ᒨᓯᓯ ᓯᑕᒪᖏᑦ 24 - ᐊᒡᓔᑦ ᐃᑦᔪᕐᖕᓁᑦᑐᑦ

ᐸᓛᒻ ᒎᑎᐅᒃ ᐅᖃᐅᓯᐅᖁᔭᖏᓐᓂᒃ ᐅᖃᕐᓂᖓᑕ ᐱᖓᔪᐊᑦ

¹ ᐸᓛᒻ ᖃᐅᔨᒐᒥ ᐊᑕᓂᖅ ᐃᓴᕆᐊᓕᒥᐅᓂᒃ ᓮᒻᒪᕐᑎᑦᓯᓂᕐᒥᒃ ᖁᕕᐊᒋᔭᖃᕐᒪᑦ, ᐃᓛᓐᓂᑦ ᐱᐅᓯᕆᕙᒃᑕᒥᑐᑦ ᐊᖓᒃᑰᓇᓱᐊᕐᓂᒃᑯᑦ ᐱᓇᓱᐊᓚᐅᓐᖏᓚᖅ, ᐃᓄᖃᖏᑦᑐᒧᓪᓕ ᓵᓐᖓᓚᐅᕐᐳᖅ.

² ᐸᓛᒻ ᐊᕙᒻᒧᑦ ᕿᕕᐊᕋᒥ, ᐃᓴᕆᐊᓕᒥᐅᑦ ᑕᖕᒫᕐᓯᒪᔪᑦ ᑕᑯᕔᑦ ᐊᕕᒃᑐᕐᓯᒪᓪᓗᑎᒃ ᑭᖑᕚᖑᖃᑎᒌᑦ ᑲᑎᓐᖓᔪᑦ, ᒎᑎᐅᓪᓗ ᐊᓂᕐᓂᖓᑕ ᑎᑭᑉᐹ.

³ ᒎᑎᒧᑦ ᐅᖃᖁᔭᐅᓂᓂ ᐅᖃᐅᓯᕆᓕᕐᐹ ᐅᖃᕐᓗᓂ: “ᐸᓛᒻ ᒎᑎᒥᑦ ᐅᖃᕐᑎᑕᐅᓂᖓ ᐱᐅᕆᐅᑉ ᐃᕐᓂᖓᑕ, ᐊᖑᑎᐅᑉ ᐃᔨᖏᒃ ᐅᐃᑎᑕᐅᓯᒪᔫᑉ ᒎᑎᒧᑦ ᐅᖃᕐᑎᑕᐅᓂᖓ,

⁴ ᒎᑎᒧᑦ ᐅᖃᕐᑎᑕᐅᓂᖓ, ᑐᓵᔫᑉ ᒎᑎᐅᑉ ᓂᐱᖓᓂᒃ, ᑕᐅᑐᒃᑎᑕᐅᔫᓪᓗ ᐊᔪᒐᖃᖏᑦᑐᑉ ᑕᑯᑎᑦᓯᔪᑎᖏᓐᓂᒃ, ᐹᒻᒪᖓᔫᓪᓗ, ᐃᔨᖏᒃ ᐅᐃᑕᓪᓗᑎᒃ:

⁵ ᑐᐱᕐᑎᑦ ᐱᐅᔪᐊᓘᕗᑦ, ᔧᑰ! ᐃᓴᕆᐊᓖ, ᐃᓂᒋᔭᑎᑦ ᐱᐅᔪᐊᓘᕗᑦ!

⁶ ᓇᕐᓴᑎᑐᑦ ᐱᕕᑐᔪᐊᓗᒃᑎᑐᑦ, ᐱᕈᕐᓰᕕᒃᑎᑐᑦ ᑰᑉ ᓯᓈᓃᑦᑐᑎᑐᑦ, ᐱᕈᕐᓯᐊᑎᑐᑦ ᐋᓘᒥᒃ ᐊᑎᓕᒃᑎᑐᑦ ᐊᑕᓂᐅᑉ ᐃᓕᐅᕋᕐᓯᒪᔭᖏᑎᑐᑦ, ᓇᐹᕐᑐᑎᑐᑦ ᓰᑕᕆᒥᒃ ᐊᑎᓕᒃᑎᑐᑦ ᐃᒪᐅᑉ ᓯᓈᓃᑦᑐᑎᑐᑦ,

