ᓂᕼᐃᒤᐊᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᐅᖓᓯᒃᑐᒥᐅᑕᓂᒃ ᑲᑎᓐᖓᓯᒋᐊᖃᖏᓐᓂᖅ

¹ ᑕᕝᕙᓂ ᐅᓪᓗᒥ ᒨᓯᓯᐅᑉ ᐊᒡᓚᖏᑦ ᐊᑐᐊᕐᑕᐅᓚᐅᕐᐳᑦ ᐃᓄᒐᓴᒡᔪᐊᑦ ᑐᓵᑎᓪᓗᒋᑦ, ᑕᕝᕙᓂ ᑎᑎᕋᕐᓯᒪᔪᓂᒃ ᓇᓂᓯᔪᖃᓚᐅᕐᐳᖅ ᐊᒧᓁᑎᒥᐅᑦ ᒧᐊᐱᒥᐅᓪᓗ ᒎᑎᐅᑉ ᑲᑎᓐᖓᔪᖁᑎᖏᓐᓄᑦ ᐃᓚᐅᑎᑕᐅᔭᕆᐊᖃᖏᓐᓂᖏᓐᓂᒃ ᐅᖃᕐᓯᒪᔪᕐᑕᖃᕐᒪᑦ;

² ᑐᓂᓯᔪᒪᓚᐅᖏᒻᒪᑕ ᓂᐊᖂᔭᒥᒃ ᐃᒥᕐᒥᒡᓗ ᐃᓴᕆᐊᓕᑎᒃᑯᓐᓄᑦ, ᐸᓛᒻᒥᒡᓕ ᑎᓕᓯᖔᓚᐅᕐᒪᑕ ᑖᒃᑯᓄᖓ ᐊᑭᕋᕐᑐᖁᓪᓗᒍ ᓯᕗᓂᕐᓗᒍᑎᒃᓴᖏᓐᓂᒡᓗ ᐱᓇᓱᐊᖁᓪᓗᒍ; ᒎᑎᑦᑕᓕ ᓯᕗᓂᕐᓗᒍᑎᒃᓴᐅᑎᑕᐅᓇᓱᐊᕐᑐᖅ ᓮᒻᒪᕐᑎᑕᐅᓂᕐᒧᑦ ᒧᒥᒃᑎᖔᓚᐅᕐᐹ.

³ ᑕᒪᓐᓇᓕ ᐱᖁᔭᖅ ᑐᓴᕋᒥᑦᔪᒃ, ᑕᕝᕙ ᐃᓴᕆᐊᓕᒥᐅᓂᑦ ᐊᕕᑎᑕᐅᓚᐅᕐᐳᑦ ᐅᖓᓯᒃᑐᒥᑦ ᐱᓯᒪᔪᓕᒫᑦ.

ᓂᕼᐃᒤᐊᐅᑉ ᐋᖅᑮᒋᐊᒃᑲᓐᓂᕐᓂᖓ

⁴ ᑕᒪᑐᒪᓕ ᓯᕗᓂᖓᒍᑦ, ᐃᓔᐊᓯᑉ ᑐᓂᕐᕈᓯᕐᑎᑦᓯᔨ, ᑖᓐᓇ ᐊᖓᔪᖅᑳᓐᖑᑎᑕᐅᓯᒪᔪᖅ ᒎᑎᑦᑕ ᐃᒡᓗᖓᓂ ᑐᓂᔭᐅᖃᑦᑕᕐᑐᑦ ᐃᓂᒃᓴᖏᓐᓄᑦ, ᐊᑯᓂ ᐱᓇᓱᐊᖃᑎᖃᖃᑦᑕᓚᐅᕐᐳᖅ ᑐᐱᐊᒥᒃ.

