ᒨᓯᓯ ᓯᑕᒪᖏᑦ 31 - ᐊᒡᓔᑦ ᐃᑦᔪᕐᖕᓁᑦᑐᑦ

ᒥᑎᐊᓂᒥᐅᑦ ᓵᓚᐅᓂᖓ

¹ ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

² “ᒥᑎᐊᓂᒥᐅᑦ ᐊᑭᒋᐊᓕᕐᓯᒋᒃ ᐃᓴᕆᐊᓕᒥᐅᑦ ᐱᓪᓗᒋᑦ. ᐱᔭᕇᕐᐸᑕ ᐃᓅᔪᓐᓃᕐᓂᐊᓕᕋᕕᑦ.”

³ ᑍᒤᒻᒪᑦ ᒨᓯᓯᐅᑉ ᐃᓄᐃᑦ ᐅᖃᕐᕕᒋᕔᑦ, ᐅᖃᕐᓗᓂ, “ᐃᓚᓯ ᐃᓚᖏᑦ ᐅᓇᑕᐅᑎᓂᒃ ᐊᑎᓕᕐᓕᑦ, ᐊᑭᓂᐊᕆᐊᕐᑐᕐᓗᑎᒃ ᒥᑎᐊᓂᒥᐅᓂᒃ ᐊᑕᓂᖅ ᐊᑭᓂᐊᕈᑎᔭᕐᑐᕐᓗᒍ ᒥᑎᐊᓂᒥᐅᓄᑦ.

⁴ 1,000ᓂᒃ ᑭᖑᕚᖑᖃᑎᒌᓂᑦ ᐊᑐᓂᑦ ᐃᓴᕆᐊᓕᒥᐅᓂᑦ ᑎᓕᓯᓂᐊᕐᐳᓯ ᐅᓇᑕᕆᐊᕐᓂᐊᕐᑐᓂᒃ.”

⁵ ᐅᓇᑕᕆᐊᕐᑐᒃᓮᑦ ᐸᕐᓇᓚᐅᕐᐳᑦ ᐃᓴᕆᐊᓕᒥᐅᑦ ᐊᕕᒃᑐᕐᓯᒪᔪᑦ ᑭᖑᕚᖑᖃᑎᒌᑦ ᐊᑐᓂᑦ ᑎᓕᓯᓪᓗᑎᒃ 1,000ᓂᒃ, ᑲᑎᓪᓗᒋᑦ 12,000ᐅᓚᐅᕐᐳᑦ.

⁶ ᑕᕝᕙ ᒨᓯᓯᐅᑉ ᐅᓇᑕᕆᐊᕐᑎᓚᐅᕐᐰᑦ 1,000ᓂᒃ ᑭᖑᕚᖑᖃᑎᒌᑦ ᐊᑐᓂᑦ; ᐅᓇᑕᕆᐊᕐᑎᑉᐰᑦ ᐃᓚᖃᕐᓗᑎᒃ ᐱᓂᕼᐋᓯᒥᒃ ᐃᓕᓯᕆᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᓂᒃ, ᐃᑦᔪᕐᓁᑦᑐᓂᒃ ᓇᒃᓴᕐᓗᓂ ᑎᑦᑐᓚᐅᑎᒥᒡᓗ ᓇᓗᓁᕐᓯᑦᔪᑎᒥᒃ.

⁷ ᒥᑎᐊᓂᒥᐅᓂᒃ ᐅᓇᑕᖃᑎᖃᓚᐅᕐᐳᑦ, ᐊᑕᓂᐅᑉ ᒨᓯᓯᒥᒃ ᐱᖁᔨᓂᖓ ᒪᓕᒡᓗᒍ, ᐊᖑᑎᓕᒫᑦ ᑐᖁᑉᐰᑦ.

⁸ ᒥᑎᐊᓂᒥᐅᓪᓗ ᐊᖓᔪᖅᑳᕐᔪᐊᖏᑦ ᑐᖁᑉᐰᑦ ᑐᖁᑕᐅᔪᑦ ᐃᓚᒋᓪᓗᒋᑦ ᐅᑯᐊ- ᐃᕕ, ᕆᑭᒻ, ᔫᕆ, ᕼᐊᕐ, ᐊᒻᒪᓗ ᕆᐸ, ᑕᓪᓕᒪᑦ ᒥᑎᐊᓂᒥᐅᑦ ᐊᖓᔪᖅᑳᕐᔪᐊᑦ. ᐸᓛᒻ-ᑕᐅᖅ ᐱᐅᕆᐅᑉ ᐃᕐᓂᖓ ᓴᕕᒃᔪᐊᒧᑦ ᑐᖁᓚᐅᕆᕚᑦ.

