ᒫᑯᓯᐅᑉ ᐊᒡᓚᖏᑦ 2 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐊᖑᒻᒥᒃ ᓄᑭᖃᖏᑦᑐᒥᒃ ᐋᖅᑭᒃᓯᓂᖓ

¹ ᐅᓪᓗᐃᑦ ᑕᒪᒃᑯᐊ ᑭᖑᕐᖓᒍᑦ ᔩᓱᓯ ᐅᑎᕐᐳᖅ ᑲᐲᕐᓂᐊᒧᑦ, ᐅᖃᐅᓯᐅᑲᑕᓕᕆᕗᖅ ᐊᖏᕐᕋᕐᓂᖓᓂᒃ.

² ᐃᓄᐃᑦ ᐊᒥᓱᑦ ᑕᕝᕗᓐᖓᕐᐳᑦ ᐃᓂᒃᓮᕈᑦᔨᓪᓗᑎᒃ, ᐅᒃᑯᐊᖓᑕᓘᓐᓃᑦ ᓯᓚᑖ ᐃᓂᒃᓴᖃᕈᓐᓃᕐᐳᖅ; ᔩᓱᓯ ᐊᔪᕆᕐᑐᐃᓕᕐᐳᖅ ᑖᒃᑯᓄᖓ.

³ ᐊᖑᑎᑦ ᓯᑕᒪᑦ ᑕᕝᕗᓐᖓᕐᐳᑦ, ᐊᒡᔭᕐᓯᓪᓗᑎᒃ ᐊᖑᒻᒥᒃ ᓄᑭᖃᖏᑦᑐᒥᒃ ᔩᓱᓯᒧᐊᖁᓪᓗᒍ.

⁴ ᐃᓄᖃᓗᐊᕐᓂᖓᓄᑦ ᔩᓱᓯᒧᐊᕐᑎᑦᓱᓐᓇᖏᓐᓇᒥᑦᔪᒃ, ᐃᒡᓘᑉ ᖄᖓᒍᑦ ᐊᖕᒪᕐᐹᑦ, ᔩᓱᓯᐅᑉ ᓇᔪᕐᑕᖓᑕ ᖁᓛᒍᑦ; ᐃᒡᓘᑉ ᖁᓚᖓ ᐊᖕᒪᕇᕋᒥᑦᔪᒃ, ᐊᖑᑦ ᓄᕿᖃᖏᑦᑐᖅ ᓂᖏᑎᑉᐹᑦ ᓇᓚᕕᖕᒥᓃᑎᓪᓗᒍ.

⁵ ᔩᓱᓯᐅᑉ ᐊᖑᑎᑦ ᑕᑯᒐᒥᒋᑦ ᐅᒃᐱᕐᓂᖃᓪᓚᕆᒃᑐᑦ, ᐊᖑᑦ ᓄᑭᖃᖏᑦᑐᖅ ᐅᖃᐅᑎᕚ, “ᐃᕐᓃᒃ ᐊᔪᕐᓂᑎᑦ ᐃᓱᒪᒋᔭᐅᔪᓐᓃᕐᐳᑦ.”

⁶ ᐱᖁᔭᓂᒃ ᐃᓕᓮᔨᑦ ᐃᓚᖏᑦ ᑕᕝᕙᓂ ᐃᒃᓯᕙᖃᑕᐅᔪᑦ, ᐃᓗᒥᒍᑦ ᐃᓱᒪᓕᕐᐳᑦ,

⁷ “ᓱᖕᒪᓄᓇ ᑍᒫᒃ ᐅᖃᓕᕆᕙ? ᑕᒪᓐᓇ ᒎᑎᒥᒃ ᐅᖃᕐᓂᕐᓘᑎᖃᕐᓂᐅᕗᖅ! ᒎᑎ ᑖᓐᓇᑐᐊᑦᓯᐊᖅ ᐊᔪᕐᓂᕐᓂᒃ ᐃᓱᒪᒋᔪᓐᓁᕐᓯᔪᓐᓇᕐᐳᖅ.”

⁸ ᑕᕝᕔᓐᓇᖅ ᔩᓱᓯᐅᑉ, ᐊᓂᕐᓂᕐᒥᒍᑦ ᖃᐅᔨᒐᒥᒋᒃ ᓱᓇᒥᒃ ᐃᓱᒪᖕᒪᖔᑕ, ᐅᖃᐅᑎᕔᑦ, “ᓱᖕᒪᑦ ᑕᒪᑐᒥᖓ ᐊᐱᕐᓲᑎᖃᕐᐱᓰ?

