ᓂᕼᐃᒤᐊᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

¹ ᑕᕝᕙᓂ ᑕᖅᑭᒥ ᐅᓪᓘᑉ ᓯᕗᓪᓕᕐᐹᖓᓂ ᐃᓄᐃᓪᓗ ᐃᓘᓐᓇᑎᒃ ᑲᑎᓚᐅᕐᐳᑦ ᐃᓄᒃᑐᑦ ᐊᑕᐅᓯᕐᑐᑦ ᐱᕕᑐᓂᕐᒥ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᑕ ᐃᓗᐊᓂ. ᐄᓱᕋᓗ ᐊᒡᓚᖕᓂᒃ ᐅᖃᓕᒫᖁᔭᐅᓚᐅᕐᐳᖅ, ᑐᓂᕐᕈᓯᕐᑎᑦᓯᔨ ᐃᓕᓐᓂᐊᕐᓯᒪᒻᒪᕆᒃᑐᕐᓗ ᒨᓯᓯᐅᑉ ᐱᖁᔭᖏᓐᓂᒃ, ᐊᑕᓂᐅᑉ ᐱᖁᔭᓕᐊᕆᓚᐅᕐᑕᖏᓐᓂᒃ ᐃᓴᕆᐊᓕᑎᓄᑦ.

² ᑕᕝᕙ ᐄᓱᕋᐅᑉ ᑐᓂᕐᕈᓯᕐᑎᑦᓯᔨᐅᑉ ᑲᑎᒪᔪᓄᐊᕈᑎᓚᐅᕐᐰᑦ ᐃᓄᖕᓄᑦ ᐊᖑᑎᓄᑦ ᐊᕐᓇᓄᓪᓗ ᕿᑐᕐᖓᖏᓐᓄᓪᓗ ᑐᓴᕈᓐᓇᕐᑐᓄᑦ ᑐᑭᓯᔪᓐᓇᓕᕐᑐᓕᒫᓄᑦ ᐅᓪᓘᑉ ᓯᕗᓪᓕᕐᐹᖓᓂ ᑕᖅᑭᐅᑉ 7ᖓᑦᑕ.

³ ᑍᑲᓂ ᐱᕕᑐᓂᕐᒥ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᑕ ᓴᓂᐊᓂ ᐅᖃᓕᒫᓚᐅᕐᐰᑦ ᐅᓪᓛᒻᒪᕆᖕᒥᑦ ᐱᒋᐊᕐᓗᓂ ᐅᓪᓘᑉ ᕿᑎᕋᓕᕐᓂᖓᓄᑦ ᑎᑭᓪᓗᒍ, ᐃᓄᖕᓄᑦ ᐊᖑᑎᓄᑦ ᐊᕐᓇᓄᓪᓗ ᑐᓴᕈᓐᓇᕐᑐᓄᑦ ᑐᑭᓯᔪᓐᓇᓕᕐᑐᓕᒫᓄᑦ; ᐃᓘᓐᓇᑎᒃ ᕿᑲᕐᓗᑎᒃ ᓈᓚᑦᓯᐊᓚᐅᕐᐳᑦ ᐊᒡᓚᖕᓂᒃ ᐱᖁᔭᓂᒃ.

⁴ ᐄᓱᕋᓕ ᓇᖏᓚᐅᕐᐳᖅ ᐳᕐᑐᓯᒋᐊᕐᓯᒪᔪᒥ ᕿᔪᖕᒥᒃ ᓇᑎᓕᖕᒥ ᓴᓇᔭᐅᓯᒪᔪᒥᒃ ᓇᓪᓕᐅᓂᖅ ᐱᑦᔪᑎᒋᓪᓗᒍ; ᐅᑯᐊ ᐊᖑᑎᑦ ᑕᓕᕐᐱᐊᓂ ᓇᖏᓚᐅᕐᐳᑦ: ᒪᑎᑍᐊ, ᓰᒪ, ᐊᓁᐊ, ᔪᕅᐊ, ᕼᐅᓪᑬᐊ, ᒫᓯᐊᓗ; ᐅᑯᐊᓗ ᓴᐅᒥᐊᓂ ᓇᖏᓚᐅᕆᕗᑦ; ᐱᑍᐊ, ᒥᓮᐅᓪ, ᒪᓪᑬᔭ, ᕼᐊᓲᒻ, ᕼᐊᓱᐸᑖᓇ, ᓴᑲᕅᐊ, ᒥᓱᓚᒻᓗ.