⁹ ᐃᓴᕆᐊᓕᒥᐅᑦ ᒥᑎᐊᓂᒥᐅᓂᒃ ᐊᕐᓇᓕᒫᓂᒃ ᑎᒍᓯᓚᐅᕐᐳᑦ ᐊᐅᓪᓚᕈᑎᓪᓗᒋᑦ, ᕿᑐᕐᖓᑯᓗᖏᓪᓗ, ᐆᒪᔪᖁᑎᓕᒫᖏᓪᓗ, ᓰᐱᖁᑎᖏᓪᓗ, ᐱᖁᑎᓕᒫᖏᓪᓗ.

¹⁰ ᐃᒡᓗᒐᓴᒡᔪᐊᖁᑎᖏᑦ ᐃᑯᒪᒧᑦ ᐃᑯᐊᓪᓚᒃᑎᓪᓗᒋᑦ ᐊᖏᕐᕋᕆᔭᖏᑦ, ᐃᒡᓗᒐᓴᒡᔪᐊᖏᑕᓗ ᓴᐳᓗᑕᖏᑦ.

¹¹ ᐱᖁᑎᓕᒫᖏᑦ ᑎᒍᓚᐅᕐᐰᑦ, ᐃᓄᖏᓪᓗ ᐆᒪᔪᖁᑎᖏᓪᓗ.

¹² ᑎᒍᔭᑎᒃ ᐃᓄᐃᑦ, ᐆᒪᔪᓪᓗ, ᐱᖁᑎᖏᓪᓗ ᒨᓯᓯᒧᑦ ᐂᑦᔪᑎᓚᐅᕐᐰᑦ, ᑐᓂᕐᕈᓯᕐᑎᑦᓯᔨᒧᓪᓗ ᐃᓕᓯᕆᒧᑦ, ᐃᓴᕆᐊᓕᒥᐅᓄᓪᓗ ᑲᑎᒪᔪᕐᔪᐊᓄᑦ, ᓇᑎᕐᓇᒥ ᒧᐊᐱᒥ ᑕᖕᒫᕐᓯᒪᔪᓄᑦ ᔪᐊᕐᑕᓂᐅᑉ ᓯᓈᓂ ᔨᕆᑰᑉ ᐊᑭᐊᓂ.

ᐅᓇᑕᕐᑐᒃᓮᑦ ᐅᑎᕐᓂᖓᑦ

¹³ ᒨᓯᓯ, ᑐᓂᕐᕈᓯᕐᑎᑦᓯᔨᓗ ᐃᓕᓯᕆ, ᐃᓴᕆᐊᓕᒥᐅᓪᓗ ᓯᕗᓕᕐᑎᖏᑕ ᐸᕐᕆᐊᓚᐅᕐᐰᑦ ᑕᖕᒫᕐᓯᒪᕕᐅᑉ ᓯᓚᑖᓄᑦ.

¹⁴ ᒨᓯᓯᓕ ᓂᓐᖓᐅᒪᓕᓚᐅᕐᐳᖅ ᐅᓇᑕᕐᑐᒃᓮᑦ ᐊᖓᔪᖅᑳᖏᓐᓄᑦ, 1,000ᓄᑦ ᐊᖓᔪᖅᑳᖑᔪᓄᑦ 100ᓄᓪᓗ ᐊᖓᔪᖅᑳᖑᔪᓄᑦ, ᐅᓇᑕᕆᐊᕐᓯᒪᓚᐅᕐᑐᓄᑦ.

¹⁵ ᒨᓯᓯᐅᓪᓗ ᐅᖃᐅᑎᕔᑦ, “ᐊᕐᓁᑦ ᑐᖁᓴᖏᑉᐱᓯᐅᒃ?

¹⁶ ᑕᑯᒋᑦ, ᐊᕐᓁᑦ ᐅᑯᐊ ᐃᓴᕆᐊᓕᒥᐅᓂᒃ ᐱᐅᖏᑦᑐᓕᑎᑦᓯᓚᐅᕐᑐᑦ, ᐸᓛᒻᒥᐅᑉ ᐱᖁᔨᓂᖓᒍᑦ, ᐱᐅᖏᑦᑐᓕᖁᔨᓪᓗᓂ ᐊᑕᓂᕐᒧᑦ ᐱᐅᕆᒥ, ᓂᖓᐅᑦᔭᐅᓯᒪᓂᕐᒥᒡᓗ ᑐᖁᓮᔪᒥᒃ ᐱᔪᖃᓕᓚᐅᕐᐳᖅ ᐊᑕᓂᐅᑉ ᐃᓄᒋᐊᒃᑐᕐᔪᐊᖁᑎᖏᓐᓂ.