⁷ ᑖᓐᓇ ᐃᒥᕐᒥᒃ ᖃᑦᑕᖁᑎᒥᓃᑦᑐᓂᒃ ᑯᕕᓯᔪᒫᕐᐳᖅ, ᐱᕈᕐᓯᐊᒃᓴᖁᑎᖏᑦ ᐃᒪᕐᓂ ᓇᓂᑐᐃᓐᓈᕈᒫᕐᐳᑦ, ᐊᖓᔪᖅᑳᕐᔪᐊᖁᑎᖓ ᐋᒑᒡᒥᑦ ᖁᑦᓯᖕᓂᕐᓴᐅᔪᒫᕐᐳᖅ, ᐊᖓᔪᖅᑳᕐᔪᐊᖑᕕᖓ ᖁᑦᓯᒃᑐᒦᑦᓱᒫᕐᐳᖅ.

⁸ ᒎᑎᐅᑉ ᐊᓂᑎᑉᐹ ᐄᑦᔨᑉᑎᒥᑦ; ᓴᓐᖏᓂᖃᕐᒪᑦ ᐃᒻᒧᒃᓯᐅᒐᕐᑐᑦ ᓄᔪᐊᕐᑐᑐᑦ; ᐃᓅᖃᑎᒌᒡᔪᐊᑦ ᓄᖑᑦᓱᒫᕐᐰᑦ, ᐊᑭᕋᕐᑐᕐᑎᓂ; ᓴᐅᓂᖏᑦ ᓯᖁᒥᑦᓱᒫᕐᐰᑦ ᖃᕐᔪᒥᓄᓪᓗ ᐳᑐᓗᒋᑦ.

⁹ ᐅᑯᕗᖅ, ᐃᓂᓪᓚᒡᓗᓂᓗ ᓛᔭᑎᑐᑦ; ᓛᔭᑎᑐᑦ, ᑭᐊ ᑐᐹᕈᒪᕚ? ᓮᒻᒪᕐᑎᑕᐅᓕ ᐃᓕᖕᓂᒃ ᓮᒻᒪᕐᑎᑦᓯᔪᖅ, ᐱᐅᖏᑦᑐᒧᑦ ᐱᔭᐅᓕ ᐃᓕᖕᓂᒃ ᐱᐅᖏᑦᑐᒧᑦ ᐱᔭᐅᖁᔨᔪᖅ.”

¹⁰ ᐰᓚᒃᓗ ᓂᓐᖓᒃᐳᖅ ᐸᓛᒻᒧᑦ, ᐊᒡᒐᓂ ᑲᓱᕐᑎᓪᓗᒋᑦ; ᐸᓛᒻᒧᓪᓗ ᐅᖃᕐᓗᓂ, “ᐊᑭᕋᒃᑲ ᐱᐅᖏᑦᑐᒧᑦ ᐱᔭᐅᖁᓪᓗᒋᑦ ᐅᖃᖁᕙᒋᑦ, ᑕᑯᒋᑦ, ᐊᖏᔪᐊᓗᖕᒥᒃ ᓮᒻᒪᕐᑎᑕᑎᑦ ᐱᖓᓱᐊᕐᑎᕐᓗᒋᑦ!

¹¹ ᑍᒤᒻᒪᑦ ᒫᓐᓇ, ᐃᓂᖕᓄᑦ ᕿᒫᓕᕆᑦ. ᐅᖃᓚᐅᕐᐳᖓ ᐊᖏᔪᒥᒃ ᐅᐱᒋᓂᐊᕐᓂᕋᕐᓗᑎᑦ, ᑭᓯᐊᓂ, ᐊᑕᓂᐅᑉ ᐅᐱᒋᔭᒃᓴᐅᑎᓐᖏᓛᑎᑦ.”

¹² ᐸᓛᒻᓗ ᐅᖃᓕᕐᐳᖅ ᐰᓚᒃᒧᑦ, “ᐅᕙᓐᓄᑦ ᑎᓕᓚᐅᕐᑕᕐᓄᑦ ᐅᖃᓚᐅᓐᖏᓐᓂᕗᖔ? ᐅᖃᕐᓗᖓ,

¹³ ‘ᐰᓚᒃ ᐃᒡᓗᒥᓂᒃ ᓯᐅᓪᕕᕆᓂᒃ ᒎᓗᓂᒡᓗ ᑕᑕᑦᑐᒥᒃ ᕾᑦᓯᒐᓗᐊᕐᐸᑦ, ᐊᑕᓂᐅᑉ ᐅᖃᐅᓯᕆᖁᔭᖓᑕ ᐅᖓᑖᓂ ᐅᖃᕈᓐᓇᓐᖏᓚᖓ, ᐱᐅᔪᒥᒃ ᐱᐅᖏᑦᑐᒥᒡᓘᓐᓃᑦ ᐅᕙᖓ ᐃᓱᒪᒋᔭᓐᓄᑦ. ᐊᑕᓂᐅᑉ ᐅᖃᐅᓯᕆᖁᔭᖓᓂᒃ ᐅᖃᕆᐊᖃᓂᕋᓚᐅᓐᖏᓚᖔ’?

¹⁴ ᒫᓐᓇᓕ, ᐃᓄᖁᑎᓐᓄᑦ ᐂᓂᐊᓕᕐᐳᖓ. ᕾᒋᑦ, ᐅᖃᐅᑎᓂᐊᕋᒃᑭᑦ, ᐃᓄᒋᐊᒃᑐᕐᔪᐊᑦ ᐅᑯᐊ ᐃᓄᖁᑎᖕᓄᑦ ᖃᓄᐃᓕᐅᕐᓂᐊᕐᒪᖔᑕ ᐅᓪᓗᓂ ᑭᖑᓪᓕᕐᓂ.”

ᐸᓛᒻ ᑭᖑᓪᓕᕐᐹᖓᓂᒃ ᒎᑎᐅᑉ ᐅᖃᐅᓯᐅᖁᔭᖓᓂᒃ ᐅᖃᕐᓂᖓ

¹⁵ ᒎᑎᒥᑦ ᐅᖃᐅᓯᒃᓴᕐᑖᕆᔭᒥᓂᒃ ᐅᖃᓕᕐᐳᖅ, ᐅᖃᕐᓗᓂ: ᐸᓛᒻ ᐱᐅᕆᐅᑉ ᐃᕐᓂᖓᑕ ᒎᑎᒥᑦ ᐅᖃᕐᑎᑕᐅᓂᖓ, “ᐃᓅᑉ ᐃᔨᖏᒃ ᐅᐃᑎᑕᐅᓯᒪᔫᑉ, ᒎᑎᒥᑦ ᐅᖃᕐᑎᑕᐅᓂᖓ;

¹⁶ ᒎᑎᐅᑉ ᐅᖃᐅᓯᖓᓂᒃ ᑐᓵᔫᑉ ᒎᑎᒥᑦ ᐅᖃᕐᑎᑕᐅᓂᖓ, ᖁᑦᓯᖕᓂᕐᐹᑉ ᖃᐅᔨᒪᓂᖓᓂᒃ ᖃᐅᔨᒪᑎᑕᐅᔫᑉ, ᑕᐅᑐᒃᑑᓪᓗ ᐊᔪᒐᖃᖏᑦᑑᑉ ᑕᑯᑎᑦᓯᑦᔪᑎᖏᓐᓂᒃ, ᐹᒻᒪᖓᔫᓪᓗ, ᐃᔨᖏᒃ ᐅᐃᑕᓪᓗᑎᒃ:

¹⁷ ᒫᓐᓇ ᑕᑯᕙᕋ, ᑭᓯᐊᓂ ᑕᕝᕙᑲᐅᑎᒋᐅᖏᑦᑐᖅ, ᑕᑯᓐᓇᕐᐸᕋ, ᖃᓂᑦᑑᓇᓂ ᑭᓯᐊᓂ; ᐅᓪᓗᕆᐊᖅ ᐊᓂᔪᒫᕐᐳᖅ ᔧᑯᒥᑦ; ᐊᖓᔪᖅᑳᕐᔪᐊᑉ ᐊᔭᐅᑉᐱᐊᖓ ᒪᑭᑦᓱᒫᕐᐳᖅ ᐃᓴᕆᐊᓕᒥᑦ, ᒧᐊᐱᒥᐅᓪᓗ ᖃᐅᖏᑦ ᓯᖁᒥᑦᓱᒫᕐᐰᑦ, ᐊᓯᕈᕐᓗᒋᓪᓗ ᓰᑎᐅᑉ ᐃᕐᓂᖏᑦ.