⁹ ᓇᓪᓕᐊᓐᓂᒃ ᐅᖃᕐᓗᓂ ᐊᔪᕐᓇᖏᓐᓂᕐᓴᐅᕚ ᐆᒧᖓ ᓄᑭᖃᖏᑦᑐᒧᑦ, ‘ᐊᔪᕐᓂᑎᑦ ᐃᓱᒪᒋᔪᓐᓁᕐᑕᐅᕗᑦ,’ ᐅᕝᕙᓗ ᐅᖃᕐᓗᓂ, ‘ᒪᑭᓪᓗᑎᑦ, ᓇᓪᓚᖓᕖᑦ ᑎᒍᓪᓗᒍ, ᐱᓱᓕᕆᑦ?’

¹⁰ ᖃᐅᔨᓂᐊᕋᑦᓯ ᐃᓅᑉ ᐃᕐᓂᖓ ᐱᔪᓐᓇᕐᓂᖃᕐᒪᑦ ᑕᒫᓂ ᓄᓇᒥ ᐊᔪᕐᓂᕐᓂᒃ ᐃᓱᒪᒋᔪᓐᓁᕐᓯᔪᓐᓇᕐᒪᑦ,” ᑖᑦᓱᒧᖓ ᓄᑭᖃᖏᑦᑐᒧᑦ ᐅᖃᕐᐳᖅ,

¹¹ “ᐅᖃᐅᑎᕙᒋᑦ, ᒪᑭᑦᑎᑦ, ᓇᓪᓚᖓᕖᑦ ᑎᒍᓗᒍ ᐊᖏᕐᕋᓕᕆᑦ.”

¹² ᑖᓐᓇ ᒪᑭᑉᐳᖅ, ᑕᕝᕔᓐᓇᖅ ᓇᓪᓚᖓᕕᓂ ᑎᒍᓪᓗᓂᐅᒃ ᑕᕝᕙᓐᖓᑦ ᐊᓂᕗᖅ ᑕᑯᓐᓇᕐᑎᓪᓗᒋᑦ; ᑖᒃᑯᐊ ᑕᒪᕐᒥᒃ ᑲᒪᓂᐊᒻᒪᕆᒃᐳᑦ ᒎᑎ ᓂᕐᑐᕐᓗᒍ, ᐅᖃᕐᐳᑦ, “ᑍᒤᑦᑐᒥᒃ ᑕᑯᓚᐅᕐᓯᒪᖏᒻᒪᕆᒃᐳᒍᑦ!”

ᔩᓱᓯᐅᑉ ᕾᖁᔨᓂᖓ ᓕᕔᒥᒃ

¹³ ᔩᓱᓯ ᐊᒻᒪ ᐊᓂᒋᕗᖅ ᒐᓕᓕᐊᑉ ᑕᓯᖓᑕ ᓯᓈᓄᑦ; ᐃᓄᒋᐊᒃᑐᕐᔪᐊᑦ ᐊᕙᑖᓂᓕᕐᐳᑦ, ᐊᔪᕆᕐᑐᓕᕐᐰᑦ.

¹⁴ ᐱᓱᒃᓗᓂ, ᑕᑯᓕᕆᕗᖅ ᓕᕔᒥᒃ ᐊᐅᓪᐱᐊᓯᐅᑉ ᐃᕐᓂᖓᓂᒃ ᑖᒃᓰᔧᕕᖕᒥ ᐱᓇᓱᐊᕐᕕᖕᒥᓂ ᐃᒃᓯᕙᔪᒥᒃ, ᔩᓱᓯᐅᑉ ᐅᖃᐅᑎᕚ, “ᒪᓕᓐᖓ.” ᑖᓐᓇ ᒪᑭᓐᓇᒥ ᔩᓱᓯ ᒪᓕᓕᕐᐹ.

¹⁵ ᑭᖑᓂᖓᒍᑦ ᔩᓱᓯ ᓂᕆᖃᑕᐅᓕᕐᐳᖅ ᑖᑦᓱᒪ ᓕᕔᑉ ᐃᒡᓗᖓᓂ, ᕉᒪᒥᐅᑦ ᑮᓇᐅᔧᕐᑎᑦᓯᔨᖁᑎᖏᑦ ᐊᒥᓱᑦ ᐊᔪᕐᑐᓕᔪᓪᓗ ᐃᒃᓯᕙᖃᑕᐅᒋᕗᑦ ᔩᓱᓯᒧᑦ ᐃᓕᓐᓂᐊᕐᑎᖏᓐᓄᓪᓗ; ᐊᒥᓱᑦ ᒪᓕᓚᐅᕐᒪᑕ.

