ᓂᕼᐃᒤᐊᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᓂᕼᐃᒤᐊᐅᑉ ᔨᕉᓴᓕᒧᐊᕐᓂᖓ

¹ ᐅᓪᓗᐃᑦ ᐃᓚᖓᓐᓂ ᑕᖅᑭᒥ ᓃᓴᓂᒥ, ᑕᖅᑮᑦ ᓯᑕᒪᑦ ᓈᓯᒪᓕᕐᑎᓪᓗᒋᑦ, ᐊᖓᔪᖅᑳᕐᔪᐊᑉ ᐋᕐᑕᔮᒃᓯᐅᑉ ᐊᖓᔪᖅᑳᖑᓂᖓᑕ 20ᒋᓕᕐᑕᖓᓂ, ᕔᓂᒥᒃ ᑖᑦᓱᒧᖓ ᐊᑐᐃᓐᓇᕈᐃᔪᖃᕐᒪᑦ, ᐊᖓᔪᖅᑳᕐᔪᐊᕐᒧᑦ ᑐᓂᓯᓚᐅᕐᐳᖓ. ᑕᒪᑐᒪᓕ ᓯᕗᓂᖓᒍᑦ ᑖᑦᓱᒧᓐᖓᕌᖓᒪ ᕿᒃᓵᒃᐸᓚᐅᓐᖏᓚᖓ.

² ᑍᒤᒻᒪᑦ ᐊᖓᔪᖅᑳᕐᔪᐊᖅ ᐅᕙᓐᓄᑦ ᐅᖃᓕᕐᐳᖅ, “ᓱᖕᒪᑦ ᑮᓁᑦ ᖁᕕᐊᓱᒡᕙᓗᓐᖏᓚᖅ, ᖃᓂᒪᖏᒃᑲᓗᐊᕐᐲᑦ? ᐆᒻᒪᑎᕕᑦ ᖁᕕᐊᓱᖏᓐᓂᖓᑕ ᑕᒪᓐᓇ ᓴᖅᑭᑎᓐᖏᓚᐅᒃ?” ᑕᕝᕙ ᐊᒃᓱᐊᓗᒃ ᑲᑉᐱᐊᓱᓕᕐᐳᖓ.

³ ᑕᕝᕙ ᐊᖓᔪᖅᑳᕐᔪᐊᖅ ᐅᖃᐅᑎᕙᕋ, “ᑕᕝᕙᑐᖅ ᐊᖓᔪᖅᑳᕐᔪᐊᖅ ᐃᓅᓂᐊᕐᐳᑎᑦ ᐃᓱᖃᖏᑦᑐᒧᑦ! ᖃᓄᕐᓕ ᑮᓇᕋ ᖁᕕᐊᓱᖕᓂᕐᒥᒃ ᓴᖅᑭᔮᕐᑎᑦᓯᔪᓐᓇᕋᔭᕐᐸ, ᐃᒡᓗᒐᓴᒡᔪᐊᑦ, ᓯᕗᓕᕕᓂᕐᒪ ᐃᓗᕕᖃᕐᕕᒋᔭᖏᑦ, ᓯᖁᑦᑎᕐᑕᐅᓯᒪᑎᓪᓗᒋᑦ, ᐃᑎᕐᑕᕐᕕᒃᔪᐊᖏᓪᓗ ᐃᑯᒪᒧᑦ ᓄᖑᑕᐅᓯᒪᑎᓪᓗᒋᑦ?”

