ᒨᓯᓯ ᓯᑕᒪᖏᑦ 34 - ᐊᒡᓔᑦ ᐃᑦᔪᕐᖕᓁᑦᑐᑦᑬᓇᓂᐅᑉ ᖃᓂᒋᔭᖓᓃᓕᕐᑎᓪᓗᒋᑦ 1 ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐃᒫᒃ, 2 “ᐃᓴᕆᐊᓕᒥᐅᑦ ᐅᖃᕐᕕᒋᒃᑭᑦ, ᐃᒫᒃ ᐅᖃᐅᑎᓗᒋᑦ: ᓄᓇᒧᑦ ᑬᓇᓂᒧᑦ ᑎᑭᒃᑯᑦᓯ, ᑕᒪᑦᔭ ᓄᓇ ᐃᓕᑦᓯᓐᓄᑦ ᐱᒋᔭᒃᓴᐅᓗᓂ ᑎᑭᓐᓂᐊᕐᑕᓯ ᓄᓇ ᑬᓇᓂ ᑭᒡᓕᖓᑕ ᐃᓱᐊᓂᑦ ᑭᒡᓕᖓᑕ ᐃᓱᐊᓄᑦ. 3 ᓯᕿᓂᖓᑕ ᑭᒡᓕᖓᓂᑦ ᐱᒋᐊᕐᓗᒍ ᐃᓄᖃᖏᑦᑑᑉ ᔨᓐ ᑭᒡᓕᖓᓂᑦ ᐄᑐᒥᐅᑉ ᑭᒡᓕᖓ ᐊᑐᐊᕐᓗᒍ; ᑕᕝᕙ ᓯᕿᓂᖓᓂ ᓄᓇᐅᑉ ᑭᒡᓕᖓ ᑎᑭᓯᒪᓂᐊᕐᐳᖅ ᓯᕿᓂᐅᑉ ᓄᐃᕕᐊᑕ ᓇᓛᓄᑦ ᐃᒪᕐᔪᐊᖅ ᑕᕆᐅᑉ ᐃᓱᐊ ᑎᑭᓪᓗᒍ: 4 ᓄᓇᖁᑎᑦᓯ ᑭᒡᓕᖓ ᑎᑭᓯᒪᓂᐊᕐᐳᖅ ᐊᑲᕌᐱᒻ ᓯᕿᓂᖓᑕ ᖁᒻᒧᑦ ᓯᕕᖓᓂᖓᓂᑦ, ᑕᐅᕗᖓ ᔨᓐ ᑎᑭᓪᓗᒍ, ᑲᑎᓯ-ᐸᕐᓂᐊ ᓯᕿᓂᕐᓯᕆᓗᒍ, ᑕᕝᕙᓐᖓᑦ ᕼᐊᔭᕐ-ᐊᑖᕆ ᐊᖅᑯᓵᕐᓗᒍ, ᐊᔾᒨᓂ ᑲᔪᓯᕕᒋᓗᒍ; 5 ᓄᓇᐅᑉ ᑭᒡᓕᖓ ᑲᔪᓯᓯᒪᓚᐅᕐᐳᖅ ᐊᔾᒨᓂᒥᑦ ᓴᖑᓯᒪᓗᓂ ᐄᑦᔨᑉᑎᐅᑉ ᑰᖓᓂᑦ, ᐃᓱᖃᕐᓗᓂ ᐃᒪᕐᔪᐊᒥᒃ. 6 “ᓄᓇᐅᑉ ᑭᒡᓕᖓ ᓯᕿᓂᐅᑉ ᓂᐱᕕᐊᓂᑦ, ᐃᒪᕐᔪᐊᒥᑦ ᐱᒋᐊᕐᓗᒍ; ᑕᒪᓐᓇ ᑕᕝᕙ ᓯᕿᓂᐅᑉ ᓂᐱᕕᐊᑕ ᐱᒋᐊᕐᕕᖓ. 7 “ᐊᒻᒪ ᑕᕝᕙ ᐅᓐᓄᐊᓪᓗᐊᑉ ᐱᒋᐊᕐᕕᖓ: ᐃᒪᕐᔪᐊᒥᑦ ᐱᒋᐊᕐᓗᒍ ᓇᓗᓁᒃᑯᑦᓯᕐᓗᒍ ᖃᖅᑲᖅ ᕼᐆᕆᑉ ᑎᑭᓪᓗᒍ; 8 ᖃᖅᑲᖅ ᕼᐆᕆᒥᑦ ᑭᒡᓕᖓᓂᒃ ᓇᓗᓁᕐᓯᓗᓯ ᕼᐊᒫᑎᐅᑉ ᐃᑎᕆᐊᕐᕕᖓ ᑎᑭᓪᓗᒍ; ᑭᒡᓕᓕᐅᕐᑕᓯ ᔨᑖᑎ ᑐᕌᕐᓗᒍ; 9 ᓄᓇᐅᑉ ᑭᒡᓕᖓ ᑲᔪᓯᓗᒍ ᔨᐸᕋᓂᒧᑦ, ᐃᓱᖃᕐᓗᒍ ᕼᐊᔭ-ᐃᓇᓐᒧᑦ. ᑕᒪᑦᔭ ᓄᓇᑖᕆᔭᑦᓯ ᐅᓐᓄᐊᓪᓗᐊᑉ ᑭᒡᓕᖓ. 10 “ᓯᕿᓂᐅᑉ ᓄᐃᕕᐊᓄᑦ ᑐᕌᖓᔪᖅ ᓄᓇᖁᑎᑖᕆᔭᑦᓯ ᑭᒡᓕᖓ ᐱᒋᐊᕐᓗᒍ ᕼᐊᔭ-ᐃᓇᓐᒥᑦ ᓯᑉᕼᐋᒥᒧᑦ; 11 ᓄᓇᐅᑉ ᑭᒡᓕᖓ ᓯᑉᕼᐋᒥᒥᑦ ᑕᐅᓄᖓ ᕆᑉᓚᒧᑦ ᐂᓂᐅᑉ ᓯᕿᓂᖓᑕ ᓄᐃᕕᐊᓃᑦᑐᒧᑦ; ᓄᓇᐅᑉ ᑭᒡᓕᖓ ᑕᐅᓄᖓ ᑲᔪᓯᓗᓂ ᐃᒪᕐᔪᐊᑉ ᓯᓂᕆᑎᐅᑉ ᓯᕿᓂᖓᑕ ᓄᐃᕕᐊᓄᑦ; 12 ᓄᓇᐅᑉ ᑭᒡᓕᖓ ᑰᒃ ᔪᐊᕐᑕᓂ ᐊᑐᐊᕐᓗᒍ, ᐃᓱᖃᕐᓗᓂ ᑕᕆᐅᕐᒧᑦ ᐃᒪᕐᔪᐊᒧᑦ. ᑕᒪᓐᓇ ᑕᕝᕙ ᓄᓇᑯᑎᑖᕆᓂᐊᕐᑕᓯ ᑭᒡᓕᖓᑕᓗ ᖃᓂᒋᔭᖓᓃᑦᑐᓕᒫᑦ.” 13 ᒨᓯᓯᐅᓪᓗ ᐃᓴᕆᐊᓕᒥᐅᑦ ᐅᖃᐅᑎᕔᖅ ᐃᒫᒃ, “ᑕᒪᓐᓇ ᑕᕝᕙ ᓄᓇᖁᑎᑖᕆᓂᐊᕐᑕᓯ ᓇᓚᐅᑦᑖᕈᑎᒃᑯᑦ ᑭᒡᓕᖏᑦ ᒪᓕᒡᓗᒋᑦ, ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ, ᑐᓂᓯᔪᒪᓂᖓ 9ᓄᑦ ᑭᖑᕚᖑᖃᑎᒌᓄᑦ ᑭᖑᕚᖑᖃᑎᒌᓪᓗ ᓇᑉᐸᖓᓐᓄᑦ. 14 ᕉᐱᓂᐅᑉ ᑭᖑᕚᖏᑦ ᓯᕗᓕᕕᓂᖏᑕ ᐃᓚᒌᖕᓂᖏᑦ ᒪᓕᒡᓗᒋᑦ, ᒑᑎᐅᑉ ᑭᖑᕙᖏᑦ ᓯᕗᓕᕕᓂᖏᑕ ᐃᓚᒌᖕᓂᖏᑦ ᒪᓕᒡᓗᒋᑦ, ᓄᓇᖁᑎᑖᕆᓂᐊᕐᑕᒥᖕᓂᒃ ᐱᑎᑕᐅᔭᕇᕐᒪᑕ; ᒫᓇᓯᐅᓪᓗ ᑭᖑᕚᖏᑕ ᓇᑉᐸᖏᑦ ᓄᓇᖁᑎᒃᓴᒥᖕᓂᒃ ᐱᑎᑕᐅᔭᕇᕐᒪᑕ. 15 ᑭᖑᕚᖑᖃᑎᒌᑦ ᒪᕐᕈᐃᑦ ᑭᖑᕚᖑᖃᑎᒌᓪᓗ ᓇᑉᐸᖏᑦ ᓄᓇᖁᑎᒃᓴᖏᓐᓂᒃ ᑐᓂᔭᐅᖕᒪᑕ ᔪᐊᕐᑕᓂᐅᑉ ᐊᑭᐊᓂ ᑕᒫᓂ ᓇᔪᕐᑕᑦᑎᓐᓂ, ᔨᕆᑰᑉ ᐊᑭᐊᓂᑦ ᓯᑭᓂᐅᑉ ᓄᐃᕕᐊᑕ ᓇᓛᓄᑦ.” ᓯᕗᓕᕐᑏᑦ ᓄᓇᒥᒃ ᐊᕕᒃᑐᐃᑎᑕᐅᔪᑦ 16 ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ, 17 “ᐅᑯᐊ ᑕᕝᕙ ᐊᖑᑎᑦ ᐊᑎᖏᑦ ᓄᓇᒥᒃ ᐊᕕᒃᑐᐃᔨᐅᓂᐊᕐᑐᑦ ᐃᓕᑦᓯᓐᓄᑦ ᓄᓇᖁᑎᑖᖁᓪᓗᓯ: ᐃᓕᓯᕆ ᑐᓂᕐᕈᓯᕐᑎᑦᓯᔨ, ᔮᓱᐊᓗ ᓈᓂᐅᑉ ᐃᕐᓂᖓ. 18 ᑎᓕᓯᔭᕆᐊᖃᕐᐳᓯᓗ ᑭᖑᕚᖑᖃᑎᒌᑦ ᐊᑐᓂᑦ ᓯᕗᓕᕐᑎᖏᓐᓂᒃ ᓄᓇᒥᒃ ᐊᕕᒃᑐᐃᔨᐅᓂᐊᕐᑐᓂᒃ ᓄᓇᖁᑎᑖᕆᔭᐅᓂᐊᕐᑐᓂᒃ.” 19 ᐅᑯᐊ ᑕᕝᕙ ᐊᖑᑎᑦ ᐊᑎᖏᑦ: ᔫᑕᐅᑉ ᑭᖑᕚᖏᓐᓂᑦ, ᑬᓚᐱ ᔨᐳᓂᐊᐅᑉ ᐃᕐᓂᖓ. 20 ᓯᒥᐅᓂᐅᑉ ᑭᖑᕚᖏᓐᓂᑦ, ᓴᒧᐃᓕ ᐊᒥᕼᐆᑎᐅᑉ ᐃᕐᓂᖓ. 21 ᐱᓐᔭᒥᓂᐅᑉ ᑭᖑᕚᖏᓐᓂᑦ, ᐃᓕᑖᑎ ᓯᔅᓘᓂᐅᑉ ᐃᕐᓂᖓ. 22 ᓯᕗᓕᕐᑎ ᑖᓐ ᑭᖑᕚᖏᓐᓂᑦ, ᐳᒃᑭ ᔪᒡᓕᐅᑉ ᐃᕐᓂᖓ. 23 ᔫᓯᐱᐅᓪᓗ ᐃᕐᓂᖏᑕ ᑭᖑᕚᖏᓐᓂᑦ: ᓯᕗᓕᕐᑎ ᒫᓇᓯᐅᑉ ᑭᖑᕚᖏᓐᓂᑦ, ᕼᐊᓁᓕ ᐃᕘᑎᐅᑉ ᐃᕐᓂᖓ. 24 ᓯᕗᓕᕐᑎ ᐃᕗᕅᒥᐅᑉ ᑭᖑᕚᖏᓐᓂᑦ, ᑭᒧᐃᓕ ᓯᑉᑖᓂᐅᑉ ᐃᕐᓂᖓ. 25 ᓯᕗᓕᕐᑎ ᓯᐳᓗᓂᐅᑉ ᑭᖑᕚᖏᓐᓂᑦ, ᐃᓔ-ᓴᐸᓇ ᐹᕐᓇᑭᐅᑉ ᐃᕐᓂᖓ. 26 ᓯᕗᓕᕐᑎ ᐃᓴᑳᕆᐅᑉ ᑭᖑᕚᖏᓐᓂᑦ, ᐹᓪᑍᓕ ᐊᑦᔮᓂᐅᑉ ᐃᕐᓂᖓ. 27 ᓯᕗᓕᕐᑎ ᐋᓱᕆᐅᑉ ᑭᖑᕚᖏᓐᓂᑦ, ᐊᕼᐃᕼᐅᑦ ᓯᓘᒥᐅᑉ ᐃᕐᓂᖓ. 28 ᓯᕗᓕᕐᑎ ᓈᑉᑕᓕᐅᑉ ᑭᖑᕚᖏᓐᓂᑦ, ᐱᑕᕼᐃᐅᓕ ᐊᒥᕼᐆᑎᐅᑉ ᐃᕐᓂᖓ. 29 ᑖᒃᑯᐊ ᑕᕝᕙ ᐊᑕᓂᐅᑉ ᐱᖁᓚᐅᕐᑕᖏᑦ ᐊᕕᒃᑐᐃᔨᐅᖁᓪᓗᒋᑦ ᐃᓴᕆᐊᓕᒥᐅᑦ ᓄᓇᖁᑎᑖᕆᓂᐊᕐᑕᖏᓐᓂᒃ ᓄᓇᒥ ᑬᓇᓂᒥ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society