ᒨᓯᓯ ᓯᑕᒪᖏᑦ 22 - ᐊᒡᓔᑦ ᐃᑦᔪᕐᖕᓁᑦᑐᑦᐹᓚᒃ ᐸᓛᒥᒥᒃ ᕾᖁᔨᓂᖓ 1 ᐃᓴᕆᐊᓕᒥᐅᑦ ᐃᖏᕐᕋᓚᐅᕐᐳᑦ, ᑕᖕᒫᕐᓗᑎᒡᓗ ᓇᑎᕐᓇᒥ ᒧᐊᐱᒥᒃ ᐊᑎᓕᖕᒥ ᔪᐊᕐᑕᓂᐅᑉ ᓯᓈᓂ ᔨᕆᑰᑉ ᐊᑭᐊᓂ. 2 ᐰᓚᒃ ᔨᐴᕆᐅᑉ ᐃᕐᓂᖓ ᖃᐅᔨᒐᒥ ᐃᓴᕆᐊᓕᒥᐅᑦ ᖃᓄᐃᓕᐅᓚᐅᕐᓂᖏᓐᓂᒃ ᐊᒧᕅᑎᓄᑦ. 3 ᒧᐊᐱᒥᐅᑦ ᐊᖏᔪᒥᒃ ᓯᕘᕋᓕᕐᐳᑦ ᐃᓄᒋᐊᒃᑐᕐᔪᐊᓂᒃ ᐅᓄᓗᐊᕐᑐᐊᓘᖕᒪᑕ, ᒧᐊᐱᒥᐅᑦ ᐃᕐᓯᒻᒪᕆᓕᓚᐅᕐᐳᑦ ᐃᓴᕆᐊᓕᒥᐅᓂᒃ ᐃᕐᓯᓪᓗᑎᒃ. 4 ᒧᐊᐱ ᐅᖃᕐᐳᖅ ᒥᑎᐊᓂᒥᐅᑦ ᐊᖓᔪᖅᑳᖏᓐᓄᑦ, “ᐃᓄᒋᐊᒃᑐᕐᔪᐊᑦ ᐃᒃᑯᐊ ᓵᓚᖃᕐᐸᓪᓕᐊᓂᐊᓕᕐᑐᑦ ᐊᕙᑎᑦᑎᓐᓃᑦᑐᓕᒫᓂᒃ, ᐃᒻᒧᒃᓯᐅᒐᕐᑐᑦ ᐃᕕᒃᓱᒐᕐᓂᒃ ᓄᖒᑦᓯᕙᓪᓕᐊᔪᑐᑦ.” ᐰᓚᒡᓕ ᔨᐴᕆᐅᑉ ᐃᕐᓂᖓ ᑍᑦᓱᒪᓂ ᒧᐊᐱᒥᐅᓄᑦ ᐊᖓᔪᖅᑳᕐᔪᐊᖑᓚᐅᕐᐳᖅ. 5 ᑕᕝᕙ ᑎᓕᓯᓚᐅᕐᐳᖅ ᐅᖃᕆᐊᕐᑐᑐᓂᒃ ᐸᓛᒻᒧᑦ ᐱᐅᕆᐅᑉ ᐃᕐᓂᖓᓄᑦ ᐱᑑᕆᒦᑦᑐᒧᑦ ᕾᖁᓪᓗᓂᐅᒃ, ᑰᑉ ᖃᓂᒋᔭᖓᓃᑦᑐᒧᑦ ᓄᓇᒥᓂ, ᐅᖃᕐᓗᓂ, “ᑕᑯᒋᑦ ᐃᓄᐃᑦ ᑎᑭᒻᒪᑕ ᐄᑦᔨᑉᑎᒥᑦ. ᓄᓇᕐᔪᐊᒥᒃ ᐊᒥᕌᒃᓯᓯᒪᔪᑦ, ᓯᓚᑎᑦᓯᐊᑎᓐᓃᓕᕐᓗᑎᒡᓗ! 