ᒨᓯᓯ ᓯᑕᒪᖏᑦ 14 - ᐊᒡᓔᑦ ᐃᑦᔪᕐᖕᓁᑦᑐᑦᐃᓄᐃᑦ ᓈᒻᒪᒃᓴᖏᓐᓂᕐᒥᒃ ᓂᓪᓕᐊᓂᖓᑦ 1 ᑍᒤᒻᒪᑦ ᐃᓄᐃᑦ ᑍᑦᓱᒪᓂ, ᓂᐱᖅᑯᕐᑐᓪᓗᑎᒃ ᕿᐊᓕᓚᐅᕐᐳᑦ ᐅᓐᓄᐊᓕᒫᖅ. 2 ᐃᓴᕆᐊᓕᒥᐅᓕᒫᓪᓗ ᓈᒻᒪᒃᓴᕋᑎᒃ ᓂᓪᓕᐊᓚᐅᕐᐳᑦ ᒨᓯᓯᒧᑦ ᐂᕉᓂᒧᓪᓗ, ᐃᓴᕆᐊᓕᒥᐅᓪᓗ ᑖᒃᑯᖕᓄᖓ ᐅᖃᕐᓗᑎᒃ, “ᑍᒪᓕ ᐄᑦᔨᑉᑎᐅᑉ ᓄᓇᖓᓂ ᑐᖁᓚᐅᕈᑦᑕ! ᐅᕝᕙᓘᓐᓃᑦ ᐃᓄᖃᖏᑦᑐᒥ ᑐᖁᓚᐅᕈᑦᑕ! 3 ᓱᖕᒪᑦ ᐊᑕᓂᐅᑉ ᑕᒪᐅᖓ ᓄᓇᒧᑦ ᑎᑭᑎᑉᐹᑎᒍᑦ ᓴᕕᒡᔪᐊᒧᑦ ᑐᖁᑕᐅᖁᓪᓗᑕ, ᓄᓕᐊᕗᓪᓗ ᕿᑐᕐᖓᕗᓪᓗ ᑐᖁᖃᓯᐅᑎᓗᑎᒃ? ᐱᐅᓂᕐᓴᐅᓕᓐᖏᓛᖅ ᐅᑎᕈᑦᑕ ᐄᑦᔨᑉᑎᒧᑦ?” 4 ᐃᒻᒥᖕᓄᓪᓗ ᐅᖃᓕᕐᐳᑦ, “ᐊᑏ ᓂᕈᐊᓚᐅᕐᑕ ᑕᓯᐅᕐᑎᒋᓂᐊᕐᑕᑦᑎᓐᓂᒃ ᐅᑎᕐᓂᐊᕋᑦᑕ ᐄᑦᔨᑉᑎᒧᑦ.” 5 ᑕᕝᕙ ᒨᓯᓯ ᐂᕉᓂᓗ ᐹᒻᒪᖓᕘᒃ ᑮᓇᑎᒃ ᓄᓇᒧᑦ ᑐᓐᖓᓪᓗᒋᒃ ᐃᓄᒋᐊᒃᑐᕐᔪᐊᑦ ᑲᑎᒪᔪᑦ ᐃᓴᕆᐊᓕᒥᐅᑦ ᓵᖓᓂ. 6 ᔮᓱᐊᓕ ᓈᓂᐅᑉ ᐃᕐᓂᖓ ᑬᓚᐱᓗ ᔨᐳᓂᐊᐅᑉ ᐃᕐᓂᖓ, ᓄᓇᒥᒃ ᕿᒥᕐᕈᔭᑐᖃᑕᐅᓚᐅᕐᑑᒃ, ᐊᓐᓄᕌᑎᒃ ᐊᓕᒃᐰᑦ; 7 ᑲᑎᒪᔪᕐᔪᐊᓄᑦ ᐃᓴᕆᐊᓕᒥᐅᓄᑦ ᐅᖃᕐᓗᑎᒃ: “ᓄᓇ ᐃᔨᕋᕐᑐᕐᓗᑕ ᕿᒥᕐᕈᓚᐅᕐᑕᕗᑦ ᐊᒃᓱᐊᓗᒃ ᓄᓇᑦᓯᐊᖑᕗᖅ. 