐᖁᓪᓗᒍᓗ, ᑍᒤᓕᐅᕐᓯᔪᖅ ᑐᖁᑕᐅᓪᓚᕆᒋᐊᖃᕐᐳᖅ. ᐃᓄᐊᕐᑑᖕᒪᑦ; ᐊᐅᖕᒥᒡᓗ ᐊᑭᓂᐊᕐᑑᑉ ᐃᓄᐊᕐᓯᒪᔪᖅ ᑐᖁᑕᒃᓴᕆᕚ ᑲᑎᒍᓂᐅᒃ.

²² “‘ᑭᓯᐊᓂᓕ, ᐊᔭᑳᓪᓚᒃᐸᒍ ᐆᒥᓱᖕᓂᕐᒨᖏᑦᑐᖅ, ᐃᒋᑦᓯᕕᒋᒃᐸᒍᓗ ᐃᔨᕐᓯᒪᓗᓂ ᐅᑕᖅᑭᖏᑉᐸᒍ,

²³ ᐅᔭᕋᖕᒥᒡᓗ ᓱᒋᐅᑎᖃᖏᓪᓗᓂ, ᐃᓅᑉ ᑐᖁᒃᔪᑎᒋᓪᓗᐊᕐᑕᖓᓂᒃ, ᑕᑯᖏᓪᓗᓂᐅᒃ ᒥᓗᕐᐸᒍ, ᑖᓐᓇᓗ ᑐᖁᒃᐸᑦ, ᐊᑭᕋᕆᓗᓂᐅᒃ ᐱᖏᑉᐸᑦ ᐋᓐᓂᕋᓱᐊᖏᓪᓗᓂᐅᒡᓗ,

²⁴ ᑕᕝᕙ ᐃᓅᖃᑎᒌᒡᔪᐊᑦ ᐃᖅᑲᕐᑐᐃᔨᖏᑦ ᐃᖅᑲᕐᑐᐃᔭᕆᐊᖃᓕᕐᐳᑦ ᐃᓄᐊᕐᑐᒥᒃ ᐊᐅᖕᒥᒡᓗ ᐊᑭᓂᐊᕈᒪᔪᒥᒃ ᐃᖅᑲᕐᑐᐃᓃᑦ ᐅᑯᐊ ᒪᓕᒡᓗᒋᑦ.

²⁵ ᐃᓅᖃᑎᒌᒡᔪᐊᑦ ᓴᐳᑎᔭᕆᐊᖃᕐᐹᑦ ᐃᓄᐊᕐᑐᖅ ᐊᐅᖕᒥᒃ ᐊᑭᓂᐊᕈᒪᔪᒥᑦ, ᐃᓅᖃᑎᒌᒡᔪᐊᑦ ᐅᑎᕐᑎᑦᓴᕆᐊᖃᕐᐹᑦ ᐃᒡᓗᒐᓴᒡᔪᐊᓄᑦ ᕿᒫᕕᒃᓴᓄᑦ ᕿᒫᕕᒋᓯᒪᔭᖓᓄᑦ, ᑕᕝᕙᓂᓗ ᐃᓂᖃᓕᕐᓗᓂ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑦ ᐅᕐᓱᒧᑦ ᐃᑦᔪᕐᓁᑦᑐᒧᑦ ᒥᖑᐊᕐᑕᐅᓯᒪᔪᖅ ᑐᖁᓚᐅᖏᓐᓂᖓᓂ.

²⁶ ᐃᓄᐊᓚᐅᕐᑐᕐᓕ ᖃᖓᑐᐃᓐᓇᖅ ᐃᒡᓗᒐᓴᒡᔪᐊᑦ ᕿᒫᕖᑦ ᑭᒫᕕᒋᓯᒪᔭᒥ ᓯᓚᑖᓄᐊᕐᐸᑦ,

²⁷ ᐊᐅᒡᓗ ᐱᓪᓗᒍ ᐊᑭᓂᐊᕈᒪᔫᑉ ᖃᐅᔨᒃᐸᒍ ᐃᒡᓗᒐᓴᒡᔪᐊᑦ ᕿᒫᕖᑦ ᓯᓚᑖᓃᑦᑐᖅ, ᑕᕝᕙ ᐊᐅᒃ ᐱᓪᓗᒍ ᐊᑭᓂᐊᕈᒪᔫᑉ ᐃᓄᐊᓚᐅᕐᑐᖅ ᑐᖁᒍᓐᓇᕐᐹ, ᐊᐅᖕᒧᓪᓗ ᑕᒪᑐᒧᖓ ᐸᓯᔭᒃᓴᐅᒐᔭᓐᖏᓚᖅ.

