ᒫᑯᓯᐅᑉ ᐊᒡᓚᖏᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᔩᓱᓯ ᔨᕉᓴᓕᒻᒧᑦ ᐃᓯᕐᑎᓪᓗᒍ ᓂᕐᑐᕐᑕᐅᒻᒪᕆᖕᓂᖓ

¹ ᔨᕉᓴᓕᒻᒧᑦ ᑎᑭᑉᐸᓪᓕᐊᓕᕐᑎᓪᓗᒋᑦ, ᓄᓇᓖᑦ ᐱᑦᐰᒋᒥᐅᑦ ᐱᑕᓂᒥᐅᓪᓗ ᖃᓂᒋᔮᓃᓪᓗᑎᒃ, ᖃᖅᑲᒧᐊᕐᐳᑦ ᓇᐹᕐᑐᓕᖕᒧᑦ ᐅᕐᓱᒃᓴᐅᔪᓐᓇᕐᑐᓂᒃ ᐸᐅᕐᒐᖃᓲᓂᒃ, ᔩᓱᓯᐅᑉ ᐃᓕᓐᓂᐊᕐᑏᖕᓂ ᒪᕐᕈᒃ ᑎᓕᕚᒃ ᓯᕗᓪᓕᐅᖁᓪᓗᒋᒃ,

² ᐅᖃᐅᑎᓪᓗᒋᒃ, “ᐃᒃᑯᓄᖓ ᓄᓇᓕᖕᓄᐊᓚᐅᕆᑦᓯᒃ, ᑕᕝᕗᖓ ᑎᑭᒃᑯᑦᓯᒃ ᑕᑯᓂᐊᕐᐳᓯᒃ ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᐃᐱᕐᓯᒪᔪᒥᒃ, ᑭᓇᒧᓪᓘᓐᓃᑦ ᐃᑭᒪᕕᐅᓚᐅᕐᓯᒪᖏᑦᑐᒥᒃ; ᑖᓐᓇ ᐃᐲᓪᓗᒍ ᑕᒪᐅᖓ ᕾᑦᔪᑎᓂᐊᕐᐸᓯᒃ.

³ ᐊᐱᕆᔭᐅᒍᑦᓯᒡᓕ ᓱᖕᒪᑦ ᑍᒤᓕᐅᕐᒪᖔᑦᓯᒃ, ᐅᖃᐅᑎᓂᐊᕐᐸᓯᒃ, ‘ᐊᑕᓂᐅᑉ ᐊᑐᕆᐊᖃᕐᒪᒍ ᐅᑎᕐᑎᑦᓴᐅᑎᒋᓂᐊᕐᑕᖓ ᐊᑐᕇᕈᓂᐅᒃ.’”

⁴ ᑖᒃᑯᐊᒃ ᐃᓕᓐᓂᐊᕐᑏᒃ ᓄᓇᓕᖕᓄᐊᕐᐴᒃ, ᑕᑯᓪᓗᑎᒃ ᓯᐅᑎᖅᑯᕐᑐᔫᑉ ᓄᕐᕋᖓᓂᒃ ᐃᒡᓘᑉ ᐹᖓᑕ ᓴᓂᐊᓂ ᐃᐱᕐᓯᒪᔪᒥᒃ; ᑖᑦᓱᒥᖓᓕ ᐃᐲᑦᓯᓕᕐᑎᓪᓗᒋᒃ.

⁵ ᑕᕝᕙᓃᑦᑐᓄᑦ ᐊᐱᕆᔭᐅᕘᒃ, “ᓱᖕᒪᓄᓇ ᓯᐅᑎᖅᑯᕐᑐᔫᑉ ᓄᕐᕋᖓ ᐃᐲᑉᐱᓯᒃᑯᒃ?”

⁶ ᑖᒃᑯᐊᒃ ᑭᐅᕘᒃ ᔩᓱᓯᒧᑦ ᐅᖃᐅᓯᐅᖁᔭᐅᖅᑲᐅᔪᓂᒃ; ᑖᒃᑯᐊᒃ ᖃᓄᐃᓴᕈᓐᓃᕐᐳᑦ ᑲᔪᓯᑐᐃᓐᓇᖁᔨᓕᕐᓗᑎᒡᓗ.

