ᒨᓯᓯ ᓯᑕᒪᖏᑦ 27 - ᐊᒡᓔᑦ ᐃᑦᔪᕐᖕᓁᑦᑐᑦ

ᓯᓘᕕᕼᐋᑉ ᐸᓂᖏᑦ

¹ ᔨᓘᕕᕼᐋᑉ ᐸᓂᖏᑦ ᕾᓚᐅᕐᐳᑦ, ᕼᐃᕙᕐ ᐃᕐᓂᖓᑕ, ᕼᐃᕙᕐ ᒋᓕᐊᑎᐅᑉ ᐃᕐᓂᕆᕚ, ᒋᓕᐊᑎ ᒪᑬᕆᐅᑉ ᐃᕐᓂᕆᕚ, ᒪᑬᕆ ᒫᓇᓯᐅᑉ ᐃᕐᓂᕆᕚ, ᒫᓇᓯ ᔫᓯᐱᐅᑉ ᐃᕐᓂᖓ; ᓯᓘᕕᕼᐋᑉ ᐸᓂᖏ ᐅᑯᐊ: ᒪᕼᐊᓚ, ᓄᐊ, ᕼᐅᒡᓚ, ᒥᐅᓪᑲ, ᐊᒻᒪᓗ ᑏᕐᔭ.

² ᒨᓯᓯᐅᑉ ᓵᖓᓂ ᓇᖏᓚᐅᕐᐳᑦ, ᑐᓂᕐᕈᓯᕐᑎᑦᓯᔨᐅᓪᓗ ᐃᓕᓯᕆᐅᑉ ᓵᖓᓂ, ᐃᓴᕆᐊᓕᒥᐅᓪᓗ ᑲᑎᒪᔪᕐᔪᐊᑦ ᓵᖓᓂ, ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ, ᐅᖃᕐᓗᑎᒃ:

³ “ᐊᑖᑕᕗᑦ ᑐᖁᓚᐅᕐᒪᑦ ᐃᓄᖃᖏᑦᑐᒥ; ᐊᑕᓂᕐᒥᒡᓕ ᐊᑭᕋᕐᑐᑐᓂ ᐃᓚᒋᔭᐅᓚᐅᓐᖏᓚᖅ, ᑰᕋᒃᑯᓐᓂ ᐃᓚᐅᓚᐅᓐᖏᓚᖅ, ᓇᖕᒥᓂᕐᓕ ᐊᔪᕐᑐᓕᓂᕐᒥᓄᑦ ᑐᖁᓚᐅᕐᐳᖅ; ᐃᕐᓂᖃᓚᐅᕋᓂᓗ.

⁴ ᓱᖕᒪᓪᓕ ᐊᑖᑕᑦᑕ ᐊᑎᖓ ᐲᕐᑕᐅᔭᕆᐊᖃᓕᕐᐸ ᐃᓚᒥᓂᑦ ᐃᕐᓂᖃᓚᐅᖏᓐᓂᖓ ᐱᑦᔪᑎᒋᓪᓗᒍ? ᑐᓂᓯᕕᒋᓚᐅᕐᑎᒍᑦ ᓄᓇᖁᑎᒋᓂᐊᕐᑕᑦᑎᓐᓂᒃ ᐊᑖᑕᑦᑕ ᖃᑕᓐᖑᑎᖏᑕ ᐊᑯᕐᖓᓐᓂ.”

⁵ ᒨᓯᓯᐅᑉ ᑕᒪᓐᓇ ᐅᖃᐅᓯᕆᔭᕐᑐᕐᐹ ᐊᑕᓂᕐᒧᑦ.

⁶ ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

⁷ “ᔨᓘᕕᕼᐋᑉ ᐸᓂᖏᑦ ᓱᓕᓪᓗᑎᒃ ᐅᖃᕐᐳᑦ; ᓱᓕᔪᒥᒃ ᑐᓂᓯᕕᒋᔭᕆᐊᖃᕐᐸᑎᑦ ᓄᓇᖁᑎᒋᓂᐊᕐᑕᖓᓐᓂᒃ ᐊᑖᑕᖓᑦᑕ ᖃᑕᓐᖑᑎᖏᑕ ᐊᑯᕐᖓᓐᓂ, ᐊᑖᑕᖓᑦᑕ ᓄᓇᒥᒃ ᑐᓂᓯᕕᒋᓚᐅᕐᑕᖏᑎᑐᑦ.

