ᒤᑲᐅᑉ ᐊᒡᓚᖏᑦ 7 - ᐊᒡᓔᑦ ᐃᑦᔪᕐᖕᓁᑦᑐᑦ

ᐃᓴᕆᐊᓕᒥᐅᑉ ᐱᓂᐊᕐᓂᖏᑦ ᐱᐅᖏᑦᑐᑦ

¹ ᑲᑉᐱᐊᓐᓇᒦᒃ! ᐊᐅᔭᒥ ᑲᑎᕐᓱᐃᔪᑐᑦ ᐱᕈᕐᑐᓂᒃ ᑲᑎᕐᓱᐃᓴᕇᕐᑎᓪᓗᒋᑦ ᐊᒥᐊᒃᑯᖏᓐᓂᑦ ᑲᑎᕐᓱᐃᔭᕐᑐᕋᓗᐊᕋᒪ, ᐸᐅᕐᖓᓂᒃ ᕔᓂᒃᓴᓂᒃ ᑲᑎᓐᖓᔪᓂᒃ ᓂᕆᔭᒃᓴᓂᒃ ᐱᑕᖃᓐᖏᓚᖅ, ᐸᐅᕐᖓᓂᒡᓗ ᐱᒋᓕᖕᓂᒃ ᐱᕈᕋᑖᕐᓂᑯᓂᒃ ᑕᐅᑐᓐᖑᐊᕐᑕᓐᓂᒃ ᐱᑕᖃᖏᒻᒪᑦ.

² ᐅᒃᐱᕐᓇᑦᓯᐊᕐᑐᑦ ᐊᓯᐅᓯᒪᖕᒪᑕ ᓄᓇᕐᔪᐊᕐᒥᑦ, ᐃᓄᖕᓂᓗ ᐃᓱᐊᕐᑐᖃᕈᓐᓁᕐᐳᖅ; ᐃᓄᓕᒫᑦ ᐅᑕᖅᑭᐅᕐᐳᑦ ᑐᖁᑦᓯᔪᒪᓪᓗᑎᒃ; ᐃᓘᓐᓇᑎᒡᓗ ᖃᑕᓐᖑᑎᒥᖕᓂᒃ ᕿᓂᕐᐳᑦ ᓄᓗᐊᕐᑎᑦᓯᔪᒪᓪᓗᑎᒃ.

³ ᐱᓇᓱᐊᕐᐳᑦ ᐱᐅᖏᑦᑐᓂᒃ ᐊᒡᒐᒥᖕᓄᑦ; ᐊᐅᓚᑦᓯᔨᐅᔪᑦ ᑐᓐᓂᕐᓴᕐᑕᐅᔪᒪᑐᐃᓐᓇᕐᐳᑦ, ᐃᖅᑲᕐᑐᐃᔩᓪᓗ ᐱᓕᕆᖃᑦᑕᕐᐳᑦ ᐊᑭᓕᕐᑕᐅᓂᒃᑯᑦ ᐃᓅᑉ ᐱᔪᒪᔭᖓᓂᒃ, ᐱᔪᓐᓇᕐᓂᓖᑦ ᐱᔪᒪᔭᑎᒃ ᐊᖓᔪᖅᑲᐅᓯᕈᑎᒋᕔᑦ; ᑲᑐᑦᔨᓪᓗᑎᒡᓗ ᓯᓔᕐᕆᒃᓯᕗᑦ.

⁴ ᐱᐅᓂᕐᐹᕆᔭᕋᓗᐊᖏᑦ ᑲᑭᓪᓚᐅᑎᓕᒃᑎᑑᕐᐳᑦ; ᐅᒃᐱᕐᓇᕐᓂᕐᐹᖏᓪᓗ ᐅᕐᐱᖕᓂᑦ ᑲᑭᓪᓚᐅᑎᓕᖕᓂᑦ ᐱᐅᖏᓐᓂᕐᓴᐅᕗᑦ. ᐅᓪᓗᖅ ᓇᓪᓕᐅᑎᕗᖅ ᖃᐅᔨᓴᕐᑎᑦᓯ ᐅᖃᐅᓯᕆᓯᒪᔭᖏᑦ ᓱᒋᐊᕐᑕᐅᕕᒃᓴᓯᓗ ᐅᓪᓗᖅ ᑎᑭᓪᓗᓂ. ᒫᓐᓇ ᓇᓗᓕᐅᒪᓂᐊᓕᕐᐳᓯ.

⁵ ᑕᑎᖃᕐᑍᓕᒋᑦᓯ ᐱᖃᓐᓇᕆᔭᑦᓯᓐᓂᒃ, ᐅᒃᐱᕈᓱᒃᑍᓕᒋᑦᓯᓗ ᐃᓅᖃᑎᑦᓯᓐᓂᒃ. ᐊᒡᓛᑦ ᐅᖃᐅᓯᓯ ᐅᑦᔨᕐᑐᕐᓯᐅᒃ ᐃᓐᓇᖓᖃᑎᒋᕙᒃᑕᑦᓯᓐᓄᑦ.

