ᓂᕼᐃᒤᐊᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᕼᐃᒤᐊᐅᑉ ᐊᑭᕋᕐᑐᕐᑎᒥᓂᒃ ᓵᓚᖃᕐᓂᖓ ᓴᓇᑎᓪᓗᒍ

¹ ᓴᓐᐸᓛᑎᓕ ᑐᓴᕋᒥ ᔫᑎᐅᔪᒍᑦ ᓴᓇᓕᕐᓂᑦᑎᓐᓂᒃ ᐊᕙᓗᕐᔪᐊᒥᒃ, ᓂᓐᖓᐅᒪᓕᓚᐅᕐᐳᖅ ᐱᐅᒃᓴᕈᓐᓁᕐᓗᓂᓗ ᐅᕙᑦᑎᓐᓂᒃ.

² ᐱᖃᑎᒋᔭᓂ ᓴᒥᐊᕆᐊᒥᐅᓪᓗ ᐅᓇᑕᕐᑐᒃᓴᖁᑎᖏᑕ ᓵᖓᓂ ᐅᖃᓚᐅᕐᐳᖅ, “ᖃᓄᕐᖏᒃᑯᐊ ᔫᑎᕐᓗᐊᓗᐃᑦ ᐱᓇᓱᓕᕐᑐᑦ? ᐃᒃᑯᐊ ᓴᓇᒋᐊᓪᓚᒐᓱᒃᑐᑦ ᐃᒡᓗᒐᓴᖕᓃᒃ? ᐃᒃᑯᐊ ᑐᓂᕐᕈᓯᖃᑦᑕᕐᓂᕐᒥᒍᑦ ᐱᔭᕇᕐᓂᐊᕋᓱᒋᔫᑦ ᓴᓇᔭᒥᖕᓂᒃ ᐅᓪᓗᒥᒃ ᐊᑕᐅᓯᕐᒥᒃ? ᐅᔭᕋᖕᓂᒃ ᓴᓇᔪᓐᓇᕐᐹᑦ ᓱᕋᒃᑎᕐᓯᒪᔪᓂᒃ ᐃᑯᐊᓪᓚᒃᓯᒪᔪᓂᒡᓗ ᖃᓕᕇᕌᓗᖕᓂᒃ?”

³ ᑐᐱᐊᓕ ᐊᒧᓁᑎᒥᐅᖅ ᓇᖏᕐᐳᖅ ᑖᑦᓱᒪ ᓴᓂᐊᓂ, ᐅᖃᕐᓗᓂᓗ, “ᖃᓄᐃᑦᑐᒥᒃ ᐊᑭᓐᓇᓕᐅᕈᓐᓇᕐᐹᑦ? ᓴᓇᔭᖏᑦ ᑎᕆᒐᓂᐊᒧᓪᓘᓐᓃᑦ ᒪᔪᕐᕕᐅᒍᑎᒃ ᐅᕐᕈᑎᑕᐅᔪᓐᓇᕐᑐᑦ!”

⁴ ᑐᒃᓯᐊᓚᐅᕐᐳᖓ, “ᑐᓵᓚᐅᕆᑦ ᐅᕙᑦᑎᓐᓂᒃ ᒥᑕᐅᑎᖃᕐᑎᓪᓗᒋᑦ, ᒎᑏᒃ! ᐱᑦᓯᐊᖏᓐᓂᖏᑦ ᐃᒻᒥᖕᓄᑦ ᑲᑕᓚᐅᕐᓕ ᓂᐊᖁᖏᓐᓄᑦ, ᑎᒡᓕᒡᕕᐅᓚᐅᕐᓕᓪᓗ ᐱᖁᑎᖏᓐᓂᒃ ᐃᓘᓐᓇᖏᓐᓂᒃ, ᑎᒍᔭᐅᒪᔪᑎᑐᓪᓗ ᑎᒍᔭᐅᓚᐅᕐᓕ ᓄᓇᒋᓐᖏᑕᒥᖕᓄᑦ.

⁵ ᐃᓱᒪᒋᔪᓐᓁᕐᕕᒋᑦᑍᓕᒃᑭᑦ ᐳᐃᒍᕐᑍᓕᒃᑭᓪᓗ ᐊᔪᕐᑐᓕᓂᖏᓐᓂᒃ, ᑍᒃᑯᐊ ᐅᕙᑦᑎᓐᓂᒃ ᓇᕐᕈᓇᕐᓯᑎᑦᓯᖕᒪᑕ ᓴᓇᓂᑦᑎᓐᓂᒃ ᐃᓕᖕᓂᒡᓗ ᓂᓐᖓᒃᓮᓪᓗᑎᒃ.”

