ᒫᑯᓯᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑦᔨᐅᔪᖅ ᑲᓐᖓᕐᓱᐃᔪᖅ

¹ ᑭᖑᓂᖓᒍᑦ ᒐᓕᓕᐊᑉ ᑕᓯᕐᔪᐊᖓᑕ ᓴᓂᐊᓂ ᐊᔪᕆᕐᑐᐃᓕᕆᕗᖅ. ᐃᓄᒋᐊᒃᑐᕐᔪᐊᑦ ᐊᕙᑖᓂ ᐅᓄᓗᐊᕐᓂᖏᓐᓄᑦ ᐅᒥᐊᒧᐊᕐᐳᖅ, ᑕᕝᕙᓂ ᐃᒃᓯᕙᓕᕐᐳᖅ ᐅᒥᐊᒥ ᐃᒫᓃᑦᑐᒥ, ᐃᓄᒋᐊᒃᑐᕐᔪᐊᓪᓗ ᑕᓯᐅᑉ ᓯᓈᓃᑉᐳᑦ.

² ᐊᑦᔨᐅᔪᓂ ᐊᑐᕐᓗᓂ ᐊᒥᓱᓂᒃ ᐊᔪᕆᕐᑐᕐᐰᑦ; ᐃᒫᒃ ᐅᖃᕐᕕᒋᓪᓗᒋᑦ:

³ “ᓈᓚᒋᑦᓯ! ᐊᖑᑎᑕᖃᓚᐅᕐᐳᖅ ᑲᓐᖓᕐᓱᐃᔭᕐᑐᕐᑐᒥᒃ ᐱᕈᕐᓯᐊᒃᓴᓂᒃ.

⁴ ᑲᓐᖓᕐᓱᐃᑎᓪᓗᒍ, ᐃᓚᖏᑦ ᐱᕈᕐᓯᐊᒃᓮᑦ ᐊᖅᑯᒻᒧᑦ ᑲᑕᒃᐳᑦ, ᑎᖕᒥᐊᑦ ᑕᒪᐅᓐᖓᕋᒥᒃ ᐳᑯᓕᕐᐰᑦ.

⁵ ᐃᓚᖏᓪᓕ ᑲᑕᒃᐳᑦ ᐅᔭᕋᓛᓄᑦ ᐃᑦᔪᑭᑦᑐᒧᑦ, ᐃᑦᔪᑭᑦᑐᒦᓇᒥᒃ ᐱᕈᕐᓯᐊᒃᓮᑦ ᐱᕈᑲᐅᕐᑐᕐᐳᑦ.

⁶ ᓯᕿᓂᖅ ᓄᐃᖕᒪᑦ ᐱᕈᓕᓵᕐᑐᑦ ᐆᑕᐅᕗᑦ ᓯᕿᓂᕐᒧᑦ; ᐱᕈᕐᑐᑦ ᐊᒫᑭᓗᐊᕋᒥᒃ ᐊᑯᓂᐅᖏᑦᑐᖅ ᐸᓂᕐᐳᑦ.

⁷ ᐃᓚᖏᓪᓕ ᐱᕈᕐᓯᐊᒃᓮᑦ ᑲᑕᒃᐳᑦ ᐅᕐᐲᑦ ᑲᑭᓪᓚᕐᓇᕐᑐᓖᑦ ᐊᑯᕐᖓᓐᓄᑦ, ᑲᑭᓪᓚᕐᓇᕐᑐᑦ ᐱᕈᕋᒥᒃ ᐱᕈᕐᑐᑦ ᐃᐱᑎᑉᐰᑦ, ᐱᕈᕐᕕᐅᔪᓐᓃᕐᖢᑎᒃ.

⁸ ᐃᓚᖏᑦ ᐱᕈᕐᓯᐊᒃᓮᑦ ᑲᑕᒃᐳᑦ ᐃᑦᔪᖃᑦᓯᐊᕐᑐᒧᑦ, ᑖᒃᑯᐊ ᐱᕈᐸᓕᐊᓕᕋᒥᒃ, ᐃᓚᖏᑦ ᐱᕈᕐᕕᐅᓪᓗᑎᒃ 30ᓂᒃ, ᐃᓚᖏᓪᓗ 60ᓂᒃ, ᐃᓚᖏᓪᓗ 100ᓂᒃ.”

