ᒨᓯᓯ ᓯᑕᒪᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᑎᓕᔭᐅᔪᑦ ᓄᓇᒧᑦ ᑬᓇᓂᒧᑦ ᐃᔨᕋᕐᑐᕐᓗᑎᒃ ᕿᒥᕐᕈᐊᕆᐊᕐᑐᖅᑯᓪᓗᒋᑦ

¹ ᐊᑕᓂᖅ ᒨᓯᓯᒧᑦ ᐅᖃᕐᐳᖅ ᐃᒤᓕᓪᓗᓂ,

² “ᑎᓕᓯᓚᐅᕆᑦ ᐊᖑᑎᓂᒃ ᐃᔨᕋᕐᑐᕐᓗᑎᒃ ᕿᒥᕐᕈᓂᐊᕐᑐᓂᒃ ᓄᓇᒥᒃ ᑬᓇᓂᒥᒃ, ᐃᓴᕆᐊᓕᒥᐅᓄᑦ ᑐᓂᓂᐊᕐᑕᓐᓄᑦ; ᑭᖑᕚᖑᖃᑎᒌᑦ ᐊᑐᓂᑦ ᐊᖓᔪᖅᑳᖏᓐᓂᑦ ᓯᕗᓕᕐᑎᐅᔪᓂᒃ ᐊᑕᐅᓯᕐᒥᒃ ᓂᕈᐊᕐᓗᑎᑦ.”

³ ᑍᒤᒻᒪᑦ ᒨᓯᓯ ᑎᓕᓯᓚᐅᕐᐳᖅ ᐃᓄᖃᖏᑦᑐᒥᑦ ᐸᕌᓐᒥᒃ ᐊᑎᓕᖕᒥᑦ ᐱᓪᓗᑎᒃ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ, ᑎᓕᔭᐅᔪᓕᒫᓪᓗ ᐃᓴᕆᐊᓕᒥᐅᑦ ᓯᕗᓕᕐᑎᒋᕔᑦ.

⁴ ᐅᑯᐊᖑᓚᐅᕐᐳᑦ: ᕉᐱᓂᐅᑉ ᑭᖑᕚᖏᓐᓂᑦ, ᓵᒧᐊ ᔭᑯᕆᐅᑉ ᐃᕐᓂᖓ;

⁵ ᓯᒥᐅᓂᐅᑉ ᑭᖑᕚᖏᓐᓂᑦ, ᓴᐹᑦ ᕼᐅᕆᐅᑉ ᐃᕐᓂᖓ;

⁶ ᔫᑕᐅᑉ ᑭᖑᕚᖏᓐᓂᑦ, ᑬᓚᐱ, ᔨᐳᓂᐊᐅᑉ ᐃᕐᓂᖓ;

⁷ ᐃᓴᑳᕆᐅᑉ ᑭᖑᕚᖏᓐᓂᑦ, ᐃᒐᐅᓪ ᔫᓯᐱᐅᑉ ᐃᕐᓂᖓ;

⁸ ᐃᕗᕅᒥᐅᑉ ᑭᖑᕚᖏᓐᓂᑦ, ᕼᐆᓯᐊ ᓈᓂᐅᑉ ᐃᕐᓂᖓ;

⁹ ᐱᓐᔭᒥᓂᐅᑉ ᑭᖑᕚᖏᓐᓂᑦ, ᐸᓪᑎ ᕌᕗᑉ ᐃᕐᓂᖓ;

¹⁰ ᓯᐳᓗᓂᐅᑉ ᑭᖑᕚᖏᓐᓂᑦ, ᒐᑍᓕ ᓲᑎᐅᑉ ᐃᕐᓂᖓ;

¹¹ ᔫᓯᐱᐅᑉ ᑭᖑᕚᖏᓐᓂᑦ, ᑕᕝᕙ ᒫᓇᓯᐅᑉ ᑭᖑᕚᖏᓐᓂᑦ, ᒑᑎ ᓲᓯᐅᑉ ᐃᕐᓂᖓ;

¹² ᑖᓐ ᑭᖑᕚᖏᓐᓂᑦ, ᐊᒥᐃᐅᓪ ᒋᒪᓕᐅᑉ ᐃᕐᓂᖓ;

¹³ ᐋᓱᕆᐅᑉ ᑭᖑᕚᖏᓐᓂᑦ, ᓯᑐᕆ ᒤᑰᑉ ᐃᕐᓂᖓ;

¹⁴ ᓈᑉᑕᓕᐅᑉ ᑭᖑᕚᖏᓐᓂᑦ, ᓈᐰ ᕘᑉᓯᐅᑉ ᐃᕐᓂᖓ;

¹⁵ ᒑᑎᐅᑉ ᑭᖑᕚᖏᓐᓂᑦ, ᒋᐅᐃᐅᓪ ᒫᑭᐅᑉ ᐃᕐᓂᖓ.

