ᓂᕼᐃᒤᐊᐅᑉ ᐊᒡᓚᖏᑦ 9 - ᐊᒡᓔᑦ ᐃᑦᔪᕐᖕᓁᑦᑐᑦᐃᓄᐃᑦ ᐊᔪᕐᓂᕐᒥᖕᓂᒃ ᖃᕿᐊᓕᕐᓂᖏᑦ 1 ᐅᓪᓗᑦ 24ᒋᓕᕐᑕᖓᓂ ᑕᖅᑭᒥ ᑕᕝᕙᓂᑦᓮᓐᓇᖅ ᐃᓴᕆᐊᓕᒥᐅᑦ ᐃᓄᖏᑦ ᑲᑎᓚᐅᕐᐳᑦ ᓂᕆᑦᑍᓕᔭᕐᑐᕐᓗᑎᒃ, ᐊᓐᓄᕌᕐᓗᑎᒃ ᐊᕐᔭᓕᓂᕐᓂᒡᓗ ᐳᔪᕋᕐᓂᒡᓗ ᓂᐊᖁᕐᒥᓅᕐᓯᓚᐅᕐᐳᑦ ᓇᓗᓁᕐᓯᓪᓗᑎᒃ ᕿᒃᓵᖕᓂᕐᒥᖕᓂᒃ. 2 ᕿᒃᓵᖕᓂᑎᒃ ᐊᔪᕐᑐᓕᓂᕐᒥᖕᓂᒃ ᐱᑦᔪᑎᒋᓪᓗᒍ ᐃᒻᒥᒍᑦ ᐃᓛᒃᑰᓕᕐᑎᓚᐅᕐᐳᑦ ᓄᓇᖅᑲᑎᒃᓴᔭᕆᓐᖏᑕᓕᒫᒥᖕᓂᑦ; ᑍᒫᒡᓗ ᓂᑯᕕᓪᓗᑎᒃ ᐊᔪᕐᑐᓕᓂᕐᒥᖕᓂᒃ ᓯᕗᓕᕕᓂᖏᑕᓗ ᐊᔪᕐᑐᓕᓂᕆᓚᐅᕐᑕᖏᓐᓂᒃ ᐅᖅᑲᕆᒃᓴᐅᑦᔨᓚᐅᕐᐳᑦ ᖃᕿᐊᓕᕐᓗᑎᒃ. 3 ᓇᖏᓚᐅᕐᐳᑦ ᓇᔪᕐᑕᒥᖕᓂ ᐊᑐᐊᕐᓯᓪᓗᑎᒃ ᐊᒡᓚᖕᓂᒃ ᐊᑕᓂᐅᑉ ᐱᖁᔭᓕᐊᕕᓂᖏᓐᓂᒃ ᑖᒃᑯᐊ ᒎᑎᖓᑦᑕ ᐃᑲᕐᕋᓂᒃ ᐱᖓᓱᓂᒃ, ᐊᒻᒪ ᑭᖑᓂᐊᒍᑦ ᓱᓕ ᐃᑲᕐᕋᓂᒃ ᐱᖓᓱᓂᒃ ᐊᔪᕐᓂᕐᒥᖕᓂᒃ ᐅᖃᕆᒃᓴᐅᑦᔨᓚᐅᕐᐳᑦ ᖃᕿᐊᓕᕐᓗᑎᒃ ᑐᒃᓯᐊᕐᓗᑎᒡᓗ ᐊᑕᓂᕐᒧᑦ ᒎᑎᒥᖕᓄᑦ. 4 ᓇᑎᖃᓚᐅᕐᐳᖅ ᐳᕐᑐᓯᖏᐊᕐᓯᒪᔪᒥᒃ, ᑕᕝᕙᓂᓗ ᓕᕔᑎᑦ ᓇᖏᓚᐅᕐᐳᑦ ᐅᑯᐊ: ᔩᓱᐊ, ᐸᓂ, ᑲᑦᒤ-ᓕ, ᓯᐸᓁᐊ, ᐳᓐᓂ, ᓯᕆᐰᐊ, ᐹᓂ, ᓯᓇᓁᓗ, ᕾᒐᓛᕐᓗᑎᒃ ᑐᒃᓯᐊᓚᐅᕐᐳᑦ ᐊᑕᓂᕐᒧᑦ ᒎᑎᒥᖕᓄᑦ. 