ᒨᓯᓯ ᓯᑕᒪᖏᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐱᖁᔧᑦ ᑐᓂᕐᕈᓯᕐᓂᖅ ᐱᓪᓗᒍ

¹ ᐊᑕᓂᖅ ᐅᖃᕐᐳᖅ ᒨᓯᓯᒧᑦ, ᐅᖃᕐᓗᓂ,

² “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ ᐃᒫᒃ ᐅᖃᕐᕕᒋᓗᒋᑦ: ᓄᓇᒧᑦ ᑎᑭᒃᑯᑦᓯ ᓄᓇᒋᓂᐊᕐᑕᑦᓯᓐᓄᑦ, ᐃᓕᑦᓯᓐᓄᑦ ᑐᓂᓂᐊᕐᑕᓐᓄᑦ,

³ ᐃᑯᐊᓚᑎᑦᓯᓂᒃᑯᑦ ᑐᓂᕐᕈᓯᓕᕈᑦᓯ ᐊᑕᓂᕐᒧᑦ, ᐃᑯᐊᓚᑦᓯᓂᒃᑯᑦ ᑐᓂᕐᕈᓯᕈᑦᓯ, ᐅᕝᕙᓘᓐᓃᑦ ᐆᒫᔪᕕᓂᕐᒥᒃ ᑐᓂᕐᕈᓯᕈᑦᓯ, ᐊᖏᕈᑎᓯ ᐃᓗᐃᑦᑑᓕᖁᓪᓗᒍ, ᐅᕝᕙᓘᓐᓃᑦ ᑐᓂᕐᕈᓯᕈᒪᓂᑐᐃᓐᓇᕐᒧᑦ, ᓇᓪᓕᐅᓐᓂᕐᓯᐅᕐᕕᑦᓯᓐᓂᓘᓐᓃᑦ, ᑎᐱᑦᓯᐊᕆᒃᑐᒥᒃ ᐊᑕᓂᕐᒧᑦ ᑐᓂᓯᔪᒪᒍᑦᓯ, ᐃᒻᒧᒃᓯᐅᒐᖁᑎᑦᓯᓐᓂᒡᓘᓐᓃᑦ ᓰᐱᖁᑎᑦᓯᓐᓂᒡᓘᓐᓃᑦ.

⁴ ᓇᓪᓕᐊᑦ ᑐᓂᕐᕈᓯᕐᑐᖅ ᐊᑕᓂᕐᒧᑦ ᐱᖃᓯᐅᑦᔨᔭᕆᐊᖃᕐᐳᖅ ᑐᓂᕐᕈᑎᒃᓴᒥᒃ ᓂᐊᖂᔭᒃᓴᒥᒃ ᐆᒃᑑᑦ ᐄᕙ 1/10ᒥᒃ ᓂᐊᖂᔭᒃᓴᖅ ᓯᖃᓕᓯᒪᑦᓯᐊᕐᓗᒍ ᐊᑯᓯᒪᓗᒍ ᐅᕐᓱᒥᒃ ᐆᒃᑑᑦ 1/4ᕼᐃᓐᒥᒃ;

⁵ ᐊᒻᒪᓗ ᕔᓂᒥᒃ ᐆᒃᑑᑦ 1/4ᕼᐃᓐᒥᒃ ᐃᒥᒐᒃᓴᒥᒃ ᑐᓂᕐᕈᑎᒃᓴᒥᒃ ᐃᓚᓕᐅᑎᓗᒋᑦ ᑐᓂᕐᕈᑎᒃᓴᒧᑦ ᐆᑕᒃᓴᒧᑦ, ᐆᒪᔪᕕᓂᕐᓄᓪᓘᓐᓃᑦ ᓰᐱᐅᑉ ᓄᕐᕋᖏᓐᓄᑦ ᐊᑐᓂᑦ.

