ᒨᓯᓯ ᓯᑕᒪᖏᑦ 32 - ᐊᒡᓔᑦ ᐃᑦᔪᕐᖕᓁᑦᑐᑦ

ᑭᖑᕚᖑᖃᑎᒌᑦ ᓄᓇᑖᕐᓂᖓᑦ ᔪᐊᕐᑕᓂᐅᑉ ᑕᓕᕐᐱᐊᓂ

¹ ᕉᐱᓂᐅᑉ ᑭᖑᕚᖏᑦ ᒑᑦᓗ ᑭᖑᕚᖏᑦ ᐅᓄᕐᑐᕐᔪᐊᓂᒃ ᐆᒪᔪᖁᑎᖃᓚᐅᕐᐳᑦ; ᓄᓁᑦ ᐊᑎᖃᕐᑐᑦ ᔧᔨᕆᒥᒃ ᒋᓕᐊᑎᒥᒡᓗ ᐆᒪᔪᖁᑎᓄᑦ ᓈᒻᒪᑦᓯᐊᕐᒪᑕ,

² ᕉᐱᓂᐅᑉ ᑭᖑᕚᖏᑦ ᒑᑦᓗ ᑭᖑᕚᖏᑦ ᒨᓯᓯᒧᑦ, ᐃᓕᓯᕆᒧᓪᓗ ᑐᓂᕐᕈᓯᕐᑎᑦᓯᔨᒧᑦ, ᐃᓴᕆᐊᓕᒥᐅᓪᓗ ᓯᕗᓕᕐᑎᖏᓐᓄᑦ, ᕾᕗᑦ ᐅᖃᕐᓗᑎᒃ,

³ “ᐊᑕᕌᑎ, ᑎᐴᓂᓗ, ᔧᔨᕆᓗ, ᓂᒻᕌᓗ, ᕼᐃᓴᐸᓂᓗ, ᐃᓕᐊᓕᓗ, ᓯᐹᒥᓗ, ᓂᐴᓗ, ᐱᐆᓂᓗ,

⁴ ᓄᓁᑦ ᐊᑕᓂᐅᑉ ᓵᓚᒋᓚᐅᕐᑕᖏᑦ ᐃᓴᕆᐊᓕᒥᐅᑦ ᓵᖏᓐᓂ, ᑖᒃᑯᐊ ᐆᒪᔪᖁᑎᓄᑦ ᐱᐅᔫᖕᒪᑕ, ᐱᔨᑎᓪᓗ ᐅᑯᐊ ᐆᒪᔪᖁᑎᓕᐊᓘᓪᓘᑎᒃ.”

⁵ ᑍᒤᒻᒪᑦ ᐅᖃᕐᐳᑦ, “ᐃᓕᑦᓯᓐᓄᑦ ᖁᕕᐊᒋᔭᐅᒍᑦᑕ, ᓄᓇ ᑕᒪᓐᓇ ᐱᔨᖕᓄᑦ ᑐᓂᓚᐅᕐᓯᐅᒃ ᐱᑖᕆᓂᐊᕋᑦᑎᒍ. ᔪᐊᕐᑕᓂᐅᓪᓗ ᐊᑭᐊᓅᕈᓐᓃᕐᓗᑕ.”

⁶ ᒨᓯᓯᓗ ᐅᖃᕐᐳᖅ ᒑᑦ ᑭᖑᕚᖏᓐᓄᑦ ᕉᐱᓂᐅᓪᓗ ᑭᖑᕚᖏᓐᓄᑦ: “ᖃᑕᓐᖑᑎᓯ ᐅᓇᑕᕆᐊᕋᔭᕐᐹᑦ ᐃᓕᑦᓯ ᑕᒫᓃᑐᐃᓐᓇᕐᑎᓪᓗᓰ?

⁷ ᒫᓐᓇᓕ ᓱᖕᒪᑦ ᐃᓴᕆᐊᓕᒥᐅᑦ ᓴᐱᓕᕐᑎᓐᓇᓱᐊᕐᐱᓯᐅᒃ ᐃᑳᖁᓇᒋᑦ ᓄᓇᒧᑦ ᐊᑕᓂᐅᑉ ᑐᓂᔪᒪᔭᖓᓄᑦ?