⁵ ᑖᓐᓇᓗ ᑐᐱᐊ ᐃᓂᒃᓴᖃᓕᕐᑎᓚᐅᕐᐹ ᓱᓇᑐᐃᓐᓇᖃᐅᑎᒥ ᐊᖏᔪᒥᒃ, ᐱᕈᕐᑐᕕᓃᑦ ᑐᓂᕐᕈᑎᐅᓯᒪᔪᑦ ᐃᓂᒃᓴᕆᖃᑦᑕᓚᐅᕐᑕᖓᓂ, ᑎᐱᑦᓯᐊᕆᒃᓴᐅᑏᓪᓗ, ᐴᒍᑍᓪᓗ, ᓂᐊᖂᔭᒃᓮᓪᓗ ᑕᓪᓕᒪᐅᔪᐃᕈᑕᐅᓯᒪᔪᑦ, ᕔᓃᑦ, ᐅᕐᓱᒃᓮᓪᓗ, ᐱᖁᔭᑎᒍᑦ ᑐᓂᔭᐅᖁᔭᐅᓯᒪᔪᑦ ᓕᕔᑎᒃᑯᓐᓄᑦ, ᐃᓐᖏᕐᑎᓄᓪᓗ, ᐃᑎᕐᑕᕐᕕᐅᓪᓗ ᑲᒪᔨᖏᓐᓄᑦ, ᑐᓂᕐᕈᑎᒃᓴᐅᓪᓗᑎᒡᓗ ᑐᓂᕐᕈᓯᕐᑎᑦᓯᔨᓄᑦ.

⁶ ᑕᒪᓐᓇᓕ ᐊᑐᕐᑕᐅᓕᕐᑎᓪᓗᒍ ᔨᕉᓴᓕᒦᓚᐅᓐᖏᓚᖓ, ᐊᖓᔪᖅᑳᕐᔪᐊᑉ ᐋᕐᑕᔮᒃᓯᐅᑉ ᐹᐱᓘᓂᒥᐅᑦ ᐊᖓᔪᖅᑳᕐᔪᐊᖓᑦᑕ ᐊᖓᔪᖅᑳᖑᓂᖓᑕ ᐊᕐᕌᒍᖏᑦ 32ᖑᓕᕐᑎᓪᓗᒋᑦ ᐅᐸᒃᓯᒪᓚᐅᕋᒃᑯ. ᐊᑯᓂᐅᓕᕐᒥᑎᓪᓗᒍᓕ ᐊᖓᔪᖅᑳᕐᔪᐊᕐᒧᑦ ᐊᐱᕆᓚᐅᕐᓗᖓ ᕿᒪᓕᓚᐅᕆᕙᕋ,

⁷ ᔨᕉᓴᓕᒧᓪᓗ ᑎᑭᓐᓇᒪ, ᖃᐅᔨᓕᓚᐅᕐᐳᖓ ᐃᓔᐊᓯᐅᑉ ᐱᐅᖏᑦᑐᒥᒃ ᐱᓕᕆᓯᒪᓂᖓᓂᒃ ᑐᐱᐊ ᐱᑦᔪᑎᒋᓪᓗᒍ, ᐃᓂᒃᓴᖃᓕᕐᑎᓚᐅᕐᒪᒍ ᓱᓇᑐᐃᓐᓇᖃᐅᑎᒥ ᒎᑎᐅᑉ ᐃᒡᓗᖓᓃᑦᑐᒥᒃ.

⁸ ᑕᒪᓐᓇᓕ ᐊᖏᔪᒥᒃ ᓂᓐᖓᒍᑎᒋᓚᐅᕐᐸᕋ; ᑕᕝᕙᓃᑦᑐᓪᓗ ᐱᖁᑎᑦ ᐃᒋᐅᖅᑲᓚᐅᕐᐸᒃᑲ ᑐᐱᐊᑉ ᐱᖁᑎᖏᑦ ᓱᓇᑐᐃᓐᓇᖃᐅᑎᒥᑦ ᐊᓂᑎᓪᓗᒋᑦ.

⁹ ᑕᕝᕙ ᑎᓕᓯᓚᐅᕐᐳᖓ ᓴᓗᒻᒪᕐᓴᕐᑕᐅᖁᓪᓗᒍ ᑖᓐᓇ ᓱᓇᑐᐃᓐᓇᖃᐅᑎ; ᑕᕝᕙ ᐅᑎᕐᑎᓚᐅᕐᐸᒃᑲ ᐴᒍᑍᑦ ᑕᓪᓕᒪᐅᔪᐃᕈᑎᒃᓴᓄᑦ ᐆᒃᑐᕋᐅᑕᐅᕙᒃᑐᑦ ᒎᑎᐅᑉ ᐃᒡᓗᖓᓄᑦ, ᐃᓚᖃᕐᑎᓪᓗᒋᑦ ᓂᕿᒃᓴᓂᒃ ᑐᓂᕐᕈᑕᐅᓯᒪᔪᓂᒃ ᑎᐱᑦᓯᐊᕆᒃᓴᐅᑎᒃᓴᓂᒡᓗ.