6 ᑍᒤᒻᒪᑦ ᑐᐊᕕᕐᓗᑎᑦ ᕾᓕᕆᑦ, ᐃᓄᒋᐊᒃᑐᕐᔪᐊᑦ ᐅᑯᐊ ᐱᐅᖏᑦᑐᒧᑦ ᐱᖁᓗᒋᑦ ᐅᖃᐅᓯᕆᓚᐅᒃᑭᑦ ᐅᕙᖓ ᐱᑦᔪᑎᒋᓗᖓ, ᐅᕙᓐᓄᑦ ᓴᓐᖏᔫᓗᐊᕐᒪᑕ, ᑍᒫᒃ ᐃᒻᒪᖄ ᓵᓚᒋᓗᒋᑦ ᑕᒫᓐᖓᑦ ᓄᓇᒥᑦ ᐊᐅᓚᕐᑎᑦᓱᓐᓇᕐᓂᐊᕋᒃᑭᑦ, ᖃᐅᔨᒪᒐᒪ ᓮᒻᒪᕐᑎᑕᑎᑦ ᓮᒻᒪᕐᑎᓯᒪᖃᑦᑕᕐᒪᑕ, ᐱᐅᖏᑦᑐᒥᒡᓗ ᐅᖃᐅᓯᕆᔭᑎᑦ ᐱᐅᖏᑦᑐᒦᓕᕐᐸᖕᒪᑕ.” 7 ᒧᐊᐱᒥᐅᑦ ᐊᖓᔪᖅᑳᖏᑦ ᒥᑎᐊᓂᒥᐅᓪᓗ ᐊᖓᔪᖅᑳᖏᑦ ᐊᐅᓪᓚᕐᐳᑦ ᖃᐅᔨᑎᑦᓯᔪᒃᓴᒧᑦ ᐊᑭᓕᐅᑎᒃᓴᒥᒃ ᓇᒃᓴᕐᓗᑎᒃ, ᐸᓛᒻᒧᑦ ᑎᑭᓐᓇᒥᒃ ᐅᖃᕐᕕᒋᕚᑦ ᐰᓚᑭᐅᑉ ᐅᖃᐅᓯᕆᖁᔭᖏᓐᓂᒃ. 8 ᑖᑦᓱᒪ ᐅᖃᐅᑎᕔᑦ, “ᐅᕙᓂ ᐅᓐᓄᒃ ᓯᓂᒃᑕᓚᐅᕆᑦᓯ, ᐅᖃᐅᑎᔭᕐᑐᓛᕐᐸᑦᓯ, ᐊᑕᓂᐅᑉ ᐅᖃᕐᕕᒋᒃᐸᖓ.” ᑍᒫᒃ ᒧᐊᐱᒥᐅᑦ ᓯᕗᓕᕐᑎᖏᑦ ᐸᓛᒻᒥ ᓯᓂᒃᑕᓚᐅᕐᐳᑦ. 9 ᒎᑎᓗ ᐸᓛᒻᒧᐊᕐᐳᖅ ᐅᖃᕐᓗᓂ, “ᐅᑯᐊ ᐃᓄᐃᑦ ᐃᓕᖕᓄᑦ ᕾᓯᒪᔪᑦ ᑭᓇᒃᑰᕙᑦ?” 10 ᐸᓛᒻᓗ ᒎᑎᒧᑦ ᐅᖃᕐᐳᖅ, “ᐰᓚᒃ ᔨᐴᕆᐅᑉ ᐃᕐᓂᖓᑕ, ᒧᐊᐱᒥᐅᑦ ᐊᖓᔪᖅᑳᕐᔪᐊᖓᑕ, ᐅᕙᓐᓄᑦ ᑎᓕᔭᖏᑦ ᐅᕙᓐᓄᑦ, ᐅᖃᕐᓗᓂ, 11 ‘ᑕᑯᒋᑦ, ᐃᓄᐃᑦ ᐄᑦᔨᑉᑎᒥᑦ ᐱᔪᑦ, ᓄᓇᕐᔪᐊᕐᒥᒃ ᐊᒥᕌᒃᓯᓯᒪᕗᑦ. ᕾᓚᐅᕆᑦ ᐱᐅᖏᑦᑐᒥᒃ ᐱᖁᓗᒋᑦ ᐅᖃᐅᓯᕆᓚᐅᒃᑭᑦ ᐱᑦᔪᑎᒋᓗᖓ; ᑍᒫᒃ ᐃᒻᒪᖄ ᓵᓚᒋᓗᒋᑦ ᑕᒫᓐᖓᑦ ᓄᓇᒥᑦ ᐊᐅᓚᕐᑎᑦᓱᓐᓇᕐᓂᐊᕋᒃᑭᑦ.’” 