⁸ ᓯᕗᓕᓯ ᑍᑦᓱᒪᓂ ᑎᓕᓚᐅᕋᒃᑭᑦ ᓄᓇᒥ ᑲᑎᓯ-ᐸᕐᓂᐊᒥᑦ ᓄᓇᒥᒃ ᕿᒥᕐᕈᔭᕐᑐᓚᐅᕐᐳᑦ.

⁹ ᓇᕐᓴᒧᓪᓗ ᐃᔅᑯᓪᒧᑦ ᑎᑭᓐᓇᒥᒃ ᓄᓇ ᑕᑯᓚᐅᕐᐹᑦ, ᓴᐱᓕᕐᑎᑦᓯᓚᐅᕐᐳᓪᓕ ᐃᓴᕆᐊᓕᒥᐅᓂᒃ, ᐅᐸᒍᓐᓃᕐᓗᒍᓗ ᓄᓇ ᐊᑕᓂᐅᑉ ᑖᒃᑯᓄᖓ ᑐᓂᓚᐅᕐᑕᖓ.

¹⁰ ᑍᑦᓱᒪᓂ ᐊᑕᓂᖅ ᓂᓐᖓᓚᐅᕐᐳᖅ, ᐅᖃᕐᓗᓂ,

¹¹ ‘ᓱᓕᓪᓗᖓ, ᐄᑦᔨᑉᑎᒥᑦ ᐊᐅᓪᓚᓚᐅᕐᑐᓕᒫᑦ, ᐊᕐᕌᒍᖃᕐᑐᑦ 20ᓂᒃ ᐅᖓᑖᓄᑦ ᑎᑭᓪᓗᒍ, ᑕᑯᓂᐊᓐᖏᓚᑦ ᓄᓇᒥᒃ ᐊᖏᕈᑎᒋᓚᐅᕐᑕᓐᓂᒃ ᐂᑉᕋᕼᐋᒻᒧᑦ, ᐂᓴᑭᒧᓪᓗ, ᔧᑯᒧᓪᓗ, ᐊᑕᖏᕐᑐᒥᒃ ᐅᕙᓐᓂᒃ ᒪᓕᓚᐅᖏᒻᒪᑕ,

¹² ᑭᓯᒥ ᑬᓚᐱ ᔨᐳᓂᐊᐅᑉ ᐃᕐᓂᖓ, ᑭᓂᔧᑎᐅᔪᖅ, ᐊᒻᒪᓗ ᔮᓱᐊ ᓈᓂᐅᑉ ᐃᕐᓂᖓ, ᑖᒃᑯᐊᒃ ᐊᑕᖏᕐᑐᒥᒃ ᒪᓕᓚᐅᕐᒪᑎᒃ ᐊᑕᓂᕐᒥᒃ.’

¹³ ᑍᒤᒻᒪᑦ ᐊᑕᓂᖅ ᓂᓐᖓᐅᒪᓕᓚᐅᕐᐳᖅ ᐃᓴᕆᐊᓕᒥᐅᓄᑦ, ᐃᖏᕐᕋᑎᓚᐅᕐᐰᑦ ᐃᓄᖃᖏᑦᑐᒥ ᐊᕐᕌᒍᓂᒃ 40ᓂᒃ, ᑭᖑᕚᖑᖃᑎᒌᑦ ᐊᑕᓂᐅᑉ ᓵᖓᓂ ᐱᐅᖏᑦᑐᓕᓚᐅᕐᑐᑦ ᓄᖑᓚᐅᖏᓐᓂᖏᓐᓂ.

¹⁴ ᑕᑯᒋᑦ, ᓯᕗᓕᕕᓂᑦᓯᓐᓂᒃ ᒪᓕᓕᕐᑐᓯ, ᐃᓄᐃᑦ ᐊᔪᕐᑐᓕᔪᑦ, ᐊᖏᒡᓕᑎᑦᓯᒃᑲᓐᓂᕐᓗᓯ ᐊᑕᓂᐅᑉ ᓂᓐᖓᐅᒪᓂᖓᓂᒃ ᐃᓴᕆᐊᓕᒥᐅᓄᑦ.