¹⁰ ᖃᐅᔨᓕᓚᐅᕆᕗᖓ ᓕᕔᑎᒃᑯᓐᓄᑦ ᑐᓂᔭᐅᖃᑦᑕᕆᐊᓖᑦ ᑐᓂᔭᐅᖃᑦᑕᕐᓯᒪᖏᓐᓂᖏᓐᓂᒃ; ᑖᒃᑯᐊ ᓕᕔᑏᑦ ᐃᓐᖏᕐᑏᓪᓗ ᐊᑐᓂᑦ ᐱᓇᓱᐊᖃᑦᑕᕆᐊᓖᑦ ᐱᕈᕐᓰᕕᖁᑎᒥᖕᓄᑦ ᕿᒫᓪᓗᑎᒃ ᐅᑎᕐᓯᒪᓕᕐᑐᕕᓂᐅᓂᖏᓐᓂᒃ.

¹¹ ᐊᖓᔪᖅᑳᓪᓕ ᓱᐊᒃᓗᒋᑦ ᐅᖃᐅᑎᓚᐅᕐᐸᒃᑲ, “ᓱᖕᒪᑦ ᒎᑎᐅᑉ ᐃᒡᓗᖓ ᕿᒪᒃᑕᐅᕚ?” ᑕᕝᕙ ᑲᑎᓐᖓᑎᓚᐅᕐᐸᒃᑲ ᐃᓂᒃᓴᖏᓐᓄᓪᓗ ᐊᑐᓂᑦ ᑎᓕᓪᓗᒋᑦ.

¹² ᑕᕝᕙ ᔫᑕᒃᑯᑦ ᐱᕈᕐᑎᑕᓕᒫᖏᑕ, ᕔᓃᓪᓗ, ᐅᕐᓱᒃᓮᓪᓗ ᑕᓪᓕᒪᐅᔪᖏᓐᓂᒃ ᑐᓂᓯᔭᕐᑐᓚᐅᕐᐳᑦ ᓱᓇᑐᐃᓐᓇᖃᐅᑎᒧᐊᕐᓗᒋᓪᓗ.

¹³ ᑮᓇᐅᔭᓕᕆᔨᒃᓴᓂᒡᓗ ᑎᓕᓯᓚᐅᕐᐳᖓ ᑐᓂᔭᐅᔪᑦ ᓱᓇᑐᐃᓐᓇᖃᐅᑎᖓᓂ ᑲᒪᔨᐅᓂᐊᕐᑐᓂᒃ ᓯᓕᒤᐊ ᑐᓂᕐᕈᓯᕐᑎᑦᓯᔨ, ᔭᑑᒃ ᐱᖁᔭᓂᒃ ᐃᓕᓯᒪᔪᖅ, ᓕᕔᑎ ᐱᑍᐊ, ᐃᑲᔪᕐᑎᒃᓴᖃᕐᓗᑎᒃ ᕼᐊᓇᓐᒥᒃ ᔭᑯᕆᐅᑉ ᐃᕐᓂᖓᓂᒃ, ᒪᑕᓁᐊᐅᑉ ᐃᕐᖑᑕᖓᓂᒃ, ᑖᒃᑯᐊ ᐱᑦᓯᐊᕈᓐᓇᕋᓱᒋᔭᐅᓚᐅᕐᒪᑕ; ᐱᔭᒃᓴᖃᕐᐳᑦ ᐃᓅᖃᑎᒥᖕᓄᑦ ᐂᑦᑐᕐᑐᐃᖃᑦᑕᖁᓪᓗᒋᑦ.