12 ᒎᑎᐅᓪᓗ ᐸᓛᒻ ᐅᖃᐅᑎᕚ, “ᑍᒃᑯᐊ ᐃᓚᒋᓂᐊᕐᓇᖏᑦ; ᐃᓄᒋᐊᒃᑐᕐᔪᐊᑦ ᐱᐅᖏᑦᑐᒧᑦ ᐱᔭᐅᖁᓗᒋᑦ ᐅᖃᐅᓯᕆᓂᐊᕐᓇᒋᑦ, ᓮᒻᒪᕐᑎᑕᐅᓯᒪᖕᒪᑕ.” 13 ᐸᓛᒻ ᐅᓪᓛᒃᑯᑦ ᒪᑭᓐᓇᒥ ᐰᓚᒃ ᐊᖓᔪᖅᑳᖁᑎᖏᑦ ᐅᖃᐅᑎᕔᑦ, “ᓄᓇᑦᓯᓐᓄᑦ ᐅᑎᓕᕆᑦᓯ, ᐊᑕᓂᐅᑉ ᐃᓕᑦᓯᓐᓄᑦ ᐃᓚᐅᖁᓗᓂᖓ ᐊᔪᕐᑎᒻᒪᖓ.” 14 ᒧᐊᐱᒥᐅᑦ ᐊᖓᔪᖅᑳᖁᑎᖏᑦ ᒪᑭᓐᓇᒥᒃ ᐰᓚᒃᒧᑦ ᐂᓕᕐᐳᑦ, ᐅᖃᐅᑎᓪᓗᒍᓗ, “ᐸᓛᒻ ᐅᕙᑦᑎᓐᓂᒃ ᐃᓚᖃᕈᒪᓐᖏᓚᖅ.” 15 ᐰᓚᒃ ᓱᓕ ᐊᖓᔪᖅᑳᖁᑎᒥᓂᒃ ᐅᓄᕐᓂᕐᓴᓂᒃ ᐅᐱᓐᓇᕐᓂᕐᓴᓂᒃ ᓯᕗᓪᓕᕐᓂᑦ ᑎᓕᓯᒃᑲᓐᓂᓚᐅᕐᐳᖅ. 16 ᑖᒃᑯᐊ ᐸᓛᒻᒧᑦ ᑎᑭᓐᓇᒥᒃ ᐅᖃᐅᑎᕚᑦ, “ᐰᓚᒃ ᔨᐴᕆᐅᑉ ᐃᕐᓂᖓ ᐅᖃᕐᐳᖅ: ‘ᐊᑏ, ᐊᒡᕕᐊᕐᑕᐅᖏᓪᓗᑎᑦ ᕾᓚᐅᕆᑦ ᐅᕙᓐᓄᑦ; 17 ᓱᓕᓗᖓ ᐊᖏᔪᒥᒃ ᐅᐱᒋᓂᐊᕐᐸᒋᑦ, ᖃᓄᑐᐃᓐᓇᕐᓘᓐᓃᑦ ᐅᖃᐅᑎᒍᕕᖓ ᐱᓇᓱᐊᕐᓂᐊᕐᐳᖓ. ᑍᒤᒻᒪᑦ ᕾᒋᑦ, ᐃᓄᒋᐊᒃᑐᕐᔪᐊᑦ ᐅᑯᐊ ᐱᐅᖏᑦᑐᒧᑦ ᐱᔭᐅᖁᓗᒋᑦ ᐅᖃᐅᓯᕆᓚᐅᒃᑭᑦ ᐱᑦᔪᑎᒋᓗᖓ.’” 