ᒨᓯᓯ ᓯᑕᒪᖏᑦ 19 - ᐊᒡᓔᑦ ᐃᑦᔪᕐᖕᓁᑦᑐᑦ

ᓴᓗᒻᒪᕐᑕᐅᓂᕐᒧᑦ ᐱᖁᔧᑦ

¹ ᐊᑕᓂᕐᓕ ᒨᓯᓯᒧᑦ ᐂᕉᓂᒧᓪᓗ ᐅᖃᕐᐳᖅ, ᐅᖃᕐᓗᓂ,

² “ᐅᓇ ᐱᖁᔭᖅ ᐊᑕᓂᐅᑉ ᒪᓕᒃᑕᐅᖁᔭᖓ ᐅᖃᕐᒪᑦ: ‘ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐃᓕᖕᓄᑦ ᕾᑦᓯᖁᓪᓗᒋᑦ ᐃᒻᒧᒃᓯᐅᒐᕐᒥᒃ ᐊᕐᓇᓪᓗᕐᒥᒃ ᐃᓐᓇᐅᖏᑦᑐᒥᒃ ᓴᓗᒤᓐᓂᖃᖏᑦᑐᒥᒃ, ᖃᓄᐃᑦᔪᑎᖃᖏᑦᑐᒥᒃ ᓱᓇᒥᒡᓗ ᐱᓇᓱᐊᕐᑎᑕᐅᓚᐅᕐᓯᒪᖏᑦᑐᒥᒃ.

³ ᑐᓂᕐᕈᓯᕐᑎᑦᓯᔨᒧᑦ ᐃᓕᓯᕆᒧᑦ ᑐᓂᓗᒍ, ᑕᖕᒫᕐᓯᒪᕕᐅᑉ ᓯᓚᑖᓄᑦ ᐂᑦᔪᑎᓂᐊᕐᒪᒍ, ᑖᕙᓂᓗ ᑐᖁᓪᓗᓂᐅᒃ;

⁴ ᑐᓂᕐᕈᓯᕐᑎᑦᓯᔨᐅᑉ ᐃᓕᓯᕆᐅᑉ ᑐᓂᕐᕈᑎᐅᔫᑉ ᐊᐅᖓᑕ ᐃᓚᖓ ᐊᒡᒐᖕᒥᓄᑦ ᖃᓗᓗᒍ, ᓯᕐᐸᕐᓴᕈᑎᓗᒍᓗ 7ᐃᑐᕐᓗᓂ ᑐᐱᕐᔪᐊᑉ ᑲᑎᒪᕕᐅᑉ ᓵᓪᓗᐊᖓᓃᓪᓗᓂ.

⁵ ᐃᒻᒧᒃᓯᐅᒐᖅ ᐊᕐᓇᓪᓗᒃ ᐃᑭᑕᐅᓂᐊᕐᐳᖅ ᐃᓕᓯᕆᐅᑉ ᓵᖓᓂ: ᐊᒥᖓᓗ, ᓂᕿᖓᓗ, ᐊᐅᖓᓗ, ᐊᒥᐊᒃᑯᓕᒫᖏᓪᓗ ᐃᑯᐊᓪᓚᖕᒥᓗᒋᑦ.

⁶ ᑐᓂᕐᕈᓯᕐᑎᑦᓯᔨ ᑎᒍᓯᔭᕆᐊᖃᕐᐳᖅ ᕿᔪᕐᒥᒃ ᓰᑕᕆᒥᒃ ᐊᑎᖃᕐᑐᒥᒃ ᕼᐊᓯᑉᒥᒡᓗ, ᓰᐱᐅᓪᓗ ᒥᖅᑯᖓᓂᒃ ᐊᐅᑉᐸᕆᒃᑐᒥᒃ, ᐃᒋᓪᓗᒋᓪᓗ ᐃᑯᐊᓚᔫᑉ ᐊᕐᓇᓪᓘᑉ ᐃᒻᒧᒃᓯᐅᒐᐅᑉ ᐊᑯᓐᓂᖓᓄᑦ.

⁷ ᑐᓂᕐᕈᓯᕐᑎᑦᓯᔨᐅᓪᓗ ᐊᓐᓄᕌᓂ ᐅᐊᓴᕆᐊᖃᕐᐰᑦ, ᐅᕕᓂᖕᓂᐊᕐᓗᓂᓗ, ᑭᖑᓂᖓᒍᑦ ᑕᖕᒫᕐᓯᒪᕕᖕᒧᑦ ᐅᑎᕐᓗᓂ; ᑐᓂᕐᕈᓯᕐᑎᑦᓯᔨᓗ ᑖᓐᓇ ᓴᓗᒤᓐᓂᕋᕐᑕᐅᓂᐊᕐᐳᖅ ᐅᓐᓄᒃ ᑎᑭᓪᓗᒍ.