¹⁶ ᐱᖁᔭᓂᒃ ᐃᓕᓮᔩᑦ ᐹᕆᓯᐅᔪᑦ, ᑕᑯᒐᒥᒃ ᓂᕆᖃᑎᖃᕐᓂᖓᓂᒃ ᐊᔪᕐᑐᓕᔪᓂᒃ ᕉᒪᒥᐅᓪᓗ ᑮᓇᐅᔧᕐᑎᑦᓯᔨᖏᓐᓂᒃ, ᐃᓕᓐᓂᐊᕐᑎᖏᓐᓄᑦ ᐅᖃᕐᐳᑦ, “ᓱᖕᒪᓄᓇ ᓂᕆᖃᑎᖃᕐᐸ ᕉᒪᒥᐅᑦ ᑮᓇᐅᔧᕐᑎᑦᓯᔨᖏᓐᓂᒃ ᐊᔪᕐᑐᓕᔪᓂᒡᓗ?”

¹⁷ ᔩᓱᓯᐅᑉ ᑐᓴᕋᒥᒋᑦ, ᐅᖃᐅᑎᕔᑦ, “ᖃᓄᐃᖏᑦᑐᑦ ᐋᓐᓂᐊᓯᐅᕐᑎᖃᕆᐊᖃᓐᖏᓚᑦ, ᖃᓂᒪᔪᓪᓕ ᑭᓯᒥ; ᐃᓗᐊᕐᑐᓂᒃ ᕾᖁᔨᔭᕐᑐᕐᓯᒪᓐᖏᓚᖓ, ᐊᔪᕐᑐᓕᔪᓂᒡᓕ.”

ᓂᕆᑦᑍᓕᓂᕐᒥᒃ ᔩᓱᓯᐅᑉ ᐊᐱᕆᔭᐅᓂᖓ

¹⁸ ᑍᑦᓱᒪᓂ ᔪᐊᓇᓯ ᐹᑉᑎᑎᕆᔨᐅᑉ ᒪᓕᒃᑎᖏᑦ ᐹᕆᓯᓪᓗ ᓂᕆᑦᑍᓕᓚᐅᕐᐳᑦ; ᐃᓄᐃᑦ ᔩᓱᓯᒧᐊᕐᓗᑎᒃ ᐊᐱᕆᕚᑦ, “ᓱᖕᒪᓂᒃᑯᐊ ᔪᐊᓇᓯ ᐹᑉᑎᑎᕆᔨᐅᑉ ᐃᓕᓐᓂᐊᕐᑎᖏᑦ ᐹᕆᓯᓪᓗ ᐃᓕᓐᓂᐊᕐᑎᖏᑦ ᓂᕆᑦᑍᓕᕙᒃᐹᑦ? ᐃᓕᓐᓂᐊᕐᑎᑎᑦ ᓂᕆᑦᑍᓕᓚᐅᕐᓯᒪᑎᓐᓇᒋᑦ?”

¹⁹ ᔩᓱᓯᐅᑉ ᐅᖃᐅᑎᕔᑦ, “ᑲᑎᑎᑕᐅᔪᖃᕐᑎᓪᓗᒍ ᓂᕆᔭᕐᑐᖁᔭᐅᓯᒪᔪᑦ ᓂᕆᑦᑍᓕᓲᖑᕚᑦ ᐅᐃᒃᓴᖅ ᑕᕝᕙᓃᑎᓪᓗᒍ? ᖃᐅᔨᒪᕗᓯ ᐅᐃᒃᓴᖅ ᑕᕝᕙᓃᑎᓪᓗᒍ, ᓂᕆᑦᑍᓕᔪᓐᓇᖏᑦᑐᑦ.

²⁰ ᐅᓪᓗᐃᑦ ᓇᓪᓕᐅᑎᔪᒫᕐᐳᑦ, ᐅᐃᒃᓴᒥᒃ ᐊᕐᓵᕐᑕᐅᕕᖓᑦ, ᑕᕝᕙ ᓂᕆᑦᑍᓕᓕᕈᒫᕐᐳᑦ.

²¹ “ᐊᓐᓄᕌᑐᖃᕐᒥᒃ ᐃᓚᓯᔪᖃᕐᐸᓐᖏᓚᖅ ᓄᑖᒥᒃ ᐃᕿᔭᑦᑐᒥᒃ; ᐊᓐᓄᕌᑐᖃᖅ ᐃᕿᔭᑦᑐᒥᒃ ᐃᓚᔭᐅᒍᓂ, ᓄᑕᐅᖏᑦᑐᖅ ᐊᓕᒃᑐᕋᔭᕐᒪᒍ, ᐊᓐᓄᕌᑐᖃᕐᓗ ᐊᖏᓂᕐᓴᒥᒃ ᐊᖕᒪᔪᖃᓕᕋᔭᕐᐳᖅ.