¹⁷ ᑍᒤᒻᒪᑦ ᒫᓐᓇ ᓱᕈᓰᑦ ᐊᖑᑎᑦ ᑐᖁᓕᕐᓯᒋᑦ, ᐊᕐᓁᓪᓗ ᐊᖑᒻᒥᒃ ᐱᖃᑎᖃᓚᐅᕐᓯᒪᔪᓕᒫᑦ.

¹⁸ ᓂᕕᐊᕐᓯᐊᓪᓕ ᐃᓅᑎᓪᓗᒋᑦ ᐱᑖᕆᓕᕐᓯᐅᒃ ᐊᖑᒻᒥᒃ ᐱᖃᑎᖃᓚᐅᕐᓯᒪᖏᑦᑐᑦ.

¹⁹ ᐃᓕᑦᓯᓗ ᑕᖕᒫᕐᓯᒪᕕᐅᑉ ᓯᓚᑖᓃᑦᓴᕆᐊᖃᕐᐳᓯ ᐅᓪᓗᓂᒃ 7ᓂᒃ; ᑭᓇᑯᑐᐃᓐᓁ ᐃᓄᖕᒥᒃ ᑐᖁᑦᓯᓚᐅᕐᑐᑦ, ᑐᖁᑕᐅᓯᒪᔪᒥᒡᓗ ᐊᒃᑐᕐᓯᓚᐅᕐᑐᑦ, ᐃᓕᑦᓯᓐᓂᒃ ᓴᓗᒻᒪᕐᓴᕆᐊᖃᕐᐳᓯ ᑎᒍᓯᒪᔭᓕᒫᓯᓗ ᐅᓪᓗᐃᑦ ᐱᖓᔪᐊᓐᓂᒃ ᐅᓪᓗᐃᓪᓗ 7ᖓᓂᒃ.

²⁰ ᐊᓐᓄᕌᓕᒫᑦ ᓴᓗᒻᒪᕐᓴᕆᐊᖃᕐᐳᑦ, ᐆᒪᔪᐃᓪᓗ ᐊᒥᕕᓂᖏᑦ ᐊᓐᓄᕌᓕᐊᕆᓯᒪᔪᓕᒫᑦ, ᒎᑦᓯᓪᓗ ᒥᖅᑯᖏᓐᓂᑦ ᓄᕕᕐᓴᕐᓯᒪᔪᑦ, ᕿᔪᐃᓪᓗ ᓴᓇᓯᒪᔪᑦ.”

²¹ ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᐊᖑᑎᑦ ᐅᓇᑕᕆᐊᓚᐅᕐᑐᑦ ᐅᖃᐅᑎᕔᑦ, “ᑕᒪᑦᔭ ᐱᖁᔭᖅ ᐊᑕᓂᐅᑉ ᐊᑐᕐᑕᐅᖁᔭᖓ ᒨᓯᓯᒃᑯᑦ:

²² ᑭᓯᒥ ᒎᓗᐃᑦ, ᓯᐅᓪᕕᕇᓪᓗ, ᖃᑯᕐᓖᓪᓗ, ᓴᕕᕋᔧᓪᓗ, ᐊᒥᕐᑍᓪᓗ, ᑯᓯᕐᓯᐊᓪᓗ,

²³ ᓱᓇᑐᐃᓐᓁᑦ ᐃᑯᒪᒧᑦ ᓄᖑᑕᐅᔪᓐᓇᖏᑦᑐᑦ, ᐃᑯᐊᓚᔪᒃᑰᕐᑎᑦᓴᕆᐊᖃᕐᐸᓯ, ᓴᓗᒻᒪᕐᓂᐊᕐᒪᑕ; ᓴᓗᒻᒪᕐᓴᕐᓂᐊᕐᐳᑦ ᐃᒥᕐᒧᑦ ᓴᓗᒻᒪᕐᓴᐅᑎᓕᐊᕆᓯᒪᔪᒧᑦ. ᐊᓯᖏᓪᓕ ᐃᑯᒪᒧᑦ ᓄᖑᑕᐅᔪᓐᓇᕐᑐᑦ ᐃᒪᕐᒧᑦ ᓴᓗᒻᒪᕐᓴᕆᐊᖃᕐᐸᓯ.

