ᒫᑯᓯᐅᑉ ᐊᒡᓚᖏᑦ 8 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᓂᕆᑎᑦᓯᓂᖓ ᐃᓄᖕᓂᒃ 4,000ᓂᒃ

¹ ᐅᓪᓗᓂ ᑍᒃᑯᓇᓂ, ᐃᓄᒐᓴᒡᔪᐊᑦ ᑲᑎᒪᓕᕆᕗᑦ, ᑖᒃᑯᐊ ᓂᕆᔭᒃᓴᖃᖏᒻᒪᑕ, ᐃᓕᓐᓂᐊᕐᑎᓂ ᕾᖁᕔᑦ ᐅᖃᐅᑎᓪᓗᒋᑦ,

² “ᐅᑯᐊ ᐃᓄᒐᓴᒡᔪᐊᑦ ᐃᓚᑦᓱᒋᕙᒃᑲ, ᐅᕙᑦᑎᓐᓃᓕᕐᒪᑕ ᐅᓪᓗᓂᒃ ᐱᖓᓱᓂᒃ, ᓂᕿᒃᓴᖃᕋᑎᒃ;

³ ᐊᖏᕐᕋᖁᒍᒃᑭᑦ ᓱᓇᒥᒡ ᓂᕆᑎᓐᓇᒋᑦ, ᐊᖏᕐᕋᐅᓕᕐᓗᑎᒃ ᓄᑮᕈᑎᓂᐊᕐᐳᑦ; ᐃᓚᖏᑦ ᐅᖓᓯᒃᑐᒥᑦ ᐱᓯᒪᖕᒪᑕ.”

⁴ ᐃᓕᓐᓂᐊᕐᑎᖏᑕ ᑭᐅᕚᑦ, “ᖃᓄᖅ ᑕᒫᓂ ᓱᓇᖃᔪᐃᑦᑐᒥᑦ ᐅᑯᐊ ᐃᓄᒐᓴᐃᑦ ᓂᕆᔭᒃᓴᕐᑖᕋᔭᕐᐹᑦ?”

⁵ ᔩᓱᓯᐅᑉ ᐊᐱᕆᕔᑦ, “ᖃᑦᓯᓂᒃ ᓂᐊᖂᔭᖃᕐᐱᓰ?” ᑖᒃᑯᐊ ᐅᖃᕐᐳᑦ, “7ᓂᒃ.”

⁶ ᔩᓱᓯᐅᑉ ᐃᓄᒐᓴᒡᔪᐊᑦ ᓄᓇᒧᑦ ᐃᖏᖁᕔᑦ; ᓂᐊᖂᔧᑦ 7 ᑎᒍᕔᑦ, ᖁᔭᓕᔭᕇᕋᒥᓗ ᐊᕕᒡᓗᒋᑦ ᐃᓕᓐᓂᐊᕐᑎᒥᓄᑦ ᑐᓂᕔᑦ ᐃᓄᒐᓴᒡᔪᐊᓄᑦ ᑐᓂᐅᖅᑬᖁᓪᓗᒋᑦ; ᑕᕝᕙ ᐃᓕᓐᓂᐊᕐᑎᖏᑦ ᑍᒤᓕᐅᕐᐳᑦ.

⁷ ᐃᖃᓗᑯᓗᖕᓂᒃᑕᐅᖅ ᐅᓄᖏᑦᑐᓂᒃ ᐱᑕᖃᕆᕗᑦ; ᖁᔭᓕᑦᔪᑎᒋᔭᕇᕋᒥᒋᑦ, ᐃᓕᓐᓂᐊᕐᑎᓂ ᐃᓄᖕᓄᑦ ᑐᓂᐅᖅᑬᖁᒋᕔᑦ.

⁸ ᓂᕆᕗᑦ, ᓈᒻᒪᒃᓯᓪᓗᑎᒃ; ᐃᕕᐅᔭᓂᒡᓗ 7ᓂᒃ ᑕᑍᕗᑦ ᑖᒃᑯᐊ ᐊᒥᐊᒃᑯᖏᓐᓂᒃ ᐊᒡᒍᕐᓯᒪᔪᓂᒃ.