⁵ ᐄᓱᕋᓗ ᓇᖏᓚᐅᕐᐳᖅ ᕿᔫᑉ ᓇᑎᓕᐅᑉ ᖄᖓᓂ ᐳᕐᑐᔪᒥ ᐃᓄᐃᑦ ᓇᔪᕐᑕᖏᓐᓂᑦ ᖁᕝᕙᓯᖕᓂᕐᓴᒥ; ᐊᒡᓔᓪᓗ ᒪᒃᐱᕐᒪᒋᑦ ᐃᓄᐃᑦ ᐃᓘᓐᓇᑎᒃ ᓂᑯᕕᑉᐳᑦ.

⁶ ᐄᓱᕋᓗ ᓂᕐᑐᐃᓚᐅᕐᐳᖅ, “ᐊᑕᓂᖅ ᓂᕐᑐᕐᑕᐅᓕ, ᒎᑎᓗ ᐊᖏᓂᕐᐸᐅᔪᖅ!” ᑕᕝᕙ ᐃᓄᐃᑦ ᐃᓘᓐᓇᑎᒃ ᑕᓕᕐᒥᖕᓂᒃ ᖁᒻᒧᐊᒃᑎᑦᓯᓪᓗᑎᒃ ᑭᐅᕗᑦ, “ᐋᒦᓐ! ᐋᒦᓐ!” ᓰᖅᑯᕐᓗᑎᒡᓗ ᑐᒃᓯᐊᓕᕐᐳᑦ ᐊᑕᓂᕐᒧᑦ ᒪᓂᖅᑲᒧᑦ ᐳᓪᓗᑎᒃ.

⁷ ᒪᑭᓐᓇᒥᒡᓗ ᓇᖏᓕᕐᐳᑦ ᐃᓂᒋᔭᒥᖕᓂ, ᓕᕔᑎᓪᓗ ᓇᓗᓁᕐᓯᓚᐅᕐᐳᑦ ᐱᖁᔧᑦ ᑐᑭᖏᓐᓂᒃ ᐃᓄᖕᓄᑦ ᐅᑯᐊᖑᓪᓗᑎᒃ: ᔩᓱᐊ, ᐹᓂ, ᓯᕆᐰᐊ, ᔭᒥᓐ, ᐊᑯᑉ, ᓴᐱᑍ, ᕼᐅᑍᐊ, ᒫᓯᐊ, ᑭᓔᑕ, ᐊᔭᕅᐊ, ᔫᓴᐸᑦ, ᕼᐊᓇᓐ, ᐱᓔᐊᓗ.

⁸ ᑕᕝᕙ ᑐᑭᓯᓇᑦᓯᐊᕐᑐᒥᒃ ᐱᖁᔭᓂᒃ ᓇᓗᓁᕐᓯᓚᐅᕐᐳᑦ, ᐊᒡᓚᖕᓂᒃ ᒎᑎᐅᑉ ᐱᖁᔭᖏᓐᓂᒃ; ᑐᑭᓯᓇᕐᓯᑎᑦᓯᓚᐅᕐᐳᑦ ᐃᓄᖕᓄᑦ ᑐᑭᓯᔪᓐᓇᖁᓪᓗᒋᑦ ᐊᑐᐊᕐᑕᐅᔪᓂᒃ.

⁹ ᐃᓄᓕᒫᑦ ᑐᓴᕋᒥᒃ ᐱᖁᔭᓂᒃ, ᐊᒃᑐᕐᑕᐅᒻᒪᕆᒃᐳᑦ ᕿᐊᓕᕐᓗᑎᒡᓗ. ᑍᒤᒻᒪᑦ ᓂᕼᐃᒤᐊ, ᑖᓐᓇ ᐊᐅᓚᑦᓯᔨᐅᔪᖅ, ᐄᓱᕋᓗ, ᑐᓂᕐᕈᓯᕐᑎᑦᓯᔨ ᐱᖁᔭᓂᒡᓗ ᐃᓕᓯᒪᔪᖅ, ᓕᕔᑏᓪᓗ ᐱᖁᔭᓂᒃ ᑐᑭᓯᓇᕐᓯᑎᑦᓯᓚᐅᕐᑐᑦ ᐃᓄᖕᓄᑦ ᐅᖃᕐᐳᑦ, “ᐅᓪᓗᖅ ᑖᓐᓇ ᐃᑦᔪᕐᓁᑦᑑᕗᖅ ᐊᑕᓂᕐᒧᑦ ᒎᑎᑦᓯᓐᓄᑦ, ᑍᒤᒻᒪᑦ ᕿᒃᓵᒃᑐᒃᓴᐅᓐᖏᓚᓯ, ᕿᐊᖏᓪᓗᓯᓗ.