8 ᐊᑕᓂᐅᑉ ᖁᕕᐊᒋᒃᐸᑎᒍᑦ, ᓄᓇᒧᑦ ᑖᕗᖓ ᑎᑭᑎᓐᓂᐊᕐᐹᑎᒍᑦ ᐅᕙᑦᑎᓐᓄᓪᓗ ᑐᓂᓗᒍ, ᐱᕈᕐᑐᖃᑦᓯᐊᕐᑐᒧᑦ ᐊᔪᕐᓴᕐᓇᖏᑦᑐᒧᓪᓗ. 9 ᑭᓯᐊᓂ ᐊᑕᓂᖅ ᐊᑭᕋᕐᑐᕐᓂᐊᕐᓇᒍ, ᐅᕝᕙᓗ ᐃᓄᐃᑦ ᑖᕙᓃᑦᑐᑦ ᐃᕐᓯᒋᓂᐊᕐᓇᒋᑦ, ᐅᕙᑦᑎᓐᓄᑦ ᓂᕆᔭᒃᓴᑎᑐᑦ ᑍᒤᑐᐃᓐᓇᕐᒪᑕ; ᓴᐴᓗᑕᖏᑦ ᐊᑐᕈᓐᓁᕐᒪᑕ ᐊᑕᓂᐅᑉ ᐃᓚᒋᖕᒪᑎᒍᑦ. ᐃᕐᓯᒋᓂᐊᕐᓇᒋᑦ.” 10 ᐃᓄᒐᓴᒡᔪᐊᓪᓕ ᐅᖃᕐᐳᑦ ᑖᒃᑯᐊᒃ ᐅᔭᖅᑲᓄᑦ ᒥᓪᓗᕐᑕᐅᖁᓪᓗᒋᑦ. ᐊᑕᓂᐅᓪᓕ ᐱᓐᓇᕐᓇᕐᓂᖓ ᓴᖅᑭᑉᐳᖅ ᑐᐱᕐᔪᐊᒥ ᑲᑎᒪᕕᖕᒥ ᐃᓴᕆᐊᓕᒥᐅᓕᒫᑦ ᓵᖓᓂ. ᒨᓯᓯᐅᑉ ᑐᒃᓯᐅᑦᔨᓂᖓ ᐃᓄᖕᓂᒃ 11 ᐊᑕᓂᕐᓗ ᒨᓯᓯᒧᑦ ᐅᖃᕐᐳᖅ: “ᖃᓄᖅ ᐊᑯᓂᐅᑎᒋᔪᒥᒃ ᐃᓄᐃᑦ ᐅᑯᐊ ᐅᕙᓐᓂᒃ ᓇᕐᕈᒋᔭᖃᕐᓂᐊᕐᐹᑦ? ᖃᓄᖅ ᐊᑯᓂᐅᑎᒋᔪᒥᒃ ᐅᕙᓐᓂᒃ ᐅᒃᐱᕈᓱᖕᓂᐊᓐᖏᓚᑦ, ᓇᓗᓁᒃᑯᑕᕐᓂᒃ ᑲᒪᓇᕐᑐᓂᒃ ᐱᓇᓱᐊᕋᓗᐊᕈᒪ ᐊᑯᓐᓂᖓᓂ? 12 ᖃᓄᐃᓐᓇᕐᑐᓄᑦ ᐋᓐᓂᐊᓄᑦ ᐱᔭᐅᑎᓐᓂᐊᕐᐸᒃᑲ, ᐊᓯᕈᕐᓗᒋᓪᓗ, ᐃᓅᖃᑎᒌᒡᔪᐊᓐᖑᕐᑎᓐᓂᐊᕐᐸᒋᑦ ᐅᓄᕐᓂᕐᓴᐅᓗᑎᑦ ᓴᓐᖏᓂᕐᓴᐅᓗᑎᓪᓗ ᑖᒃᑯᓇᓐᖓᑦ.” 