²⁸ ᑖᓐᓇ ᐃᒡᓗᒐᓴᒡᔪᐊᓂ ᕿᒫᕕᖕᒥ ᐃᓂᖃᑦᓮᓇᕆᐊᖃᕐᒪᑦ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦ ᑐᖁᓚᐅᖏᓐᓂᖓᓂ. ᑐᓂᕐᕈᓯᕐᑎᑦᔨᓪᓕ ᐊᖓᔪᖅᑳᖓᑕ ᑐᖁᓂᖓᑕ ᑭᖑᓂᖓᒍᑦ, ᐃᓄᐊᓚᐅᕐᑐᖅ ᓄᓇᖁᑎᑖᕆᓚᐅᕐᑕᒥᓄᑦ ᐅᑎᕈᓐᓇᕐᓯᕗᖅ.

²⁹ ᑕᒪᒃᑯᐊ ᐃᖅᑲᕐᑐᐃᔨᒧᑦ ᒪᓕᒐᒃᓴᐅᔭᕆᐊᖃᕐᐳᑦ ᐃᓕᑦᓯᓐᓄᑦ ᑭᖑᕚᑦᓯᓐᓄᓪᓗ ᑐᕌᖓᓗᑎᒃ ᐃᓂᒋᔭᑦᓯᓐᓂ.

³⁰ “‘ᓇᓪᓕᐊᑦ ᐃᓄᖕᒥᒃ ᑐᖁᑦᓯᔪᖅ, ᐃᓄᐊᕐᑐᖅ ᑐᖁᑕᐅᔭᕆᐊᖃᕐᐳᖅ ᖃᐅᔨᔪᕕᓃᑦ ᐅᖃᐅᓯᖏᑦ ᒪᓕᒡᓗᒋᑦ; ᐊᑕᐅᓯᐅᓪᓕ ᖃᐅᔨᔪᕕᓂᐅᑉ ᐅᖃᐅᓯᖏᑦ ᓈᒻᒪᒃᓯᑎᑦᓯᓐᖏᓚᑦ ᐃᓄᑉ ᑐᖁᑦᓯᔪᕕᓂᐅᑉ ᑐᖁᑕᐅᔭᕆᐊᖃᕐᓂᖓᓄᑦ.

³¹ ᓱᓕᓗ ᐃᓅᑉ ᐊᑭᓕᐅᑎᒃᓴᖓᓂᒃ ᐊᑭᓖᓇᓱᐊᕆᐊᖃᓐᖏᓚᓯ ᐃᓄᐊᕐᓯᒪᔫᑉ ᑐᖁᑕᐅᖏᑦᔪᑎᒃᓴᖓᓂᒃ, ᑖᓐᓇ ᑐᖁᑕᐅᓪᓚᕆᒋᐊᖃᕐᒪᑦ.

³² ᐊᑭᓖᔭᕆᐊᖃᓐᖏᓚᓯᓗ ᐃᒡᓗᒐᓴᒡᔪᐊᓄᑦ ᕿᒫᕕᖕᓄᑦ ᕿᒫᓯᒪᔪᒥᒃ, ᓄᓇᖁᑎᒋᓚᐅᕐᑕᒥᓄᑦ ᐅᑎᖁᓗᒍ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓ ᑐᖁᓚᐅᖏᓐᓂᖓᓂ.

³³ ᓄᓇ ᐃᓂᒋᔭᓯ ᐃᑦᔪᕐᓇᕐᑑᓕᖁᓇᒍ; ᐊᐅᑉ ᓄᓇ ᐃᑦᔪᕐᓇᕐᓯᑎᒻᒪᒍ, ᓄᓇᓗ ᓱᓇᒧᑦ ᓴᓗᒻᒪᕐᑎᑕᐅᔪᓐᓇᕋᓂ, ᐊᐅᒃ ᑯᕕᔭᐅᓯᒪᔪᖅ ᑕᒪᐅᖓ ᐱᓪᓗᒍ, ᑭᓯᐊᓂ ᐊᐅᖕᒥᒃ ᑯᕕᓯᓚᐅᕐᑑᑉ ᓴᓗᒻᒪᕐᑎᑦᓱᓐᓇᕐᒪᒍ.

³⁴ ᓄᓇ ᐃᓂᒋᓂᐊᑕᕐᓯ ᓴᓗᒤᓕᑎᑦᓴᕆᐊᖃᓐᖏᓚᓯᐅᒃ, ᐊᑯᓐᓇᑦᓯᓐᓂᑦᑕᐅᖅ ᐃᓂᖃᕋᒪ; ᐅᕙᖓ ᐊᑕᓂᖅ ᐃᓴᕆᐊᓕᒥᐅᑦ ᐊᑯᕐᖓᓐᓂ ᐃᓂᖃᕐᐳᖓ.’”