¹⁵ ᒪᓕᒍᓐᓁᕐᒥᒍᑦᓯᐅᒃ, ᑕᕝᕙ ᐃᓄᖃᖏᑦᑐᒥ ᐃᖏᕐᕋᑎᒃᑲᓐᓂᕐᓂᐊᕆᕚᓯ, ᐃᓄᐃᓪᓗ ᐅᑯᐊ ᑖᕙᓂ ᑐᖁᑐᐃᓐᓇᕐᓂᐊᕐᓗᑎᒃ.”

¹⁶ ᑖᒃᑯᐊ ᒨᓯᓯᒧᑦ ᖃᒡᓕᒋᐊᕐᓗᑎᒃ ᐅᖃᕐᐳᑦ: “ᑕᒫᓂ ᓰᐱᒃᑯᕕᖕᓂᒃ ᓴᓇᓂᐊᕐᐳᒍᑦ ᐆᒪᔪᖁᑎᑦᑎᓐᓄᑦ, ᐃᒡᓗᒐᓴᒡᔪᐊᓕᐅᕐᓗᑕᓗ ᕿᑐᕐᖓᑦᑎᓐᓄᑦ,

¹⁷ ᐅᕙᒍᓪᓕ ᐅᓇᑕᐅᑎᓂᒃ ᐊᑐᕐᓂᐊᕐᐳᒍᑦ ᐸᕐᓇᒃᓯᒪᓗᑕ, ᐃᓴᕆᐊᓕᒥᐅᑦ ᐃᓚᒋᓗᒋᑦ ᐃᓂᒃᓴᖏᓐᓄᑦ ᑎᑭᓚᐅᖏᓐᓂᖏᓐᓂ; ᕿᑐᕐᖓᕗᓪᓕ ᐃᒡᓗᒐᓴᖕᓂ ᐊᕙᓗᓕᐅᕐᓯᒪᔪᓂ ᐃᓂᖃᕐᓂᐊᕐᐳᑦ ᑖᒫᓂᕐᒥᐅᑦ ᐱᓪᓗᒋᑦ.

¹⁸ ᐊᖏᕐᕋᑦᑎᓐᓄᑦ ᐅᑎᕐᓂᐊᓐᖏᓚᒍᑦ ᐃᓴᕆᐊᓕᒥᐅᓕᒫᑦᓯᐊᑦ ᓄᓇᑖᕆᓂᐊᕐᑕᒥᖕᓂᒃ ᐱᓚᐅᖏᓐᓂᖏᓐᓂ.

¹⁹ ᓄᓇᑖᖃᑎᒋᓂᐊᖏᓐᓇᑦᑎᒍ ᔪᐊᕐᑕᓂᐅᑉ ᐊᑭᐊᓂ ᐅᖓᑖᓂᓘᓐᓃᑦ, ᓄᓇᑖᕆᔭᒃᓴᕗᑦ ᑕᒫᓃᒻᒪᑦ ᔪᐊᕐᑕᓂᐅᑉ ᑕᓕᕐᐱᖓᓂ.”

²⁰ ᒨᓯᓯᐅᑉ ᐅᖃᐅᑎᕔᑦ: “ᑍᒤᓕᐅᕈᑦᓯ, ᐅᓇᑕᕐᓂᕐᒧᓪᓗ ᐸᕐᓇᒡᓗᓯ ᐊᑕᓂᐅᑉ ᓵᖓᓂ,

²¹ ᐅᓇᑕᕐᑐᒃᓴᖁᑎᓯᓗ ᔪᐊᕐᑕᓂᒥᒃ ᐃᑳᖃᑕᐅᓗᑎᒃ ᐊᑕᓂᐅᑉ ᓵᖓᓂ ᐊᑭᕋᒥᓂᒃ ᓱᓕ ᐊᐅᓪᓚᕐᑎᑦᓯᓚᐅᕐᑎᓐᓇᒍ ᓵᒥᓂᑦ,

²² ᓄᓇ ᓵᓚᖃᐅᑕᐅᓯᒪᓕᕐᐸᑦ ᐊᑕᓂᐅᑉ ᓵᖓᓂ, ᑭᖑᓂᖓᒍᑦ ᐅᑎᕈᓐᓇᓕᕐᓗᓯ ᐊᑕᓂᐅᑉ ᐃᓴᕆᐊᓕᒥᐅᓪᓗ ᓵᖓᓂ ᐸᓯᔭᒃᓴᐅᓂᐊᓐᖏᓚᓯ; ᑕᕝᕙ ᓄᓇ ᓄᓇᖁᑎᑖᕆᔪᓐᓇᕐᓂᐊᕐᐸᓯ ᐊᑕᓂᐅᑉ ᓵᖓᓂ.

