ᓂᕼᐃᒤᐊᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᔨᕉᓴᓕᐅᑉ ᐊᕙᓗᖏᑕ ᐋᖅᑭᒋᐊᕐᑕᐅᓂᖏᑦ

¹ ᐃᒫᒃ ᑕᕝᕙ ᐃᒡᓗᒐᓮᑦ ᐊᕙᓗᕐᔪᐊᖓᑕ ᐋᖅᑭᒋᐊᕐᑕᐅᓂᖏᑦ ᐃᒤᓕᐅᓚᐅᕐᐳᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓ ᐃᓔᐊᓯᑉ ᑐᓂᕐᕈᓯᕐᑎᑦᓯᔨᖁᑎᖏᓪᓗ ᐋᖅᑮᒋᐊᓚᐅᕐᐳᑦ ᓰᐲᑦ ᐃᑎᕐᑕᕐᕕᖓᓂᒃ, ᑐᓂᕐᕈᑎᒋᓪᓗᒍᓗ, ᐃᑎᕐᑕᕐᕕᐅᓪᓗ ᐅᒃᑯᐊᖓ ᒪᓕᒡᓗᒍ ᐊᕙᓗᐊᓗ ᑐᓂᕐᕈᑎᒋᓚᐅᕐᐹᑦ 100ᐃᓪᓗ ᓇᐸᔪᕐᔪᐊᖓ ᕼᐊᓇᓂᐅᓪᓗ ᓇᐸᔪᕐᔪᐊᖓᓄᑦ.

² ᔨᕆᑰᑉ ᐃᓄᖏᑦ ᓴᓇᓚᐅᕐᐳᑦ ᓴᓂᐊᓃᑦᑐᒥᒃ. ᔭᑯᕆ ᐃᒻᕆᐅᑉ ᐃᕐᓂᖓ ᓴᓇᓚᐅᕐᐳᖅ ᓴᓂᐊᓃᑦᑐᒥᒃ.

³ ᕼᐊᓯᓇᐅᑉ ᑭᖑᕚᖏᑦ ᓴᓇᓚᐅᕐᐳᑦ ᐃᖃᓗᐃᑦ ᐃᑎᕐᑕᕐᕕᖓᓂᒃ, ᐃᑎᕐᑕᕐᕕᐅᑉ ᓴᐅᓂᖏᑦ ᐃᓕᔭᐅᓚᐅᕐᐳᑦ ᖁᓛᓄᑦ, ᐊᑦᓱᖏᐅᑎᖏᓪᓗ ᓴᕕᕋᔭᑯᑖᖏᓪᓗ ᐃᓕᕔᑦ ᐃᑎᕐᑕᕐᕕᖕᒧᑦ.

⁴ ᒥᕆᒫᑎᒃᑯᑦ ᔪᕅᐊᐅᑉ ᐃᕐᓂᖓ, ᕼᐊᑰᔨᐅᑉ ᐃᕐᖑᑕᖏᑦ ᓴᓇᓚᐅᕐᐳᑦ ᓴᓂᐊᓃᑦᑐᒥᒃ. ᓴᓂᐊᓂ ᒥᓱᓚᒻᑯᑦ ᐱᕆᑬᐊᐅᑉ ᐃᕐᓂᖓ, ᒥᓯᔭᐱᐅᑉ ᐃᕐᖑᑕᖏᑦ ᓴᓇᓚᐅᕐᐳᑦ. ᔭᑑᑭᒃᑯᑦ ᐹᓇᐅᑉ ᐃᕐᓂᖓ ᓴᓇᓚᐅᕐᐳᖅ ᓴᓂᐊᓃᑦᑐᒥᒃ.

⁵ ᑎᑯᐊᒥᐅᑦ ᓴᓇᓚᐅᕐᐳᑦ ᓴᓂᐊᓃᑦᑐᒥᒃ, ᓄᓇᓕᖕᓂᓕ ᓯᕗᓕᕐᑎᖏᑦ ᓴᓇᔪᒪᓚᐅᓐᖏᓚᑦ ᑲᒪᔨᒋᔭᐅᔪᑦ ᑎᓕᓯᑦᔪᑎᒋᓚᐅᕐᑕᖏᓐᓂᒃ.

