ᓂᕼᐃᒤᐊᐅᑉ ᐊᒡᓚᖏᑦ 5 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᔪᕐᓴᕐᑐᑦ ᐅᖁᒤᒃᓴᕐᓂᖏᑦ

¹ ᑕᒪᑐᒪ ᑭᖑᓂᐊᒍᑦ ᐃᓄᐃᑦ ᐅᓄᕐᑐᑦ, ᐊᖑᑎᓪᓗ ᐊᕐᓁᓪᓗ ᓈᒻᒪᒃᓴᓐᖏᕙᓪᓛᓕᓚᐅᕐᐳᑦ ᔫᑎᐅᖃᑎᒥᖕᓄᑦ.

² ᐃᓚᖏᑦ ᐅᖃᓚᐅᕐᒪᑕ, “ᐃᓚᒌᑎᒍᑦ ᐃᓄᒋᐊᒻᒪᕆᐊᓘᒐᑦᑕ, ᓂᐊᖂᔭᒃᓴᖃᕆᐊᖃᕐᐳᒍᑦ ᓂᕆᖃᑦᑕᕐᓗᑕ ᑭᓯᐊᓂ ᐃᓅᔪᓐᓇᕋᑦᑕ.”

³ ᐊᓯᖏᑦᑕᐅᖅ ᐅᖃᕐᐳᑦ, “ᐊᑐᕐᑐᐊᕐᑎᑦᓯᔭᕆᐊᖃᓕᕐᐳᒍᑦ ᐱᕈᕐᓰᕕᑦᑎᓐᓂᒃ ᕔᓂᓕᐅᕐᕕᑦᑎᓐᓂᒡᓗ, ᐃᒡᓗᑦᑎᓐᓂᒡᓗ ᓂᐊᖂᔭᒃᓴᕐᑖᕈᓐᓇᖁᓪᓗᑕ ᐱᕐᓕᖁᓇᑕᓗ.”

⁴ ᐊᓯᖏᑦᑕᐅᖅ ᐅᖃᕆᕗᑦ, “ᐊᑐᕐᑐᐊᕆᐊᖃᓚᐅᕐᐳᒍᑦ ᑮᓇᐅᔭᓂᒃ ᐊᑭᓖᖁᓪᓗᑕ ᐊᖓᔪᖅᑳᕐᔪᐊᕐᒧᑦ ᐊᑭᓕᕆᐊᖃᕐᑕᑦᑎᓐᓂᒃ ᑖᒃᓯᓂᒃ ᐱᕈᕐᓰᕕᖁᑎᑦᑎᓐᓄᑦ ᕔᓂᓕᐊᑦᑎᓐᓄᓪᓗ.

⁵ ᐃᓅᖃᑎᒌᒃᑲᓗᐊᕐᑐᒍᑦ ᔫᑎᐅᖃᑎᒋᒐᑦᑎᒍ, ᕿᑐᕐᖓᕗᑦ ᑍᒃᑯᑎᑐᓇᖅ ᕿᑐᕐᖓᖏᑎᑐᑦ ᐱᐅᔫᑎᒋᓐᖏᓛᑦ? ᐸᓂᑦᑕ ᐃᓚᖏᑦ ᐊᒡᓛᑦ ᓂᐅᕐᕈᑎᐅᓯᒪᕗᑦ ᐱᔨᑲᑖᖑᓂᐊᓕᕐᓗᑎᒃ. ᐊᔪᓕᕐᐳᒍᑦ ᐱᕈᕐᓰᕕᖁᑎᕗᑦ ᕔᓂᓕᐅᕐᕕᒃᐳᓪᓗ ᑎᒍᔭᐅᓯᒪᓕᕐᒪᑕ.”

⁶ ᐊᒃᓱᐊᓗᒃ ᓂᓐᖓᓚᐅᕐᐳᖓ, ᓈᒻᒪᒃᓴᖏᓐᓂᖏᑦ ᐅᖃᐅᓯᕆᔭᖏᓪᓗ ᑐᓴᕋᒃᑭᑦ.

