ᒨᓯᓯ ᓯᑕᒪᖏᑦ 18 - ᐊᒡᓔᑦ ᐃᑦᔪᕐᖕᓁᑦᑐᑦ

ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ ᐱᔭᒃᓴᖏᑦ

¹ ᐊᑕᓂᕐᓗ ᐅᖃᕐᐳᖅ ᐂᕉᓂᒧᑦ: “ᐃᕝᕕᑦ ᐃᕐᓂᑎᓪᓗ ᑭᖑᕚᖑᖃᑎᑎᓪᓗ ᐸᓯᔭᒃᓴᐅᕗᓯ ᐃᑦᔪᕐᓁᑦᑐᕕᐅᑉ ᓇᓛᓄᑦ ᐱᐅᖏᑦᑐᓕᑦᔪᑕᐅᔪᓂᒃ, ᐃᕝᕕᓪᓗ ᐃᕐᓂᑎᓪᓗ ᐸᓯᔭᒃᓴᐅᕗᓯ ᑐᓂᕐᕈᓯᕐᑎᑦᓯᔨᐅᓂᑦᓯᓐᓄᑦ ᐱᐅᖏᑦᑐᓕᓂᕐᓂᒃ.

² ᕾᖃᑎᒋᓗᒋᑦ ᖃᑕᓐᖑᑎᓯ ᓕᕔᑉ ᑭᖑᕚᖏᑦ, ᓯᕗᓕᕕᓂᕐᐱᑦ ᑭᖑᕚᖏᑦ, ᐃᓕᑦᓯᓐᓂᒃ ᐱᔨᑦᓯᕐᓂᐊᕐᒪᑕ ᐃᒃᓯᕐᕕᐅᑉ ᐊᖏᕈᑎᑕᓕᐅᑉ ᓵᖓᓂ ᐱᓕᕆᑎᓪᓗᓯ.

³ ᐱᔭᕆᐊᖃᕐᑕᑦᓯᓐᓂᒃ ᐱᔨᑦᓯᖃᕐᑕᕐᓂᐊᕐᐹᓯ ᑐᐱᕐᔪᐊᒥᓗ ᐱᔭᕆᐊᓕᓕᒫᓂᒃ; ᐃᑦᔪᕐᓁᑦᑐᕕᐅᓪᓕ ᓱᓇᑐᐃᓐᓇᖏᓐᓄᑦ ᑐᓂᕐᕈᓯᕐᕕᖕᒧᓪᓘᓐᓃᑦ ᖃᒡᓕᔪᒃᓴᐅᓐᖏᓚᑦ, ᑐᖁᖁᓇᒋᑦ ᑍᒃᑯᐊᓗ ᐃᓕᑦᓯᓗ.

⁴ ᑲᑎᖃᑦᑕᕐᓂᐊᕐᐹᓯ ᐃᓚᒋᓗᒋᑦ ᑐᐱᕐᔪᐊᒥ ᑲᑎᒪᕕᖕᒥ ᐱᔭᕆᐊᓕᖕᓂᒃ ᐱᓇᓱᐊᖃᑎᒋᖃᑦᑕᕐᓂᐊᕋᑦᓯᐅᒃ, ᑐᐱᕐᔪᐊᒥ ᐱᔭᕆᐊᓕᓕᒫᓂᒃ; ᐃᓚᒋᓐᖏᑕᓯᓕ ᓯᓚᑖᓂᑦ ᐱᔫᑉ ᖃᓂᒋᔭᕆᐊᖃᓐᖏᓛᓯ.

⁵ ᐃᓕᑦᓯᓕ ᐃᑦᔪᕐᓁᑦᑐᕕᖕᒥ ᐱᔭᕆᐊᓕᖕᓂᒃ ᐱᓕᕆᔭᕆᐊᖃᕐᐳᓯ ᑐᓂᕐᕈᓯᕐᕕᖕᒥᓗ ᐱᔭᕆᐊᓕᖕᓂᒃ, ᐃᓴᕆᐊᓕᒥᐅᑦ ᓇᓪᓕᐊᓪᓘᓐᓃᑦ ᓂᓐᖓᐅᑦᔭᐅᒃᑲᓐᓂᖁᓇᒍ.

