ᒨᓯᓯ ᓯᑕᒪᖏᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᒪᕐᕉᒃ ᑎᑦᑐᓚᐅᑏᒃ ᓯᐅᓪᕕᕇᒃ

¹ ᐊᑕᓂᐅᓪᓗ ᒨᓯᓯ ᐅᖃᕐᕕᒋᕚ, ᐅᖃᕐᓗᓂ:

² “ᒪᕐᕉᖕᓂᒃ ᑎᑦᑐᓚᐅᑏᖕᓂᒃ ᓴᓇᓚᐅᕆᑦ ᐱᒋᓂᐊᕐᑕᕐᓂᒃ; ᓴᓇᓯᒪᔭᕆᐊᖃᕐᐴᒃ ᑲᓱᐊᕐᓯᒪᓗᑎᒃ; ᐊᑐᕆᐊᖃᕐᐹᒃᑭᒃ ᐃᓄᒋᐊᕐᑐᕐᔪᐊᓂᒃ ᕾᖁᔨᑦᔪᑎᒋᓗᒋᒃ ᑕᖕᒫᕐᓯᒪᔪᓪᓗ ᓱᒋᐊᖃᕐᒪᖔᑕ ᓇᓗᓁᕐᓯᑦᔪᑎᒋᓗᒋᒃ.

³ ᑕᒪᕐᒥᒃ ᓂᓪᓕᕐᑎᑕᐅᒃᐸᑎᒃ, ᐃᓄᒋᐊᒃᑐᕐᔪᐊᑦ ᑕᕝᕙ ᓵᖕᓂ ᑲᑎᔭᕆᐊᖃᕐᐳᑦ ᑐᐱᕐᔪᐊᑉ ᑲᑎᒪᕕᐅᑉ ᐃᑎᕐᑕᕐᕕᖓᓂ.

⁴ ᐊᑕᐅᓯᕐᓕ ᓂᓪᓕᕐᑎᑕᐅᒃᐸᑦ, ᑕᕝᕙ ᓯᕗᓕᕐᑎᑦ ᑭᓯᒥ, ᐃᓴᕆᐊᓕᐅᑉ ᑭᖑᕚᖏᑕ ᓯᕗᓕᕐᑎᖏᑦ ᓵᖕᓂ ᑲᑎᔭᕆᐊᖃᕐᐳᑦ.

⁵ ᐃᖏᕐᕋᖁᔨᓂᕐᒧᑦ ᓂᓪᓕᐊᑎᑦᓯᒍᕕᑦ, ᓯᕿᓂᐅᑉ ᓄᐃᕕᐊᓂᑦ ᑕᖕᒫᕐᓯᒪᔪᑦ ᑕᕝᕙ ᐃᖏᕐᕋᓯᔭᕆᐊᖃᓕᕐᐳᑦ.

⁶ ᐃᖏᕐᕋᖁᔨᓂᕐᒧᑦ ᓂᓪᓕᕐᑎᑦᓯᒃᑲᓐᓂᕈᕕᑦ, ᓂᒋᕐᒥ ᑕᖕᒫᕐᓯᒪᔪᑦ ᑕᕝᕙ ᐃᖏᕐᕋᓯᔭᕆᐊᖃᓕᕐᐳᑦ, ᑍᒃᑯᐊᓗ ᓂᓪᓕᕐᑎᑦᓯᔭᕆᐊᖃᕆᕗᑦ ᐃᖏᕐᕋᖁᔨᓂᕐᒥᒃ.

⁷ ᐃᓄᒋᐊᒃᑐᕐᔪᐊᓪᓕ ᑲᑎᔭᕆᐊᖃᕐᐸᑕ, ᓂᓪᓕᕐᑎᑦᓯᔭᕆᐊᖃᕐᐳᑎᑦ, ᐃᖏᕐᕋᓯᖁᔨᑦᔪᑎᐅᖏᑦᑐᒥᒃ.