¹⁰ ᐊᖏᕐᕋᓕᕆᑦᓯ ᓂᕆᖃᑎᒌᒃᓗᓯᓗ, ᓂᕆᖃᑎᖃᕐᓗᓯ ᐃᒥᖃᑎᖃᕐᓗᓯᓗ ᐱᖃᓐᖏᓗᐊᕐᑐᓂᒃ, ᐅᓪᓗᖅ ᑖᓐᓇ ᐃᑦᔪᕐᓁᑦᑑᕗᖅ ᐊᑕᓂᑦᑎᓐᓄᑦ, ᕿᒃᓵᖏᓪᓗᓯ, ᖁᕕᐊᓱᖕᓂᖅ ᐊᑕᓂᕐᒥᑦ ᐱᔪᖅ ᓲᖑᑦᔪᑎᒋᕙᓯ.”

¹¹ ᑕᕝᕙ ᓕᕔᑎᑦ ᐃᓄᖕᓄᐊᕐᓗᑎᒃ ᓂᓪᓕᐊᔪᓐᓃᕐᑎᑦᓯᕗᑦ ᐅᖃᐅᑎᓪᓗᒋᓪᓗ, “ᕿᐊᔪᓐᓃᕆᑦᓯ, ᐅᓪᓗᖅ ᑖᓐᓇ ᐃᑦᔪᕐᓁᑦᑑᖕᒪᑦ, ᕿᒃᓵᒍᓐᓃᕆᑦᓯ.”

¹² ᐃᓄᐃᓪᓗ ᐃᓘᓐᓇᑎᒃ ᐊᖏᕐᕋᓕᕐᐳᑦ ᓂᕆᔭᕐᑐᕐᓗᑎᒃ ᐃᒥᕆᐊᕐᑐᕐᓗᑎᒡᓗ ᑲᑐᑦᔨᖃᑎᒌᒡᓗᑎᒡᓗ ᐊᖏᔪᒥᒃ ᖁᕕᐊᓱᓕᕐᐳᑦ, ᑐᑭᓯᑦᓯᐊᓚᐅᕋᒥᒃ ᐅᖃᐅᓯᕐᓂᒃ ᐅᖃᓕᒫᕐᑕᐅᓚᐅᕐᑐᓂᒃ.

ᓇᓪᓕᐅᓐᓂᕐᓯᐅᕐᓂᖅ ᑐᐲᓐᓇᕐᒦᖃᑦᑕᓚᐅᕐᓂᕐᒥᒃ

¹³ ᖃᐅᑎᓪᓗᒍ ᐃᓚᒌᓕᒫᑦ ᐊᖓᔪᖅᑳᖏᑦ, ᑐᓂᕐᕈᓯᕐᑎᑦᓯᔩᓪᓗ ᓕᕔᑎᓪᓗ ᐃᓚᒋᓪᓗᒋᑦ, ᐄᓱᕋᒧᐊᕐᐳᑦ ᐱᖁᔭᓂᒃ ᐃᓕᓮᔨᒧᑦ, ᐃᓕᓐᓂᐊᕆᐊᕐᓗᑎᒃ ᐱᖁᔭᓂᒃ.

¹⁴ ᖃᐅᔨᓚᐅᕐᐳᑦ ᐱᖁᔧᑦ ᐊᑕᓂᐅᑉ ᑐᓂᓚᐅᕐᑕᖏᑦ ᒨᓯᓯᒃᑯᑦ, ᐱᖁᔨᓯᓯᒪᖕᒪᑕ ᐃᓴᕆᐊᓕᒥᐅᓂᒃ ᐊᖏᕐᕋᖃᑬᓐᓇᖃᑦᑕᖁᓪᓗᒋᑦ ᑐᐱᕐᒥ ᓇᓪᓕᐅᓐᓂᕐᓯᐅᕐᓂᕐᒥᖕᓂᒃ ᑐᐱᑐᐃᓐᓇᕐᒦᓐᓂᕐᒥᒃ ᑕᖅᑭᐅᑉ 7ᖓᓐᓂ.