5 ᐅᑯᐊ ᓕᕔᑎᑦ ᑐᒃᓯᐊᕐᑎᑦᓯᓚᐅᕐᐳᑦ: ᔩᓱᐊ, ᑲᑦᒤ-ᓕ, ᐹᓂ, ᕼᐊᓴᑉᓂᐊ, ᓯᕆᐰᐊ, ᕼᐅᑍᐊ, ᓯᐸᓁᐊ, ᐱᑕᕼᐂᐊᓗ, ᐅᖃᕐᓗᑎᒃ: “ᓂᑯᕕᓪᓗᓯ ᐊᑕᓂᖅ ᓂᕐᑐᕐᓯᐅᒃ ᒎᑎᑦᓯ ᓂᕐᑐᕐᓯᐅᒃ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ! ᐃᓘᓐᓇᓯ ᐊᑎᖓᑕ ᓂᕐᑐᕐᓇᕐᓂᖓ ᓂᕐᑐᕐᓯᐅᒃ, ᑕᒤᓐᓂᑦᓯᐊᖅ ᐊᖏᓂᕐᐸᐅᔪᖅ ᓂᕐᑐᕐᓇᕐᑎᑕᐅᓕ ᓂᕐᑐᕐᑕᐅᓗᓂᓗ!” ᑐᒃᓯᐊᕐᓂᖅ ᖃᕿᐊᓕᕐᓂᕐᒧᑦ 6 “ᐃᕝᕕᑦ ᑭᓯᕕᑦ ᐊᑕᓂᑑᕗᑎᑦ; ᕿᓚᖕᒥᒃ ᓴᓇᓚᐅᕐᐳᑎᑦ, ᕿᓔᓪᓗ ᕿᓚᖏᓐᓂᒃ, ᕿᓚᖕᒦᑦᑐᓕᒫᓂᓪᓗ, ᓄᓇᒥᒃ ᓄᓇᒥᐅᑕᓕᒫᓂᒡᓗ, ᐃᒪᕕᒡᓗ ᐃᓘᓐᓇᑎᒡᓗ ᐃᒪᐅᑉ ᐃᓗᐊᓃᑦᑐᑦ ᓴᓇᓚᐅᕐᐸᑎᑦ; ᐃᓅᓯᕐᒥᒃ ᐃᓘᓁᓐᓄᑦ ᑐᓂᓯᕗᑎᑦ, ᕿᓚᖕᒥᐅᑕᓕᒫᑦᓯᐊᑦ ᐃᓕᖕᓄᑦ ᐅᑯᕗᑦ ᑐᒃᓯᐊᕐᓗᑎᒡᓗ. 7 ᐃᕝᕕᑦ, ᐊᑕᓃᖅ ᒎᑎᐅᕗᑎᑦ, ᓂᕈᐊᓚᐅᕐᐳᑎᑦ ᐂᑉᕋᒻᒥᒃ, ᑕᓯᐅᓚᐅᕐᐸᓪᓗ ᓄᓇᒥᑦ ᐅᕐᒥᑦ ᑲᐅᓪᑎᐊᒦᑦᑐᒥᑦ; ᐊᑎᖓᓗ ᐊᓯᑦᔨᓚᐅᕐᐸᑦ ᐂᑉᕋᕼᐋᒻᒥᒃ. 8 ᓇᒡᕚᓚᐅᕐᐸᑦ ᐆᒻᒪᑎᒥᒍᑦ ᐅᒃᐱᕐᓂᖓ ᑲᔪᓯᓂᖃᕐᑎᓪᓗᒍ ᐃᓕᖕᓄᑦ, ᐊᖏᖃᑎᒌᓚᐅᕐᐳᓯᒡᓗ ᓄᓇᒥᒃ ᑬᓇᓂᒥᒃ ᑐᓂᓂᐊᕐᓂᕋᕐᓗᒍ, ᐅᑯᐊ ᓄᓇᖁᑎᖓᓐᓂᑦ, ᕼᐃᑍᑎᒃᑯᑦ, ᐊᒧᕅᑎᑯᓪᓗ, ᐱᕆᔧᑎᒃᑯᓪᓗ, ᔨᐳᓮᑎᒃᑯᓪᓗ, ᒋᕐᒐᓮᑎᒃᑯᓪᓗ, ᓄᓇᒋᔭᐅᖁᓪᓗᒋᑦ ᑭᖑᕚᖏᓐᓄᑦ. ᐊᖏᕐᓂᕆᓚᐅᕐᑍᑦ ᑲᔪᓯᑎᓚᐅᕐᐸᑦ, ᐅᒃᐱᕐᓇᑦᓯᐊᕋᕕᑦ. 