ᒤᑲᐅᑉ ᐊᒡᓚᖏᑦ 4 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᑕᓂᐅᑉ ᓯᓚᕐᔪᐊᕐᒥᐅᓕᒫᓂᒃ ᐃᓂᓪᓚᖓᑦᓯᐊᕐᑐᒥᒃ ᐊᐅᓚᑦᓯᓂᖓ

¹ ᐅᓪᓗᐃᑦ ᑭᖑᓪᓕᖏᓐᓂ ᓇᓪᓕᐅᑎᔪᒫᕐᐳᖅ, ᖃᖅᑲᒥ ᐊᑕᓂᐅᑉ ᐃᒡᓗᖓ ᐋᖅᑭᒃᓯᒪᓕᕈᒫᕐᐳᖅ, ᐊᖏᓂᕐᐹᖑᓕᕈᒫᕐᐳᖅ ᐳᕐᑐᓂᕐᓴᐅᓗᓂ ᖃᖅᑲᓕᒫᓂᑦ; ᐃᓅᖃᑎᒋᒡᔪᐊᓪᓗ ᑕᕝᕗᓐᖓᐅᓕᕈᒫᕐᐳᑦ ᑰᒃᑐᑎᑐᑦ.

² ᐃᓅᖃᑎᒌᒡᔪᐊᑦ ᐂᒍᑎᒃ ᐅᖃᕈᒫᕐᐳᑦ, “ᕾᓗᓯ, ᐊᑕᓂᐅᑉ ᖃᖅᑲᖓᓄᐊᓚᐅᕐᑕ, ᔧᑰᑉ ᒎᑎᖓᑕ ᐃᒡᓗᖓᓄᑦ; ᐃᓕᓐᓂᐊᕐᑎᓐᓂᐊᕐᒪᑎᒍᑦ ᐱᓂᐊᕐᓂᕐᒥᓂᒃ, ᐃᓅᓯᖃᓕᕐᓗᑕᓗ ᐱᓂᐊᕐᑕᐅᖁᔭᖓᓂᒃ.” ᓮᐅᓂᒥᑦ ᐱᖁᔧᑦ ᐱᒋᐊᕈᒫᕐᒪᑕ, ᐊᑕᓂᐅᓪᓗ ᐅᖃᐅᓯᖓ ᐱᒋᐊᕐᓗᓂ ᔨᕉᓴᓕᒥᑦ.

³ ᐃᖅᑲᕐᑐᐃᔨᐅᔪᒫᕐᐳᖅ ᐃᓅᖃᑎᒌᒡᔪᐊᑦ ᐊᑯᕐᖓᓐᓂ, ᐃᓂᕐᑎᕈᒫᕐᐰᓪᓗ ᓲᖑᔪᐃᑦ ᐃᓅᖃᑎᒌᒡᔪᐊᑦ ᐅᖓᓯᒃᑐᒦᑦᑐᑦ; ᓴᕕᒡᔪᐊᒥᖕᓂᒡᓗ ᓄᓇᒥᒃ ᒪᒃᐱᕐᑎᕆᑦᔪᑎᓕᐅᕈᒫᕐᐳᑦ, ᖃᓗᒋᐊᒥᖕᓂᒡᓗ ᓇᐹᕐᑑᑉ ᐊᕙᓚᖓᔪᖏᓐᓄᑦ ᓇᑲᑎᕆᑦᔪᑎᓕᐅᕐᓗᑎᒃ, ᐃᓅᖃᑎᒌᒡᔪᐊᓪᓗ ᓴᕕᒡᔪᐊᒧᑦ ᐅᓇᑕᐅᑎᔪᓐᓁᕈᒫᕐᐳᑦ, ᐅᓇᑕᕐᓂᕐᒧᓪᓗ ᐃᓕᓐᓂᐊᕈᓐᓁᕐᓗᑎᒃ.