¹⁵ ᑕᒪᓐᓇᓗ ᓇᓗᓁᕐᑕᐅᔭᕆᐊᖃᕐᓗᓂ ᔨᕉᓴᓕᒥᐅᓕᒫᓄᑦ, ᐃᒡᓗᒐᓴᖕᓄᓪᓗ ᓄᓇᓕᖕᓄᓪᓗ ᐊᓯᖏᓐᓃᑦᑐᓄᑦ, ᐅᖃᕐᓗᓂᒃ, “ᖃᖅᑲᓄᑦ ᐂᓕᕆᑦᓯ ᓇᐹᕐᑑᓪᓗ ᐊᕙᓚᖓᔪᖏᓐᓂᒃ ᑎᒍᓯᓗᓯ ᓇᐹᕐᑐᓂᑦ ᐅᕐᓱᒃᓴᓕᖕᓂᑦ, ᓇᐹᕐᑑᓪᓗ ᐅᕐᓱᒃᓴᓖᑦ ᐊᕙᓚᖓᔪᖏᓐᓂᒃ, ᒨᕐᑐᐃᓪᓗ ᐊᕙᓚᖓᔪᖏᓐᓂᒃ, ᐹᓪᒦᓪᓗ ᐊᕙᓚᖓᔪᖏᓐᓂᒃ, ᐊᓯᖏᓐᓂᒡᓗ ᓇᐹᕐᑐᓂᒃ ᐊᕙᓚᖓᔪᖏᓐᓂᒃ ᐅᖃᐅᔭᓕᖕᓂᒃ ᖁᓕᑦᔪᑎᒃᓴᑦᓯᓐᓂᒃ ᐱᖁᔧᑦ ᐱᖁᔨᓯᒪᓂᖏᑦ ᒪᓕᒡᓗᒋᑦ.”

¹⁶ ᑍᒤᒻᒪᑦ ᐃᓄᐃᑦ ᐊᕙᓚᖓᔪᓂᒃ ᐱᓚᐅᕐᐳᑦ ᓴᓇᓪᓗᑎᒡᓗ ᑐᐱᕐᒥᖕᓂᒃ ᖁᓕᓯᕗᑦ ᐃᒡᓗᖏᑕ ᐊᑐᓂᑦ ᖄᖓᓂ, ᓯᓚᑎᑦᓯᐊᒥᖕᓂᓘᓐᓃᑦ, ᑐᒃᓯᐊᕐᕕᐅᓪᓗ ᐱᕕᑐᓂᖓᓂ, ᐃᓄᑐᐃᓐᓇᕐᓄᓪᓗ ᐃᓂᒋᔭᐅᕙᒃᑑᑉ ᐱᕕᑐᓂᖓᓂ, ᐃᒥᕐᑕᕐᕕᐅᓪᓗ ᐃᑎᕐᑕᕐᕕᖓᑕ ᓴᓂᐊᓂ ᐃᕗᕅᑎᐅᓪᓗ ᐃᑎᕐᑕᕐᕕᖓᑕ ᓴᓂᐊᓂ.

¹⁷ ᐃᓄᓕᒫᑦ ᑎᒍᔭᐅᓯᒪᕕᖕᒥᑦ ᐅᑎᓚᐅᕐᑐᑦ ᓴᓇᓚᐅᕐᐳᑦ ᖁᓕᓯᒪᔪᓂᒃ ᓯᓂᒃᑕᕐᕕᒃᓴᓂᒃ ᐊᖏᕐᕋᕆᓕᕐᓗᒍᓗ. ᑕᒪᓐᓇ ᐊᑐᕐᑕᐅᓕᑍᓐᓇᓚᐅᕐᐳᖅ ᓯᕗᓪᓕᕐᐹᒥᒃ ᑍᑦᓱᒪᓂ ᐊᑐᕐᑕᐅᕙᓚᐅᕐᓯᒪᖕᒪᑦ ᔩᓱᐊᑉ ᓈᓂᐅᑉ ᐃᕐᓂᖓᑕ ᐅᓪᓗᖏᓐᓂ. ᐊᖏᔪᒥᒃ ᖁᕕᐊᓱᒡᓗᑎᒃ ᐊᓕᐊᓁᒍᓱᒃᑐᐊᓘᓚᐅᕐᐳᑦ.

¹⁸ ᐅᓪᓘᑉ ᐱᒋᐊᕐᓂᖓᓂᑦ ᓇᓪᓕᐅᓐᓂᕐᓯᐅᕐᕕᐅᑉ ᐅᓪᓗᒧᑦ ᑭᖑᓪᓕᕐᐹᒧᑦ ᑎᑭᓪᓗᒍ, ᒎᑎᐅᑉ ᐱᖁᔭᖏᑦ ᐅᖃᓕᒫᕐᑕᐅᓚᐅᕐᐳᑦ ᖃᐅᑕᒫᑦ. ᓇᓪᓕᐅᓐᓂᕐᓯᐅᓚᐅᕐᐳᓪᓗ ᐅᓪᓗᓂᒃ 7ᓂᒃ, ᐅᓪᓗᐃᓪᓗ 8ᖓᓐᓂ ᑲᑎᖃᑎᒌᒃᓗᑎᒃ ᐅᒃᑯᐊᕐᓯᓚᐅᕐᐳᑦ ᓇᓪᓕᐅᓐᓂᕐᓯᐅᕐᓂᕐᒥᖕᓂᒃ, ᐱᖁᔧᑦ ᑍᒫᒃ ᐱᖁᔨᓂᖏᑦ ᒪᓕᒡᓗᒋᑦ.