9 ᓯᕗᓕᕗᑦ ᐅᖁᒤᒃᓴᕐᑎᓪᓗᒋᑦ ᑕᑯᓚᐅᕐᐸᑎᑦ ᐄᑦᔨᑉᑎᒥ; ᐃᑲᔪᕐᑕᐅᔪᒪᓂᖏᓐᓂᒡᓗ ᑐᓴᓚᐅᕐᐸᑎᑦ ᐃᒪᕐᒥ ᐊᐅᐸᓗᒃᑕᒥ. 10 ᓇᓗᓁᒃᑯᑕᓂᒃ ᑲᒪᓇᕐᑐᓂᒡᓗ ᐱᓇᓱᐊᓚᐅᕐᐳᑎᑦ ᐊᖓᔪᖅᑳᕐᔪᐊᕐᒧᑦ ᐰᕉᒧᑦ, ᐅᓇᑕᕐᑐᒃᓴᖁᑎᖏᑕ ᐊᖓᔪᖅᑳᖏᓐᓄᑦ ᐃᓄᖏᓐᓄᓪᓗ ᓄᓇᖓᓐᓃᑦᑐᓕᒫᓄᑦ. ᖃᐅᔨᒪᓚᐅᕋᕕᑦ ᑖᒃᑯᓄᖓ ᐃᓄᖁᑎᕕᑦ ᐅᖁᒤᒃᓴᕐᑎᑕᐅᓂᖏᓐᓂᒃ. ᑍᒤᒻᒪᑦ ᓵᓚᖃᓚᐅᕐᐳᑎᑦ, ᖃᐅᔨᒪᔭᐅᑦᓯᐊᕐᓃᓪᓗ ᐅᓪᓗᒥ ᓱᓕ ᐱᒋᕙᑦ. 11 ᐃᒪᖅ ᐊᕕᒃᑎᓪᓗᒍ ᐃᓄᖁᑎᑎᑦ ᐊᖅᑯᓯᓚᐅᕐᐸᑎᑦ, ᐃᒪᐅᓚᐅᕐᑐᒃᑯᑦ ᑕᓯᐅᓚᐅᕐᐸᑎᑦ ᓄᓇᒃᑯᑦ ᐸᓂᕐᑐᒃᑯᑦ; ᑍᒃᑯᐊᓗ ᐊᑭᕋᕐᑐᕐᑐᑦ ᐃᐱᓚᐅᕐᐳᑦ ᐃᒫᓂ, ᐅᔭᕋᒃᑎᑐᑦ ᑭᕕᓚᐅᕐᐳᑦ ᐃᒪᕐᔪᐊᕐᒥ. 12 ᓄᕗᔭᒧᓪᓗ ᖁᒻᒧᖓᔪᒧᑦ ᑕᓯᐅᓚᐅᕐᐸᑎᑦ ᐅᓪᓘᑎᓪᓗᒍ, ᐅᓐᓄᒃᑯᓪᓗ ᖃᐅᒪᑎᓚᐅᕐᐸᑎᑦ ᐃᑯᒪᒧᑦ ᖁᒻᒧᖓᔪᒧᑦ ᐊᖅᑯᑎᖏᓐᓂ ᖃᐅᒻᒥᔮᖁᓪᓗᒋᑦ ᐃᖏᕐᕋᕕᒋᔭᒥᒃᑎᒍᑦ. 13 ᓮᓁᑉ ᖃᖅᑲᖓᓄᑦ ᐊᖅᑲᓚᐅᕐᐳᑎᑦ ᕿᓚᖕᒥᑦ, ᐃᓄᖁᑎᑎᓪᓗ ᐅᖃᕐᕕᒋᓚᐅᕐᐸᑎᑦ ᕿᓚᖕᒥᑦ, ᐱᖁᔭᓂᒡᓗ ᑐᓂᓯᕕᒋᓚᐅᕐᐸᑎᑦ ᐊᑐᒐᒃᓴᑦᓯᐊᓂᒃ, ᐃᓕᓐᓂᐊᕐᑎᓚᐅᕐᐸᑎᓪᓗ ᐱᐅᔪᓂᒃ ᐱᖁᔭᓂᒃ. 14 ᐃᓕᓴᑎᓚᐅᕐᐸᑎᓪᓗ ᓴᐸᑎ ᐃᑦᔪᕐᓁᑎᑕᐅᖁᓪᓗᒍ, ᐱᖁᔨᓚᐅᕐᐳᑎᓪᓗ ᐊᑐᒐᒃᓴᐅᖁᔭᕐᓂᒃ ᒪᓕᒃᑕᐅᖁᔭᕐᓂᒡᓗ ᒪᓕᖁᓪᓗᒋᑦ, ᐱᔨᒃᑯᑦ ᒨᓯᓯᒃᑯᑦ ᐱᖁᔭᓂᒃ ᑐᓂᓯᕕᒋᓚᐅᕐᐸᑎᑦ. 