⁷ ᑖᓐᓇ ᓯᐅᑎᖅᑯᕐᑐᔫᑉ ᓄᕐᕋᖓ ᔩᓱᓯᒧᐊᕈᑎᕚᒃ, ᐅᓕᒡᔪᐊᒥᖕᓂᒃ ᖄᖓᓄᐊᕐᓯᓪᓗᑎᒃ, ᔩᓱᓯ ᖄᖓᓄᑦ ᐃᑭᕗᖅ.

⁸ ᐅᓄᕐᑐᓪᓗ ᐅᓕᒡᔪᐊᒥᖕᓂᒃ ᐊᖅᑯᑎᒧᑦ ᐃᓯᕕᑦᓯᕗᑦ, ᐃᓚᖏᓪᓕ ᓇᐹᕐᑐᐃᑦ ᐊᕙᓚᖓᔪᖏᓐᓂᒃ ᓇᑲᑦᓯᓪᓗᑎᒃ ᑕᒪᐅᖓ ᐊᖅᑯᑎᒧᐊᖅᑬᕗᑦ.

⁹ ᐃᓄᐃᑦ ᔩᓱᓯᐅᑉ ᓯᕗᓂᖓᓃᑦᑐᑦ, ᒪᓕᒃᑐᓪᓗ ᕾᒐᓛᓯᕗᑦ, “ᕼᐆᓵᓇ! ᓂᕐᑐᕐᑕᐅᓕ ᐊᑕᓂᐅᑉ ᐊᑎᖓᓂ ᑎᑭᑦᑐᖅ!

¹⁰ ᒎᑎᐅᑉ ᓮᒻᒪᕐᓕᐅᒃ ᑍᕕᑎᐅᑉ ᓯᕗᓕᑦᑕ ᐊᖓᔪᖅᑲᐅᕕᖓᑕ ᑎᑭᑎᑕᐅᓂᖓ, ᕼᐆᓵᓇ ᓂᕐᑐᕐᑕᐅᓕ ᖁᑦᓯᖕᓂᕐᐹᖑᔪᖅ!”

¹¹ ᔩᓱᓯ ᔨᕉᓴᓕᒻᒧᑦ ᑎᑭᑉᐳᖅ, ᑐᒃᓯᐊᕐᕕᒡᔪᐊᒧᑦ ᐃᑎᕐᓗᓂ; ᐃᓘᓐᓇᑦᓯᐊᖓᓂᒡᓗ ᕿᒥᕐᕈᐊᕐᐳᖅ, ᐅᓐᓄᒃᐸᓪᓕᐊᓕᕐᒪᑦ, ᐱᑕᓂᒧᐊᕐᐳᖅ ᐃᓕᓐᓂᐊᕐᑎᓂ 12 ᐃᓚᒋᓪᓗᒋᑦ.

ᔩᓱᓯᐅᑉ ᓇᐹᕐᑐᒥᒃ ᐱᒋᓕᖕᓂᒃ ᐱᕈᕐᕕᐅᒃᑲᓐᓂᖁᔨᔪᓐᓃᕐᓂᖓ

¹² ᖃᐅᑎᓪᓗᒍᓕ, ᔨᕉᓴᓕᒻᒧᑦ ᐅᑎᓕᕐᓗᑎᒃ ᐱᑕᓂᒥᑦ, ᔩᓱᓯ ᑳᓕᕐᐳᖅ.

¹³ ᓇᐹᕐᑐᒥᒃ ᐱᒋᓕᖕᓂᒃ ᐸᐅᕐᖓᓕᒃᓴᒥᒃ ᑕᑯᒐᒥ ᐅᖓᓯᒃᑐᒦᑎᓪᓗᒍ ᓱᓕ, ᐅᖃᐅᔭᖏᑦ ᐱᕈᕐᓯᒪᑦᓯᐊᓕᕐᑐᓂᒃ, ᐅᐸᒃᐹ ᐸᐅᕐᖓᓂᒃ ᐱᑕᖃᕐᒪᖔᑦ ᑕᑯᔭᕐᑐᕐᓗᒍ, ᐅᐸᒃᑲᒥᐅᒃ ᑕᑯᕚ, ᐅᖃᐅᔭᖃᑐᐃᓐᓇᕐᑐᖅ, ᐸᐅᕐᖓᖃᕐᕕᒃᓴᖓ ᓱᓕ ᓈᒻᒪᒃᓯᓯᒪᖏᒻᒪᑦ.