⁹ ᐃᓄᒐᓴᒡᔪᐊᑦ ᐅᓄᕐᓂᖃᓚᐅᕐᐳᑦ 4,000 ᖃᓂᒋᔮᓂ.

¹⁰ ᔩᓱᓯᐅᑉ ᐃᓄᐃᑦ ᐊᐅᓪᓚᖁᓕᕐᐰᑦ; ᑕᕝᕔᓐᓇᕐᓗ ᐅᒥᐊᒧᑦ ᐃᑭᕗᖅ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ, ᑖᓪᒪᓅᑕᐅᑉ ᖃᓂᒋᔮᓄᐊᕐᐳᑦ.

ᐹᕆᓯᑦ ᑲᒪᓇᕐᑐᓕᖁᔨᓂᖓᑦ ᔩᓱᓯᒥᒃ

¹¹ ᐹᕆᓯᑦ ᐃᓚᖏᑦ ᔩᓱᓯᒧᐊᕐᐳᑦ ᐅᖃᖃᑎᒋᓪᓗᒍ ᐆᒃᑐᕐᐹᑦ, ᕿᓚᖕᒥᑦ ᓇᓗᓁᒃᑯᑕᕐᒥᒃ ᑲᒪᓇᕐᑐᒥᒃ ᓴᖅᑭᑎᑦᓯᖁᓪᓗᒍ.

¹² ᔩᓱᓯᓕ ᐊᖏᔪᒥᒃ ᐊᓂᕐᓴᐅᒥᓪᓗᓂ ᐅᖃᐅᑎᕔᑦ, “ᓱᖕᒪ ᐅᓪᓗᒥᐅᓕᕐᑐᖅ ᐃᓄᐃᑦ ᑲᒪᓇᕐᑐᓕᖁᔨᕚᑦ? ᓱᓕᔪᒥᒃ ᐅᖃᐅᑎᕙᑦᓯ, ᓇᓗᓁᒃᑯᑕᕐᒥᒃ ᐅᓪᓗᒥᐅᔪᖅ ᐃᓄᐃᑦ ᑐᓂᓯᕕᐅᓂᐊᓐᖏᓚᑦ.”

¹³ ᕿᒪᒃᐰᑦ ᑕᕝᕙ, ᐅᒥᐊᒧᑦ ᐃᑭᒋᕗᖅ ᑕᓯᐅᑉ ᐊᑭᐊᓄᐊᓕᕐᓗᓂ.

ᐹᕆᓯᑦ ᐃᕉᑕᓯᐅᓪᓗ ᐳᕙᓪᓚᖅᑯᑎᖏᑦ

¹⁴ ᐃᓕᓐᓂᐊᕐᑎᖏᑦ ᓂᐊᖂᔭᒡᒋᕆᐊᒃᓴᖅ ᐳᐃᒍᕐᑐᕕᓂᐅᖕᒪᑕ; ᐊᑕᐅᓯᕐᒥᒃ ᓂᐊᖂᔭᒥᒃ ᐱᓯᒪᒐᓗᐊᕐᐳᑦ ᑕᕝᕙᓂ ᐅᒥᐊᒥ.

¹⁵ ᖃᐅᔨᒪᓇᓱᐊᖁᓪᓗᒋᑦ ᐅᖃᐅᑎᕔᑦ, “ᑲᒪᑦᓯᐊᕆᑦᓯ, ᐅᑦᔨᕐᓱᕐᓗᓯ ᐹᕆᓯᑦ ᐃᕉᑕᓯᐅᓪᓗ ᐳᕙᓪᓚᖅᑯᑎᖏᓐᓂᒃ.”

¹⁶ ᐃᓕᓐᓂᐊᕐᑎᖏᑦ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, ᐅᖃᕐᓗᑎᒃ, “ᑍᒫᖑᓇ ᐅᖃᕐᑐᖅ ᓂᐊᖂᔭᖃᖏᓐᓂᑦᑎᓐᓄᑦ.”

¹⁷ ᔩᓱᓯᐅᑉ ᖃᐅᔨᒪᒐᒥᒋᑦ, ᐅᖃᐅᑎᕔᑦ, “ᓱᖕᒪᑦ ᐃᓕᑦᓯᓐᓄᑦ ᐅᖃᖃᑎᒌᒃᐱᓰ ᓂᐊᖂᔭᖃᖏᓐᓂᑦᓯᓐᓂᒃ? ᓱᓕ ᖃᐅᔨᒪᓐᖏᓚᓰ ᐅᕝᕙᓗ ᑐᑭᓯᓐᖏᓚᓰ ᐆᒻᒪᑎᓯ ᓯᑎᔪᐊᓘᕚᑦ?