⁴ ᑕᕝᕙ ᐊᖓᔪᖅᑳᕐᔪᐊᖅ ᐊᐱᕆᓕᕐᐳᖅ, “ᓱᓇᒦᒃ ᐱᔪᒪᒐᕕᑦ?” ᑕᕝᕙ ᒎᑎᒧᑦ ᕿᓚᖕᒦᑦᑐᒧᑦ ᑐᒃᓯᐊᕐᐳᖓ,

⁵ ᐅᖃᐅᑎᓪᓗᒍᓗ ᐊᖓᔪᖅᑳᕐᔪᐊᖅ, “ᐊᖓᔪᖅᑳᕐᔪᐊᖅ ᖃᓄᐃᒃᓴᖏᒃᑯᕕᑦ, ᐱᔩᓪᓗ ᐃᓕᖕᓄᑦ ᖁᕕᐊᒋᔭᐅᒃᐸᑦ, ᑎᓕᔭᐅᔪᒪᒐᓗᐊᕐᐳᖓ ᔫᑕᒧᐊᖁᓪᓗᖓ, ᓯᕗᓕᕕᓂᕐᒪ ᐃᓗᕕᖃᕐᕕᒋᔭᖏᓐᓄᑦ, ᑖᒃᑯᓂᖓ ᓴᓇᔪᓐᓇᖁᓪᓗᖓ.”

⁶ ᑕᕝᕙ ᐊᖓᔪᖅᑳᕐᔪᐊᑉ ᐅᖃᐅᑎᓕᕐᐹᖓ (ᑯᐃᒃᑕᐅᖅ ᓴᓂᐊᓂ ᐃᒃᓯᕙᓚᐅᕐᐳᖅ), “ᖃᓄᖅ ᐊᑯᓂᐅᑎᒋᔪᖅ ᐊᐅᓪᓚᕐᓯᒪᔭᕆᐊᖃᕋᔭᕋᕖᑦ? ᖃᖓᓗ ᐅᑎᕋᔭᕋᕕᑦ?” ᓇᓗᓇᕈᓐᓁᕐᐳᖅ ᐊᖓᔪᖅᑳᕐᔪᐊᑉ ᐅᕙᓐᓂᒃ ᖃᓄᐃᒃᓴᖏᓐᓂᖓ ᐊᐅᓪᓚᕐᑎᑦᓯᔭᕆᐊᒃᓴᖅ; ᑕᕝᕙ ᐱᕕᒃᓴᓐᓂᒃ ᐅᖃᐅᑎᓕᕐᐸᕋ.

⁷ ᐅᖃᐅᑎᓪᓗᒍᓗ, “ᐊᖓᔪᖅᑳᕐᔪᐊᖅ ᖃᓄᐃᒃᓴᖏᒃᑯᕕᑦ, ᑎᑎᖅᑲᓂᒃ ᓇᒃᓴᕐᑎᓛᕐᐸᕐᒪ ᑰᑉ ᐊᑭᐊᓂᒥᐅᖏᑕ ᐊᐅᓚᑦᓯᔨᖏᓐᓄᑦ ᑐᓂᔭᒃᓴᓐᓂᒃ, ᑖᒃᑯᓇᓐᖓᑦ ᐊᓂᒍᐃᔪᓐᓇᕐᑎᑕᐅᖁᓪᓗᖓ ᓄᓇᖏᓐᓂᒃ ᔫᑕᒧᑦ ᑎᑭᓚᐅᖏᓐᓂᓐᓂ;

⁸ ᐊᓴᐸᒧᓪᓗ ᑎᑎᕋᖁᒋᕙᒋᑦ, ᐊᖓᔪᖅᑳᕐᔪᐊᑉ ᓇᐹᕐᑐᓕᕆᔨᖁᑎᖓᓄᑦ, ᑖᑦᓱᒧᖓ ᕿᔪᖕᓂᒃ ᐃᑎᕐᑕᕐᕕᐅᑉ ᓴᐅᓂᒃᓴᖏᓐᓂᒃ ᑐᓂᓯᕕᐅᔪᓐᓇᖁᓪᓗᖓ ᑐᒃᓯᐊᕐᕕᒃᔪᐊᑉ ᐊᕙᓗᕐᔪᐊᖓᑕ ᑲᒪᔨᖃᕐᕕᒃᓴᖏᓐᓄᑦ, ᐃᒡᓗᒐᓮᓪᓗ ᐊᕙᓗᕐᔪᐊᖓᑕ ᓴᐅᓂᒃᓴᖏᓐᓂᒃ, ᐃᒡᓗᒋᒐᔭᕐᑕᒪᓗ ᓴᐅᓂᒃᓴᖏᓐᓂᒃ.” ᐊᖓᔪᖅᑳᕐᔪᐊᓪᓗ ᐱᔪᒪᔭᓐᓂᒃ ᑐᓂᓯᕕᒋᓚᐅᕐᐹᖓ, ᒎᑎᒪ ᐱᔪᓐᓇᕐᓂᖓᑕ ᓇᔪᓚᐅᕐᒪᖓ.

