ᒨᓯᓯ ᓯᑕᒪᖏᑦ 28 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᑎᑦ ᖃᐅᑕᒫᕐᓯᐅᑎᑦ

¹ ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ,

² “ᐱᖁᔭᒥᒃ ᐆᒥᖓ ᐃᓴᕆᐊᓕᒥᐅᑦ ᑐᓂᓯᕕᒋᒃᑭᑦ, ᐅᖃᐅᑎᓗᒋᑦ, ‘ᑐᓂᕐᕈᓯᐊᒃᓴᕋ, ᓂᕿᒃᓴᖅ ᑐᓂᕐᕈᓯᐊᒃᓴᕋ ᐃᑯᐊᓚᑎᑕᒃᓴᖅ ᑎᐱᑦᓯᐊᕆᒃᑑᓗᓂ ᐅᕙᓐᓄᑦ, ᑲᒪᑦᓯᐊᕐᓗᓯ ᐱᕕᒃᓴᖓᓂ ᐅᕙᓐᓄᑦ ᑐᓂᕐᕈᑎᒋᖃᑦᑕᕐᓂᐊᕐᐸᓯ.’

³ “ᐅᖃᐅᑎᓗᒋᓪᓗ, ᑐᓂᕐᕈᑏᑦ ᑍᒤᑦᑐᖅ ᑐᓂᔭᕆᐊᖃᕐᐸᓯ ᐃᑯᐊᓚᑎᓪᓗᒍ ᐊᑕᓂᕐᒧᑦ: ᐃᒫᒃ, ᓰᐱᐅᑉ ᓄᕐᕋᖏᒃ ᒪᕐᕉᒃ ᐊᖑᑎᐅᓗᑎᒃ, ᐊᑕᐅᓯᕐᒥᒃ ᐊᕐᕌᒍᖃᕐᓗᑎᒃ ᓴᓗᒤᓐᓂᖃᖏᓪᓗᑎᒃ, ᖃᐅᑕᒫᑦ ᑖᒃᑯᐊᒃ ᑐᓂᕐᕈᑎᒋᖃᑦᑕᕐᓂᐊᕐᐸᓯ, ᑍᒪᓐᖓᓕᒫᖅ ᑐᓂᕐᕈᓯᕐᐸᒃᓗᓯ.

⁴ ᓰᐱᐅᑉ ᓄᕐᕋᖓ ᐊᑕᐅᓯᖅ ᐅᓪᓛᒃᑯᑦ ᑐᓂᕐᕈᑎᒋᖃᑦᑕᕐᓂᐊᕐᐸᓯ, ᓰᐱᐅᓪᓗ ᓄᕐᕋᖓᑕ ᐂᑉᐸᖓ ᐅᓐᓄᒃᑯᑦ ᑐᓂᕐᕈᑎᒋᖃᑦᑕᕐᓂᐊᕐᐸᓯ,

⁵ ᓂᐊᖂᔭᒃᓴᒥᒡᓗ ᓯᖃᓪᓕᑦᓯᐊᕐᓯᒪᔪᒥᒃ ᐆᒃᑑᑦ 1/10 ᐃᕝᕙᒥᒃ ᓂᐊᖂᔭᒃᓴᖅ ᑐᓂᕐᕈᑎᒃᓴᖅ, ᐃᓚᖃᕐᓗᓂ ᐅᕐᓱᒥᒃ ᐆᒃᑑᑦ 1/4 ᕼᐃᓐᒥᒃ.

⁶ ᑕᒪᓐᓇ ᑐᓂᕐᕈᓯᕐᓂᖅ ᑍᒪᓐᖓᑦ ᐊᑐᕐᑕᐅᓂᐊᕐᐳᖅ ᐱᒋᐊᕐᑎᑕᐅᓚᐅᕐᑐᖅ ᖃᖅᑲᒥ ᓮᓁᒥ ᑎᐱᑦᓯᐊᕆᒃᑑᓗᓂ ᑐᓂᕐᕈᑕᐅᔪᖅ ᐃᑯᐊᓚᑎᓪᓗᒍ ᐊᑕᓂᕐᒧᑦ.