¹⁸ ᐃᔨᖃᕐᓗᓯ ᑕᑯᔪᓐᓇᓐᖏᓚᓰ? ᓯᐅᑎᖃᕐᓗᓯᓗ ᑐᓴᕈᓐᓇᓐᖏᓚᓰ?

¹⁹ ᐃᖅᑲᐅᒪᓐᖏᓚᓰ ᓂᐊᖂᔧᑦ ᑕᓪᓕᒪᑦ ᐊᒡᒍᕋᒃᑭᑦ ᐃᓄᖕᓄᑦ 5,000ᓄᑦ, ᖃᑦᓯᓂᒃ ᐃᕕᐅᔭᓂᒃ ᐊᒥᐊᒃᑯᓂᒃ ᑕᑍᓚᐅᕐᐱᓰ?” ᑖᒃᑯᐊ ᐅᖃᐅᑎᕚᑦ, “12ᓂᒃ ᑕᑍᓚᐅᕐᐳᒍᑦ.”

²⁰ “ᓂᐊᖂᔭᓂᒡᓗ 7ᓂᒃ ᐊᒡᒍᐃᒐᒪ ᐃᓄᖕᓄᑦ 4,000ᓄᑦ, ᖃᑦᓯᓂᒃ ᐃᕕᐅᔭᓂᒃ ᑕᑍᓚᐅᕐᐱᓯ ᐊᒥᐊᒃᑯᖏᓐᓂᒃ?” ᐅᖃᐅᑎᕚᑦ, “7ᓂᒃ ᑕᑍᓚᐅᕐᐳᒍᑦ.”

²¹ ᐅᖃᐅᑎᕔᑦ, “ᓱᓕ ᑐᑭᓯᓐᖏᓚᓰ?”

ᔩᓱᓯᐅᑉ ᑕᐅᑐᖏᑦᑐᒥᒃ ᑕᐅᑐᓕᕐᑎᑦᓯᓂᖓ ᐱᑦᓮᑕᒥ

²² ᐱᑦᓮᑕᒧᑦ ᑎᑭᑉᐳᑦ, ᐃᓄᐃᑦ ᐃᓚᖏᑦ ᑕᕝᕗᓐᖓᐅᑦᔨᕗᑦ ᑕᐅᑐᖏᑦᑐᒥᒃ, ᕿᓄᕕᒋᕚᑦ ᑖᑦᓱᒥᖓ ᐊᒃᑐᕐᓯᖁᓪᓗᒍ.

²³ ᑕᐅᑐᖏᑦᑐᖅ ᑕᓯᐅᕐᓗᒍ ᓄᓇᓖᑦ ᓯᓚᑖᓄᐊᕈᑎᕚ; ᐃᔨᖏᒃ ᓄᕙᒥᑦᑕᓚᐅᕐᓗᒋᒃ ᐸᑎᒻᒥᓚᐅᕐᓗᒍ ᐊᐱᕆᕚ, “ᓱᓇᑐᐃᓐᓇᒥᒃ ᑕᑯᕖᑦ?”

²⁴ ᑕᑯᓇᓱᐊᕋᒥ ᐅᖃᕐᐳᖅ, “ᐃᓄᖕᓂᒃ ᑕᑯᕗᖓ; ᑭᓯᐊᓂ ᓇᐹᕐᑑᔮᕐᑐᑦ ᐱᓱᑲᑕᒃᑐᑦ.”

²⁵ ᑕᕝᕙ ᐃᔨᖏᒃ ᐊᒃᑐᒃᑲᓐᓂᕐᐹᒃ; ᑕᕝᕙ ᑕᑯᑦᓯᐊᕋᓱᐊᕋᒥ ᐃᔨᖏᒃ ᑕᐅᑐᖕᓂᕆᓚᐅᕐᑕᒥᑐᑦ ᑕᐅᑐᑦᓯᐊᓕᕐᐴᒃ, ᑕᒤᓐᓂᒃ.