²⁴ ᐊᓐᓄᕌᓯ ᐅᐊᓴᕆᐊᖃᕐᐸᓯ ᐅᓪᓗᐃᑦ 7ᖓᓂ ᓴᓗᒻᒪᕐᓗᓯᓗ, ᑭᖑᓂᖓᒍᑦ ᑕᖕᒫᕐᓯᒪᔪᓄᑦ ᐃᑎᕈᓐᓇᕐᓯᓂᐊᕐᐳᓯ.”

ᐱᖁᑎᑦ ᑎᒍᔭᐅᓚᐅᕐᑐᑦ ᐊᒡᒍᕐᑕᐅᓂᖏᑦ

²⁵ ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

²⁶ “ᓈᓴᕐᓯᒋᒃ ᑎᒍᔭᕕᓂᓕᒫᑦ, ᐃᓄᐃᑦ ᐆᒪᔪᓪᓗ, ᐃᕝᕕᓪᓗ, ᑐᓂᕐᕈᓯᕐᑎᑦᓯᔨᐅᔪᕐᓗ ᐃᓕᓯᕆ, ᑭᖑᕚᖑᖃᑎᒌᓪᓗ ᓯᕗᓕᕐᑎᖏᑦ.

²⁷ ᑎᒍᔭᕕᓂᓕᒫᑦ ᒪᕐᕈᐃᓕᓗᒋᑦ, ᐊᒡᒍᕐᓗᒋᑦ ᐅᓇᑕᕆᐊᓚᐅᕐᑐᓄᑦ, ᐅᓇᑕᖃᑕᐅᓚᐅᕐᑐᓄᑦ, ᐃᓄᒋᐊᒃᑐᕐᔪᐊᓄᓪᓗ.

²⁸ ᐅᓇᑕᕆᐊᕐᓯᒪᓚᐅᕐᑐᑦ, ᑐᓂᔭᒃᓴᒥᖕᓂᒃ ᐊᑕᓂᕐᒧᑦ ᓴᓂᕐᕔᔭᕆᐊᖃᕐᐳᑦ, ᐱᑖᒥᖕᓂᑦ 500ᓂᑦ ᐊᑕᐅᓯᕐᒥᒃ, ᐃᓄᖕᓂᒃ, ᐃᒻᒧᕐᓯᐅᒐᓂᒡᓗ, ᓯᐅᑎᖅᑯᕐᑐᔪᓂᒡᓗ, ᓰᐱᓂᒡᓗ, ᒎᑦᓯᓂᒡᓗ ᐆᒪᔪᓂᒡᓗ ᐊᓯᖏᓐᓂᒃ.

²⁹ ᑖᒃᑯᐊ ᐊᕝᕙᖏᑦ ᑎᒍᒃᑭᑦ, ᑐᓂᓗᒋᓪᓗ ᑐᓂᕐᕈᓯᕐᑎᑦᓯᔨᒧᑦ ᐃᓕᓯᕆᒧᑦ ᐃᓵᒃᑕᕈᑎᑐᑦ ᑐᓂᕐᕈᑕᐅᖁᓪᓗᒋᑦ ᐊᑕᓂᕐᒧᑦ.

³⁰ ᐃᓴᕆᐊᓕᒥᐅᓪᓗ ᐱᔭᒃᓴᖏᓐᓂᑦ 50ᓂᑦ ᑕᒫᑦ ᐊᑕᐅᓯᕐᒥᒃ ᑎᒍᓯᔭᕆᐊᖃᕐᐳᑎᑦ, ᐃᓄᖕᓂᒃ, ᐃᒻᒧᒃᓯᐅᒐᓂᒡᓗ, ᓯᐅᑎᖅᑯᕐᑐᔪᓂᒡᓗ, ᓰᐱᓂᒡᓗ, ᐆᒪᔪᓕᒫᓪᓗ, ᓕᕔᑎᓄᑦ ᑐᓂᓗᒋᑦ ᐊᑕᓂᐅᑉ ᑐᐱᕐᔪᐊᖁᑎᖓᓂ ᑲᒪᔨᐅᔪᓄᑦ.”

³¹ ᒨᓯᓯᓗ ᐃᓕᓯᕆᓗ ᑐᓂᕐᕈᓯᕐᑎᑦᓯᔨᐅᔪᖅ ᑍᒫᒃ ᐱᓇᓱᐊᕐᐴᒃ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ.