⁶ ᐃᕐᓂᐅᑉ ᐊᑖᑕᓂ ᐅᐱᒋᓐᖏᓛ, ᐸᓂᒡᓗ ᐊᑭᕋᕐᑐᕐᐳᖅ ᐊᓈᓇᒥᓂᒃ, ᐅᑯᐊᕐᓗ ᓴᑭᒥᓄᑦ ᐊᑭᕋᕐᑐᕐᐳᖅ, ᐃᓅᑉ ᐊᑭᕋᕐᑐᕐᑎᒋᓂᕐᐹᕆᓂᐊᕐᐰᑦ ᐃᒡᓗᒥᐅᖃᑎᓂ.

⁷ ᐅᕙᖓᓕ ᐊᑕᓂᕐᒥᒃ ᓂᕆᐅᒃᐳᖓ; ᐅᑕᖅᑭᓪᓗᖓᓗ ᒎᑎᓐᓂᒃ ᐱᐅᓕᕐᓯᔨᓐᓂᒃ, ᒎᑎᒪᓗ ᑐᓴᕐᓂᐊᕐᐹᖓ.

ᐊᑕᓂᐅᑉ ᐱᐅᓕᕐᓯᓂᖓ

⁸ ᖁᕕᐊᓲᑎᒋᑦᑍᓕᓐᖓ ᐊᑭᕌᒃ! ᐹᓪᓚᒃᑲᓗᐊᕈᒪ ᒪᑭᑦᓱᒫᕐᐳᖓ, ᑖᕐᑐᒥ ᐃᒃᓯᕙᒐᓗᐊᕈᒪ, ᐊᑕᓂᖅ ᖃᐅᒪᓂᕆᔪᒫᕐᐸᕋ.

⁹ ᐊᑕᓂᕐᒧᑦ ᐱᐅᖏᑦᑐᓕᓚᐅᕋᒪ, ᕿᓄᐃᓵᕐᓗᖓ ᐊᑐᕈᒪᕙᕋ ᐊᑕᓂᐅᑉ ᓂᓐᖓᐅᓯᖓ, ᕿᓄᑦᔪᑎᒋᔭᓐᓂᒃ ᐋᖅᑭᒃᓯᓚᐅᖅᑳᕐᑎᓐᓇᒍ ᐃᓱᐊᕐᓯᑎᓪᓗᖓᓗ, ᖃᐅᒪᓂᕐᒧᐊᕈᑎᓂᐊᕐᐹᖓ ᖃᐅᔨᓗᒍᓗ ᐃᓱᐊᕐᓂᖓ.

¹⁰ ᐊᑭᕋᕋ ᑕᑯᔪᒫᕐᐳᖅ, ᑲᓐᖑᓱᖕᓂᕐᒧᓪᓗ ᐅᓕᒃᑕᐅᔪᒫᕐᐳᖅ ᐅᕙᓐᓄᑦ ᐅᖃᓚᐅᕐᑐᖅ, “ᓇᐅᒡᓕ ᐊᑕᓂᖅ ᒎᑏᑦ?” ᐃᔨᓐᓄᑦ ᑕᑯᔪᒫᕐᐸᕋ ᓵᓚᐅᔪᖅ ᑐᓪᓕᕌᕐᑕᐅᔪᕐᓗ ᒪᕐᕋᑎᑐᑦ ᐊᖅᑯᑎᒥ.

¹¹ ᐅᓪᓗᖅ ᑎᑭᑦᓱᒫᕐᐳᖅ ᐊᕙᓗᕐᔪᐊᓕᐅᕐᕕᒃᓴᓯ, ᐅᓪᓗᕐᓗ ᑎᑭᑦᓱᒫᕐᐳᖅ ᓄᓇᖁᑎᓯ ᐊᖏᒡᓕᒋᐊᕐᑕᐅᕕᒃᓴᖓ.

¹² ᐅᓪᓗᒥ ᑍᑲᓂ ᐃᓅᖃᑎᓯ ᐃᓕᑦᓯᓐᓄᑦ ᐅᑎᕈᒫᕐᐳᑦ, ᐊᓯᕆᐊᒥᑦ ᐃᒡᓗᒐᓴᖕᓂᓪᓗ ᓴᐴᓗᑕᓕᖕᓂᑦ, ᐊᒡᓛᑦ ᐄᑦᔨᑉᑎᒥᑦ ᐃᕗᕅᑎᒥᓪᓗ ᐃᒪᕕᐅᑉ ᑭᒡᓕᖓᓂᑦ ᐃᑎᕕᐊᓄᑦ ᖃᖅᑬᓪᓗ ᐊᑭᓕᕇᑦ ᐊᑯᓐᓂᖓᓂᑦ ᐱᔪᑦ.

¹³ ᓄᓇᓕ ᓱᓇᖃᔪᐃᑦᑑᓕᕈᒫᕐᐳᖅ ᓄᓇᖃᕐᑐᑦ ᑕᕝᕙᓂ ᐱᑦᔪᑎᒋᓗᒋᑦ, ᐱᓂᐊᕐᓂᖏᑕᓗ ᐱᕈᕐᑎᑕᖏᑦ ᐱᓪᓗᒋᑦ.