¹⁴ ᔩᓱᓯ ᓇᐹᕐᑐᒧᑦ ᐅᖃᕐᐳᖅ, “ᐃᓕᖕᓂᑦ ᐸᐅᕐᖓᓂᒃ ᓂᕆᕕᐅᓚᐅᕐᓯᒪᓂᐊᕈᓐᓃᕐᐳᑎᑦ.” ᐃᓕᓐᓂᐊᕐᑎᖏᑕ ᑐᓴᕐᐹᑦ ᑍᒫᒃ ᐅᖃᕐᑎᓪᓗᒍ.

ᔩᓱᓯᐅᑉ ᑐᒃᓯᐊᕐᕕᒡᔪᐊᒧᐊᕐᓂᖓ

¹⁵ ᔨᕉᓴᓕᒻᒧᓪᓕ ᑎᑭᓐᓇᒥᒃ, ᔩᓱᓯ ᑐᒃᓯᐊᕐᕕᒡᔪᐊᒧᐊᕐᐳᖅ ᑕᕝᕙᓂᓗ ᓂᐅᕕᕐᑐᑦ ᓂᐅᕐᕈᑎᖃᕐᑐᓪᓗ ᐊᓂᐅᕋᕐᑎᑉᐰᑦ, ᑮᓇᐅᔭᓂᒡᓗ ᑕᐅᕐᓰᔪᑦ ᓵᖏᑦ ᐅᕐᕈᑎᓪᓗᒋᑦ ᑑᕕᓂᒃ ᓂᐅᕐᕈᑎᓖᑦ ᐃᒃᓯᕙᐅᑕᖏᑦ ᐅᕐᕈᑎᒃᑭᕔᑦ.

¹⁶ ᓱᓇᑐᐃᓐᓇᒥᒃ ᐊᒡᔭᕐᓯᖁᔨᓐᖏᓚᖅ ᑐᒃᓯᐊᕐᕕᒃᔪᐊᒃᑯᑦ.

¹⁷ ᐃᓄᐃᑦ ᐊᔪᕆᕐᑐᕐᐰᑦ ᐅᖃᐅᑎᓪᓗᒋᑦ, “ᒎᑎᐅᑉ ᐅᖃᐅᓯᖏᓐᓂ ᑎᑎᕋᕐᓯᒪᖕᒪᑦ, ‘ᐃᒡᓗᖁᑎᒐ ᑍᔭᐅᔭᕆᐊᖃᕐᐳᖅ ᑐᒃᓯᐊᕆᐊᕐᑐᕐᕕᖕᒥᒃ ᐃᓅᖃᑎᒌᒡᔪᐊᓄᑦ ᑕᒤᓐᓄᑦ.’ ᐃᓕᑦᓯᓕ ᑎᒡᓕᒃᑎᓄᑦ ᐃᓂᒋᔭᐅᑎᓕᕐᐸᓯ!”

¹⁸ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ ᑕᒪᑐᒥᖓ ᑐᓴᕋᒥᒃ ᐱᑦᔪᑎᒃᓴᕐᓯᐅᓕᕐᐳᑦ ᑐᖁᑦᓯᔪᒪᓪᓗᑎᒃ; ᑭᓯᐊᓂᓕ ᑲᑉᐱᐊᒋᕚᑦ, ᐃᓄᒐᓴᒡᔪᐊᑦ ᐊᔪᕆᕐᑑᑎᒋᔭᖏᓐᓂᒃ ᑲᒪᓂᐊᖃᑦᑕᕐᒪᑕ.

¹⁹ ᐅᓐᓄᓕᕐᒪᓪᓕ ᑕᕝᕙᓐᖓᑦ ᐃᒡᓗᒐᓴᖕᓂᑦ ᐊᐅᓪᓚᕐᐳᑦ.