³² ᓵᓚᖃᕐᓂᕐᒧᑦ ᑎᒍᔭᐅᔪᑦ, ᐊᖑᑎᑦ ᐅᓇᑕᓚᐅᕐᓗᑎᒃ ᑎᒍᓚᐅᕐᑕᖏᑦ ᐅᓄᕐᓂᖃᓚᐅᕐᐳᑦ ᓰᐱᑦ 675,000ᐅᓚᐅᕐᐳᑦ,

³³ ᐃᒻᒧᒃᓯᐅᒊᑦ 72,000ᐅᓪᓗᑎᒃ,

³⁴ ᓯᐅᑎᖅᑯᕐᑐᔪᑦ 61,000ᐅᓪᓗᑎᒃ,

³⁵ ᐃᓄᐃᑦ 32,000ᐅᓪᓗᑎᒃ, ᐊᕐᓁᑦ ᐊᖑᒻᒥᒃ ᐱᖃᑎᖃᓚᐅᕐᓯᒪᖏᑦᑐᑦ.

³⁶ ᐊᕝᕙᖏᑦ ᐅᓇᑕᕆᐊᓚᐅᕐᑐᓂᑦ ᐱᑖᕆᔭᐅᓚᐅᕐᑐᑦ ᐅᓄᕐᓂᑲᓚᐅᕐᐳᑦ ᓰᐲᑦ 337,000ᓂᒃ,

³⁷ ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ, 675ᖑᓚᐅᕐᐳᑦ;

³⁸ ᐃᒻᒧᒃᓯᐅᒊᑦ 36,000ᐅᓚᐅᕐᐳᑦ, ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ 72ᖑᓚᐅᕐᐳᑦ.

³⁹ ᓯᐅᑎᖅᑯᕐᑐᔪᑦ 30,500ᐅᓚᐅᕐᐳᑦ, ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ 61ᖑᓚᐅᕐᐳᑦ.

⁴⁰ ᐃᓄᐃᑦ 16,000ᐅᓚᐅᕐᐳᑦ, ᑖᒃᑯᓇᓐᖓᑦ ᐊᑕᓂᕐᒧᑦ ᑐᓂᔭᐅᔪᑦ 32ᖑᓚᐅᕐᐳᑦ.

⁴¹ ᒨᓯᓯᐅᑉ ᑐᓂᔭᒃᓮᑦ ᐊᑕᓂᕐᒧᑦ ᐃᓵᒃᑕᕈᑕᐅᓗᑎᒃ ᑐᓂᕐᕈᑕᐅᔪᑦ ᑐᓂᕐᕈᓯᕐᑎᑦᓯᔨᒧᑦ ᐃᓕᓯᕆᒧᑦ ᑐᓂᓚᐅᕐᐰᑦ, ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.

⁴² ᐃᓴᕆᐊᓕᒥᐅᑦ ᐊᕝᕙᖏᑦ ᐱᔭᕆᐊᖃᕐᑕᖏᑦ, ᒨᓯᓯᐅᑉ ᐊᒡᒍᓚᐅᕐᑕᖏᑦ ᐊᖑᑎᓂᑦ ᐅᓇᑕᕆᐊᓚᐅᕐᑐᓂᑦ;

⁴³ ᑖᒃᑯᐊ ᐊᕝᕙᖏᑦ ᐃᓴᕆᐊᓕᒥᐅᓄᑦ ᑐᓂᔭᐅᔪᑦ ᐅᓄᕐᓂᖃᓚᐅᕐᐳᑦ: ᓰᐱᑦ 337,000ᐃᑦ,

⁴⁴ ᐃᒻᒧᒃᓯᐅᒊᑦ 36,000ᐃᑦ,

⁴⁵ ᓯᐅᑎᖅᑯᕐᑐᔪᑦ 30,500ᐃᑦ,

⁴⁶ ᐊᒻᒪᓗ ᐃᓄᐃᑦ 16,000ᐃᑦ.

⁴⁷ ᐃᓴᕆᐊᓕᒥᐅᓄᑦ ᑐᓂᔭᐅᔪᓂᑦ, ᒨᓯᓯ ᑖᒃᑯᓇᓐᖓᑦ ᐊᑐᓂᑦ ᑎᒍᓯᓚᐅᕐᐳᖅ 50ᐅᓈᕐᑎᕐᑐᓂᒃ, ᐃᓄᖕᓂᒃ, ᐆᒪᔪᓂᒡᓗ, ᑐᓂᓪᓗᒋᓪᓗ ᓕᕔᑎᓄᑦ, ᐊᑕᓂᐅᑉ ᑐᐱᕐᔪᐊᖁᑎᖓᓂᒃ ᑲᒪᔨᐅᔪᓄᑦ, ᑍᒫᑦ ᒨᓯᓯ ᐊᑕᓂᐅᑉ ᐱᖁᓚᐅᕐᒪᒍ.