⁸ ᑐᓂᕐᕈᓯᕐᑎᑦᓯᔩᑦ ᐂᕉᓂᐅᑉ ᐃᕐᓂᖏᑦ ᑎᑦᑐᓚᐅᑎᓂᒃ ᓂᓪᓕᕐᑎᑦᓯᔭᕆᐊᖃᕐᐳᑦ; ᑕᒪᓐᓇ ᑕᕝᕙ ᐱᖁᔭᖅ ᒪᓕᒋᐊᖃᕐᑕᓯ ᑍᒪᓐᖓᓕᒫᖅ ᑭᖑᕚᕇᓄᑦ.

⁹ “ᐅᓇᑕᕆᐊᕐᑐᓕᕈᑦᓯᓕ ᓄᓇᑦᓯᓐᓂ ᐊᑭᕋᕐᑐᕐᑎᓯ ᐊᑭᕋᕐᑐᕐᓗᒋᑦ, ᓂᓪᓕᐊᑎᑦᓯᔭᕆᐊᖃᕐᐳᓯ ᑎᑦᑐᓚᐅᑎᓂᒃ, ᐃᖅᑲᐅᒪᔭᐅᓂᐊᕐᐳᓯᓗ ᐊᑕᓂᐅᑉ ᒎᑎᑦᓯ ᓵᖓᓂ, ᓴᐳᑎᔭᐅᓗᓯᓗ ᐊᑭᕋᑦᓯᓐᓂᑦ.

¹⁰ ᐊᒻᒪᓗᑦᑕᐅᖅ ᐅᓪᓗᓂ ᖁᕕᐊᓇᕐᑐᓂ, ᓇᓪᓕᐅᓐᓂᕐᓯᐅᕐᕕᒋᕙᒃᑕᑦᓯᓐᓂ, ᑕᖅᑭᐅᓪᓗ ᐱᒋᐊᓕᕐᓂᖏᓐᓂ, ᑎᑦᑐᓚᐅᑎᓂᒃ ᓂᓪᓕᐊᑎᑦᓯᔭᕆᐊᖃᕐᐳᓯ ᐆᑕᒃᓮᑦ ᑐᓂᕐᕈᑕᐅᑎᓪᓗᒋᑦ ᓮᒪᓂᕐᒧᓪᓗ ᑐᓂᕐᕈᑏᑦ ᑐᓂᕐᕈᑕᐅᑎᓪᓗᒋᑦ; ᑕᒪᒃᑯᐊ ᐃᖅᑲᐅᒪᑦᔪᑎᒃᓴᐅᖕᒪᑕ ᒎᑎᑦᓯ ᓵᖓᓂ: ᐊᑕᓂᐅᒐᒪ ᒎᑎᓯ.”

ᓮᓁᒥᑦ ᐊᐅᓪᓚᓕᕐᓂᖓᑦ

¹¹ ᐱᔪᖃᓚᐅᕐᐳᖅ ᐅᓪᓗᐃᑦ 20ᖓᓂ ᑕᖅᑭᐅᑉ ᐂᑉᐸᖓᓂ, ᐊᕐᕌᒍᑉ ᐂᑉᐸᕆᓕᕐᑕᖓᓂ, ᓄᕗᔭ ᖁᒻᒧᐊᓚᐅᕐᐳᖅ ᑐᐱᕐᔪᐊᖅ ᐊᖏᕈᑎᑕᓕᐅᑉ ᖁᓛᓂᑦ.

¹² ᐃᓴᕆᐊᓕᐅᓪᓗ ᕿᑐᕐᖓᖏᑦ ᐃᓄᖃᖏᑦᑐᒥᑦ ᓮᓁᒥᑦ ᐃᖏᕐᕋᓯᓚᐅᕐᐳᑦ; ᓄᕗᔭᓗ ᓄᖅᑲᕐᓗᓂ ᐃᓄᖃᖏᑦᑐᒥ ᐸᕌᓐᒥ.

