ᒫᑯᓯᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖑᑎᐅᑉ ᑕᓕᖓ ᓄᑭᖃᖏᑦᑐᖅ

¹ ᑭᖑᓂᖓᒍᑦ ᔩᓱᓯ ᐅᑎᕆᕗᖅ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓄᑦ, ᑕᕝᕙᓃᑦᑐᖃᕐᐳᕐᓗ ᐊᖑᒻᒥᒃ ᐊᒡᒐᖃᕐᑐᖅ ᓄᑭᖃᖏᑦᑐᒥᒃ.

² ᐃᓄᐃᑦ ᑕᕝᕙᓃᓚᐅᕆᕗᑦ ᖃᐅᔨᓴᕆᐊᕐᓯᒪᓪᓗᑎᒃ ᐊᖑᑦ ᓴᐸᑎᒥ ᐋᖅᑭᖕᓂᐊᕐᒪᖔᒍ, ᐸᓯᒃᖠᕈᑎᒃᓴᕐᓯᐅᕐᓗᑎᒃ.

³ ᐊᖑᑦ ᐊᒡᒐᓕᒃ ᓄᑭᖃᖏᑦᑐᓂᒃ ᐅᖃᐅᑎᕚ, “ᒪᐅᖓ ᕾᒋᑦ.”

⁴ ᐃᓄᐃᑦ ᐅᖃᐅᑎᕔᑦ, “ᐱᖁᔭᕗᑦ ᓴᐸᑎᒥ ᐃᑲᔪᖁᔨᕚᑦ ᐋᓐᓂᕐᓯᖁᔨᕙᓪᓘᓐᓃᑦ? ᐃᓅᓯᕐᒥᒃ ᓴᐳᑦᔨᖁᔨᕚᑦ ᑐᖁᑦᓯᖁᔨᕙᓪᓘᓐᓃᑦ?” ᐃᓄᐃᓪᓕ ᓂᓪᓕᕐᑐᖃᓐᖏᓚᑦ.

⁵ ᐊᕙᑎᒥᓃᑦᑐᑦ ᑕᑯᓴᕐᐰᑦ ᐊᑲᐅᒃᓴᕈᓐᓃᕐᓗᓂ, ᕿᒃᓵᒍᑎᒋᓪᓗᒋᑦ ᐆᒻᒪᑎᖏᑦ ᓯᑎᔪᐊᓘᖕᒪᑕ, ᐊᖑᒻᒧᑦ ᐅᖃᕐᐳᖅ, “ᐊᒡᒐᑎᑦ ᐃᓵᓚᐅᒃᑭᑦ.” ᑕᕝᕙ ᐃᓵᒃᐰᑦ, ᐋᖅᑭᑦᓯᐊᕐᓗᑎᒃ ᖃᓄᐃᖏᑦᔪᓯᕕᓂᕐᒥᒃᑐᑦ.

⁶ ᑕᕝᕙ ᐹᕆᓯᑦ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖓᓐᓂᑦ ᐊᓂᒐᒥᒃ ᐃᕉᑕᓯᐅᑉ ᐃᑲᔪᕐᑎᖏᓐᓂᒃ ᐃᓚᖃᕐᓗᑎᒃ ᑲᑎᕗᑦ, ᖃᓄᖅ ᑐᖁᑦᓯᔪᓇᖔᕐᒥ ᔩᓱᓯᒥᒃ.

ᔩᓱᓯᐅᑉ ᐊᔪᕆᕐᑐᐃᓂᖓ ᑕᓯᐅᑉ ᓯᓈᓂ ᐃᓄᒋᐊᒃᑐᕐᔪᐊᓄᑦ

⁷ ᔩᓱᓯ ᐃᓕᓐᓂᐊᕐᑎᖏᓪᓗ ᒐᓕᓕᐊᒧᑦ ᑕᓯᕐᔪᐊᒧᐊᓕᕐᐳᑦ, ᐃᓄᒋᐊᒃᑐᕐᔪᐊᓂᑦ ᒪᓕᒃᑕᐅᓪᓗᑎᒃ ᒐᓕᓕᐊᒥᓐᖔᕐᑐᓂᑦ; ᔫᑎᐊᒥᓐᖔᕐᑐᓂᓪᓗ,

⁸ ᔨᕉᓴᓕᒻᒥᓐᖔᕐᑐᓂᓪᓗ, ᐂᑐᒥᐊᒥᓪᓗ, ᔪᐊᕐᑕᓂᐅᓪᓗ ᐊᑭᐊᓂᓐᖔᕐᑐᓂᑦ, ᐃᒡᓗᒐᓴᒡᔪᐊᓂᓪᓗ ᑍᕆᒥ ᓮᑐᓂᒥᓪᓗ, ᑕᒪᕐᒥᒃ ᔩᓱᓯᒧᐊᓚᐅᕐᐳᑦ ᑐᓴᓚᐅᕋᒥᒃ ᑖᑦᓱᒪ ᐱᓇᓱᐊᕐᓂᕆᓚᐅᕐᑕᖏᓐᓂᒃ.