¹⁶ ᑖᒃᑯᐊ ᑕᕝᕙ ᐊᖑᑎᑦ ᐊᑎᖏᑦ ᒨᓯᓯᐅᑉ ᑎᓕᓚᐅᕐᑕᖏᑦ ᐃᔨᕋᕐᑐᕐᓗᑎᒃ ᓄᓇᒥᒃ ᕿᒥᕐᕈᔭᕐᑐᖁᓪᓗᒋᑦ. ᒨᓯᓯᐅᓪᓗ ᕼᐆᓯᐊ ᓈᓂᐅᑉ ᐃᕐᓂᖓ ᐊᑎᕐᑖᕐᑎᑉᐹ ᔮᓱᐊᒥᒃ.

¹⁷ ᑕᕝᕙ ᒨᓯᓯᐅᑉ ᑎᓕᕔᑦ ᐃᔨᕋᕐᑐᕐᓗᑎᒃ ᓄᓇᒥᒃ ᑬᓇᓂᒥᒃ ᕿᒥᕐᕈᔭᕐᑐᖁᓪᓗᒋᑦ, ᐅᖃᐅᑎᓪᓗᒋᓪᓗ, “ᒪᐅᓈᕐᓗᓯ ᓯᕿᓂᐅᑉ ᓇᓛᓂᑦ ᓂᒋᑉᒥᑦ ᖃᖅᑲᓄᑦ ᐂᓕᕆᕐᓯ,

¹⁸ ᕿᒥᕐᕈᒋᑦᓯ ᓄᓇ ᖃᓄᐃᑦᑑᖕᒪᖔᑦ: ᐃᓄᐃᓪᓗ ᑖᕙᓂ ᓄᓇᖃᕐᑐᑦ ᓴᓐᖏᔫᖕᒪᖔᑕ ᓴᓐᖐᑦᑑᖕᒪᖔᑕᓘᓐᓂᑦ ᐅᓄᖏᒻᒪᖔᑕᓘᓐᓃᑦ ᐅᓄᕐᒪᖔᑕᓘᓐᓃᑦ;

¹⁹ ᓄᓇ ᓄᓇᒋᔭᖓᑦ ᐱᐅᖕᒪᖔᑦ ᐱᐅᖏᒻᒪᖔᓪᓘᓐᓃᑦ; ᐃᒡᓗᒐᓴᒡᔪᐊᖁᑎᖏᓪᓗ ᑕᖕᒫᕐᓯᒪᕕᐅᔮᕐᒪᖔᑕᓘᓐᓃᑦ ᓴᐴᓗᑕᖃᕐᒪᖔᑕᓘᓐᓃᑦ;

²⁰ ᓄᓇ ᐱᕈᕐᕕᐅᑦᓯᐊᕐᒪᖔᑦ ᐱᕈᕐᕕᐅᑦᓯᐊᖏᒻᒪᖔᑕᓘᓐᓃᑦ; ᑲᑎᓐᖓᔪᕐᔪᐊᓂᒃ ᓇᐹᕐᑐᖃᕐᒪᖔᑦ ᓇᐹᕐᑐᖃᖏᒻᒪᖔᓪᓘᓐᓃᑦ, ᓯᕘᕋᖏᓪᓗᓯ ᕾᑦᓯᔪᒫᕐᐳᓯ ᓄᓇᐅᑉ ᐱᕈᕐᑐᖏᓐᓂᒃ.” ᓇᓪᓕᐅᑎᓚᐅᕐᐳᓪᓗ ᑍᑦᓱᒪᓂ ᓯᕗᓪᓖᑦ ᕔᓂᒃᓮᑦ ᐱᕈᕇᑦᓯᐊᕐᕕᖓᑦ.

²¹ ᐂᓚᐅᕐᐳᑦ ᐃᔨᕋᕐᑐᕐᓗᑎᒃ ᓄᓇ ᕿᒥᕐᕈᔭᕐᑐᕐᓗᒍ ᐃᓄᖃᖏᑦᑐᒥᑦ ᔨᓐᒥᒃ ᐊᑎᓕᖕᒥᑦ ᐱᒋᐊᕐᓗᑎᒃ ᕅᕼᐊᐱ ᑎᑭᓪᓗᒍ, ᕼᐊᒫᑎ ᐃᑎᕐᑕᕐᕕᐅᑉ ᖃᓂᑕᖓᓂ.