⁸ ᑖᑦᓱᒥᖓ ᐃᑭᑦᓯᔪᖅ ᐊᓐᓄᕌᓂ ᐃᒥᕐᒧᑦ ᐅᐊᓴᕆᐊᖃᕐᐰᑦ, ᐃᒥᕐᒧᓪᓗ ᐅᕕᓂᖕᓂᐊᕐᓗᓂ, ᓴᓗᒤᑦᑑᓂᐊᕐᐳᕐᓗ ᐅᓐᓄᒃ ᑎᑭᓪᓗᒍ.

⁹ ᐊᖑᑎᐅᓪᓕ ᓴᓗᒤᓕᓯᒪᖏᑦᑑᑉ ᐊᕐᓇᓪᓘᑉ ᐃᒻᒧᒃᓯᐅᒐᐅᑉ ᐊᕐᔭᓕᓂᖏᑦ ᓄᐊᒋᐊᖃᕐᐰᑦ, ᐃᓕᓗᒋᓪᓗ ᓴᓗᒪᓂᕋᕐᑕᐅᔪᒧᑦ ᑕᖕᒫᕐᓯᒪᕕᐅᑉ ᓯᓚᑖᓂ, ᑍᑲᓂ ᐃᓂᖃᕐᑎᑕᐅᔭᕆᐊᖃᕐᐳᖅ ᑲᑎᒪᔪᕐᔪᐊᑦ ᐃᓴᕆᐊᓕᒥᐅᑦ ᐱᑦᔪᑎᒋᓗᒋᑦ ᐃᒥᕐᒧᑦ ᓴᓗᒻᒪᕐᓴᐅᑕᐅᓗᓂ; ᐊᔪᕐᓂᐅᑉ ᓴᓗᒪᑦᓯᐊᓕᕈᑎᒃᓴᖓᓄᑦ.

¹⁰ ᓇᓪᓕᐊᑦ ᐊᕐᓇᓪᓘᑉ ᐃᒻᒧᒃᓯᐅᒐᐅᑉ ᐊᕐᔭᓕᓂᖏᓐᓂᒃ ᓄᐊᑦᓯᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ, ᓴᓗᒤᓐᓂᕋᕐᑕᐅᓗᓂᓗ ᐅᓐᓄᒃ ᑎᑭᓪᓗᒍ. ᑕᒪᓐᓇ ᐃᓴᕆᐊᓕᒥᐅᓄᑦ ᓄᓇᖃᑎᒋᓐᖏᑕᖏᓐᓄᓪᓗ ᑖᒃᑯᓇᓂ ᐃᓂᖃᕐᑐᓄᑦ ᒪᓕᒐᐅᓂᐊᕐᐳᖅ ᐃᓱᖃᖏᑦᑐᒧᑦ.’”

ᑐᖁᖓᔪᒥᒃ ᐊᒃᑐᕐᓯᓂᖅ

¹¹ “ᓇᓪᓕᐊᑦ ᐃᓅᑉ ᑎᒥᖓᓂᒃ ᑐᖁᖓᔪᒥᒃ ᐊᒃᑐᕐᓯᔪᖅ ᓴᓗᒤᑦᑑᓂᕋᑕᐅᓂᐊᕐᐳᖅ ᐅᓪᓗᓂᒃ 7ᓂᒃ.

¹² ᐃᒻᒥᓂᒃ ᐃᒥᕐᒧᑦ ᓴᓗᒻᒪᕐᓴᕆᐊᖃᕐᐳᖅ ᐅᓪᓗᐃᑦ ᐱᖓᔪᐊᓐᓂᒃ ᐅᓪᓗᐃᓪᓗ 7ᖓᓂᒃ; ᑕᕝᕙ ᓴᓗᒻᒪᕐᓂᐊᕐᐳᖅ, ᐅᓪᓘᑉ ᐱᖓᔪᐊᓐᓂ ᐅᓪᓘᓪᓗ 7ᖓᓂ ᓴᓗᒻᒪᕐᓴᖏᑉᐸᑦ, ᓴᓗᒻᒪᕐᓂᐊᓐᖏᓚᖅ.