¹³ ᑕᕝᕙ ᓯᕗᓪᓕᕐᐹᒥᒃ ᐊᐅᓪᓚᓕᑍᓐᓇᓚᐅᕐᐳᑦ ᐊᑕᓂᐅᑉ ᐱᖁᔨᓂᖓ ᒪᓕᒡᓗᒍ ᒨᓯᓯᒧᑦ ᑕᓯᐅᕐᑕᐅᓪᓗᑎᒃ.

¹⁴ ᐅᓇᑕᕐᑐᓴᐅᖃᑎᒌᒃᔪᐊᑦ ᔫᑕᐅᑉ ᕿᑐᕐᖓᖏᑦ ᓯᕗᓪᓕᕐᐸᐅᓪᓗᑎᒃ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᓈᓲᓂ ᐊᒥᓇᑕᐱᐅᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ.

¹⁵ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᐃᓴᑳᕆᐅᑉ ᕿᑐᕐᖓᖏᓐᓄᑦ ᓂᑖᓂᐅᓪ ᔪᐊᕆᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

¹⁶ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᓯᐳᓗᓂᐅᑉ ᕿᑐᕐᖓᖏᓐᓄᑦ ᐃᓔᐊᑉ ᕼᐃᓘᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

¹⁷ ᑐᐱᕐᔪᐊᖅ ᑕᕝᕙ ᐲᔭᕐᑕᐅᕗᖅ; ᒌᕐᓲᓂᐅᓪᓗ ᐃᕐᓂᖏᑦ ᒥᕋᕆᐅᓪᓗ ᐃᕐᓂᖏᑦ ᐊᐅᓪᓚᓕᕆᕗᑦ, ᑐᐱᕐᔪᐊᒥᒃ ᐊᒡᔭᕐᓯᓪᓗᑎᒃ.

¹⁸ ᐅᓇᑕᕐᑐᓴᐅᖃᑎᒌᒃᔪᐊᑦ ᕉᐱᓂᐅᑉ ᕿᑐᕐᖓᖏᑦ ᐊᐅᓪᓚᕆᕗᑦ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᐃᓕᓱᕆ ᓯᑎᐅᕆᐅᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ.

¹⁹ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᓯᒥᐅᓂᐅᑉ ᕿᑐᕐᖓᖏᓐᓄᑦ ᓯᓘᒥᓕ ᔪᕆᓴᑍᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

²⁰ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᒑᑦ ᕿᑐᕐᖓᖏᓐᓄᑦ ᐃᓔᐊᓴᐱ ᑎᐅᐃᓕᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

²¹ ᑖᒃᑯᐊ ᑭᖑᓂᖓᓂ, ᑯᕼᐊᑍᑎᐅᑉ ᑭᖑᕚᖏᑦ ᐊᐅᓪᓚᕆᕗᑦ, ᐊᒡᔭᕐᓯᓪᓗᑎᒃ ᐃᑦᔪᕐᓁᑦᑐᓂᒃ. ᑐᐱᕐᔪᐊᖅ ᓇᑉᐸᕐᑕᐅᔭᕆᕐᐸᓚᐅᕐᒪᑦ ᑖᒃᑯᐊ ᑎᑭᓚᐅᕐᑎᓐᓇᒋᑦ.

²² ᐅᓇᑕᕐᑐᓴᐅᖃᑎᒌᒃᔪᐊᑦ ᐃᕗᕅᒥᐅᑉ ᕿᑐᕐᖓᖏᑦ ᐊᐅᓪᓚᕆᕗᑦ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᐃᓔᓴᒪ ᐊᒥᕼᐆᑎᐅᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ.