⁹ ᐅᖃᕆᕗᖅ, “ᑐᓵᔪᓂᒃ ᓯᐅᑎᓖᑦ ᑐᓴᕐᓕᑦ.”

ᐊᑦᔨᐅᔪᑦ ᑖᒃᑯᐊ ᐅᖃᐅᓯᕆᔭᐅᑦᔪᑎᖏᑦ

¹⁰ ᐃᓄᑑᓕᕐᒪᑦ, ᐃᓚᖏᑦ ᐅᖃᓪᓚᒃᑎᓪᓗᒍ ᑐᓵᖅᑲᐅᔪᑦ ᔩᓱᓯᒧᐊᕐᐳᑦ ᐃᓕᓐᓂᐊᕐᑎᖏᑦ 12 ᐃᓚᒋᓪᓗᒋᑦ, ᐊᐱᕆᓪᓗᑎᒃ ᐊᑦᔨᐅᔪᒥᒃ ᑖᑦᓱᒥᖓ ᑐᑭᓯᓇᕐᓯᑎᑦᓯᖁᓪᓗᒍ.

¹¹ ᑭᐅᕔᑦ, “ᐃᓕᑦᓯ ᓇᓗᓇᕐᑐᒥᒃ ᖃᐅᔨᑎᑕᐅᕗᓯ ᒎᑎᐅᑉ ᐊᑕᓂᐅᕕᖓᓂᒃ, ᐊᓯᓯᓕ ᒎᑎᐅᑉ ᐊᑕᓂᐅᕕᖓᑕ ᓯᓚᑖᓃᑦᑐᑦ ᑐᓴᕐᑎᑕᐅᕗᑦ ᐊᑦᔨᐅᔪᑎᒍᑦ;

¹² ᑍᒪ, ‘ᐃᔨᒥᖕᓄᑦ ᑕᑯᒐᓗᐊᕐᓗᑎᒃ, ᐃᓕᑕᕐᓯᖁᓇᒋᑦ, ᓯᐅᑎᒥᖕᓄᓪᓗ ᑐᓵᒐᓗᐊᕐᓗᑎᒃ, ᑐᑭᓯᖁᓇᒋᑦ; ᑍᒤᓐᖏᒃᑯᑎᒃ ᒎᑎᒧᑦ ᓵᒋᐊᕋᔭᕐᒪᑕ, ᑖᑦᓱᒪ ᐃᓱᒪᒋᔪᓐᓁᕐᕕᒋᒐᔭᕐᒪᒋᑦ ᐊᔪᕐᓂᖏᓐᓂᑦ.’”

ᔩᓱᓯᐅᑉ ᑐᑭᓯᓇᕐᓯᑎᑦᓯᓂᖓ ᑲᓐᖓᕐᓱᐃᔫᑉ ᐊᑦᔨᐅᑎᑕᐅᓂᖓᓂᒃ

¹³ ᔩᓱᓯᐅᑉ ᐅᖃᐅᑎᕔᑦ, “ᑕᒪᑐᒥᖓ ᐊᑦᔨᐅᔪᒥᒃ ᑐᑭᓯᓐᖏᓚᓰ? ᖃᓄᕐᓕ ᑕᕝᕙ ᐊᑦᔨᐅᔪᓂᒃ ᓇᓕᐊᓐᓂᑐᐃᓐᓇᖅ ᑐᑭᓯᔪᓐᓇᕐᓂᐊᕐᐱᓰ?

¹⁴ ᑲᓐᖓᕐᓱᐃᔨ ᑲᓐᖓᕐᓱᐃᕗᖅ ᒎᑎᐅᑉ ᐅᖃᐅᓯᖏᓐᓂᒃ.