¹⁴ ᒎᑎᒐ ᐃᖅᑲᐅᒪᓐᖓ, ᑕᒪᒃᑯᐊ ᐱᑦᔪᑎᒋᓗᒋᑦ, ᐱᓇᓱᐊᑦᓯᐊᕐᓂᕆᓚᐅᕐᑕᒃᑲᓗ ᒎᑎᒪ ᐃᒡᓗᖓᓄᑦ ᐳᐃᒍᕐᑍᓕᒃᑭᑦ ᑖᑦᓱᒪᓗ ᐱᓇᓱᐊᕐᑕᐅᖁᓯᒪᔭᖏᓐᓂᒃ ᐱᓇᓱᐊᕐᓯᒪᔭᒃᑲ.

¹⁵ ᑍᑦᓱᒪᓂᐅᑎᓪᓗᒍ ᐃᓄᖕᓂᒃ ᔫᑕᒥᐅᓂᒃ ᑕᑯᓚᐅᕐᐳᖓ ᐸᐅᕐᖓᓂᒃ ᕔᓂᒃᓴᓂᒃ ᐃᑦᑏᔧᕕᖕᒥ ᑐᓪᓕᕐᑐᓂᒃ ᓴᐸᑎᐅᑎᓪᓗᒍ, ᓂᐊᖂᔭᒃᓴᓂᒡᓗ ᓇᑲᑎᕐᓯᒪᔪᓂᒃ ᐊᒡᔭᕐᓯᓪᓗᑎᒃ ᓯᐅᑎᖅᑯᕐᑐᔪᖁᑎᒥᖕᓄᑦ ᐅᓯᓕᕐᑐᐃᔪᓂᒃ; ᕔᓂᓂᒡᓗ, ᐸᐅᕐᖓᓂᒡᓗ ᕔᓂᒃᓴᓂᒃ, ᐸᐅᕐᖓᓂᒡᓗ ᐱᒋᓕᖕᓂᒃ, ᐊᓯᖏᓐᓂᒡᓗ ᐅᖁᒤᑦᑐᓂᒃ ᐱᓕᕆᔪᓂᒃ, ᔨᕉᓴᓕᒧᐊᕈᑦᔨᖃᑦᑕᕐᑐᓂᒃ ᐅᓪᓗᖅ ᓴᐸᑎᐅᑎᓪᓗᒍ. ᐃᓂᕐᑎᓚᐅᕐᐸᒃᑲᓕ ᐅᓪᓗᒥ ᑕᕝᕙᓂ ᓂᐅᕐᕈᓯᖃᑦᑕᖁᓇᒋᑦ ᓂᕿᒃᓴᓂᒃ.

¹⁶ ᐃᓄᐃᑦᑕᐅᖅ ᑍᕆᒥᐅᑍᑦ, ᑕᕝᕙᓂ ᐃᒡᓗᒐᓴᖕᓂ ᓄᓇᖃᓚᐅᕆᕗᑦ, ᐃᖃᓗᖕᓂᒃ ᐊᓯᖏᓐᓂᒡᓗ ᖃᓄᐃᑦᑐᑐᐃᓐᓇᓂᒃ ᓂᐅᕕᐊᒃᓴᖃᖃᑦᑕᓚᐅᕆᕗᑦ ᓴᐸᑎᐅᑎᓪᓗᒍ ᔫᑕᐅᑉ ᐃᓄᖏᓐᓄᑦ, ᔨᕉᓴᓕᒥᓗ.

¹⁷ ᑕᕝᕙ ᔫᑕᐅᑉ ᐊᖓᔪᖅᑳᖏᑦ ᓱᐊᓚᐅᕐᐸᒃᑲ ᐅᖃᐅᑎᓪᓗᒋᓪᓗ, “ᓱᖕᒪᑦ ᐱᐅᖏᑦᑐᒥᒃ ᐱᓕᕆᓕᕐᐱᓰ, ᓴᐸᑎᒥᒃ ᓇᕐᕈᓇᕐᓯᑎᑦᓯᒐᑦᓯ?

