ᓂᕼᐃᒤᐊᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᕼᐃᒤᐊᐅᑉ ᐊᑭᕋᕐᑐᕐᑕᐅᓂᖓ

¹ ᓴᓐᐸᓛᑎ, ᑐᐱᐊ, ᒋᓯᒥᓗ ᐋᕋᑉᒥᐅᑦ ᐊᑭᕋᕐᑐᕐᑎᓕᒫᕗᑦ ᑐᓴᕋᒥᒃ ᐱᔭᕇᕐᓂᑦᑎᓐᓂᒃ ᐊᕙᓗᕐᔪᐊᕐᒥᒃ, ᐊᕙᓗᖃᖏᑦᑐᖃᕈᓐᓁᕐᓂᖓᓗ (ᐃᓛᒃ ᑍᑦᓱᒪᓂᐅᑎᓪᓗᒍ ᓱᓕ ᐱᔭᕇᓚᐅᓐᖏᒃᑲᓗᐊᕐᑐᒍᑦ ᐃᑎᕐᑕᕐᕕᐅᑉ ᐅᒃᑯᐊᕐᔪᐊᖏᓐᓂᒃ),

² ᑍᒤᒻᒪᑦ ᓴᓐᐸᓛᑎᓗ ᒋᓯᒥᓗ ᐅᖃᕆᐊᕐᑐᕐᑎᑦᓯᓚᐅᕐᐴᒃ, ᐅᕙᓐᓂᒃ ᑲᑎᓯᑬᓐᓇᕈᒪᓪᓗᑎᒃ ᓄᓇᓖᑦ ᐃᓚᖓᓐᓂ ᐆᓅᒥ. ᑭᓯᐊᓂ ᓯᓔᕐᕆᒃᓯᓇᓱᐊᓚᐅᕐᐳᑦ ᐅᕙᓐᓂᒃ ᐋᓐᓂᕐᓯᔪᒪᓪᓗᑎᒃ.

³ ᑎᓕᓯᓚᐅᕐᐳᖓᓕ ᐅᖃᕆᐊᕐᑐᖁᔨᓪᓗᖓ ᑖᒃᑯᓄᖓ, ᐅᖃᖁᓪᓗᒋᑦ, “ᐱᓇᓱᐊᕐᑕᕋ ᐱᒻᒪᕆᐅᖕᒪᑦ ᕾᔪᓐᓇᓐᖏᓚᖓ, ᓱᖕᒪᑦ ᐱᓇᓱᐊᕐᑕᕋ ᓄᖅᑲᐅᑎᔭᒃᓴᕆᕙᕌ ᐃᓕᖕᓂᒃ ᑕᑯᔭᕐᑐᑐᐃᓐᓇᕐᓗᖓ?”

⁴ ᑖᒃᑯᐊᓕ ᐅᖃᕆᐊᕐᑐᕐᑎᑦᓯᖃᑦᑕᓚᐅᕐᐳᑦ ᑍᒫᑦᓮᓐᓇᖅ ᓯᑕᒪᕕᒃᓱᑎᒃ, ᑍᒪᓐᖓᓪᓗ ᑍᒫᑦᓮᓐᓇᖅ ᑭᐅᖃᑦᑕᓚᐅᕐᐸᒃᑲ.

⁵ ᑕᕝᕙ ᑭᖑᓂᖓᒍᑦ ᓴᓐᐸᓛᑦ ᐱᔨᒥᓂᒃ ᑎᓕᓯᓚᐅᕐᐳᖅ ᑕᓪᓕᒪᒋᓕᕐᑕᖓᓂᒃ, ᑖᓐᓇᓗ ᑎᒍᒥᐊᓚᐅᕐᐳᖅ ᑎᑎᕋᕐᓯᒪᔪᓂᒃ ᓇᕿᑕᐅᓯᒪᖏᑦᑐᓂᒃ.

