ᒫᑯᓯᐅᑉ ᐊᒡᓚᖏᑦ 13 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯᐅᑉ ᐅᖃᐅᓯᖃᕐᓂᖓ ᑐᒃᓯᐊᕐᕕᒡᔪᐊᑉ ᐊᓯᕈᕐᑕᐅᓂᒃᓴᖓᓂᒃ

¹ ᑐᒃᓯᐊᕐᕕᒡᔪᐊᕐᒥᑦ ᐊᓂᓕᕐᒪᑦ, ᐃᓕᓐᓂᐊᕐᑎᖏᑕ ᐃᓚᖓᑦᑕ ᐅᖃᐅᑎᕚ, “ᑕᑯᒋᑦ, ᐊᔪᕆᕐᑐᐃᔩ, ᒪᑯᐊ ᐅᔭᕅᑦ ᓴᓇᒪᓂᖏᑦ ᐊᒃᓱᐊᓗᒃ ᑕᑯᒥᓇᕐᐳᑦ, ᐃᒡᓗᑦᓯᐊᕙᒻᒪᕆᐊᓘᓪᓗᓂᓗ!”

² ᔩᓱᓯᐅᑉ ᐅᖃᐅᑎᕚ, “ᐃᒡᓗᓕᐊᕆᓯᒪᔪᑦ ᒪᒃᑯᐊ ᓴᓇᒪᑦᓯᐊᕐᑐᑦ ᑕᑯᕕᒌᑦ? ᐅᔭᕋᒃᑕᖏᑦ ᐊᑕᐅᓯᕐᓘᓐᓃᑦ ᐃᓂᒥᓃᑦᑐᖃᕈᓐᓃᕈᒫᕐᐳᑦ, ᑕᒪᕐᒥᑦᓯᐊᖅ ᐅᕐᕈᑎᑕᐅᔪᒫᕐᒪᑕ.”

ᐃᓗᐊᖏᑦᔪᑎᒃᓴᑦ ᐊᑭᕋᕐᑐᕐᑕᐅᓃᓪᓗ

³ ᖃᖅᑲᐅᑉ ᖄᖓᓂ ᐃᒃᓯᕙᓕᕐᒪᑦ ᓇᐹᕐᑐᓕᖕᒥᒃ ᐸᐅᕐᖓᖃᕐᑐᓂ ᐅᕐᓱᒃᓴᕐᑕᓕᖕᓂᒃ ᑐᒃᓯᐊᕐᕕᒡᔪᐊᑉ ᓇᓕᓪᓗᐊᖓᓂ, ᐲᑦᑐᕉᓯᐅᑉ ᔧᒥᓯᐅᓪᓗ ᔪᐊᓇᓯᐅᓪᓗ ᐋᓐᑐᕉᓪᓗ ᐅᐸᒃᐹᑦ ᑖᒃᑯᑑᓪᓗᑎᒃ.

⁴ ᐅᖃᕐᓗᑎᒃ, “ᐅᖃᐅᑎᓚᐅᕐᑎᒍᑦ, ᖃᖓ ᑕᒪᓐᓇ ᑍᒤᑦᓱᒫᕐᐸ, ᓱᓇᓂᒃ ᓇᓗᓁᒃᑯᑕᖃᕈᒫᕐᐸ ᑕᒪᑐᒪ ᓇᓪᓕᐅᑎᓂᖓ?”

⁵ ᔩᓱᓯᐅᑉ ᐅᖃᐅᑎᕔᑦ, “ᖃᐅᔨᓴᑦᓯᐊᕆᑦᓯ ᐅᐃᕖᕐᕆᔭᐅᖁᓇᓯ.

⁶ ᐊᒥᓱᑦ ᐊᑎᓐᓂ ᐅᕙᖓᐅᓂᕋᕐᓗᑎᑦ ᑎᑭᑦᓱᒫᕐᒪᑕ ᐅᖃᕐᓗᑎᒃ, ‘ᑖᓐᓇᐅᕗᖓ!’ ᐊᒥᓱᑦ ᐅᐃᕖᕐᕆᔪᒫᕐᐰᑦ.