¹⁸ ᓯᕗᓕᓯ ᑍᒤᓕᐅᖃᑦᑕᓚᐅᓐᖏᓛᑦ, ᒎᑎᑦᑕ ᐱᐅᖏᑦᑐᒥᒃ ᐱᓇᓱᐊᕐᕕᒋᓚᐅᓐᖏᓛᑎᒎᑦ ᑕᕝᕙᓂ ᐃᒡᓗᒐᓴᖕᓂ? ᐃᓕᑦᓯᓕ ᓂᓐᖓᐅᑦᔭᐅᓇᕐᑐᒥᒃ ᐃᓴᕆᐊᓕᒥᐅᓄᑦ ᐱᑎᑦᓯᕗᓯ ᓴᐸᑎᒥᒃ ᓇᕐᕈᓇᕐᓯᑎᑦᓯᒐᑦᓯ.”

¹⁹ ᑕᕝᕙ ᑖᕐᓯᕙᓪᓕᐊᓕᕐᒪᑦ ᔨᕉᓴᓕᐅᑉ ᐃᑎᕐᑕᕐᕕᖏᓐᓂ ᓴᐸᑎᐅᓂᐊᓕᕐᑎᓪᓗᒍ, ᑎᓕᓯᓚᐅᕐᐳᖓ ᐃᑎᕐᑕᕐᕕᐅᑉ ᐅᒃᑯᐊᖏᑦ ᐅᒃᑯᐊᕐᑕᐅᖁᓪᓗᒋᑦ ᓴᐸᑎ ᐊᓂᒍᓚᐅᖏᓐᓂᖓᓂ ᐅᒃᑯᐃᕐᑍᓕᖁᓪᓗᒋᓪᓗ. ᐱᔨᒪᓗ ᐃᓚᖏᓐᓂᒃ ᑎᓕᓯᓚᐅᕐᐳᖓ ᐃᑎᕐᑕᕐᕕᖕᒦᖁᓪᓗᒋᑦ, ᓇᓪᓕᐊᓐᓂᒡᓘᓐᓃᑦ ᓱᓇᑐᐃᓐᓇᕐᒥᒃ ᐃᑎᕈᑦᔨᔪᖃᖁᓇᒍ ᓴᐸᑎᐅᑎᓪᓗᒍ.

²⁰ ᑕᕝᕙ ᓂᐅᕕᕋᓱᐊᕐᑏᑦ ᓂᐅᕐᕈᓯᕐᑏᓪᓗ ᓱᓇᑐᐃᓐᓇᕐᓂᒃ ᓂᐅᕐᕈᑎᒃᓴᓂᒃ ᓇᔪᕐᑎᖃᕐᓗᑎᒃ ᓯᓂᒃᑕᖃᑦᑕᓚᐅᕐᐳᑦ ᐊᑕᐅᓯᐊᕐᓗᑎᒃ ᐅᕝᕙᓗ ᒪᕐᕈᕕᒡᓗᑎᒃ ᔨᕉᓴᓕᐅᑉ ᓯᓚᑖᓂ.

²¹ ᐃᓂᕐᑎᓚᐅᕐᐸᒃᑲᓕ ᐅᖃᐅᑎᓪᓗᒋᓪᓗ, “ᓱᖕᒪᑦ ᐊᕙᓗᕐᔪᐊᑉ ᓯᓚᑖᓂ ᓯᓂᒃᑕᕐᐱᓰ? ᑍᒤᓕᑐᐊᕐᒥᒍᑦᓯ ᑕᕝᕙ ᐱᒋᐊᓛᓕᕐᐳᖓ ᐃᓕᑦᓯᓐᓂᒃ.” ᑕᕝᕙᓐᖓᑦ ᐱᒋᐊᕐᓗᑎᒃ ᓴᐸᑎᐅᑎᓪᓗᒍ ᕾᖃᑦᑕᕈᓐᓃᓚᐅᕐᐳᑦ.