⁶ ᐃᒤᓕᐅᕐᑐᓂᒃ: “ᒋᓯᒥᐅᑉ ᐅᖃᐅᑎᓚᐅᕐᒪᖓ ᑐᓴᐅᒪᔭᐅᓕᕋᑦᓯᒎᖅ ᐃᓅᖃᑎᒌᒡᔪᐊᓄᑦ ᖃᓂᑦᑐᓃᑦᑐᓂᑦ, ᐃᓕᑦᓯ ᔫᑎᐅᔪᓯ ᒐᕙᒪᑦᓯᓐᓂᒃ ᐊᑭᕋᕐᑐᕐᓂᐅᓴᒐᑦᓯ, ᑍᒤᓐᓂᑯᖓᓄᑦ ᐊᕙᓗᕐᔪᐊᒥᒃ ᓴᓇᕗᓯ, ᐅᖃᒃᑲᓐᓂᓚᐅᕐᒪᓪᓗ ᐃᓕᖕᓂᒃ ᓇᖕᒥᓂᖅ ᐊᖓᔪᖅᑳᕐᔪᐊᓐᖑᕐᑎᓐᓂᐊᓕᕐᑐᑎᒡᒎᖅ

⁷ ᐊᒻᒪᓗ ᐋᖅᑮᔭᕇᕐᓯᒪᔪᑎᑦ ᒎᑎᐅᑉ ᐱᔪᖃᓛᕐᑐᒥᒃ ᐅᖃᕐᑎᖏᓐᓂᒃ ᔨᕉᓴᓕᒥ ᓇᓗᓁᕐᓯᓛᖁᓪᓗᒋᑦ ᐊᖓᔪᖅᑳᕐᔪᐊᓐᖑᕐᓂᕐᓂᒃ ᔫᑕᒧᑦ. ᐊᖓᔪᖅᑳᕐᔪᐊᕗᑦ ᑕᒪᑐᒥᖓ ᑐᓴᕐᓂᐊᕐᐳᖅ. ᑍᒤᒻᒪᑦ ᑲᑎᓗᓄᒃ ᑕᒪᓐᓇ ᐅᖃᖃᑎᒌᒍᑎᒋᓚᐅᕐᓚᕗᒃ.”

⁸ ᐊᐅᓪᓚᕐᑎᑦᓯᓚᐅᕐᐳᖓ ᑭᒡᒍᓯᓐᓂᒃ ᑖᑦᓱᒧᖓ, ᐅᖃᕐᓯᒪᔪᓂᒃ, “ᐅᖃᐅᓯᑎᑦ ᓇᓪᓕᐊᓪᓘᓐᓃᑦ ᓱᓕᔪᖃᓐᖏᓚᑦ, ᐃᕝᕕᓪᓕ ᓇᖕᒥᓂᖅ ᐃᓱᒪᖕᓂᒃ ᐋᖅᑭᒃᓯᒪᑐᐃᓐᓇᕐᐸᑦ.”

⁹ ᑍᒃᑯᐊ ᑲᑉᐱᐊᓱᒃᑎᑦᓯᓇᓱᐊᓚᐅᕐᒪᑕ ᐅᕙᑦᑎᓐᓂᒃ ᐱᓇᓱᐊᕐᑕᑦᑎᓐᓂᒃ ᓄᖅᑲᕐᑎᑦᓯᓇᓱᐊᕐᓗᑎᒃ, ᑍᒤᒻᒪᑦ ᑐᒃᓯᐊᓕᓚᐅᕐᐳᖓ, “ᒫᓐᓇ ᒎᑏᒃ, ᓲᖑᓂᖃᕐᑎᓚᐅᓐᖓ!”

