ᒤᑲᐅᑉ ᐊᒡᓚᖏᑦ 6 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓵᓐᖓᓯᑦᔪᑎᖓ ᐃᓴᕆᐊᓕᒥᐅᓂᒃ

¹ ᓈᓚᒋᑦᓯ ᐊᑕᓂᐅᑉ ᐅᖃᐅᓯᖏᓐᓂᒃ: “ᒪᑭᓕᕆᑦᓯ, ᓂᑲᓇᕐᓴᕐᓗᓯᓗ ᐱᑦᔪᑎᑦᓯᓐᓂᒃ ᖃᖅᑲᓄᑦ, ᐱᖑᐃᓪᓗ ᑐᓵᑎᓯᒋᑦ ᐅᖃᐅᓯᕆᔪᒪᔭᑦᓯᓐᓂᒃ.

² “ᑐᓴᕆᑦᓯ, ᐃᓕᑦᓯ ᖃᖅᑬᑦ, ᐊᑕᓂᐅᑉ ᓈᒻᒪᒃᓴᖏᑦᔪᑎᖓᓂᒃ, ᐃᓕᑦᓯᓗ ᓄᓇᕐᔪᐊᑉ ᑐᓐᖓᕕᖏᑦ ᓴᓐᖏᔪᑦ. ᐊᑕᓂᖅ ᓈᒻᒪᒃᓴᖏᑦᔪᑎᖃᕐᒪᑦ ᐃᓄᖁᑎᒥᓄᑦ, ᐊᑭᕋᕐᑐᕐᓂᐊᕐᓗᓂᓗ ᐃᓴᕆᐊᓕᒥᐅᓂᒃ.

³ “ᐃᓄᖁᑎᒃᑲ, ᐃᓕᑦᓯᓐᓄᑦ ᖃᓄᐃᓕᐅᕐᓯᒪᒐᒪ? ᖃᓄᕐᓗ ᐊᒃᓱᕈᕐᑎᑦᓯᓚᐅᕋᒪ ᐃᓕᑦᓯᓐᓂᒃ? ᑭᐅᓚᐅᕐᓯᓐᖓ.

⁴ ᐄᑦᔨᑉᑎᐅᑉ ᓄᓇᖓᓂᑦ ᐊᐅᓪᓚᕐᑎᓚᐅᕐᐸᑦᓯ, ᐅᑎᕐᑎᓪᓗᓯ ᓄᓇᒥᑦ ᑎᒍᔭᐅᓯᒪᕕᖕᒥᑦ. ᐃᓕᑦᓯᓐᓄᑦ ᑎᓕᓯᓚᐅᕐᐳᖓ ᒨᓯᓯᒥᒃ, ᐂᕉᓂᒥᒃ ᒥᕆᐊᒥᒥᒡᓗ.

⁵ ᐃᓄᖁᑎᒃᑲ, ᐃᖅᑲᐅᒪᒋᑦᓯ ᐊᖓᔪᖅᑳᕐᔪᐊᑉ ᐰᓚᑭᐅᑉ ᒧᐊᐱᒥᐅᑕᐅᑉ ᐱᓂᐊᕐᓂᕆᔪᒪᓚᐅᕐᑕᖏᓐᓂᒃ, ᐸᓛᒻᒥᐅᓪᓗ ᐱᐅᕆᐅᑉ ᐃᕐᓂᖓᑕ ᑭᐅᓂᕕᓂᖓᓂᒃ ᑖᑦᓱᒧᖓ, ᐊᑐᓚᐅᕐᑕᓯᓗ ᓯᑎᒻᒥᑦ ᒋᐅᓪᒐᐅᓪᒧᑦ. ᖃᐅᔨᖁᓪᓗᓯ ᐊᑕᓂᐅᑉ ᐃᓱᐊᕐᑐᓕᓂᖓᓂᒃ.”