²² ᑕᕝᕙ ᓕᕔᑏᑦ ᐱᖁᓚᐅᕐᐸᒃᑲ ᐃᒻᒥᖕᓂᒃ ᑐᒃᓯᐊᕐᓂᒃᑯᑦ ᓴᓗᒻᒪᕐᓴᖅᑳᕐᓗᑎᒃ, ᐃᑎᕐᑕᕐᕖᑦ ᖃᐅᔨᓴᕐᑕᐅᖃᑦᑕᖁᓪᓗᒋᑦ, ᐅᓪᓗᖅ ᓴᐸᑎ ᐃᑦᔪᕐᓁᑎᑕᐅᖁᓪᓗᒍ. ᒎᑎᒐ ᐃᖅᑲᐅᒪᓐᖓ, ᑕᒪᓐᓇ ᐱᑦᔪᑎᒋᓗᒍᑦᑕᐅᖅ, ᓴᐳᑎᓗᖓᓗ ᓇᒡᓕᒍᓱᒃᑐᕐᔪᐊᖑᓃᑦ ᐱᑦᔪᑎᒋᓗᒍ.

²³ ᐊᒻᒪ ᑕᒪᒃᑯᐊ ᓇᓪᓕᐅᓯᒪᑎᓪᓗᒋᑦ ᖃᐅᔨᓚᐅᕆᕗᖓ ᔫᑎᑦ ᓄᓕᐊᓂᖃᑦᑕᓕᕐᓂᕐᒪᑕ ᐊᕐᓇᓂᒃ ᐋᔅᑖᑦᒥᐅᓂᒃ, ᐊᒧᓂᒥᐅᓂᒡᓗ, ᒧᐊᐱᒥᐅᓂᒡᓗ;

²⁴ ᕿᑐᕐᖓᖏᑕᓗ ᕿᑎᖅᑲᖏᑦ ᐋᔅᑖᑦᒥᐅᑎᑐᑦ ᐅᖃᐅᓯᖃᕐᐳᑦ, ᔫᑕᒥᐅᓪᓗ ᐅᖃᐅᓯᖏᑎᑐᑦ ᐅᖃᕈᓐᓇᕋᑎᒃ, ᐃᓅᖃᑎᒌᓪᓕ ᓇᓪᓕᐊᑦᑕ ᐅᖃᐅᓯᖏᓐᓂᒃ ᐅᖃᐅᓯᖃᖔᕐᐳᑦ.

²⁵ ᓱᐊᓚᐅᕐᐸᒃᑲᓕ ᐅᖃᕐᓂᕐᓗᒡᕕᒋᓪᓗᒋᓪᓗ, ᐃᓚᖏᓪᓗ ᐋᓐᓂᕐᓯᓚᐅᕐᐸᒃᑲ ᓄᔮᕐᑐᕐᓗᒋᓪᓗ; ᐊᖏᒻᒪᕆᒃᑎᓚᐅᕐᐸᒃᑲ ᒎᑎᐅᑉ ᐊᑎᖓᓂ, ᐅᖃᐅᑎᓪᓗᒋᓪᓗ, “ᐸᓂᓯ ᑐᓂᔭᒃᓴᕆᓐᖏᓚᓯ ᑍᒃᑯᐊ ᐃᕐᓂᖏᓐᓄᑦ, ᐅᕝᕙᓗ ᑍᒃᑯᐊ ᐸᓂᖏᓐᓂᒃ ᑎᒍᓯᔪᒃᓴᐅᓐᖏᓚᓯ ᐃᕐᓂᑦᓯᓐᓄᑦ, ᓇᖕᒥᓂᑦᓯᓐᓄᓪᓘᓐᓃᑦ.

²⁶ ᓲᓗᒨᓂ ᐃᓴᕆᐊᓕᒃᑯᑦ ᐊᖓᔪᖅᑳᕐᔪᐊᖓᑦ ᐊᔪᕐᑐᓕᑦᔪᑎᖃᓚᐅᓐᖏᓛᖅ ᐊᕐᓇᓄᑦ ᑍᒤᓕᐅᕐᓂᕐᒥᓄᑦ? ᐃᓅᖃᑎᒌᒡᔪᐊᓕᒫᓂᑦ ᑖᑦᓱᑐᓇᖅ ᐊᔪᓐᖏᑎᒋᔪᒥᒃ ᐊᖓᔪᖅᑳᕐᔪᐊᕐᑕᖃᓚᐅᓐᖏᓚᖅ, ᒎᑎᖓᑕᓗ ᓇᒡᓕᒋᓪᓗᓂᐅᒃ, ᒎᑎᐅᓪᓗ ᐃᓴᕆᐊᓕᓕᒫᒧᑦ ᐊᖓᔪᖅᑳᕐᔪᐊᓐᖑᕐᑎᓚᐅᕐᐹ; ᔫᑎᐅᖏᑦᑐᓪᓕ ᐊᕐᓇᖏᑕ ᐊᔪᕐᑐᓕᑎᓚᐅᕐᐹᑦ.