⁹ ᑎᑭᓐᓇᒪᓗ ᑰᑉ ᐊᑭᐊᓂᒥᐅᖏᑕ ᐊᐅᓚᑦᓯᔨᖏᓐᓄᑦ, ᐊᖓᔪᖅᑳᕐᔪᐊᑉ ᑎᑎᖅᑲᖏᓐᓂᒃ ᑐᓂᓯᕕᒋᓚᐅᕐᐸᒃᑲ. ᐊᖓᔪᖅᑳᕐᔪᐊᓪᓕ ᐃᓚᒋᓂᐊᕐᑕᓐᓂᒃ ᒪᓕᒃᑕᐅᑎᓚᐅᕐᐹᖓ ᐅᓇᑕᕐᑏᑦ ᐊᖓᔪᖅᑳᖏᓐᓂᒃ ᐅᓇᑕᕐᑎᓂᒡᓗ ᕿᒻᒥᕐᔪᐊᕐᒥᐅᑕᓂᒃ.

¹⁰ ᓴᓐᐸᓛᑎᓕ ᕼᐅᕈᓁᑎᒥᐅᑕᖅ ᑐᐱᐊᓗ ᑖᑦᓱᒪ ᐱᔨᖓ, ᐊᒧᓁᑎᒥᐅᑕᖅ ᑕᒪᑐᒥᖓ ᑐᓴᕋᒥᒃ ᐊᖏᔪᒥᒃ ᖁᕕᐊᓱᒍᓐᓁᓚᐅᕐᐴᒃ; ᐃᓴᕆᐊᓕᒃᑯᑦ ᒪᑭᑦᔪᑎᒃᓴᖓᓂ ᓴᓇᔭᕐᑐᕋᓱᒋᒃᓯᕐᓗᑎᒃ.

¹¹ ᔨᕉᓴᓕᒧᓪᓕ ᑎᑭᓐᓇᒪ, ᐅᓪᓗᓂᒃ ᐱᖓᓱᓂᒃ ᓱᒋᐊᓚᐅᓐᖏᓚᖓ.

¹² ᑕᕝᕙ ᐅᓐᓄᐊᖑᓕᕐᒪᑦ ᒪᑭᑉᐳᖓ, ᐊᖑᑎᓂᒃ ᖃᑦᓰᓐᓇᓂᒃ ᐃᓚᖃᕐᓗᖓ; ᓇᓪᓕᐊᓐᓂᒡᓘᓐᓃᑦ ᐅᖃᐅᑦᔨᓚᐅᓐᖏᓚᖓ ᒎᑎᒪ ᖃᓄᖅ ᐆᒻᒪᑎᒃᑯᑦ ᑐᓂᓯᕕᒋᓚᐅᕐᒪᖔᖓ ᔨᕉᓴᓕᒥ ᐱᓇᓱᐊᖁᓪᓗᖓ; ᐆᒪᔪᓂᒡᓘᓐᓃᑦ ᓇᒃᓴᓚᐅᓐᖏᓚᖓ ᐃᑭᒪᕕᒋᔭᒪ ᐊᓯᐊᓂᒃ.