18 ᐸᓛᒻ ᑭᐅᒐᒥ ᐅᖃᓕᕐᐳᖅ ᐰᓚᒃ ᐱᔨᖏᓐᓄᑦ, ᐅᖃᕐᓗᓂ, “ᐹᓚᒃ ᐃᒡᓗᒥᓂᒃ ᓯᐅᓪᕕᕆᓂᒃ ᒎᓗᓂᒡᓗ ᑕᑕᑦᑐᒥᒃ ᐅᕙᓐᓄᑦ ᕾᑦᓯᒐᓗᐊᕐᐸᑦ, ᐊᑕᓂᐅᑉ ᒎᑎᒪ ᐅᖃᐅᓯᕆᔭᖓᑕ ᐅᖓᑖᓄᑦ ᐱᔪᓐᓇᖏᑦᑐᖓ, ᒥᑭᓐᓂᕐᓴᒥᒡᓘᓐᓃᑦ ᐊᖏᓂᕐᓴᒥᒡᓘᓐᓃᑦ. 19 ᒫᓐᓇᓕ ᐊᑏ, ᐅᓐᓄᒃ ᐅᕙᓂ ᓯᓂᒃᑕᓚᐅᕆᑦᓯᑕᐅᖅ, ᖃᐅᔨᒃᑲᓐᓂᖁᓪᓗᖓ ᖃᓄᖅ ᐊᑕᓂᖅ ᐅᕙᓐᓄᑦ ᐅᖃᒃᑲᓐᓂᕐᓂᐊᕐᒪᖔᑦ.” 20 ᒎᑎ ᐅᓐᓄᐊᒃᑯᑦ ᕾᓚᐅᕆᕗᖅ ᐸᓛᒻᒧᑦ ᐅᖃᐅᑎᓪᓗᒍᓗ, “ᐊᖑᑎᑦ ᕾᒃᐸᑕ ᐃᓕᖕᓂᒃ ᕾᖁᔨᓗᑎᒃ, ᒪᑭᓪᓗᑎᑦ ᒪᓕᓕᒃᑭᑦ; ᐅᖃᐅᓯᕆᔭᓐᓂᒃ ᑭᓯᐊᓂ ᐃᓕᖕᓄᑦ ᐱᓇᓱᐊᕐᓂᐊᕐᐳᑎᑦ.” 21 ᑍᒤᒻᒪᑦ ᐸᓛᒻ ᐅᓪᓛᒃᑯᑦ ᒪᑭᓐᓇᒥ, ᓯᐅᑎᖅᑯᕐᑐᔪᖁᑎᓂ ᐃᑭᒪᕝᕕᖓ ᐋᖅᑭᒡᓗᒍ, ᒧᐊᐱᒥᐅᑦ ᐊᖓᔪᖅᑳᖁᑎᖏᑦ ᒪᓕᒃᐰᑦ. ᐸᓛᒻ ᓯᐅᑎᖅᑯᕐᑐᔪᖁᑎᖓᓗ 22 ᒎᑎᐅᑉ ᓂᓐᖓᐅᓯᖓ ᐆᒻᒪᓚᐅᕐᐳᖅ ᒪᓕᖕᒪᑦ, ᐊᑕᓂᐅᓪᓗ ᐂᖏᓕᖁᑎᖓ ᐊᖅᑯᑎᖓᓂ ᓇᖏᓕᕐᐳᖅ ᐊᑭᕋᕐᑐᕐᓗᒍᓗ. ᓯᐅᑎᖅᑯᕐᑐᔪᒥ ᐃᑭᒪᓪᓗᓂ ᐃᖏᕐᕋᑎᓪᓗᒍ, ᐱᔨᒥᓂᒃ ᒪᕐᕉᖕᓂᒃ ᐃᓚᖃᕐᓗᓂ. 23 ᓯᐅᑎᖅᑯᕐᑐᔫᑉ ᐊᑕᓂᐅᑉ ᐂᖏᓕᑯᑎᖓ ᐊᖅᑯᑎᖓᓂ ᓇᖏᕐᑐᖅ ᑕᑯᒐᒥᐅᒃ ᓴᕕᒡᔪᐊᒥᒃ ᑎᒍᒥᐊᕐᑐᖅ, ᓯᐅᑎᖅᑯᕐᑐᔪᖅ ᐊᒡᕖᕐᓗᓂ ᓴᖑᕗᖅ ᓄᓇᒧᑦ ᐱᕈᕐᓰᕕᖕᒧᑦ ᐂᓕᕐᓗᓂ. ᐸᓛᒻ ᓯᐅᑎᖅᑯᕐᑐᔪᖅ ᐊᓇᐅᕚ ᐊᖅᑯᑎᒧᑦ ᐅᑎᖁᓪᓗᒍ. 