ᒤᑲᐅᑉ ᐊᒡᓚᖏᑦ 3 - ᐊᒡᓔᑦ ᐃᑦᔪᕐᖕᓁᑦᑐᑦ

ᒤᑲᐅᑉ ᓇᕐᕈᓇᕐᓯᑎᑦᓯᓂᖓ ᐃᓴᕆᐊᓕᒥᐅᑉ ᓯᕗᓕᕐᑎᖏᓐᓂᒃ

¹ ᐅᖃᕐᐳᖓ, “ᑐᓴᓚᐅᕆᑦᓯ, ᐃᓕᑦᓯ ᓯᕗᓕᕐᑎᐅᔪᓯ ᔧᑯᒃᑯᓐᓂ, ᐃᓕᑦᓯᓗ ᐊᐅᓚᑦᓯᔨᐅᔪᓯ ᐃᓴᕆᐊᓕᒥᐅᓄᑦ: ᖃᐅᔨᒪᔪᒃᓴᐅᓐᖏᓚᓰ ᐃᖅᑲᕐᑐᐃᑦᓯᐊᕐᓂᕐᒥᒃ?

² ᐃᓕᑦᓯ ᐱᐅᔪᒥᒃ ᓇᕐᕈᔪᓯ ᐱᐅᒃᓴᕐᓗᓯᓗ ᐱᐅᖏᑦᑐᒥᒃ; ᐃᓕᑦᓯ ᐃᓄᖁᑎᒪ ᐅᕕᓂᖏᓐᓂᒃ ᐊᓕᒃᑐᐃᔪᓯ, ᓴᐅᓂᖏᑕ ᐅᕕᓂᖏᑦ ᐲᔭᕋᑦᓯᒋᒃ.

³ ᐃᓄᖁᑎᒪ ᐅᕕᓂᖏᓐᓂᒃ ᓂᕆᕙᒃᑐᓯ ᐊᒦᔭᕐᓗᒋᑦ, ᐊᕕᒃᑐᐃᕙᒃᑐᓯᓗ ᓴᐅᓂᖏᑦ ᐊᒡᒍᕐᓗᒋᑦ ᐅᒃᑯᓯᖕᒧᑦ ᓂᕿᒥᒃ ᐆᒃᓕᔪᑎᑐᑦ.

⁴ ᒪᑐᒪ ᑭᖑᕐᖓᒍᑦ ᓯᕗᓕᕐᑏᑦ, ᑐᒃᓯᐊᕈᒫᕐᐳᑦ ᐊᑕᓂᕐᒧᑦ, ᑭᓯᐊᓂᓕ ᑐᓴᕐᓂᐊᓐᖏᓔᑦ; ᑍᑲᓂ ᑮᓇᓂ ᐃᔨᕈᒫᕐᐹ ᑖᒃᑯᓇᓐᖓᑦ, ᐱᐅᖏᑦᑐᐊᓗᖕᓂᒃ ᐱᓂᐊᓚᐅᕐᓂᖏᑦ ᐱᓪᓗᒋᑦ.

⁵ “ᑍᒤᒻᒪᑦ ᐊᑕᓂᖅ ᐅᖃᕐᐳᖅ, ᐃᓄᖁᑎᒃᑲ ᑕᒻᒪᕐᑎᑕᐅᕗᑦ ᓇᓚᐅᑦᑍᓂᕐᓗᒃᑐᓄᑦ, ᓮᓕᑦᓯᐊᕐᓂᕐᒥᒃ ᐊᖏᕈᑎᖃᕐᐸᒃᐳᑦ ᓂᕆᑎᑦᓯᔨᒥᖕᓂᒡᓗ, ᓂᕿᒃᓴᖃᕐᑎᑦᓯᖏᑦᑐᓄᓪᓗ ᓯᕘᕋᓵᕆᕙᒃᑐᑦ ᐅᓇᑕᕆᐊᕐᑐᕐᓂᐊᕐᓂᕋᕐᓗᒋᑦ.

⁶ ‘ᑍᒤᒻᒪᑦ ᐅᓐᓄᐊᕐᓯᐅᕐᑐᑐᑦ ᐱᔪᒫᕐᐳᑦ ᑕᑯᑎᑕᐅᓃᑦ ᐱᓪᓗᒋᑦ ᓇᓚᐅᑦᓯᓇᓱᐊᕐᐸᒃᑐᓪᓗ ᐅᓐᓄᐊᕐᓯᐅᕐᑐᑐᑦ ᑍᒤᑦᓱᒫᕐᐳᑦ, ᐅᓪᓗᑐᑦ ᑖᕐᓯᔪᑐᑦ ᑍᒤᑦᓱᒫᕐᒪᑦ.’