⁶ ᓰᐱᐅᓪᓕ ᐊᖑᓴᓪᓗᖓᓂᒃ ᑐᓂᕐᕈᓯᕐᓂᐊᕈᑦᓯ, ᓂᐊᖂᔭᒃᓴᒥᒃ ᐆᒃᑑᑦ 2/10ᐄᕙᒥᒃ, ᐃᓚᓗᒍ ᐅᕐᓱᒥᒃ ᐆᒃᑑᑦ 1/3ᕼᐃᓐᒥᒃ;

⁷ ᐃᒥᒐᒃᓴᒥᒡᓕ ᐃᓚᓗᒍ ᕔᓂᒥᒃ ᐆᒃᑑᑦ 1/3ᕼᐃᓐᒥᒃ ᑎᐱᑦᓯᐊᕆᒃᑑᓗᓂ ᐊᑕᓂᕐᒧᒃ ᑐᓂᕐᕈᑕᐅᖁᓪᓗᒍ.

⁸ ᑐᓂᕐᕈᓯᕐᓂᐊᕈᑦᓯᓕ ᐃᒻᒧᒃᓯᐅᒐᐅᑉ ᐊᖑᓴᓪᓗᖓᓂᒃ ᐃᓐᓇᐅᖏᑦᑐᒥᒃ ᐆᑕᒃᓴᒥᒃ, ᐃᓚᔭᕆᐊᖃᕐᐳᖅ, ᐊᖏᕈᑎᒧᓪᓘᓐᓃᑦ ᑐᓂᕐᕈᑎᒋᓂᐊᕐᓗᒍ, ᓮᒻᒪᕐᑎᑕᐅᓂᕐᒧᓪᓗᓐᓃᑦ ᑐᓂᕐᕈᑎᒋᓗᒍ ᐊᑕᓂᕐᒧᑦ,

⁹ ᐃᒻᒧᒃᓯᐅᒐᐅᑉ ᐊᖑᓴᓪᓗᖓ ᑐᓂᕐᕈᑕᐅᔭᕆᐊᖃᕐᐳᖅ ᐃᓚᖃᕐᓗᓂ ᓂᐊᖂᔭᒃᓴᒥᒃ ᐆᒃᑑᑦ 3/10ᐄᕙᒥᒃ ᓂᐊᖂᔭᒃᓴᒥᒃ ᓯᖃᓪᓕᑦᓯᐊᕐᓯᒪᔪᒥᒃ ᐃᓚᖃᕐᓗᒍ ᐅᕐᓱᒥᒃ ᐆᒃᑑᑦ 1/2ᕼᐃᓐᒥᒃ:

¹⁰ ᐃᒥᒐᒃᓴᒥᒃ ᐃᓚᖃᕆᐊᖃᕐᐳᖅ ᕔᓂᒥᒃ ᐆᒃᑑᑦ 1/2ᕼᐃᓐᒥᒃ, ᐃᑯᐊᓚᑎᓪᓗᒍ ᑐᓂᕐᕈᑎᒃᓴᐅᖁᓪᓗᒍ, ᑎᐱᑦᓯᐊᕆᒃᑑᓗᓂ ᐊᑕᓂᕐᒧᑦ.

¹¹ “ᑍᒫᒃ ᐱᔭᕆᐊᖃᕐᐳᖅ ᐃᒻᒧᒃᓯᐅᒐᐅᑉ ᐊᖑᓴᓪᓗᖏᓐᓄᑦ, ᓰᐱᐅᓪᓗ ᐊᖑᓴᓪᓗᖏᓐᓄᑦ, ᓰᐱᐅᓪᓗ ᓄᕐᕋᖏᓐᓄᑦ, ᒎᑦᓯᓪᓗ ᓄᕐᕋᖏᓐᓄᑦ.