⁷ ᑐᓂᕐᕈᑎᓗ ᐃᒥᒐᒃᓴᖅ ᐆᒃᑑᑦ 1/4 ᕼᐃᓐᒥᒃ ᐊᖏᓂᖃᕐᓗᓂ ᐊᑐᓂᑦ ᓰᐱᒧᑦ ᑐᓂᕐᕈᑕᐅᔪᒧᑦ; ᑐᓂᕐᕈᓯᕐᕕᖕᒥ ᐃᑦᔪᕐᓁᑦᑐᒥ ᑯᕕᔭᐅᔪᒃᓴᐅᕗᖅ ᐊᑕᓂᕐᒧᑦ ᑐᓂᕐᕈᑎᒃᓴᐅᖁᓪᓗᒍ.

⁸ ᓰᐱᐅᑉ ᓄᕐᕋᖓᑕ ᐱᖃᑖ ᐅᓐᓄᒃᐸᑦ ᑐᓂᕐᕈᑎᒋᔭᕆᐊᖃᕐᐸᓯ; ᐅᓪᓛᒃᑯᑦ ᑐᓂᕐᕈᑎᒋᔭᑦᓯᑐᑦ ᓂᐊᖂᔭᒃᓴᖅ ᐃᒥᒃᓴᕐᓗ ᐊᑦᔨᒋᓗᒍ, ᑎᐱᑦᓯᐊᕆᒃᑑᓗᓂ ᐃᑯᐊᓚᑎᓪᓗᒍ ᑐᓂᕐᕈᑎᒋᔭᕆᐊᖃᕐᐸᓯ ᐊᑕᓂᕐᒧᑦ.”

ᓴᐸᑎ ᑕᒫᑦ ᑐᓂᕐᕈᓯᕐᓂᖅ

⁹ “ᓴᐸᑎᐅᑉ ᐅᓪᓗᖓᓂ ᓰᐱᐅᑉ ᓄᕐᕋᖏᖕᓂᒃ ᒪᕐᕉᖕᓂᒃ ᑐᓂᕐᕈᓯᕆᐊᖃᕐᐳᓯ ᐊᑕᐅᓯᕐᒥᒃ ᐊᕐᕌᒍᖃᕐᑑᖕᓂᒃ, ᓴᓗᒤᑦᑑᖏᓪᓗᑎᒃ, ᓂᐊᖂᔭᓴᒥᒃ ᓯᖃᓪᓕᓯᒪᑦᓯᐊᕐᑐᒥᒃ ᐆᒃᑑᑦ 2/10 ᕼᐃᓐᒥᒃ ᐊᖏᓂᓕᖕᒥᒃ ᐅᕐᓱᒥᒃ ᐃᓚᓗᒍ, ᕔᓂᒥᒡᓗ:

¹⁰ ᑍᒫᒃ ᐃᑯᐊᓚᑎᑕᒃᓴᖅ ᓴᐸᑎ ᑕᒫᑦ, ᖃᐅᑕᒫᑦ ᑐᓂᕐᕈᑎᑦ ᐃᓚᒋᒃᑲᓐᓂᕆᐊᖃᕐᑕᖓ.”

ᑕᖅᑭᐅᑉ ᐅᓪᓗᖓᑕ ᓯᕗᓪᓕᕐᐹᖓᓂᒃ ᑐᓂᕐᕈᑎ

¹¹ “ᑕᖅᑭᐅᑉ ᐱᒋᐊᕐᓂᖓᓂ ᐃᑯᐊᓚᑎᑕᒃᓴᒥᒃ ᐊᑕᓂᕐᒧᑦ ᑐᓂᕐᕈᓯᖃᑦᑕᕐᓂᐊᕐᐳᓯ: ᐊᖑᓴᓪᓘᖕᓂᒃ ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ, ᓰᐱᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, 7ᓂᒡᓗ ᓰᐱᓂᒃ ᓄᕐᕋᕐᓂᒃ ᐊᕐᕌᒍᖃᕐᑐᓂᒃ ᐊᑕᐅᓯᕐᒥᒃ, ᓴᓗᒤᓐᓂᖃᖏᓪᓗᑎᒃ;

¹² ᐃᓚᖃᕐᓗᑎᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᐆᒃᑑᑦ 3/10ᐃᕝᕙᒥᒃ, ᐅᕐᓱᒥᒃ ᐃᓚᖃᕐᓗᒍ ᐃᒻᒧᒃᓯᐅᒐᕐᒥᒃ ᑐᓂᕐᕈᓯᓕᕈᑦᓯ; ᓰᐱᒥᒃ ᐊᖑᓴᓪᓗᕐᒥᒃ ᑐᓂᕐᕈᓯᓕᕈᑦᓯ, 2/10ᐄᕝᕙᒥᒃ ᐊᖏᑎᒋᔪᒥᒃ ᓂᐊᖂᔭᒃᓴᒥᒃ ᐅᕐᓱᒥᒡᓗ ᐃᓚᖃᕐᓗᒍ;