⁶ ᔪᐃᐊᑕ ᐸᓯᐊᑉ ᐃᕐᓂᖓ ᒥᓱᓚᒻᓗ ᐱᓱᑎᐊᑉ ᐃᕐᓂᖓ ᓴᓇᓚᐅᕐᐳᑦ ᔨᓴᓈᑉ ᐃᑎᕐᑕᕐᕕᖓᓂᒃ, ᕿᔪᖏᑦ ᐋᖅᑭᓚᐅᕐᐰᑦ ᐃᑎᕐᑕᕐᕕᖏᑦ ᐃᓕᓚᐅᕐᐰᑦ, ᐊᑦᓱᖏᐅᑎᖏᓪᓗ ᓴᕕᕋᔭᑯᑖᖏᓪᓗ ᐋᖅᑭᓚᐅᕐᐰᑦ.

⁷ ᒥᓚᑎᐊ ᒋᐱᐅᓂᒥᐅᑕᖅ, ᔧᑕᓐ ᒥᕈᓄᑍᒥᐅᑕᖅ, ᒋᐱᐅᓂᐅᓪᓗ ᒥᔅᐸᐅᓪᓗ ᐃᓄᖁᑎᖏᑦ ᓴᓇᓚᐅᕐᐳᑦ ᓴᓂᐊᓃᑦᑐᒥᒃ, ᐊᐅᓚᑦᓯᔨᐅᑉ ᐃᕗᕅᑎᐅᑉ ᐅᐊᖕᓇᖓᓃᑦᑐᒧᑦ ᐃᒡᓗᖓ ᑎᑭᓪᓗᒍ.

⁸ ᐊᑦᔧᐅᓪ ᕼᐊᕋᕼᐂᐊᐅᑉ ᐃᕐᓂᖓ, ᒎᓗᓕᕆᔨ ᓴᓇᓚᐅᕐᐳᖅ ᓴᓂᐊᓃᑦᑐᒥᒃ. ᕼᐊᓇᓁᐊ, ᑎᐱᑦᓯᐊᕆᒃᓴᐅᑎᓂᒃ ᓴᓇᔨ, ᓴᓇᓚᐅᕐᐳᖅ ᓴᓂᐊᓃᑦᑐᒥᒃ, ᔨᕉᓴᓕᒻ ᐋᖅᑭᒃᓱᕐᑕᐅᒃᑲᓐᓂᕐᓗᓂ ᐳᕈᐊᑦ ᐊᑭᓐᓇᖓ ᑎᑭᓪᓗᒍ.

⁹ ᕆᐰᐊ ᕼᐊᕆᐅᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᔨᕉᓴᓕᐅᑉ ᐊᕕᒃᓯᒪᓂᖓᑕ ᐊᕝᕙᖓᓂᒃ, ᓴᓇᓚᐅᕐᐳᖅ ᓴᓂᐊᓃᑦᑐᒥᒃ.

¹⁰ ᔨᑍᐊ ᕼᐊᕈᒫᐸᐅᑉ ᐃᕐᓂᖓ, ᓴᓇᓚᐅᕐᐳᖅ ᓴᓂᐊᓃᑦᑐᒥᒃ, ᐃᒡᓗᒥᑕ ᖃᓂᒋᔮᓃᑦᑐᒥᒃ. ᕼᐊᑑᓯ ᕼᐊᓴᑉᓂᐊᑉ ᐃᕐᓂᖓ ᓴᓇᓚᐅᕐᐳᖅ ᓴᓂᐊᓃᑦᑐᒥᒃ.

¹¹ ᒪᓪᑬᔭ ᕼᐊᕆᒻᒥᐅᑉ ᐃᕐᓂᖓ ᕼᐊᓲᑉᓗ ᐸᕼᐊᑕ-ᒧᐊᐱᐅᓪᓗ ᐃᕐᓂᖓ ᓴᓇᓚᐅᕐᐳᖅ ᓴᓂᐊᓃᑦᑐᒥᒃ ᐊᕕᓐᓗ ᓇᐸᔪᕐᔪᐊᖓᓂᒃ.

¹² ᓴᓗᒻ ᕼᐊᓗᕼᐃᓴᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᔨᕉᓴᓕᐅᑉ ᐊᕕᒃᓯᒪᓂᖓᑕ ᐂᑉᐸᖓᓂᒃ, ᓴᓇᓚᐅᕐᐳᖅ ᓴᓂᐊᓃᑦᑐᒥᒃ, ᐸᓂᖏᓪᓗ ᐃᑲᔪᓚᐅᕐᐳᑦ ᓴᓇᑎᓪᓗᒍ.

