ᒨᓯᓯ ᓯᑕᒪᖏᑦ 20 - ᐊᒡᓔᑦ ᐃᑦᔪᕐᖕᓁᑦᑐᑦ

ᓄᓇᒥ ᑲᑎᓯᒥᒃ ᐊᑎᖃᕐᑐᒥ ᐱᔪᖃᓚᐅᕐᑐᑦ

¹ ᑕᕝᕙ ᐃᓴᕆᐊᓕᒥᐅᑦ, ᑲᑎᒪᔪᕐᔪᐊᓪᓗ ᐃᓘᓐᓇᑎᒃ, ᑎᑭᑉᐳᑦ ᐃᓄᖃᖏᑦᑐᒧᑦ ᔨᓐᒥᒃ ᐊᑎᓕᖕᒧᑦ ᑕᖅᑮᑦ ᓯᕗᓪᓕᕐᐹᖓᓂᒃ, ᓄᖅᑲᖓᓕᕐᓗᑎᒡᓗ ᓄᓇᒥ ᑲᑎᓯᒥᒃ ᐊᑎᓕᖕᒥ; ᒥᕆᐊᒻᓕ ᑕᕝᕙᓂ ᑐᖁᓚᐅᕐᐳᖅ ᑕᕝᕙᓂᓗ ᐃᓗᕕᕐᑕᐅᓪᓗᓂ.

² ᐃᒪᖃᓚᐅᓐᖏᓚᕐᓕ ᑕᕝᕙᓂ ᐃᓄᒋᐊᒃᑐᕐᔪᐊᑦ ᐃᒥᒃᓴᖓᓂᒃ; ᑲᑎᓚᐅᕐᐳᑦ ᐊᑭᕋᕐᑐᕈᒪᓪᓗᑎᒃ ᒨᓯᓯᒥᒃ ᐂᕉᓂᒥᒡᓗ.

³ ᐃᓄᐃᓪᓕ ᐂᕙᓕᕐᐳᑦ ᒨᓯᓯᒧᑦ ᐅᖃᕐᓗᑎᒃ, “ᑍᒪᓕ ᑐᖁᖃᑕᐅᓚᐅᕈᑦᑕ ᖃᑕᓐᖑᑎᕗᑦ ᑐᖁᑎᓪᓗᒋᑦ ᐊᑕᓂᐅᑉ ᓵᖓᓂ!

⁴ ᓱᖕᒪᑦ ᐊᑕᓂᐅᑉ ᑲᑎᒪᔪᖁᑎᖏᑦ ᑕᒪᐅᖓ ᐃᓄᖃᖏᑦᑐᒧᑦ ᐱᑎᑉᐱᒋᑦ, ᐅᕙᒍᑦ ᐆᒪᔪᖁᑎᕗᓪᓗ ᑐᖁᖁᓪᓗᑕ ᑕᒫᓂ?

⁵ ᓱᖕᒪᓪᓗ ᐊᐅᓪᓚᕐᑎᓚᐅᕐᐱᑎᒍᑦ ᐄᑦᔨᑉᑎᒥᑦ ᑕᒪᐅᖓ, ᑕᒪᐅᖓ ᐱᐅᖏᑦᑐᐊᓗᖕᒧᑦ ᐱᑎᑦᓱᒪᓚᐅᕐᐱᑎᒎᑦ? ᑕᒫᓂ ᓂᐊᖂᔭᒃᓴᓂᒃ ᐱᕈᕐᑐᖃᓐᖏᓚᖅ ᐸᐅᕐᖓᓂᒡᓘᓐᓃᑦ ᕕᒡᓯᓂᒃ ᐊᑎᓕᖕᓂᒃ, ᕔᓂᒃᓴᓂᒡᓘᓐᓃ, ᐸᐅᕐᖓᓂᒡᓘᓐᓃᑦ ᐹᒥᒍᕌᓐᑎᓂᒃ ᐊᑎᓕᖕᓂᒃ; ᐃᒪᖃᕋᓂᓗ ᐃᒥᒐᒃᓴᑦᑎᓐᓂᒃ.”