⁷ ᐃᓱᒪᒃᓴᕐᓯᐅᕈᑎᒋᒻᒪᕆᓚᐅᕐᓗᒍ ᑕᒪᓐᓇ, ᓯᕗᓕᕐᑏᑦ ᐊᖓᔪᖅᑳᓪᓗ ᐃᓄᖕᓄᑦ ᓱᐊᓚᐅᕐᐸᒃᑲ ᐃᓄᐃᑦ ᓯᕗᕌᓂ ᐅᖃᐅᑎᓪᓗᒋᓪᓗ, “ᖃᑕᓐᖑᑎᓯ ᐅᖁᒤᒃᓴᕐᑎᓕᕋᑦᓯᐅᒃ!” ᐃᓄᓕᒫᓂᒃ ᑲᑎᒪᑎᑦᓯᓕᓚᐅᕐᐳᖓ ᑕᒪᓐᓇ ᐃᓱᐃᓪᓕᐅᕈᑎᐅᔪᖅ ᐱᓪᓗᒍ.

⁸ ᐅᖃᐅᑎᓕᓚᐅᕐᐸᒃᑲᓗ, “ᐱᔪᓐᓇᕐᓂᓕᒫᑦᑎᓐᓄᑦ, ᔫᑎᐅᖃᑎᕗᑦ ᐅᑎᕐᑎᓐᓇᓱᓚᐅᕐᐸᕗᑦ ᓂᐅᕕᐊᕆᓪᓗᒋᑦ ᐃᓅᖃᑎᒌᒡᔪᐊᓂᑦ, ᐃᒻᒥᖕᓂᒃ ᓂᐅᕐᕈᑎᒋᕙᓕᕐᓂᕐᒪᑕ ᔫᑎᐅᖏᑦᑐᓄᑦ, ᒫᓐᓇᓗ ᖃᑕᓐᖑᑎᓯ ᓇᖕᒥᓂᖅ ᓂᐅᕐᕈᑎᒋᓕᕆᕗᑦ ᐃᓕᑦᓯᓐᓄᑦ, ᔫᑎᐅᖃᑎᓯ!” ᓯᕗᓕᕐᑏᑦ ᓂᓪᓕᕐᑐᖃᓚᐅᓐᖏᓚᑦ ᐅᖃᐅᓯᒃᓴᖃᕋᑎᒡᓗ.

⁹ ᑕᕝᕙ ᐅᖃᒃᑲᓐᓂᓕᕐᐳᖓ, “ᐱᓂᐊᕐᓂᕆᔭᑦᓯ ᐱᐅᓐᖏᓚᖅ! ᒎᑎᒥᒃ ᐃᒃᐱᒍᓱᑦᓯᐊᕆᐊᖃᕐᐳᓯ ᐱᐅᔪᒥᒡᓗ ᐱᓇᓱᐊᕐᓗᓯ, ᐊᑭᕋᕐᑐᕐᑎᕗᓪᓗ ᔫᑎᐅᖏᑦᑐᑦ ᐃᓅᖃᑎᒌᒡᔪᐊᑦ ᐱᑦᔪᑎᒃᓴᕐᑖᕐᑎᑕᒃᓴᕆᓐᖏᓚᕗᑦ ᐊᑭᕋᕐᑐᕈᑎᒃᓴᒥᒃ.

¹⁰ ᐃᓄᐃᑦ ᑮᓇᐅᔭᓂᒃ ᐊᑐᕐᑐᐊᕐᑎᓚᐅᕐᐸᒃᑲ ᓂᐊᖂᔭᒃᓴᓂᒡᓗ, ᐱᖃᑎᒋᔭᒃᑲᓗ ᐱᓇᓱᐊᖃᑎᒋᔭᒃᑲᓗ ᑍᒫᑦᓮᓐᓇᖅ ᐱᓇᓱᐊᕆᕗᑦ, ᒫᓐᓇᓕ ᐊᑭᓕᒃᓴᖃᕐᕕᐅᓂᕗᑦ ᐊᑭᓖᒋᐊᓖᓪᓗ ᓄᖅᑲᕐᑎᓕᕐᓚᕗᑦ.

¹¹ ᐅᓪᓗᒥ ᒫᓐᓇ ᐊᑭᓕᒃᓴᖏᑦ ᓄᖑᑎᓕᕐᓚᕗᑦ, ᑮᓇᐅᔭᐅᒃᐸᑕ, ᓂᐊᖂᔭᒃᓴᐅᒃᐸᑕ, ᕔᓂᐅᒃᐸᑕ, ᐸᐅᕐᖓᐅᓪᓘᓐᓃᑦ ᐅᕐᓱᖏᑦ, ᐱᕈᕐᓰᕕᖁᑎᖏᓪᓗ, ᕔᓂᓕᐅᕐᕕᖏᓪᓗ, ᐅᕐᓱᒃᓴᓕᖁᑎᖏᓪᓗ ᐃᒡᓗᖏᓪᓗ ᒫᓐᓇ ᐅᑎᕐᑎᑕᐅᓕᕐᓕᑦ!”