⁷ ᐅᓇᑕᕐᑐᓂᒃ ᑐᓵᓕᕈᑦᓯ ᐅᓇᑕᕐᑐᓪᓗ ᐅᓂᒃᑲᐅᓯᐅᓂᖏᓐᓂᒃ ᑐᓴᕐᑎᑕᐅᒍᑦᓯ, ᑲᑉᐱᐊᓱᖕᓂᐊᕋᓯ; ᑕᒪᒃᑯᐊ ᓇᓪᓕᐅᑎᔭᕆᐊᖃᕐᒪᑕ, ᓯᓚᕐᔫᑉ ᓇᒡᒐᑖ ᓱᓕ ᓇᓪᓕᐅᑎᓐᖏᓚᖅ.

⁸ ᐃᓅᖃᑎᒌᒡᔪᐊᑦ ᐅᓇᑕᕈᒫᕐᐳᑦ ᐃᓅᖃᑎᒌᒡᔪᐊᓄᑦ ᐊᓯᒥᖕᓄᑦ, ᐊᖓᔪᖅᑲᐅᕖᑦ ᐅᓇᑕᕈᒫᕐᐳᑦ ᐊᖓᔪᖅᑲᐅᕕᖕᓄᑦ ᐊᓯᒥᖕᓄᑦ; ᓄᓇᒥ ᓇᓂᑐᐃᓐᓇᖅ ᓴᔪᒃᐱᓪᓚᖃᑦᑕᕈᒫᕐᐳᖅ, ᑳᖕᓇᕐᑐᕐᔪᐊᖃᖃᑦᑕᕐᓗᓂᓗ; ᑕᒪᒃᑯᐊ ᑕᕝᕙ ᐃᕐᓂᓱᒃᑑᑉ ᐃᒃᐱᖕᓂᐊᓕᕐᓂᖓᑐᑦ ᐱᒋᐊᕐᐸᓪᓕᐊᓕᕐᑐᑦ.

⁹ “ᐃᓕᑦᓯ ᓇᖕᒥᓂᖅ ᖃᐅᔨᓴᕆᑦᓯ; ᑎᒍᔭᐅᔪᒫᕐᐳᓯ ᐃᖅᑲᕐᑐᐃᕕᖕᒧᑦ ᐱᑎᑕᐅᓗᓯ; ᐋᓐᓂᕐᓯᕐᑕᐅᔪᒫᕐᐳᓯ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓂ; ᐋᑕᐅᔪᒫᕐᐳᓯ ᐊᐅᓚᑦᓯᔨᓄᑦ ᐊᖓᔪᖅᑳᕐᔪᐊᓄᓪᓗ ᓇᖏᖁᓪᓗᓯ ᓵᖏᓐᓂ ᐅᕙᖓ ᐱᑦᔪᑎᒋᓗᖓ, ᓇᓗᓁᕐᓯᔪᓐᓇᖁᓪᓗᓯ ᑖᒃᑯᓄᖓ.

¹⁰ ᐅᖃᐅᓰᑦ ᑐᓴᕈᒥᓇᕐᑐᑦ ᐅᖃᐅᓯᐅᖅᑳᕆᐊᖃᕐᐳᑦ ᐃᓅᖃᑎᒌᒡᔪᐊᓄᑦ ᑕᒤᓐᓄᑦ.

¹¹ ᑎᒍᔭᐅᒍᑦᓯ ᐃᖅᑲᕐᑐᐃᕕᖕᒧᓪᓗ ᐋᑕᐅᒍᑦᓯ, ᐃᓱᒪᔮᕐᓂᐊᕋᓯ ᓯᕗᓂᖓᓂ ᖃᓄᖅ ᐅᖃᕆᐊᖃᕐᓂᐊᕐᒪᖔᑦᓯ; ᐅᖃᐅᓯᖃᕆᑦᓯᓕ ᑕᕝᕙᓂ ᓇᓪᓕᐅᑦᑐᒥ ᐅᖃᐅᓯᒃᓴᕐᑖᕐᑎᑕᐅᓂᕆᔭᑦᓯᓐᓂᒃ, ᓇᖕᒥᓂᖅ ᐅᖃᓪᓚᖏᓐᓇᑦᓯ, ᐊᓂᕐᓂᕐᓕ ᐃᑦᔪᕐᓁᑦᑐᖅ ᐅᖃᓪᓚᒃᐳᖅ.