15 ᑳᓕᕐᑎᓪᓗᒋᓪᓗ, ᓂᐊᖁᔭᒥᒃ ᑐᓂᓯᕕᒋᓚᐅᕐᐸᑎᑦ ᕿᓚᖕᒥᑦ, ᐃᒥᕐᑎᓚᐅᕐᐸᑎᓪᓗ ᕾᕐᓱᒥᑦ ᐃᒥᕈᓱᓕᕐᑎᓪᓗᒋᑦ. ᓄᓇᒥᒃ ᓄᓇᑖᖁᓪᓗᒋᑦ ᐅᖃᐅᑎᓚᐅᕐᐸᑎᑦ, ᐊᖏᕈᑎᒋᓚᐅᕐᑕᕐᓂᒃ ᑐᓂᓂᐊᕐᓂᕋᕐᓗᒋᑦ. 16 ᓯᕗᓕᕕᓂᕗᓪᓕ ᐱᐅᔪᕆᓕᓚᐅᕐᐳᑦ ᓯᑎᔫᓕᕐᓗᑎᒡᓗ ᐱᖁᔭᕐᓂᒡᓗ ᓈᓚᒍᒪᔪᓐᓁᓚᐅᕐᐳᑦ. 17 ᐱᖁᔭᕐᓂᒃ ᓈᓚᒍᒪᔪᓐᓁᓚᐅᕐᐳᑦ ᐳᐃᒍᕐᓗᑎᒡᓗ ᐱᓂᐊᕐᓂᕆᓚᐅᕐᑕᕐᓂᒃ, ᑲᒪᓇᕐᑐᓕᓂᕆᓚᐅᕐᑕᕐᓂᒡᓗ, ᐱᐅᔪᕆᓂᕐᒥᖕᓄᑦ ᓯᕗᓕᕐᑎᒃᓴᒥᖕᓂᒃ ᓂᕈᐊᓚᐅᕐᐳᑦ ᐅᑎᖁᓪᓗᒋᑦ ᓯᐊᓛᖑᓂᕐᒧᑦ ᕿᓚᒃᑕᐅᓯᒪᓂᕆᓚᐅᕐᑕᒥᖕᓄᑦ. ᐃᕝᕕᓪᓕ ᒎᑎᐅᕗᑎᑦ ᐃᓱᒪᒋᔪᓐᓁᕐᓯᓲᖑᓪᓗᑎᑦ, ᐱᑦᓯᐊᕐᑐᑎᑦ ᓂᑲᒍᓱᒃᑐᑎᓪᓗ, ᓂᓐᖓᒃᓴᕅᖏᑦᑐᑎᑦ, ᓈᒃᑭᒍᓱᖕᓃᑦ ᐊᖏᔫᖕᒪᑦ, ᑖᒃᑯᐊ ᕿᒪᓚᐅᓐᖏᓚᑎᑦ. 18 ᒎᑎᓐᖑᐊᓕᐅᕋᓗᐊᕐᒪᑕᓗ ᐃᒻᒧᒃᓯᐅᒐᐅᑉ ᓄᕐᕋᓐᖑᐊᖓᓂᒃ, ᐅᖃᕐᓗᑎᒡᓗ, ‘ᐅᓇ ᑕᕝᕙ ᒎᑎᓯ ᑕᓯᐅᕐᓯᓚᐅᕐᑐᖅ ᐄᑦᔨᑉᑎᒥᑦ!’ ᐅᖃᕐᓂᕐᓘᑎᖃᒻᒪᕆᓚᐅᕐᐳᓪᓗ ᐃᓕᖕᓂᒃ ᐊᑕᓃᖅ! 19 ᑭᓯᐊᓂᓕ ᕿᒪᓚᐅᓐᖏᓚᑎᑦ ᐃᓄᖃᖏᑦᑐᒥ, ᓈᒃᑭᒍᓱᖕᓃᑦ ᐊᖏᔫᖕᒪᑦ, ᓄᕗᔭ ᓇᐸᔪᖅ ᐅᓪᓗᕐᓯᐅᑎ ᐲᓚᐅᖏᓐᓇᕕᐅᒃ ᑕᓯᐅᕐᓯᖃᑦᑕᓚᐅᕐᑐᖅ ᐊᖅᑯᑎᒃᓴᖓᓐᓂᒃ; ᐃᑯᒪᓗ ᓇᐸᔪᖅ ᐅᓐᓄᒃᓯᐅᑎ ᐲᓚᐅᖏᓐᓇᕕᐅᒃ ᖃᐅᒪᑎᑦᓯᖃᑦᑕᓚᐅᕐᑐᖅ ᑖᒃᑯᓂᖓ, ᓇᓗᓁᕐᓯᓯᒪᖁᓪᓗᒋᑦ ᐊᖅᑯᑎᒃᓴᖏᓐᓂᒃ. 