¹² ᑕᕝᕙ ᓯᕗᓕᕐᑏᑦ ᑭᐅᕗᑦ, “ᐱᓇᓱᐊᕐᓂᐊᕐᐳᒍᑦ ᐅᖃᐅᓯᕆᔭᓕᒫᑎᑦ ᐊᑐᕐᓗᒋᑦ, ᐱᖁᑎᖏᓐᓂᒃ ᐅᑎᕐᑎᑦᓯᕕᒋᓂᐊᕐᐸᕗᑦ, ᐊᑭᓕᒃᓴᖏᓐᓂᒡᓗ ᐊᑭᓖᑎᑦᓯᓇᓱᐊᕐᓂᐊᓐᖏᓚᒍᑦ.” ᑕᕝᕙ ᑐᓂᕐᕈᓯᕐᑎᑦᓯᔩᑦ ᕾᖁᓚᐅᕐᐸᒃᑲ, ᓯᕗᓕᕐᑏᓪᓗ ᐊᖏᒻᒪᕆᒍᑎᖃᕐᑎᓚᐅᕐᐸᒃᑲ ᑖᒃᑯᐊ ᓵᖏᓐᓂ, ᐊᖏᕈᑎᒋᔭᒥᖕᓂᒃ ᑲᔪᓯᑦᓯᐊᖁᓪᓗᒋᑦ.

¹³ ᐅᓕᒡᔪᐊᒪᓗ ᕿᑎᕈᑎᖓ ᐊᑐᕐᑕᕋ ᐃᑦᓱᒃᑐᕐᓗᒍ, ᐅᖃᕐᐳᖓ, “ᑍᒫᑦᓮᓐᓇᖅ ᒎᑎᐅᑉ ᐃᑦᓱᒃᑐᕐᓂᐊᕐᐹᓯ; ᐃᒡᓗᑦᓯᓐᓂᓗ ᓱᓇᑐᐃᓐᓇᑦᓯᓐᓂᒃ ᓇᖕᒥᓂᑦᓯᓐᓂᒃ ᐊᕐᓵᕐᓂᐊᕐᐹᓯ, ᓱᓇᒥᒡᓘᓐᓃᑦ ᕿᒤᕕᒋᓂᐊᓐᖏᓛᓯ ᐊᖏᕈᑎᒋᔭᑦᓯᓐᓂᒃ ᑲᔪᓯᓐᖏᑐᐊᕈᑦᓯ!” ᐃᓘᓐᓇᑎᒃ ᑲᑎᒪᔪᑦ ᐅᖃᕐᐳᑦ, “ᐋᒦᓐ!” ᐊᑕᓂᖅ ᓂᕐᑐᕐᑕᐅᓕ, ᓯᕗᓕᕐᑏᑦ ᑲᔪᓯᓚᐅᕐᒪᑕ ᐊᖏᕈᑎᒋᓚᐅᕐᑕᒥᖕᓂᒃ.

ᓂᕼᐃᒤᐊᐅᑉ ᓇᖕᒥᓂᕐᓱᑐᐃᓐᓇᖏᓐᓂᖓ

¹⁴ ᐊᕐᕌᒍᓂᒃ 12ᓂᒃ ᐊᐅᓚᑦᓯᔨᐅᑎᑕᐅᑎᓪᓗᖓ ᔫᑕᐅᑉ ᓄᓇᖓᓂ, ᐋᕐᑕᔮᒃᓯᐅᑉ ᐊᖓᔪᖅᑳᕐᔪᐊᖑᓂᖓᓂ ᐊᕐᕌᒍᒥ 20ᒥᑦ ᐱᒋᐊᕐᓗᓂ 32ᒧᑦ ᑎᑭᓪᓗᒍ, ᐅᕙᖓᓘᓐᓃᑦ ᐃᓚᒃᑲᓘᓐᓃᑦ ᓂᕆᓚᐅᓐᖏᓚᒍᑦ ᓂᕿᒋᔭᕆᐊᖃᕐᑕᑦᑎᓐᓂᒃ ᐊᐅᓚᑦᓯᔨᐅᓂᓐᓄᑦ ᑐᕌᖓᔪᓂᒃ.