⁶ ᑕᑯᒋᑦ, ᐅᕙᖓ ᓇᖕᒥᓂᖅ ᖃᑕᓐᖑᑎᓯ ᓕᕔᑎᒃᑯᑦ ᓂᕈᐊᓚᐅᕐᐸᒃᑲ ᐃᓴᕆᐊᓕᒥᐅᑦ ᐊᑯᕐᖓᓐᓂᑦ; ᐃᓕᑦᓯᓐᓄᑦ ᑐᓂᕐᕈᑕᐅᕗᑦ ᐊᑕᓂᐅᑉ ᑐᓂᔭᖏᑦ, ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕐᑎᐅᖁᓪᓗᒋᑦ.

⁷ ᑍᒤᒻᒪᑦ ᐃᕝᕕᑦ, ᐃᕐᓂᑎᓪᓗ ᐃᓚᒋᓗᒋᑦ ᑐᓂᕐᕈᓯᕐᑎᑦᓯᔨᐅᓂᐊᕐᐳᓯ ᑐᓂᕐᕈᓯᕐᕕᖕᒥ ᖃᓄᐃᓕᐅᕆᐊᖃᕐᑐᓕᒫᓂᒃ ᑖᓗᑕᕐᔪᐊᓪᓗ ᐅᖓᑖᓃᑦᑐᓂᒃ; ᑍᒫᒃ ᐱᔨᑦᓯᕐᓂᐊᕐᐳᓯ. ᑐᓂᕐᕈᓯᕐᑎᑦᓯᔨᐅᓂᖅ ᐃᓕᑦᓯᓐᓄᑦ ᑐᓂᕐᕈᑎᒋᕙᕋ ᐱᔨᑦᓯᕈᑎᒋᓂᐊᕋᑦᓯᐅᒃ, ᓯᓚᑎᑦᓯᓐᓂᓪᓕ ᐱᔪᖅ ᐃᓕᑦᓯᓐᓄᑦ ᖃᒡᓕᔪᖅ ᑐᖁᑕᒃᓴᐅᕗᖅ.”

ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ ᑐᓂᕐᕈᓯᐅᑎᔭᕆᐊᖃᕐᑕᖏᑦ

⁸ ᐊᑕᓂᐅᓪᓗ ᐂᕉᓂ ᐅᖃᕐᕕᒋᕚ, “ᐅᕙᖓ ᓇᖕᒥᓂᖅ ᑐᓂᓯᕕᒋᕙᑦᓯ ᐊᖓᔪᖅᑳᖑᖁᓪᓗᓯ ᑐᓂᕐᕈᓯᕐᓂᕐᒧᑦ ᐃᓵᒃᑕᕈᑎᒧᑦ, ᐃᑦᔪᕐᓁᑦᑐᓕᒫᓂᒡᓗ ᐃᓴᕆᐊᓕᒥᐅᑦ ᑐᓂᕐᕈᑎᒋᕙᒃᑕᖏᓐᓄᑦ; ᑐᓂᓯᕕᒋᕙᑦᓯ ᐃᓕᖕᓄᑦ ᐃᕐᓂᕐᓄᓪᓗ, ᑍᒪᓐᖓᓕᒫᖅ ᑕᒪᓐᓇ ᒪᓕᒐᐅᖁᓪᓗᒍ.

