ᒨᓯᓯ ᓯᑕᒪᖏᑦ 30 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔧᑦ ᐊᖏᕐᓂᖅ ᐱᓪᓗᒍ

¹ ᒨᓯᓯᐅᑉ ᐃᓴᕆᐊᓕᒥᐅᑦ ᑭᖑᕚᖑᖃᑎᒌᖏᑕ ᓯᕗᓕᕐᑎᖏᑦ ᐅᖃᕐᕕᒋᕔᑦ, ᐃᓴᕆᐊᓕᒥᐅᑦ ᐱᑦᔪᑎᒋᓪᓗᒋᑦ, ᐅᖃᕐᓗᓂ, “ᐃᒫᒃ ᐊᑕᓂᖅ ᐱᖁᔨᕗᖅ:

² ᐊᖑᑦ ᐊᑕᓂᕐᒧᑦ ᐊᖏᕈᑎᖃᕐᐸᑦ, ᐊᓯᑦᔨᕆᐊᖃᓐᖏᑕᒥᓂᒃ, ᐅᖃᐅᓯᕆᔭᓂ ᓯᖁᒥᑦᓴᕆᐊᖃᓐᖏᓛ; ᐅᖃᐅᓯᕆᔭᓕᒫᖏᑦ ᖃᓂᖓᓂᑦ ᐊᓂᔪᑦ ᒪᓕᒋᐊᖃᕐᐰᑦ.

³ “ᐊᕐᓇᕐᓘᓐᓃᑦ ᐊᑕᓂᕐᒧᑦ ᐊᖏᕈᑎᖃᕐᐸᑦ, ᐊᓯᑦᔨᕆᐊᖃᓐᖏᑕᒥᓂᒃ ᐊᑖᑕᒥ ᐃᒡᓗᖓᓂ ᐃᓂᖃᕐᓗᓂ ᐃᓅᓱᒃᑑᓗᓂ,

⁴ ᐊᑖᑕᖓᑕ ᐊᕐᓇᐅᑉ ᐊᖏᕈᑎᖓ ᑐᓴᕐᓗᓂᐅᒃ ᐊᓯᑦᔨᕆᐊᖃᓐᖏᑕᒥᓂᒃ ᐊᖏᕈᑎᖃᕐᑎᓪᓗᒍ, ᐊᑖᑕᖓ ᓂᓪᓕᖏᑉᐸᑦ, ᐊᖏᕈᑎᒋᑦ ᑕᕝᕙ ᑲᔪᓯᔭᕆᐊᖃᓕᕐᐳᑦ, ᐊᖏᖃᑎᒌᒍᑎᒋᔭᓕᒫᓂ ᒪᓕᒋᐊᖃᓕᕐᐰᑦ.

⁵ ᐊᑖᑕᖓᑕᓕ ᐊᖏᕈᑎᖏᑦ ᑐᓴᕐᓗᒋᑦ ᑲᔪᓯᖁᖏᑉᐸᒋᑦ, ᑕᕝᕙ ᐊᖏᖃᑎᒌᒍᑎᓕᒫᖏᑦ ᑲᔪᓯᔪᓐᓇᕐᓂᐊᓐᖏᓚᑦ; ᐊᑕᓂᐅᓪᓗ ᐊᖏᕈᑎᖏᓐᓂᒃ ᒪᓕᒋᐊᖃᕈᓐᓁᕐᑎᓐᓂᐊᕐᐹ ᐊᑖᑕᖓᑕ ᓵᓚᒋᖕᒪᒍ.