13 ᒨᓯᓯᓗ ᐊᑕᓂᕐᒧᑦ ᐅᖃᕐᐳᖅ: “ᑕᕝᕙ ᐄᑦᔨᑉᑎᒥᐅᑦ ᑕᒪᑐᒥᖓ ᑐᓴᕐᓂᐊᕆᕗᑦ, ᐊᔪᒐᖃᖏᓐᓂᕐᓄᑦ ᑍᒃᑯᓇᓐᖓᑦ ᐊᐅᓪᓚᕐᑎᓚᐅᕋᕕᒋᑦ, 14 ᐅᖃᐅᓯᕆᓂᐊᕐᐹᓪᓗ ᓄᓇᐅᑉ ᐅᐸᒐᓱᐊᕐᑕᑦᑕ ᐃᓄᖏᓐᓄᑦ. ᑐᓴᕐᓯᒪᖕᒪᑕ, ᐃᕝᕕᑦ ᐊᑕᓃᖅ, ᐃᓄᐃᑦ ᑖᒃᑯᐊ ᐃᓚᒋᒐᕕᒋᑦ; ᐃᕝᕕᓪᓗ ᐊᑕᓃᖅ ᑕᑯᕙᒃᑲᕕᒋᑦ ᑮᓇᕐᒥᑦ ᑮᓇᕐᒧᑦ ᓄᕗᔭᒧᓪᓗ ᖁᓚᖏᐊᖃᑦᑕᕋᕕᒋᑦ, ᓄᕗᔭᒧᓪᓗ ᓯᕗᓕᖃᑦᑕᕋᕕᒋᑦ ᐅᓪᓗᒃᑯᑦ ᐃᑯᐊᓚᔪᒧᓪᓗ ᐅᓐᓄᐊᒃᑯᑦ. 15 ᒫᓐᓇᓕ ᐃᓄᐃᑦ ᐅᑯᐊ ᑐᖁᓴᕈᕕᒋᑦ ᐃᓄᒃᑐᑦ ᐊᑕᐅᓯᕐᑐᑦ, ᑕᕝᕙ ᐃᓅᖃᑎᒌᒡᔪᐊᑦ ᑐᓴᕐᓯᒪᔪᑦ ᐊᔪᖏᓐᓂᕐᓂᒃ ᓂᓪᓕᐊᓕᕐᓂᐊᕐᐳᑦ, ᐅᖃᕐᓗᑎᒃ, 16 ‘ᐊᑕᓂᐅᑉ ᐃᓄᖁᑎᓂ ᓄᓇᒧᑦ ᑖᒃᑯᓄᖓ ᐊᖏᕈᑎᒋᓯᒪᔭᒥᓄᑦ ᑎᑭᑎᑦᓱᓐᓇᖏᓐᓇᒥᒋᑦ, ᑐᖁᓴᑐᐃᓐᓇᓕᕐᐰᑦ ᐃᓄᖃᒋᑦᑐᒥ.’ 17 ᒫᓐᓇᓕ, ᑐᒃᓯᐊᕐᐳᖓ ᐊᑕᓂᕐᒪ ᐱᔪᓐᓇᕐᓂᖓ ᐊᖏᔫᖁᓪᓗᒍ, ᐃᒫᒃ ᐅᖃᓚᐅᕋᕕᑦ, 18 ‘ᐊᑕᓂᖅ ᓂᓐᖓᒃᓴᕅᓐᖏᓚᖅ, ᓇᒡᓕᒍᓱᖕᓂᖓᓗ ᐊᒥᒐᕋᓂ, ᐱᐅᖏᑦᑐᓕᓂᕐᒥᒃ ᑕᒻᒪᕐᓂᕐᒥᒡᓗ ᐃᓱᒪᒋᔪᓐᓁᕐᕕᖃᕐᐳᖅ; ᐸᓯᔭᒃᓴᐅᔪᓂᒡᓕ ᓱᒋᐊᕐᓯᑦᑍᓕᓐᖏᓚᖅ, ᐊᑖᑕᐅᔪᑦ ᐱᐅᖏᑦᑐᓕᓂᖏᑦ ᑎᑭᑦᓱᓐᓇᕐᒪᒋᑦ ᐃᕐᓂᕇᑦ ᐱᖓᔪᖏᑦ ᓯᑕᒪᖏᓪᓘᓐᓃᑦ ᑎᑭᓪᓗᒋᑦ.’ 