ᒫᑯᓯᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐊᔪᕆᕐᑐᐃᓂᖓ ᐃᓄᐃᑦ ᓯᕗᓕᕕᓂᖏᓐᓂᒃ

¹ ᑕᕝᕙ ᐹᕆᓯᑦ ᑲᑎᑉᕕᒋᒪᑦᔪᒃ ᐱᖁᔭᓂᒡᓗ ᐃᓕᓮᔩᑦ ᐃᓚᖏᑦ ᔨᕉᓴᓕᒻᒥᓐᖔᕐᓯᒪᔪᑦ.

² ᑕᑯᒐᒥᒃ ᐃᓕᓐᓂᐊᕐᑎᖏᑕ ᐃᓚᖏᑦ ᓂᕆᖕᒪᑕ ᐊᒡᒐᖕᒥᖕᓂᒃ ᐅᐊᓴᕐᓯᒪᓇᑎᒃ.

³ ᐹᕆᓯᑦ, ᔫᑎᓕᒫᓪᓗ, ᓂᕆᕙᖏᒻᒪᑕ ᐊᒡᒐᖕᒥᖕᓂᒃ ᐅᐊᓴᓚᐅᕋᑎᒃ ᑭᓯᐊᓂ ᐅᐊᓴᓚᐅᕐᓗᑎᒃ ᓯᕗᓕᕕᓂᖏᑕ ᐊᔪᕆᕐᑑᓯᖏᓐᓂᒃ ᒪᓕᒡᓗᑎᒃ;

⁴ ᓂᐅᕕᕐᕕᖕᓃᑦᑐᕕᓂᐅᒍᑎᒃᓗ ᐃᒻᒥᖕᓂᒃ ᐅᐊᓴᓚᐅᖏᓪᓗᑎᒃ ᓂᕆᓯᑐᐃᓐᓇᕐᐸᖏᒻᒪᑕ; ᐊᓯᖏᓐᓂᒃ ᐊᒥᓱᓂᒃ ᐱᐅᓯᖃᕆᕗᑦ ᓯᕗᓕᕐᒥᖕᓂᑦ ᐊᔪᕆᕐᑐᕐᑕᐅᑦᔪᑎᒋᓯᒪᔭᒥᖕᓂᒃ, ᐅᐊᓴᕐᓯᔭᕆᐊᖃᕐᓗᑎᒃ ᑏᑑᑎᓂᒃ, ᓂᕿᓕᐅᕈᑎᓂᒃ, ᓴᕕᕋᔭᖕᓂᒡᓗ ᐴᒍᑕᐅᔨᖓᔪᓂᒃ.

⁵ ᑍᒤᒻᒪᑦ ᐹᕆᓯᑦ ᐱᖁᔭᓂᒡᓗ ᐃᓕᓮᔩᑦ ᐊᐱᕆᕚᑦ, “ᓱᖕᒪᓄᑯᐊ ᐃᓕᓐᓂᐊᕐᑎᑎᑦ ᒪᓕᓐᖏᓚᑦ ᓯᕗᓕᑦᑕ ᐱᐅᓯᖏᓐᓂᒃ, ᐊᒡᒐᖕᒥᖕᓂᒃ ᓴᓗᒻᒤᓯᒪᓇᑎᒃ ᓂᕆᖕᒪᑕ?”

⁶ ᔩᓱᓯᐅᑉ ᑭᐅᕔᑦ, “ᐂᓮᐊᓯ ᓇᓚᐅᑦᑍᓪᓗᓂ ᐅᖃᐅᓯᖃᓚᐅᕐᐳᖅ ᑕᒃᑯᕐᒨᕐᑐᓂᒃ ᐃᓕᑦᓯᓐᓂᒃ, ᑎᑎᕋᕐᓯᒪᖕᒪᑦ, ‘ᐅᑯᐊ ᐃᓄᐃᑦ ᖃᓂᕐᒥᖕᓄᑦ ᓂᕐᑐᕐᐹᖓ, ᐆᒻᒪᑎᖏᑕᓕ ᐅᖓᓯᒋᕚᖓ;

⁷ ᓱᓕᓇᑎᒃ ᑐᒃᓯᐊᕐᕕᒋᕚᖓ, ᐊᔪᕆᕐᑐᐃᑦᔪᑎᖃᕋᒥᒃ ᐃᓄᐃᑦ ᐊᖅᑭᒃᑕᕕᓂᖏᓐᓂᒃ ᐅᒃᐱᕐᓂᕐᒧᑦ ᑐᓐᖓᕕᐅᓂᕋᕐᑕᒥᖕᓂᒃ.’