¹³ ᐅᓐᓄᐊᒃᑯᑦ ᐊᓂᒐᒪ ᓇᕐᓴᐅᑉ ᐃᑎᕐᑕᕐᕕᖓᒍᑦ ᔮᑯᐃᑦ ᕿᒻᒥᐅᔮᕐᑐᖅ ᐃᒥᕆᐊᕐᑐᕐᕕᖓᓄᐊᕐᐳᖓ ᐊᒻᒪ ᓴᓂᒃᑯᕕᓕᐊᕆᐊᑉ ᐃᑎᕐᑕᕐᕕᖓᓄᑦ ᑎᑭᓪᓗᖓ, ᔨᕉᓴᓕᐅᑉ ᐊᕙᓗᕐᔪᐊᖓ ᖃᐅᔨᓴᓚᐅᕐᐸᕋ ᓯᖁᑦᑎᕐᑕᐅᓯᒪᓚᐅᕐᒪᑦ ᐃᑎᕐᑕᕐᕕᖏᓪᓗ ᐃᑯᒪᒧᑦ ᓄᖑᑕᐅᓯᒪᓪᓗᑎᒃ.

¹⁴ ᑭᖑᓂᖓᒍᑦ ᐃᒥᕐᑕᕐᕕᐅᑉ ᐃᑎᕐᑕᕐᕕᖓᓄᐊᓚᐅᕆᕗᖓ ᐊᒻᒪ ᐊᖓᔪᖅᑳᕐᔪᐊᑉ ᐃᒥᕐᑕᕐᕕᖓᓂᒃ ᐊᑎᓕᖕᒧᑦ; ᑭᓯᐊᓂᓕ ᐃᑭᒪᕕᒋᔭᕋ ᐊᓂᒎᑎᔪᓐᓁᓪᓕᓚᐅᕐᐳᖅ.

¹⁵ ᑍᑦᓱᒪᓂ ᐅᓐᓄᐊᒃᑯᑦ ᐊᓂᒐᒪ ᓇᕐᓴᒥᒃ ᐊᑎᓕᒃᑰᕐᓗᖓ ᐊᕙᓗᕐᔪᐊᖅ ᕿᒥᕐᕈᐊᓚᐅᕐᐸᕋ, ᐅᑎᕆᐊᕐᒥᒐᒪ ᐃᑎᓚᐅᕆᕗᖓ ᓇᕐᓴᐅᑉ ᐃᑎᕐᑕᕐᕕᖓᒍᑦ, ᐱᒋᐊᕐᕕᒋᖅᑲᐅᔭᓐᓄᑦ ᐅᑎᕆᓪᓗᖓ.

¹⁶ ᐊᖓᔪᖅᑳᓪᓕ ᖃᐅᔨᓚᐅᓐᖏᓚᑦ ᓇᓃᓚᐅᕐᒪᖔᕐᒪ ᖃᓄᐃᓕᐅᕐᒪᖔᕐᒪᓗ; ᔫᑎᓂᒃ ᓱᓕ ᐅᖃᐅᑦᔨᓚᐅᖏᓐᓇᒪ, ᑐᓂᕐᕈᓯᕐᑎᑦᓯᔨᓂᒡᓗ, ᓯᕗᓕᕐᑎᓂᒡᓗ, ᐊᖓᔪᖅᑳᓂᒡᓗ, ᐊᓯᖏᓐᓂᒡᓘᓐᓃᑦ ᐱᓇᓱᐊᕆᐊᖃᓛᕐᑐᓂᒃ.