¹² ᐃᓄᐃᑦ ᑎᒍᔭᐅᑎᑦᓯᔪᒫᕐᐳᑦ ᖃᑕᓐᖑᑎᒥᖕᓂᒃ ᑐᖁᑕᐅᖁᓪᓗᒋᑦ, ᐊᑖᑕᐅᔪᑦ ᑍᒤᑦᓱᒫᕆᕗᑦ ᕿᑐᕐᖓᒥᖕᓂᒃ, ᕿᑐᕐᖎᑦ ᐊᑭᕋᕐᑐᓕᕈᒫᕐᐳᑦ ᐊᖓᔪᖅᑳᒥᖕᓄᑦ ᑐᖁᑕᐅᑎᑦᓯᓗᑎᒃ.

¹³ ᑕᒤᓐᓄᑦ ᐆᒥᒋᔭᐅᓕᕈᒫᕐᐳᓯ ᐅᕙᖓ ᐱᑦᔪᑎᒋᓗᖓ. ᓇᓪᓕᐊᓪᓕ ᕿᓄᐃᓵᕐᓗᓂ ᐊᓂᒍᐃᔪᖅ ᑖᓐᓇ ᐱᐅᓕᔭᐅᔪᒫᕐᐳᖅ.”

ᑕᑯᒥᓁᑦᑐᕐᔪᐊᖅ ᑲᑉᐱᐊᓇᕐᑐᖅ

¹⁴ “ᑕᑯᓕᕈᑦᓯ ᑕᑯᒥᓁᑦᑐᕐᔪᐊᕐᒥᒃ ᓇᑉᐸᕐᑕᐅᔪᒥᒃ ᑕᒫᓂ ᐃᓂᒃᓴᕆᓐᖏᑕᖓᓂ (ᐊᑐᐊᕐᓯᔫᑉ ᑐᑭᓯᓕᐅᒃ ᖃᓄᖅ ᑐᑭᖃᕐᒪᖔᑦ), ᑕᕝᕙ ᔫᑎᐊᒦᑦᑐᑦ ᕿᒫᔭᕆᐊᖃᓕᕈᒫᕐᐳᑦ ᖃᖅᑲᓄᑦ.

¹⁵ ᐃᒡᓘᑉ ᖄᖓᓃᑦᑐᖅ ᐃᒡᓗᒥᓄᑦ ᐊᖅᑲᕆᐊᖃᕈᒫᓐᖏᓚᖅ, ᓱᓇᑐᐃᓐᓇᕐᒥᒃ ᓇᒃᓴᕈᒪᔭᒥᓂᒃ ᐂᒃᖠᕋᓱᒡᓗᓂ.

¹⁶ ᐱᕈᕐᓰᕕᖕᒦᑦᑐᖅ ᐂᒃᖠᕆᐊᖃᕈᒫᓐᖏᓚᖅ ᐅᓕᒡᔪᐊᒥᓂᒃ.

¹⁷ ᑲᑉᐱᐊᓇᕐᑐᐊᓘᔪᒫᕐᐳᖅ ᐊᕐᓇᓄᑦ ᓄᑕᕋᒃᓴᖃᕐᑐᓄᑦ ᕿᑐᕐᖓᓛᓕᖕᓄᓪᓗ!

¹⁸ ᑐᒃᓯᐊᕆᑦᓯ ᕿᒫᕕᒃᓴᓯ ᐅᑭᐅᒥ ᓇᓪᓕᐅᑎᖁᓇᒍ.