20 ᐊᓂᕐᓂᕐᐱᓪᓗ ᐱᐅᓂᖓᓄᑦ ᑕᓯᐅᖃᑦᑕᓚᐅᕐᐸᑎᑦ, ᐅᖃᐅᑎᓪᓗᒋᑦ ᖃᓄᐃᓕᐅᕐᑐᒃᓴᐅᓂᖏᓐᓂᒃ; ᓂᕆᑎᓚᐅᕐᐸᑎᑦ ᒫᓇᒥᒃ, ᐃᒥᕐᑎᓚᐅᕋᕕᒋᓪᓗ ᐃᒥᕈᓕᕐᑎᓪᓗᒋᑦ. 21 ᐊᕐᕌᒍᓂᒃ 40ᓂᒃ ᐃᓄᖃᖏᑦᑐᒥ ᐱᔭᕆᐊᓕᖏᓐᓂᒃ ᑐᓂᓯᕕᒋᓚᐅᕋᕕᒋᑦ; ᐊᓐᓄᕌᖏᓪᓗ ᓄᑕᐅᔪᓐᓃᕐᐸᓪᓕᐊᓚᐅᓐᖏᓚᑦ, ᐃᑎᒐᖏᓪᓗ ᐳᓪᓕᓕᓚᐅᕋᑎᒃ ᐋᓐᓂᐊᓕᓚᐅᓐᖏᓚᑦ. 22 ᐃᓅᖃᑎᒌᓂᒡᓗ ᐊᑕᓂᐅᕕᖕᓂᒡᓗ ᐅᓇᑕᕐᑎᓚᐅᕐᐸᑎᑦ ᓵᓚᖃᕐᑎᓪᓗᒋᓪᓗ, ᓄᓇᑖᕐᑎᓚᐅᕐᐸᑎᓪᓗ ᓇᖕᒥᓂᒃᓴᖏᓐᓂᒃ, ᓵᓚᖃᕐᓂᒃᑯᑦ ᓄᓇᑖᓚᐅᕐᐳᑦ ᕼᐃᓴᐸᓂᒥᒃ, ᓮᕼᐆᓂᐅᑉ ᐊᐅᓚᑦᓯᕕᖓᓂᒃ, ᐹᓴᓂᐅᓪᓗ ᓄᓇᖓᓂᒃ, ᐋᒡᓗ ᐊᖓᔪᖅᑳᕐᔪᐊᒃᑯᕕᖓᓂᒃ. 23 ᕿᑐᕐᖓᕐᑖᕐᑎᓚᐅᕐᐸᑎᓪᓗ ᐅᓄᕐᑐᐊᓗᖕᓂᒃ ᐅᓪᓗᕆᐊᑎᑐᑦ ᕿᓚᖕᒦᑦᑐᑎᑐᑦ, ᓄᓇᑖᕐᑎᓚᐅᕐᐸᑎᓪᓗ ᐊᖏᕐᕋᒃᓴᖏᓐᓂᒃ ᓯᕗᓪᓕᖏᓐᓄᑦ ᐊᖏᕈᑎᒋᓚᐅᕐᑕᕐᓂᒃ ᑐᓂᓂᐊᕐᓂᕋᕐᓗᒋᑦ. 24 ᓵᓚᖃᕐᓂᒃᑯᑦ ᓄᓇᑖᓚᐅᕐᐳᑦ ᑬᓇᓂᐅᑉ ᓄᓇᖓᓂᒃ; ᐃᓄᐃᓪᓗ ᓄᓇᓖᑦ ᓯᖏᑕᐅᑎᓚᐅᕐᐸᑎᑦ, ᐃᓄᖁᑎᑎᑦ ᐱᔪᓐᓇᕐᓂᕐᒥᒃ ᑐᓂᓯᕕᒋᓚᐅᕐᐸᑎᑦ ᐃᓱᒤᓐᓇᕐᕆᖁᓪᓗᒋᑦ ᐃᓄᖕᓂᒃ ᐊᖓᔪᖅᑳᕐᔪᐊᓂᒡᓗ ᑬᓇᓂᒥ. 25 ᐃᓄᖁᑎᑎᓪᓗ ᐃᒡᓗᒐᓴᖕᓂᒃ ᓴᐴᓗᑕᕐᔪᐊᓕᖕᓂᒃ ᓵᓚᖃᓚᐅᕐᐳᑦ, ᓄᓇᒥᒡᓗ ᐱᕈᕐᑐᓕᖕᒥᒃ, ᐃᒡᓗᓂᒡᓗ ᐊᔪᕐᓴᖏᑦᔪᑎᒃᓴᖃᕐᑐᓂᒃ, ᐃᒥᕐᑕᕐᕖᓪᓗ ᐃᑎᕐᓴᓕᐅᕇᕐᓯᒪᔪᑦ, ᓇᐹᕐᑐᓂᒡᓗ ᐅᕐᓱᒃᓴᓕᖕᓂᒃ, ᐱᕈᕐᑐᓕᖕᓂᒡᓗ, ᕔᓂᒃᓴᓕᖕᓂᒡᓗ ᑐᓂᓚᐅᕐᐸᑎᑦ, ᓂᕆᔪᒪᔭᓕᒫᒥᓂᒡᓗ ᓂᕆᓚᐅᕐᐳᑦ ᖁᐃᒃᓯᓪᓗᑎᒡᓗ; ᖁᕕᐊᓲᑎᖃᓚᐅᕐᐳᓪᓗ ᐱᐅᔪᓂᒃ ᑐᓂᔭᕐᓂᒃ ᑖᒃᑯᓄᖓ. 26 ᑍᒤᒃᑲᓗᐊᕐᒪᑦ ᐃᓄᖁᑎᑎᑦ ᐊᑭᕋᕐᑐᓕᓚᐅᕐᐳᑦ ᓈᓚᒍᓐᓃᕐᓗᑎᒡᓗ ᐃᓕᖕᓂᒃ, ᐱᖁᔭᕐᓂᒡᓗ ᑐᓄᑦᓯᓚᐅᕐᐳᑦ, ᐅᖃᕐᑎᖕᓂᒡᓗ ᑐᖁᑦᓯᓚᐅᕐᐳᑦ ᐃᓂᕐᑎᕆᔪᓂᒃ, ᐃᓕᖕᓄᑦ ᐅᑎᖁᔨᓪᓗᑎᒃ ᐅᖃᓪᓚᓚᐅᕐᑐᓂᒃ, ᐃᓕᖕᓂᒡᓗ ᐅᖃᕐᓂᕐᓘᑎᖃᖃᑦᑕᓚᐅᕐᐳᑦ ᑍᒪᓐᖓᑦ. 27 ᑍᒤᒻᒪᑦ ᐊᑭᕋᕐᑐᕐᑎᖏᓐᓄᑦ ᓵᓚᐅᑎᓚᐅᕐᐸᑎᑦ ᐊᐅᓚᑕᐅᓕᕐᑎᓪᓗᒋᓪᓗ, ᑖᒃᑯᓄᖓ ᐊᒃᓱᕈᕐᑎᑕᐅᓕᕋᒥᒃ, ᐃᓕᖕᓄᑦ ᐃᑲᔪᕐᑕᐅᔪᒪᓕᓚᐅᕐᐳᖅ, ᐃᕝᕕᓪᓗ ᑭᐅᓚᐅᕐᐸᑎᑦ ᕿᓚᖕᒥᑦ; ᓈᒃᑭᒍᓱᖕᓂᕐᔪᐊᕐᓄᑦ ᑎᓕᓯᓚᐅᕐᐳᑎᑦ ᑕᓯᐅᕐᓯᓂᐊᕐᑐᓂᒃ ᓴᐳᑦᔭᐅᖁᓪᓗᒋᑦ ᐅᖁᒤᒃᓴᕐᑎᑕᐅᓂᖏᓐᓂᑦ ᐊᑭᕋᒥᖕᓄᑦ. 28 ᒥᕐᖑᐃᕐᓯᓚᐅᕐᑎᓪᓗᒋᑦ ᑕᒪᓐᓇ ᐊᓂᒍᕐᒪᑦ, ᐊᔪᕐᑐᓕᓕᓚᐅᕆᕗᑦ ᐃᓕᖕᓄᑦ. ᑍᒤᒻᒪᑦ ᐊᑭᕋᖏᓐᓄᑦ ᑐᓂᓪᓗᒋᑦ ᓵᓚᒋᔭᐅᓯᒪᑎᓕᓚᐅᕐᐸᑎᑦ. ᖃᕿᐊᓕᕐᒪᑕᓗ ᐱᐅᓕᔭᐅᔪᒪᓕᕐᓗᑎᒡᓗ ᐃᓕᖕᓄᑦ, ᕿᓚᖕᒥᑦ ᑐᓴᓚᐅᕐᐸᑎᑦ; ᑍᒪᓐᖓᓪᓗ ᐅᓄᕐᑐᐊᕐᓱᕐᓗᒋᑦ ᐱᐅᓕᖃᑦᑕᓚᐅᕐᐸᑎᑦ ᓈᒃᑭᒍᓱᖕᓂᕐᔪᐊᕐᓄᑦ. 