⁶ ᑲᔪᓯᓚᐅᕐᐳᒍᓪᓕ ᓴᓇᔭᑦᑎᓐᓂᒃ ᐊᕙᓗᕐᔪᐊᕐᒥᒃ, ᐊᑯᓂᐅᓗᐊᖏᑦᑐᕐᓗ ᐊᕝᕙᕈᓚᐅᕐᐹᑦ ᐳᕐᑐᓂᖓ, ᐃᓄᐃᑦ ᑲᑦᓱᖎᒻᒪᕆᓚᐅᕐᒪᑕ ᓴᓇᔭᒥᖕᓂᒃ.

⁷ ᓴᓐᐸᓛᑎᓕ, ᑐᐱᐊᓗ ᐃᓄᐃᓪᓗ ᐋᕋᑉᒥᐅᑦ, ᐊᒧᓁᑎᒥᐅᑦ ᐋᔅᑖᑦᒥᐅᓪᓗ ᑐᓴᕋᒥᒃ ᐱᕙᓪᓕᐊᓂᑦᑎᓐᓂᒃ ᐊᕙᓗᕐᔪᐊᓪᓗ ᐱᔭᕇᕐᐸᓪᓕᐊᓂᖓᓂᒃ ᔨᕉᓴᓕᐅᑉ ᐊᕙᓗᕐᔪᐊᖓᑕ, ᓯᖁᒥᓯᒪᓂᖏᓪᓗ ᐊᕙᓗᕐᔪᐊᒦᑦᑐᑦ ᒪᑐᔭᐅᕙᓪᓕᐊᓂᖏᓐᓂᒃ, ᑖᒃᑯᐊ ᓂᓐᖓᐅᒪᒻᒪᕆᓕᓚᐅᕐᐳᑦ.

⁸ ᐊᓱᐃᓛᒃ ᐃᓱᒪᖃᑎᒌᓚᐅᕐᐳᑦ ᑲᑎᓪᓗᑎᒡᓗ ᔨᕉᓴᓕᒥᒃ ᐅᓇᑕᕆᐊᕈᒪᓪᓗᑎᒃ ᓇᓗᓕᕐᑎᑦᓯᔪᒪᓪᓗᑎᒡᓗ,

⁹ ᑐᒃᓯᐊᓚᐅᕐᐳᒍᓪᓕ ᒎᑎᒧᑦ ᓇᐅᑦᓯᕐᑐᕐᑎᕾᓐᓇᓕᕐᓗᑕᓗ ᐅᓪᓗᒃᑯᑦ ᐅᓐᓄᒃᑯᓪᓗ.

¹⁰ ᔫᑕᐅᑉ ᐃᓄᖏᑦ ᐃᓐᖏᐅᑎᖃᓚᐅᕐᐳᑦ ᐃᓐᖏᕐᐸᒃᑕᒥᖕᓂᒃ: “ᓴᓐᖐᓕᕗᒍᑦ ᐅᖁᒤᒃᓴᕐᓂᕐᒧᑦ; ᐅᔭᕅᑦ ᖃᓕᕇᒃᑐᑦ ᐅᓄᓗᐊᓕᕐᒪᑕ, ᖃᓄᕐᓕ ᐊᕙᓗᕐᔪᐊᓕᐅᕐᓂᐊᕐᐱᑖ ᐅᓪᓗᒥ?”

¹¹ ᐊᑭᕋᕗᑦ ᐃᓱᒪᓚᐅᕐᒪᑕ ᑕᑯᓂᐊᕐᑐᒋᒃᓯᓇᑎᒃ ᖃᐅᔨᒪᓇᓱᒋᒃᓯᒐᑎᒡᓗ, ᕾᒐᒥᒃ ᑭᓯᐊᓂ ᖃᐅᔨᓚᐅᕐᐳᑦ, ᑐᖁᑦᓯᒋᐊᕐᑐᓕᕋᒥᒃ ᐱᓇᓱᐊᕐᑕᑦᑎᓐᓂᒡᓗ ᓄᖅᑲᕐᑎᑦᓯᒋᐊᕐᑐᓕᕋᒥᒃ.

¹² ᑭᓯᐊᓂᓕ ᑍᒪᓐᖓᑦ ᔫᑎᓂᑦ ᖃᓂᒋᔮᓂ ᓄᓇᖃᖃᑕᐅᔪᓂᑦ ᐊᑭᕋᑦᑎᓐᓄᑦ ᐅᖃᐅᑦᔭᐅᒋᐊᕐᑐᖃᑦᑕᓚᐅᕐᐳᒍᑦ, ᐊᑭᕋᑦᑕᓗ ᐅᕙᑦᑎᓐᓄᑦ ᐱᓇᓱᐊᓕᕐᑕᖏᓐᓂᒃ.