⁶ “ᐅᐃᑖᕐᐸᑦ, ᐊᖏᕈᑎᒥᓂᒃ ᑲᔪᓯᑎᑦᓯᔭᕆᐊᖃᕐᓗᓂ ᐊᖏᕈᑎᒥᒡᓘᓐᓃᑦ ᒪᓕᒋᐊᖃᕐᑕᒥᓂᒃ ᐅᖃᕐᓯᒪᓗᓂ ᐊᓯᑦᔨᕆᐊᖃᓐᖏᑕᒥᓂᒃ,

⁷ ᐅᐃᖓᑕ ᓄᓕᐊᒥ ᐊᖏᕈᑎᖓ ᑐᓴᕐᓗᓂᐅᒃ, ᓂᓪᓕᐅᑎᒋᖏᓪᓗᒍᓗ ᐅᓪᓗᒥ ᑐᓴᕐᕕᖕᒥᓂ, ᐊᖏᕈᑎᖓ ᑲᔪᓯᔭᕆᐊᖃᕐᐳᖅ, ᐊᖏᖃᑎᒌᒍᑎᖓ ᐊᓯᑦᔨᕆᐊᖃᓐᖏᑕᖓ ᑲᔪᓯᔭᕆᐊᖃᕐᓂᐊᕐᐳᖅ.

⁸ ᐅᐃᖓᑕᓕ ᓄᓕᐊᒥ ᐊᖏᖃᑎᒌᖕᓂᖓ ᑐᓴᕐᓗᓂᐅᒃ ᐅᓪᓗᒥ ᑕᕝᕙᓂ ᑐᓴᕐᕕᖕᒥᓂ ᑲᔪᓯᖁᖏᑉᐸᒍ, ᐊᖏᕈᑎᖓ ᑕᕝᕙ ᓯᖁᒥᓐᓂᐊᕐᐹ ᐊᖏᖃᑎᒌᒍᑎ ᐅᖃᐅᓯᕆᓚᐅᕐᑕᖓ, ᒪᓕᒋᐊᖃᓪᓚᕆᒡᓗᒍ, ᑕᕝᕙ ᐊᑕᓂᐅᑉ ᒪᓕᒋᐊᖃᕈᓐᓃᕐᑎᓐᓂᐊᕐᐹ.

⁹ “ᐅᐃᒡᒐᕐᓂᐅᓪᓗ ᐊᖏᕈᑖ ᐊᕐᓇᐅᓪᓘᓐᓃ ᐊᕕᑕᐅᓯᒪᔫᑉ ᐊᖏᕈᑖ, ᐊᓯᑦᔨᕆᐊᖃᕐᓇᒍ ᐊᖏᕈᑎᓕᐊᕆᓯᒪᔭᖓ, ᑲᔪᓯᔭᕆᐊᖃᕐᐳᖅ.

¹⁰ “ᐅᐃᒥ ᐃᒡᓗᖓᓃᓪᓗᓂ ᐊᖏᕈᑎᓕᐅᕐᐸᑦ, ᐊᓯᑦᔨᕆᐊᖃᓐᖏᑕᒥᓄᑦ ᐃᒻᒥᓂᒃ ᐊᔪᓕᕐᑎᑉᐸᑦ, ᑖᓐᓇ ᐊᖏᕈᑎᖓ ᑲᔪᓯᔭᕆᐊᖃᕐᐳᖅ,

¹¹ ᐅᐃᖓᑕ ᐊᖏᕈᑎᖓ ᑐᓴᕐᓗᓂᐅᒃ, ᓂᓪᓕᐅᑎᒋᖏᓪᓗᒍᓗ ᐅᓪᓗᒥ ᑐᓴᕐᕕᖕᒥᓂ, ᐅᐃᖓᑕ ᓵᓚᒋᓇᓱᐊᖏᑉᐸᒍ, ᐊᖏᕈᑎᖓ ᑲᔪᓯᔭᕆᐊᖃᕐᐳᖅ, ᐊᖏᖃᑎᒌᒍᑎᓕᒫᖏᑦ ᐊᓯᑦᔨᕆᐊᖃᓐᖏᑕᖏᑦ ᑲᔪᓯᔭᕆᐊᖃᕐᓂᐊᕐᐳᑦ.