¹³ ᓇᓪᓕᐊᑦ ᑭᓇᑐᐃᓐᓇᕐᒥᒃ ᑐᖁᔪᒥᒃ ᐊᒃᑐᕐᓯᔪᖅ, ᐃᒻᒥᓂᒡᓗ ᓴᓗᒻᒪᕐᓴᖏᓪᓗᓂ, ᐊᑕᓂᐅᑉ ᑐᐱᕐᔪᐊᖓᓂᒃ ᓴᓗᒤᓕᑎᑦᓯᕗᖅ. ᑖᓐᓇᓗ ᐃᓴᕆᐊᓕᒥᐅᓂᑦ ᐊᕕᑕᐅᔭᕆᐊᖃᕐᐳᖅ. ᓴᓗᒤᑦᑑᓂᐊᕐᒪᑦ, ᐃᒥᖅ ᓴᓗᒻᒪᕐᓮᑦᔪᑎ ᓯᕐᐸᕐᓴᕐᑕᐅᓚᐅᖏᒻᒪᖅ ᑖᑦᓱᒧᖓ; ᓴᓗᒤᓐᓂᖓ ᓱᓕ ᑖᑦᓱᒪᓃᒻᒪᑦ.

¹⁴ “ᑕᕝᕙ ᑍᒫᒃ ᐱᖁᔭᖅ ᐃᓄᒃ ᑐᐱᕐᒥᓂ ᑐᖁᒃᐸᑦ: ᑐᐱᕐᒧᑦ ᐃᑎᕐᑐᓕᒫᑦ ᑐᐱᕐᒦᑦᑐᓕᒫᓪᓗ ᓴᓗᒤᑦᑑᓂᐊᕐᐳᑦ ᐅᓪᓗᓂᒃ 7ᓂᒃ.

¹⁵ ᐃᓗᓕᖁᑎᓕᒫᓪᓗ ᒪᑐᐃᖓᔪᑦ, ᐊᑦᓱᖏᕐᓯᒪᓗᑎᒃ ᒪᑐᓯᒪᖏᑦᑐᑦ, ᓴᓗᒤᑦᑑᕗᑦ.

¹⁶ ᓇᓪᓕᐊᓪᓘᓐᓃᑦ ᓇᑎᕐᓇᒥ ᓴᕕᒡᔪᐊᒧᑦ ᑐᖁᑕᐅᔪᒥᒃ ᐊᒃᑐᕐᓯᔪᖅ ᑐᖁᔪᒥᒡᓘᓐᓂᑦ, ᐃᓅᓪᓘᓐᓃᑦ ᓴᐅᓂᖓᓂᒃ, ᐃᓗᕕᕐᒥᒡᓘᓐᓃᑦ, ᓴᓗᒤᑦᑑᓂᐊᕐᐳᖅ ᐅᓪᓗᓂᒃ 7ᓂᒃ.

¹⁷ “ᐃᓄᒃ ᓴᓗᒤᓕᓯᒪᔪᖅ ᐱᓪᓗᒍ, ᐃᒻᒧᒃᓯᐅᒐᐅᑉ ᐊᕐᓇᓪᓘᑉ ᐃᒥᕐᒧᑦ ᓴᓗᒻᒪᕐᓴᐅᑎᒃᓴᐅᓗᓂ ᐊᔪᕐᓂᕐᒧᑦ ᐃᑯᐊᓚᑎᑕᐅᓯᒪᔫᑉ, ᐊᕐᔭᓕᓂᖏᑕ ᐃᓚᖏᓐᓂᒃ ᐱᔭᕆᐊᖃᕐᐳᑦ, ᐃᒥᕐᒥᒃ ᑯᕕᔪᒥᒃ ᐊᖅᑯᓵᕐᕕᒋᓗᒋᑦ ᐃᓗᓕᖃᕐᑐᒧᑦ ᑯᕕᑎᓪᓗᒍ.