²³ ᑍᒤᓕᐅᖏᒃᑯᑦᓯᓕ, ᖃᐅᔨᒪᓕᕆᑦᓯ ᐊᔪᕐᑐᓕᓂᐊᕋᑦᓯ ᐊᑕᓂᕐᒧᑦ; ᐃᖅᑲᐅᒪᓕᕆᑦᓯᓗ ᐊᔪᕐᑐᓕᓂᐅᑉ ᑕᕝᕙ ᓇᓗᓁᕐᓂᐊᕐᒪᓯ.

²⁴ ᐃᒡᓗᒐᓴᒡᔪᐊᓕᐅᕆᑦᓯ ᕿᑐᕐᖓᑦᓯᓐᓄᑦ ᓮᐱᒃᑯᕕᓕᐅᕐᓗᓯᓗ, ᐅᖃᐅᓯᕆᓯᒪᔭᓕᒫᑦᓯᓐᓂᒡᓗ ᑲᔪᓯᑎᑦᓯᓗᓯ.”

²⁵ ᑕᕝᕙ ᒑᑎᐅᑉ ᑭᖑᕚᖏᑦ ᕉᐱᓂᐅᓪᓗ ᑭᖑᕚᖏᑦ ᒨᓯᓯᒧᑦ ᐅᖃᕐᐳᑦ, ᐃᒫᒃ: “ᐱᔨᑎᑦ ᐊᖓᔪᖅᑳᒥ ᐱᓂᐊᕐᑕᐅᖁᔭᖏᓐᓂᒃ ᒪᓕᖕᓂᐊᕐᐳᑦ.

²⁶ ᕿᑐᕐᖓᕗᑦ ᓄᓕᐊᕗᓪᓗ, ᓰᐱᖁᑎᕗᓪᓗ ᐃᒻᒧᒃᓯᐅᒐᖁᑎᕗᓪᓗ ᐃᓂᖃᕐᓂᐊᕐᐳᑦ ᐃᒡᓗᒐᓴᒡᔪᐊᓂ ᒋᓕᐊᑎᒥ;

²⁷ ᐱᔨᑎᓪᓕ ᐃᑳᖃᑕᐅᓂᐊᕐᐳᑦ, ᐊᖑᑎᓕᒫᑦ ᐅᓇᑕᐅᑎᓂᒃ ᓇᒃᓴᕐᓗᑎᒃ, ᐊᑕᓂᐅᑉ ᓵᖓᓂ ᐅᓇᑕᕐᓂᕐᒧᑦ ᐊᑐᐃᓐᓇᐅᓗᑎᒃ ᐊᖓᔪᖅᑳᑦᑕ ᐅᖃᐅᓯᖏᑦ ᒪᓕᒡᓗᒋᑦ.”

²⁸ ᒨᓯᓯᓗ ᐱᖁᔨᓕᕐᐳᖅ ᑖᒃᑯᐊ ᑍᒤᓕᐅᖁᓪᓗᒋᑦ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖓᑦ ᐃᓕᓯᕆ ᐅᖃᐅᑎᓪᓗᒍ, ᔮᓱᐊᓗ ᓈᓂᐅᑉ ᐃᕐᓂᖓ, ᑭᖑᕚᖑᖃᑎᒌᓪᓗ ᐃᓴᕆᐊᓕᒥᐅᑦ ᐊᖓᔪᖅᑳᓕᒫᖏᑦ ᐅᖃᐅᑎᒋᓪᓗᒋᑦ.