ᐊᑕᓂᐅᑉ ᓂᑲᒍᓱᖕᓂᖓ ᐃᓴᕆᐊᓕᒥᐅᓂᒃ

¹⁴ ᐃᓄᖁᑎᑎᑦ ᐰᕆᒃᑭᑦ ᐊᔭᐅᑉᐱᐊᕐᓄᑦ, ᓰᐱᖁᑎᑎᑦ ᓇᖕᒥᓂᕆᒋᒐᕕᒋᑦ ᑭᖑᕚᒃᓴᓯ, ᓄᓇᖃᕐᑐᑦ ᑭᓯᒥᐅᓗᑎᒃ ᓇᐹᕐᑐᓕᖕᓂ, ᐱᕈᕐᑐᖃᑦᓯᐊᕐᑐᒥᓗ. ᓂᕆᓕᕐᓕᑦ ᐹᓴᓂᒥ ᒋᓕᐊᑎᒥᓗ ᑍᑦᓱᒪᓂ ᐱᐅᓯᐅᕙᓚᐅᕐᑐᑎᑐᑦ.

¹⁵ ᑍᑦᓱᒪᓂ ᐅᓪᓗᓂ ᐊᐅᓪᓚᓚᐅᕋᑦᓯ ᐄᑦᔨᑉᑎᒥᑦ, ᑍᒫᒃᑕᐅᖅ ᑖᒃᑯᐊ ᑲᒪᓇᕐᑐᓂᒃ ᑕᑯᔪᒫᕐᐳᑦ.

¹⁶ ᐃᓅᖃᑎᒌᒡᔪᐊᑦ ᑕᑯᔪᒫᕐᐳᑦ ᑲᓐᖑᓲᑎᖃᓕᕐᓗᑎᒡᓗ ᐱᔪᓐᓇᕐᓂᕆᔭᕋᓗᐊᒥᖕᓂᒃ. ᖃᓂᑎᒃ ᐊᒡᒐᖕᒥᖕᓄᑦ ᒪᑐᔪᒫᕐᐰᑦ, ᑐᓵᔪᓐᓁᕐᓗᑎᒡᓗ.

¹⁷ ᒪᓂᖅᑲᒥᒡᓗ ᐊᓗᒃᑐᕈᒫᕐᐳᑦ ᖁᒡᓗᒋᐊᑎᑐᑦ; ᖁᐱᕐᕈᑎᑐᓪᓗ ᐹᕐᖑᕈᒫᕐᐳᑦ ᓄᓇᒦᑦᑐᑐᑦ. ᓯᑎᒥᖕᓂᑦ ᓴᔪᒡᓗᑎᑦ ᐊᓂᔪᒫᕐᐳᑦ, ᓯᕘᕋᓗᑎᒃ ᐊᑕᓂᕐᒥᒃ ᒎᑎᑦᑎᓐᓂᒃ, ᑲᑉᐱᐊᓱᒍᒫᕐᐳᑦ ᐃᓕᖕᓂᒃ.

¹⁸ ᑭᓇ ᐃᓕᒃᑐᑦ ᒎᑎᐅᕙ, ᐃᓱᒪᒋᔪᓐᓁᕐᓯᔪᓐᓇᕐᑐᖅ ᐱᐅᖏᑦᑐᓕᓂᕐᓂᒃ ᐊᔪᕐᑐᓕᓂᕐᓂᒡᓗ ᐊᒥᐊᒃᑰᔪᓄᑦ ᐃᓄᖁᑎᒥᓄᑦ ᑭᖑᕚᕆᔭᐅᔪᓄᑦ, ᓂᓐᖓᐅᒤᓐᓇᕈᓐᓇᖏᑦᑐᖅ ᖁᕕᐊᒋᔭᖃᕋᒥ ᓇᒡᓕᖕᓂᕐᒥᒃ ᓱᖁᓯᔪᐃᑦᑐᒥᒃ.

¹⁹ ᐃᓚᑦᓱᒍᓱᓕᕐᓂᐊᕐᒥᔪᖅ ᐅᕙᑦᑎᓐᓂᒃ, ᐱᐅᖏᑦᑐᓕᓂᕗᑦ ᓵᓚᒋᓂᐊᕐᐰᑦ. ᐊᔪᕐᑐᓕᓂᕗᑦ ᐃᒋᓐᓂᐊᕐᐸᑎᑦ ᐃᒪᕐᕕᐅᑉ ᐃᑎᓂᕐᐹᖓᓄᑦ.

²⁰ ᓱᓕᑦᓯᐊᕐᓃᑦ ᓴᖅᑭᑎᓐᓂᐊᕐᐸᑦ ᔧᑯᒧᑦ ᓇᒡᓕᒍᓱᖕᓃᓪᓗ ᓱᖁᓯᔪᐃᑦᑐᖅ ᐂᑉᕋᕼᐋᒻᒧᑦ, ᑍᑦᓱᒪᓂᐊᓗᒃ ᐊᖏᕈᑎᒋᓚᐅᕐᑍᑦ ᓯᕗᓕᕕᓂᑦᑎᓐᓄᑦ.