⁹ ᐃᓕᓐᓂᐊᕐᑎᓂ ᐅᒥᐊᒥᒃ ᐊᑐᐃᓐᓇᕈᐃᖁᓪᓗᒋᑦ ᐅᖃᐅᑎᕔᑦ ᐊᑐᕐᓂᐊᕐᑕᒥᓂᒃ, ᑕᓯᕐᒧᑦ ᐃᓄᖕᓂᑦ ᓯᖏᑕᐅᓂᐊᕋᓱᒋᓪᓗᓂ.

¹⁰ ᐃᓄᖕᓂᒃ ᐊᒥᓱᓂᒃ ᖃᓂᒪᔪᓂᒃ ᐋᖅᑭᒃᓯᓚᐅᕐᒪᑦ, ᑍᒤᒻᒪᑦ ᖃᓂᒪᔪᑦ ᐃᓄᖕᓂᒃ ᐱᖑᔧᓪᓗᑎᒃ ᔩᓱᓯᒧᐊᕋᓱᐊᕐᐳᑦ ᐊᒃᑐᕈᒪᓪᓗᓂᑦᔪᒃ.

¹¹ ᐃᓄᐃᑦ ᐊᓂᕐᓂᕐᓗᑕᐅᓯᒪᔪᑦ ᑖᑦᓱᒥᖓ ᑕᑯᔭᕌᖓᒥᒃ, ᐹᒻᒪᖃᑦᑕᕐᐳᑦ ᕾᒐᓛᓕᕐᓗᑎᒃ, “ᒎᑎᐅᑉ ᐃᕐᓂᕆᕚᑎᑦ.”

¹² ᔩᓱᓯᐅᑉ ᐊᓂᕐᓂᕐᓗᐃᑦ ᐃᓂᕐᑎᕐᐰᑦ ᐃᓄᖕᓄᑦ ᐅᖃᐅᓯᐅᔪᒪᓇᓂ ᑭᓇᐅᓂᕐᒥᓂᒃ.

ᔩᓱᓯᐅᑉ ᓂᕈᐊᕐᓂᖓ ᐋᐴᓯᑕᓕᖕᓂᒃ 12ᓂᒃ

¹³ ᑭᖑᓂᖓᒍᑦ ᔩᓱᓯ ᖃᖅᑲᒧᑦ ᒪᔪᐊᕐᐳᖅ, ᐊᖑᑎᓂᒃ ᕾᖁᔨᓪᓗᓂ ᓂᕈᐊᕐᑕᒥᓂᒃ; ᑖᒃᑯᐊ ᔩᓱᓯᒧᐊᕐᐳᑦ,

¹⁴ ᑕᕝᕙ 12 ᓂᕈᐊᕐᐰᑦ, ᓇᔪᕐᑎᒌᓐᓇᕈᒪᓪᓗᒋᑦ, ᑎᓕᔪᒪᓪᓗᒋᑦ ᐊᔪᕆᕐᑐᐃᔭᕐᑐᖁᓪᓗᒋᑦ,

¹⁵ ᐱᔪᓐᓇᕐᓂᖃᖁᓪᓗᒋᑦ ᐊᓂᕐᓂᕐᓗᖕᓂᒃ ᐊᓂᑎᑦᓯᓂᕐᒥᒃ:

¹⁶ ᓮᒨᓂ ᔩᓱᓯᐅᑉ ᐊᑦᑎᕐᐹ ᐲᑦᑐᕉᓯᒥᒃ;

¹⁷ ᔧᒥᓯᑯᒃ ᔪᐊᓇᓯᑯᒃ ᓄᑲᕇᒃ ᓯᐱᑎᐅᑉ ᐃᕐᓂᖏᒃ, ᔩᓱᓯᐅᑉ ᐊᑎᕐᑖᕐᑎᓚᐅᐹᒃ ᐳᐊᓂᒌᓯᓂᒃ, ᐃᒫᒃ ᑐᑭᓕᒃ, “ᑲᓪᓘᑉ ᐃᕐᓂᖏᒃ”;

¹⁸ ᐋᓐᑐᕉᓗ, ᐱᓕᑉᐴᓯᓗ, ᐸᑎᐅᓗᒥᐅᓗ, ᒫᑎᐅᓯᓗ, ᑑᒪᓯᓗ, ᔧᒥᓯᓗ ᐊᐅᓪᐱᐊᓯᐅᑉ ᐃᕐᓂᖓ, ᑖᑎᐊᓯᓗ, ᓮᒨᓂᓗ ᑬᓇᓂᒥᐅᖅ,

¹⁹ ᔫᑕᓯᓗ ᐃᔅᑲᕆᐊᑦ, ᑖᓐᓇ ᔩᓱᓯᒥᒃ ᐱᔭᐅᑎᑦᓯᓚᐅᕐᑐᖅ.

