ᒨᓯᓯ ᓯᑕᒪᖏᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᐂᕉᓂᐅᑉ ᐊᔭᐅᑉᐱᐊᖓ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ, ᐅᖃᕐᓗᓂ:

² “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ, ᐊᔭᐅᑉᐱᐊᒥᒃ ᓯᕗᓕᖏᑕ ᐊᔭᐅᑉᐱᐊᖓᓂᒃ ᐊᑕᐅᓯᕐᒥᒃ ᐊᑐᓂᑦ ᐱᖁᓪᓗᒋᑦ, ᓯᕗᓕᕐᑏᑦ ᑭᖑᕚᖑᖃᑎᒌᓂᑦ ᐊᑐᓂᑦ 12ᓂᒃ. ᐊᖑᑎᐅᑉ ᐊᑎᖓ ᐊᔭᐅᑉᐱᐊᕐᒥ ᑎᑎᕋᕐᓯᒪᓗᓂ.

³ ᐂᕉᓂᐅᑉ ᐊᑎᖓ ᑎᑎᕋᕐᓗᒍ ᓕᕔᑉ ᐊᔭᐅᑉᐱᐊᖓᓂ. ᑭᖑᕚᖑᖃᑎᒌᑦ ᐊᑐᓂᑦ ᐊᑕᐅᓯᕐᒥᒃ ᐱᓂᐊᕐᒪᑕ.

⁴ ᐃᓕᓂᐊᕐᐸᓯᓗ ᑐᐱᕐᔪᐊᒧᑦ ᑲᑎᒪᕕᖕᒧᑦ ᐃᒃᓯᕐᕕᐅᑉ ᐊᖏᕈᑎᑕᓕᐅᑉ ᓵᖓᓂ, ᑕᕝᕙᓂ ᑲᑎᓂᐊᕋᑦᓯ.

⁵ ᐃᒤᓐᓂᐊᕐᐳᖅ ᐊᖑᑎᐅᑉ ᓂᕈᐊᕐᑕᒪ ᐊᔭᐅᑉᐱᐊᖓ ᐱᕈᕐᕕᐅᓂᐊᕐᐳᖅ; ᑍᒫᒃ ᐃᓴᕆᐊᓕᒥᐅᑦ ᐅᕙᓐᓂᒃ ᓈᒻᒪᒃᓴᖏᓪᓗᑎᒃ ᓂᓪᓕᐊᓂᖏᑦ ᓄᖅᑲᕐᑎᓐᓂᐊᕐᐸᒃᑲ, ᐃᓕᖕᓂᒃ ᐊᑭᕋᕐᑐᕐᑐᑦ.”

⁶ ᑍᒫᒃ ᒨᓯᓯᐅᑉ ᐃᓴᕆᐊᓕᒥᐅᑦ ᐅᖃᕐᕕᒋᓚᐅᕐᐰᑦ, ᓯᕗᓕᕐᑎᖏᑕ ᐊᑐᓂᑦ ᐊᔭᐅᑉᐱᐊᕐᒥᒃ ᑐᓂᓯᕕᒋᕚᑦ, ᓯᕗᓕᕐᑏᑦ ᐊᑐᓂᑦ ᓯᕗᓕᕕᓂᕐᑎᒃ ᒪᓕᒡᓗᒋᑦ, 12ᓂᒃ ᐊᔭᐅᑉᐱᐊᓂᒃ; ᐂᕉᓂᐅᑉ ᐊᔭᐅᑉᐱᐊᖓ ᐃᓚᒋᔭᐅᓚᐅᕐᐳᖅ.

⁷ ᒨᓯᓯᐅᑉ ᐊᔭᐅᑉᐱᐊᑦ ᐃᓕᕔᑦ ᐊᑕᓂᐅᑉ ᓵᖓᓂ ᑐᐱᕐᔪᐊᒥ ᓇᓗᓁᕐᓯᕕᖕᒥ.

⁸ ᑕᕝᕙ ᐱᔪᖃᓚᐅᕐᐳᖅ ᖃᐅᑎᓪᓗᒍ, ᒨᓯᓯ ᑐᐱᕐᔪᐊᒧᑦ ᐂᒐᒥ ᓇᓗᓁᕐᓯᕕᖕᒧᑦ, ᑕᑯᕗᕐᓗ, ᐂᕉᓂᐅᑉ ᓕᕔᒃᑯᑦ ᑭᖑᕚᖓᑕ ᐊᔭᐅᑉᐱᐊᖓ ᐱᕈᕐᕕᐅᓕᕐᑐᖅ ᖃᖅᑯᐊᒐᓂᒡᓗ ᐋᓪᒪᓐᓂᒃ ᐊᑎᖃᕐᑐᓂᒃ ᓄᑖᓂᒃ ᐱᕈᕐᕕᐅᔪᖅ.

⁹ ᑕᕝᕙ ᒨᓯᓯᐅᑉ ᐊᔭᐅᑉᐱᐊᓕᒫᑦ ᐊᓐᓂᓯᕔᑦ ᐊᑕᓂᐅᑉ ᓵᖓᓂᑦ ᐃᓴᕆᐊᓕᒥᐅᓕᒫᓄᑦ; ᕿᒥᕐᕈᐊᓕᕐᓗᑎᒡᓗ ᐊᖑᑎᑦ ᐊᑐᓂᑦ ᐊᔭᐅᑉᐱᐊᑎᒃ ᑎᒍᕔᑦ.

¹⁰ ᐊᑕᓂᐅᓪᓗ ᒨᓯᓯ ᐅᖃᐅᑎᕚ, “ᐂᕉᓂᐅᑉ ᐊᔭᐅᑉᐱᐊᖓ ᐃᒃᓯᕐᕕᐅᑉ ᐊᖏᕈᑎᑕᓕᐅᑉ ᓵᖓᓄᑦ ᐅᑎᕐᑎᒍᒃ, ᑕᕝᕙᓂ ᐃᓂᖃᓕᖁᓪᓗᒍ ᐊᑭᕋᕐᑐᓚᐅᕐᑐᓄᑦ ᓇᓗᓁᒃᑯᑕᐅᖁᓪᓗᒍ, ᐅᕙᓐᓂᒃ ᐊᑭᕋᕐᑐᕐᓂᖏᑦ ᐃᓱᓕᑎᑕᐅᖁᓪᓗᒋᑦ, ᑐᖁᖁᓇᒋᑦ.”

¹¹ ᒨᓯᓯ ᑍᒤᓕᐅᓚᐅᕐᐳᖅ; ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ.

¹² ᑕᕝᕙ ᐃᓴᕆᐊᓕᒥᐅᑦ ᒨᓯᓯᒧᑦ ᐅᖃᓕᕐᐳᑦ, ᐅᖃᕐᓗᑎᒃ, “ᓱᓕᔪᒥᒃ ᑐᖁᓂᐊᓕᕐᐳᒍᑦ, ᐊᓯᐅᓂᐊᓕᕐᐳᒍᑦ, ᑕᒪᑦᑕ ᐊᓯᐅᓂᐊᓕᕐᐳᒍᑦ!

¹³ ᓇᓪᓕᐊᓪᓘᓐᓃᑦ ᐊᑕᓂᐅᑉ ᑐᐱᕐᔪᐊᖓᓄᑦ ᖃᒡᓕᔪᖅ ᑐᖁᔪᒃᓴᐅᖕᒪᑦ. ᑕᕝᕙᓖ ᑐᖁᔪᐃᓐᓇᐅᓂᐊᓕᕐᐱᑕ?”