24 ᐊᑕᓂᐅᑉ ᐂᖏᓕᖁᑎᖓ ᐊᖅᑯᑎᒥ ᑐᐊᑦᑐᒥ ᓇᖏᓕᕐᐳᖅ ᕔᓂᒥᒃ ᐱᕈᕐᓰᕖᑦ ᐊᑯᕐᖓᓐᓂ, ᐊᕙᑖᓂ ᐊᕙᓗᕐᔪᐊᖃᕐᓗᓂ ᒫᓂ ᐃᒡᓗᐊᓂᓗ. 25 ᓯᐅᑎᖅᑯᕐᑐᔫᑉ ᐊᑕᓂᐅᑉ ᐂᖏᓕᖓ ᑕᑯᒐᒥᐅᒃ, ᐊᕙᓗᕐᔪᐊᑉ ᑭᒡᓕᖓᓄᐊᕐᐳᖅ ᐸᓛᒻ ᐃᑎᒐᖓ ᓰᒥᒃᓗᒍ ᐊᕙᓗᕐᔪᐊᕐᒧᑦ; ᑕᕝᕙ ᐊᓇᐅᒃᑲᓐᓂᕐᐹ. 26 ᐊᑕᓂᐅᑉ ᐂᖏᓕᖓ ᑖᕗᖓᒃᑲᓐᓂᕐᓗᓂ, ᐊᖅᑯᑎᒥ ᑐᐊᑦᑐᒥ ᓇᖏᕐᐳᖅ ᓴᖑᕕᖃᖏᑦᑐᒥ ᑕᓕᕐᐱᖕᒧᓪᓘᓐᓃᑦ ᓴᐅᒥᖕᒧᓪᓘᓐᓃᑦ. 27 ᓯᐅᑎᖅᑯᕐᑐᔫᑉ ᐊᑕᓂᐅᑉ ᐂᖏᓕᖓ ᑕᑯᒐᒥᐅᒃ, ᐸᓛᒻ ᐃᑭᒪᑎᓪᓗᒍ ᐊᑖᓄᑦ ᐹᒻᒪᒃᐳᖅ; ᐸᓛᒻ ᓂᓐᖓᐅᒪᓂᖓ ᐆᒻᒪᕐᐳᖅ, ᐊᔭᐅᑉᐱᐊᒥᓄᓪᓗ ᓯᐅᑎᖅᑯᕐᑐᔪᖅ ᐊᓇᐅᓪᓗᒍ. 28 ᐊᑕᓂᐅᑉ ᓯᐅᑎᖅᑯᑐᔪᑉ ᖃᓂᖓ ᒪᑐᐃᕐᐹ, ᓯᐅᑎᖅᑯᕐᑐᔪᖅ ᐸᓛᒻᒧᑦ ᐅᖃᕐᐳᖅ, “ᖃᓄᐃᓕᐅᕋᒪ ᐃᓕᖕᓄᑦ, ᐱᖓᓱᐊᕐᑎᕐᓗᖓ ᐊᓇᐅᕕᖓ?” 29 ᐸᓛᒻ ᓯᐅᑎᖅᑯᕐᑐᔪᒧᑦ ᐅᖃᕐᐳᖅ, “ᒥᑕᐅᑎᒋᒐᕕᖓ, ᓴᕕᒡᔪᐊᖃᕈᒪ ᑎᒍᒥᐊᕐᑕᓐᓂᒃ, ᒫᓐᓇ ᑐᖁᒃᑲᔭᕐᐸᒋᑦ!” 30 ᑍᒤᒻᒪᑦ ᓯᐅᑎᖅᑯᕐᑐᔪᖅ ᐸᓛᒻᒧᑦ ᐅᖃᕐᐳᖅ, “ᓯᐅᑎᖅᑯᕐᑐᔪᖁᑎᒋᓐᖏᓚᕐᒫ, ᐃᑭᒪᕝᕕᒋᖃᕐᑕᕐᓗᖓ, ᑍᒪᓐᖓᑦ ᓯᐅᑎᖅᑯᑦᑐᔪᖁᑎᒋᓕᓚᐅᕋᕕᖓ ᐅᓪᓗᒥᒧᑦ ᑎᑭᓪᓗᒍ ᑍᒤᓕᐅᓚᐅᕐᓯᒪᕗᖓ ᐃᓕᖕᓅᑦ?” ᑭᐅᕗᕐᓗ, “ᑍᒤᓕᐅᓚᐅᕐᓯᒪᓐᖏᓚᑎᑦ.” 