19 ᐅᑯᐊ ᐃᓄᐃᑦ ᑕᒻᒪᕐᓂᖏᓐᓂᒃ ᐃᓱᒪᒋᔪᓐᓁᕐᕕᒋᓚᐅᒃᑭᑦ, ᑐᒃᓯᐊᕐᐳᖓ ᓂᑲᒍᓱᖕᓃᑦ ᐊᖏᔪᖅ ᒪᓕᒡᓗᒍ, ᑍᒫᒃᑕᐅᖅ ᐃᓄᐃᑦ ᐅᑯᐊ ᐃᓱᒪᒋᔪᓐᓁᕐᕕᒋᕙᒃᑲᕕᒋᑦ ᐄᑦᔨᑉᑎᒥᑦ ᐊᐅᓪᓚᓚᐅᕐᓂᖏᓐᓂᑦ ᐅᓪᓗᒥᒧᑦ ᑎᑭᓪᓗᒍ.” 20 ᐊᑕᓂᕐᓗ ᐅᖃᕐᐳᖅ: “ᐃᓱᒪᒋᔪᓐᓁᕐᕕᒋᕙᒃᑲ, ᐅᖃᐅᓰᑦ ᒪᓕᒡᓗᒍ; 21 ᓱᓕᑦᓯᐊᕐᐳᖅ, ᐃᓅᑎᓪᓗᖓ ᓄᓇᕐᔪᐊᓕᒫᖅ ᐊᑕᓂᐅᑉ ᐱᓐᓇᕐᓇᕐᓂᖓᓂᒃ ᑕᑕᑦᓱᒫᕐᐳᖅ; 22 ᐊᖑᑎᑦ ᐅᑯᐊ ᑕᑯᓯᒪᖕᒪᑕ ᐱᓐᓇᕐᓇᕐᓂᓐᓂᒃ ᓇᓗᓁᒃᑯᑕᓂᒡᓗ ᑲᒪᓇᕐᑐᓂᒃ ᐱᓂᐊᕐᓂᕆᓚᐅᕐᑕᓐᓂᒃ ᐄᑦᔨᑉᑎᒥ ᐃᓄᖃᖏᑦᑐᒥᓗ, ᐆᒃᑐᕐᒪᖓᓗ ᒫᓐᓇ ᖁᓕᕕᒡᓗᑎᒃ ᓂᐱᓐᓂᒡᓗ ᓈᓚᓚᐅᕋᑎᒃ, 23 ᐃᒫᓪᓚᕆᒃ ᑕᑯᓂᐊᓐᖏᓚᑦ ᓄᓇᒥᒃ ᐊᑖᑕᖏᓐᓄᑦ ᐊᖏᕈᑎᒋᓯᒪᔭᓐᓂᒃ, ᐅᕙᓐᓂᒡᓗ ᓇᕐᕈᔪᓕᒫᑦ ᑍᑦᓱᒥᖓ ᑕᑯᓂᐊᓐᖏᓚᑦ. 24 ᐱᔨᒐᓕ ᑬᓚᐱ ᐊᑦᔨᒋᓐᖏᑕᖓᓐᓂᒃ ᐊᓂᕐᓂᕐᒥᒃ ᐱᓯᒪᖕᒪᑦ ᐅᕙᓐᓂᒡᓗ ᓈᓚᑦᓯᐊᕐᓗᓂ, ᓄᓇᒧᑦ ᐅᐸᓚᐅᕐᑕᖓᓄᑦ ᑎᑭᓐᓂᐊᕐᐳᖅ, ᑭᖑᕚᖏᑕᓗ ᓄᓇᒋᔪᒫᕐᐹᑦ. 25 ᒫᓐᓇᓕ ᐊᒪᓕᑬᑎᑦ ᑬᓇᓂᒥᐅᓪᓗ ᓇᕐᓴᒥ ᓄᓇᖃᕐᒪᑕ; ᖃᐅᒃᐸᑦ ᐅᑎᕆᐊᕐᓂᐊᕐᐳᓯ ᐃᓄᖃᖏᑦᑑᑉ ᓇᓛᓄᑦ ᐃᖏᕐᕋᓕᕐᓗᓯ ᐃᒪᕐᒧᑦ ᐊᐅᐸᓗᒃᑕᒧᑦ.” ᐊᑕᓂᐅᑉ ᓱᒋᐊᕐᓯᓂᖓ ᐃᓄᖕᓂᒃ ᓈᒻᒪᒃᓴᖏᑦᑐᓂᒃ 