²² ᐂᓚᐅᕐᐳᑦ ᓯᕿᓂᐅᑉ ᓇᓛᓂᑦ ᓂᒋᑉᒥᑦ ᕼᐃᑉᐳᕌᓂ ᑎᑭᓪᓗᒍ; ᐊᕼᐂᒪᓐ, ᓯᓮᓗ, ᑕᓪᒤᓗ ᐊᓇᑭᐅᑉ ᑭᖑᕚᖏᑦ ᑍᑲᓃᓚᐅᕐᐳᑦ. (ᕼᐃᐸᕋᓐ ᓴᓇᔭᐅᓚᐅᕐᑐᖅ ᔪᐊᓂ ᐄᑦᔨᑉᑎᒦᑦᑐᖅ ᐊᕐᕌᒍᑦ 7ᐃᑦ ᓴᓇᔭᐅᓚᖅᑳᕐᑎᓐᓇᒍ.)

²³ ᓇᕐᓴᒧᑦ ᐊᑎᓕᖕᒧᑦ ᐃᔅᑯᓪᒥᒃ ᑎᑭᓐᓇᒥᒃ, ᓇᐹᕐᑑᑉ ᐊᕙᓚᖓᔪᖓᓂᒃ ᓇᑲᑦᓯᕗᑦ ᐸᐅᕐᖓᓂᒃ ᐊᑕᐅᓯᐅᓕᖅᑲᖓᔪᓂᒃ ᕔᓂᒃᓴᓂᒃ ᑲᑎᓐᖓᔪᓂᒃ; ᒪᕐᕉᓪᓗᑎᒃ ᐊᒡᔭᕐᓯᓕᕐᐳᒃ ᕿᔪᖕᒧᑦ ᐊᑭᕋᕐᓗᒍ.

²⁴ ᓄᓇ ᑖᓐᓇ ᐊᑎᖃᕐᐳᖅ ᐃᔅᑯᓪ ᑕᕝᕙᓂ ᐊᖑᑎᑦ ᐃᓴᕆᐊᓕᒥᐅᑦ ᕔᓂᒃᓴᓂᒃ ᑲᑎᓐᖓᔪᓂᒃ ᓇᑲᑦᓯᓚᐅᕐᒪᑕ ᓇᐹᕐᑐᒥᑦ.

²⁵ ᐅᑎᓚᐅᕐᐳᓪᓗ ᐃᔨᕋᕐᑐᕐᓗᑎᒃ ᓄᓇᒥᒃ ᕿᒥᕐᕈᔭᕐᑐᕐᓯᒪᓚᐅᕐᓗᑎᒃ ᐅᓪᓗᓂᒃ 40ᓂᒃ.

²⁶ ᐊᐅᓪᓚᕋᒥᒃ ᒨᓯᓯᒧᑦ ᐂᕉᓂᒧᓪᓗ ᐃᓴᕆᐊᓕᒥᐅᓄᑦ ᐅᑎᕐᐳᑦ, ᑲᑎᓯᒦᑦᑐᓄᑦ ᐃᓄᖃᖏᑦᑐᒥ ᐸᕌᓐᒥ; ᐅᓂᒃᑳᕐᓗᑎᒡᓗ ᐃᓄᖃᑎᒌᒡᔪᐊᓄᑦ, ᓄᓇᐅᓪᓗ ᐸᐅᕐᖓᖏᓐᓂᒃ ᑕᑯᑎᓪᓗᒋᑦ.

²⁷ ᑖᒃᑯᓄᖓ ᐅᓂᒃᑳᕐᐳᑦ ᐅᖃᕐᓗᑎᒃ: “ᓄᓇᒧᑦ ᐂᓚᐅᕐᐳᒍᑦ ᐅᕙᑦᑎᓐᓂᒃ ᑎᓕᓯᕝᕕᒋᓚᐅᕐᑕᑦᓯᓐᓄᑦ ᐱᕈᕐᑐᖃᑦᓯᐊᕐᑐᒧᑦ ᐊᔪᕐᓴᕐᓇᖏᑦᑐᒧᓪᓗ, ᐅᕝᕙᓗ ᐸᐅᕐᒊᑦ ᓄᓇᒥ ᐱᕈᕐᑐᑦ.