¹⁵ ᐃᓄᐃᑦ ᐃᓚᖏᑦ ᐱᕈᕐᓯᐊᒃᓴᑎᑐᑦ ᐊᖅᑯᑎᒧᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ, ᐅᖃᐅᓯᕐᓂᒃ ᑐᓴᕐᒪᑕ, ᓵᑖᓇᓯᐅᑉ ᑕᕝᕙ ᐅᐸᑦᑕᐅᑎᒋᕔᑦ ᐅᖃᐅᓰᑦ ᑖᒃᑯᓄᖓ ᑲᓐᖓᕐᓲᑎᒋᔭᐅᔪᑦ ᐲᔭᕐᐰᑦ.

¹⁶ ᐃᓚᖏᑦ ᐃᓄᐃᑦ ᐱᕈᕐᓯᐊᒃᓴᑎᑐᑦ ᐅᔭᕋᓛᓄᑦ ᓄᓇᑭᑦᑐᒧᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ, ᐅᖃᐅᓯᕐᓂᒃ ᑐᓴᕋᒥᒃ, ᑕᕝᕔᓐᓇᖅ ᐃᓚᓕᐅᕆᕗᑦ ᖁᕕᐊᓱᒡᓗᑎᒃ;

¹⁷ ᐅᖃᐅᓰᑦ ᐊᒫᕐᑖᖏᓐᓇᒥᒃ, ᑲᔪᓯᓂᖃᕐᐳᑦ ᓯᕕᑭᑦᑐᒥᒃ; ᐅᖁᒤᑦᑐᑦ ᐊᑭᕋᕐᑐᕐᑕᐅᓃᓪᓗ ᐱᒋᐊᓕᕐᒪᑕ ᐅᖃᐅᓰᑦ ᐱᑦᔪᑎᒋᓪᓗᒋᑦ, ᑕᕝᕔᓐᓇᖅ ᓴᐱᓕᑲᐅᑎᒋᕗᑦ.

¹⁸ ᐃᓚᖏᑦ ᐃᓄᐃᑦ ᐱᕈᕐᓯᐊᒃᓴᑎᑐᑦ ᐅᕐᐱᖕᓄᑦ ᑲᑭᓪᓚᕐᓇᕐᑐᓕᖕᓄᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ; ᑖᒃᑯᐊᖑᕗᑦ ᐅᖃᐅᓯᕐᓂᒃ ᑐᓴᕐᑐᑦ,

¹⁹ ᐃᓅᓯᐅᑉ ᑕᒪᑐᒪ ᐃᓱᒪᔮᕐᓇᕐᓂᖓᓄᑦ, ᐊᔪᕐᓴᖏᑦᑐᒪᓂᕐᒧᓪᓗ, ᐊᓯᖏᓐᓄᓪᓗ ᐱᔪᒪᕕᒃᔪᐊᕐᓂᕐᓄᑦ ᑎᑭᕝᕕᐅᓕᕋᒥᒃ ᐅᖃᐅᓰᑦ ᐃᐱᑎᑕᐅᕗᑦ ᑕᒪᒃᑯᓄᖓ, ᐱᕈᕐᕕᐅᔪᓐᓇᕐᓯᓇᑎᒃ.

²⁰ ᐃᓚᖏᓪᓕ ᐃᓄᐃᑦ ᐱᕈᕐᓯᐊᒃᓴᑎᑐᑦ ᐃᑦᔪᖃᑦᓯᐊᕐᑐᒧᑦ ᑲᓐᖓᕐᓲᑎᒋᔭᐅᔪᑎᑐᑦ ᑍᒤᑉᐳᑦ; ᑖᒃᑯᐊᖑᕗᑦ ᐅᖃᐅᓯᕐᓂᒃ ᑐᓴᕋᒥᒃ ᐃᓚᓕᐅᕆᔪᑦ ᐱᕈᕐᕕᐅᓕᕐᓗᑎᒃ, ᐃᓚᖏᑦ 30ᓂᒃ, ᐃᓚᖏᓪᓗ 60ᓂᒃ, ᐃᓚᖏᓪᓗ 100ᓂᒃ.”