¹² ᐅᐃᖓᑕᓕ ᐊᖏᖃᑎᒌᖕᓂᖓ ᑐᓴᕐᓗᓂᐅᒃ ᐅᓪᓗᒥ ᑕᕝᕙᓂ ᑐᓴᕐᕕᖕᒥᓂ ᑲᔪᓯᖁᖏᒻᒪᕆᒃᐸᒍ, ᑕᕝᕙ ᐅᖃᐅᓯᕆᓯᒪᔭᓕᒫᖏᑦ ᓯᖁᒥᓐᓂᐊᕐᐰᑦ, ᐊᓯᑦᔨᕆᐊᖃᕐᓇᒋᑦ ᐅᖃᐅᓯᕆᓯᒪᔭᕋᓗᐊᖏᑦ, ᑲᔪᓯᓂᐊᓐᖏᓚᑦ; ᐅᐃᖓᑕ ᐊᑐᕈᓐᓁᕐᑎᒻᒪᒋᑦ, ᑕᕝᕙ ᐊᑕᓂᐅᑉ ᒪᓕᒋᐊᖃᕈᓐᓁᕐᑎᓐᓂᐊᕐᐹ.

¹³ ᐊᖏᖃᑎᒌᒍᑎᒋᓯᒪᔭᓕᒫᖏᑦ, ᐊᓯᑦᔨᕆᐊᖃᕐᓇᒋᓪᓗ ᐊᖏᕈᑎᕕᓂᖏᑦ ᐃᒻᒥᓄᑦ, ᐅᐃᖓᑕ ᑲᔪᓯᑎᑦᓱᓐᓇᕐᐰᑦ, ᐅᕝᕙᓘᓐᓃᑦ ᐊᑐᕈᓐᓁᕐᑎᑦᓱᓐᓇᕐᐰᑦ.

¹⁴ ᐅᐃᖓᓕ ᑕᒪᒃᑯᓂᖓ ᓂᓪᓕᕈᑎᖃᖏᑉᐸᑦ ᖃᐅᕙᒃᑲᓗᐊᕐᑎᓪᓗᒍ, ᑕᕝᕙ ᐊᖏᖃᑎᒌᒍᑎᖏᓐᓂᒃ ᐊᓯᑦᔨᕆᐊᖃᓐᖏᑕᒥᓂᒃ ᑲᔪᓯᑎᑦᓯᓂᐊᕐᐳᖅ; ᐊᖏᖃᑎᒋᕔᑦ ᓂᓪᓕᕈᑎᒋᓚᐅᖏᒻᒪᒋᑦ ᐅᓪᓗᒥᑦ ᓯᕗᓪᓕᕐᐹᒥᑦ ᑐᓴᕋᓗᐊᕋᒥᒋᑦ.

¹⁵ ᐊᑐᕈᓐᓁᕐᑎᑉᐸᒋᓪᓕ ᑐᓴᓚᐅᕐᓂᒥᑕ ᑭᖑᓂᐊᒍᑦ, ᐸᓯᔭᒃᓴᐅᓂᖓᓂᒃ ᐱᓯᒪᓕᕐᓂᐊᕐᐳᖅ.”

¹⁶ ᑕᒪᒃᑯᐊ ᑕᕝᕙ ᐱᖁᔧᑦ ᐊᑕᓂᐅᑉ ᐊᑐᕐᑕᐅᖁᓚᐅᕐᑕᖏᑦ ᒨᓯᓯᒃᑯᑦ, ᐊᖑᑎᐅᑉ ᓄᓕᐊᒥᓄᑦ ᐱᓂᐊᒐᒃᓴᖏᑦ, ᐊᑖᑕᐅᓪᓗ ᐸᓂᖕᒥᓄᑦ ᐃᓅᓱᒃᑑᓂᕐᒥᓂ ᐊᑖᑕᒥ ᐃᒡᓗᖓᓃᓐᓂᕐᒥᓂ ᐱᓂᐊᒐᒃᓴᖏᑦ.