⁶ ᒨᓯᓯᓕ ᐂᕉᓂᓗ ᐃᓄᖕᓂᑦ ᕿᒪᕉᑎᓪᓗᑎᒃ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ ᓇᖏᕐᐴᒃ. ᐹᒻᒪᒃᑎᕐᓗᑎᒡᓗ ᑮᓇᑎᒃ ᓄᓇᒧᑦ ᐊᒃᑐᕐᓗᒍ, ᐊᑕᓂᐅᓪᓗ ᐱᓐᓇᕐᓇᕐᓂᖓᑕ ᓴᖅᑭᕝᕕᒋᕚᒃ.

⁷ ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ,

⁸ “ᐊᔭᐅᑉᐱᐊᖅ ᑎᒍᓕᕈᒃ; ᐃᕝᕕᓪᓗ ᖃᑕᓐᖑᑏᓪᓗ ᐂᕉᓂ ᐃᓄᐃᑦ ᑲᑎᖁᓕᕐᓯᐅᒃ, ᕾᕐᑐᕐᓗ ᐅᖃᐅᑎᓗᒍ ᐃᓄᐃᑦ ᑕᒃᑯᐊᓂ, ᑕᕝᕙ ᐃᒥᕐᒥᒃ ᑯᕕᓕᕐᓂᐊᕐᐳᖅ; ᑍᒫᒃ ᐃᒥᕐᒥᒃ ᓴᖅᑭᑎᑦᓯᓂᐊᕐᐳᑎᑦ ᕾᕐᑐᒥᑦ, ᐃᒥᕐᑎᓪᓗᒋᓪᓗ ᐃᓄᐃᑦ ᐆᒪᔪᖁᑎᖏᓪᓗ.”

⁹ ᑕᕝᕙ ᒨᓯᓯᐅᑉ ᐊᔭᐅᑉᐱᐊᖅ ᑎᒍᕚ ᐊᑕᓂᐅᑉ ᓵᖓᓂᑦ ᑍᒫᒃ ᐱᖁᔭᐅᒐᒥ.

¹⁰ ᒨᓯᓯᐅᓪᓗ ᐂᕉᓂᐅᓪᓗ ᐃᓄᒋᐊᒃᑐᕐᔪᐊᑦ ᑲᑎᖁᕔᑦ ᕾᕐᑑᑉ ᓵᖓᓂ; ᐅᖃᐅᑎᓪᓗᒋᓪᓗ, “ᑐᓴᓕᕆᑦᓯ ᐊᑭᕋᕐᑐᕐᑎᐅᔪᓯ! ᐅᕙᓐᖓᑦ ᕾᕐᑐᒥᑦ ᐃᓕᑦᓯᓐᓄᑦ ᐃᒥᕐᒥᒃ ᓴᖅᑭᑎᑦᓯᔭᕆᐊᖃᕐᐱᑖ?”

¹¹ ᒨᓯᓯᐅᓪᓗ ᑕᓕᓂ ᐃᓵᒡᓗᒍ ᕾᕐᑐᖅ ᐊᓇᐅᕚ ᒪᕐᕈᐊᕐᑎᕐᓗᒍ; ᑕᕝᕙ ᐃᒪᖅ ᐊᒥᒐᖏᑦᑐᒥᒃ ᑰᓕᕐᐳᖅ, ᑕᕝᕙ ᐃᓄᒋᐊᑐᕐᔪᐊᑦ ᐆᒪᔪᖁᑎᖏᓪᓗ ᐃᒥᕐᐳᑦ.

¹² ᐊᑕᓂᐅᓪᓗ ᒨᓯᓯ ᐂᕉᓂᓗ ᐅᖃᐅᑎᕚᒃ, “ᐅᕙᓐᓂᒃ ᐅᒃᐱᕈᓱᖏᓐᓇᑦᓯᒃ, ᐅᕙᓐᓂᒡᓗ ᐃᑦᔪᕐᓁᑎᑦᓯᓚᐅᖏᓐᓇᑦᓯᒃ ᐃᓴᕆᐊᓕᒥᐅᑦ ᑕᒃᑯᐊᓂ, ᑍᒤᒻᒪᑦ ᐃᓄᒋᐊᒃᑐᕐᔪᐊ ᐅᑯᐊ ᓄᓇᒧᑦ ᐊᖏᕈᑎᒋᓯᒪᔭᓐᓄᑦ ᑎᑭᓕᕐᐸᑕ ᑕᓯᐅᕐᑎᐅᔪᒫᕈᓐᓁᕐᐳᓯᒃ.”