¹⁸ ᐃᓄᒃ ᓴᓗᒤᓕᓯᒪᖏᑦᑐᖅ ᕼᐊᓯᑉᒥᒃ ᑎᒍᓯᓗᓂ ᐃᒥᕐᒧᑦ ᑕᕝᕗᖓ ᒥᓱᒡᓗᒍ, ᑐᐱᖅ ᓯᕐᐸᕐᓴᕆᐊᖃᕐᐹ, ᐃᓗᓕᖁᑎᓕᒫᖏᓪᓗ, ᐃᓄᐃᓪᓗ ᑐᐱᕐᒦᑦᑐᕕᓂᓕᒫᑦ, ᐅᕝᕙᓘᓐᓃᑦ ᓇᓪᓕᐊᑦ ᓴᐅᓂᕕᓂᕐᒥᒃ ᐊᒃᑐᕐᓯᓚᐅᕐᑐᒧᑦ, ᑐᖁᑕᕕᓂᕐᒥᒡᓘᓐᓃᑦ, ᑐᖁᖓᔪᒥᒡᓘᓐᓃᑦ, ᐃᓗᕕᕐᒥᒡᓘᓐᓃᑦ ᐊᒃᑐᕐᓯᓚᐅᕐᑐᒧᑦ.

¹⁹ ᐃᓄᒃ ᓴᓗᒤᓕᓯᒪᖏᑦᑐᖅ ᓴᓗᒤᑦᑐᒥᒃ ᓯᕐᐸᕐᓴᕐᓯᔭᕆᐊᖃᕐᐳᖅ ᐅᓪᓗᐃᑦ ᐱᖓᔪᐊᓐᓂᒃ ᐅᓪᓗᐃᓪᓗ 7ᖓᓂᒃ; ᐅᓪᓗᐃᓪᓕ 7ᖓᓂ ᐃᓄᒃ ᓴᓗᒻᒪᕐᓴᕐᑕᐅᔪᖅ ᓇᖕᒥᓂᖅ ᓴᓗᒻᒪᕐᓴᕆᐊᖃᓕᕐᐳᖅ, ᐊᓐᓄᕌᓂ ᐅᐊᓴᕐᓗᒋᑦ, ᐃᒥᕐᒧᓪᓗ ᐅᕕᓂᖕᓂᐊᕐᓗᓂ; ᐅᓐᓄᒃᐸᑦ ᓴᓗᒻᒪᕐᓂᐊᕐᐳᖅ.

²⁰ “ᐃᓄᒡᓕ ᓴᓗᒤᑦᑐᖅ ᐃᒻᒥᓂᒡᓗ ᓴᓗᒻᒪᕐᓴᖏᓪᓗᓂ, ᐃᓅᖃᑎᒌᒡᔪᐊᓂᑦ ᐊᕕᑕᐅᔭᕆᐊᖃᕐᐳᖅ, ᐊᑕᓂᐅᑉ ᐃᑦᔪᕐᓁᑦᑐᕕᖁᑎᖓᓂᒃ ᓴᓗᒤᓕᑎᑦᓯᖕᒪᑦ. ᐃᒥᖅ ᓴᓗᒻᒪᕐᓴᐅᑎᓕᐊᕆᓯᒪᔪᖅ ᓯᕐᐸᕐᓴᕈᑕᐅᓯᒪᖏᒻᒪᑦ ᑖᑦᓱᒧᖓ; ᑍᒫᒃ ᓴᓗᒤᑦᑑᕗᖅ.

²¹ ᑕᒪᓐᓇ ᑍᒪᓐᖓᑦ ᒪᓕᒐᐅᓂᐊᕐᐳᖅ ᑖᒃᑯᓄᖓ. ᓇᓪᓕᐊᓪᓗ ᐃᒥᕐᒥᒃ ᓴᓗᒻᒪᕐᓮᑦᔪᑎᒥᒃ ᓯᕐᐸᕐᓮᔪᖅ ᐊᓐᓄᕌᓂ ᐅᐊᓴᕆᐊᖃᕐᐰᑦ; ᓇᓪᓕᐊᓪᓗ ᐃᒥᕐᒥᒃ ᓴᓗᒻᒪᕐᓮᑦᔪᑎᒥᒃ ᐊᒃᑐᕐᓯᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.

²² ᓇᓪᓕᐊᑦ ᓴᓗᒤᓕᓯᒪᔪᖅ ᓱᓇᑐᐃᓐᓁᑦ ᐊᒃᑐᕐᑕᖏᑦ ᓴᓗᒤᕐᑑᓕᕐᐳᑦ; ᓇᓪᓕᐊᑦᓗ ᐊᒃᑐᕐᑕᕕᓂᖏᓐᓂᒃ ᐊᒃᑐᕐᓯᔪᖅ ᓴᓗᒤᑦᑑᓂᐊᕐᐳᖅ ᐅᓐᓄᒃ ᑎᑭᓪᓗᒍ.”