¹² ᑐᓂᕐᕈᑎᒃᓮᑦ ᐊᑐᐃᓐᓇᕈᕐᑕᓯ ᐅᓄᕐᓂᖏᑦ ᒪᓕᒡᓗᒋᑦ, ᑍᒫᒃ ᐱᖃᑦᑕᕐᓂᐊᕐᐳᓯ ᑐᓂᕐᕈᓯᕐᓂᐊᕐᑐᓕᒫᓄᑦ ᐅᓄᕐᓂᖏᑦ ᒪᓕᒡᓗᒋᑦ.

¹³ ᑖᕙᓂ ᐃᓅᔪᑦ ᑕᒪᒃᑯᓂᖓ ᑍᒫᒃ ᐱᔭᕆᐊᖃᕐᐳᑦ, ᑐᓂᕐᕈᓯᕐᓂᐊᕈᑎᒃ ᐃᑯᐊᓚᑎᑕᒃᓴᒥᒃ, ᐊᑕᓂᕐᒧᑦ ᑎᐱᑦᓯᐊᕆᒃᑐᒥᒃ.

¹⁴ ᓄᓇᐅᑉ ᐊᓯᐊᓂᑦ ᐱᓯᒪᔪᒥᒃ ᐃᓕᑦᓯᓐᓃᑦᑐᖃᕐᐸᑦ, ᐃᓕᑦᓯᓐᓃᑐᖃᕐᐸᓪᓘᓐᓃᑦ ᐃᓅᖃᑎᒋᔭᑦᓯᓐᓂᒃ, ᑐᓂᕐᕈᓯᕈᒪᒃᐸᑦ ᐃᑯᐊᓚᑎᑕᒃᓴᒥᒃ, ᐊᑕᓂᕐᒧᑦ ᑎᐱᑦᓯᐊᕆᒃᑐᒥᒃ, ᐃᓕᑦᓯᑎᑐᑦ, ᑍᒫᒃ ᐱᔭᕆᐊᖃᕐᐳᖅ.

¹⁵ ᒪᓕᒐᖃᕐᓂᐊᕐᐳᓯ ᐃᓕᑦᓯᓐᓄᑦ ᑲᑎᒪᔪᕐᔪᐊᓄᑦ ᓄᓇᐅᓪᓗ ᐊᓯᐊᓂᑦ ᐱᓯᒪᔪᓄᑦ, ᑍᒪᓐᖓᓕᒫᖅ ᒪᓕᒐᕆᓂᐊᕐᑕᓯ ᑭᖑᕚᕇᓂᑦ ᑭᖑᕚᕇᓄᑦ; ᐃᓕᑦᓯ ᑍᒤᑦᓴᕆᐊᖃᕐᓂᐊᕋᑦᓯ, ᑍᒫᒃᑕᐅᖅ ᓄᓇᐅᑉ ᐊᓯᐊᓂᑦ ᐱᓯᒪᔪ ᐱᔭᕆᐊᖃᕆᕗᑦ ᐊᑕᓂᐅᑉ ᓵᖓᓂ.

¹⁶ ᐱᖁᔭᖅ ᐊᑕᐅᓯᖅ ᐱᐅᓯᕐᓗ ᐊᑕᐅᓯᖅ ᐃᓕᑦᓯ ᒪᓕᒋᐊᖃᕐᐸᓯ ᓄᓇᖃᑎᒋᓐᖏᑕᓯᓗ ᐃᓕᑦᓯᓐᓃᑦᑐᑦ ᑍᒫᑦᓮᓐᓇᖅ.”