29 ᐃᓂᕐᑎᓚᐅᕐᐸᑎᓪᓗ ᓈᓚᑦᓯᐊᖁᓪᓗᒋᑦ ᐃᓕᓐᓂᐊᕐᑎᑦᓯᒍᑎᖕᓂᒃ, ᑭᓯᐊᓂᓕ ᐱᐅᔪᕆᓂᕐᒥᖕᓄᑦ ᓈᓚᒍᒪᓚᐅᓐᖏᓚᑦ ᐱᖁᔭᕐᓂᒃ, ᐱᖁᔭᕐᓂᒃ ᒪᓕᖕᓂᒃ ᐃᓅᓯᐅᒐᓗᐊᕐᑎᓪᓗᒍ, ᑭᓯᐊᓂᓕ ᓯᑎᔫᓚᐅᕐᐳᑦ ᐊᐅᓚᑕᒃᓴᐅᓇᑎᒃ ᓈᓚᒍᒪᓇᑎᒡᓗ. 30 ᐊᕐᕌᒍᓂᒃ ᐅᓄᕐᑐᓂᒃ ᕿᓄᐃᓵᕐᓗᑎᑦ ᐃᓂᕐᑎᖃᑦᑕᓚᐅᕐᐸᑎᑦ, ᐅᖃᕐᑎᑎᓪᓗ ᐊᓂᕐᓂᒃᑯᑦ ᐅᖃᕈᒪᔪᓐᓇᕐᑎᓚᐅᕐᐸᑎᑦ, ᐃᓄᖁᑎᑎᓪᓕ ᓱᓕ ᑐᓵᓐᖏᓴᓚᐅᕐᐳᑦ; ᑍᒤᒻᒪᑦ ᓵᓚᐅᑎᓚᐅᕐᐸᑎᑦ ᐃᓅᖃᑎᒌᒡᔪᐊᓄᑦ. 31 ᑍᒤᒃᑲᓗᐊᕐᑎᓪᓗᒍ, ᓈᒃᑭᒍᓱᖕᓂᕐᔪᐊᕐᓄᑦ ᓇᕐᕈᒋᓕᓚᐅᓐᖏᓚᑎᑦ ᐊᓯᕈᓚᐅᕐᓇᒋᓪᓗ, ᐱᑦᓯᐊᕐᓗᑎᑦ ᓈᒃᑭᒍᓱᒡᓗᑎᓪᓗ ᒎᑎᐅᒐᕕᑦ. 32 ᒎᑏᒃ, ᒎᑎᕗᑦ ᐊᖏᔪᕐᔪᐊᖑᕗᑎᑦ ᐊᔪᒐᖃᖏᑦᑐᕐᔪᐊᖑᓪᓗᑎᓪᓗ! ᑲᑉᐱᐊᓇᕐᑐᐊᓘᓪᓗᑎᑦ, ᐱᔪᓐᓇᕐᓂᕐᔪᐊᖃᕐᐳᑎᑦ! ᓇᒡᓕᒍᓱᖕᓂᕐᔪᐊᕐᓄᑦ ᐊᖏᖃᑎᒌᒍᑎᒋᓚᐅᕐᑍᑦ ᑲᔪᓯᑎᒃᑲᕕᐅᒃ: ᑍᑦᓱᒪᓐᖓᒥᑦ ᐊᓯᕆᐊᒥᐅᑦ ᐊᖓᔪᖅᑳᕐᔪᐊᖏᑕ ᐅᖁᒤᒃᓴᕐᑎᓚᐅᕐᒪᑎᒍᑦ ᒫᓐᓇᒧᑦ ᐊᒡᓛᑦ ᐊᒃᓱᕈᕐᐳᒍᑦ. ᐊᖓᔪᖅᑳᕐᔪᐊᕗᑦ, ᓯᕗᓕᕐᑎᕗᑦ, ᑐᓂᕐᕈᓯᕐᑎᑦᓯᔨᕗᑦ, ᐅᖃᕐᑎᕗᓪᓗ, ᓯᕗᓕᕗᓪᓗ, ᐃᓅᖃᑎᓕᒫᕗᓪᓗ ᐊᒃᓱᕈᕐᑎᑕᐅᓯᒪᕗᑦ, ᐃᖅᑲᐅᒪᓚᐅᕆᑦ ᐊᒃᓱᕈᕐᑎᑕᐅᓯᒪᓂᑦᑎᓐᓂᒃ ᑕᒪᓐᓇᓗ ᒥᑭᔫᑎᑦᑍᓕᓗᒍ! 33 ᓈᒻᒪᒃᑐᒥᒃ ᐱᓇᓱᐊᕐᓯᒪᕗᑎᑦ ᓱᒋᐊᕐᓗᑕ; ᓱᖁᓯᔪᐃᑦᑑᓪᓗᑎᑦ ᑲᔪᓯᑦᓯᐊᕐᓯᒪᕗᑎᑦ, ᐅᕙᒍᓪᓕ ᐊᔪᕐᑐᓕᓯᒪᕗᒍᑦ. 