²³ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᒫᓇᓯᐅᑉ ᕿᑐᕐᖓᖏᓐᓄᑦ ᒐᒤᓕᓕ ᐱᑕᔪᕆᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

²⁴ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᐱᓐᔭᒥᓂᐅᑉ ᕿᑐᕐᖓᖏᓐᓄᑦ ᐊᐱᑖᓂ ᒋᑎᐅᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

²⁵ ᐅᓇᑕᕐᑐᓴᐅᖃᑎᒌᒃᔪᐊᑦ ᑖᓐ ᕿᑐᕐᖓᖏᑦ ᑭᖑᓪᓕᕐᐹᖑᓪᓗᑎᒃ ᐊᐅᓪᓚᕆᕗᑦ ᐅᓇᑕᕐᑐᒃᓴᐅᖃᑎᒌᒃᑐᑦ ᒪᓕᒡᓗᒋᑦ; ᐊᕼᐂᓱᕆ ᐊᒥᓴᑍᑉ ᐃᕐᓂᖓ ᐅᓇᑕᕐᑐᒃᓴᓄᑦ ᑖᒃᑯᓄᖓ ᐊᖓᔪᖅᑳᖑᓚᐅᕐᐳᖅ.

²⁶ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᐋᓱᕆᐅᑉ ᕿᑐᕐᖓᖏᓐᓄᑦ ᐸᒊᓕ ᐆᑯᕌᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

²⁷ ᐅᓇᑕᕐᑐᒃᓴᐅᖃᑎᒌᓄᓪᓗ ᑭᖑᕚᖑᖃᑎᒌᓄᑦ ᓈᑉᑕᓕᐅᑉ ᕿᑐᕐᖓᖏᓐᓄᑦ ᐊᕼᐂᕋ ᐃᓈᓂᐅᑉ ᐃᕐᓂᖓ ᐊᖓᔪᖅᑳᖑᓚᐅᕐᐳᖅ.

²⁸ ᑖᒃᑯᐊ ᑕᕝᕙ ᐱᓱᒃᑐᑦ ᐃᓴᕆᐊᓕᐅᑉ ᕿᑐᕐᖓᖏᑕ ᑭᖑᓕᕇᖕᓂᖏᑦ, ᐅᓇᑕᕐᑐᒃᓴᐅᖃᑎᒌᑦ ᑭᖑᓕᕇᒃᓗᑎᒃ, ᐃᖏᕐᕋᓯᓕᕐᑎᓪᓗᒋᑦ.

²⁹ ᒨᓯᓯ ᕼᐅᐹᐱᒧᑦ ᐅᖃᕐᐳᖅ ᕆᐅᓕᐅᑉ ᐃᕐᓂᖓᓄᑦ ᒥᑎᐊᓂᒥᐅᑕᕐᒧᑦ ᓴᑭᒥᓄᑦ, “ᐊᐅᓪᓚᓕᕋᑦᑕ ᓄᓇᒧᑦ ᐊᑕᓂᐅᑉ ᐅᖃᐅᓯᕆᔭᖓᓄᑦ, ‘ᓄᓇ ᐃᓕᑦᓯᓐᓄᑦ ᑐᓂᓂᐊᕐᐸᕋ,’ ᐅᕙᑦᑎᓐᓄᑦ ᐃᓚᐅᓚᐅᕆᑦ ᑲᒪᒋᑦᓯᐊᕐᓂᐊᕐᐸᑦᑎᒋᑦ; ᐊᑕᓂᖅ ᐊᖏᕐᓯᒪᖕᒪᑦ ᐱᐅᔪᓂᒃ ᐱᓂᐊᕐᓂᕋᕐᓗᓂ ᐃᓴᕆᐊᓕᒧᑦ.”

³⁰ ᑖᓐᓇ ᑭᐅᕗᖅ, “ᐃᓚᐅᓂᐊᖏᓐᓇᒪ, ᐊᐅᓪᓚᕐᓂᐊᕐᐳᖓᓕ ᓇᖕᒥᓂᖅ ᓄᓇᓐᓄᑦ, ᐃᓚᓐᓄᑦ ᐃᓅᖃᑎᓐᓄᑦ.”