¹³ ᑍᒫᒃ ᐱᔪᖃᓚᐅᕐᐳᖅ ᐃᒪᕐᒥᒃ ᓄᓇᒥ ᒥᕆᐸᒥ, ᐃᓴᕆᐊᓕᒥᐅᑦ ᐂᕙᓚᐅᕐᒪᑕ ᐊᑕᓂᕐᒧᑦ, ᐃᑦᔪᕐᓁᓐᓂᕐᒥᓂᒡᓗ ᓴᖅᑭᑎᑦᓯᓚᐅᕐᒪᑦ ᑖᒃᑯᓄᖓ.

ᐄᑐᒥᒥᐅᑦ ᐊᖓᔪᖅᑳᕐᔪᐊᖓᑦᑕ ᐃᓴᕆᐊᓕᒥᐅᓂᒃ ᓄᓇᖁᑎᒥᒍᑦ ᐊᖅᑯᓵᖁᔨᖏᓐᓂᖓ

¹⁴ ᒨᓯᓯᓗ ᑎᓕᓯᕗᖅ ᐅᖃᕆᐊᕐᑐᕐᑐᓂᒃ ᓄᓇᒥᑦ ᑲᑎᓯᒥᑦ ᐄᑐᒥᒥᐅᑦ ᐊᖓᔪᖅᑳᕐᔪᐊᖓᓐᓄᑦ ᐃᒫᒃ, “ᐃᓴᕆᐊᓕᒥᐅᑦ ᖃᑕᓐᖑᑎᑎᑦ ᐃᒫᒃ ᐅᖃᕐᐳᑦ: ‘ᖃᐅᔨᒪᕗᓯ ᐅᖁᒤᑦᑐᑎᒍᑦ ᐊᑐᕐᓯᒪᒐᑦᑕ,

¹⁵ ᓯᕗᓕᕕᓂᕐᐳᑦ ᐄᑦᔨᑉᑎᒨᓚᐅᕐᒪᑕ, ᐄᑦᔨᑉᑎᒥᓗ ᐊᑯᓂ ᓄᓇᖃᓚᐅᕐᐳᒍᑦ, ᐄᑦᔨᑉᑎᒥᐅᓂᓪᓕ ᐅᖁᒤᒃᓴᕐᑎᑕᐅᓚᐅᕐᐳᒍᑦ ᓯᕗᓕᕕᓂᕐᐳᓪᓗ.

¹⁶ ᐊᑕᓂᕐᒧᓪᓕ ᓂᓪᓕᐊᒐᑦᑕ, ᓂᐱᕗᑦ ᑐᓴᓚᐅᕐᐰᑦ, ᐂᖏᓕᒥᒡᓗ ᑎᓕᓯᓪᓗᓂ ᐊᐅᓪᓚᕐᑎᓚᐅᕐᐹᑎᒍᑦ ᐄᑦᔨᑉᑎᒥᑦ; ᒫᓐᓇᓕ ᑲᑎᓯᒦᑉᐳᒍᑦ, ᐃᒡᓗᒐᓴᖕᓂ ᓄᓇᖁᑎᑦᓯ ᖃᓂᒋᔮᓂ ᓯᓚᑖᓃᑦᑐᒥ.