¹³ ᓰᐱᐅᑉ ᓄᕐᕋᖏᑦ ᐊᑐᓂᑦ ᐃᓚᖃᕆᐊᖃᕐᐳᑦ, ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ, ᐅᕐᓱᒥᒃ ᐃᓚᓯᒪᓗᒍ, ᐆᒃᑑᑦ 1/10ᐄᕝᕙᒥᒃ ᑎᐱᑦᓯᐊᕆᒃᑐᒥᒃ ᐃᑯᐊᓚᑎᑕᒃᓴᒥᒃ ᑐᓂᕐᕈᑎᒃᓴᒥᒃ ᐊᑕᓂᕐᒧᑦ ᑐᓂᕐᕈᑎᒥᒃ.

¹⁴ ᕔᓂ ᑖᒃᑯᓄᖓ ᑐᓂᕐᕈᑎᓄᑦ ᐃᓚᓕᐅᑎᔭᕆᐊᓕᒃ ᐊᖏᑎᒋᔭᕆᐊᖃᕐᐳᖅ ᐆᒃᑑᑦ 1/2ᕼᐃᓐᒥᒃ ᐃᒻᒧᒃᓯᐅᒐᕐᒧᑦ ᐊᑕᐅᓯᕐᒧᑦ, 1/3ᕼᐃᓐ ᓰᐱᒧᑦ ᐊᖑᓴᓪᓗᕐᒧᑦ, 1/4ᕼᐃᓐ ᓰᐱᐅᑉ ᓄᕐᕋᖓᓄᑦ; ᑍᒫᒃ ᑕᖅᑭᑕᒫᕐᓯᐅᑎᒥᒃ ᑐᓂᕐᕈᓯᖃᕐᑕᕐᓂᐊᕐᐳᓯ ᐊᕐᕌᒍᓕᒫᖅ ᓈᓗᒍ.

¹⁵ ᐊᒻᒪ ᓱᓕ ᒎᑦᓯᐅᑉ ᓄᕐᕋᖓᓂᒃ ᐊᑕᐅᓯᕐᒥᒃ ᐊᔪᕐᓂᖅ ᐱᓪᓗᒍ ᐊᑕᓂᕐᒧᑦ ᑐᓂᕐᕈᓯᕆᐊᖃᕐᐳᓯ ᑐᓂᕐᕈᑕᐅᔭᕆᐊᓖᑦ ᐃᑯᐊᓚᑎᑕᒃᓮᑦ ᕔᓃᓪᓗ ᑐᓂᕐᕈᑎᒃᓮᑦ ᐊᓯᐊᑦᑎᒍᑦ.”

ᑐᓂᕐᕈᑎᑦ ᓇᓪᓕᐅᓐᓂᕐᓯᐅᕐᕕᖕᒥ ᐳᕙᓪᓚᕐᓴᐅᑎᖃᖏᑦᑐᒥᒃ ᓂᐊᖂᔭᕐᑐᕐᕕᖕᒥᒃ

¹⁶ “ᐅᓪᓗᐃᑦ 14ᖓᓂ ᑕᖅᑮᑦ ᓯᕗᓪᓕᕐᐹᖓᓂ ᐊᑕᓂᐅᑉ ᐊᐅᓪᓚᕐᕕᒃᓯᐅᕐᕕᖓ ᓇᓪᓕᐅᑎᕗᖅ.

¹⁷ ᐅᓪᓗᐃᑦ 14ᖓᓂ ᑕᖅᑭᒥ ᑕᕝᕙᓂ ᓇᓪᓕᐅᓐᓂᕐᓯᐅᕆᐊᖃᕐᐳᓯ; ᓂᐊᖂᔭᕐᒥᒃ ᐳᕙᓪᓚᕐᓴᐅᑎᖃᖏᑦᑐᒥᒃ ᐅᓪᓗᓂᒃ 7ᓂᒃ ᓂᕆᖃᑦᑕᕆᐊᖃᕐᐳᓯ.