²⁶ ᑕᕝᕙ ᐊᖏᕐᕋᖁᓕᕐᐹ ᐅᖃᐅᑎᓪᓗᒍᓗ, “ᓄᓇᓕᖕᓄᑦ ᑕᕝᕗᖓ ᐃᑎᕐᑍᓕᒋᑦ.”

ᐲᑦᑐᕉᓯᐅᑉ ᔩᓱᓯᒥᒃ ᓇᓗᓁᕐᓯᓂᖓ ᙭ᔅᑑᓯᐅᓂᖓᓂᒃ

²⁷ ᐃᓕᓐᓂᐊᕐᑎᓂ ᐃᓚᒋᓪᓗᒋᑦ ᐊᐅᓪᓚᕐᐳᑦ, ᓄᓇᓕᖕᓄᑦ ᓯᓴᕆᐊ ᐱᓕᐰᑉ ᖃᓂᒋᔮᓄᑦ; ᐊᖅᑯᑖᓂ ᐱᓱᒃᓗᑎᒃ ᐃᓕᓐᓂᐊᕐᑎᓂ ᐊᐱᕆᕔᑦ, “ᐃᓄᐃᑦ ᑭᓇᐅᓇᓱᒋᕚᖔ?”

²⁸ ᑖᒃᑯᐊ ᑭᐅᕚᑦ, “ᐃᓚᖏᑕ ᔪᐊᓇᓯ ᐹᑉᑎᑎᕆᔨᐅᓇᓱᒋᕚᑎᑦ; ᐃᓚᖏᑕᓕ ᐃᓔᑦᔭᐅᓇᓱᒋᕚᑎᑦ; ᐃᓚᖏᓐᓄᑦ ᓇᓚᐅᑦᑍᔪᓄᑦ ᐃᓚᒋᔭᐅᓇᓱᒋᔭᐅᕗᑎᑦ.”

²⁹ ᐊᐱᕆᕔᑦᓕ, “ᐃᓕᑦᓯᓕ ᑭᓇᐅᓇᓱᒋᕕᓯᓐᖔ?” ᐲᑦᑐᕉᓯᐅᑉ ᑭᐅᕚ, “᙭ᔅᑑᓯᐅᕗᑎᑦ.”

³⁰ ᔩᓱᓯᐅᑉ ᐃᓂᕐᑎᒪᕆᒃᐰᑦ ᑭᓇᑐᐃᓐᓇᕐᒧᑦ ᐅᖃᖁᓇᒋᑦ ᑭᓇᐅᓂᕐᒥᓂᒃ.

ᔩᓱᓯᐅᑉ ᐅᖃᐅᓯᖃᕐᓂᖓ ᐋᓐᓂᐊᑎᑕᐅᓂᒃᓴᒥᓂᒃ ᑐᖁᑕᐅᓂᒃᓴᒥᓂᒡᓗ

³¹ ᑕᑉᕙ ᐃᓕᓐᓂᐊᕐᑎᓂ ᐊᔪᕆᕐᑐᕐᐰᑦ ᐃᓅᑉ ᐃᕐᓂᖓ ᐋᓐᓂᐊᑎᑕᐅᔭᕆᐊᖃᕐᓂᖓᓂᒃ ᐊᖏᔪᒥᒃ, ᔪᑎᑦ ᐊᖓᔪᖅᑳᖏᓐᓄᑦ ᓇᕐᕈᒋᔭᐅᒻᒪᕆᒍᒫᕐᓂᒥᓂᒃ ᑐᓂᕐᕈᓯᕐᑎᑦᓯᔨᓪᓗ ᐊᖓᔪᖅᑳᖏᓐᓄᑦ, ᐱᖁᔭᓂᒡᓗ ᐃᓕᓮᔨᓄᑦ, ᑐᖁᑕᐅᔪᒫᕐᓂᒥᓂᒡᓗ, ᐅᓪᓗᐃᑦ ᐱᖓᔪᐊᓐᓂ ᒪᑭᑦᓱᒫᕐᓂᒥᓂᒃ.