²⁹ ᒨᓯᓯᐅᓪᓗ ᐅᖃᐅᑎᕔᑦ: “ᒑᑎᐅᑉ ᑭᖑᕚᖏᑦ ᕉᐱᓂᐅᓪᓗ ᑭᖑᕚᖏᑦ ᔪᐊᕐᑕᓂᐅᑉ ᐊᑭᐊᓄᑦ ᐃᑳᖃᑎᒋᒍᑦᓯᒋᒃ, ᐊᖑᑎᓕᒫᑦ ᐅᓇᑕᕐᓂᕐᒧᑦ ᐅᐸᓗᖎᕐᓯᒪᓗᑎᒃ ᐊᑕᓂᐅᑉ ᓵᖓᓂ, ᓄᓇᒥᒃ ᓇᔪᕐᑕᑦᓯᓐᓂᒃ ᓵᓚᖃᕈᑦᓯ, ᑖᒃᑯᐊ ᓄᓇᒥᒃ ᒋᓕᐊᑎᒥᒃ ᓄᓇᖁᑎᑖᕐᑎᑦᓴᕆᐊᖃᕐᐸᓯ.

³⁰ ᐅᓇᑕᐅᑎᓂᒡᓕ ᓇᒃᓴᖏᑉᐸᑕ ᐃᓚᒋᓗᓯᓗ ᐃᑳᖃᑕᐅᖏᑉᐸᑕ, ᑕᕝᕙ ᑬᓇᓂᒥ ᓄᓇᑖᖃᑎᒋᔭᕆᐊᖃᕐᐸᓯ.”

³¹ ᒑᑎᐅᓪᓕ ᑭᖑᕚᖏᑦ ᕉᐱᓂᐅᓪᓗ ᑭᖑᕚᖏᑦ ᑭᐅᓪᓗᑎᒃ ᐅᖃᕐᐳᑦ: “ᓲᕐᓗ ᐊᑕᓂᐅᑉ ᐱᔨᑎᑦ ᐅᖃᐅᑎᓚᐅᕐᒪᒋᑦ, ᑍᒤᓕᐅᕈᒪᕗᒍᑦ.

³² ᐃᑳᖃᑕᐅᔪᒪᕗᒍᑦ ᐅᓇᑕᐅᑎᓂᒃ ᓇᒃᓴᕐᓗᑕ ᐊᑕᓂᐅᑉ ᓵᖓᓂ ᑬᓇᓂᐅᑉ ᓄᓇᖓᓄᑦ, ᑭᓯᐊᓂᓕ ᓄᓇᑖᕆᔪᒪᔭᕗᑦ ᑲᔪᓯᖁᕙᕗᑦ ᔪᐊᕐᑕᓂᐅᑉ ᐊᑭᐊᓃᑦᑐᖅ.”

³³ ᑍᒤᒻᒪᑦ ᒑᑎᐅᑉ ᑭᖑᕚᖏᑦ, ᕉᐱᓂᐅᓪᓗ ᑭᖑᕚᖏᑦ ᒫᓇᓯᐅᓪᓗ ᔫᓯᐱᐅᑉ ᐃᕐᓂᖓᑕ ᑭᖑᕚᖏᑕ ᐊᕝᕙᖏᑦ, ᒨᓯᓯᐅᑉ ᑐᓂᓯᕕᒋᕔᑦ ᐊᒧᕅᑎᑦ ᐊᖓᔪᖅᑳᕐᔪᐊᕕᓂᖓᑦᑕ ᓮᕼᐆᓂᐅᑉ ᐊᖓᔪᖅᑲᐅᕕᕕᓂᖓᓂᒃ, ᐹᓴᓂᒥᐅᓪᓗ ᐊᖓᔪᖅᑳᕐᔪᐊᕕᓂᖓᑦᑕ ᐋᒡ ᐊᖓᔪᖅᑲᐅᕕᕕᓂᖓᓂᒃ, ᐃᒡᓗᒐᓴᒡᔪᐊᖏᓐᓂᒃ ᓄᓇᐅᑉ ᐃᓱᖏᑕ ᓇᓗᓁᕐᓯᒪᓂᖏᑦ ᑎᑭᓪᓗᒋᑦ, ᐃᒡᓗᒐᓴᒡᔪᐊᓂᒡᓗ ᓄᓇᐅᑉ ᓯᓚᑖᓃᑦᑐᓂᒃ.