¹³ ᕼᐊᓄᓂ ᓄᓇᖃᓚᐅᕐᑐᕐᓗ ᐃᒡᓗᒐᓴᖕᓂ ᔭᓄᐊᒥ ᓴᓇᓚᐅᕐᐳᖅ ᓇᕐᓴᐅᑉ ᐃᑎᕐᑕᕐᕕᖓᓂᒃ, ᐃᑎᕐᑕᕐᕕᒡᓗ ᓴᓇᕚᑦ ᐅᒃᑯᐊᖏᓪᓗ ᐋᖅᑭᒃᐰᑦ ᐊᑦᓱᖏᐅᑎᖏᓪᓗ ᓴᕕᕋᔭᑯᑖᖏᓪᓗ ᐃᓕᕔᑦ, ᐊᑭᓐᓇᕐᓗ ᐋᖅᑭᒋᐊᕐᓗᒍ ᑕᑭᒡᓕᒋᐊᕐᐹᑦ 1,500ᓂᒃ ᐃᑎᒐᖕᓂᒃ, ᓴᓂᒃᑯᕕᓕᐊᕆᐊᑉ ᐃᑎᕐᑕᕐᕕᖓ ᑎᑭᓪᓗᒍ.

¹⁴ ᒪᓪᑬᔭ ᕆᑳᐱᐅᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᐱᑦᕼᐊᑲᕆᑉ ᐊᕕᒃᑐᕐᓯᒪᓂᖓᓄᑦ, ᓴᓇᓚᐅᕐᐳᖅ ᓴᓂᒃᑯᕕᓕᐊᕆᐊᑉ ᐃᑎᕐᑕᕐᕕᖓᓂᒃ; ᐃᑎᕐᑕᕐᕕᐅᑉ ᐊᕙᓗᖏᑦ ᐋᖅᑭᒃᓱᓚᐅᕐᐰᑦ, ᐊᑦᓱᖏᐅᑎᖏᓪᓗ ᓴᕕᕋᔭᑯᑖᖏᓪᓗ ᐋᖅᑭᓚᐅᕐᐰᑦ.

¹⁵ ᓴᓗᒻ ᑯᓪ-ᕼᐅᔨᐅᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᒥᔅᐸᐅᑉ ᐊᕕᒃᑐᕐᓯᒪᓂᖓᓄᑦ, ᓴᓇᓚᐅᕐᐳᖅ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᓂᒃ, ᐃᑎᕐᑕᕐᕕᒃ ᖁᓕᓚᐅᕐᐹ, ᐃᓂᖓᓅᕐᓗᒋᓪᓗ, ᑭᑭᐊᖏᓪᓗ ᓴᕕᕋᔭᖏᓪᓗ ᐋᖅᑭᓚᐅᕐᐰᑦ. ᑕᓯᓕᐊᖑᓯᒪᔫᓪᓗ ᓯᓛᒻᒥᐅᑉ ᐊᕙᓗᖏᑦ ᐋᖅᑭᓚᐅᕐᐰᑦ ᐊᖓᔪᖅᑳᕐᔪᐊᑉ ᐱᕈᕐᓰᕕᖁᑎᖓᑕ ᓴᓂᐊᓃᑦᑐᖅ, ᒪᔪᕋᐅᑎᓄᑦ ᑕᐅᓄᖓ ᑍᕕᑎᐅᑉ ᐃᒡᓗᒐᓴᖓᓃᑦᑐᓄᑦ ᑎᑭᓪᓗᒍ.

¹⁶ ᓂᕼᐃᒤᐊ ᐊᔾᐴᑭᐅᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᐱᑦ-ᔪᕆᐅᑉ ᐊᕕᒃᑐᕐᓯᒪᓂᖓᑕ ᐂᑉᐸᖓᓂᒃ, ᓴᓇᓚᐅᕐᐳᖅ ᐋᖅᑭᒋᐊᕐᓯᓪᓗᓂ ᑍᕕᑎᐅᑉ ᐃᓗᕕᖓᑕ ᓯᕗᕌᓂᑦ ᑕᓯᕐᒧᑦ ᐃᒥᕐᑕᕐᕕᓕᐊᕆᔭᐅᓯᒪᔪᒧᑦ, ᐊᒡᓛᑦ ᐊᔪᒐᖃᖏᑦᑑᑉ ᐃᒡᓗᖓᓄᑦ ᑎᑭᓪᓗᒍ.