¹⁹ ᐅᓪᓗᐃᑦ ᑖᒃᑯᐊ ᑲᑉᐱᐊᓇᕐᑐᑦ ᓇᓕᖃᕈᒫᖏᒻᒪᑕ ᓯᓚᕐᔪᐊᑉ ᐱᒋᐊᕐᓂᖓᓂᑦ ᒎᑎᐅᑉ ᐱᓐᖑᕐᑎᑦᓯᓚᐅᕐᓂᖓᓂᑦ ᒫᓐᓇᒧᑦ ᑎᑭᓪᓗᒍ, ᑭᖑᓂᖓᒍᑦ ᑍᒫᒃ ᑲᑉᐱᐊᓇᕐᑎᒋᔪᒥᒃ ᐱᑕᖃᕈᒫᓐᖏᓚᖅ.

²⁰ ᐊᑕᓂᐅᑉ ᐅᓪᓗᐃᑦ ᓁᒡᓕᒋᐊᕐᓂᐊᖏᑉᐸᒋᑦ, ᐃᓄᓕᒫᑦ ᐱᐅᓕᔭᐅᔪᖃᕋᔭᓐᖏᓚᑦ; ᓂᕈᐊᕐᓯᒪᔭᓂᓕ ᐱᑦᔪᑎᒋᓪᓗᒋᑦ, ᐅᓪᓗᐃᑦ ᑖᒃᑯᐊ ᓁᒡᓕᒋᐊᕐᓯᒪᕔᑦ.

²¹ “ᓇᓪᓕᐊᓐᓄᑦ ᐅᖃᐅᑦᔭᐅᒍᕕᑦ, ‘ᑕᑯᒋᑦ, ᐅᓇ ᑕᕝᕙ ᙭ᔅᑑᓯ!’ ᐅᕝᕙᓗ, ‘ᑕᑯᒋᑦ, ᙭ᔅᑑᓯ ᑍᑲ!’ ᐅᒃᐱᕆᓂᐊᕋᓯᒋᒃ.

²² ᙭ᔅᑑᓯᐅᓂᕋᕐᑐᑦ ᓱᓕᖏᑦᑐᑦ, ᓇᓚᐅᑦᑍᔫᓂᕋᕐᑐᓪᓗ ᓱᓕᖏᑦᑐᑦ ᓴᖅᑭᕈᒫᕐᒪᑕ ᓇᓗᓁᒃᑯᑕᕐᓂᒃ ᓴᖅᑭᑎᑦᓯᔪᒫᕐᐳᑦ ᑲᒪᓇᕐᑐᓕᓂᕐᓂᒡᓗ, ᑕᒻᒪᕐᑎᑦᓯᓗᑎᒃ, ᐊᒡᓛᑦ ᓂᕈᐊᕐᑕᐅᓯᒪᔪᑦ ᐊᔪᕐᓇᓐᖏᑉᐸᑕ ᑕᒻᒪᕐᑎᓐᓇᓱᐊᕐᓗᒋᑦ.

²³ ᖃᐅᔨᓴᑦᓯᐊᕆᑦᓯ; ᑕᒪᒃᑯᓂᖓ ᑕᒤᓐᓂᒃ ᐅᖃᐅᑎᕙᑦᓯ ᓱᓕ ᑕᒪᒃᑯᐊ ᓇᓪᓕᐅᑎᖅᑳᕐᑎᓐᓇᒋᑦ.”

ᐃᓅᑉ ᐃᕐᓂᖓᑕ ᑎᑭᓐᓂᖓ

²⁴ “ᐅᓪᓗᐃᑦ ᑖᒃᑯᐊ ᑲᑉᐱᐊᓇᕐᑐᑦ ᑭᖑᕐᖓᑦᑎᒍᑦ, ᓯᕿᓂᖅ ᑖᕐᓯᔪᒫᕐᐳᖅ, ᑕᖅᑭᕐᓗ ᖃᐅᒪᔪᓐᓃᕈᒫᕐᐳᖅ,

²⁵ ᐅᓪᓗᕆᐊᓪᓗ ᕿᓚᖕᒥᑦ ᑲᑕᒐᕈᒫᕐᐳᑦ, ᕿᓚᖕᒥ ᐱᔪᓐᓇᕐᓃᑦ ᐊᐅᓚᑎᑕᐅᔪᒫᕐᐳᑦ.