¹⁷ ᑭᖑᓂᖓᒍᓪᓕ ᐅᖃᐅᑎᓕᕐᐸᒃᑲ, “ᖃᐅᔨᒪᕗᓯ ᖃᓄᖅ ᐊᑲᐅᖏᑦᑐᒦᑎᒋᖕᒪᖔᑦᑕ, ᔨᕉᓴᓕᒻᓗ ᓯᖁᑦᑎᕐᑕᐅᓯᒪᓪᓗᓂ ᐃᑎᕐᑕᕐᕕᖏᓪᓗ ᐃᑯᐊᓚᓂᑰᓪᓗᑎᒃ. ᕾᓗᓯ ᔨᕉᓴᓕᐅᑉ ᐊᕙᓗᕐᔪᐊᖓ ᓴᓇᓚᐅᕐᓚᕗᑦ, ᓱᓇᐅᖏᓐᓂᕋᕐᑕᐅᓂᐊᓗᖕᒧᑦ ᐅᖁᒤᒃᓴᐅᑎᖃᕐᓂᐊᕈᓐᓁᕋᑦᑕ.”

¹⁸ ᐅᖃᐅᑎᓕᓚᐅᕐᐸᒃᑲᓗ ᖃᓄᖅ ᒎᑎᐅᑉ ᐱᔪᓐᓇᕐᓂᖓᓄᑦ ᐱᓇᓱᐊᕐᕕᐅᓯᒪᖕᒪᖔᕐᒪ ᖃᓄᕐᓗ ᐃᑲᔪᕐᑕᐅᓯᒪᖕᒪᖔᕐᒪ ᑖᑦᓱᒧᖓ, ᖃᓄᕐᓗ ᐊᖓᔪᖅᑳᕐᔪᐊᕐᒧᑦ ᐅᖃᐅᑦᔭᐅᓯᒪᖕᒪᖔᕐᒪ. ᑖᒃᑯᐊᓗ ᐅᖃᕐᐳᑦ, “ᐊᑏ ᒪᑭᓪᓗᑕ ᓴᓇᒋᐊᓕᕐᑕ!” ᑕᕝᕙ ᐊᑐᐃᓐᓇᕈᕐᑎᓕᓚᐅᕐᐳᑦ ᐱᓇᓱᐊᕈᒪᓕᕐᓗᑎᒃ.

¹⁹ ᓴᓐᐸᓛᑎᓕ ᕼᐅᕈᓁᑎᒥᐅᖅ ᑐᐱᐊᓗ ᑖᑦᓱᒪ ᐱᔨᖓ, ᐊᒧᓁᑎᒥᐅᖅ ᒋᓯᒥᓗ ᐋᕋᑉᒥᐅᑕᖅ ᑕᒪᑐᒥᖓ ᑐᓴᕋᒥᒃ, ᐃᔪᓚᐅᕐᐳᑦ ᓱᓕᔪᕐᓴᖏᒻᒪᕆᒃᓗᑎᒡᓗ ᐅᖃᕐᓗᑎᒃ, “ᖃᓄᐃᓕᐅᕋᓱᓕᕐᐱᓰ? ᐊᖓᔪᖅᑳᕐᔪᐊᕐᒥᒃ ᐊᑭᕋᕐᑐᕋᓱᐊᓕᕐᐱᓰ?”

²⁰ ᑕᕝᕙ ᑭᐅᓚᐅᕐᐸᒃᑲ, “ᒎᑎᐅᑉ ᕿᓚᖕᒦᑦᑑᑉ ᐱᕙᓪᓕᐊᑎᓐᓂᐊᕐᐹᑎᒍᑦ, ᐅᕙᒍᑦ ᑖᑦᓱᒧᖓ ᐱᔨᐅᔪᒍᑦ ᒪᑭᓪᓗᑕ ᓴᓇᒋᐊᕐᓂᐊᓕᕐᐳᒍᑦ; ᐃᓕᑦᓯᓕ ᐱᖃᖃᑕᐅᓂᐊᓐᖏᓚᓯ ᐃᓚᒋᔭᐅᓂᐊᓐᖏᓚᓯᓘᓐᓃᑦ ᐃᖅᑲᐅᒪᔭᐅᑦᔪᑎᒃᓴᖃᕐᓂᐊᓐᖏᓚᓯᓘᓐᓃᑦ ᔨᕉᓴᓕᒥ.”