ᓕᕔᑎᑦ ᓴᓇᓚᐅᕐᑐᑦ ᐊᑭᓐᓇᕐᒥᒃ

¹⁷ ᑖᒃᑯᐊ ᑭᖑᓂᖓᓐᓂ ᓕᕔᑎᑦ ᓴᓇᓚᐅᕐᐳᑦ ᐊᑭᓐᓇᒥᒃ ᐊᕕᒃᑐᕐᑕᐅᓯᒪᔪᓄᑦ: ᕆᕼᐆᒻ ᐹᓂᐅᑉ ᐃᕐᓂᖓ ᓴᓇᓚᐅᕐᐳᖅ ᐊᑭᓐᓇᒥᒃ ᓴᓂᐊᓃᑦᑐᒥᒃ, ᕼᐊᓴᐰᐊ, ᐊᐅᓚᑦᓯᔨᐅᔪᖅ ᑮᓚᐅᑉ ᐊᕕᒃᑐᕐᓯᒪᓂᖓᑕ ᐂᑉᐸᖓᓄᑦ, ᓴᓇᓚᐅᕐᐳᖅ ᐋᖅᑭᒋᐊᕐᓯᓪᓗᓂᓗ ᐊᑭᓐᓇᒥᒃ ᓴᓂᐊᓃᑦᑐᒥᒃ.

¹⁸ ᐸᕔ ᕼᐃᓇᑕᐅᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᑮᓚᐅᑉ ᐊᕕᒃᑐᕐᓯᒪᓂᖓᑕ ᐂᑉᐸᖓᓂ, ᓴᓇᓚᐅᕐᐳᖅ ᓴᓂᐊᓃᑦᑐᒥᒃ.

¹⁹ ᐃᔨᕆ ᔩᓱᐊᑉ ᐃᕐᓂᖓ, ᐊᐅᓚᑦᓯᔨᐅᔪᖅ ᒥᔅᐸᒥ, ᓴᓇᓚᐅᕐᐳᖅ ᐅᓇᑕᕐᑐᒃᓮᑦ ᐅᓇᑕᐅᑎᖃᕐᕕᖓᑕ ᓯᕗᕌᓂᑦ, ᐋᒧᕆᐅᑉ ᓴᖑᒋᐊᕐᓂᖓᓄᑦ ᑎᑭᓪᓗᒍ.

²⁰ ᐸᕉᒃ, ᔭᐰᑉ ᐃᕐᓂᖓ ᓴᓇᓚᐅᕐᐳᖅ ᓴᓂᐊᓃᑦᑐᒥᒃ ᐋᒧᕆᐅᑉ ᓴᖑᒋᐊᕐᓂᖓᓂᑦ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖓᑕ ᐃᓔᐊᓯᑉ ᐃᒡᓗᖓᑕ ᐅᒃᑯᐊᖓ ᑎᑭᓪᓗᒍ;

²¹ ᒥᕆᒫᑎ ᔪᕅᐊᐅᑉ ᐃᕐᓂᖓ ᕼᐊᑰᔨᐅᓪᓗ ᐃᕐᖑᑕᖓᑕ, ᓴᓇᓚᐅᕐᐹ ᓴᓂᐊᓃᑦᑐᖅ ᐃᓔᐊᓯᐅᑉ ᐃᒡᓗᖓᑕ ᐃᓱᐊ ᑎᑭᓪᓗᒍ.

ᑐᓂᕐᕈᓯᕐᑎᑦᓯᔩᑦ ᓴᓇᓚᐅᕐᑐᑦ ᐊᑭᓐᓇᒥᒃ

²² ᐅᑯᐊ ᑐᓂᕐᕈᓯᕐᑎᑦᓯᔩᑦ ᓴᓇᓚᐅᕐᐳᑦ ᐊᑭᓐᓇᒥᒃ ᐊᕕᒃᑐᕐᓯᒪᔪᓂᒃ. ᑐᓂᕐᕈᓯᕐᑎᑦᓯᔩᑦ ᔨᕉᓴᓕᐅᑉ ᓴᓂᐊᓃᑦᑐᑦ ᓴᓇᓚᐅᕐᐳᑦ ᓴᓂᐊᓃᑦᑐᒥᒃ.