⁸ “ᒎᑎᐅᑉ ᐱᖁᔭᖏᑦ ᕿᒪᒃᐸᓯ, ᐃᓄᐃᑦ ᐃᓕᖅᑯᓯᑐᐃᓐᓇᖏᑦ ᓈᓚᖔᕐᓗᒋᑦ.”

⁹ ᐅᖃᐅᑎᒃᑲᓐᓂᕐᐰᑦ, “ᓯᓚᑐᐊᕿᓯᒪᔪᒥᒃ ᒪᓕᖏᑦᔪᑎᒃᓴᖃᕐᐸᒃᐳᓯ ᒎᑎᐅᑉ ᐱᖁᔭᖏᓐᓂᒃ, ᓇᖕᒥᓂᖅ ᐱᐅᓯᓯ ᓈᓚᒃᑕᐅᑎᖔᕈᒪᓪᓗᒋᑦ.

¹⁰ ᒨᓯᓯ ᐅᖃᓚᐅᕐᒪᑦ, ‘ᐊᑖᑍᑦ ᐊᓈᓁᓪᓗ ᐅᐱᒋᑦᓯᐊᒃᑭᒃ, ᓇᓪᓕᐊᓪᓗ ᐊᑖᑕᒥᓂᒃ ᐊᓈᓇᒥᓂᒡᓗ ᐅᖃᕐᓂᕐᓘᑎᓕᒃ ᑖᓐᓇ ᑐᖁᑕᐅᔪᒃᓴᐅᕗᖅ.’

¹¹ ᐃᓕᑦᓯᓕ ᐅᖃᕐᐳᓯ, ‘ᐃᓄᒃ ᓱᓇᑐᐃᓐᓇᕐᒥᒃ ᐊᑖᑕᒥᓄᑦ ᐊᓈᓇᒥᓄᓪᓗ ᐃᑲᔪᕈᑎᒋᔪᓐᓇᕐᑕᒥᓂᒃ ᐱᑕᖃᕐᓗᓂ, ᐅᖃᕐᐸᑦ, ᑰᕐᐸᓐ’ (ᐃᒫᒃ ᑐᑭᖃᕐᑐᖅ, ᐅᓇᓕ ᒎᑎᒧᑦ ᑐᓂᔭᒃᓴᖅ),

¹² ᑖᓐᓇ ᑕᕝᕙ ᐊᑖᑕᒥᓄᑦ ᐊᓈᓇᒥᓄᓪᓗ ᐃᑲᔪᕈᓐᓃᕐᑎᖃᑦᑕᕐᐸᓯ.

¹³ ᑕᕝᕙ ᑍᒤᓕᐅᕐᓗᓯ ᐱᐅᓯᓯ ᒪᓕᖔᕐᓗᒋᑦ ᒎᑎᐅᑉ ᐅᖃᐅᓯᖏᓐᓂᒃ ᐊᑐᕈᓐᓃᕐᑎᑦᓯᕙᒃᐳᓯ. ᐊᒻᒪᑦᑕᐅᖅ ᐊᓯᖏᓐᓂᒃ ᐊᒥᓱᓂᒃ ᑍᒤᓕᐅᕐᐸᒃᐳᓯ.”