ᓇᓂᕈᐊᖅ ᖃᑦᑕᐅᔭᐅᑉ ᐊᑖᓃᑦᑐᖅ

²¹ ᔩᓱᓯᐅᑉ ᐅᖃᐅᑎᕔᑦ, “ᓇᓂᕈᐊᕐᒥᒃ ᐃᑎᕐᓯᔪᖃᓲᖑᕚ ᐃᓕᓪᓗᒍ ᖃᑦᑕᐅᔭᐅᑉ ᐊᑖᓄᑦ, ᐅᕝᕙᓗ ᓯᓂᒃᕕᐅᑉ ᐊᑖᓄᑦ ᓇᓂᕈᐊᑉ ᐃᓂᖓᓄᐊᕐᑕᐅᒐᔭᓐᖏᓛᖅ?

²² ᐃᔨᕐᑕᐅᓯᒪᔪᖅ ᓴᖅᑭᑎᑕᐅᔪᒫᕐᐳᖅ ᐃᔨᕐᕕᖃᖏᑦᑐᒧᑦ; ᐊᓐᖏᐊᕆᔭᐅᔪᖅ ᓴᖅᑭᑎᑕᐅᔪᒫᐳᖅ ᖃᐅᒪᔪᒧᑦ.

²³ ᑐᓵᔪᓂᒃ ᓯᐅᑎᓕᒃ, ᑐᓴᕐᓕ.”

²⁴ ᐅᖃᐅᑎᕔᑦ, “ᑐᓴᕐᑕᑦᓯᓐᓂᒃ ᐃᒃᐱᒍᓱᑦᓯᐊᕆᑦᓯ; ᐊᓯᑦᓯᓐᓄᑦ ᐃᖅᑲᕐᑐᐃᓂᓯ ᒪᓕᒡᓗᒍ ᒎᑎᒧᑦ ᐃᖅᑲᕐᑐᕐᑕᐅᔪᒫᕆᕗᓯ, ᐊᒡᓛᑦ ᖃᐅᔨᓴᕐᑕᐅᒻᒪᕆᖕᓂᕐᓴᐅᓗᓯ.

²⁵ ᐱᖃᕐᑐᖅ ᑐᓂᓯᕕᐅᒃᑲᓐᓂᕐᓂᐊᕐᐳᖅ; ᐱᖃᖏᑦᑐᕐᓕ ᐊᕐᓵᕐᑕᐅᓂᐊᕐᐳᖅ ᒥᑭᔪᒥᒡᓘᓐᓃᑦ ᐱᖃᕋᓗᐊᕐᐸᑦ.”

ᐊᑦᔨᐅᔪᖅ ᐱᕈᕐᓯᐊᒃᓴᐅᑉ ᐱᕈᕐᐸᓪᓕᐊᓂᖓ

²⁶ ᐅᖃᕆᕗᖅ, “ᒎᑎᐅᑉ ᐊᑕᓂᐅᕕᖓ ᐃᒤᑦᑑᔮᕐᐳᖅ ᐊᖑᑦ ᐱᕈᕐᓯᐊᒃᓮᑦ ᑲᓐᖓᕐᓲᑎᒃᓴᖓᓂᒃ ᑲᓐᖓᕐᓱᐃᔪᖅ ᐱᕈᕐᓰᕕᖁᑎᒥᓂ,

²⁷ ᐅᓐᓄᐊᖑᓕᕐᒪᑦ ᓯᓂᓕᕐᐳᖅ ᒪᑭᓪᓗᓂᓗ ᐅᓪᓛᒃᑯᑦ, ᐱᕈᕐᓯᐊᒃᓮᑦ ᑲᓐᖓᕐᓲᑎᒋᓯᒪᔭᖏᑦ ᓄᐃᓕᕐᐳᑦ ᐱᕈᓕᕐᓗᑎᒃ, ᑖᓐᓇ ᖃᐅᔨᒪᓐᖏᓚᖅ ᖃᓄᖅ ᐱᖕᒪᖔᑕ.

