ᒨᓯᓯ ᓯᑕᒪᖏᑦ 25 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑦ ᐱᐅᕆᒦᓐᓂᖏᑦ

¹ ᐃᓴᕆᐊᓕᒥᐅᑦ ᓄᖅᑲᖓᓚᐅᕐᐳᑦ ᓯᑎᒻᒥ, ᐃᓄᐃᓪᓗ ᓄᓕᐊᒐᕐᓂᒃ ᐱᖃᑎᖃᖃᑦᑕᓕᓚᐅᕐᐳᑦ ᒧᐊᐱᒥᐅᑦ ᐊᕐᓇᖏᓐᓂᒃ.

² ᑖᒃᑯᐊ ᕾᖁᔨᖃᑦᑕᓚᐅᕐᒪᑕ ᐃᓴᕆᐊᓕᒥᐅᓂᒃ ᒎᑎᓐᖑᐊᒥᖕᓄᑦ ᑐᓂᕐᕈᓯᕌᖓᒥᒃ, ᐃᓄᐃᓪᓗ ᓂᕆᖃᑦᑕᓚᐅᕐᐳᑦ ᐹᒻᒪᒃᑎᕐᓗᑎᒡᓗ ᒎᑎᓐᖑᐊᖏᓐᓄᑦ.

³ ᑍᒤᒻᒪᑦ ᐃᓴᕆᐊᓕᒥᐅᑦ ᑐᒃᓯᐊᖃᑕᐅᓕᓚᐅᕐᐳᑦ ᐰᓕ-ᐱᐅᕆᒥ, ᐊᑕᓂᐅᓪᓗ ᓂᓐᖓᐅᓯᖓ ᐆᒻᒪᕐᐳᖅ ᐃᓴᕆᐊᓕᒥᐅᓄᑦ.

⁴ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, “ᐃᓄᐃᑦ ᓯᕗᓕᕐᑎᓕᒫᖏᑦ ᑎᒍᒃᑭᑦ ᐸᓯᔭᒃᓴᐅᔪᑦ ᕿᒥᓪᓗᒋᑦ ᐊᑕᓂᐅᑉ ᓵᖓᓂ, ᐅᓪᓘᑎᓪᓗᒍ, ᐊᑕᓂᐅᑉ ᓂᓐᖓᐅᒪᓂᖓ ᐃᓴᕆᐊᓕᒥᐅᓂᒃ ᕿᒤᖁᓪᓗᒍ.”

⁵ ᒨᓯᓯ ᐃᓴᕆᐊᓕᒥᐅᑦ ᐃᓱᒪᓕᐅᕐᑎᖏᓐᓄᑦ ᐅᖃᕐᐳᖅ, “ᐃᓄᖁᑎᓕᒫᓯ ᑐᖁᕋᕐᓯᒋᒃ ᑐᒃᓯᐊᖃᑕᐅᔪᑦ ᐰᓕ-ᐱᐅᕆᒥᐅᑕᕐᒧᑦ.”

⁶ ᐃᓴᕆᐊᓕᒥᐅᑦ ᐃᓚᖓᑦ ᐊᖑᑦ ᐃᓚᒥᓄᐊᕈᑦᔨᕗᖅ ᐊᕐᓇᒥᒃ ᒥᑎᐊᓂᒥᐅᑕᕐᒥᒃ ᒨᓯᓯ ᑕᑯᓐᓇᕐᑎᓪᓗᒍ ᐃᓴᕆᐊᓕᒥᐅᓪᓗ ᕿᐊᑎᓪᓗᒋᑦ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ.

⁷ ᐱᓂᕼᐋᓯᐅᓪᓕ ᐃᓕᓯᕆᐅᑉ ᐃᕐᓂᖓᑕ, ᐂᕉᓂᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᖑᑕᖓᑕ, ᑕᑯᒐᒥᐅᑉ, ᒪᑭᑉᐳᖅ ᐃᓄᒋᐊᒃᑐᕐᔪᐊᑦ ᐊᑯᕐᖓᓐᓂᑦ ᓇᐅᒃᑯᑎᒥᒃ ᑎᒍᓯᓪᓗᓂ;

⁸ ᐊᖑᑦ ᐃᓴᕆᐊᓕᒥᐅᑕᖅ ᒪᓕᒃᓴᕐᐹ ᑐᐱᖓᓄᑦ ᐃᑎᕐᓗᓂ ᑕᒪᕐᒥᒃ ᐊᑕᐅᑦᓯᒃᑯᑦ ᑲᐱᓪᓗᒋᒃ ᐃᓴᕆᐊᓕᒥᐅᕐᓗ ᐊᖑᑦ ᐊᕐᓇᕐᓗ. ᑍᒫᒃ ᐋᓐᓂᐊᓇᕐᑐᖅ ᑐᖁᕅᔪᖅ ᓄᖅᑲᕐᐳᖅ ᐃᓴᕆᐊᓕᒥᐅᓂᑦ.

⁹ ᓂᓐᖓᐅᒪᕕᐅᓂᕐᒧᑦ ᑐᖁᕅᔪᒧᑦ ᑐᖁᔪᑦ 24,000ᐅᓚᐅᕐᐳᑦ.