ᐃᓄᖕᒥᒃ ᓴᓗᒪᔪᓐᓃᕐᑎᑦᓯᔪᑦ

¹⁴ ᑕᕝᕙ ᔩᓱᓯ ᐃᓄᒋᐊᒃᑐᕐᔪᐊᓂᒃ ᕾᖁᔨᒃᑲᓐᓂᕐᐳᖅ, ᐅᖃᐅᑎᓪᓗᒋᑦ, “ᑕᒪᑦᓯ ᓈᓚᒃᓯᓐᖓ, ᑐᑭᓯᓗᓯᓗ:

¹⁵ ᐃᓅᑉ ᓯᓚᑖᓂᑦ ᐱᔪᖅ ᐃᓅᑉ ᐃᓗᐊᓂᒃ ᓴᓗᒪᔪᓐᓃᕐᑎᑦᓯᔪᓐᓇᓐᖏᓚᖅ; ᐃᓅᓪᓕ ᐃᓗᐊᓂᑦ ᐊᓂᔪᑦ ᑕᒪᒃᑯᐊ ᐃᓄᖕᒥᒃ ᐱᐅᔪᓐᓃᕐᑎᑦᓯᕗᑦ. [

¹⁶ ᑐᓵᔪᓂᒃ ᓯᐅᑎᓕᒃ ᐊᑏ ᑐᓴᕐᓕ.]”

¹⁷ ᔩᓱᓯ ᐃᒡᓗᒧᑦ ᐃᑎᕐᒪᑦ, ᐃᓄᐃᑦ ᕿᒪᒡᓗᒋᑦ, ᐃᓕᓐᓂᐊᕐᑎᖏᑕ ᐊᐱᕐᓱᕐᐹᑦ ᐊᑦᔨᐅᔪᑦ ᑐᑭᖏᓐᓂᒃ ᑐᑭᓯᓇᕐᓯᑎᑦᓯᖁᓪᓗᒍ.

¹⁸ ᐅᖃᐅᑎᕔᑦ, “ᐃᓕᑦᓯᑦᑕᐅᖅ ᑐᑭᓯᔪᓐᓇᓐᖏᓚᓰ? ᐃᓅᑉ ᓯᓚᑖᓂᑦ ᐱᔪᖅ ᐃᓅᑉ ᐃᓗᐊᓂᒃ ᐱᐅᔪᓐᓃᕐᑎᑦᓯᔪᓐᓇᓐᖏᓚᖅ,

¹⁹ ᐅᐱᓐᓇᕋᓂ ᐃᓅᑉ ᐃᓱᒪᖓᓄᐊᖏᓐᓇᒥ, ᐊᕿᐊᕈᖓᓄᐊᕐᐳᓪᓕ, ᐊᓂᓕᕆᓪᓗᑎᒃ ᐱᐅᓯᕐᒥᑐᑦ.” ᑕᒪᑐᒥᖓ ᔩᓱᓯ ᓇᓗᓁᕐᓯᕗᖅ ᓂᖀᑦ ᓂᕆᔭᐅᑦᑍᓕᔭᕆᐊᖃᖏᓐᓂᖏᓐᓂᒃ.

²⁰ ᐅᖃᕆᕗᖅ, “ᐃᓅᓪᓕ ᐃᓗᐊᓂᓐᖔᕐᑐᑦ ᑭᓯᒥ ᐃᓄᖕᒥᒃ ᐱᐅᔪᓐᓃᑎᑦᓯᕙᒃᑐᑐᕗᖅ.

²¹ ᐃᓅᑉ ᐃᓗᐊᓂᓐᖔᕐᑐᑦ, ᐃᓅᑉ ᐆᒻᒪᑎᖓᓂᑦ, ᐱᐅᖏᑦᑐᑦ ᐊᓂᕙᒃᐳᑦ, ᓄᓕᐊᕈᒪᓃᑦ, ᑎᒡᓕᒍᒪᓃᑦ, ᑐᖁᑦᓯᔪᒪᓃᑦ, ᐊᓯᓐᓂᐊᕐᓃᑦ,

²² ᐱᔪᒪᕕᒡᔪᐊᕐᓃᑦ, ᐱᐅᖏᑦᑐᓕᓃᑦ, ᓴᒡᓗᕿᑦᓯᔪᒪᓃᑦ, ᑲᓐᖑᓇᕐᑐᓕᖃᑎᖃᕐᓃᑦ, ᒥᖕᓂᒍᑦᔨᓃᑦ, ᒎᑎᒥᒃ ᒥᑕᐅᑎᖃᕐᓃᑦ, ᐱᐅᔪᕆᓃᑦ, ᓯᓔᑦᑑᓃᑦ,

²³ ᑕᒪᒃᑯᐊ ᑕᒪᑦᔭ ᑕᒪᕐᒥᒃ ᐱᐅᖏᑦᑐᑦ ᐃᓅᑉ ᐃᓗᐊᓂᑦ ᐊᓂᔪᑦ ᐃᓄᖕᒥᒃ ᐱᐅᔪᓐᓃᕐᑎᑦᓯᕙᒃᑐᑑᕗᑦ.”