²⁶ ᑕᕝᕙ ᐃᓅᑉ ᐃᕐᓂᖓ ᑕᑯᔪᒫᕐᐹᑦ ᓄᕗᔭᑎᒍᑦ ᐊᖅᑲᕐᑐᖅ ᐱᔪᓐᓇᕐᓂᕐᔪᐊᖃᕐᓗᓂ ᓂᕐᑐᕐᓇᕐᓂᕐᔪᐊᖃᕐᓗᓂᓗ.

²⁷ ᑖᑦᓱᒪ ᐂᖏᓖᑦ ᑎᓕᔪᒫᕐᐰᑦ, ᑲᑎᕐᓱᐃᖁᓪᓗᒋᑦ ᓂᕈᐊᕐᓯᒪᔭᖏᓐᓂᒃ ᓄᓇᕐᔪᐊᑉ ᐊᓄᕌᕐᕕᒋᕙᒃᑕᖏᓐᓂᑦ ᓯᑕᒪᓂᑦ, ᓄᓇᕐᔪᐊᑉ ᐃᓱᐊᓂᑦ ᕿᓚᐅᑉ ᐃᓱᐊᓄᑦ.”

ᓇᐹᕐᑐᒥᑦ ᐱᒋᓕᖕᓂᒃ ᐸᐅᕐᖓᓕᖕᒥᑦ ᐃᓕᓐᓂᐊᕈᑎᒃᓴᖅ

²⁸ “ᓇᐹᕐᑑᑉ ᐱᒋᓕᖕᓂᒃ ᐸᐅᕐᖓᓕᐅᑉ ᐊᔪᕆᕐᑐᕐᓕᓯ ᐃᓕᓐᓂᐊᕈᑎᒃᓴᑦᓯᓐᓂᒃ: ᐊᕙᓚᖓᔪᖏᑦ ᐆᒻᒪᕈᑦᓯᐊᕌᖓᒥᒃ ᐱᕈᕐᕕᐅᓕᕐᐸᒃᐳᑦ ᐅᖃᐅᔭᖃᓕᕐᓗᑎᒡᓗ, ᑕᕝᕙ ᖃᐅᔨᕙᒃᐳᓯ ᐊᐅᔭᐅᔭᕆᐊᒃᖠᓕᕐᒪᑦ.

²⁹ ᑍᒫᒃᑕᐅᖅ, ᑕᒪᒃᑯᐊ ᐅᖃᐅᓯᕆᔭᒃᑲ ᑕᑯᓕᕈᑦᓯᒋᒃ ᐱᕙᓪᓕᐊᓕᕐᑐᑦ, ᑕᕝᕙ ᖃᐅᔨᒪᓂᐊᕐᐳᓯ ᖃᓂᑦᑑᓕᕐᒪᑦ ᐃᓯᕐᑕᕐᕕᖕᒦᓕᕐᓗᓂᓗ.

³⁰ ᓱᓕᔪᒥᒃ ᐅᖃᐅᑎᕙᑦᓯ, ᒫᓐᓇ ᐃᓅᔪᑦ ᓄᖑᓚᐅᖅᑳᕐᑎᓐᓇᒋᑦ ᑕᒪᒃᑯᐊ ᑕᒪᕐᒥᒃ ᓇᓪᓕᐅᑎᔪᒫᕐᐳᑦ.

³¹ ᕿᓚᒡᓗ ᓄᓇᓗ ᓄᖑᔪᒫᕐᐴᒃ, ᐅᖃᐅᓯᒃᑲᓕ ᓄᖑᔪᒫᓐᖏᓚᑦ.”