¹⁷ ᓄᓇᖁᑎᑦᓯᒍᑦ ᐊᖅᑯᓵᕈᓐᓇᕐᑎᓚᐅᕐᑎᒍᑦ. ᐱᕈᕐᓰᕕᖁᑎᑦᓯᒍᑦ ᓂᐊᖂᔭᒃᓴᓕᐅᕐᕕᒃᑎᒍᑦ ᕔᓂᒃᓴᓕᐅᕐᕕᒃᑎᒍᓪᓗ ᐊᖅᑯᓵᕐᓂᐊᓐᖏᓚᒍᑦ, ᐃᒥᕐᑕᕐᕕᒃᓯᓐᓂᓪᓘᓐᓂᑦ ᐃᒥᕐᓂᐊᓐᖏᓚᒍᑦ; ᐊᖓᔪᖅᑳᕐᔪᐊᑉ ᐊᖅᑯᑎᐅᖁᔭᖓᒍᑦ ᐃᖏᕐᕋᓂᐊᕐᐳᒍᑦ; ᓴᖑᓂᐊᓐᖏᓚᒍᓪᓘᓐᓂᑦ ᑕᓕᕐᐱᒧᑦ ᓴᐅᒥᒧᓪᓘᓐᓃᑦ, ᓄᓇᖁᑎᓯ ᑭᓯᐊᓂ ᖄᖏᕐᓯᒪᓕᕈᑎᑦᒍ ᓴᖑᔪᒫᕐᐳᒍᑦ.’”

¹⁸ ᐄᑐᒥᒥᐅᓪᓕ ᐅᖃᕐᐳᑦ, “ᓄᓇᖁᑎᑦᑎᒍᑦ ᐊᖅᑯᓵᕐᓂᐊᓐᖏᓚᓯ, ᑕᒪᐅᓈᕋᓱᒃᑯᑦᓯ ᑕᕝᕙ ᐅᐸᒃᑐᕐᓂᐊᕐᐳᒍᑦ ᓴᕕᒡᔪᐊᓕᔭᕐᓗᑕ.”

¹⁹ ᐃᓴᕆᐊᓕᒥᐅᓪᓕ ᑖᒃᑯᓄᖓ ᐅᖃᕐᐳᑦ, “ᐊᖅᑯᑎᒃᑯᑦ ᐃᖏᕐᕋᑐᐃᓐᓇᕈᒪᕗᒍᑦ, ᑕᒪᐅᓈᕐᑎᓪᓗᑕᓗ ᓇᓕᕐᐳᑦ ᐆᒪᔪᖁᑎᕗᓪᓘᓐᓃᑦ ᐃᒥᕐᐸᑦ ᐃᒪᑦᓯᓐᓂᑦ, ᑕᕝᕙ ᐃᓕᑦᓯᓐᓄᑦ ᐊᑭᓕᕈᒪᕙᕗᑦ; ᐱᓱᒃᓗᑕ ᐊᖅᑯᓵᕈᒪᕗᒍᑦ, ᐊᓯᐊᓂ ᐱᓇᓱᐊᖏᓪᓗᑕ.”

²⁰ ᐄᑐᒥᒥᐅᑦ ᑭᐅᕘᑦ, “ᐊᖅᑯᓵᕐᓂᐊᖏᑦᑐᓯ.” ᑍᒤᒻᒪᑦ ᐄᑐᒥᒥᐅᑦ ᐅᓇᑕᕆᐊᕐᑐᕐᓗᑎᒃ ᑖᒃᑯᓄᖓ ᐸᕐᕆᐊᕐᐳᑦ, ᐊᖑᑎᒐᓴᖕᓂᒃ ᓴᓐᖏᔪᓂᒃ ᓇᒃᓴᕐᓗᑎᒃ.

²¹ ᑍᒫᒃ ᐄᑐᒥᒥᐅᑦ ᐃᓴᕆᐊᓕᒥᐅᓂᒃ ᓄᓇᖁᑎᒥᒃᑎᒍᑦ ᐊᖅᑯᓵᖁᔨᓐᖏᓚᑦ; ᑍᒤᒻᒪᑦ ᐃᓴᕆᐊᓕᒥᐅᑦ ᑖᒃᑯᓇᖓᑦ ᑐᓄᓪᓗᑎ ᐊᓯᐊᒎᕆᐊᕐᑐᕐᐳᑦ.

ᐂᕉᓂᐅᑉ ᑐᖁᓂᖓ

²² ᐃᓴᕆᐊᓕᒥᐅᑦ ᐃᓄᒋᐊᒃᑐᕐᔫᓪᓗᑎᒃ ᐃᖏᕐᕋᓚᐅᕐᐳᑦ ᑲᑎᓯᒥᑦ ᖃᖅᑲᖅ ᕼᐅᕆ ᑎᑭᓪᓗᒍ.