¹⁸ ᐅᓪᓗᐃᑦ ᓯᕗᓪᓕᕐᐹᖓᓂ ᑐᒃᓯᐊᖃᑎᒌᒋᐊᖃᕐᐳᓯ ᐃᑦᔪᕐᓁᑦᑐᒥᒃ ᑍᓗᒍ. ᑕᕝᕙᓂ ᓴᓇᕙᒃᑕᑦᓯᓂᒃ ᐱᓇᓱᐊᕐᓂᐊᖏᓚᓯ.

¹⁹ ᑐᓂᕐᕈᓯᕆᐊᖃᕐᐳᓯ ᐃᑯᐊᓚᑎᓪᓗᒍ ᐊᑕᓂᕐᒧᑦ ᑐᓂᕐᕈᑎᒋᓗᒍ: ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ ᐊᖑᓴᓪᓘᖏᓂᒃ, ᓰᐱᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, 7ᓂᒃ ᓰᐱᐅᑉ ᓄᕐᕋᖏᓐᓂᒃ ᐊᑕᐅᓯᕐᒥᒃ ᐊᕐᕌᒍᖃᕐᑐᓂᒃ. ᑖᒃᑯᐊ ᓴᓗᒤᑦᑑᔭᕆᐊᖃᓐᖏᓚᑦ.

²⁰ ᑖᒃᑯᓄᖓ ᐃᓚᒋᔭᐅᔭᕆᐊᓖᑦ, ᓂᐊᖂᔭᒃᓴᖅ ᓯᖃᓪᓕᑦᓯᐊᕐᓯᒪᔪᖅ ᐅᕐᓱᒥᒃ ᐃᓚᖃᕐᓗᒍ: ᐆᒃᑑᑦ 3/10ᐃᕝᕙ ᐃᒻᒧᒃᓯᐅᒐᒧᑦ, 2/10ᐃᕝᕙ ᓰᐱᐅᑉ ᐊᖑᓴᓪᓗᖓᓄᑦ;

²¹ 1/10ᐃᕝᕙ ᓰᐱᐅᑉ ᓄᕐᕋᖏᓐᓄᑦ 7ᓄᑦ ᐊᑐᓂᑦ.

²² ᐃᓚᖃᕐᓗᑎᒃ ᒎᑦᓯᒥᒃ ᐊᑕᐅᓯᕐᒥᒃ ᐊᔪᕐᓂᖅ ᐱᓪᓗᒍ, ᐃᓱᒪᒋᔪᓐᓁᕐᕕᐅᖁᓪᓗᓯ.

²³ ᑖᒃᑯᐊ ᑐᓂᕐᕈᑎᒋᔭᕆᐊᖃᕐᐸᓯ ᐅᓪᓛᑕᒫᑦ ᑐᓂᕐᕈᑎᒋᔭᕆᐊᖃᕐᑕᑦᓯ ᐊᓯᐊᒍᑦ, ᑍᓐᓇ ᐊᓯᑦᔨᕆᐊᖃᖏᒻᒪᑦ.

²⁴ ᑍᒫᒃ ᓂᖅᑭᒃᓴᓂᒃ ᑐᓂᕐᕈᓯᖃᑦᑕᕆᐊᖃᕐᓂᐊᕐᐳᓯ ᐃᑯᐊᓚᑎᑕᒃᓴᓂᒃ ᖃᐅᑕᒫᑦ ᐅᓪᓗᓂᒃ 7ᓂᒃ, ᑎᐱᑦᓯᐊᕆᒃᑐᒥᒃ ᐊᑕᓂᕐᒧᑦ; ᑕᒪᒃᑯᐊ ᑐᓂᕐᕈᑕᐅᔭᕆᐊᓖᑦ ᕔᓃᓪᓗ ᐊᓯᖏᑎᒍᑦ ᑐᓂᕐᕈᑕᐅᖃᕐᑕᕆᐊᖃᕐᐳᑦ.

²⁵ ᐅᓪᓗᐃᑦ 7ᖓᓂ ᑐᒃᓯᐊᕆᐊᕐᓯᒪᔭᕆᐊᖃᕐᐳᓯ ᐃᑦᔪᕐᓁᑦᑐᒥᒃ ᑍᓗᒍ. ᑕᕝᕙᓂ ᓴᓇᕙᒃᑕᑦᓯᓐᓂᒃ ᐱᓇᓱᐊᕆᐊᖃᓐᖏᓚᓯ.”