ᓇᓪᓕᐊᓐᓄᑦ ᖃᐅᔨᒪᔭᐅᓐᖏᓚᖅ ᐅᓪᓗᖅ ᐃᑲᕐᕋᕐᓘᓐᓃᑦ

³² “ᐅᓪᓗᑉ ᑕᒪᑐᒪ ᓇᓪᓕᐅᓐᓂᖓ ᐃᑲᕐᕋᕐᓘᓐᓃᑦ ᓇᓪᓕᐊᓐᓄᑦ ᖃᐅᔨᒪᔭᐅᓐᖏᓚᖅ, ᐂᖏᓖᑦ ᐊᒡᓛᑦ ᕿᓚᖕᒦᑦᑐᑦ, ᐃᕐᓂᐅᓪᓘᓐᓃᑦ ᖃᐅᔨᒪᖏᓐᓂᕚ, ᐊᑖᑕᐅᑉ ᑭᓯᒥ ᖃᐅᔨᒪᕚ.

³³ ᖃᐅᔨᒪᓇᓱᐊᑦᓯᐊᕆᑦᓯ, ᖃᐅᔨᓴᑦᓯᐊᕐᓗᓯ; ᖃᖓ ᓇᓪᓕᐅᑎᔪᒫᕐᒪᖔ ᖃᐅᔨᒪᖕᒋᓐᓇᑦᓯᐅᒃ.

³⁴ ᐊᖑᑎᑐᑦ ᐊᐅᓪᓚᕐᑐᑐᑦ ᑍᒤᑦᓱᒫᕐᐳᖅ, ᐊᖏᕐᕋᒥᓂᒃ ᕿᒤᓕᕋᒥ ᐱᔨᒥᓂᒃ ᑲᒪᔨᐅᑎᑦᓯᔪᑐᑦ, ᑖᒃᑯᐊ ᐊᑐᓂᑦ ᐱᓇᓱᐊᕆᐊᖃᕐᑕᖏᓐᓂᒃ ᐅᖃᐅᑎᑦᓯᐊᕐᐰᑦ, ᐅᒃᑯᐊᒥᒃ ᖃᐅᔨᓴᕐᑎᐅᓂᐊᕐᑐᖅ ᖃᐅᔨᓴᑦᓯᐊᖁᕚ.

³⁵ ᑍᒤᒻᒪᑦ ᖃᐅᔨᓴᑦᓯᐊᕆᑦᓯ, ᐃᒡᓘᑉ ᐊᖓᔪᖅᑳᖓᑕ ᑎᑭᕝᕕᒋᓂᐊᕐᑕᖓ ᖃᐅᔨᒪᖏᓐᓇᑦᓯᐅᒃ, ᐅᓐᓄᒃᑯᑦ ᑎᑭᑐᐃᓐᓇᕆᐊᖃᕐᒪᑦ, ᐅᕝᕙᓗ ᐅᓐᓄᐊᓪᓗᐊᒃᑯᑦ ᑎᑭᑐᐃᓐᓇᕆᐊᖃᕐᓗᓂ, ᐅᕝᕙᓗ ᖃᐅᒻᒪᓕᕐᑎᓪᓗᒍ ᐊᖑᑎᕕᐊᑉ ᓂᓪᓕᕐᕕᖓᓂ, ᐅᕝᕙᓗ ᐅᓪᓛᓐᖑᕐᑎᓪᓗᒍ.

³⁶ ᑕᕝᕔᓐᓇᖅ ᑎᑭᑲᓪᓚᒃᐸᑦ ᓯᓂᒃᑎᓪᓗᓯ ᑎᑭᑕᐅᖁᓇᓯ.

³⁷ ᐃᓕᑦᓯᓐᓄᑦ ᐅᖃᐅᓯᕆᔭᕋ ᑕᒤᓐᓄᑦ ᐅᖃᕐᐸᕋ: ᐃᖅᑯᒪᑦᑎᐊᕆᑦᓯ.”