ᐊᑕᓂᐅᑉ ᐱᓂᐊᕐᑕᐅᖁᔭᖓ

⁶ ᓱᓇᒦᒃ ᐊᑕᓂᕐᒧᐊᕈᑦᔨᔪᒃᓴᐅᕗᖓ? ᐹᒻᒪᒃᑎᕐᓗᖓᓗ ᒎᑎᐅᑉ ᖁᑦᓯᖕᓂᕐᐸᐅᔫᑉ ᓵᖓᓂ, ᓵᖓᓄᐊᕐᑐᒃᓴᐅᕗᖔ ᑐᓂᕐᕈᓯᕐᓗᖓ ᐃᑯᐊᓚᔪᒃᓴᓂᒃ? ᓄᕐᕋᕐᒥᒃ ᐊᕐᕌᒍᓕᖕᒥᒃ ᐊᑕᐅᓯᕐᒥᒃ.

⁷ ᐊᑕᓂᖅ ᖁᕕᐊᓱᖕᓂᐊᕐᐹ ᑐᓂᒍᒃᑯ ᑕᐅᓴᑏᑦ ᐅᖓᑖᓂ ᓰᐲᑦ ᐊᖑᓴᓪᓗᖏᓐᓂᒃ? 10,000ᓂᒡᓘᓐᓃᑦ ᐸᐅᕐᖎᑦ ᐅᕐᓱᖏᓐᓂᒃ? ᕿᑐᕐᖓᕐᑖᕆᐅᕈᑎᒐᓘᓐᓃᑦ ᑐᓂᕐᕈᑎᒋᒍᒃᑰ ᐊᔪᕐᓂᒃᑲ ᐱᓪᓗᒋᑦ, ᓇᖕᒥᓂᖅ ᑎᒥᓐᓂᑦ ᐱᔪᖅ ᑕᕐᓂᕐᒪ ᐊᔪᕐᑐᓕᓂᖏᓐᓄᑦ?

⁸ ᑕᑯᑎᓯᒪᕚᑎᑦ, ᐃᓅᔪᑎᑦ, ᓱᓇ ᐱᐅᖕᒪᖔᑦ; ᓱᓇᒥᒡᓗ ᐊᑕᓂᖅ ᐃᓕᖕᓂᒃ ᐱᖁᔨᖕᒪᖔᑦ ᓇᓛᒍᑦ ᐱᓇᓱᐊᖁᓪᓗᑎᑦ, ᓇᒡᓕᒍᓱᖁᓪᓗᑎᑦ ᐱᑦᓯᐊᕐᓗᑎᓪᓗ, ᐃᓅᖁᓪᓗᑎᓪᓗ ᒥᑭᒡᓕᑎᕐᓯᒪᓗᑎᑦ ᒎᑎᐅᑉ ᓵᖓᓂ.

⁹ ᐊᑕᓂᐅᑉ ᓂᐱᖓ ᑐᓴᕐᓴᐅᕗᖅ ᐃᒡᓗᒐᓴᖕᓄᑦ; ᓯᓚᑐᔪᑦ ᐊᑎᕐᓂᒃ ᓯᕘᕋᕗᑦ: “ᓈᓚᒃᓯᐅᒃ ᓱᒋᐊᕐᑕᐅᓂᖅ! ᐃᓕᑦᓯ ᑭᖑᕚᕇᖑᔪᓯ ᓄᓇᖃᕐᑐᓯ ᐃᒡᓗᖓᓴᖕᓂ!

¹⁰ ᐳᐃᒍᕆᐊᖃᕐᐳᖔ? ᑭᖑᕚᖑᖃᑎᒌᑦ ᐊᔪᕐᑐᓕᔪᑦ, ᓱᓕᖏᑦᑐᒃᑯᑦ ᐱᖁᑎᑖᕆᓯᒪᔭᖏᓐᓂᒃ ᐅᖁᒤᓐᓂᕐᓯᐅᕈᑎᖏᓪᓗ ᓱᓕᖏᑦᑐᑦ ᐱᓪᓗᒌᑦ?