⁹ ᑕᒪᓐᓇ ᐃᓕᑦᓯ ᐱᒋᓂᐊᕐᑕᓯ ᐃᑦᔪᕐᓁᓐᓂᕐᐹᓂᒃ ᐃᑯᒪᒧᑦ ᑐᓂᕐᕈᑕᐅᖏᑦᑐᓂᒃ ᑲᒪᔨᐅᓂᖅ: ᑍᒃᑯᐊᓕᒫᑦ ᑐᓂᕐᕈᑎᖏᓐᓂᒃ, ᓂᐊᖂᔭᒃᓴᓂᒡᓗ ᐊᔪᕐᓂᕐᓗ ᐱᓪᓗᒍ ᑐᓂᕐᕈᑕᐅᔪᓂᒃ ᐸᓯᔭᒃᓴᐅᓂᕐᒧᓪᓗ ᐊᑭᓕᐅᑎᒃᓴᒧᑦ ᑐᓂᕐᕈᑕᐅᔪᓂᒃ ᐅᕙᓐᓄᑦ ᑐᓂᔭᖏᓐᓂᒃ. ᑖᒃᑯᐊ ᐃᑦᔪᕐᓁᓐᓂᕐᐹᖑᓂᐊᕐᐳᑦ ᐃᓕᑦᓯᓐᓄᑦ.

¹⁰ ᐃᑦᔪᕐᓁᓐᓂᕐᐹᒥ ᓂᕆᔭᕆᐊᖃᕐᐳᓯ; ᐊᖑᑎᓕᒫᑦ ᓂᕆᔭᕆᐊᖃᕐᐳᑦ. ᑕᒪᓐᓇ ᐃᓕᑦᓯᓐᓄᑦ ᐃᑦᔪᕐᓁᑦᑑᖕᒪᑦ.

¹¹ “ᐅᕝᕙᑦᑕᐅᖅ ᐃᓕᑦᓯ ᐱᒋᓂᐊᕐᒥᔭᓯ: ᐃᓵᒃᑕᕈᑦᔭᐅᓗᑎᒃ ᑐᓂᕐᕈᑎᕕᓃᑦ ᐃᓄᐃᑦ ᑐᓂᕐᕈᑎᕕᓂᖏᑦ, ᐃᓚᖃᕐᓗᑎᒃ ᐃᓴᕆᐊᓕᒥᐅᓂᑦ ᐃᓵᒃᑕᕈᑦᔭᐅᓗᑎᒃ ᑐᓂᕐᕈᑎᕕᓂᖏᓐᓂᒃ; ᐃᓕᖕᓄᑦ ᑖᒃᑯᐊ ᑐᓂᓯᒪᕙᒃᑲ ᐃᕐᓂᑎᑦ ᐸᓂᑎᓪᓗ ᑐᓂᖃᓯᐅᑎᓪᓗᒋ ᑕᒪᒃᑯᓂᖓ, ᑍᒪᓐᖓᓕᒫᖅ ᑕᒪᓐᓇ ᒪᓕᒐᐅᖁᓪᓗᒍ. ᑐᒃᓯᐊᕐᓂᑯᑦ ᓴᓗᒻᒪᕐᓯᒪᔪᓕᒫᑦ ᐃᓚᒌᖕᓂᑦᓯᓐᓂ ᐱᔪᑦ ᓂᕆᖃᑕᐅᔪᓐᓇᕐᐳᑦ.

¹² “ᐅᕐᓱᐃᑦ ᐱᐅᓂᕐᐹᑦ ᑕᒪᕐᒥᒃ, ᕔᓃᓪᓗ ᐱᐅᓂᕐᐹᑦ ᓂᐊᖂᔭᒃᓮᓪᓗ ᑕᒪᕐᒥᒃ, ᐱᕈᕐᑎᑕᐅᔪᑦ ᓯᕗᓪᓕᕐᐹᑦ ᐊᑕᓂᕐᒧᑦ ᑐᓂᕐᕈᑎᒋᔭᖏᑦ, ᐃᓕᖕᓄᑦ ᑐᓂᕙᒃᑲ.