⁷ ᓇᓚᐅᑦᑍᕙᒃᑐᑦ ᑲᓐᖑᓱᒃᑎᑕᐅᔪᒫᕐᐳᑦ, ᓯᕗᓂᒃᓴᓕᕆᕙᒃᑐᓪᓗ ᓇᓗᓕᕐᑎᑕᐅᓗᑎᒃ ᑮᓇᕐᒥᓂᒃ ᐅᓕᒃᓯᔪᒫᕐᐳᑦ, ᒎᑎᐅᑉ ᑭᐅᔪᓐᓁᓪᓕᔪᒫᕐᒪᒋᑦ.

⁸ “ᐅᕙᖓᓕ ᑕᑕᑉᐳᖓ ᐱᔪᓐᓇᕐᓂᕐᒥᒃ ᐊᑕᓂᐅᑉ ᐊᓂᕐᓂᖓᒍᑦ, ᐃᖅᑲᕐᑐᐃᑦᓯᐊᕐᓂᕐᒥᒃ ᐊᔪᖏᓐᓂᕐᒥᒡᓗ, ᐅᖃᐅᓯᕆᓂᐊᕐᐸᒃᑲᓗ ᔧᑰᑉ ᑭᖑᕚᖏᑕ ᐱᐅᖏᑦᑐᓕᓂᖏᑦ ᐃᓴᕆᐊᓕᒥᐅᓪᓗ ᐊᔪᕐᑐᓕᓂᖏᑦ.

⁹ ᒫᓐᓇ ᒪᑐᒥᖓ ᑐᓴᓕᕆᑦᓯ, ᐃᓕᑦᓯ ᓯᕗᓕᕐᑎᐅᔪᓯ ᔧᑰᑉ ᑭᖑᕚᖏᓐᓄᑦ ᐃᓴᕆᐊᓕᒥᐅᓄᓪᓗ ᐊᐅᓚᑦᓯᔨᐅᔪᓯ, ᓇᕐᕈᔪᓯ ᐃᖅᑲᕐᑐᐃᑦᓯᐊᕐᓂᕐᒥᒃ ᓱᓕᔪᒥᒡᓗ ᑕᒻᒪᕐᓂᐅᓂᕅᓕᕐᓗᓯ.

¹⁰ ᓴᓇᓚᐅᕐᑐᓯ ᓮᐅᓂᒥᒃ ᐊᐅᖕᒥᒃ ᐊᑭᖃᕐᓗᒍ, ᔨᕉᓴᓕᒥᒡᓗ ᓴᓇᓚᐅᕐᑐᓯ ᐱᐅᖏᑦᑐᓕᓂᒃᑯᑦ.

¹¹ ᓯᕗᓕᕐᑎᐅᔪᑦ ᐃᖅᑲᕐᑐᐃᖕᒪᑕ ᐊᑭᓕᕐᑕᐅᔪᒪᓂᒃᑯᑦ ᑭᓯᐊᓂ, ᑐᓂᕐᕈᓯᕐᑎᑦᓯᔩᓪᓗ ᐱᖁᔭᓂᒃ ᐃᓕᓮᕙᖕᒪᑕ ᐊᑭᓕᕐᑕᐅᓪᓗᑎᒃ ᑭᓯᐊᓂ, ᓇᓚᐅᑦᑍᔩᓪᓗ ᓇᓚᐅᑦᑍᖕᒪᑕ ᑮᓇᐅᔭᒧᑦ ᑭᓯᐊᓂ, ᐃᓘᓐᓇᑎᒃ ᐊᑕᓂᕐᒧᑦ ᐃᓚᒋᔭᐅᓂᕋᕐᒪᑕ ᐅᖃᕐᐸᖕᒪᑕᓗ, ‘ᐊᑕᓂᐅᑉ ᐃᓚᒋᕚᑎᒍᑦ, ᑲᑉᐱᐊᓇᕐᑐᒧᑦ ᑎᑭᑕᐅᓂᐊᓐᖏᓚᒍᑦ.’

¹² ᑍᒤᒻᒪ ᐃᓕᑦᓯ ᐱᓪᓗᓯ ᓮᐅᓂᐅᑉ ᓄᓇᖓ ᒧᒥᒃᑎᑕᐅᔪᒫᕐᐳᖅ ᐱᕈᕐᓰᕕᒃᑎᑐᑦ, ᔨᕉᓴᓕᒻ ᓱᕋᒃᑎᕐᓯᒪᓕᕈᒫᕐᐳᖅ, ᑐᒃᓯᐊᕐᕕᒡᔪᐊᓪᓗ ᐃᓂᖓ, ᐱᖑᑐᐃᓐᓇᐅᓕᕐᓗᓂ ᓇᐹᕐᑐᓄᑦ ᐱᕈᕐᕕᑐᐃᓐᓇᐅᓕᕐᓗᓂ.”