¹⁰ ᑕᕝᕙ ᐊᑕᓂᖅ ᐅᖃᓕᕐᐳᖅ ᒨᓯᓯᒧᑦ, ᐅᖃᕐᓗᓂ:

¹¹ “ᐱᓂᕼᐋᓯ ᐃᓕᓯᕆᐅᑉ ᐃᕐᓂᖓᑕ, ᑐᓂᕐᕈᓯᕐᑎᑦᓯᔨᐅᑉ ᐂᕉᓂᐅᑉ ᐃᕐᖑᑕᖓᑕ, ᐃᓴᕆᐊᓕᒥᐅᓄᑦ ᓂᓐᖓᐅᒪᓂᕋ ᓄᖅᑲᕐᑎᑉᐹ, ᐊᒃᓱᕈᕐᓗᓂ ᓴᐳᑦᔨᔪᒪᓪᓚᕆᖕᒪᑦ ᐅᕙᑦᑐᑦ ᐅᐱᒋᔭᐅᓂᕋ ᐃᓄᖕᓄᑦ ᐱᓪᓗᒍ, ᐃᓴᕆᐊᓕᒥᐅᓂᒃ ᓴᐳᑦᔨᔪᒪᓪᓗᓂ ᓄᖒᑦᓯᖁᓇᖓ ᑖᒃᑯᓂᖓ ᑲᔪᓯᔪᒪᓂᓐᓄᑦ.

¹² ᑍᒤᒻᒪᑦ ᐅᖃᐅᑎᒍᒃ ᑕᑯᒋᑦ, ᐊᖏᖃᑎᒌᖕᓂᕐᒥᒃ ᑐᓂᓯᕕᒋᕙᒋᑦ ᓮᒪᓇᕐᑐᒦᖁᓪᓗᑎᑦ;

¹³ ᑖᓐᓇ ᑭᖑᕚᖏᓪᓗ ᐊᖏᖃᑎᒌᒍᑎᒧᑦ ᑐᓂᕐᕈᓯᕐᑎᑦᓯᔨᐅᖏᓐᓇᕐᓂᐊᓕᕐᐳᑦ ᐃᓱᖃᖏᑦᑐᒧᑦ, ᒎᑎᒥᓂᒃ ᐊᒃᓱᕈᕈᑎᖃᓚᐅᕐᒪᑦ ᓴᐳᑎᔪᒪᓪᓗᒍ, ᐃᓴᕆᐊᓕᒥᐅᓂᒃ ᐃᓱᒪᒋᔪᓐᓁᕐᕕᐅᑎᑦᓯᓚᐅᕐᒪᑦ.”

¹⁴ ᐃᓴᕆᐊᓕᒥᐅᕐᓕ ᑐᖁᑕᐅᓚᐅᕐᑐᖅ, ᐊᕐᓇᒥᒃ ᒥᑎᐊᓂᒥᐅᑕᕐᒥᒃ ᑐᖁᑕᐅᖃᑎᖃᓚᐅᕐᑐᖅ, ᐊᑎᖃᕐᐳᖅ ᔨᒻᕆ ᓴᓘᑉ ᐃᕐᓂᖓ, ᓯᕗᓕᕕᓂᖓᑕ ᓯᒥᐅᓂᐅᑉ ᑭᖑᕚᖏᓐᓂ ᓯᕗᓕᕐᑎᐅᔪᖅ.

¹⁵ ᒥᑎᐊᓂᒥᐅᓪᓗ ᐊᕐᓇᐅᑉ ᑐᖁᑕᐅᓚᐅᕐᑑᑉ ᐊᑎᖓ ᑰᔾᐱ ᔫᕆᐅᑉ ᐸᓂᖓ; ᐊᑖᑕᖓ ᓯᕗᓕᕐᑎᐅᓚᐅᕐᐳᖅ ᑭᖑᕚᖑᖃᑎᒥᓂ ᒥᑎᐊᓂᒥᐅᓂ.

¹⁶ ᑕᕝᕙ ᐊᑕᓂᖅ ᒨᓯᓯᒧᑦ ᐅᖃᕐᐳᖅ,

¹⁷ “ᒥᑎᐊᓂᒥᐅᑦ ᐊᑭᕋᑐᑦ ᐱᓂᐊᕐᕕᒋᒃᑭᑦ ᑐᖁᕋᕐᓗᒋᓪᓗ,

¹⁸ ᐊᑭᕋᒥᒃᑎᑐᑦ ᐱᓂᐊᕐᕕᒋᓚᐅᕐᒪᓯ ᐃᓕᑦᓯᓐᓂᒃ ᓯᓔᕐᕆᒃᓯᓂᕐᒥᒃᑎᒍᑦ, ᐃᒃᓯᒎᕐᑎᓚᐅᕐᒪᓯ ᐱᐅᕆᒥ, ᑰᔾᐱᒧᓪᓗ, ᒥᑎᐊᓂᒥᐅᑦ ᓯᕗᓕᕐᑎᖓᑦᑕ ᐸᓂᖓᓄᑦ, ᓇᔭᒃᑎᒃ, ᑐᖁᑕᐅᓚᐅᕐᑐᖅ ᓂᓐᖓᐅᒪᓂᖅ ᑐᖁᓰᔪᖅ ᐱᓕᕐᑎᓪᓗᒍ ᐱᐅᕆᒥ.”