²⁸ ᓄᓇᕐᔪᐊᑉ ᑕᒪᑐᒪ ᓇᖕᒥᓂᖅ ᓂᕆᑎᒻᒪᒋᑦ ᐱᕈᕐᑎᓪᓗᓂᒋᓪᓗ, ᐱᕈᕐᑐᑦ ᐱᕈᕐᕕᐅᓕᕐᐳᑦ, ᓯᕗᓪᓕᕐᒥᒃ ᐱᕈᓯᒐᒥᒃ ᓄᐃᓕᕐᐳᑦ, ᑭᖑᓂᖓᒍᑦ ᓂᐊᖁᕐᑖᓯᕗᑦ, ᑭᖑᓪᓕᕐᐹᒥᒃ ᓂᐊᖁᖏᑦ ᐱᕈᕐᓯᐊᒃᓴᖃᓕᕐᐳᑦ.

²⁹ ᐱᕈᕐᑐᑦ ᐱᕈᕇᑦᓯᐊᕐᒪᑕ, ᐊᖑᑎᐅᑉ ᓇᑲᑎᓕᕐᐰᑦ ᓇᑲᑎᕆᑦᔪᑎᒥᓄᑦ, ᐱᕈᕐᑐᓂᒃ ᑲᑎᕐᓱᐃᕕᒃ ᓇᓪᓕᐅᑎᖕᒪᑦ.”

ᐊᑦᔨᐅᔪᖅ ᐱᕈᕐᓯᐊᑉ ᑲᓐᖓᕐᓲᑎᒃᓴᕐᑕᖓ

³⁰ ᐅᖃᕆᕗᖅ, “ᖃᓄᕐᓕ ᒎᑎᐅᑉ ᐊᑕᓂᐅᕕᖓ ᐊᑦᔨᖃᕐᓂᕋᕈᓐᓇᕐᐸᕗᑦ ᓱᓇᒥᒡᓗ ᐊᑦᔨᐅᔪᒥᒃ ᐊᑐᕈᓐᓇᕐᐱᑕ?

³¹ ᐃᒤᑦᑑᔭᕐᐳᖅ; ᐊᖑᑦ ᐱᕈᕐᓯᐊᒃᓴᐅᑉ ᑲᓐᖓᕐᓲᑎᒃᓴᕐᑕᖓᓂᒃ ᒪᓯᑕᕐᑦᒥᒃ ᑎᒍᓯᒐᒥ ᓄᓇᒧᑦ ᑲᓐᖓᕐᓲᑎᒋᕚ, ᑖᓐᓇ ᓄᓇᕐᔪᐊᕐᒥ ᐱᕈᕐᓯᐊᒃᓴᓂᑦ ᒥᑭᓐᓂᕐᐸᐅᕗᖅ;

³² ᑭᖑᓂᖓᒍᑦ ᑖᓐᓇ ᑲᓐᖓᕐᓲᑕᐅᒐᒥ ᐱᕈᕐᐸᓪᓕᐊᓯᕗᖅ ᐱᕈᕐᑐᓕᒫᓂᑦ ᐊᖏᓂᕐᐸᐅᓕᕐᓗᓂ, ᐊᕙᓚᖓᔪᖏᑦ ᐊᖏᒡᓕᕐᒪᑕ, ᑎᖕᒥᐊᑦ ᑕᕝᕙᓂ ᐅᓪᓗᖃᕈᓐᓇᓕᕐᐳᑦ ᑕᕐᕋᓕᓂᖓᓂ.”

³³ ᐃᓄᖕᓂᒃ ᐊᔪᕆᕐᑐᐃᕗᖅ ᐊᑦᔨᐅᔪᓂᒃ ᐊᑐᕐᓗᓂ, ᐊᑦᔨᐅᔪᑦ ᑖᒃᑯᐊ ᐊᓯᖏᓐᓂᒃ ᐊᒥᓱᓂᒃ ᐊᔪᕆᕐᑐᐃᑦᔪᑎᖃᕆᕗᖅ, ᐅᖃᓪᓚᒡᕕᒋᕔᑦ ᑐᑭᓯᔪᓐᓇᕐᑕᖏᑎᒍᑦ;

³⁴ ᐊᑦᔨᐅᔪᑦ ᐊᓯᐊᒍᑦ ᐅᖃᓪᓚᒃᕕᒋᓐᖏᓔᑦ, ᐃᓕᓐᓂᐊᕐᑎᓂ ᐃᓚᑐᐊᕆᓕᕌᖓᒥᒋᑦ, ᐅᖃᐅᓯᕆᖅᑲᐅᔭᒥᓂᒃ ᐊᑦᔨᐅᔪᓂᒃ ᑕᒤᓐᓂᒃ ᓇᓗᓁᕐᓯᕕᒋᖃᑦᑕᕐᐰᑦ.