31 ᑕᕝᕙ ᐊᑕᓂᐅᑉ ᐸᓛᒻ ᐃᔨᖏᒃ ᐅᐃᑎᑉᐹᒃ, ᑕᑯᓪᓗᓂᓗ ᐊᑕᓂᐅᑉ ᐂᖏᓕᖓᓂᒃ ᐊᖅᑯᒻᒥ ᓇᖏᕐᑐᒥᒃ ᓴᕕᒡᔪᐊᒧᑦ ᐅᕐᓕᕐᓗᓂ ᑎᒍᒥᐊᕐᑕᒥᓄᑦ; ᑕᕝᕙ ᓂᐊᖁᓂ ᐅᑯᕚ ᓄᓇᒧᓪᓗ ᐹᒻᒪᒡᓗᓂ ᑮᓇᓂ ᒪᓂᖅᑲᒧᑦ ᑐᓪᓗᒍ. 32 ᐊᑕᓂᐅᓪᓗ ᐂᖏᓕᖓᑕ ᐅᖃᐅᑎᕚ, “ᓱᖕᒪᑦ ᓯᐅᑎᖅᑯᕐᑐᔪᖁᑏᑦ ᐊᓇᐅᕕᐅᒃ ᐱᖓᓱᐊᕐᑎᕐᓗᒍ? ᑕᑯᒋᑦ ᕾᓚᐅᕐᑐᖓ ᐊᒃᕕᐊᕆᐊᕐᑐᕐᓗᖓ ᐊᖅᑯᑎᖕᓂ, ᐊᖅᑯᑎᒋᔧᑦ ᓈᓚᖏᓐᓂᐅᖕᒪᑦ ᐅᕙᓐᓂᒃ. 33 ᓯᐅᑎᖅᑯᕐᑐᔫᑉ ᑕᑯᒐᒥᖓ ᐱᖓᓱᐊᕐᑎᕐᓗᓂ ᐅᕙᓐᓂᑦ ᓴᖑᖃᑦᑕᖅᑲᐅᕗᖅ, ᐅᕙᓐᓂᑦ ᓴᖑᓇᓱᖃᑕᖃᐅᖏᑉᐸᑦ ᓱᓕᓪᓗᖓ ᒫᓐᓇ ᑐᖁᓯᒪᓕᕋᔭᕐᐸᒋᑦ ᑖᓐᓇ ᐆᒪᓗᓂ.” 34 ᑕᕝᕙ ᐸᓛᒻ ᐊᑕᓂᐅᑉ ᐂᖏᓕᖓᓄᑦ ᐅᖃᕐᐳᖅ, “ᐊᔪᕐᑐᓕᓚᐅᕐᐳᖓ, ᖃᐅᔨᒪᖅᑲᐅᖏᓐᓇᒪ ᐊᖅᑯᑎᓐᓂ ᓇᖏᕐᑐᑎᑦ ᐅᕙᓐᓄᑦ ᐊᒡᕕᐊᕐᓗᑎᑦ. ᒫᓐᓇᓕ ᖁᕕᐊᒋᖏᒃᑯᕕᖓ ᐅᑎᕐᓂᐊᕐᐳᖓ.” 