²⁷ ᑕᕝᕙ ᐃᓕᑦᓯᓐᓂᒃ ᒪᓕᑐᐃᓐᓇᕐᓗᑕ ᐱᐅᖏᑦᑐᓕᓂᐊᓗᖕᒥᒃ ᐱᓇᓱᐊᕐᓂᐊᓕᕐᐱᑖ ᑍᒫᒃ ᒎᑎᕗᑦ ᐊᔪᕐᑐᓕᕕᒋᓗᒍ ᔫᑎᐅᖏᑦᑐᓂᒃ ᓄᓕᐊᓂᖃᑦᑕᕐᓗᑖ?”

²⁸ ᐃᓔᐊᓯᐅᑉ ᑐᓂᕐᕈᓯᕐᑎᑦᓯᔨᐅᑉ ᐃᕐᓂᖓᑕ ᐃᓚᖓᑦ, ᔨᕼᐅᐃᐊᑕ ᓴᓐᐸᓪᓛᑎᐅᑉ ᕼᐅᕈᓁᑎᐅᑉ ᓂᖓᐅᒋᓚᐅᕐᒪᒍ; ᑍᒤᒻᒪᑦ ᑕᕝᕙᓐᖓᑦ ᐊᐅᓪᓚᕐᑎᓚᐅᕐᐸᕋ.

²⁹ ᒎᑎᒐ ᐃᖅᑲᐅᒪᒃᑭᑦ, ᑐᓂᕐᕈᓯᕐᑎᑦᓯᔨᓂᒃ ᓇᕐᕈᓇᕐᓯᑎᑦᓯᖕᒪᑕ; ᐊᖏᖃᑎᒌᒍᑎᒋᓯᒪᔭᓕᒫᖏᓐᓂᒡᓗ ᑐᓂᕐᕈᓯᕐᑎᑦᓯᔩᑦ ᓕᕔᑎᓪᓗ.

³⁰ ᓴᓗᒻᒪᕐᓴᓚᐅᕐᐸᒃᑲ ᐃᓚᖃᕈᓐᓁᕐᑎᓪᓗᒋᓪᓗ ᐅᖓᓯᒃᑐᒥᐅᑕᓂᒃ, ᑐᓂᕐᕈᓯᕐᑎᑦᓯᔩᓪᓗ ᓕᕔᑎᓪᓗ ᐱᓇᓱᐊᒐᒃᓴᖏᓐᓂᒃ ᓇᓗᓁᕐᓯᓚᐅᕐᐳᖓ, ᐊᑐᓂᑦ ᐱᓇᓱᐊᖃᑦᑕᕐᓂᐊᕐᑕᖏᓐᓂᒃ.

³¹ ᕿᔪᖕᓂᒡᓗ ᐊᑐᐃᓐᓇᕈᐃᓚᐅᕐᐳᖓ ᑐᓂᕐᕈᓯᓕᕐᑎᓪᓗᒋᑦ ᐃᑯᐊᓚᒍᑎᒃᓴᓂᒃ, ᑐᓂᕐᕈᓯᕐᕕᒃᓴᖅ ᓇᓪᓕᐅᓐᓂᖅ ᓈᒻᒪᒃᓯᔭᕌᖓᑦ, ᐱᕈᕐᑐᓪᓗ ᓯᕗᓪᓕᕐᐹᑦ ᐱᕈᕐᑎᑕᐅᔪᑦ ᑐᓂᔭᐅᓂᒃᓴᖏᓐᓂ. ᒎᑎᒐ, ᐃᖅᑲᐅᒪᓐᖓ, ᐱᐅᔪᓂᒃ ᐱᓇᓱᐊᓚᐅᕐᑕᓐᓄᑦ.