¹³ ᐸᐅᕐᖎᑦ ᐱᕈᑦᓯᐊᕐᑐᑦ ᓯᕗᓪᓕᕐᐹᑦ ᐱᕈᕐᑐᑦ ᓄᓇᖁᑎᖏᓐᓂᑦ, ᐊᑕᓂᕐᒧᑦ ᑐᓂᕐᕈᑎᒋᔭᖏᑦ, ᐃᕝᕕᑦ ᐱᑖᕆᓂᐊᕐᐸᑎᑦ. ᑕᒪᒃᑯᐊᓕᒫᑦ ᑐᒃᓯᐊᕐᓂᒃᑯᑦ ᓴᓗᒪᔪᑦ ᐃᓚᒌᖕᓂᑦᓯᓐᓂᑦ ᐱᔪᑦ ᓂᕆᖃᑕᐅᔪᓐᓇᕐᐳᑦ.

¹⁴ “ᓱᓇᑐᐃᓐᓁᑦ ᐃᓴᕆᐊᓕᒥᐅᓂᑦ ᐃᑦᔪᕐᓁᑎᑕᐅᔪᑦ ᐱᒋᔭᕆᐊᖃᕐᐸᑎᑦ.

¹⁵ “ᓱᓇᑐᐃᓐᓁᑦ ᐃᕐᓂᐊᕆᔭᐅᖅᑳᕐᑐᑦ ᑎᒥᖃᕐᑐᓕᒫᓄᑦ ᐊᑕᓂᕐᒧᑦ ᑐᓂᔭᐅᔭᕆᐊᖃᕐᐳᑦ, ᐊᑕᓂᕐᒧᑦ ᕾᑦᔪᑎᓗᒋᑦ, ᐃᓅᒃᐸᓪᓘᓐᓃᑦ ᓂᕐᔪᑎᐅᒃᐸᓪᓘᓐᓃᑦ, ᐃᕝᕕᑦ ᐱᒋᔭᕆᐊᖃᕐᐸᑎᑦ; ᑭᓯᐊᓂᓕ ᐃᓄᒃ ᐊᖑᑕᐅᓗᓂ ᐃᕐᓂᐊᕆᔭᐅᖅᑳᕐᐸᑦ ᐅᑎᕐᑎᑕᐅᓪᓚᕆᒋᐊᖃᕐᐳᖅ, ᐃᕐᓂᐊᖑᖅᑳᕐᑐᖅ ᓂᕐᔪᑎ ᓴᓗᒤᑦᑑᒃᐸᑦ ᐅᑎᕐᑎᓴᕆᐊᖃᕐᐸᑦ.

¹⁶ ᐅᑎᕐᑎᑕᒃᓮᑦ ᐅᑎᕐᑎᑦᓴᕆᐊᖃᕐᐸᓯ ᑕᖅᑭᖅ ᐊᑕᐅᓯᖅ ᐊᓂᒍᕐᐸᑦ, ᐊᑭᖃᕐᑎᑦᓯᓃᑦ ᒪᓕᒡᓗᒍ, ᑮᓇᐅᔭᓂᒃ ᓯᐅᓪᕕᕆᓂᒃ ᑕᓪᓕᒪᓂᒃ ᓴᑯᓪᓂᒃ ᑐᐱᕐᔪᐊᑉ ᓴᑯᓪᖏᑦ ᒪᓕᒡᓗᒋᑦ, ᐊᑭᖃᓪᓗᐊᕐᓗᒋᑦ 20ᒋᕋᓂᒃ.

¹⁷ ᐃᒻᒧᒃᓯᐅᒐᐅᑉ ᐃᕐᓂᐊᕆᖅᑳᕐᑕᖏᑦ, ᓰᐲᓪᓗ ᐃᕐᓂᐊᕆᖅᑳᕐᑕᖏᑦ ᒎᑦᓰᓪᓗ ᐃᕐᓂᐊᕆᖅᑳᕐᑕᖏᑦ ᐅᑎᕐᑎᑦᓴᕆᐊᖃᓐᖏᓚᓯ; ᐃᑦᔪᕐᓁᑦᑑᖕᒪᑕ. ᐊᐅᖏᑦ ᓯᕐᐸᕐᓴᕈᑎᔭᕆᐊᖃᕐᐸᓯ ᑐᓂᕐᕈᓯᕐᕕᖕᒧᑦ, ᑐᓐᓄᖏᓪᓗ ᐃᑯᐊᓪᓚᒃᑎᓪᓗᒋᑦ ᐃᑯᐊᓚᑎᑕᒃᓴᑎᑐᑦ ᑐᓂᕐᕈᑎᑎᑐᑦ ᐊᑕᓂᕐᒧᑦ ᑎᐱᑦᓯᐊᕆᒃᑑᖁᓪᓗᒋᑦ.