¹⁰ ᑕᒪᑐᒪ ᑭᖑᓂᖓᒍᑦ ᐳᓛᕆᐊᓚᐅᕐᐳᖓ ᓯᒤᐊᒧᑦ ᑎᓔᐊᐅᑉ ᐃᕐᓂᖓᓄᑦ, ᒥᕼᐃᑕᐱᐅᓕᐅᑉ ᐃᕐᖑᑕᖓᓄᑦ, ᑖᓐᓇ ᐃᒡᓗᒥᓂᒃ ᕿᒤᔪᓐᓇᓚᐅᖏᒻᒪᑦ ᑐᓴᕐᑎᑦᓯᔨᒋᕙᒃᓗᒍᓗ; ᑖᑦᓱᒪ ᐅᖃᐅᑎᕙᖓ, “ᑲᑎᔭᕐᑐᓚᐅᕐᓗᒃ ᐊᑕᐅᑦᓯᒃᑯᑦ ᒎᑎᐅᑉ ᐃᒡᓗᖓᓂ, ᑕᕝᕙᓂᓗ ᑐᒃᓯᐊᕐᕕᒡᔪᐊᑉ ᐅᒃᑯᐊᖏᑦ ᐊᑦᓱᖏᕐᓗᒋᑦ, ᐃᓕᖕᓂᒃ ᑐᖁᑦᓯᔭᕐᑐᕈᒪᓪᓗᑎᒃ ᕾᓂᐊᕐᐳᑦ; ᐃᓛᒃ, ᐅᓐᓄᐊᖅ ᕾᓂᐊᕐᐳᑦ ᑐᖁᑦᓯᔭᕐᑐᕐᓗᑎᒃ ᐃᓕᖕᓂᒃ.”

¹¹ ᑭᐅᓚᐅᕐᐳᖓ, “ᐱᐅᓯᖃᓐᖏᓚᖓ ᕿᒫᔨᐅᓂᕐᒥᒃ ᐃᔨᕐᑎᑐᐃᓐᓇᐅᓂᕐᒥᒡᓗ, ᐃᓱᒪᕖᑦ ᓇᖕᒥᓂᖅ ᐃᓅᓯᓐᓂᒃ ᐱᐅᓕᓯᓇᓱᐊᕐᓂᐊᕐᑐᕆᓪᓗᖓ ᐃᔨᕆᐊᕐᑐᕐᓂᓐᓄᑦ ᑐᒃᓯᐊᕐᕕᒃᔪᐊᕐᒨᑦ? ᑍᒤᓐᓂᐊᓐᖏᓚᖓ.”

¹² ᐃᓱᒪᒋᑦᓯᐊᓕᕋᒃᑯᓕ, ᖃᐅᔨᓚᐅᕐᐳᖓ ᓯᒤᐊ ᒎᑎᐅᑉ ᐅᖃᕐᕕᒋᓚᖏᒻᒪᒍ, ᑐᐱᐊᓪᓗ ᓴᓐᐸᓛᑎᐅᓪᓗ ᑮᓇᐅᔧᕐᕕᒋᓐᓂᕐᒪᒍ ᑍᒫᒃ ᐅᖃᓪᓚᖁᓪᓗᒍ ᐅᕙᓐᓄᑦ.

¹³ ᐊᑭᓕᓚᐅᕐᐹ ᑲᑉᐱᐊᓱᖕᓂᕐᒧᑦ ᑍᒤᓕᐅᖁᓪᓗᖓ ᐊᔪᕐᑐᓕᖁᓪᓗᖓᓗ, ᑐᓴᐅᒪᔭᐅᓂᓐᓂᒃ ᓱᒃᑯᐃᔪᒪᓪᓗᑎᒃ, ᐅᕙᓐᓄᓪᓗ ᐊᑭᕋᕐᑐᕈᑎᒃᓴᖃᕈᒪᓪᓗᑎᒃ.

¹⁴ ᑐᒃᓯᐊᓚᐅᕐᐳᖓ, “ᒎᑏᒃ, ᐃᖅᑲᐅᒪᒋᑦ ᑐᐱᐊᑉ ᓴᓐᐸᓛᑎᐅᓪᓗ ᐱᓂᐊᕐᓂᕆᔭᖏᖕᓂᒃ ᓱᒋᐊᕐᓗᒋᒡᓗ, ᐃᖅᑲᐅᒪᒍᒃᑕᐅᖅ ᑍᓐᓇ ᐊᕐᓇᖅ ᓄᐊᑎᐊ ᐊᓯᖏᓪᓗ ᐱᔪᒫᕐᑐᓂᒃ ᐅᖃᕐᑎᐅᔪᑦ ᐅᕙᓐᓂᒃ ᑲᑉᐱᐊᓱᒃᑎᑦᓯᓇᓱᐊᓚᐅᕐᑐᑦ.”