35 ᐊᑕᓂᐅᓪᓕ ᐂᖏᓕᖓ ᐸᓛᒻᒧᑦ ᐅᖃᕐᐳᖅ, “ᐊᖑᑎᑦ ᐅᑯᐊ ᒪᓕᓕᑭᑦ ᐅᖃᐅᓯᕆᔭᓐᓂᒃ ᑭᓯᐊᓂ ᐅᖃᖃᑦᑕᕐᓂᐊᕐᐳᑎᑦ.” ᑍᒤᒻᒪᑦ ᐸᓛᒻ ᐰᓚᑭᐅᑉ ᐊᖓᔪᖅᑳᖁᑎᖏᑦ ᐊᐅᓪᓚᖃᑎᒋᕔᑦ. ᐹᓚᒃ ᑐᓐᖓᓱᒃᑎᑦᓯᓂᖓ ᐸᓛᒻᒥᒃ 36 ᐰᓚᒡᓕ ᑐᓴᕋᒥ ᐸᓛᒻ ᕾᓕᕐᒪᑦ, ᐸᕐᕆᐊᕐᐹ ᐃᒡᓗᒐᓴᒡᔪᐊᓄᑦ ᒧᐊᐱᒧᑦ, ᐋᕐᓄᓂᐅᑉ ᓯᓚᑖᓂᑦᑐᒧᑦ, ᓄᓇᓕᒡᔪᐊᑦ ᑭᒡᓕᖓᓃᑦᑐᒧᑦ. 37 ᐰᓚᒃ ᐸᓛᒻᒧᑦ ᐅᖃᕐᐳᖅ, “ᐊᒃᓱᕈᕐᓗᖓ ᐂᔭᐅᖁᓚᐅᓐᖏᓚᒌᑦ ᕾᖁᓪᓗᑎᑦ? ᓱᖕᒪᑦ ᐅᕙᓐᓄᑦ ᕾᓚᐅᓐᖏᓚᑎᑦ? ᐅᐱᒋᔪᓐᓇᓐᖏᓚᒌᑦ?” 38 ᐸᓛᒻ ᐰᓚᒃᒧᑦ ᐅᖃᕐᐳᖅ, “ᑕᑯᒋᑦ, ᕾᔪᖓ ᐃᓕᖕᓄᑦ ᐱᔪᓐᓇᕐᓂᖃᓐᖏᓚᖔ ᓱᓇᑐᐃᓐᓇᕐᒥᒃ ᐅᖃᕐᓗᖓ? ᐅᖃᐅᓰᑦ ᒎᑎᐅᑉ ᐅᖃᐅᓯᕆᖁᔭᖏᑦ ᐅᖃᐅᓯᕆᔭᕆᐊᖃᕐᐸᒃᑲ.” 39 ᑕᕝᕙ ᐸᓛᒻ ᐰᓚᒃ ᐱᖃᑎᒋᓪᓗᒍ ᐂᓕᕐᐴᒃ, ᑭᕆᐊᑦ-ᕼᐅᔮᑎᒧᑦ ᑎᑭᑉᐴᒃ. 40 ᑕᕝᕙᓂ ᐰᓚᒃ ᑐᓂᕐᕈᓯᕐᐳᖅ ᐃᒻᒧᒃᓯᐅᒐᕐᓂᒃ ᓰᐱᓂᒡᓗ, ᐃᓚᖏᓐᓂᒃ ᑐᓂᓯᓪᓗᓂ ᐸᓛᒻᒧᑦ ᐊᖓᔪᖅᑳᓄᓪᓗ ᐃᓚᒋᔭᖏᓐᓄᑦ. 41 ᐃᒤᓚᐅᕐᐳᖅ, ᖃᐅᑎᓪᓗᒍ, ᐰᓚᒃ ᐸᓛᒻ ᐂᖃᑎᒋᕚ ᐳᕐᑐᔪᓄᑦ ᐸᒨᑦ-ᐰᓕᒧᑦ ᑐᒃᓯᐊᕐᕕᖕᓄᑦ, ᑕᕝᕙᓐᖓᑦ ᑕᑯᔪᓐᓇᖁᓪᓗᒍ ᐃᓄᒋᐊᒃᑐᕐᔪᐊᑦ ᖃᓄᖅ ᐅᓄᕐᑎᒋᖕᒪᖔᑕ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society