ᔩᓱᓯᐅᑉ ᐃᑯᓪᓚᕐᑎᑦᓯᓂᖓ ᐊᓄᕆᒥᒃ

³⁵ ᐅᓪᓗᒥ ᑕᕝᕙᓂ ᐅᓐᓄᖕᒪᑦ, ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᑕᓯᐅᑉ ᐊᑭᐊᓄᐊᓚᐅᕐᑕ.”

³⁶ ᐃᓄᒋᐊᒃᑐᕐᔪᐊᑦ ᕿᒪᒃᓗᒋᑦ, ᐃᓕᓐᓂᐊᕐᑎᖏᑦ ᐅᒥᐊᒧᐊᕐᐳᑦ ᔩᓱᓯᐅᑉ ᐃᒃᓯᕙᕕᒋᔭᖓᓄᑦ. ᐅᒥᐊᖑᖃᑎᖏᑦᑕᐅᖅ ᒪᓕᒃᑭᕗᑦ.

³⁷ ᐊᓄᕆᕐᔪᐊᕐᒧᑦ ᑎᑭᑕᐅᕗᑦ, ᒪᓪᓕᓕᕐᑐᐊᓘᖕᒪᑦ ᐅᒥᐊᖅ ᖃᓪᓕᕋᕐᑕᕐᑕᐅᓕᕐᒪᑦ, ᐃᒻᒪᒃᐸᓪᓕᐊᓕᕐᓗᓂ.

³⁸ ᔩᓱᓯ ᐅᒥᐊᑉ ᐊᖁᐊᓂ ᓯᓂᒃᐳᖅ, ᐊᑭᓯᕐᓯᒪᓪᓗᓂ; ᐃᓕᓐᓂᐊᕐᑎᖏᑕ ᑐᐹᕐᓗᒍ ᐅᖃᐅᑎᕚᑦ, “ᐊᔪᕆᕐᑐᐃᔩ ᖃᓄᐃᒃᓴᓐᖏᓚᑏᑦ ᑐᖁᑐᐃᓐᓇᕋᓗᐊᕈᑦᑕ?”

³⁹ ᑐᐸᒐᒥ ᐊᓄᕆ ᐃᓂᕐᑎᕐᐹ, ᐃᒪᕐᒧᑦ ᐅᖃᕐᐳᖅ, “ᐃᑯᓪᓚᕐᓗᑎᑦ ᓄᖅᑲᕆᑦ!” ᐊᓄᕆ ᐃᑯᓪᓚᕐᐳᖅ, ᐃᒪᖅ ᐃᑯᓪᓕᐊᒻᒪᕆᓕᕐᓗᓂ.

⁴⁰ ᐃᓕᓐᓂᐊᕐᑎᓂ ᐅᖃᐅᑎᕔᑦ, “ᓱᖕᒪᑦ ᑲᑉᐱᐊᓱᒃᐱᓯ? ᓱᓕ ᐅᒃᐱᕐᓂᖃᓐᖏᓚᓰ?”

⁴¹ ᑖᒃᑯᐊ ᑲᒪᕗᑦ ᐊᖏᔪᒥᒃ, ᐃᒻᒥᖕᓄᑦ ᐅᖃᖃᑦᑕᐅᑎᓪᓗᑎᒃ, “ᖃᓄᐃᑦᑑᒐᒥᐅᓇ, ᐊᓄᕆᐅᑉ ᐃᒪᐅᓪᓗ ᓈᓚᒍᓐᓇᕐᑕᖓ!”