¹⁷ ᐊᒻᒪ ᐊᑕᓂᖅ ᐅᖃᕆᕗᖅ ᒨᓯᓯᒧᑦ, ᐅᖃᕐᓗᓂ,

¹⁸ “ᐃᓴᕆᐊᓕᒥᐅᑦ ᐅᖃᕐᕕᒋᒃᑭᑦ, ᐃᒤᓕᓗᒋᑦ: ᓄᓇᒧᑦ ᑎᑭᒃᑯᑦᓯ ᐃᓕᑦᓯᓐᓄᑦ ᑐᓂᓂᐊᕐᑕᓐᓄᑦ,

¹⁹ ᓄᓇᒥᑦ ᐱᔪᒥᒃ ᓂᐊᖂᔭᒥᒃ ᓂᕆᔭᕌᖓᑦᓯ, ᐃᓵᒃᑕᕈᑎᒋᓗᒍ ᑐᓂᕐᕈᑎᒋᔭᒃᓴᕆᕙᓯ ᐊᑕᓂᕐᒧᑦ.

²⁰ ᓂᐊᖂᔭᒥᒃ ᐆᓯᒪᔪᒥᒃ ᓯᖃᓪᓕᔭᕕᑦ ᓯᕗᓪᓕᕐᐹᖓᓂᒃ ᑐᓂᕐᕈᓯᕆᐊᖃᕐᐳᓯ ᐃᓵᒃᑕᕈᑎᒋᓗᒍ; ᓂᐊᖂᔭᒃᓴᓂᒃ ᐃᕖᔧᕕᖕᒥᑦ ᐱᔪᒥᒃ ᐃᓵᒃᑕᕈᑎᒋᓗᒍ, ᑍᒫᒃ ᖁᒻᒧᑦ ᑐᓂᕐᕈᑎᒋᔭᕆᐊᖃᕐᐸᑦ.

²¹ ᓯᕗᓪᓕᕐᐹᖅ ᓂᐊᖂᔭᒃᓴᖅ ᓯᖃᓪᓕᔧᑦ ᐊᑕᓂᕐᒧᑦ ᑐᓂᕐᕈᑎᒋᔭᕆᐊᖃᕐᐸᑦ ᐃᓵᒃᑕᕈᑎᒋᓗᒍ ᑭᖑᕚᑦᓯᓐᓄᑦ ᑍᒤᓕᐅᕐᓗᓯ.”

ᐱᖁᔧᑦ ᐱᔮᕆᓇᓂ ᐱᐅᖏᑦᑐᓕᓂᖅ ᐱᓪᓗᒍ

²² “ᐱᔮᕆᖏᓪᓗᓯ ᐱᐅᖏᑦᑐᓕᒍᑦᓯ, ᐱᖁᔧᓪᓗ ᒪᓕᖏᓪᓗᒋᑦ ᐊᑕᓂᐅᑉ ᐅᖃᐅᓯᕆᓚᐅᕐᑕᖏᑦ ᒨᓯᓯᒧᑦ,

²³ ᐊᑕᓂᐅᑉ ᐱᖁᓚᐅᕐᑕᓕᒫᖏᑦ ᒨᓯᓯᑯᑦ, ᑍᒪᓐᖓᑦ ᐅᓪᓗᒥᑦ ᐱᖁᔭᓕᐅᕐᕕᒋᓚᐅᕐᑕᖓᓂᑦ ᑭᖑᓕᕇᑦ ᑭᖑᕚᕇᑦ ᑎᑭᓪᓗᒋᑦ,

²⁴ ᑕᕝᕙ ᐃᒤᒃᑲᔭᕐᐳᖅ, ᒪᓕᒃᑕᐅᖏᑉᐸᑕ ᐱᔮᕆᖏᑦᑐᒧᑦ, ᐃᓅᖃᑎᒌᒡᔪᐊᑦ ᖃᐅᔨᑎᓐᓇᒋᑦ, ᐃᓅᖃᑎᒌᒡᔪᐊᑦ ᑐᓂᕐᕈᓯᕋᔭᕐᐳᑦ ᐃᒻᒧᒃᓯᐅᒐᕐᒥᒃ ᐊᖑᓴᓪᓗᕐᒥᒃ ᐃᑯᐊᓚᑎᑕᒃᓴᒥᒃ, ᐊᑕᓂᕐᒧᑦ ᑎᐱᑦᓯᐊᕆᒃᑐᒥᒃ, ᓂᐊᖂᔭᒃᓴᒥᒃ ᐃᓚᖃᕐᓗᒍ, ᐃᒥᒃᓴᒥᒡᓗ ᑐᓂᕐᕈᑎᒃᓴᒥᒃ, ᑐᓂᕐᕈᑎᒃᓴᐅᑉ ᒪᓕᒐᖓ ᒪᓕᒡᓗᒍ, ᒎᑦᓯᐅᓪᓗ ᓄᕐᕋᖓᓂᒃ ᐊᑕᐅᓯᕐᒥᒃ.