²⁸ ᑭᓯᐊᓂᓕ ᐃᓄᐃᑦ ᑖᕙᓂ ᓄᓇᖃᕐᑐᑦ ᓴᓐᖏᔪᐊᓘᕗᑦ; ᓄᓇᓕᒡᔪᐊᖏᓪᓗ ᐊᕙᓗᕐᔪᐊᖃᕐᐳᑦ ᓴᐴᓗᑕᖃᕐᓗᑎᒃ ᐊᖏᔪᕐᔪᐊᖑᓪᓗᑎᒡᓗ; ᐊᒻᒪᓗ ᑕᑯᓚᐅᕐᐳᒍᑦ ᐊᓇᑭᐅᑉ ᑭᖑᕚᖏᓐᓂᒃ ᑕᐅᕙᓂ.

²⁹ ᐊᒪᓕᑬᑎᑦ ᓄᓇᖃᕐᐳᑦ ᓯᕿᓂᐅᑉ ᓇᓛᓂ ᓂᒋᑉᒥ; ᕼᐃᑍᑎᑦ, ᔨᐳᓮᑎᑦ, ᐊᒧᕅᑎᓪᓗ ᓄᓇᖃᕐᐳᑦ ᖃᖅᑲᓂ; ᑬᓇᓂᒥᐅᑦ ᓄᓇᖃᕐᐳᑦ ᐃᒪᐅᑉ ᓯᓈᓂ ᑰᓪᓗ ᔪᐊᕐᑕᓂᐅᑉ ᓯᓈᓂ.”

³⁰ ᑬᓚᐱᐅᑉ ᐃᓄᐃᑦ ᓂᐸᖏᖁᕔᑦ ᒨᓯᓯᐅᑉ ᓵᖓᓂ, ᐅᖃᕐᓗᓂᓗ, “ᐊᑏ ᒫᓐᓇ ᑖᕗᖓ ᐂᓕᕐᑕ ᐱᑖᕆᔭᕐᑐᓕᕐᓗᒍ, ᐊᔪᖏᓐᓇᑦᑕ ᓵᓚᒋᔪᓐᓇᑦᓯᐊᕋᑦᑎᒍ.”

³¹ ᐊᖑᑎᓪᓕ ᐊᐅᓪᓚᕐᓯᒪᖃᑎᒋᓚᐅᕐᑕᖏᑦ ᑕᐅᕗᖓ ᐅᖃᕐᐳᑦ, “ᑍᒃᑯᐊ ᐅᓇᑕᕆᐊᕐᑐᕈᓐᓇᓐᖏᑕᕗᑦ ᐊᔪᓗᐊᕋᕐᑕ, ᐅᕙᑦᑎᓐᓂᑦ ᓴᓐᖏᓂᕐᓴᐅᖕᒪᑕ.”

³² ᑖᒃᑯᐊᓗ ᐅᓂᒃᑳᕐᐳᑦ ᐱᐅᖏᓐᓂᕅᓪᓗᑎᒃ ᐃᓴᕆᐊᓕᒥᐅᓄᑦ ᓄᓇᒥᒃ ᐃᔨᕋᕐᑐᕐᓗᑎᒃ ᕿᒥᕐᕈᔭᕐᑐᓚᐅᕐᑕᒥᖕᓂᒃ ᐅᖃᕐᓗᑎᒃ, “ᓄᓇ ᐃᔨᕋᕐᑐᕐᓗᑕ ᕿᒥᕐᕈᔭᕐᑐᓚᐅᕐᑕᕗᑦ ᓱᒃᑯᔨᐊᖃᕐᐳᑦ ᐃᓄᖕᓂᒃ ᑖᕙᓂ ᓄᓇᖃᕐᑐᓂᒃ; ᐃᓄᐃᑦ ᑖᕙᓂ ᑕᑯᔭᓕᒫᕗᑦ ᐊᖏᔫᑎᐊᓘᕗᑦ.

³³ ᑖᕙᓂ ᑕᑯᓚᐅᕐᐳᒍᑦ ᐃᓄᒃᐸᓂᒃ (ᐊᓇᑭᐅᑉ ᑭᖑᕚᖏᑦ ᐃᓄᒃᐸᓂᑦ ᐱᓯᒪᖕᒪᑕ); ᐅᕙᒍᓪᓕ ᖁᐱᕐᕈᑎᑐᑦ ᐱᒡᓕᕐᑕᐅᔮᕐᑐᑎᑐᑦ ᑍᒤᓚᐅᕐᐳᒍᑦ ᑕᐅᑐᒃᑕᑦᑎᒍᑦ, ᑍᒫᒃᑕᐅᖅ ᑍᒃᑯᓇᓐᖓᑦ ᑕᐅᑐᒃᑕᐅᓪᓗᑕ.”