¹⁵ ᐊᐅᓚᑦᓯᔨᐅᓚᐅᕐᑐᑦ ᐃᓘᓐᓇᑎᒃ ᓯᕗᓂᓐᓂ ᐃᓄᖕᓄᑦ ᐅᖁᒤᓐᓇᕐᑑᓚᐅᕐᒪᑕ ᐊᑭᓖᖁᔨᕙᓚᐅᕐᒪᑕᓗ 40ᓂᒃ ᓯᐅᓪᕕᕆᓂᒃ, ᓂᕿᓂᒡᓗ, ᕔᓂᓂᒡᓗ, ᐱᔨᒋᔭᖏᓪᓘᓐᓃᑦ ᐅᖁᒤᒃᓴᕐᑎᑦᓯᓚᐅᕆᕗᑦ ᐃᓄᖕᓂᒃ, ᑍᒤᓕᐅᓚᐅᓐᖏᓚᖓᓕ ᒎᑎᒥᒃ ᐃᓕᕋᓱᓚᐅᕋᒪ.

¹⁶ ᐱᔪᓐᓇᕐᓂᓕᒫᓐᓄᑦ ᐱᓇᓱᐊᓚᐅᕐᐳᖓ ᐋᖅᑮᕙᓪᓕᐊᓪᓗᑕ ᐊᕙᓗᕐᔪᐊᒥᒃ, ᓄᓇᒥᒡᓗ ᓇᖕᒥᓂᕐᑖᓚᐅᓐᖏᓚᒍᑦ, ᐃᓘᓐᓇᑎᒡᓗ ᐅᕙᓐᓄᑦ ᐱᓇᓱᒃᑐᑦ ᓴᓇᖃᑕᐅᓚᐅᕐᐳᑦ ᐊᕙᓗᕐᔪᐊᒥᒃ.

¹⁷ ᖃᐅᑕᒫᑦ ᓂᕆᑎᑦᓯᖃᑦᑕᓚᐅᕐᐳᖓ ᐊᖏᕐᕋᓐᓂ ᔫᑎᓂᒃ 150ᓂᒃ ᐊᐅᓚᑦᓯᔨᐅᔪᓂᒡᓗ, ᐊᓯᖏᓐᓂᒡᓗ ᐃᓄᖕᓂᒃ ᐅᕙᓐᓄᑦ ᕾᓯᒪᔪᓂᒃ ᓄᓇᓂᑦ ᐃᓅᖃᑎᒌᒡᔪᐊᓂᒃ ᓇᑭᑐᐃᓐᓈᕐᓯᒪᔪᓂᒃ.

¹⁸ ᖃᐅᑕᒫᑦ ᓂᕆᑎᑦᓯᖃᑦᑕᓚᐅᕐᐳᖓ ᐃᒻᒧᒃᓯᐅᒐᕐᒥᒃ ᐊᑕᐅᓯᕐᒥᒃ, ᐱᖓᓲᔪᕐᑐᓂᒃ ᓰᐱᓂᒃ ᐱᐅᓂᕐᐹᓂᒃ, ᐅᓄᕐᑐᓂᒡᓗ ᐊᑭᒡᒋᐅᔭᓂᒃ, ᐅᓪᓗᐃᓪᓗ ᖁᓕᑦ ᓈᑐᐊᕐᒪᑕ ᐊᑐᐃᓐᓇᐅᑎᑦᓯᕙᓚᐅᕐᐳᖓ ᕔᓂᒥᒃ ᓄᑖᒥᒃ, ᖃᐅᔨᒪᒐᒪ ᐃᓄᐃᑦ ᐅᖁᒤᒃᓴᕐᓂᖏᓐᓂᒃ, ᐱᔭᕆᐊᓕᒐᓗᐊᒃᑲ ᐊᐅᓚᑦᓯᔨᐅᓂᓐᓄᑦ ᐱᖃᑦᑕᓚᐅᓐᖏᓚᒃᑲ.

¹⁹ ᒎᑏᒃ, ᐃᖅᑲᐅᒪᓂᐊᕐᐸᕐᒪ ᐱᑦᓯᐊᕐᓯᒪᓂᓐᓂᒃ, ᐱᓂᐊᕐᓂᕆᓯᒪᔭᓕᒫᓐᓂᒡᓗ ᐅᑯᓄᖓ ᐃᓄᖕᓄᑦ.