⁴ ᑭᓇᒃᑯᓕᒫᑦ ᐃᓱᒫᓗᒃᑐᖃᖏᓪᓗᑎᒃ ᓇᖕᒥᓂᖅ ᕔᓂᖁᑎᒥ ᓇᐹᕐᑐᐃᓪᓗ ᐱᒋᓖᑦ ᐊᑖᓂ ᐃᒃᓯᕙᔪᒫᕐᐳᑦ ᑲᑉᐱᐊᓵᕐᑕᐅᔪᓐᓃᕐᓗᑎᒡᓗ. ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ.

⁵ ᐃᓅᖃᑎᒌᒡᔪᐊᑦ ᒎᑎᒥᖕᓄᑦ ᐃᓅᒐᓗᐊᕐᐸᑕ, ᐅᕙᒍᓪᓕ ᐃᓅᓂᐊᕐᐳᒍᑦ ᐊᑕᓂᐅᑉ ᒎᑎᑦᑕ ᐊᑎᖓᓂ ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ.

ᐃᓴᕆᐊᓕᒥᐅᑦ ᐅᑎᕈᒫᕐᓂᖏᑦ ᑎᒍᔭᐅᓯᒪᕕᖕᒥᓂᑦ

⁶ ᐊᑕᓂᖅ ᐅᖃᕐᐳᖅ, “ᐅᓪᓗᒥ ᑍᑲᓂ ᑐᓯᐊᑦᑐᑦ ᑲᑎᒪᑎᑦᓱᒫᕐᐸᒃᑲ ᐊᐅᓪᓚᕈᑦᔭᐅᓯᒪᔪᑦ ᐋᓐᓂᐊᑎᓚᐅᕐᑕᒃᑲᓗ ᑲᑎᕐᓱᕐᓗᒋᑦ.

⁷ ᑐᓯᐊᑦᑐᑦ ᐊᒥᐊᑰᑎᑦᓱᒫᕐᐸᒃᑲ, ᐊᐅᓪᓚᕈᑦᔭᐅᓯᒪᔪᓪᓗ ᓲᖑᓯᑎᑦᓱᒫᕐᐸᒃᑲ ᐃᓅᖃᑎᒌᒡᔪᐊᕐᖑᕐᑎᓪᓗᒋᑦ; ᐊᑕᓂᖅ ᐊᐅᓚᑦᓯᔪᒫᕐᒪᑦ ᑖᒃᑯᓂᖓ ᓮᐅᓂᐅᑉ ᖃᖅᑲᖓᓂᑦ ᒫᓐᓇᒥᑦ ᐃᓱᖃᖏᑦᑐᒧᓪᓗ.

⁸ “ᐃᕝᕕᓪᓕ, ᓰᐱᓂᒃ ᖃᐅᔨᓴᕐᕕᖕᒦᑦᑐᑎᑦ, ᓮᐅᓂᐅᑉ ᐸᓂᖓᓄᑦ, ᕿᒫᕕᒃᓴᕆᔭᐅᔪᑎᑦ ᐊᖓᔪᖅᑳᕐᔪᐊᖑᓂᖅ ᐱᓯᒪᓚᐅᕐᑍᑦ ᐃᓕᖕᓄᑦ ᐅᑎᕈᒫᕐᐳᖅ; ᐊᖓᔪᖅᑳᕐᔪᐊᖃᕐᓂᖅ ᑎᑭᑦᓱᒫᕐᐳᖅ ᔨᕉᓴᓕᐅᑉ ᐸᓂᖓᓄᑦ.”

⁹ ᓱᖕᒪᑦ ᕿᐊᕖᑦ ᓂᐱᖃᕐᓗᑏᑦ? ᐊᖓᔪᖅᑳᕐᔪᐊᖃᖏᓐᓂᑦᓯᓐᓅᑦ? ᐃᓱᒪᒃᓴᕐᓯᐅᕐᑎᓰ ᐊᓯᐅᓯᒪᖕᒪᑕ? ᐋᓐᓂᐊᓕᕐᐳᓯ ᐊᕐᓇᐅᑉ ᐃᕐᓂᓱᒃᑑᑉ ᐋᓐᓂᐊᓂᖓᑐᑦ.