¹¹ ᖃᓄᐃᒃᓴᕆᐊᖃᓐᖏᓚᖔ ᐃᓄᖕᒥᒃ ᓯᓔᕐᕆᒃᓯᓂᒃᑯᑦ ᐅᖁᒤᓐᓂᕐᓯᐅᑎᒃᑯᑦ ᐆᒃᑐᕋᐅᑎᖃᕐᐸᒃᑐᒥᒃ?

¹² ᐃᓄᐃᑦ ᐊᒃᓱᐃᑦᑐᖁᑎᓯ ᑲᑉᐱᐊᓱᒃᑎᑦᓯᓂᕐᒥᒃ ᑕᑕᒻᒪᑕ; ᓄᓇᖅᑲᑎᓯᓗ ᓴᒡᓗᑐᓪᓗᑎᒃ, ᐅᖃᖏᑦ ᐅᐃᕕᕆᒃᓯᓂᕐᓂᒃ ᑕᑕᑉᐳᑦ.

¹³ ᑍᒤᒻᒪᑦ, ᓱᒋᐊᓕᕐᐸᑦᓯ, ᐊᔪᓕᕐᑎᓪᓗᓯ ᐊᔪᕐᑐᓕᓂᓯ ᐱᓪᓗᒋᑦ.

¹⁴ ᓂᕆᒐᓗᐊᕈᑦᓯ ᐊᕿᐊᑦᑐᕈᓐᓁᓪᓕᓂᐊᕐᐳᓯ, ᑳᖏᓐᓇᓕᕐᓗᓯ ᐊᕿᐊᕈᓯ ᓂᒪᑐᐃᓐᓇᓕᕐᓗᓂ; ᐱᖁᑎᓪᓗ ᑲᑎᕐᓱᕐᑕᕋᓗᐊᓯ ᐊᓯᐅᔨᕙᓪᓕᐊᓗᒋᑦ, ᐱᐅᓕᐊᕋᓗᐊᓯᓗ ᐊᑭᕋᑦᓯᓐᓄᑦ ᐱᔭᐅᔪᒫᕐᐳᑦ.

¹⁵ ᑲᓐᖓᕐᓱᐃᒐᓗᐊᕈᑦᓯ, ᑲᑎᕐᓱᐃᓛᓐᖏᓚᓯ; ᓇᐹᕐᑐᐃᓪᓗ ᐅᕐᓱᒃᓴᖏᓐᓂᒃ ᑐᓪᓕᕋᓗᐊᕈᑦᓯ, ᐃᓕᑦᓯᓐᓄᑦ ᐊᑐᕈᓐᓇᓛᓐᖏᓚᑦ; ᐸᐅᕐᖓᓂᒃ ᕔᓂᒃᓴᓂᒃ ᓴᓇᖓᓗᐊᕈᑦᓯ, ᐃᒥᕐᕕᒋᔪᒫᓐᖏᓚᓯ.

¹⁶ ᐊᖓᔪᖅᑳᕐᔪᐊᑉ ᐅᒻᕆᐅᑉ ᒪᓕᖓᖏᓐᓂᒃ ᒪᓕᒃᑲᑦᓯ, ᐂᕼᐊᑉᓗ ᐱᓂᐊᕐᓂᖏᓐᓂᒃ ᐱᐅᖏᑦᑐᓂᒃ ᒪᓕᒃᓗᓯ; ᑍᒃᑯᐊ ᐱᐅᓯᖏᓐᓂᒃ ᐱᐅᓯᖃᕋᑦᓯ; ᑍᒤᒻᒪᑦ ᐃᓂᓕᐅᕈᒫᕐᐳᓯ ᓄᓇᖅᑲᑎᓯ ᒥᑕᐅᑎᒃᓴᐅᓕᕐᓗᑎᒃ, ᐃᓅᖃᑎᒌᒡᔪᐊᓄᓪᓗ ᒥᑕᐅᑎᒋᔭᐅᓂᓯ ᐊᑐᓕᕐᓗᒍ.”