⁸ ᐃᓴᕆᐊᓕᒥᐅᑦ ᐅᖃᐅᑎᔭᕆᐊᖃᕐᐸᑎᑦ ᐅᖃᕐᓗᑎᑦ, ‘ᐊᖑᑦ ᑐᖁᒃᐸᑦ ᐃᕐᓂᖃᖏᓪᓗᓂ, ᐱᒋᔭᖏᑦ ᐱᔭᐅᔭᕆᐊᖃᕐᐳᑦ ᐸᓂᖓᓄᑦ.

⁹ ᐸᓂᖃᖏᑉᐸᓪᓕ, ᖃᑕᓐᖑᑎᖏᓐᓄᑦ ᓄᓇᖁᑎᖓ ᑐᓂᔭᕆᐊᖃᕐᐹᑦ.

¹⁰ ᖃᑕᓐᖑᑎᖃᖏᑉᐸᓪᓗ, ᓄᓇᖁᑎᖓ ᐊᑖᑕᖓᑕ ᖃᑕᓐᖑᑎᖏᓐᓄᑦ ᑐᓂᔭᕆᐊᖃᕐᐹᑦ.

¹¹ ᐊᑖᑕᖓᓗ ᖃᑕᓐᖑᑎᖃᖏᑉᐸᑦ, ᑕᕝᕙ ᓄᓇᖁᑎᖓ ᐃᓚᖓᓄᑦ ᖃᓂᒋᓂᕐᐸᖓᓄᑦ ᑐᓂᔭᕆᐊᖃᕐᐹᑦ, ᑖᑦᓱᒪ ᐱᑖᕆᓂᐊᕐᐹ. ᑕᒪᓐᓇᓗ ᐃᓴᕆᐊᓕᒥᐅᓄᑦ ᐱᖁᔭᕆᔭᐅᓂᐊᕐᐳᖅ ᐃᖅᑲᕐᑐᐃᕕᖕᒥ, ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.’”

ᔮᓱᐊᑉ ᓂᕈᐊᕐᑕᐅᓂᖓ ᒨᓯᓯᒥᒃ ᐃᓇᖐᖁᓪᓗᒍ

¹² ᐊᑕᓂᐅᑉ ᒨᓯᓯ ᐅᖃᐅᑎᕚ: “ᐅᕗᖓ ᖃᖅᑲᒧᑦ ᐊᐸᕅᒻᒧᑦ ᒪᔪᕋᕆᑦ, ᓄᓇ ᐃᓴᕆᐊᓕᒥᐅᓄᑦ ᑐᓂᔭᕋ ᑕᑯᓂᐊᕋᕕᐅᒃ.

¹³ ᑕᑯᔭᕇᕈᕕᐅᒃ ᑐᖁᓂᐊᕋᕕᑦ, ᓲᕐᓗᑦᑕᐅᖅ, ᖃᑕᓐᖑᑏᑦ ᐂᕉᓂ ᑐᖁᓚᐅᕐᒪᑦ.

¹⁴ ᐃᓄᖃᖏᑦᑐᒥ ᔨᓐᒥᒃ ᐊᑎᓕᖕᒥ, ᐃᓄᒋᐊᒃᑐᕐᔪᐊᑦ ᐊᑭᕋᕐᑐᕐᑎᓪᓗᒋᑦ, ᐱᖁᔭᓐᓂᒃ ᓈᓚᓚᐅᖏᓐᓇᕕᑦ ᐃᒪᓕᕆᓪᓗᓯ, ᐃᑦᔪᕐᓁᑎᑕᐅᔪᒪᑎᓪᓗᖓ ᐃᓄᐃᑦ ᑕᑯᓐᓇᕐᑎᓪᓗᒋᑦ.” (ᑖᒃᑯᐊ ᐃᒪᐅᕗᑦ ᒥᕆᐸᒥ, ᑲᑎᓯᒥ ᐃᓄᖃᖏᑦᑐᒥ ᐊᑎᖃᕐᑐᒥ ᔨᓐᒥᒃ.)