¹⁸ ᓂᕿᖏᑦ ᐃᓕᑦᓯ ᐱᓂᐊᕐᐸᓯ, ᓴᑭᐊᑦ ᐃᓵᒃᑕᕈᑕᐅᓯᒪᔪᑦ ᒥᒥᖏᓪᓗ ᑕᓕᕐᐱᖏᑦ ᐱᔭᕆᐊᖃᕋᕕᒋᑦ.

¹⁹ “ᑭᕕᒡᓗᒋᓪᓗ ᑐᓂᕐᕈᑏᑦ ᐃᑦᔪᕐᓁᑎᑕᐅᔪᓕᒫᑦ, ᐃᓴᕆᐊᓕᒥᐅᑦ ᐊᑕᓂᕐᒧᑦ ᑐᓂᕐᕈᑎᖏᑦ, ᐃᓕᖕᓄᑦ ᐃᕐᓂᕐᓄᓪᓗ ᐸᓂᖕᓄᓪᓗ ᑐᓂᕙᒃᑲ ᒪᓕᒐᐅᖁᓪᓗᒋᑦ ᑍᒪᓐᖓᓕᒫᖅ; ᐊᑕᓂᕐᒧᑦ ᐃᓕᖕᓄᓪᓗ ᑭᖑᕚᕐᓄᓪᓗ ᐊᖏᖃᑎᒌᒍᑕᐅᕗᖅ ᑕᕆᐅᖑᓪᓗᓂ ᐃᓱᖃᖏᑦᑐᒧᑦ.”

²⁰ ᐊᑕᓂᐅᓪᓗ ᐂᕉᓂ ᐅᖃᐅᑎᕚ, “ᓄᓇᒥᒃ ᐱᒋᓂᐊᕐᑕᕐᓂᒃ ᐱᓂᐊᖏᑦᑐᑎᑦ ᓄᓇᖁᑎᖏᓐᓂᑦ, ᓄᓇᖁᑎᖏᑕᓘᓐᓃᑦ ᐃᓚᖓᓂᒃ; ᐅᕙᖓ ᐱᖃᕈᑎᒋᕙᕐᒪ ᓇᖕᒥᓂᖃᕈᑎᒋᓪᓗᖓᓗ ᐃᓴᕆᐊᓕᒥᐅᑦ ᐊᑯᕐᖓᓐᓂ.”

ᑕᓪᓕᒪᐅᔪᐃᕈᑏᑦ ᓕᕔᑎᑦ ᐃᑲᔪᕐᑕᐅᑦᔪᑎᖏᓐᓄᑦ

²¹ “ᑕᑯᒋᑦ, ᓕᕔᑉ ᑭᖑᕚᖏᑦ ᑐᓂᓯᕕᒋᕙᒃᑲ ᐃᓴᕆᐊᓕᒥᐅᑦ ᑕᓪᓕᒪᐅᔪᐃᕈᑎᓕᒫᖏᓐᓂᒃ ᑖᒃᑯᓄᖓ ᐱᒃᓴᕆᔭᐅᖁᓪᓗᒋᑦ ᐱᓇᓱᐊᕐᓂᖏᓐᓄᑦ, ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕐᑎᐅᓂᖏᑦ ᐱᓪᓗᒋᑦ.

²² ᒫᓐᓇᒥᑦ, ᐃᓴᕆᐊᓕᒥᐅᑦ ᑐᐱᕐᔪᐊᒧᑦ ᑲᑎᒪᕕᖕᒧᑦ ᖃᒡᓕᔭᕆᐊᖃᓐᖏᓚᑦ, ᐊᔪᕐᑐᓕᓂᕐᒧᑦ ᐸᓯᔭᒃᓴᐅᓗᑎᒃ ᑐᖁᖁᓇᒋᑦ.