⁴⁸ ᐅᓇᑕᕐᑐᒃᓴᓕᒫᓄᑦ ᐊᖓᔪᖅᑳᖑᔪᑦ, ᐊᖓᔪᖅᑳᓪᓗ 1,000ᓄᑦ, ᐊᖓᔪᖅᑳᓪᓗ 100ᓄᑦ, ᒨᓯᓯᒧᑦ ᕾᓚᐅᕐᐳᑦ;

⁴⁹ ᐅᖃᕐᓗᑎᒃ, “ᐱᔨᑎᑦ ᓈᓮᓚᐅᕐᐳᑦ ᐅᓇᑕᕐᑐᒃᓴᖁᑎᒥᖕᓂᒃ, ᑭᓇᒥᒡᓘᓐᓃᑦ ᐊᓯᐅᔪᖃᓐᖏᓚᖅ.

⁵⁰ ᑍᒤᒻᒪᑦ ᐊᑕᓂᕐᒧᑦ ᑐᓂᕐᕈᑎᑦᑎᓐᓂᒃ ᑐᓂᓯᔭᕐᑐᕋᑦᑕ, ᐊᖑᑎᓕᒫᑦ ᓇᓂᓚᐅᕐᑕᒥᖕᓂᒃ ᒎᓗᒥᑦ ᓴᓇᓯᒪᔪᓂᒃ; ᓂᕕᓐᖓᑖᓂᒃ, ᑕᓕᐊᕐᓂᒡᓗ, ᓇᒡᒍᐊᕐᒥᖕᓂᒡᓗ, ᓯᐅᑎᕈᑎᓂᒡᓗ, ᐅᔭᒥᖕᓂᒡᓗ, ᐅᕙᒍᑦ ᐃᓱᒪᒋᔪᓐᓁᕐᕕᐅᔪᒪᓪᓗᑕ ᐊᑕᓂᐅᑉ ᓵᖓᓂ.”

⁵¹ ᑍᒤᒻᒪᑦ ᒨᓯᓯᐅᑉ ᐃᓕᓯᕆᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᒎᓗᐃᑦ ᐱᓚᐅᕐᐰᑦ ᑖᒃᑯᓇᓐᖓᑦ, ᑕᑯᒥᓇᕐᓴᐅᑎᓕᒫᑦ ᓴᓇᓯᒪᔪᑦ.

⁵² ᒎᓗᓕᒫᑦ ᑐᓂᔭᖏᑦ ᐊᑕᓂᕐᒧᑦ, ᐅᓇᑕᕐᑐᒃᓴᓄᑦ 1000ᓄᑦ ᐊᖓᔪᖅᑳᓄᑦ 100ᓄᓪᓗ ᐊᖓᔪᖅᑳᓄᑦ, ᐊᑭᖃᓚᐅᕐᐳᑦ 16,750ᓂᒃ ᓴᑯᓪᔅᓂᒃ.

⁵³ ᐅᓇᑕᕐᑐᒃᓮᑦ ᓵᓚᖃᓚᐅᕐᓗᑎᒃ ᓇᖕᒥᓂᕐᑖᕆᓪᓗᒋᑦ ᐱᓚᐅᕐᑕᒥᖕᓂᒃ.

⁵⁴ ᒨᓯᓯᐅᑉ ᐃᓕᓯᕆᐅᓪᓗ ᑐᓂᕐᕈᓯᕐᑎᑦᓯᔨᐅᑉ ᒎᓗᐃᑦ ᐱᓚᐅᕐᐰᑦ ᐅᓇᑕᕐᑐᒃᓴᓄᑦ 1000ᓄᑦ ᐊᖓᔪᖅᑳᓂᑦ 100ᓄᓪᓗ ᐊᖓᔪᖅᑳᓂᑦ, ᐃᓕᓪᓗᒋᓪᓗ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐃᓴᕆᐊᓕᒥᐅᓂᑦ ᐃᖅᑲᐅᒪᑦᔪᑎᒃᓴᐅᖁᓪᓗᒋᑦ ᐊᑕᓂᐅᑉ ᓵᖓᓂ.