¹³ ᑍᒤᒻᒪᑦ ᐃᓄᐃᑦ ᓴᕕᒃᔪᐊᕐᑖᕐᑎᓚᐅᕐᐸᒃᑲ, ᖃᓗᒋᐊᓂᒡᓗ, ᐱᓯᒃᓯᓂᒡᓗ, ᖃᐅᔨᓴᕐᐸᒃᓗᑎᒡᓗ, ᐊᕙᓗᕐᔪᐊᒥ ᐊᒃᐸᓯᖕᓂᕐᓴᒥ ᐊᕙᓗᕐᔪᐊᖃᖏᓐᓂᖓᓂᓗ, ᐃᓚᒌᑦ ᒪᓕᒡᓗᒋᑦ ᐊᕙᓗᕐᔪᐊᑉ ᓴᓂᐊᓂ ᐱᔭᕇᕐᓯᒪᖏᑦᑐᓂ.

¹⁴ ᑕᑯᓚᐅᕐᐳᖓᓕ ᐃᓄᖕᓂᒃ ᐃᓱᒪᔮᕐᑐᓂᒃ, ᑍᒤᒻᒪᑦ ᓯᕗᓕᕐᑎᖏᑦ ᐅᖃᐅᑎᓚᐅᕐᐸᒃᑲ, ᐊᖓᔪᖅᑳᖏᓪᓗ, “ᑲᑉᐱᐊᓱᒃᑍᓕᒋᑦᓯ ᐊᑭᕋᑦᑎᓐᓂᒃ, ᐃᖅᑲᐅᒪᒋᑦᓯ ᖃᓄᖅ ᐊᑕᓂᖅ ᐊᔪᖏᑦᑐᕐᔪᐊᖑᓂᖓᓂᒃ ᐊᖏᔪᕐᔪᐊᖑᓂᖓᓂᒡᓗ, ᓴᐳᓐᓂᐊᕐᓂᐊᕐᐳᕐᓗ, ᐃᓚᑦᓯᓐᓂᒃ, ᓄᓇᖅᑲᑎᑦᓯᓐᓂᒃ, ᕿᑐᕐᖓᑦᓯᓐᓂᒃ, ᓄᓕᐊᑦᓯᓐᓂᒃ, ᐊᖏᕐᕋᓯᓗ ᐱᓪᓗᒋᑦ.”

¹⁵ ᐊᑭᕋᕗᓪᓕ ᑐᓴᕋᒥᒃ ᖃᐅᔨᒪᓕᕐᓂᑦᑎᓐᓂᒃ ᐊᑭᕋᕐᑐᕋᓱᖕᓂᖏᓐᓂᒃ, ᖃᐅᔨᓪᓗᑎᒡᓗ ᐋᖅᑭᒃᓱᕐᓯᒪᓇᓱᒃᑕᖏᑦ ᒎᑎᐅᑉ ᓵᓚᒋᖕᒪᒋᑦ, ᐃᓘᓐᓇᑕᓗ ᓴᓇᔭᑦᑎᓐᓄᑦ ᐅᑎᕐᓂᑦᑎᓐᓂᒃ ᓴᓇᒋᐊᓪᓚᓕᕐᓂᑦᑎᓐᓂᒡᓗ ᐊᕙᓗᕐᔪᐊᕐᒥᒃ.

¹⁶ ᑍᒃᑲᓐᖓᓂᑦ ᐱᒋᐊᕐᓗᒍ ᐃᓄᐃᑦ ᐊᕝᕙᖏᑦ ᓴᓇᖃᑦᑕᓕᓚᐅᕐᐳᑦ, ᐊᕝᕙᖏᓪᓗ ᖃᐅᔨᓴᕐᑎᐅᓪᓗᑎᒃ, ᐅᓕᒡᔪᐊᖃᓚᐅᕐᐳᑦ ᓴᐴᓗᑕᖃᕐᓗᑎᒡᓗ ᐅᓇᑕᐅᑎᖃᕐᓗᑎᒡᓗ ᖃᓗᒋᐊᓂᒃ, ᓴᐴᓗᑕᕐᓂᒃ, ᐱᓯᒃᓯᓂᒡᓗ. ᓯᕗᓕᕐᑎᕗᓪᓗ ᐃᑲᔪᕐᑐᑦᓯᐊᓚᐅᕐᐳᑦ ᐃᓄᖕᓂᒃ.

¹⁷ ᐊᕙᓗᕐᔪᐊᒥᒃ ᓴᓇᔪᓂᒃ, ᑍᒃᑯᐊᑦᑕᐅᖅ ᐃᓚᒃᓴᓂᒃ ᐊᒡᔭᕐᑐᕐᑏᑦ ᐱᓇᓱᐊᓚᐅᕐᐳᑦ ᐊᒡᒐᖕᒥ ᐃᒡᓗᐊᓄᑦ, ᐃᒡᓗᐊᓄᓪᓗ ᓱᒋᐅᓯᔭᕐᓗᑎᒃ.