¹⁰ ᓮᐅᓂᐅᑉ ᐸᓂᖓ ᐋᓐᓂᐊᕆᑦᓯ ᐋᓐᓂᐊᓂᑦᓯᓐᓄᑦ ᐊᕐᓇᑐᑦ ᐃᕐᓂᓱᒃᑐᑐᑦ ᑍᒤᓐᓂᐊᕐᐳᓯ. ᒫᓐᓇ ᐊᐅᓪᓚᕆᐊᖃᓕᕋᑦᓯ ᐃᒡᓗᒐᓴᖕᓂᑦ, ᐃᓂᖃᓕᕐᓗᓯᓗ ᓇᑎᕐᓇᓂ, ᐹᐱᓘᓂᒧᐊᕈᒫᕐᐳᓯᓗ, ᑍᑲᓂ ᐃᑲᔪᕐᑕᐅᔪᒫᕐᐳᓯ; ᑍᑲᓂᓗ ᐊᑕᓂᐅᑉ ᐱᐅᓕᔪᒫᕐᐹᓯ ᐊᑭᕋᑦᓯ ᐊᒡᒐᖏᓐᓂᑦ.

¹¹ ᒫᓐᓇᓕ ᐃᓅᖃᑎᒌᒡᔪᐊᑦ ᐅᓄᕐᑐᑦ ᑲᑎᕗᑦ ᐃᓕᑦᓯᓐᓂᒃ ᐊᑭᕋᕐᑐᕐᓗᑎᒃ, ᐃᒫᒡᓗ ᐅᖃᕐᓗᑎᒃ, “ᓮᐅᓂ ᐊᓯᕈᕐᑕᐅᔪᒃᓴᐅᕗᖅ! ᑕᑯᓐᓇᕐᑎᓪᓗᑕ!”

¹² ᖃᐅᔨᒪᓐᖏᓚᓪᓕ ᐊᑕᓂᐅᑉ ᐃᓱᒪᖓᓂᒃ, ᐱᓇᓱᐊᕈᒪᔭᖓᓗ ᑐᑭᓯᔭᐅᓯᒪᖏᒻᒪᑦ; ᑲᑎᕐᓱᕈᒫᕐᐰᑦ ᓂᐊᖂᔭᒃᓮᑦ ᑲᑎᕐᓱᕐᑕᐅᕙᖕᓂᖏᑎᑐᑦ ᐃᕖᔭᕐᑕᐅᕕᖕᓂ ᐊᓇᐅᓕᕐᑕᐅᓪᓗᑎᒃ.

¹³ “ᓮᐅᓂᐅᑉ ᐃᓄᖏᑦ ᐊᑭᕋᓯ ᐊᓇᐅᓕᕆᐊᕐᑐᓕᕐᓯᒋᒃ! ᐱᔪᓐᓇᕐᓯᑎᓐᓂᐊᕐᐸᑦᓯ ᓲᖑᓯᑎᓪᓗᓯ ᐃᒻᒧᒃᓯᐅᒊᑦ ᐸᖕᓂᖏᑎᑐᑦ ᓴᕕᕋᔭᖕᓂᒃ ᓇᒡᔪᖃᕐᓗᑎ ᑯᑭᖃᕐᓗᑎᒡᓗ ᑲᓐᓄᔭᓂᒃ, ᐊᓯᕈᐃᔪᒫᕐᐳᓯ ᐃᓅᖃᑎᒌᒡᔪᐊᓂᒃ ᐅᓄᕐᑐᓂᒃ, ᐱᖁᑎᑖᕕᓂᖏᓪᓗ ᐅᓇᑕᕐᓂᒃᑯᑦ ᐅᑎᕐᑎᑕᐅᓂᐊᕐᐳᑦ ᐃᑦᔪᕐᓁᑎᑕᐅᓗᑎᒃ ᐊᑕᓂᐅᔪᒧᑦ ᓯᓚᕐᔪᐊᓕᒫᒧᑦ.”