ᓇᐹᕐᑐᒥᒃ ᐱᒋᓕᖕᓂᒃ ᐸᐅᕐᖓᓕᖕᒥᒃ ᐃᓕᓐᓂᐊᕈᑎᖃᕐᓂᖅ

²⁰ ᖃᐅᑎᓪᓗᒍ ᐅᓪᓛᒃᑯᑦ ᓴᓂᖅᑯᓕᕋᒥᑦᔪᒃ ᓇᐹᕐᑐᖅ ᐱᒋᓕᖕᓂᒃ ᐸᐅᕐᖓᓕᒃᓴᖅ ᑕᑯᕚᑦ, ᐸᓂᒻᒪᕆᓕᕐᑐᖅ ᐊᒡᓛᑦ ᐊᒫᒥᓄᑦ.

²¹ ᐲᑦᑐᕉᓯ ᐃᖅᑲᐅᒪᒐᒥ ᖃᓄᐃᓕᓚᐅᕐᒪᖔᑦ ᔩᓱᓯ ᑖᑦᓱᒧᖓ ᓇᐹᕐᑐᒧᑦ, ᐅᖃᐅᑎᕚ, “ᕌᐰ, ᑕᑯᒋᑦ! ᓇᐹᕐᑐᖅ ᐱᒋᓕᖕᓂᒃ ᐸᐅᕐᖓᓕᒃᓴᖅ ᐱᕈᕐᕕᐅᓂᐊᕈᓐᓃᕐᓂᕋᓚᐅᕐᑍᑦ ᐸᓂᕐᓂᕐᐳᖅ.”

²² ᔩᓱᓯᐅᑉ ᑭᐅᕔᑦ, “ᒎᑎᒧᑦ ᐅᒃᐱᕆᑦᓯ.

²³ ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᖃᖅᑲᒧᑦ ᐆᒧᖓ ᐅᖃᕐᐸᑦ, ᑕᕝᕙᓐᖓᑦ ᖃᖓᑦᑕᕆᑦ ᑕᕆᐅᕐᒧᓪᓗ ᑲᑕᒃᓗᑎᒃ, ᐆᒻᒪᑎᒥᒍᑦ ᖁᓚᖏᓪᓗᓂ, ᐅᒃᐱᕐᓗᓂᓗ ᐅᖃᐅᓯᕆᔭᒥ ᑍᒤᓐᓂᐊᕐᓂᖓᓂᒃ, ᑕᕝᕙ ᑍᒤᓕᕐᓂᐊᕐᐳᖅ.

²⁴ ᑍᒤᒻᒪᑦ ᐅᖃᐅᑎᕙᑦᓯ, ᑐᒃᓯᐊᕈᑦᓯ ᓱᓇᑐᐃᓐᓇᕐᒥᒃ ᐱᔪᒪᔭᖃᕐᓗᓯ, ᐅᒃᐱᕆᑦᓯ ᐱᔪᒪᔭᓯ ᐱᒐᑦᓯᐅᒃ, ᑕᕝᕙ ᑐᓂᓯᕕᐅᓂᐊᕐᐳᓯ.

²⁵ ᓇᖏᕐᓗᓯᓕ ᑐᒃᓯᐊᕈᑦᓯ, ᐃᓱᒪᒋᔪᓐᓁᕐᕕᖃᕆᑦᓯ ᐃᓅᖃᑎᑦᓯ ᐊᑲᐅᒃᓴᖏᒃᔪᑎᒃᓴᖃᕈᑦᓯ; ᐊᑖᑕᑦᓯᓐᓄᑦᑕᐅᖅ ᕿᓚᖕᒦᑦᑐᒧᑦ ᐃᓱᒪᒋᔪᓐᓁᕐᕕᐅᖁᓪᓗᓯ ᐊᔪᕐᑐᓕᓂᑦᓯᓐᓂᑦ. [

²⁶ ᐃᓅᖃᑎᑦᓯᓐᓂᒃ ᐃᓱᒪᒋᔪᓐᓁᕐᕕᖃᓂᐊᖏᒃᑯᑦᓯ ᐊᑖᑕᑦᓯᑦᑕᐅᖅ ᕿᓚᖕᒦᑦᑑᑉ ᐃᓱᒪᒋᔪᓐᓁᕐᕕᒋᓂᐊᖏᓐᓂᕚᓯ ᐊᔪᕐᑐᓕᓂᓯᓂᑦ.]”