³¹ ᒨᓯᓯᐅᓪᓕ ᐅᖃᐅᑎᕚ, “ᐊᑏ ᐅᕙᑦᑎᓐᓄᑦ ᐃᓚᐅᑐᐃᓐᓇᓚᐅᕆᑦ, ᖃᐅᔨᒪᒐᕕᑦ ᓇᒧᑦ ᑕᖕᒫᕆᐊᖃᕐᓂᑦᑎᓐᓂᒃ ᖃᐅᔨᒪᔨᒋᓂᐊᕋᑦᑎᒋᑦ.

³² ᐅᕙᑦᑎᓐᓄᑦ ᐊᐅᓪᓚᖃᑕᐅᒍᕕᑦ, ᐱᑎᑕᐅᖃᑎᒋᓂᐊᕐᐸᑦᑎᒋᑦ ᐱᐅᔪᓂᒃ ᐊᑕᓂᐅᑉ ᑐᓂᔭᖏᓐᓂᒃ ᐅᕙᑦᑎᓐᓄᑦ.”

³³ ᑕᕝᕙ ᐊᑕᓂᐅᑉ ᖃᖅᑲᖁᑎᖓᓂᑦ ᐊᐅᓪᓚᕐᐳᑦ ᐃᖏᕐᕋᓪᓗᑎᒃ ᐅᓪᓗᓂᒃ ᐱᖓᓱᓂᒃ; ᐊᑕᓂᐅᓪᓗ ᐊᖏᖃᑎᒌᒍᑎᖓᑕ ᐃᒃᓯᕐᕕᖁᑎᖓ ᓯᕗᓪᓕᐅᑎᑕᐅᓚᐅᕐᐳᖅ ᐃᖏᕐᕋᓪᓗᑎᒃ ᐅᓪᓗᓂᒃ ᐱᖓᓱᓂᒃ, ᑕᖕᒫᕐᕕᒋᓂᐊᕐᑕᒥᖕᓂᒃ ᕿᓂᕐᓗᑎᒃ.

³⁴ ᐊᑕᓂᐅᑉ ᓄᕗᔭᖓ ᐅᓪᓗᒃᑯᑦ ᖁᓛᓃᓚᐅᕐᐳᖅ ᑕᖕᒫᕐᓯᒪᕕᖕᒥᑦ ᐃᖏᕐᕋᑎᓪᓗᒋᑦ.

³⁵ ᑕᕝᕙ ᑍᒤᓕᓚᐅᕐᐳᖅ, ᐃᒃᓯᕐᕕᒃ ᐊᖏᕈᑎᑕᓕᒃ ᐊᐅᓪᓚᕈᑎᔭᐅᓕᕌᖓᑦ, ᒨᓯᓯ ᐅᖃᕐᐸᓚᐅᕐᐳᖅ: “ᐊᑕᓃᖅ, ᒪᑭᓕᕆᑦ! ᐊᑭᕋᑎᑦ ᐊᕙᒻᒧᑦ ᕿᒫᓕᑦ, ᐃᓕᖕᓂᒡᓗ ᐱᐅᒃᓴᖏᑦᑐᑦ ᓵᖕᓂᑦ ᕿᒪᒃᓯᓕᑦ.”

³⁶ ᐃᒃᓯᕐᕕᒃ ᓄᖅᑲᕌᖓᑦ ᐅᖃᕐᐸᓚᐅᕐᐳᖅ: “ᐊᑕᓃᖅ, ᐅᑎᓕᕆᑦ, ᐃᓴᕆᐊᓕᐅᑉ ᓈᓴᒐᒃᓴᐅᖏᑦᑐᕐᔪᐊᖁᑎᖏᓐᓄᑦ ᑕᐅᓴᑎᕐᔪᐊᓄᑦ.”