²³ ᐱᓐᔭᒥᓂᓗ ᕼᐊᓱᑉᓗ ᓴᓇᓚᐅᕐᐴᒃ ᑖᒃᑯᐊ ᓴᓂᐊᓃᑦᑐᒥᒃ, ᐃᒡᓗᒥᑕ ᓯᕗᕌᓃᑦᑐᒥᒃ; ᐊᔭᕅᐊ, ᒫᓯᐊᑉ ᐃᕐᓂᖓ ᐊᒻᒪᓗ ᐊᓇᓁᐊᐅᑉ ᐃᕐᖑᑕᖓ, ᓴᓇᓚᐅᐳᑦ ᓴᓂᒥᓃᑦᑐᓂᒃ, ᐃᒡᓗᖓᑕ ᓯᕗᕌᓃᑦᑐᒥᒃ.

²⁴ ᐱᓄᐃ, ᕼᐃᓇᑕᐅᑉ ᐃᕐᓂᖓ, ᓴᓇᓚᐅᕐᐳᖅ ᓴᓂᒥᓃᑦᑐᒥᒃ, ᐊᔭᕅᐊᐅᑉ ᐃᒡᓗᖓᓂᑦ ᐋᒧᕆᐅᑉ ᓴᖑᒋᐊᕐᓂᖓᓄᑦ; ᐊᒡᓛᑦ ᐊᑭᓐᓇᐅᑉ ᑎᕆᖅᑯᐊᓄᑦ ᑎᑭᓪᓗᓂ;

²⁵ ᐸᓚᐅᓪ, ᐅᔧᑉ ᐃᕐᓂᖓ ᓴᓇᓚᐅᕐᐳᖅ ᓴᓂᒥᓃᑦᑐᒥᒃ, ᐱᒋᐊᕐᓗᓂ ᐋᒧᕆᐅᑉ ᓴᖑᒋᐊᕐᓂᖓᑕ ᐃᒡᓗᐊᓂᑦ ᐱᒋᐊᕐᓗᓂ, ᐊᑭᓐᓇᐅᑉ ᑎᕆᖅᑯᐊᓄᑦ ᓇᐸᔪᕐᔪᐊᒧᑦ ᐊᖓᔪᖅᑳᕐᔪᐊᑉ ᐃᒡᓗᑯᑎᖓᓂᑦ ᖁᑦᓯᖕᓂᕐᓴᒧᑦ ᖃᐅᔨᓴᕐᑏᑦ ᐃᓂᒋᕙᒃᑕᖓᓄᑦ ᑎᑭᓪᓗᒍ; ᐱᑍᐊ ᐸᕉᓯᐅᑉ ᐃᕐᓂᖓ ᓴᓇᓚᐅᕐᐳᖅ ᓴᓂᒥᓃᑦᑐᒥᒃ,

²⁶ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᒃ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᑕ ᓴᓂᐊᓄᑦ, ᓇᐸᔪᕐᔪᐊᒧᑦ ᑐᒃᓯᐊᕐᕕᒃᔪᐊᑉ ᓴᐴᓗᑕᖓᓄᑦ ᑎᑭᓪᓗᒍ. (ᑖᓐᓇ ᐃᒡᓗᒐᓴᐅᑉ ᐃᓗᐊᓂ ᑍᔭᐅᔪᖅ ᐅᐱᐅᓪᒥᒃ, ᑖᒃᑯᐊ ᑐᒃᓯᐊᕐᕕᒡᔪᐊᒥ ᓴᓇᔩᑦ ᐊᖏᕐᕋᖓᓂ.)

ᐊᓯᖏᑦ ᓴᓇᓚᐅᕐᒥᔪᑦ

²⁷ ᑎᑯᐊᒥᐅᑦ ᓴᓇᓚᐅᕐᐳᑦ ᓴᓂᒥᓃᑦᑐᒥᒃ, ᑖᒃᑯᐊ ᓴᓇᔭᖏᑕ ᑭᒡᓕᖓᓃᑦᑐᒥᑦ, ᐱᒋᐊᕐᓗᑎᒃ ᓇᐸᔪᕐᔪᐊᑉ ᑐᒃᓯᐊᕐᕕᒡᔪᐊᑉ ᓴᐴᓗᑕᖓᑕ ᐊᑭᐊᓂᑦ ᐊᑭᓐᓇᒧᑦ ᐅᐱᐅᓪᑉ ᓴᓂᐊᓄᑦ ᑎᑭᓪᓗᒍ.

²⁸ ᑐᓂᕐᕈᓯᕐᑎᑦᓯᔨᒐᓔᑦ ᓴᓇᓚᐅᕐᐳᑦ ᓴᓂᒥᓃᑦᑐᓂᒃ, ᐅᓐᓄᐊᓪᓗᐊᑉ ᓇᓛᓃᑦᑐᒥᑦ ᐱᒋᐊᕐᓗᑎᒃ ᕿᒻᒥᕐᔪᐊᑉ ᐃᑎᕐᑕᕐᕕᖓᓂᑦ, ᐃᓘᓐᓇᑎᒃ ᓴᓇᓚᐅᕐᐳᑦ ᐃᒡᓗᒥᑕ ᓯᕗᕌᓃᑦᑐᒥᒃ.