²² ᐅᐂᓂᒥᒃ ᓄᑖᒥᒃ ᐅᐂᓂᖃᐅᑎᑐᖃᕐᒧᑦ ᐊᒥᕐᒧᑦ ᑯᕕᓯᔪᖃᕐᐸᓐᖏᓚᖅ; ᓄᑖᑉ ᐅᐂᓂᖃᐅᑎᑐᖃᖅ ᐊᒥᖅ ᖄᕐᑎᑐᐃᓐᓇᕐᓂᐊᕐᒪᒍ, ᐅᐂᓂᓗ ᑕᒪᐅᖓᑐᐃᓐᓇᖅ ᑯᕕᒐᔭᑦᐳᖅ, ᐅᐂᓂᖃᐅᑎᑐᖃᕐᓗ; ᑍᒤᒻᒪᑦ ᐅᐂᓂ ᓄᑖᖅ ᑯᕕᔭᐅᔭᕆᐊᖃᕐᐳᖅ ᐅᐂᓂᖃᐅᑎᒧᑦ ᓄᑖᒧᑦ.”

ᓵᐸᑎᒥᒃ ᐊᐱᖅᑯᓯᖃᕐᓂᖅ

²³ ᑍᑦᓱᒪᓂ ᔩᓱᓯ ᓴᐸᑎᐅᑎᓪᓗᒍ ᐱᓱᓚᐅᕐᐳᖅ ᓂᐊᖂᔭᒃᓴᕐᑕᓕᒃᑯᑦ; ᐃᓕᓐᓂᐊᕐᑎᖏᑦ ᐱᓱᒃᓗᑎᒃ ᓂᐊᖂᔭᒃᓮᑦ ᓄᕗᖏᓐᓂᒃ ᑎᒍᓯᖃᑦᑕᕐᐳᑦ.

²⁴ ᐹᕆᓯᑦ ᔩᓱᓯᒧᑦ ᐅᖃᕐᐳᑦ, “ᑕᑯᒋᑦ, ᐃᓕᓐᓂᐊᕐᑎᑎᑦ ᐱᖁᔭᑦᑎᓐᓂᒃ ᒪᓕᒍᓐᓃᕐᐳᑦ ᓴᐸᑎᒥ ᑍᒤᓕᐅᕐᑎᓪᓗᒋᑦ!”

²⁵ ᔩᓱᓯᐅᑉ ᐅᖃᐅᑎᕔᑦ, “ᐊᑐᐊᕐᓯᓚᐅᕐᓯᒪᓐᖏᓚᓰ ᑍᕕᑎᐅᑉ ᐱᓂᐊᕐᓂᕆᓚᐅᕐᓯᒪᔭᖓᓂᒃ, ᓂᕿᒃᓴᖃᕈᓐᓃᕋᒥᒃ ᑳᓕᕐᓗᑎᒃ, ᓇᖕᒥᓂᖅ ᐃᓚᒋᔭᖏᓪᓗ?

²⁶ ᑍᕕᑎ ᒎᑎᐅᑉ ᐃᒡᓗᖓᓄᐊᓚᐅᕐᐳᖅ, ᓂᕆᓪᓗᓂ ᓂᐊᖂᔭᓂᒃ ᒎᑎᒧᑦ ᑐᓂᕐᕈᑎᒋᔭᐅᓯᒪᔪᓂᒃ, ᐊᐰᐊᑕ ᑐᓂᕐᕈᓯᕐᑎᑦᓯᔨᓄᑦ ᐊᖓᔪᖅᑳᖑᑎᓪᓗᒍ, ᐱᖁᔧᑦ ᒪᓕᒡᓗᒋᑦ ᓂᐊᖂᔧᑦ ᑐᓂᕐᕈᓯᕐᑎᑦᓯᔨᓄᑦ ᑭᓯᐊᓂ ᓂᕆᔭᐅᔭᕆᐊᖃᕐᑎᓪᓗᒋᑦ, ᑍᕕᑎᓕ ᓂᕆᓚᐅᕐᐳᖅ ᐃᓚᒥᓄᑦ ᐊᒡᓛᑦ ᑐᓂᓯᓪᓗᓂ.”

²⁷ ᔩᓱᓯ ᐅᖃᕐᐳᖅ, “ᓴᐸᑎ ᐋᖅᑭᒃᑕᐅᓯᒪᕗᖅ ᐃᓄᒃ ᐱᑦᔪᑎᒋᓪᓗᒍ; ᐃᓄᒡᓕ ᐋᖅᑭᒃᑕᐅᓯᒪᓐᖏᓚᖅ ᓴᐸᑎ ᐱᓪᓗᒍ;

²⁸ ᐃᓅᑉ ᐃᕐᓂᖓ ᐊᑕᓂᐅᖕᒪᑦ ᐊᒡᓛᑦ ᓴᐸᑎᒧᑦ.”