²³ ᐊᑕᓂᐅᓪᓗ ᒨᓯᓯ ᐂᕉᓂᓗ ᐅᖃᕐᕕᒋᕚᒃ ᖃᖅᑲᒥ ᕼᐅᕆᒥ ᐄᑐᒥᒥᐅᑦ ᓄᓇᖓᑕ ᑭᒡᓕᖓᓃᑦᑐᒥ, ᐃᒫᒃ ᐅᖃᕐᓗᓂ:

²⁴ “ᐂᕉᓂ ᐃᓄᖁᑎᒥᓄᑦ ᑲᑎᔭᐅᔭᕆᐊᖃᕐᐳᖅ, ᓄᓇᒧᑦ ᐃᓴᕆᐊᓕᒥᐅᓄᑦ ᐊᖏᕈᑎᒋᓯᒪᔭᓐᓄᑦ ᑎᑭᓐᓂᐊᖏᒻᒪᑦ, ᑕᒪᑦᓯᒃ ᐃᕝᕕᓪᓗ ᑖᓐᓇᓗ ᐱᖁᔭᓐᓂᒃ ᓈᓚᓚᐅᖏᓐᓇᑦᓯᒃ ᒥᕆᐸᒥ ᐃᒥᕐᑎᑕᐅᕕᖕᒥ.

²⁵ ᐂᕉᓂ ᐃᕐᓂᖓᓗ ᐃᓕᓯᕆ ᖃᖅᑲᒧᑦ ᕼᐅᕆᒧᑦ ᒪᔪᕋᖃᑎᒋᒃᑭᒃ;

²⁶ ᐂᕉᓂᓗ ᐊᓐᓄᕌᖏᓐᓂᒃ ᐱᔧᕕᒋᒍᒃ, ᐃᕐᓂᖓᓄᓪᓗ ᐃᓕᓯᕆᒧ ᐊᑎᑎᓪᓗᒋᑦ: ᐂᕉᓂᓕ ᐃᓅᖃᑎᒥᓂᒃ ᑲᑎᓯᓂᐊᕐᐳᖅ ᑕᕝᕙᓂ ᑐᖁᓂᐊᕐᒪᑦ.”

²⁷ ᑕᕝᕙ ᒨᓯᓯ ᐱᓂᐊᓚᐅᕐᐳᖅ ᐊᑕᓂᐅᑉ ᐱᖁᔨᓂᖓᓂᒃ, ᑖᒃᑯᐊ ᖃᖅᑲᒧᑦ ᕼᐅᕆᒧᑦ ᒪᔪᕋᕐᐳᑦ ᐃᓄᒋᐊᒃᑐᕐᔪᐊᑦ ᑕᒃᑯᐊᓂ.

²⁸ ᒨᓯᓯᐅᓪᓗ ᐂᕉᓂᐅᑉ ᐊᓐᓄᕌᖏᑦ ᐲᔭᕐᐰᑦ, ᐃᕐᓂᖓᓄᓪᓗ ᐃᓕᓯᕆᒧᑦ ᐊᑎᑎᓪᓗᒋᑦ; ᐂᕉᓂᓗ ᑐᖁᕗᖅ ᑕᕝᕙᓂ ᖃᖅᑲᐅᑉ ᖄᖓᓂ. ᑕᕝᕙ ᒨᓯᓯ ᐃᓕᓯᕆᓗ ᖃᖅᑲᒥᑦ ᐊᖅᑲᕐᐴᒃ.

²⁹ ᐃᓄᒋᐊᒃᑐᕐᔪᐊᓪᓕ ᖃᐅᔨᒐᒥᒃ ᐂᕉᓂ ᑐᖁᖕᒪᑦ ᕿᒃᓵᓚᐅᕐᐳᑦ ᐅᓪᓗᓂᒃ 30ᓂᒃ, ᐃᓴᕆᐊᓕᒥᐅᓕᒫᑦ.