¹⁸ ᓴᓇᔪᓕᒫᑦ ᕿᑎᕐᒥᐅᑕᖃᓚᐅᕐᐳᑦ ᓴᕕᒡᔪᐊᒥᒃ. ᐊᖑᓪᓗ ᑎᑦᑐᓚᐅᑎᒥᒃ ᓂᓪᓕᕐᑎᑦᓯᒍᒫᕐᓂᐊᕐᑐᖅ ᐅᕙᓐᓃᖏᓐᓇᓚᐅᕐᐳᖅ.

¹⁹ ᑕᕝᕙ ᐃᓄᐃᑦ ᐊᖓᔪᖅᑳᖏᑦ, ᓯᕗᓕᕐᑎᖏᓪᓗ ᐅᖃᐅᑎᓚᐅᕐᐸᒃᑲ, “ᐱᓇᓱᐊᕐᑐᑦ ᓯᐊᒻᒪᕐᓯᒪᓗᐊᕐᒪᑕ ᐅᖓᓯᒌᓗᐊᕐᓗᑎᒡᓗ ᐊᕙᓗᕐᔪᐊᓕᐅᕐᑕᒥᖕᓂ.

²⁰ ᖃᖓᑐᐃᓐᓇᑦᓯᐊᖅ ᑎᑦᑐᓚᐅᒻᒥᒃ ᑐᓴᑐᐊᕈᑦᓯ ᕾᓛᕐᐳᓯ, ᒎᑎᕗᑦ ᐅᓇᑕᕐᓂᐊᕐᒪᑦ ᐅᕙᒍᑦ ᐱᓪᓗᑕ.”

²¹ ᑍᒤᒻᒪᑦ ᖃᐅᑕᒫᑦ, ᐅᓪᓛᒻᒪᕆᖕᒥᑦ ᐱᒋᐊᕐᓗᑕ ᐅᓐᓄᒧᑦ ᐅᓪᓗᕆᐊᑦ ᓄᐃᖕᒪᑕ ᑭᓯᐊᓂ ᓄᖅᑲᕐᐸᒃᓗᑕ ᐱᓇᓱᐊᖃᑦᑕᓚᐅᕐᐳᒍᑦ, ᐊᕝᕙᖏᑦ ᐱᓇᓱᐊᕐᐳᑦ ᐊᕙᓗᕐᔪᐊᓕᕆᓪᓗᑎᒃ, ᐊᕝᕙᖏᑕ ᐂᑉᐸᖏᑦ ᖃᐅᔨᓴᕐᑎᐅᑎᓪᓗᒋᑦ ᖃᓗᒋᐊᖃᕐᓗᑎᒃ.

²² ᑍᑦᓱᒪᓂᐅᑎᓪᓗᒍ ᐊᖑᑎᑦ ᑲᒪᔨᐅᔪᑦ ᐃᑲᔪᕐᑎᓕᒫᖏᓪᓗ ᔨᕉᓴᓕᒦᖏᓐᓇᖁᓪᓗᒋᑦ ᐅᓐᓄᒃᑯᑦ ᐅᖃᐅᑎᓚᐅᕆᕙᒃᑲ, ᐃᒡᓗᒐᓮᓪᓗ ᖃᐅᔨᓴᕐᑎᕾᓐᓇᑯᓪᓗᒋᑦ ᐅᓐᓄᒃᑯᑦ ᐅᓪᓗᒃᑯᓪᓗ ᐱᓇᓱᐊᕈᓐᓇᖁᓪᓗᒋᑦ ᑍᒤᓚᐅᕐᐳᒍᑦ.

²³ ᐊᓐᓄᕌᒃᑲᓘᓐᓃᑦ ᐅᓐᓄᒃᑯᑦ ᐲᖃᑦᑕᕈᓐᓁᓚᐅᕐᐸᒃᑲ, ᐃᓚᒋᔭᒃᑲᓗ, ᐱᔨᒋᔭᒃᑲᓘᓐᓃᑦ ᖃᐅᔨᓴᕐᑎᖁᑎᒃᑲᓘᓐᓃᑦ ᐅᕙᓐᓂᒃ ᒪᓕᑐᐃᓐᓇᓚᐅᕐᐳᑦ, ᑭᓯᐊᓂ ᐅᐊᓴᕆᐊᖃᓕᕌᖓᑕ ᐲᖃᑦᑕᕋᓗᐊᕐᓗᑎᒍ, ᐅᓇᑕᐅᑎᓂᒃ ᓇᔪᕐᑎᕾᓐᓇᓕᓚᐅᕋᑦᑕ.