ᐱᓇᓱᐊᕐᑕᐅᔪᑦ ᐱᔭᕇᕐᑕᐅᓂᖓ

¹⁵ ᐅᓪᓗᓂᒃ 52ᓂᒃ ᐱᓇᓱᐊᕐᑕᐅᔪᑦ ᐊᕙᓗᕐᔪᐊᖅ ᐱᔭᕇᕐᑕᐅᓚᐅᕐᐳᖅ ᐃᓘᓐᓇᓕᒫᖓ, ᐱᔭᕇᓚᐅᕐᐳᖅ ᐅᓪᓘᑉ 25ᖓᓐᓂ ᐃᓘᑉ ᑕᖅᑭᖓᓂ.

¹⁶ ᐊᑭᕋᕐᑐᕐᑎᕗᑦ ᖃᓂᒋᔭᑦᑎᓐᓃᑦᑐᑦ ᑐᓴᕋᒥᒃ ᑕᒪᑐᒥᖓ, ᐃᓅᖃᑎᒌᒡᔪᐊᓕᒫᓪᓗ ᖃᓂᒋᔮᓃᑦᑐᑦ ᑲᑉᐱᐊᓱᓕᓚᐅᕐᐳᑦ ᐃᒻᒥᖕᓂᒡᓗ ᐃᒃᐱᒋᐅᒻᒥᓕᕐᓗᑎᒃ, ᐃᓘᓐᓇᑎᒃ ᖃᐅᔨᓚᐅᕐᒪᑕ ᐱᓇᓱᐊᕐᑕᑦᑎᓐᓂᒃ ᐱᔭᕇᓚᐅᕋᑦᑕ ᒎᑎᐅᑉ ᐃᑲᔪᕐᓂᖓᒍᑦ.

¹⁷ ᑍᑦᓱᒪᓂᓕᒫᖅ ᔫᑎᑦ ᓯᕗᓕᕐᑎᖏᑦ ᐅᓄᕐᑐᐃᓱᕐᓗᑎᒃ ᑎᑎᕋᖃᑦᑕᓚᐅᕐᐳᑦ ᑐᐱᐊᒧᑦ, ᑖᑦᓱᒧᖓᓗ ᑎᑎᕋᕐᕕᐅᕙᒃᓗᑎᒃ.

¹⁸ ᐃᓄᐃᑦ ᐅᓄᕐᑐᑦ ᔫᑕᒥᐅᑦ ᐃᑲᔪᕐᑐᓚᐅᕐᐳᑦ ᑖᑦᓱᒥᖓ ᔫᑎᒥᒃ ᓴᑭᖃᕐᓂᖓ ᐱᑦᔪᑎᒋᓪᓗᒍ, ᓯᑲᓁᐊ ᐊᕋᐅᑉ ᐃᕐᓂᖓᓂᒃ, ᑖᑦᓱᒪᓗ ᐃᕐᓂᖓ ᔨᕼᐅᕼᐊᓇᓐ ᓄᓕᐊᓂᓚᐅᕐᒪᑦ ᒥᓱᓚᒻᒥᒃ, ᐱᕆᑬᐊᐅᑉ ᐃᕐᓂᖓᑕ ᐸᓂᖓᓂᒃ.

¹⁹ ᐃᓄᐃᓪᓗ ᐅᕙᓐᓄᑦ ᐅᖃᖃᑦᑕᓚᐅᕐᐳᑦ ᑐᐱᐊᑉ ᐱᑦᓯᐊᕐᓂᖓᓂᒃ, ᐅᖃᐅᑦᔭᐅᕙᒃᓗᓂᓗ ᐅᖃᐅᓯᕆᔭᕕᓂᓐᓂᒃ. ᑎᑎᕋᕐᕕᒋᖃᑦᑍᓐᓇᓚᐅᕐᐹᖓᓗ ᑲᑉᐱᐊᓱᒃᑎᑦᓱᒪᓪᓗᖓ.