³² ᑕᒪᑐᒥᖓ ᐊᓐᖏᒍᑎᓇᒋᑦ ᐅᖃᐅᑎᕔᑦ. ᐲᑦᑐᕉᓯᐅᑉ ᓴᓂᕐᕙᖃᑎᒋᓪᓗᒍ ᐃᓂᕐᑎᒻᒪᕆᓕᕐᐹ.

³³ ᐃᓕᓐᓂᐊᕐᑎᒥᓄᑦ ᕿᕕᐊᕐᓗᓂ, ᐲᑦᑐᕉᓯ ᓱᐊᒃᐹ, ᐅᖃᕐᓗᓂ, “ᓵᑖᓇᓰ ᑐᓄᓐᓄᐊᕆᑦ! ᐃᓱᒪᒋᔧᑦ ᒎᑎᒥᑦ ᐱᖏᒻᒪᑦ, ᐃᓄᖕᒥᓪᓕ ᐱᕗᖅ.”

³⁴ ᔩᓱᓯ ᐃᓄᖕᓂᒃ ᐃᓕᓐᓂᐊᕐᑎᒥᓂᒡᓗ ᕾᖁᔨᕗᖅ ᐅᖃᐅᑎᓪᓗᒋᑦ, “ᐅᕙᓐᓂᒃ ᒪᓕᒍᒪᔪᖅ, ᐃᒻᒥᓂᒃ ᐃᓱᒪᒋᔪᒃᓴᐅᓐᖏᓚᖅ ᓴᓐᓂᖓᔪᓕᖕᒥᓂᒡᓕ ᐃᕐᓱᒡᓗᓂ ᐅᕙᓐᓂᒃ ᒪᓕᒃᑐᒃᓴᐅᕗᖅ.

³⁵ ᓇᓪᓕᐊᑦ ᐃᓅᓯᕐᒥᓂᒃ ᐱᐅᓕᒃᓯᔪᒪᔪᖅ ᐊᓯᐅᔨᓂᐊᕐᐳᖅ; ᓇᓪᓕᐊᓪᓕ ᐃᓅᓯᕐᒥᓂᒃ ᐊᓯᐅᔨᔪᖅ ᐅᕙᓐᓂᒃ ᐱᑦᔪᑎᖃᕐᓗᓂ ᐅᖃᐅᓰᓪᓗ ᑐᓴᕈᒥᓇᕐᑐᑦ ᐱᑦᔪᑎᒋᓗᒋᑦ ᑖᓐᓇ ᐃᓅᓯᕐᒥᓂᒃ ᐱᐅᓕᒃᓯᓂᐊᕐᐳᖅ.

³⁶ ᐃᓄᒃ ᓱᓇᒥᒃ ᐱᕙᓪᓕᐅᑎᖃᕋᔭᕐᐹ ᓯᓚᕐᔪᐊᓕᒫᒥᒃ ᐱᖃᓕᕋᓗᐊᕈᓂ ᓇᖕᒥᓂᕐᓗ ᐃᓅᓯᕐᒥᓂᒃ ᐊᓯᐅᔨᓗᓂ?

³⁷ ᓱᓇᒥᒃ ᑐᓂᓯᔪᒃᓴᐅᕚ ᐃᓅᓯᖓᑕ ᐅᑎᕐᑎᑕᐅᑦᔪᑎᒃᓴᖓᓂᒃ?

³⁸ ᓇᓪᓕᐊᑦ ᐅᕙᓐᓂᒃ ᑲᓐᖑᓲᑎᖃᕐᐸᑦ ᐊᔪᕆᕐᑐᐃᑦᔪᑎᒋᔭᓐᓂᒡᓗ ᐅᕙᓂ ᓯᓚᕐᔪᐊᕐᒥ ᒎᑎᖃᖏᑦᑐᓂ ᐱᐅᖏᑦᑐᓕᔪᓂᓗ, ᐃᓅᑉ ᐃᕐᓂᖓᑕ ᑲᓐᖑᒋᔪᒫᕆᕚ, ᑎᑭᓕᕈᓂ ᐊᑖᑕᖓᑕ ᓂᕐᑐᕐᓇᕐᓂᕐᔪᐊᖓᓂ ᐂᖏᓖᓂ ᐃᑦᔪᕐᓁᑦᑐᑦ ᐱᖃᑎᒋᓗᒋᑦ.”