ᔩᓱᓯᐅᑉ ᐱᐅᓪᓯᐹᐱᒥᒃ ᐃᓗᒻᒥᕐᑕᐅᓯᒪᓂᕋᕐᑕᐅᓂᖓ

²⁰ ᑭᖑᓂᖓᒍᑦ ᔩᓱᓯ ᐊᖏᕐᕋᕐᐳᖅ; ᐃᓄᒐᓴᒡᔪᐊᑦ ᐊᒻᒪ ᑲᑎᓕᕆᕗᑦ, ᐊᒡᓛᑦ ᔩᓱᓯ ᐃᓕᓐᓂᐊᕐᑎᖏᓪᓗ ᓂᕆᔪᓐᓇᕈᓐᓃᕐᐳᑦ.

²¹ ᐃᓚᖏᑦ ᓇᖕᒥᓂᖏᑦ ᑕᒪᑐᒥᖓ ᑐᓴᕋᒥᒃ, ᐅᐸᒍᑎᕗᑦ ᑕᕝᕙᓐᖓᑦ ᐊᓂᑎᑦᓱᒪᓪᓗᒍ, ᐃᓄᐃᑦ ᐅᖃᖃᑦᑕᓕᕐᒪᑕ, “ᔩᓱᓯ ᐃᓱᒤᕈᑎᓂᕋᕐᓗᒍ.”

²² ᐱᖁᔭᓂᒃ ᐃᓕᓮᔩᑦ ᐃᓚᖏᑦ ᔨᕉᓴᓕᒻᒥᓐᖔᕐᓯᒪᔪᑦ ᐃᒫᒃ ᐅᖃᕐᐳᑦ, “ᔩᓱᓯᐅᓇ ᐱᐅᓪᓯᐹᐱᒥᒃ ᐃᓗᒻᒥᕐᑕᐅᓯᒪᒐᒥ, ᐊᓂᕐᓂᕐᓗᐃᑦ ᐊᖓᔪᖅᑳᖓᓐᓂᒃ, ᑖᑦᓱᒪ ᐱᔪᓐᓇᓂᕐᑖᕐᑎᓯᒪᔭᖓ ᐊᓂᕐᓂᕐᓗᖕᓂᒃ ᐊᓂᑎᑦᓯᔪᓐᓇᕐᑎᓪᓗᓂᐅᒃ.”

²³ ᔩᓱᓯᐅᑉ ᐃᓄᐃᑦ ᕾᖁᕔᑦ, ᐊᑦᔨᐅᔪᒥᒃ ᐅᖃᕐᕕᒋᓪᓗᒋᑦ, “ᖃᓄᕐᓕ ᓵᑖᓇᓯ ᐊᓂᑎᑦᓯᔪᓐᓇᕐᐹ ᓵᑖᓇᓯᒥᒃ?

²⁴ ᓄᓇᖁᑎᒋᔭᐅᔪᖅ ᐊᖓᔪᖅᑲᐅᕕᖕᓄᑦ ᐊᕕᒃᑐᕐᓗᑎᒃ ᐃᒻᒥᖕᓄᑦ ᐊᑭᕋᕐᑑᑎᓕᕐᐸᑕ, ᑖᒃᑯᐊ ᓄᓇᖃᑎᒌᖑᔪᑦ ᐊᕕᒃᑐᕈᑎᒃ ᐃᓅᖃᑎᒋᒍᓐᓁᓕᓂᐊᕐᐳᑦ.

²⁵ ᐃᓚᒌᑦ ᐃᒡᓗᒥᐅᖃᑎᒌᑦ ᐃᒻᒥᖕᓄᑦ ᐊᕕᓪᓗᑎᒃ ᐊᑭᕋᕐᑐᓕᕈᑎᒃ ᑕᕝᕙ ᐃᒡᓗᒥᐅᖃᑎᒌᑦ ᐊᓯᕈᕐᓗᑎᒃ ᓄᖑᓐᓂᐊᕐᐳᑦ.

²⁶ ᑍᒫᒃᑕᐅᖅ ᓵᑖᓇᓯ ᐃᒻᒥᓄᑦ ᐊᕕᒃᑐᕐᓗᓂ ᐊᑭᕋᕐᑐᓕᕈᓂ, ᐊᓯᕈᔪᐃᑦᑑᔪᓐᓇᓐᖏᓚᖅ, ᐊᓯᕈᕐᓗᓂᓕ ᓄᖑᒃᑲᔭᕐᐳᖅ.