26 ᐊᑕᓂᖅ ᐅᖃᕐᐳᖅ ᒨᓯᓯᒧᑦ ᐂᕉᓂᒧᓪᓗ, ᐅᖃᕐᓗᓂ, 27 “ᖃᓄᖅ ᐊᑯᓂᐅᑎᒋᔪᒥᒃ ᐃᓅᖃᑎᒌᒡᔪᐊᑦ ᐱᐅᖏᑦᑐᑦ ᕿᓄᐃᓵᕈᑎᒋᓂᐊᕐᐸᒃᑲ ᓈᒻᒪᒃᓴᕋᑎᒃ ᓂᓪᓕᐊᔪᑦ ᐅᕙᓐᓄᑦ? ᐃᓴᕆᐊᓕᒥᐅᑦ ᐅᕙᓐᓄᑦ ᓂᓪᓕᐊᑲᒻᒪᖕᓂᖏᑦ ᑐᓵᕙᒃᑲ. 28 ᐅᖃᐅᑎᒃᑭᑦ, ᐊᑕᓂᖅ ᐅᖃᕐᐳᖅ ‘ᐃᓅᑎᓪᓗᖓ ᐅᖃᓚᐅᕋᑦᓯ ᑐᓵᑎᓪᓗᖓ, ᑍᒪᒃ ᐱᓂᐊᕐᕕᒋᓂᐊᕐᐸᑦᓯ; 29 ᓈᒻᒪᒃᓴᕋᓯ ᓂᓪᓕᐊᔪᓯ ᐅᕙᓐᓄᑦ, ᑎᒥᕕᓂᓯ ᐅᕐᕈᖓᔪᒫᕐᐳᑦ ᐃᓄᖃᖏᑦᑐᒥ, ᐃᓕᑦᓯ ᓈᓴᕐᑕᐅᓚᐅᕐᑐᓯ, ᐅᓄᕐᓂᓯ ᒪᓕᒡᓗᒋᑦ, ᐊᕐᕌᒍᓖᑦ 20ᓂᒃ ᐅᖓᑖᓂᓗ. 30 ᑬᓚᐱ ᔨᐳᓂᐊᐅᑉ ᐃᕐᓂᖓ ᔮᓱᐊᓗ ᓈᓂᐅᑉ ᐃᕐᓂᖓ, ᐱᓐᖏᑕᑐᐊᕆᓗᒋᒃ, ᓇᓕᕐᓯᓘᓐᓃᑦ ᐃᑎᕐᓂᐊᓐᖏᓚᓯ ᓄᓇᒧᑦ ᐃᓕᑦᓯᓐᓄᑦ ᐃᓂᒋᔭᒃᓴᐅᖁᓪᓗᒍ ᐊᖏᕈᑎᒋᓚᐅᕐᑕᓐᓄᑦ. 31 ᕿᑐᕐᖓᓯᓕ ᑐᖁᑕᐅᓂᐊᕐᓂᕋᕐᑕᓯ ᐃᑎᕐᑎᓐᓂᐊᕐᐸᒃᑲ, ᓄᓇᒥᒃ ᖃᐅᔨᑦᓯᐊᕈᒫᕐᐳᑦ ᓇᕐᕈᒋᔭᑦᓯᓐᓂᒃ. 32 ᐃᓕᑦᓯᓕ, ᑎᒥᓯ ᐅᕐᕈᔪᒫᕐᐳᑦ ᐃᓄᖃᖏᑦᑐᒥ. 33 ᐃᕐᓂᓯᓗ ᓰᐱᓂᒃ ᑲᒪᔨᐅᔪᒫᕐᐳᑦ ᐃᓄᖃᖏᑦᑐᒥ ᐊᕐᕌᒍᓂᒃ 40ᓂᒃ, ᐅᖁᒤᑦᔪᑎᓂᒃ ᐊᑐᕐᓗᑎᒃ ᓈᓚᖏᓐᓂᕆᓚᐅᕐᑕᑦᓯᓐᓂᒃ, ᑎᒥᓯ ᐃᓄᖃᖏᑦᑐᒥ ᐅᕐᕈᓚᐅᖅᑳᕐᑎᓐᓇᒋᑦ. 