ᐊᕐᓇᐅᑉ ᓮᕈᐱᓂᓯᐊᒥᐅᑕᐅᑉ ᐅᒃᐱᕐᓂᖓ

²⁴ ᑕᕝᕙᓐᖓᑦ ᐊᐅᓪᓚᕋᒥ ᐃᒡᓗᒐᓮᑦ ᑍᕆᐅᑉ ᓮᑐᓂᐅᓪᓗ ᖃᓂᒋᔮᓄᐊᕐᐳᖅ. ᐃᒡᓗᒧᑦ ᐃᑎᕋᒥ, ᖃᐅᔨᒪᔭᐅᔪᒪᓐᖏᓚᖅ ᑕᕝᕙᓃᓐᓂᕐᒥᓂᒃ; ᑭᓯᐊᓂᓕ ᐃᔨᕐᓯᒪᔪᓐᓇᓚᐅᓐᖏᓚᖅ.

²⁵ ᐊᕐᓇᖅ ᐸᓂᖃᕐᑐᖅ ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᔪᒥᒃ, ᑐᓴᕋᒥ, ᐃᑎᕐᐳᖅ ᐃᑎᒐᖏᓐᓄᑦ ᐹᒻᒪᒃᓗᓂ.

²⁶ ᐊᕐᓇᖅ ᒍᕇᑭᐅᕗᖅ, ᓮᕈᐱᓃᓯᐊᒥᑦ ᐱᓯᒪᔪᖅ ᓯᕆᐊᒦᑦᑐᒥ. ᐊᕐᓇᖅ ᕿᓄᓕᕐᐳᖅ ᐊᓂᕐᓂᕐᓗᒃ ᐸᓂᖕᒥᓂᑦ ᐊᓂᑎᑕᐅᖁᓪᓗᒍ.

²⁷ ᔩᓱᓯᐅᑉ ᐅᖃᐅᑎᕚ, “ᓯᕗᓪᓕᕐᒥᒃ ᕿᑐᕐᖎᑦ ᓂᕆᑎᑕᐅᖅᑳᕆᐊᖃᕐᐳᑦ, ᓈᒻᒪᖏᒻᒪᑦ ᕿᑐᕐᒊᑦ ᓂᕆᓂᐊᕐᑕᖏᓐᓂᒃ ᐊᕐᓵᕐᓗᒋᑦ ᕿᒻᒥᓄᓪᓗ ᐃᒋᓪᓗᒋᑦ.”

²⁸ ᐊᕐᓇᐅᑉ ᑭᐅᕚ, “ᐊᑕᓃᖅ ᓱᓕᕗᑎᑦ; ᑭᓯᐊᓂᓕ ᕿᒻᒥᑦ ᓵᑉ ᐊᑖᓂᑦ ᑲᑕᒐᕐᓂᑯᓂᒃ ᓂᕆᕙᒃᐳᑦ, ᕿᑐᕐᒊᑦ ᑲᑕᒐᕐᑕᖏᓐᓂᒃ.”

²⁹ ᐊᕐᓇᖅ ᐅᖃᐅᑎᕚ, “ᑕᒪᓐᓇ ᑭᒡᒍᓯᕆᔧᑦ ᐱᓪᓗᒍ ᐃᒡᓗᖕᓄᑦ ᐊᖏᕐᕋᓕᕆᑦ; ᐊᓂᕐᓂᕐᓗᒃ ᐸᓂᖕᓂᑦ ᐊᓂᓯᒪᓕᕐᒪᑦ.”

³⁰ ᐊᕐᓇᖅ ᐊᖏᕐᕋᕐᐳᖅ, ᐸᓂᓂ ᑕᑯᕚ ᐃᒡᓕᕐᒥ ᓇᓚᔪᖅ, ᐊᓂᕐᓂᕐᓗᒃ ᑖᑦᓱᒪᖓᑦ ᐊᓂᓯᒪᓕᕐᑐᖅ.