²⁵ ᑍᒫᒃ ᑐᓂᕐᕈᓯᕐᑎᑦᓯᔨ ᐃᓅᖃᑎᒌᒡᔪᐊᓂᒃ ᐃᓴᕆᐊᓕᒥᐅᓂᒃ ᐃᓱᒪᒋᔪᓐᓁᕐᕕᐅᑎᑦᓯᒐᔭᕐᐳᖅ, ᑖᒃᑯᐊ ᐃᓱᒪᒋᔪᓐᓁᕐᕕᐅᒐᔭᕐᐳᑦ ᐲᔮᕆᓂᐅᖏᒻᒪᑦ; ᑐᓂᕐᕈᑎᒃᓴᒥᒃ ᓇᒃᓴᕐᓗᑎᒃ, ᑐᓂᕐᕈᑎᒃᓴᒥᒃ ᐃᑯᐊᓚᑎᑕᒃᓴᒥᒃ ᐊᑕᓂᕐᒧᑦ, ᐊᔪᕐᑐᓕᓂᖅ ᐱᑦᔪᑎᒋᓗᒍ ᐊᑕᓂᐅᑉ ᓵᖓᓂ, ᐱᔮᕆᓇᑎᒃ ᐊᔪᕐᑐᓕᓂᖏᓐᓄᑦ.

²⁶ ᐃᓴᕆᐊᓕᒥᐅᑦ ᐃᓅᖃᑎᒌᒡᔪᐊᓕᒫᑦ ᐃᓱᒪᒋᔪᓐᓁᕐᕕᐅᒐᔭᕐᐳᑦ ᐃᓄᐃᓪᓗ ᐊᓯᐊᓂᑦ ᐱᓯᒪᔪᑦ ᓄᓇᖃᑎᒋᔭᖏᑦ, ᐃᓄᐃᑦ ᐱᔮᕆᓇᑎᒃ ᐊᔪᕐᑐᓕᓚᐅᕐᓂᖏᓐᓄᑦ.

²⁷ ᐃᓄᒡᓕ ᐊᑕᐅᓯᖅ ᐱᔮᕆᓇᓂ ᐱᐅᖏᑦᑐᓕᒃᐸᑦ, ᒎᑦᓯᒥᒃ ᐊᕐᓇᓪᓗᖕᒥᒃ ᐊᕐᕌᒍᖃᕐᑐᒥᒃ ᐊᑕᐅᓯᕐᒥᒃ ᐊᔪᕐᓂᖅ ᐱᑦᔪᑎᒋᓗᒍ ᑐᓂᕐᕈᓯᕐᑐᒃᓴᐅᕗᖅ.

²⁸ ᑐᓂᕐᕈᓯᕐᑎᑦᓯᔨᐅᑉ ᐃᓱᒪᒋᔪᓐᓁᕐᕕᐅᑎᒃᒐᔭᕐᐹ ᐃᓄᒃ ᐱᔮᕆᓇᓂ ᐊᔪᕐᑐᓕᓚᐅᕐᑐᖅ, ᐱᔮᕆᓇᓂ ᐊᔪᕐᑐᓕᓚᐅᕐᐸᑦ ᐊᑕᓂᐅᑉ ᓵᖓᓂ, ᐃᓱᒪᒋᔪᓐᓁᕐᕕᐅᖁᓪᓗᒍ; ᑕᕝᕙ ᐃᓱᒪᒋᔪᓐᓁᕐᕕᐅᓂᐊᕐᐳᖅ.