²³ ᓕᕔᑎᓪᓕ ᐱᓇᓱᐊᕈᓐᓇᕐᐳᑦ ᑐᐱᕐᔪᐊᒥ ᑲᑎᒪᕕᖕᒥ, ᐸᓯᔭᒃᓴᐅᓂᐊᕐᓗᑎᒃ ᐊᔪᕐᑐᓕᓂᕐᒥᖕᓄᑦ; ᑕᒪᓐᓇ ᒪᓕᒐᐅᓂᐊᕐᐳᖅ ᐃᓱᖃᖏᑦᑐᒧᑦ, ᑭᖑᕚᕇᓄᑦ ᑍᒪᓐᖓᑦ, ᐃᓴᕆᐊᓕᒥᐅᓪᓗ ᓇᖕᒥᓂᖃᑦᔮᓐᖏᓚᑦ ᓱᓇᒥᒃ.

²⁴ ᐃᓴᕆᐊᓕᒥᐅᑦ ᑕᓪᓕᒪᐅᔪᐃᕈᑎᖏᑦ, ᐃᓵᒃᑕᕈᑎᒋᓗᒋᑦ ᑐᓂᕐᕈᑕᐅᓯᒪᔪᑦ ᐊᑕᓂᕐᒧᑦ, ᓕᕔᑎᓄᑦ ᑐᓂᕙᒃᑲ ᑖᒃᑯᓄᖓ ᐱᑖᕆᔭᐅᖁᓪᓗᒋᑦ; ᑍᒤᒻᒪᑦ ᐅᖃᐅᑎᕙᒃᑲ, ‘ᐃᓴᕆᐊᓕᒥᐅᑦ ᐊᑯᕐᖓᓐᓂ ᓇᖕᒥᓂᕆᔭᑦᓯᓐᓂᒃ ᐱᖃᕐᓂᐊᓐᖏᓚᓯ.’”

ᓕᕔᑎᑦ ᑕᓪᓕᒪᐅᔪᐃᕈᑎᖏᑦ

²⁵ ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ,

²⁶ “ᓕᕔᑎᑦ ᐅᖃᕐᕕᒋᒃᑭᑦ, ᐃᒫᒃ ᐅᖃᕐᓗᑎᑦ: ‘ᐃᓴᕆᐊᓕᒥᐅᑦ ᑕᓪᓕᒪᐅᔪᐃᕈᑎᖏᓐᓂᒃ ᐱᔭᕌᖓᑦᓯ ᐃᓕᑦᓯᓐᓄᑦ ᑐᓂᔭᓐᓂᒃ ᐃᓕᑦᓯᓐᓄᑦ ᐱᔭᐅᔭᕆᐊᖃᕐᑐᓂᒃ, ᑕᕝᕙ ᐊᑕᓂᕐᒧᑦ ᑐᓂᕐᕈᓯᕆᐊᖃᕐᐳᓯ ᐃᓵᒃᑕᕈᑎᒋᓗᒍ ᑕᓪᓕᒪᐅᔪᐃᕈᑎᐅᓯᒪᔪᑦ ᑕᓪᓕᒪᐅᔪᖏᓐᓂᒃ.

²⁷ ᐃᓵᒃᑕᕈᑎᒋᓗᒍ ᑐᓂᕐᕈᑎᓯ ᐊᑦᔨᖃᕆᐊᖃᕐᐳᖅ ᓂᐊᖂᔭᒃᓴᓂᒃ ᐃᕖᔧᕕᐅᑉ ᓇᑎᖓᓂ ᐊᒥᐊᒃᑯᕐᓗᑯᑎᑐᑦ, ᕔᓂᓕᐅᕐᕕᐅᓪᓘᓐᓃᑦ ᑕᑕᓗᐊᕈᑎᖓᑐᑦ.