ᔩᓱᓯᐅᑉ ᐱᔪᓐᓇᕐᑎᑕᐅᓂᖓᓄᑦ ᐊᐱᖅᑯᑎ

²⁷ ᔨᕉᓴᓕᒻᒧᑦ ᐅᑎᒃᑲᓐᓂᕆᕗᑦ. ᑐᒃᓯᐊᕐᕕᒡᔪᐊᒃᑯᑦ ᐱᓱᓕᕐᑎᓪᓗᒍ, ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔩᑦ, ᐊᖓᔪᖅᑳᓪᓗ ᐅᐸᒃᐹᑦ.

²⁸ ᐊᐱᕆᓪᓗᒍ, “ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᑎᑦ ᑕᒪᒃᑯᓂᖓ ᐱᓇᓱᐊᕈᓐᓇᕐᐲᑦ? ᑭᐊᓗ ᑕᒪᑐᒥᖓ ᐱᔪᓐᓇᕐᓂᕐᒥᒃ ᑐᓂᓯᕕᒋᓯᒪᕚᑎᑦ?”

²⁹ ᔩᓱᓯᐅᑉ ᐅᖃᐅᑎᕔᑦ, “ᐊᐱᕆᔪᒪᒋᕗᖓ ᐃᓕᑦᓯᓐᓂᒃ ᐊᐱᕐᓲᑎᒋᔭᓐᓂᒃ; ᑭᐅᔪᓐᓇᕈᑦᓯᓐᖓ, ᑕᕝᕙ ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖓ ᑕᒪᒃᑯᓂᖓ ᐱᓇᓱᐊᖃᑦᑕᕐᒪᖔᕐᒪ ᐅᖃᐅᑎᓂᐊᕐᐸᑦᓯ.

³⁰ ᐅᖃᐅᑎᓚᐅᕐᓯᓐᖓ, ᔪᐊᓇᓯᐅᑉ ᐹᑉᑎᑦᔪᑎᖓ ᒎᑎᒥᑦ ᐱᕙ, ᐅᕝᕙᓗ ᐃᓄᖕᓂᑦ?”

³¹ ᑖᒃᑯᐊᓕ ᐃᒻᒥᖕᓄᑦ ᐅᖃᖃᑎᒌᓕᕐᐳᑦ, “ᐅᖃᕈᑦᑕ, ‘ᒎᑎᒥᑦ ᐱᕗᖅ,’ ᑕᕝᕙ ᐅᖃᐅᑎᓂᐊᕐᐹᑎᒍᑦ, ‘ᓱᖕᒪᓪᓕ ᔪᐊᓇᓯ ᐅᒃᐱᕆᓚᐅᖏᑉᐱᓯᐅᒃ?’

³² ᐅᖃᕈᑦᑕᓕ, ‘ᐃᓄᖕᓂᑦ ᐱᓂᕋᕐᓗᒍ—’” ᐃᓄᖕᓂᒃ ᓯᕘᕋᕗᑦ, ᐃᓄᓕᒫᑦ ᔪᐊᓇᓯᒥᒃ ᓇᓚᐅᑦᑍᔪᓪᓚᕆᐅᓱᕆᒃᓯᒪᑕ.

³³ ᑍᒤᒻᒪᑦ ᔩᓱᓯ ᑭᐅᕚᑦ, “ᓇᑭᑦ ᐱᖕᒪᖔᑦ ᖃᐅᔨᒪᓐᖏᓚᕗᑦ.” ᑕᕝᕙ ᔩᓱᓯᐅᑉ ᐅᖃᐅᑎᕔᑦ, “ᐅᕙᖓᑦᑕᐅᖅ ᐅᖃᐅᑎᓂᐊᖏᓐᓂᕙᑦᓯ, ᓇᑭᑦ ᐱᔪᓐᓇᕐᓂᖃᕐᑎᑕᐅᓪᓗᖓ ᐱᓇᓱᐊᖃᑦᑕᕐᒪᖔᕐᒪ.”