34 ᐅᓪᓗᐃᑦ ᐅᓄᕐᓂᖏᑦ ᓄᓇᒥᒃ ᐃᔨᕋᕐᑐᕐᓗᓯ ᕿᒥᕐᕈᓚᐅᕐᓂᓯ ᒪᓕᒡᓗᒋᑦ, ᐅᓪᓗᐃᑦ 40ᐃᑦ ᐅᓪᓗᖅ ᐊᑕᐅᓯᖅ ᐊᕐᕌᒍᒧᑦ ᐊᑕᐅᓯᕐᒧᑦ ᐸᓯᔭᒃᓴᐅᑦᔪᑎᒋᓗᒍ, ᐃᒫᒃ ᐊᕐᕌᒍᓂᒃ 40ᓂᒃ, ᓈᒻᒪᒃᓴᖏᓐᓂᕋ ᖃᐅᔨᔪᒫᕐᐸᓯ.’ 35 ᐅᕙᖓ ᐊᑕᓂᖅ ᑍᒫᒃ ᐅᖃᕐᐳᖓ, ᑍᒫᓪᓚᕆᒃ ᐱᓂᐊᕐᐳᖓ ᐱᐅᖏᑦᑐᓕᔪᓄᑦ ᐃᓅᖃᑎᒌᒡᔪᐊᓄᑦ ᑲᑎᓐᖓᔪᓄᑦ ᐊᑭᕋᕐᑐᕈᒪᓪᓗᑎᒃ ᐅᕙᓐᓂᒃ, ᐃᓄᖃᖏᑦᑐᒥ ᑕᒫᓂ ᓄᖑᑕᐅᔪᒫᕐᐳᑦ ᑐᖁᔪᒫᕐᓗᑎᒃᓗ.” 36 ᐊᖑᑎᓪᓕ ᒨᓯᓯᐅᑉ ᑎᓕᓚᐅᕐᑕᖏᑦ ᓄᓇᒥᒃ ᐃᔨᕋᕐᑐᕐᓗᑎᒃ ᕿᒥᕐᕈᔭᕐᑐᓚᐅᕐᑐᑦ, ᐅᑎᓚᐅᕐᑐᓪᓗ ᐃᓅᖃᑎᒌᒡᔪᐊᓂᒃ ᓈᒻᒪᒃᓴᕈᓁᕐᑎᑦᓯᓪᓗᑎᒃ ᓂᓪᓕᐊᑎᑦᓯᓚᐅᕐᑐᑦ ᒨᓯᓯᒥᒃ ᐊᑭᕋᕐᑐᕐᓗᑎᒃ ᐱᐅᖏᑦᑐᒥᒡᓗ ᓄᓇᒥᒃ ᐅᓂᒃᑳᓚᐅᕐᑐᑦ, 37 ᑍᒃᑯᐊ ᐊᖑᑎᑦ ᓄᓇᒥᒃ ᐱᐅᖏᓐᓂᕅᓪᓗᑎᒃ ᐅᓂᒃᑳᓚᐅᕐᑐᑦ ᐅᕐᕈᕗᑦ ᐋᓐᓂᐊᓇᕐᑐᒧᑦ ᑐᖁᓪᓗᑎᒡᓗ, ᐊᑕᓂᐅᑉ ᓵᖓᓂ. 38 ᔮᓱᐊᓕ ᓈᓂᐅᑉ ᐃᕐᓂᖓ ᑬᓚᐱᓗ ᔨᐳᓂᐊᐅᑉ ᐃᕐᓂᖓ ᐃᓅᓚᐅᕐᐴᒃ, ᑍᒃᑯᓇᓐᖓᑦ ᓄᓇᒥᒃ ᐃᔨᕋᕐᑐᕐᓗᑎᒃ ᕿᒥᕐᕈᔭᕐᑐᓚᐅᕐᑐᓂᑦ ᐊᒥᐊᒃᑯᑑᓪᓗᑎᒃ. ᐅᓇᑕᕆᐊᕐᓂᖓᑦ ᓵᓚᖃᖏᓐᓂᖓᓪᓗ 39 ᒨᓯᓯᐅᑉ ᑖᒃᑯᐊ ᐅᖃᐅᓰᑦ ᐃᓴᕆᐊᓕᒥᐅᓄᑦ ᐅᖃᐅᓯᕆᖕᒪᒋᑦ, ᐃᓄᐃᑦ ᕿᒃᓵᕕᒡᔪᐊᓕᓚᐅᕐᐳᑦ. 