²⁸ ᑍᒫᒃ ᑐᓂᕐᕈᓯᕆᐊᖃᕐᐳᓯ ᐃᓵᒃᑕᕈᑎᒋᓗᒋᑦ ᐊᑕᓂᕐᒧᑦ ᑕᓪᓕᒪᐅᔪᐃᕈᑕᐅᔪᓂᒃ ᐃᓕᑦᓯᓐᓄᑦ ᐃᓴᕆᐊᓕᒥᐅᓕᒫᑦ ᑐᓂᕐᕈᑎᕕᓂᖏᓐᓂᒃ, ᑐᓂᕐᕈᓯᖃᑦᑕᕐᓂᐊᕐᐳᓯ ᐃᓵᒃᑕᕈᑎᒋᓗᒍ ᐊᑕᓂᕐᒧᑦ ᑐᓂᕐᕈᑎᑦᓯᓐᓂᒃ, ᐂᕉᓂᒧᓪᓗ ᑐᓂᕐᕈᓯᕐᑎᑦᓯᔨᒧᑦ ᑐᓂᓗᒍ.

²⁹ ᑐᓂᕐᕈᑎᓯ ᑐᓂᕐᕈᑎᒋᔭᕆᐊᖃᕐᐸᓯ ᐃᓵᒃᑕᕈᑎᒋᓗᒋᑦ ᐊᑕᓂᕐᒧᑦ ᑐᓂᕐᕈᑎᒋᔭᕆᐊᖃᕐᑕᓕᒫᓯ, ᐱᐅᓂᕐᐹᓕᒫᖏᑦ, ᐃᑦᔪᕐᓁᑎᑕᐅᓯᒪᓂᓕᒫᖏᑦ.’

³⁰ ᑍᒤᒻᒪᑦ ᐅᖃᐅᑎᔭᕆᐊᖃᕐᐸᑎᑦ: ‘ᐱᐅᓂᕐᐹᖏᑦ ᖁᒻᒧᐊᒃᑎᒃᑯᑦᓯᐅᒃ, ᐊᒥᐊᒃᑯᖏᑦ ᓕᕔᑎᓄᑦ ᐱᔭᐅᔭᕆᐊᖃᓕᕐᐳᑦ ᓂᐊᖂᔭᒃᓴᒥᒃ ᐃᕖᔧᕕᖕᒥ ᓴᓇᔭᐅᓯᒪᔪᑎᑐᑦ ᕔᓂᓕᐅᕐᕕᖕᒥᓗ ᓴᓇᔭᐅᓯᒪᔪᑎᑐᑦ.’

³¹ ᓇᓂᑐᐃᓐᓇᖅ ᓂᕆᔪᓐᓇᕐᐸᓯ, ᐃᕝᕕᑦ ᐃᒡᓗᒥᐅᖃᑎᓯᓗ, ᑐᓂᕐᕈᓯᐊᕆᒐᑦᓯᐅᒃ ᑐᐱᕐᔪᐊᒥ ᑲᑎᒪᕕᖕᒥ ᐱᓇᓱᐊᕐᑎᐅᓂᑦᓯᓐᓄᑦ.

³² ᑍᒤᓕᐅᕋᓗᐊᕈᑦᓯ ᐊᔪᕐᑐᓕᓂᐊᓐᖏᓚᓯ, ᐱᐅᓂᕐᐹᖏᓐᓂᒃ ᐃᓵᒃᑕᕈᑎᒋᓗᒋᑦ ᑐᓂᕐᕈᓯᕈᑎᒋᖃᑦᑕᕈᕐᓯᒋᑦ. ᐃᓴᕆᐊᓕᒥᐅᓪᓕ ᑐᓂᕐᕈᑎᖏᑦ ᐃᑦᔪᕐᓁᑦᑐᑦ ᓇᕐᕈᓇᕐᓯᑎᑕᒃᓴᕆᓐᖏᓚᓯ, ᑐᖁᖁᓇᓯ.”