²⁹ ᔭᑑᒃ, ᐃᒥᕆᐅᑉ ᐃᕐᓂᖓ ᓴᓇᓚᐅᕐᐳᖅ ᓴᓂᑦᓯᐊᒥᓃᑦᑐᒥᒃ, ᐃᒡᓗᖓᑕ ᓯᕗᕌᓃᑦᑐᒥᒃ. ᑖᒃᑯᐊ ᐅᖓᑖᓂ ᓯᒤᐊ, ᓯᑲᓁᐊᐅᑉ ᐃᕐᓂᖓ, ᖃᐅᔨᓴᕐᑎ ᐃᑎᕐᑕᕐᕕᖕᒥ ᓯᕿᓂᐅᑉ ᓄᐃᕕᐊᑕ ᓇᓛᓃᑦᑐᒥᒃ, ᓴᓇᓚᐅᕐᐳᖅ ᓴᓂᑦᓯᐊᒥᓃᑦᑐᒥᒃ.

³⁰ ᑖᒃᑯᐊ ᐅᖓᑖᓂ ᕼᐊᓇᓁᐊ, ᓯᓕᒤᐊᐅᑉ ᐃᕐᓂᖓ, ᕼᐊᓄᓂᐅᓪᓗ ᔭᓚᐸᐅᑉ ᐃᕐᓂᖓᑕ ᐱᖓᓲᔪᕐᑕᖓᑦᑕ, ᓴᓇᓚᐅᕐᐹ ᓴᓂᒥᓃᑦᑐᖅ, ᑖᒃᑯᐊ ᐂᑉᐸᖓᓐᓂᒃ ᓴᓇᒋᐊᓪᓚᓚᐅᕐᐳᖅ. ᒥᓱᓚᒻ, ᐱᕆᑬᐊᐅᑉ ᐃᕐᓂᖓ ᓴᓇᓚᐅᕐᐳᖅ ᓴᓂᒥᓃᑦᑐᒥᒃ, ᐃᒡᓗᖓᑕ ᓯᕗᕌᓃᑦᑐᒥᒃ.

³¹ ᑖᒃᑯᐊ ᐅᖓᑖᓂ ᒪᓪᑬᔭ, ᒎᓗᓕᕆᔨ ᓴᓇᓚᐅᕐᐳᖅ ᓴᓂᑦᓯᐊᒥᓃᑦᑐᒥᒃ, ᐃᒡᓗ ᑐᒃᓯᐊᕐᕕᒡᔪᐊᑉ ᓴᓇᔨᖏᓐᓂᑦ ᓂᐅᕕᕐᓂᐊᕐᑎᑦᓯᔨᓂᓪᓗ ᐊᑐᕐᑕᐅᔪᖅ ᐃᒡᓗ ᑎᑭᓪᓗᒍ, ᑖᓐᓇ ᒥᐱᑲᑦ ᐃᑎᕐᑕᕐᕕᖓ ᑐᒃᓯᐊᕐᕕᒡᔪᐊᒧᐊᕆᐊᖅ, ᐅᓐᓄᐊᓪᓗᐊᑉ ᓯᕿᓂᐅᓪᓗ ᓇᓛᓃᑦᑐᖅ ᐊᑭᓐᓇᐅᑉ ᑎᕆᖅᑯᐊᓂ ᐃᒡᓗᕈᓯᖅ ᖄᖓᓃᑦᑐᖅ ᑎᑭᓪᓗᒍ.

³² ᒎᓗᓕᕆᔩᑦ ᓂᐅᕕᕐᓂᐊᕐᑎᑦᓯᔩᓪᓗ ᓴᓇᓚᐅᕐᐳᑦ ᑭᖑᓪᓕᕐᐸᐅᓕᕐᑐᒥᒃ, ᐃᒡᓗᕈᓯᕐᒥᑦ ᑎᕆᖅᑯᐊᑕ ᖄᖓᓃᑦᑐᒥᑦ ᐱᒋᕐᐊᓗᑎᒃ ᓰᐲᑦ ᐃᑎᕐᑕᕐᕕᐊ ᑎᑭᓪᓗᒍ.