¹⁸ ᐄᑐᒥᒥᐅᑦ ᓵᓚᐅᔪᒫᕐᐳᑦ; ᓰᐊᕆ ᓵᓚᐅᔪᒫᕆᕗᖅ, ᐊᑭᕋᖏᓪᓗᑦᑕᐅᖅ, ᐱᑖᕆᔭᐅᔪᒫᕆᕗᑦ ᐃᓴᕆᐊᓕᓕ ᓴᓐᖏᔪᕐᔪᐊᖑᔪᒫᕐᐳᖅ.

¹⁹ ᐊᖓᔪᖅᑳᕐᔪᐊᖅ ᓴᖅᑭᑦᓱᒫᕐᐳᖅ ᔧᑯᒥᑦ, ᐃᒡᓗᒐᓴᒡᔪᐊᓂ ᐊᒥᐊᒃᑯᑦ ᓄᖑᑦᓱᒫᕐᐰᑦ.”

²⁰ ᐊᒪᓕᒃᒥᐅᑦ ᕿᕕᐊᕋᒥᒋᑦ, ᒎᑎᒥᑦ ᐅᖃᐅᓯᒃᓴᒥᓂᒃ ᐅᖃᓕᕐᐳᖅ, ᐅᖃᕐᓗᓂ: “ᐊᒫᓚᒃ ᐃᓅᖃᑎᒋᒡᔪᐊᓂᑦ ᓯᕗᓪᓕᕐᐹᖑᓚᐅᕐᐳᖅ, ᑭᖑᓪᓕᕐᐹᖑᓕᕈᒫᕐᐳᕐᓕ ᐊᓯᕈᕐᑕᐅᓂᓂ ᑎᑭᓪᓗᒍ.”

²¹ ᑭᓁᑎᑦ ᕿᕕᐊᕋᒥᒋᑦ, ᒎᑎᒥᑦ ᐅᖃᐅᓯᒃᓴᒥᒃ ᐅᖃᓕᕐᐳᖅ, ᐅᖃᕐᓗᓂ: “ᐃᓂᒋᔧᑦ ᐊᐅᓚᔪᓐᓇᕋᓂ ᑐᓐᖓᕕᖃᑦᓯᐊᕐᐳᖅ, ᐃᕙᕝᕖᓪᓗ ᕾᕐᑐᒥ ᐃᓂᖃᕐᐳᖅ;

²² ᑍᒤᒐᓗᐊᕐᑎᓪᓗᒍ ᑲᐃᓐ ᐃᑭᑕᐅᔪᒫᕐᐳᖅ. ᖃᓄᖅ ᐊᑯᓂᐅᑎᒋᕙ ᓱᓕ ᐋᓱᕆᐅᑉ ᑎᒍᓗᑎᑦ ᐊᐅᓪᓚᕈᑎᔪᒫᕐᒪᑎᑦ?”

²³ ᒎᑎᒥᑦ ᐅᖃᐅᓯᒃᓴᕆᔭᒥᓂᒃ ᐅᖃᓕᕐᐳᖅ ᐅᖃᕐᓗᓂ: “ᑲᑉᐱᐊᓐᓇᒦᒃ! ᑭᓇ ᐆᒪᔪᓐᓇᓛᕐᐹ ᒎᑎ ᑍᒤᓕᐅᓕᕐᐸᑦ?

²⁴ ᐅᒥᐊᕐᔪᐊᑦ ᑎᑭᑦᓱᒫᕐᐳᑦ ᑭᑎᒻᒥᐅᑉ ᓯᒡᔭᖓᓂᑦ; ᑖᒃᑯᐊᓗ ᐋᓱᕆ ᐄᐸᕆᓗ ᓵᓚᒋᔪᒫᕐᐹᒃ, ᐋᒪᓕᒃᑎᑐᑦᑕᐅᖅ, ᑍᒤᑕᐅᔪᒫᕐᐳᑦ ᐊᓯᕈᕐᑕᐅᕕᖕᒥᖕᓄᑦ.”

²⁵ ᑕᕝᕙ ᐸᓛᒻ ᒪᑭᑉᐳᖅ ᓇᔪᒐᕐᒥᓄᓪᓗ ᐅᑎᕐᓗᓂ ᐰᓚᒃᑕᐅᖅ ᐅᑎᓕᕆᕗᖅ.