ᔩᓱᓯᐅᑉ ᑐᓵᖏᑦᑐᒥᒃ ᑐᓵᓕᕐᑎᑦᓯᓂᖓ

³¹ ᑕᕝᕙ ᓄᓇᐅᑉ ᑍᕆᐅᑉ ᖃᓂᒋᔭᖓᓂᑦ ᐊᐅᓪᓚᕐᐳᖅ, ᓮᑐᓂ ᐊᖅᑯᓵᕐᓗᒍ ᑕᓯᕐᔪᐊᒧᐊᕐᐳᑦ ᒐᓕᓕᐊᑉ ᒥᒃᓵᓃᑦᑐᒧᑦ, ᓄᓇᓖᑦ ᑎᑲᐳᓖᓯᑦ ᖁᓕᓂᒃ ᐃᒡᓗᒐᓴᒡᔪᐊᓕᖕᓂᒃ ᑍᔭᐅᔪᑦ ᓄᓇᖓᓄᑦ.

³² ᐋᑦᓯᕕᐅᕗᖅ ᑐᓵᓇᓂ ᐅᖃᕈᓐᓇᖏᑦᑐᒥᒃ; ᔩᓱᓯ ᕿᓄᕕᒋᕚᑦ ᐸᑎᒻᒥᓯᖁᓪᓗᒍ ᑖᑦᓱᒥᖓ.

³³ ᐃᓄᒐᓴᒡᔪᐊᓂᑦ ᕿᒪᕉᑎᑎᓪᓗᒍ ᐃᓄᑑᖃᑎᒋᓕᕐᐹ, ᐊᒡᒐᓂ ᓯᐅᑎᖕᒐᓄᐊᕐᐰᑦ, ᐊᒡᒐᖕᒥᓄᑦ ᑎᕗᐊᓚᐅᕐᓗᓂ, ᐅᖃᖓ ᐊᒃᑐᕐᐹ;

³⁴ ᕿᓚᖕᒧᑦ ᐋᕐᓗᕐᐳᖅ, ᐊᓂᕐᓴᐅᒥᓪᓗᓂ, ᐊᖑᒻᒧᑦ ᐅᖃᕐᐳᖅ, “ᐃᐸᐸᑕ,” ᐃᒫᒃ ᑐᑭᓕᒃ, “ᐊᖕᒪᕆᑦ.”

³⁵ ᓯᐅᑎᖏᒃ ᑕᕝᕔᓐᓇᖅ ᑐᓵᔪᓐᓇᓕᕐᐴᒃ, ᐅᖃᖓᑕ ᐅᖃᕈᓐᓇᖏᑦᔪᑎᖓ ᐲᕐᐳᖅ, ᐅᖃᕈᓐᓇᓯᐊᓕᕐᓗᓂ.

³⁶ ᔩᓱᓯᐅᑉ ᐃᓄᐃᑦ ᐃᓂᕐᑎᕐᐰᑦ ᑭᓇᑐᐃᓐᓇᒧᑦ ᐅᖃᐅᓯᖃᖁᓇᒋᑦ; ᐃᓂᕐᑎᕋᓗᐊᕐᒪᒋᑦ ᑲᑦᓱᖕᒊᓪᓗᑎᒃ ᐅᖃᐅᓯᖃᓕᒃᑲᓐᓂᑐᐃᓐᓇᕐᐳᑦ.

³⁷ ᑕᒪᑐᒥᖓ ᑐᓴᕐᑐᑦ ᑲᒪᒻᒪᕆᒃᐳᑦ ᐅᖃᕈᓐᓇᕐᑕᖏᑕ ᐅᖓᑖᓄᑦ, ᐅᖃᕐᓗᑎᒃ, “ᖃᓄᐊᓗᖏᓐᓇ ᓱᓇᑐᐃᓐᓇᕐᓂᒃ ᐊᔪᓐᖏᓚᖅ; ᐊᒡᓛᑦ ᑐᓵᖏᑦᑐᑦ ᑐᓴᓕᕐᑎᑉᐰᑦ ᐅᖃᕈᓐᓇᖏᑦᑐᓪᓗ ᐅᖃᕈᓐᓇᕐᓯᑎᓪᖢᒋᑦ.”