40 ᐅᓪᓛᕌᕐᔪᒃᑯᑦ ᒪᑭᓐᓇᒥᒃ ᖃᖅᑲᐅᑉ ᖄᖓᓄᑦ ᒪᔪᕋᕐᐳᑦ, ᐅᖃᕐᓗᑎᒡᓗ, “ᑕᕝᕙ ᒪᔪᕋᓕᕐᐳᒍᑦ ᐊᑕᓂᐅᑉ ᐅᐸᖁᓪᓗᓂᐅᒃ ᐊᖏᕈᑎᒋᔭᖓᓄᑦ, ᐊᔪᕐᑐᓕᓚᐅᕋᑦᑕ!” 41 ᒨᓯᓯᓗ ᐅᖃᕐᐳᖅ, “ᓱᖕᒪᑦ ᐊᑕᓂᐅᑉ ᐱᖁᔨᓂᖓᓂᒃ ᓈᓚᓐᖏᓚᓰ? ᑍᒫᒃ ᓵᓚᖃᕐᓂᐊᖏᑦᑐᓯ. 42 ᒪᔪᕋᖏᓪᓗᓯ ᐊᑭᕋᑦᓯᓐᓄᑦ ᓵᓚᐅᖁᓇᓯ, ᑍᒫᒃ ᐊᑕᓂᐅᑉ ᐃᓚᒋᖏᒻᒪᓯ. 43 ᐊᒪᓕᑬᑎᑦ ᑬᓇᓂᒥᐅᓪᓗ ᐊᑭᑦᓯᓐᓃᒻᒪᑕ ᓴᕕᒡᔪᐊᒧᑦ ᑐᖁᑕᐅᓂᐊᕐᐳᓯ; ᐊᑕᓂᖅ ᑐᓄᓯᒪᒐᑦᓯᐅᒃ, ᐊᑕᓂᐅᑉ ᐃᓚᒋᓂᐊᓐᖏᓛᓯ.” 44 ᑲᔪᓯᓇᓱᐊᕐᐳᓪᓕ ᖃᖅᑲᐅᑉ ᖄᖓᓄᑦ ᑎᑭᓐᓇᓱᐊᕐᓗᑎᒃ, ᑍᒤᒐᓗᐊᕐᑎᓪᓗᒋᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖁᑎᖓ ᐱᖁᔭᕐᑕᓕᒃ ᒨᓯᓯᓘᓐᓃᑦ ᑕᖕᒫᕐᓯᒪᕕᖕᒥᑦ ᓅᓚᐅᓐᖏᓛᒃ. 45 ᐊᒪᓕᑬᑎᓪᓕ ᑬᓇᓂᒥᐅᓪᓗ ᖃᖅᑲᒥ ᐃᓂᖃᕐᑐᑦ ᐊᖅᑲᕐᑎᓕᕐᐳᑦ ᐅᓇᑕᕆᐊᓕᕐᓗᑎᒃ ᑖᒃᑯᓂᖓ, ᕿᒫᑎᓪᓗᒋᓪᓗ ᖃᖅᑲᖅ ᕼᐅᕐᒪ ᑎᑭᓪᓗᒍ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society