²⁷ “ᓇᓪᓕᐊᑦ ᓲᖑᔪᕐᔪᐊᑉ ᐃᒡᓗᖓᓄᑦ ᐃᑎᕐᓗᓂ ᐱᖁᑎᖏᓐᓂᒃ ᐊᕐᓵᕐᓯᔪᓐᓇᓐᖏᓚᖅ, ᑭᓯᐊᓂ ᓲᖑᔪᕐᔪᐊᖅ ᕿᓚᒃᓱᖄᕐᓗᒍ; ᑭᖑᕐᖓᒍᑦ ᐃᒡᓗᖓᑕ ᐱᖁᑎᖏᓐᓂᒃ ᐊᕐᓵᓕᕋᔭᕐᐹ.

²⁸ “ᓱᓕᔪᒥᒃ ᐅᖃᐅᑎᕙᑦᓯ, ᐃᓄᐃᑦ ᐊᔪᕐᑐᓕᓂᕐᓂᑦ ᒎᑎᒥᒡᓘᓐᓃᑦ ᐅᖃᕐᓂᕐᓗᒃᓯᒪᒐᓗᐊᕐᐸᑕ ᐃᓱᒪᒋᔪᓐᓁᕐᕕᐅᔪᒫᕐᐳᑦ;

²⁹ ᑭᓯᐊᓂᓕ ᓇᓪᓕᐊᑦ ᐅᖃᕐᓂᕐᓘᑎᖃᕐᐸᑦ ᐊᓂᕐᓂᕐᒥᒃ ᐃᑦᔪᕐᓁᑦᑐᒥᒃ ᑖᓐᓇ ᐃᓱᒪᒋᔪᓐᓁᕐᕕᐅᓂᐊᓐᖏᓚᖅ, ᐊᔪᕐᑐᓕᖕᒪᑦ ᐸᓯᔭᒃᓴᐅᓐᓇᕐᑐᒥᒃ ᐃᓱᖃᖏᑦᑐᒧᑦ.”

³⁰ ᐃᓄᐃᑦ ᐃᓚᖏᑦ ᐅᖃᓚᐅᕐᒪᑕ, “ᔩᓱᓯᐅᓇ ᐊᓂᕐᓂᕐᓗᖕᒥᒃ ᐃᓗᒻᒥᕐᑕᐅᓯᒪᔪᖅ.”

ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ

³¹ ᑕᕝᕙ ᔩᓱᓯᐅᑉ ᐊᓈᓇᖓ ᖃᑕᓐᖑᑎᖏᓪᓗ ᑕᕝᕗᓐᖓᕐᐳᑦ; ᐃᒡᓘᑉ ᓯᓚᑖᓂᓪᓗᑎᒃ ᑖᒃᑯᐊ ᐅᖃᐅᑦᔭᐅᖁᕚᑦ, ᕾᖁᓪᓗᒍ.

³² ᐃᓄᒋᐊᒃᑐᓪᓕ ᐊᕙᑖᓂ ᐃᒃᓯᕙᔪᑦ, ᔩᓱᓯᒧᑦ ᐅᖃᕐᐳᑦ, “ᐊᓈᓁᑦ ᖃᑕᓐᖑᑎᑎᓪᓗ ᓯᓚᒦᑉᐳᑦ, ᐃᓕᖕᓂᒃ ᕾᖁᔨᓪᓗᑎᒃ.”

³³ ᔩᓱᓯᐅᑉ ᑭᐅᕔᑦ, “ᑭᓇ ᐊᓈᓇᒐ ᑭᓇᒃᑯᓪᓘ ᖃᑕᓐᖑᑎᒃᑲ?”

³⁴ ᐊᕙᑎᒥᓂᒃ ᐃᒃᓯᕙᔪᑦ ᐃᓄᐃᑦ ᑕᑯᓴᕐᓗᒋᑦ ᐅᖃᕐᐳᖅ, “ᑕᑯᒋᑦ ᐅᕝᕙᐅᑯᐊ ᐊᓈᓇᒃᑲ ᖃᑕᓐᖑᑎᒃᑲᓗ!

³⁵ ᓇᓪᓕᐊᑦ ᒎᑎᐅᑉ ᐱᔪᒪᔭᖓᓂᒃ ᐊᑐᕐᑐᖅ ᑖᓐᓇ ᖃᑕᓐᖑᑎᒋᕙᕋ, ᓇᔭᒋᓪᓗᒍᓗ ᐊᓈᓇᒋᕙᕋ.”