²⁹ ᐊᑕᐅᓯᕐᒥᒃ ᐱᖁᔭᖃᕐᓂᐊᕐᐳᓯ ᐱᔮᕆᓇᓂ ᐊᔪᕐᑐᓕᔪᒧᑦ, ᐃᓴᕆᐊᓕᒥᐅᓂ ᓄᓇᖃᖃᑕᐅᓗᓂ ᐃᓅᓚᐅᕐᑐᒧᑦ ᐊᓯᓂᓪᓗ ᓄᓇᒥᑦ ᐱᓯᒪᓗᓂ ᑖᒃᑯᓇᓂ ᓄᓇᖃᖃᑕᐅᔪᓄᑦ.”

ᐱᔮᕆᓗᓂ ᐊᔪᕐᑐᓕᓂᖅ ᐱᓪᓗᒍ ᐱᖁᔭᖅ

³⁰ “ᐱᔮᕆᓗᓂᓕ ᐊᔪᕐᑐᓕᔪᖅ, ᐃᓴᕆᐊᓕᒥᐅᓂ ᐃᓅᓯᒪᒐᓗᐊᕈᓂ, ᓄᓇᐅᓪᓗ ᐊᓯᐊᓂᑦ ᐱᓯᒪᒐᓗᐊᕈᓂ, ᐊᑕᓂᕐᒥᒃ ᓇᕐᕈᓇᕐᑎᑦᓯᕗᖅ, ᑖᓐᓇ ᐃᓅᖃᑎᒥᓂᑦ ᐊᕕᑕᐅᔭᕆᐊᖃᕐᐳᖅ.

³¹ ᐊᑕᓂᐅᑉ ᐅᖃᐅᓯᖓᓂᒃ ᓇᕐᕈᖕᒪᑦ, ᐱᖁᔭᖓᓂᒡᓗ ᓯᖁᒥᑦᓯᓪᓗᓂ, ᑖᓐᓇ ᐊᕕᑕᐅᒻᒪᕆᒋᐊᖃᕐᐳᖅ; ᐸᓯᔭᒃᓴᐅᓐᓚᕆᖕᒪᑦ.”

ᓴᐸᑎᒥᒃ ᓯᖁᒥᑦᓯᔫᑉ ᓱᒋᐊᕐᑕᐅᑦᔪᑎᒃᓴᖏᑦ

³² ᐃᓴᕆᐊᓕᒥᐅᑦ ᐃᓄᖃᖏᑦᑐᒦᑎᓪᓗᒋᑦ, ᑕᑯᓚᐅᕐᐳᑦ ᐊᖑᒻᒥᒃ ᕿᔪᖕᓂᒃ ᓄᐊᑦᓯᔪᒥᒃ ᐅᓪᓗᖅ ᓴᐸᑎᐅᑎᓪᓗᒍ.

³³ ᑖᒃᑯᐊᓗ ᑕᑯᔪᑦ ᕿᔪᖕᓂᒃ ᓄᐊᑦᓯᔪᒥᒃ, ᒨᓯᓯᒧᐊᕈᑎᕚᑦ ᐂᕉᓂᒧᓪᓗ, ᑲᑎᒪᔪᕐᔪᐊᓄᓪᓗ ᐃᓴᕆᐊᓕᒥᐅᓄᑦ.

³⁴ ᖃᐅᔨᓴᕐᑕᐅᕕᖕᒨᕈᑎᕚᑦ, ᖃᓄᐃᓕᐅᕐᑕᐅᔭᕆᐊᖃᕐᒪᖔᑦ ᐅᖃᐅᓯᐅᓯᒪᖏᓐᓂᖓ ᐱᓪᓗᒍ.