ᑐᓂᕐᕈᑎᑦ ᐱᕈᕐᓯᐊᓂᒃ ᑲᑎᕐᓱᐃᕕᐅᑉ ᓇᓪᓕᐅᓐᓂᕐᓯᐅᕐᕕᖓᓂ

²⁶ “ᐊᒻᒪ ᐱᕈᕐᑐᑦ ᓯᕗᓪᓕᕐᐹᑦ ᑲᑎᑕᐅᓂᖏᓐᓂ, ᐱᕈᕐᑐᓂᒃ ᓄᑖᓂᒃ ᐊᑕᓂᕐᒧᑦ ᑐᓂᕐᕈᓯᓕᕈᑦᓯ ᐱᓇᓱᐊᕈᓯᕐᓂ ᐱᕈᕐᑐᑦ ᐱᓗᒋᑦ ᓇᓪᓕᐅᓐᓂᕐᓯᐅᕐᕕᖕᒥ, ᑲᑎᒪᓗᓯ ᑐᒃᓯᐊᕆᐊᖃᕐᐳᓯ ᐃᑦᔪᕐᓁᑦᑐᒥᒃ ᑍᓗᒍ. ᑕᕝᕙᓂ ᓴᓇᕙᒃᑕᑦᓯᓂᒃ ᐱᓇᓱᐊᕐᑐᒃᓴᐅᓐᖏᓚᓯ.

²⁷ ᑐᓂᕐᕈᓯᕆᐊᖃᕐᐳᓯ ᐃᑯᐊᓚᑎᑕᒃᓴᓂᒃ ᑎᐱᑦᓯᐊᕆᒃᑐᓂᒃ ᐊᑕᓂᕐᒧᑦ: ᐃᒻᒧᒃᓯᐅᒑᖕᓂᒃ ᒪᕐᕉᖕᓂᒃ ᐊᖑᓴᓪᓘᖕᓂᒃ, ᓰᐱᒥᒃ ᐊᖑᓴᓪᓗᕐᒥᒃ ᐊᑕᐅᓯᕐᒥᒃ, 7ᓂᒃ ᓰᐱᐅᑉ ᓄᕐᕋᖏᓐᓂᒃ ᐊᑕᐅᓯᕐᒥᒃ ᐊᕐᕌᒍᖃᕐᑐᓂᒃ,

²⁸ ᐃᓚᖃᕐᓗᑎᒃ ᓂᐊᖂᔭᒃᓴᓂᒃ ᓯᖃᓕᑦᓯᐊᕐᓯᒪᔪᓂᒃ ᑐᓂᕐᕈᑎᓂᒃ ᐅᕐᓱᒥᒃ ᐃᓚᓯᒪᔪᓂᒃ: ᐆᒃᑑᑦ 3/10ᐃᕝᕙ ᐃᒻᒧᒃᓯᐅᒐᕐᒧᑦ ᐊᑕᐅᓯᕐᒧᑦ ᐊᑐᓂᑦ, ᐆᒃᑑᑦ 2/10ᐃᕝᕙ ᓰᐱᒧᑦ ᐊᖑᓴᓪᓗᕐᒧᑦ ᐊᑐᓂᑦ,

²⁹ ᐆᒃᑑᑦ 1/10ᐃᕝᕙ ᓰᐱᐅᑉ ᓄᕐᕋᖏᓐᓄᑦ 7ᓄᑦ ᐊᑐᓂᑦ;

³⁰ ᐃᓚᓗᒋᑦ ᒎᑦᓯᐅᑉ ᓄᕐᕋᖓᓂᒃ ᐊᑕᐅᓯᕐᒥᒃ, ᐊᔪᕐᓂᕐᒥᑦ ᐃᓱᒪᒋᔪᓐᓁᕐᕕᐅᑦᔪᑎᒥᒃ.

³¹ ᑐᓂᕐᕈᑎᑦ ᓴᓗᒤᓐᓂᖃᕆᐊᖃᓐᖏᓚᑦ. ᑐᓂᕐᕈᑎᒋᔭᕆᐊᖃᕐᐸᓯ ᐃᓚᖃᕐᓗᒋᑦ ᕔᓂᒥᒃ ᑐᓂᕐᕈᑎᒃᓴᒥᒃ, ᑐᓂᕐᕈᑎᑦ ᐃᑯᐊᓚᑎᑕᒃᓮᑦ ᐊᓯᖏᑎᒍᑦ ᑐᓂᕐᕈᑎᒋᔭᕆᐊᖃᕐᐸᓯ.”