¹⁵ ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

¹⁶ “ᐊᑕᓂᖅ, ᒎᑎ ᐃᓅᔪᓕᒫᑦ ᐊᓂᕐᓂᖃᕐᕕᖏᔭᖓᑦ, ᐃᓄᖕᒥᒃ ᐃᓂᒋᓂᐊᕐᑕᖓᓄᑦ ᐃᓕᓯᓚᐅᕐᓕ ᐃᓄᒋᐊᒃᑐᕐᔪᐊᓄᑦ ᖁᓪᓕᕐᐸᐅᓂᐊᕐᑐᒥᒃ,

¹⁷ ᓯᕗᓪᓕᕐᐸᐅᓗᓂ ᐊᓂᖃᑦᑕᕐᓂᐊᕐᑐᒥᒃ ᓯᕗᓪᓕᕐᐸᐅᓗᓂᓗ ᐃᑎᖃᑦᑕᕐᓂᐊᕐᑐᒥᒃ, ᐊᐅᓪᓚᓕᕌᖓᑕ ᑎᑭᓕᕌᖓᑕᓗ ᑕᓯᐅᕐᑎᐅᓂᐊᕐᑐᒥᒃ, ᐊᑕᓂᐅᑉ ᐃᓄᒋᐊᒃᑐᕐᔪᐊᖁᑎᖏᑦ ᓰᐱᑎᑐᑦ ᑲᒪᔨᖃᖏᑦᑐᑎᑐᑦ ᑍᒤᖁᓇᒋᑦ.”

¹⁸ ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ: “ᔮᓱᐊ ᓈᓂᐅᑉ ᐃᕐᓂᖓ ᐱᖃᑎᒋᓗᒍ, ᑖᑦᓱᒪᓂ ᐊᓂᕐᓂᕋ ᐃᓂᖃᕐᒪᑦ, ᐸᑎᒻᒥᓂᐊᕐᐸᑦ;

¹⁹ ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᓵᖓᓄᑦ ᐱᑎᒍᒃ, ᐃᓄᒋᐊᒃᑐᕐᔪᐊᓪᓗ ᑕᒪᕐᒥᒃ ᓵᖓᓂ, ᐃᓂᒋᓂᐊᕐᑕᖓᓄᑦ ᐃᓕᒍᒃ ᑕᑯᓐᓇᕐᑎᓪᓗᒋᑦ.

²⁰ ᐱᔪᓐᓇᕐᑎᑕᐅᓂᕕᑦ ᐃᓚᖓᓂᒃ ᑐᓂᓯᕕᒋᓂᐊᕐᐸᑦ, ᐃᓴᕆᐊᓕᒥᐅᑦ ᑲᑎᒪᔪᓕᒫᑦ ᓈᓚᒍᓐᓇᖁᓪᓗᒋᑦ ᑖᑦᓱᒥᖓ.

²¹ ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᓵᖓᓂ ᓇᖏᕐᓗᓂ, ᐃᓕᓯᕆ ᐊᑕᓂᕐᒥᒃ ᐊᐱᕐᓱᕐᓂᐊᕐᒪᑦ ᐃᓱᒻᒥᕐᑐᐃᓂᕐᒧᑦ ᐊᑐᕐᑕᐅᕙᒃᑐᖅ ᔫᕆᒻ ᐊᑐᕐᓗᒍ; ᐅᖃᕌᖓᑦ ᐊᐅᓪᓚᖃᑦᑕᕐᓂᐊᕐᒪᑕ, ᐅᖃᕌᖓᓪᓗ ᑎᑭᖃᑦᑕᕐᓂᐊᕐᒪᑕ, ᐃᓴᕆᐊᓕᒥᐅᓕᒫᓂᒃ ᐃᓚᖃᕐᓗᓂ ᐃᓄᒋᐊᒃᑐᕐᔪᐊᓂᒃ.”

²² ᒨᓯᓯ ᑍᒤᓕᐅᓚᐅᕐᐳᖅ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ. ᔮᓱᐊ ᐱᒐᒥᐅᒃ ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᓵᖓᓄᑦ ᐱᑎᑉᐹ ᐃᓄᒋᐊᒃᑐᕐᔪᐊᓪᓗ ᓵᖓᓄᑦ.

²³ ᑕᕝᕙᓂ ᐸᑎᒻᒥᓪᓗᒍ ᐃᓂᒋᓂᐊᕐᑕᖓᓂᒃ ᐃᓂᑖᕐᑎᑉᐹ, ᑍᒫᒃ ᐊᑕᓂᐅᑉ ᒨᓯᓯ ᐱᖁᓚᐅᕐᒪᒍ.