34 ᐊᒡᓛᑦ ᐊᖓᔪᖅᑳᕐᔪᐊᕗᑦ, ᓯᕗᓕᕐᑎᕗᓪᓗ, ᑐᓂᕐᕈᓯᕐᑎᑦᓯᔨᕗᑦ ᓯᕗᓕᕗᓪᓗ, ᐱᖁᔭᕐᓂᒃ ᒪᓖᓐᓇᕐᓯᒪᖏᒻᒪᑕ, ᓈᓚᓚᐅᖏᒻᒪᑕ ᐱᖁᔭᕐᓂᒃ ᐃᓂᕐᑎᕆᐅᑎᒋᔭᕐᓂᒡᓗ, ᓇᓗᓁᕐᓯᓕᓚᐅᕐᐳᑎᑦ ᓈᒻᒪᒃᓴᖏᓐᓂᕐᓂᒃ ᑖᒃᑯᓂᖓ. 35 ᓮᒻᒪᕐᑎᑦᓯᓂᕐᓄᑦ, ᐊᖓᔪᖅᑳᕐᔪᐊᑦ ᐊᐅᓚᑦᓯᓚᐅᕐᐳᑦ ᐃᓄᖁᑎᖕᓂᒃ ᓄᓇᖃᑦᓯᐊᕐᓂᖏᓐᓂ ᐱᕕᑐᔪᒥ, ᐱᕈᕐᑐᖃᑦᓯᐊᕐᑐᒥᒡᓗ ᓄᓇᒥᒃ ᑐᓂᓚᐅᕐᐸᑎᑦ; ᑭᓯᐊᓂᓕ ᐊᔪᕐᑐᓕᓂᕐᒥᖕᓂᒃ ᕿᒤᓚᐅᓐᖏᓚᑦ, ᐱᔨᑦᓯᓚᐅᕋᑎᒡᓗ ᐃᓕᖕᓂᒃ. 36 ᒫᓐᓇᓗ ᓯᐊᓛᖑᕗᒍᑦ ᐊᔪᓕᕐᓗᑕ ᓄᓇᒥ ᑐᓂᓚᐅᕐᑕᕐᓂ, ᐱᕈᕐᑐᓕᖕᒥᒡᓗ ᓄᓇᒥᒃ ᓂᕿᒃᓴᓕᖕᒥᒡᓗ ᓯᐊᓛᖑᑐᐃᓐᓇᓕᕐᐳᒍᑦ! 37 ᓄᓇᐅᓪᓗ ᐱᕈᕐᑎᑕᖏᑦ ᐊᖓᔪᖅᑳᕐᔪᐊᓄᐊᕐᑕᐅᕗᑦ ᐅᕙᑦᑎᓐᓂᒃ ᐊᐅᓚᑦᓯᔪᓂᒃ ᐊᔪᕐᑐᓕᓂᕗᑦ ᐱᓪᓗᒋᑦ, ᐊᑐᕈᒪᔭᒥᖕᓂᒡᓗ ᐊᑐᕐᐳᑦ ᐅᕙᑦᑎᓐᓂᑦ ᐆᒪᔪᖁᑎᑦᑎᓐᓂᒡᓗ, ᐅᕙᒍᓪᓗ ᐊᔪᓕᕐᓯᒪᓕᕐᐳᒍᑦ ᐃᑎᔪᒥᒃ!” ᐃᓄᐃᑦ ᐊᖏᖃᑎᒌᒍᑎᒥᒃ ᐊᑎᓕᐅᖃᑎᒌᖕᓂᖓᑦ 38 ᑕᒪᒃᑯᐊ ᖃᓄᐃᓕᐅᕐᓂᐅᓚᐅᕐᑐᑦ ᐱᑦᔪᑎᒋᓪᓗᒋᑦ ᐊᖏᖃᑎᒌᖕᓂᖃᕐᑎᑦᓯᓚᐅᕐᐳᒍᑦ ᓴᖑᑎᑕᐅᓂᐊᖏᑦᑐᒥᒃ ᑎᑎᕋᕐᓗᒋᓪᓗ; ᐊᖓᔪᖅᑳᕗᑦ, ᓕᕔᑎᓪᓗ, ᑐᓂᕐᕈᓯᕐᑎᑦᓯᔨᖁᑎᕗᓪᓗ ᑖᒃᑯᐊ ᓇᕿᑦᔪᓯᕐᓯᓚᐅᕐᐳᑦ ᓇᓗᓁᒃᑯᑕᐅᓂᐊᕐᑐᓂᒃ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society