³⁵ ᐊᑕᓂᐅᓪᓕ ᒨᓯᓯ ᐅᖃᐅᑎᕚ, “ᐊᖑᑦ ᑖᓐᓇ ᑐᖁᑕᐅᔭᕆᐊᖃᓪᓚᕆᒃᐳᖅ; ᐃᓅᖃᑎᒌᒡᔪᐊᑦ ᑕᖕᒫᕐᓯᒪᕕᐅᑉ ᓯᓚᑖᓂ ᐅᔭᕋᖕᓄᑦ ᒥᓪᓗᕐᑕᒃᓴᕆᕚᑦ.”

³⁶ ᑍᒫᒃ ᐊᑕᓂᐅᑉ ᒨᓯᓯ ᐱᖁᖕᒪᒍ, ᐃᓅᖃᑎᒌᒡᔪᐊᑦ ᑕᖕᒫᕐᓯᒪᔪᑦ ᓯᓚᑖᓅᕐᑎᑉᐹᑦ ᐅᔭᖅᑲᓄᓪᓗ ᒥᓪᓗᕐᓗᒍ, ᑐᖁᑉᐹᑦ.

ᒪᓕᒊᑦ ᓂᒃᔧᑦ (ᖀᕆᓕᑍᑦ) ᐱᓪᓗᒋᑦ

³⁷ ᐊᑕᓂᐅᑉ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ,

³⁸ “ᐃᓴᕆᐊᓕᒥᐅᑦ ᐅᖃᐅᑎᒃᑭᑦ: ᓂᒡᔭᓕᐅᖁᓗᒋᑦ ᐊᓐᓄᕌᖏᑕ ᑎᕆᖅᑯᐊᒍᑦ ᑭᖑᕚᕇᓄᑦ ᑍᒪᓐᖓᓕᒫᖅ ᒪᓕᒃᑕᐅᓂᐊᕐᑐᒥᒃ, ᐃᕙᓗᒥᒃ ᑐᖑᔪᕐᑐᒥᒃ ᓂᒡᔭᖃᖁᓪᓗᒋᑦ ᑎᕆᖅᑯᖏᑎᒍᑦ.

³⁹ ᓂᒡᔭᖃᕐᓂᐊᕐᐳᓯᓗ, ᑕᑯᔭᕌᖓᑦᓯᐅᒃ ᐃᖅᑲᐅᒪᑦᔪᑎᒋᓂᐊᕋᑦᓯᐅᒃ ᐊᑕᓂᐅᑉ ᐱᖁᔭᖏᓐᓂᒃ ᒪᓕᒡᓗᒋᓪᓗ, ᐆᒻᒪᑎᑦᓯ ᐃᔨᓯᓗ ᐃᒃᓕᒎᕐᓂᖏᓐᓄᑦ ᐊᓯᓐᓂᐊᕈᒪᓂᕐᒧᓪᓗ ᐊᐅᓚᑕᐅᖁᓇᒋᑦ.

⁴⁰ ᐃᖅᑲᐅᒪᖁᓪᓗᓯ ᐱᖁᔭᓕᒫᓐᓂᒡᓗ ᒪᓕᖁᓪᓗᓯ, ᐃᑦᔪᕐᓁᑦᑑᖁᓪᓗᓯᓗ ᒎᑎᓯ ᐱᓪᓗᒍ.

⁴¹ ᐅᕙᖓ ᐊᑕᓂᐅᒐᒪ ᒎᑎᓯ, ᐄᑦᔨᑉᑎᒥᑦ ᐊᐅᓪᓚᕐᑎᓚᐅᕐᐸᑦᓯ, ᐃᓕᑦᓯᓐᓄᑦ ᒎᑎᒋᔭᐅᔪᒪᓪᓗᖓ: ᐅᕙᖓ ᐊᑕᓂᐅᒐᒪ ᒎᑎᓯ.”