³⁴ ᒑᑎᐅᑉ ᑭᖑᕚᖏᑦ ᐃᒡᓗᒐᓴᒡᔪᐊᑦ ᓴᓇᒋᐊᒃᑲᓐᓂᕐᐰᑦ ᓄᓇᓂ ᑎᐴᓂᒥ ᐊᑕᕉᑎᒥᓗ ᐊᕈᐃᕆᒥᓗ,

³⁵ ᐊᑕᕌᑎ-ᓲᐹᓐᒥᓗ ᔧᔨᕆᒥᓗ ᔪᒡᐱᕼᐊᒥᓗ

³⁶ ᐱᑦ-ᓂᒻᕋᒥ ᐱᑦ-ᕼᐊᕋᒻᒥᓗ, ᐃᒡᓗᒐᓴᒡᔪᐊᓂ ᐊᕙᓗᕐᔪᐊᓕᐅᕐᐳᑦ, ᓰᐱᒃᑯᕕᓕᐅᕐᓗᑎᒡᓗ.

³⁷ ᕉᐱᓂᐅᓪᓗ ᑭᖑᕚᖏᑦ ᐃᒡᓗᒐᓴᒡᔪᐊᑦ ᓴᓇᒋᐊᒃᑲᓐᓂᕐᐰᑦ ᓄᓇᓂ ᕼᐃᓴᐸᓂᒥ ᐃᓕᐊᓕᒥᓗ ᑭᕆᐊᑍᒥᓗ,

³⁸ ᓂᐴᒥ ᐰᓕ-ᒥᐅᓂᒥᓗ (ᑖᒃᑯᐊ ᐊᑎᖏᑦ ᐊᓯᓐᖑᕐᑎᑕᐅᓚᐅᕐᑐᑦ) ᓯᑉᒪᒥᒡᓗ; ᐊᑎᕐᑖᕐᑎᑦᓯᓚᐅᕐᐳᑦ ᐃᒡᓗᒐᓴᒡᔪᐊᓂᒃ ᓴᓇᔭᒥᖕᓂᒃ.

³⁹ ᒪᑬᕆᐅᑉ ᒫᓇᓯᐅᑉ ᐃᕐᓂᖓᑕ ᑭᖑᕚᖏᑦ ᐂᓚᐅᕐᐳᑦ ᒋᓕᐊᑎᒧᑦ ᓄᓇᑖᕆᓪᓗᒍ, ᐊᐅᓪᓚᕐᑎᓪᓗᒋᓪᓗ ᐊᒧᕅᑎᑦ ᑕᒫᓂ ᓄᓇᖃᓚᐅᕐᑐᑦ.

⁴⁰ ᑍᒫᒃ ᒨᓯᓯᐅᑉ ᒋᓕᐊᑎ ᑐᓂᕚ ᒫᓇᓯᐅᑉ ᐃᕐᓂᖓᑕ ᒪᑬᕆᐅᑉ ᑭᖑᕚᖏᓐᓄᑦ, ᑖᒃᑯᐊ ᑕᒫᓂ ᓄᓇᖃᓕᕐᓗᑎᒃ.

⁴¹ ᒫᓇᓯᐅᑦᑕᐅᖅ ᐃᕐᓂᖓᑕ ᔧᕆᐅᑉ ᑭᖑᕚᖏᑦ ᑕᒫᓂ ᓄᓇᓖᑦ ᒥᑭᓐᓂᕐᓮᑦ ᓄᓇᑖᕆᕔᑦ, ᐊᑎᖃᕐᑎᓪᓗᒋᓪᓗ ᕼᐆᕕᑎ ᔧᕆᒥᒃ.

⁴² ᓅᐸᑯᑦᑕᐅᖅ ᐃᒡᓗᒐᓮᑦ ᑭᓇᑎᒥᒃ ᐊᑎᓖᑦ ᑎᒍᒋᕔᑦ, ᐊᑦᑎᕐᓗᒋᓗ ᓅᐸᒥᒃ ᓇᖕᒥᓂᖅ ᐊᑎᕐᒥᓂᒃ.